Padayon sa Pag-alagad Abaga sa Abaga
“Ihatag ko sa mga katawhan ang kausaban ngadto sa putli nga pinulongan, aron silang tanan magatawag sa ngalan ni Jehova, aron magaalagad kaniya abaga sa abaga.”—SOFONIAS 3:9.
1. Unsay nagakahitabo ingong katumanan sa Sofonias 3:9?
MGA 6,000 ka pinulongan ang ginasulti karon sa tibuok yuta. Gawas niini, dunay lainlaing mga diyalekto, o mga pinulongan nga iya lamang sa usa ka dapit. Bisan pag ang mga tawo nagsultig lainlaing mga pinulongan sama sa Arabe ug Zulu, hinunoa, ang Diyos dunay gihimo nga talagsaon gayod. Gipaposible niya nga ang mga tawo bisan asa makakat-on ug makasulti sa bugtong putli nga pinulongan. Kini nagakahitabo ingong katumanan sa saad nga gihatag pinaagi kang manalagnang Zacarias: “Ihatag ko [Jehova nga Diyos] sa mga katawhan ang kausaban ngadto sa putli nga pinulongan [sa literal, “hinlo nga ngabil”], aron silang tanan magatawag sa ngalan ni Jehova, aron magaalagad kaniya abaga sa abaga.”—Sofonias 3:9.
2. Unsa ang “putling pinulongan,” ug unsay gipaposible niini?
2 Ang “putli nga pinulongan” mao ang kamatuoran sa Diyos nga makita sa iyang Pulong, ang Bibliya. Kana maoy kamatuoran ilabina bahin sa Gingharian sa Diyos, nga magbalaan sa ngalan ni Jehova, magbindikar sa iyang pagkasoberano, ug magdalag mga panalangin ngadto sa katawhan. (Mateo 6:9, 10) Ingong bugtong espirituwal nga hinlong pinulongan dinhi sa yuta, ang putling pinulongan gisulti sa mga tawo sa tanang nasod ug mga rasa. Kini makapaarang kanila sa pag-alagad kang Jehova “abaga sa abaga.” Busa sila nag-alagad kaniya nga nahiusa, o “uban ang panag-uyon.”—The New English Bible.
Walay Luna Alang sa Pagpihigpihig
3. Unsay makapaarang kanato sa pag-alagad kang Jehova nga nahiusa?
3 Ingong mga Kristohanon, kita mapasalamaton tungod sa pagtinabangay sa mga tawo nga lainlaig mga pinulongan. Bisan tuod kita nagasangyaw sa maayong balita sa Gingharian diha sa daghang pinulongan sa tawo, kita nagkahiusa sa pag-alagad sa Diyos. (Salmo 133:1) Posible kini tungod kay, bisan asa kita nagpuyo sa yuta, kita nagasulti sa usa ka putling pinulongan sa pagdayeg kang Jehova.
4. Nganong dili angay nga adunay pagpihigpihig taliwala sa katawhan sa Diyos?
4 Kinahanglang walay pagpihigpihig taliwala sa katawhan sa Diyos. Gitin-aw kana ni apostol Pedro sa dihang nagsangyaw siya sa panimalay sa Hentil nga opisyal sa kasundalohan nga si Cornelio niadtong 36 K.P. ug natukmod siya sa pag-ingon: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Sanglit tinuod man kana, ang Kristohanong kongregasyon dili dapit sa pagpihigpihig, sa eksklusibong mga pundok, o sa paboritismo.
5. Nganong daotan ang pagpalambo ug eksklusibong mga pundok diha sa kongregasyon?
5 Mahitungod sa iyang pag-adto sa Kingdom Hall, usa ka estudyante sa kolehiyo miingon: “Kasagaran, ang mga relihiyon mangdani ug mga membro sa usa lamang ka rasa o minoriyang grupo. . . . Ang mga Saksi ni Jehova nanglingkod nga magkauban ang tanan ug wala mabahinbahin sa mga pundok.” Apan, ang ubang mga membro sa kongregasyon sa karaang Corinto nagpatunghag pagkabahinbahin. Pinaagi sa pagpahinabog panagbangi, ilang gisupak ang paglihok sa balaang espiritu sa Diyos, kay kini nagpalambo sa panaghiusa ug pakigdait. (Galacia 5:22) Kon kita magpalambo ug eksklusibong mga pundok diha sa kongregasyon, kita wala magpasakop sa pagpanguna sa espiritu. Busa, hinumdoman nato ang giingon ni apostol Pablo ngadto sa mga taga-Corinto: “Ako magaawhag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magasulti nga may panagkauyon, ug nga walay pagkabahinbahin diha kaninyo, kondili kamo unta bug-os nga magkahiusa sa samang kaisipan ug sa samang panghunahuna.” (1 Corinto 1:10) Gipasiugda usab ni Pablo ang panaghiusa diha sa iyang sulat ngadto sa mga taga-Efeso.—Efeso 4:1-6, 16.
