Ang Katawhan Nagkinahanglan sa Kahibalo sa Diyos

“Ikaw makasabot sa pagkahadlok kang Jehova, ug makaplagan mo ang mismong kahibalo sa Diyos.”​—PROVERBIO 2:5.

 1. Nganong ikaingon nga ang kasingkasing sa tawo maoy usa ka obra maestra sa enhinyeriya sa Diyos?

DUOLAN sa 5,600,000,000 ka kasingkasing sa tawo ang nagapitik sa yuta karon mismo. Matag adlaw, ang imong kaugalingong kasingkasing nagapitik sa 100,000 ka beses ug nagabombag katumbas sa 7,600 ka litrong dugo sa 100,000-ka-kilometros nga sistema sa kaugatan sa imong lawas. Walay laing kaunoran ang kuging nagtrabaho kay sa niining obra maestra sa enhinyeriya sa Diyos.

 2. Unsaon nimo paghubit ang mahulagwayong kasingkasing?

² Adunay 5,600,000,000 usab ka mahulagwayong mga kasingkasing ang nagatrabaho sa yuta. Diha sa mahulagwayong kasingkasing nagapuyo ang atong mga emosyon, ang atong mga motibasyon, ang atong mga tinguha. Kini mao ang sentro sa atong hunahuna, atong pagsabot, atong kabubut-on. Ang mahulagwayong kasingkasing mahimong mapahitas-on o mapainubsanon, masulob-on o malipayon, nangitngitan o nadan-agan.​—Nehemias 2:2; Proverbio 16:5; Mateo 11:29; Buhat 14:17; 2 Corinto 4:6; Efeso 1:16-18.

3, 4. Sa unsang paagi ang mga kasingkasing ginaabot sa maayong balita?

³ Si Jehova nga Diyos makabasa sa kasingkasing sa tawo. Nag-ingon ang Proverbio 17:3: “Ang kolon tunawanan alang sa salapi ug ang hasohasan alang sa bulawan, apan si Jehova mao ang nagasusi sa mga kasingkasing.” Apan, imbes basahon lamang ang matag usa ka kasingkasing ug magpakanaog ug paghukom, gigamit ni Jehova ang iyang mga Saksi sa pag-abot sa mga kasingkasing sa tawo uban sa maayong balita. Kini nahiuyon sa mga pulong ni apostol Pablo: “‘Ang tanang nanagtawag sa ngalan ni Jehova mamaluwas.’ Apan, unsaon nila pagtawag kaniya kang kinsa wala sila magbutang ug pagtuo? Unsaon, sa baylo, pagbutang nila ug pagtuo kaniyang kinsa wala nila madunggi? Unsaon, sa baylo, nila pagkadungog kon walay magwali? Unsaon, sa baylo, nila pagwali gawas kon sila gipadala? Maingon gayod sa nahisulat: ‘Pagkatahom sa mga tiil niadtong mga nagapahayag sa maayong balita sa maayong mga butang!’”​—Roma 10:13-15.

⁴ Nakahatag ug kalipay ni Jehova ang pagpadala sa iyang mga Saksi ngadto sa mga kinatumyan sa yuta aron sa “pagwali sa maayong balita sa maayong mga butang” ug sa pagpangita niadtong may masanongong mga kasingkasing. Kita karon may gidaghanon nga kapin sa 5,000,000​—mga 1,200 ka tawo sa yuta ang katumbas sa matag 1 ka Saksi. Ang pag-abot sa binilyon sa yuta sa maayong balita dili masayon. Apan ang Diyos mao ang nagdumala niining buluhatona pinaagi ni Jesu-Kristo ug nagdani sa mga matinud-anon ug kasingkasing. Busa, ang tagna nga narekord sa Isaias 60:22 napamatud-ang tinuod: “Ang usa nga diyutay mahimo nga usa ka libo, ug ang usa nga gamay mahimo nga usa ka kusganon nga nasod. Ako mismo, si Jehova, magapadali niini sa iyang panahon.”

