TROAS

Ang pangunang dunggoanan sa AK sa Asia Minor diin didto migikan si Pablo sa iyang unang pagduaw sa Macedonia, ug didto siya usahay magduawan sa ulahi. Kini nahimutang nga mga 30 km (19 mi) sa H sa Hellespont (Dardanelles) ug mga 25 km (15 mi) sa H sa gituohang dapit sa karaang Troy. Ang samang Gregong termino nga gihubad ug “Troas” gigamit usab alang sa Troad, usa ka rehiyon sa Misia nga naglibot sa Troy.

Ang siyudad sa Troas unang gitukod ni Antigonus nga usa sa mga heneral ni Alejandrong Bantogan, sa ulahing bahin sa ikaupat nga siglo W.K.P. Niadtong 133 W.K.P. kini nailalom sa pagmando sa Roma, ug human niadto ang rehiyon sa Misia nahimong bahin sa Romanhong lalawigan sa Asia. Dihay panahon nga gihunahuna ni Julio Cesar nga ibalhin ang sentro sa pangagamhanan sa Roma ngadto sa Troas. Si Emperador Agusto dugang nga naghatag ug pabor sa siyudad pinaagi sa paghimo niini nga usa ka colonia nga independente gikan sa gobernador sa lalawigan sa Asia, ug wala usab niya pabayra ug buhis sa yuta ug buhis por ulo ang mga lungsoranon niini.

Sa ikaduhang panaw ni Pablo, lagmit sa tingpamulak sa 50 K.P., ug human moagi sa Frigia ug Galacia, ang apostol ug ang iyang mga kauban miadto sa Troas, kay “ang espiritu ni Jesus wala motugot kanila” sa pag-adto sa Bitinia. (Buh 16:6-8) Dinhi sa Troas, si Pablo nakakitag usa ka talagsaong panan-awon, usa ka tawo nga naghangyo kaniya: “Dali ngari sa Macedonia ug tabangi kami.” Dayon kini gitapos, “Ang Diyos nagpatawag kanamo aron ipahayag ang maayong balita ngadto kanila.” Ang paggamit sa “kanamo” niini nga teksto (ug sa “kami” sa misunod nga mga bersikulo) nagkahulogan gayod nga, dinhi sa Troas, unang miduyog si Lucas sa grupo ni Pablo ug mikuyog sa pagpanaw uban kanila tabok sa Aegean ngadto sa Neapolis.​—Buh 16:9-12.

Human mobiya sa Efeso sa iyang ikatulong panaw, si Pablo mihapit sa Troas ug didto nagsangyaw sa maayong balita mahitungod kang Kristo, kay sama sa iyang giingon, “Usa ka pultahan ang nabuksan alang kanako diha sa Ginoo.” Apan human sa wala ibutyag nga yugto sa panahon, ang apostol nabalaka nga si Tito wala moabot, ug busa siya mibiya paingon sa Macedonia, nga naglaom nga iyang makit-an siya didto.​—Buh 20:1; 2Co 2:​12, 13.

Dayag nga si Pablo nagpalabay sa tingtugnaw didto sa Gresya una pa mobalik pag-usab sa Troas sa tingpamulak sa 56 K.P. (Buh 20:2-6) Niining higayona si Pablo miestar ug pito ka adlaw nga nag-alagad ug nagpalig-on sa espirituwalidad sa Kristohanong mga igsoon sa Troas. Sa gabii una pa mobiya, si Pablo nakigtigom kanila ug “gitaas ang iyang pakigpulong hangtod sa tungang-gabii.” Ang usa ka batan-ong lalaki nga mitambong nga ginganlag Eutiko, nga naglingkod sa bentana sa ikatulong andana, nahikatulog ug nahulog maong siya namatay. Ang apostol milagrosong nagbuhi sa batan-ong lalaki ug nagpadayon sa pagpakigsulti sa grupo hangtod nga mibanagbanag na.​—Buh 20:6-12.

Si Pablo lagmit miduaw pag-usab sa Troas human makagawas gikan sa pagkabilanggo sa balay didto sa Roma niadtong 61 K.P. Si Pablo misulat kang Timoteo panahon sa ikaduhang pagkabilanggo sa apostol didto sa Roma, sa mga tuig 65 K.P., ug naghangyo kang Timoteo nga dad-on ang usa ka kupo ug ang pipila ka linukot nga basahon ug mga pergamino nga gibilin ni Pablo kang Carpo didto sa Troas. Daw imposible nga ang maong hangyo gihimo mga siyam ka tuig sa ulahi, nga mao unta ang kahimtang kon ang kataposang pagduaw ni Pablo sa pinuy-anan ni Carpo nahitabo sa iyang ikatulong panaw sa mga 56 K.P.​—2Ti 4:13.