6, 7. Unsang tambag ang gihatag ni Santiago maylabot sa paboritismo, ug sa unsang paagi mapadapat ang iyang giingon?
6 Ang mga Kristohanon kanunayng gibaoran nga dili magmapihigon. (Roma 2:11) Tungod kay ang pipila diha sa unang-siglong kongregasyon nagpakitag paboritismo sa adunahang mga igsoon, ang tinun-an nga si Santiago misulat: “Mga igsoon ko, wala kamo mangupot sa pagtuo sa atong Ginoong Jesu-Kristo, nga atong himaya, tungod sa mga buhat sa paboritismo, dili ba? Kay, kon ang usa ka tawo nga may mga singsing nga bulawan sa iyang mga tudlo ug nagsul-ob ug maanindot nga besti mosulod sa inyong panagkatigom, ug ang usa ka tawong kabos nga lago ug pamesti mosulod usab, ug unya inyong paboran ang usa nga nagsul-ob ug maanindot nga besti ug moingon: ‘Lingkod dinhi sa maayong dapit,’ ug kamo moingon sa kabos: ‘Pagtindog lang,’ o kaha: ‘Lingkod diha sa ubos duol sa tumbanan sa akong mga tiil,’ kamo adunay pagpihig sa inyong taliwala ug kamo nahimong mga maghuhukom nga nagpakanaog ug daotang mga desisyon, dili ba?”—Santiago 2:1-4.
7 Kon ang datong mga dili-magtutuo nga may bulawang mga singsing ug nagsul-ob ug maanindot nga mga besti motambong sa usa ka Kristohanong panagkatigom ug ang kabos nga mga dili-magtutuo nga lago ug pamesti motambong usab, ang mga adunahan maoy makadawat sa linaing pagtagad. Sila palingkoron sa “maayong dapit,” samtang ang mga kabos giingnan nga magtindog lang o palingkoron sa salog diha sa tiilan sa usa ka tawo. Apan ang Diyos dili-mapihigong nagtagana sa halad lukat ni Jesus alang sa dato ug kabos. (Job 34:19; 2 Corinto 5:14) Busa kon gusto natong pahimut-an si Jehova ug alagaron siya abaga sa abaga, kinahanglang dili kita magpakita ug paboritismo o ‘modayeg sa mga personalidad alang sa atong kaayohan.’—Judas 4, 16.
Likayi ang Pagbagulbol
8. Unsay nahitabo tungod sa pagbagulbol sa mga Israelinhon?
8 Aron mamentinar ang atong panaghiusa ug padayong mabatonan ang pag-uyon sa Diyos, kinahanglang patalinghogan nato ang tambag ni Pablo: “Magpadayon sa pagbuhat sa tanang butang nga walay pagbagulbol.” (Filipos 2:14, 15) Ang dili-matinuohong mga Israelinhon nga napagawas gikan sa pagkaulipon sa Ehipto nagbagulbol batok kang Moises ug Aaron, ug busa bisan kang Jehova nga Diyos. Tungod niini, ang tanang lalaki nga 20 anyos ug pataas, gawas sa matinumanong sila Josue ug Caleb ug sa mga Levihanon, wala makasulod sa Yutang saad kondili namatay panahon sa 40 ka tuig nga panaw sa mga Israelinhon diha sa kamingawan. (Numeros 14:2, 3, 26-30; 1 Corinto 10:10) Pagkadako sa bugti sa ilang pagbagulbol!
9. Unsay naagoman ni Miriam tungod sa iyang pagbagulbol?
9 Nagpakita kini kon unsay mahitabo sa tibuok nagbagulbol nga nasod. Komosta ang tagsatagsa ka bagulbolan? Aw, ang igsoon ni Moises nga si Miriam, duyog sa iyang igsoon nga si Aaron, nagbagulbol: “Pinaagi ba lamang kang Moises nga si Jehova nakigsulti? Dili ba usab pinaagi kanato nga siya nakigsulti?” Ang asoy nagpadayon: “Si Jehova namati.” (Numeros 12:1, 2) Ang resulta? Si Miriam, kinsa dayag nga maoy nanguna niini nga pagreklamo, gipakaulawan sa Diyos. Sa unsang paagi? Sa pagkaagi nga gihampak siya sa sanla ug napugos siya sa pagpabilin gawas sa kampo sulod sa pito ka adlaw hangtod nga siya nahinloan na.—Numeros 12:9-15.