 5. Unsa ang kahibalo, ug unsa ang ikaingon bahin sa kaalam sa kalibotan?

⁵ Mao na kanang panahona karon, ug usa ka butang ang tin-aw​—ang binilyon sa yuta nagkinahanglag kahibalo. Kasagaran, ang kahibalo maoy pagkasinati sa mga kamatuoran nga makuha pinaagi sa kasinatian, obserbasyon, o pagtuon. Ang kalibotan nakabaton ug daghang kahibalo. Adunay mga kauswagan sa mga natad sama sa transportasyon, pag-atiman sa panglawas, ug komunikasyon. Apan kalibotanong kahibalo ba gayod ang gikinahanglan sa katawhan? Dili gayod! Ang gubat, paglupig, sakit, ug kamatayon nagpadayon sa paghampak sa katawhan. Ang kaalam sa kalibotan napamatud-ang sama sa mga balas nga ginapalid sa makusog nga mga hangin sa disyerto.

 6. Bahin sa dugo, sa unsang paagi ikatandi ang kahibalo sa Diyos sa kalibotanon nga kaalam?

⁶ Sa pag-ilustrar: Sa miaging duha ka siglo, batasan niadto ang pagpaagas sa dugo ingong paagi kuno sa pagtambal. Si George Washington, ang unang presidente sa Tinipong Bansa, daghang higayon nga gipaagasag dugo sa kataposang mga takna sa iyang kinabuhi. Sa usa ka punto siya miingon: “Pasagdi ako nga mamatay sa hilom; dili na ako magdugay.” Husto siya, kay siya namatay niana mismong adlawa​—Disyembre 14, 1799. Imbes paagasag dugo, gihatagan ug pasiugda karon ang pag-abunog dugo diha sulod sa lawas sa tawo. Kining duha ka paagi puno sa makamatay nga mga problema. Apan, niining tanang panahon, ang Pulong sa Diyos nag-ingon: “Padayong magaayad . . . gikan sa dugo.” (Buhat 15:29) Ang kahibalo sa Diyos husto kanunay, kasaligan, ug sibo sa panahon.

 7. Sa unsang paagi ikatandi ang tukmang Kasulatanhong kahibalo sa kalibotanon nga kaalam kon bahin sa pagmatuto ug bata?

⁷ Palandonga ang laing panig-ingnan sa dili-kasaligang kalibotanong kaalam. Sa daghang tuig gipaluyohan sa mga sikologo ang matinugoton nga pagmatuto sa bata, apan ang usa sa mga tigpaluyo niini sa ulahi miadmiter nga sayop kini. Ang German Philological Association kas-a miingon nga ang pagkamatinugoton “sa labing menos sa dili direkta maoy responsable sa mga problema nato karon sa mga batan-on.” Ang kalibotanon nga kaalam nagbag-obag-o nga daw ginapalidpalid sa hangin, apan ang tukmang kahibalo sa Kasulatan dili matarog. Ang Bibliya naghatag ug timbang nga tambag bahin sa pagmatuto ug bata. “Pitola ang imong anak ug siya maghatag kanimo ug pahulay ug maghatag ug dako nga kalipay sa imong kalag,” nag-ingon ang Proverbio 29:17. Kini nga disiplina angay ipahamtang nga may gugma, kay si Pablo nagsulat: “Mga amahan, ayawg palagota ang inyong mga anak, kundili padayong matutoa sila diha sa disiplina ug mapasiboong pagdumala-sa-kaisipan ni Jehova.”​—Efeso 6:4.

“Ang Mismong “Kahibalo sa Diyos”

8, 9. Unsaon nimo pagpatin-aw ang giingon sa Proverbio 2:1-6 bahin sa kahibalo nga gikinahanglan gayod sa katawhan?