10, 11. Ang dili-mapugngang pagbagulbol mahimong mosangpot sa unsa? Iilustrar.
10 Ang pagbagulbol dili lamang pagreklamo bahin sa usa ka sayop. Ang mga tawong magsigeg bagulbol nabalaka pag-ayo sa ilang pagbati o kahimtang, nga nagdani sa pagtagad ngadto sa ilang kaugalingon imbes ngadto sa Diyos. Kon dili mapugngan, kini magpahinabog panagbangi taliwala sa espirituwal nga mga igsoon ug makababag sa ilang paningkamot sa pag-alagad kang Jehova abaga sa abaga. Tungod kini kay ang mga bagulbolan magpunayg reklamo, sa walay duhaduha naglaom nga ang uban modapig kaniya.
11 Pananglitan, duna tingaliy manaway sa paagi nga ang usa ka ansiyano maghatag sa iyang mga bahin diha sa kongregasyon o mag-atiman sa iyang mga katungdanan. Kon mamati kita sa reklamador, basin magsugod kita sa paghunahuna nga sama kaniya. Sa wala pa matisok sa atong hunahuna ang pagkadiskontento, tingali wala kita mapikal sa mga kalihokan sa maong ansiyano, apan niining tungora napikal na kita. Sa ngadtongadto, ang tanang buhaton sa maong ansiyano sayop na sa atong panan-aw, ug kita usab mahimong magsugod na sa pagreklamo bahin kaniya. Kining matanga sa panggawi dili haom diha sa kongregasyon sa katawhan ni Jehova.
12. Unsay epekto sa pagbagulbol diha sa atong relasyon sa Diyos?
12 Ang pagbagulbol bahin sa mga tawo kansang katungdanan mao ang pagbantay sa panon sa Diyos mahimong motultol sa pagpasipala. Ang maong pagbagulbol o mabutangbutangon nga pagpanghimaraot kanila makadaot sa atong relasyon kang Jehova. (Exodo 22:28) Ang dili-mahinulsolong mga mapasipalahon dili makapanunod sa Gingharian sa Diyos. (1 Corinto 5:11; 6:10) Ang tinun-ang si Judas misulat bahin sa mga bagulbolan nga “nagsalikway sa pagkaginoo ug nagsulti nga mapasipalahon labot sa mga mahimayaon,” o sa responsableng mga lalaki sa kongregasyon. (Judas 8) Kadtong maong mga bagulbolan wala makabaton sa pag-uyon sa Diyos, ug kita maalamong maglikay sa ilang daotang dalan.
13. Nganong dili tanang reklamo daotan?
13 Apan, dili tanang reklamo dili makapahimuot sa Diyos. Wala niya ibalewala “ang tuaw sa pagmulo” bahin sa Sodoma ug Gomora kondili gilaglag niya kadtong daotang mga siyudad. (Genesis 18:20, 21; 19:24, 25) Sa Jerusalem, wala madugay human sa Pentekostes sa 33 K.P., “dihay pagbagulbol sa nagsultig-Grego nga mga Hudiyo batok sa nagsultig-Hebreohanon nga mga Hudiyo, tungod kay ang ilang mga babayeng balo nataligam-an man sa adlaw-adlaw nga pagpang-apod-apod.” Busa, “ang napulog-duha” nagsulbad sa problema pinaagi sa pagtudlo ug ‘pito ka lalaki nga napanghimatud-ang maayo’ nga mag-atiman sa “hinungdanong atimanonon” sa pagpang-apod-apod ug pagkaon. (Buhat 6:1-6) Ang mga ansiyano karon kinahanglang dili ‘magsampong sa ilang mga igdulungog’ sa makataronganong mga reklamo. (Proverbio 21:13) Ug imbes sawayon ang mga isigkamagsisimba, ang mga ansiyano kinahanglang makapadasig ug makapalig-on.—1 Corinto 8:1.