⁸ Bisan tuod ug edukadong tawo si Pablo, siya miingon: “Kon may si bisan kinsa taliwala kaninyo nagahunahuna nga siya maalamon niining sistemaha sa mga butang, magpakahimo siyang buang, aron siya mahimong maalamon. Kay ang kaalam niining kalibotana maoy kabuangan para sa Diyos.” (1 Corinto 3:18, 19) Ang Diyos lamang ang makahatag sa kahibalo nga gikinahanglan gayod sa katawhan. Mahitungod niini, ang Proverbio 2:1-6 nag-ingon: “Anak ko, kon dawaton mo ang akong mga pulong ug ampingan mo ang akong kaugalingong mga sugo diha kanimo, aron patalinghogan mo ang kaalam pinaagi sa imong dalunggan, aron ikiling mo ang imong kasingkasing sa pagsabot; dugang pa, kon ikaw magatawag alang sa salabotan mismo ug ikaw mosinggit alang sa pagkamasinaboton mismo, kon magpadayon ka sa pagpangita niana sama sa salapi, ug magpadayon ka sa pagpangita niana sama sa tinipigan nga mga bahandi, unya imong masabtan ang pagkahadlok kang Jehova, ug makaplagan mo ang mismong kahibalo sa Diyos. Kay si Jehova mismo mohatag ug kaalam; gikan sa iyang baba magagula ang kahibalo ug pagkamasinaboton.”

⁹ Ang mga tawo nga natukmod sa maayong mga kasingkasing magpatalinghog sa kaalam pinaagi sa paggamit sa hustong paagi sa hinatag sa Diyos nga kahibalo. Ilang ikiling ang ilang mga kasingkasing sa pagsabot, nga timbangtimbangog maayo ang mga kamatuoran nga ilang nakat-onan. Sa ingon, nanawag sila sa pagsabot, o sa katakos sa pagkakita kon sa unsang paagi ang mga bahin sa usa ka ulohan nalangkit sa usag usa. Ang mga tawong matarong ug kasingkasing magtrabaho nga daw sila nangalot ug salapi ug nangitag mga bahandi nga natago. Apan unsang dakong bahandi ang makaplagan sa mga tawo nga may masanongong mga kasingkasing? Kini mao “ang mismong kahibalo sa Diyos.” Unsa kana? Sa yanong pagkasulti, kini mao ang kahibalo nga makita diha sa Pulong sa Diyos, ang Bibliya.

10. Unsa ang kinahanglan natong himoon aron matagamtam ang maayong espirituwal nga panglawas?

¹⁰ Ang kahibalo sa Diyos makataronganon, malig-on, nagahatag ug kinabuhi. Makapahimsog kini sa espirituwal. Giawhag ni Pablo si Timoteo: “Padayong hupti ang sumbanan sa makapahimsog nga mga pulong nga imong nadungog kanako uban ang pagtuo ug gugma nga may kalabotan kang Kristo Jesus.” (2 Timoteo 1:13) Ang usa ka pinulongan adunay sumbanan sa mga pulong. Sa susama, ang “putli nga pinulongan” sa Kasulatanhong kamatuoran adunay “sumbanan sa makapahimsog nga mga pulong,” nga bug-os nga gipasukad sa tema sa Bibliya nga mao ang pagbindikar sa pagkasoberano ni Jehova pinaagi sa Gingharian. (Sofonias 3:9) Kinahanglang ibutang nato kining sumbanan sa makapahimsog nga mga pulong sa hunahuna ug kasingkasing. Aron malikayan nato nga magsakit ang atong mahulagwayong kasingkasing ug magpabiling himsog sa espirituwal, kinahanglang ipadapat nato ang Bibliya diha sa kinabuhi ug bug-os nga pahimuslan ang espirituwal nga mga tagana nga gihatag sa Diyos pinaagi sa “kasaligan ug mabuot nga ulipon.” (Mateo 24:45-47; Tito 2:2) Hinumdoman nato kanunay nga alang sa maayong espirituwal nga panglawas, kita nagkinahanglan sa kahibalo sa Diyos.

11. Unsa ang pipila ka katarongan kon nganong kinahanglan sa katawhan ang kahibalo sa Diyos?

¹¹ Palandonga ang ubang mga katarongan kon nganong ang binilyon sa yuta nagkinahanglan sa kahibalo sa Diyos. Sila bang tanan nahibalo kon sa unsang paagi ang yuta ug ang mga tawo mitungha? Wala, sila wala mahibalo. Ang tanan bang katawhan nahibalo sa matuod nga Diyos ug sa iyang Anak? Ang tanan ba nahibalo sa mga isyu nga gipatugbaw ni Satanas bahin sa pagkasoberano sa Diyos ug sa integridad sa katawhan? Wala usab. Ang mga tawo ba sa katibuk-an nahibalo kon nganong kita matigulang ug mamatay? Sa makausa pa kita moingon nga wala. Ang tanan bang molupyo sa yuta nahibalo nga ang Gingharian sa Diyos karon nagamando na ug nga kita nagkinabuhi na sa kataposang mga adlaw? Sila ba nahibalo bahin sa daotang espirituhanong mga puwersa? Ang tanan bang katawhan adunay kasaligang kahibalo bahin sa kon unsaon sa pagbaton ug usa ka malipayong pamilya? Ug ang katawhan ba nahibalo nga ang malipayong kinabuhi diha sa Paraiso mao ang katuyoan sa atong Maglalalang alang sa masinugtanong katawhan? Alang niini nga mga pangutana usab ang tubag maoy wala. Nan, matin-aw nga ang katawhan nagkinahanglan sa kahibalo sa Diyos.

12. Sa unsang paagi atong masimba ang Diyos “pinaagi sa espiritu ug kamatuoran”?

¹² Ang katawhan nagkinahanglan usab sa kahibalo sa Diyos tungod sa giingon ni Jesus diha sa pag-ampo sa kataposang gabii sa iyang yutan-ong kinabuhi. Dayag nga natandog gayod pag-ayo ang iyang mga apostoles sa pagkadungog kaniya nga nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang pagpadapat sa maong kahibalo mao lamang ang paagi sa pagsimba nga dawaton sa Diyos. “Ang Diyos maoy usa ka Espiritu, ug silang nagasimba kaniya kinahanglang mosimba pinaagi sa espiritu ug kamatuoran,” miingon si Jesus. (Juan 4:24) Kita nagsimba sa Diyos “pinaagi sa espiritu” sa dihang kita mapalihok sa mga kasingkasing nga puno sa pagtuo ug gugma. Sa unsang paagi simbahon nato siya ‘pinaagi sa kamatuoran’? Pinaagi sa pagtuon sa iyang Pulong ug pagsimba kaniya sumala sa iyang gipadayag nga kamatuoran​—“ang mismong kahibalo sa Diyos.”

13. Unsang hitabo ang girekord sa Buhat 16:25-34, ug unsa ang matun-an nato gikan niini?

¹³ Linibo ang nagsugod sa pagsimba kang Jehova matag tuig. Apan, kinahanglan bang padugayon ang pagdumala sa mga pagtuon sa Bibliya uban sa interesadong mga tawo, o posible ba nga mapadali ang pagpabawtismo sa mga matinud-anon ug kasingkasing? Aw, palandonga ang nahitabo labot sa tigbilanggo ug sa iyang panimalay nga gihisgotan sa Buhat 16:25-34. Si Pablo ug Silas nabilanggo sa Filipos, apan sa pagkatungang gabii, nabuksan sa dakong linog ang mga pultahan sa prisohan. Naghunahuna nga nakaeskapo ang tanang mga binilanggo ug nga siya silotan ug grabe, ang tigbilanggo maghikog na unta sa dihang gisultihan siya ni Pablo nga atua ra silang tanan didto. Si Pablo ug Silas ‘nagsulti sa pulong ni Jehova ngadto kaniya uban kanilang tanan nga anaa sa iyang balay.’ Kadto nga tigbilanggo ug ang iyang panimalay maoy mga Hentil nga walay kahibalo sa Balaang Kasulatan. Bisan pa, nianang usa ka gabii, sila nahimong mga magtutuo. Labaw pa niana, ‘ang tanan gayod, siya ug ang mga iya gibawtismohan.’ Kadto maoy talagsaong mga kahimtang, apan ang mga bag-ohan gitudloan sa paninugdang mga kamatuoran ug unya nakakat-on sa ubang mga butang diha sa mga tigom sa kongregasyon. Ang susamang butang angay nga posible karon.

Ang Anihon Dako!

14. Nganong gikinahanglan ang pagdumala ug mas daghang mabungahon nga mga pagtuon sa Bibliya sa mas mubo nga panahon?

¹⁴ Maayo gayod kon makadumala ang mga Saksi ni Jehova ug mas daghang mabungahong mga pagtuon sa Bibliya sa mas mubo nga panahon. Gikinahanglan gayod kini. Sa mga kayutaan sa Sidlakang Uropa, pananglitan, ang mga tawo kinahanglang magpalista sa talaan sa naghulat alang sa mga pagtuon sa Bibliya. Mao usab kanay kahimtang sa ubang lugar. Sa usa ka lungsod sa Dominican Republic, dili madumala sa lima ka Saksi ang daghan kaayong hangyo sa mga pagtuon. Unsay ilang gihimo? Ilang gidasig ang mga interesado sa pagtambong sa mga miting sa Kingdom Hall ug magpalista sa talaan sa naghulat alang sa mga pagtuon sa Bibliya. Ingon usab niana ang kahimtang sa daghang lugar sa tibuok yuta.

15, 16. Unsa ang gitagana aron mas daling mapakaylap ang kahibalo sa Diyos, ug unsa ang pila ka kamatuoran bahin niini?

¹⁵ Ang halapad nga mga teritoryo​—dagkong mga natad nga pagaanihan​—ang gibuksan sa katawhan sa Diyos. Bisan pag si Jehova, “ang Agalon sa Anihon,” nagpadalag dugang mga mamumuo, daghan gihapon kaayong buluhaton ang pagahimoon. (Mateo 9:37, 38) Busa, aron mapakaylap dayon ang kahibalo sa Diyos, ang ‘kasaligang ulipon’ nagtaganag usa ka butang nga mubo apan espisipikong impormasyon aron ang mga estudyante sa Bibliya mouswag sa espirituwal sa matag leksiyon. Usa kini ka bag-ong publikasyon nga gamiton sa mga pagtuon sa Bibliya sa balay nga mas daling matapos​—tingali sa pipila ka bulan. Ug sayon kining dalhon diha sa atong mga porpolyo, sa atong mga bag, ug bisan sa atong mga bulsa! Ang ginatos ka libo nga nagtigom sa “Malipayong mga Magdadayeg” Distritong mga Kombensiyon sa mga Saksi ni Jehova nalipay sa pagdawat niining bag-ong 192-panid nga librong nag-ulohang Kahibalo nga Motultol sa Kinabuhing Walay Kataposan.

¹⁶ Ang mga magsusulat sa nagkalainlaing kayutaan nag-andam sa materyal nga mainampingong giusa alang sa librong Kahibalo. Busa kini makapukaw sa interes sa mga tawo sa tibuok yuta. Apan dugay pa ba nga maluwat kining bag-ong publikasyon sa mga pinulongan sa katawhan sa tibuok kalibotan? Dili, tungod kay ang 192-panid nga libro mas dali nga hubaron kay sa dagkong mga libro. Sa pagka-Oktubre 1995, giaprobahan sa Writing Committee sa Nagamandong Lawas ang paghubad niining libroha gikan sa Ingles ngadto sa kapin sa 130 ka pinulongan.

17. Unsang mga butang ang magpasayon sa paggamit sa librong Kahibalo?

¹⁷ Ang espisipikong mga impormasyon sa matag kapitulo sa librong Kahibalo makatabang gayod sa mga estudyante sa mas kusog nga pag-uswag sa espirituwal. Ang libro nagpresentar sa Kasulatanhong mga kamatuoran sa makapalig-on nga paagi. Wala kini maglanganlangan sa detalyadong paghisgot sa bakak nga mga doktrina. Ang tin-aw nga pinulongan ug lohikal nga pagkahan-ay magpasayon sa paggamit sa libro sa pagdumala sa mga pagtuon sa Bibliya ug sa pagtabang sa mga tawo sa pagsabot sa kahibalo sa Diyos. Gawas sa gikutlo nga mga kasulatan, adunay mga teksto sa Bibliya nga gisitar nga matan-aw sa estudyante agig pagpangandam alang sa pagtuon. Mahimong basahon kini panahon sa pagtuon kon itugot sa panahon, apan dili maalamong hisgotan ang dugang materyal nga makalubog sa pangunang mga punto. Hinunoa, kadtong nagdumala sa mga pagtuon sa Bibliya kinahanglang maningkamot sa pagsabot ug sa pagpatin-aw sa estudyante kon unsay gipamatud-an sa libro sa matag kapitulo. Kini nagkahulogan nga ang magtutudlo kinahanglang magtuon pag-ayo, aron ang pangunang mga ideya matin-aw kaayo sa iyang hunahuna.

18. Unsa ang mga sugyot bahin sa paggamit sa librong Kahibalo?

¹⁸ Sa unsang paagi ang librong Kahibalo nga Motultol sa Kinabuhing Walay Kataposan magpadali sa buluhatong paghimog tinun-an? Kining 192-panid nga libro mahimong tun-an sa mas mubo nga panahon, ug kadtong “sa husto nahimutang alang sa kinabuhing walay kataposan” igong makakat-on pinaagi sa pagtuon niana aron makapahinungod kang Jehova ug makapabawtismo. (Buhat 13:48) Busa atong gamiton ug maayo ang librong Kahibalo diha sa ministeryo. Kon ang usa ka estudyante sa Bibliya nakatuon na ug dakong bahin sa laing libro, praktikal nga taposon kini. O kaha, gisugyot nga ang pagtuon sa Bibliya pulihan sa librong Kahibalo. Human matapos kining bag-ong publikasyon, wala na isugyot nga dumalahan pag pagtuon ang mao gihapong estudyante ug ikaduhang libro. Kadtong modawat sa kamatuoran makahingpit sa ilang kahibalo pinaagi sa pagtambong sa mga miting sa mga Saksi ni Jehova maingon man pinaagi sa pagbasa sa Bibliya ug sa nagkalainlaing Kristohanong mga publikasyon sa ilang kaugalingon.​—2 Juan 1.

19. Sa dili pa magdumalag mga pagtuon sa Bibliya sa librong Kahibalo, nganong makatabang ang pagrepaso sa mga panid 175 ngadto sa 218 sa Organisado sa Pagtuman sa Atong Ministeryo?

¹⁹ Ang librong Kahibalo gisulat sa tinguha nga matabangan ang usa ka tawo nga makatubag sa tanang mga pangutana nga repasohon sa mga ansiano uban sa dili-bawtismadong mga magmamantala nga nagtinguha nga magpabawtismo ingong mga Saksi ni Jehova. Busa, sa dili pa nimo ibalhin ang imong presenteng mga pagtuon sa Bibliya niining bag-ong publikasyon, girekomendar nga mogugol ka ug pipila ka oras sa pagrepaso sa mga pangutana sa mga panid 175 ngadto sa 218 sa librong Organisado sa Pagtuman sa Atong Ministeryo.a Kini motabang kanimo sa pagpasiugda sa mga tubag sa mga pangutana panahon sa mga pagtuon sa Bibliya sa librong Kahibalo.

20. Unsay imong plano nga himoon sa librong Kahibalo nga Motultol sa Kinabuhing Walay Kataposan?

²⁰ Ang mga tawo bisan asa angay makadungog sa maayong balita. Oo, ang katawhan nagkinahanglan sa kahibalo sa Diyos, ug si Jehova adunay iyang mga Saksi sa pagpahibalo niini. Karon kita adunay bag-ong libro nga gitagana sa atong mahigugmaon langitnong Amahan pinaagi sa kasaligan ug mabuot nga ulipon. Gamiton ba nimo kini sa pagtudlo sa kamatuoran ug paghatag ug pasidungog sa balaang ngalan ni Jehova? Segurado gayod nga panalanginan ka ni Jehova samtang nagapaningkamot ka sa pagdala ngadto sa daghan sa kahibalo nga motultol sa kinabuhing walay kataposan.

[Footnote]

Unsay Imong Tubag?

◻Unsaon nimo paghubit ang mahulagwayong kasingkasing?

◻Unsa ang kahibalo sa Diyos?

◻Nganong ang kahibalo sa Diyos gikinahanglan sa katawhan?

◻Unsang bag-ong libro ang mabatonan, ug unsay imong plano sa paggamit niini?

[Hulagway sa panid 10]

Adunay daghang katarongan kon nganong ang binilyong tawo sa yuta nagkinahanglan sa kahibalo sa Diyos