14. Aron malikayan ang pagbagulbol, unsang hiyas ang ilabinang gikinahanglan?
14 Kitang tanan kinahanglang maglikay sa pagbagulbol, kay ang pagkareklamador makadaot sa espirituwalidad. Ang maong tinamdan makadaot sa atong panaghiusa. Hinunoa, kanunay natong tugotan ang balaang espiritu nga magpatungha ug gugma diha kanato. (Galacia 5:22) Ang pagtuman sa ‘harianong balaod sa gugma’ motabang kanato sa pagpadayon sa pag-alagad kang Jehova abaga sa abaga.—Santiago 2:8; 1 Corinto 13:4-8; 1 Pedro 4:8.
Pagbantay Batok sa Pagbutangbutang
15. Unsaon nimo pag-ila ang kalainan tali sa tabitabi ug pagbutangbutang?
15 Tungod kay ang pagbagulbol motultol sa makadaot nga tabitabi, kinahanglang magbantay kita kon unsay atong isulti. Ang tabitabi maoy walay pulos nga estorya bahin sa mga tawo ug sa ilang mga kalihokan. Apan, ang pagbutangbutang maoy bakak nga taho nga ang tuyo mao ang pagdaot sa dungog sa laing tawo. Ang maong estorya maoy madinaoton ug dili-diyosnon. Busa giingnan sa Diyos ang mga Israelinhon: “Dili ka magsuroysuroy sa taliwala sa imong katawhan aron mamutangbutang.”—Levitico 19:16.
16. Unsay giingon ni Pablo bahin sa pipila ka tabian, ug sa unsang paagi maapektahan kita sa iyang tambag?
16 Tungod kay ang walay pulos nga estorya motultol sa pagbutangbutang, si Pablo maisogong nagbadlong sa pipila ka tabian. Human hisgoti ang mga balo nga takos tabangan sa kongregasyon, iyang gihisgotan ang mga balo nga nakakat-on “sa pagkawalay-ginabuhat, sa pagpanumbalay; oo, dili lamang walay ginabuhat, kondili usab mga tabian ug hilabtanon sa mga kalihokan sa ubang mga tawo, nga manulti sa mga butang nga dili nila angayng isulti.” (1 Timoteo 5:11-15) Kon maamgohan sa usa ka Kristohanong babaye nga siya dunay kahuyangon labot sa matang sa estorya nga mahimong motultol sa pagbutangbutang, angay niyang patalinghogan ang tambag ni Pablo nga “magmaugdang, dili mabutangbutangon.” (1 Timoteo 3:11) Siyempre, ang Kristohanong mga lalaki kinahanglang magbantay usab batok sa makadaot nga tabitabi.—Proverbio 10:19.
Hunong na sa Pagpanghukom!
17, 18. (a) Unsay giingon ni Jesus bahin sa paghukom sa atong igsoon? (b) Sa unsang paagi ikapadapat nato ang giingon ni Jesus bahin sa pagpanghukom?
17 Bisan pag dili kita magbutangbutang ni bisan kinsa, basin kinahanglan natong maningkamot pag-ayo nga malikayan ang pagpanghukom sa uban. Gisaway ni Jesus ang maong tinamdan sa dihang siya miingon: “Hunong na sa pagpanghukom aron dili kamo pagahukman; kay sa hukom nga inyong ginahukom, kamo pagahukman; ug sa sukod nga inyong ginasukod, sila magasukod nganha kaninyo. Nan, nganong tan-awon nimo ang uhot nga anaa sa mata sa imong igsoon, apan wala magtagad sa salagunting nga anaa sa imong kaugalingong mata? O unsaon nimo pag-ingon sa imong igsoon, ‘Tugoti ako sa pagkuha sa uhot gikan sa imong mata’; sa dihang, tan-awa! usa ka salagunting ang anaa sa imong kaugalingong mata? Salingkapaw! Kuhaa una ang salagunting gikan sa imong kaugalingong mata, ug unya makakita ka nga tin-aw kon unsaon sa pagkuha sa uhot gikan sa mata sa imong igsoon.”—Mateo 7:1-5.
18 Dili kita angayng mangako sa pagtanyag nga kuhaon ang “uhot” lamang gikan sa mata sa atong igsoon aron tabangan siya sa dihang ang atong katakos sa paghimog hustong pagpanghukom nababagan sa usa ka mahulagwayong “salagunting.” Gani, kon nasabtan gayod nato kon unsa ka maluluy-on ang Diyos, dili kita makiling sa paghukom sa atong espirituwal nga mga igsoong lalaki ug babaye. Unsaon god nato sa pagsabot kanila sama sa pagsabot kanila sa atong langitnong Amahan? Mao diay nga gipasidan-an kita ni Jesus nga ‘mohunong na sa pagpanghukom aron dili kita pagahukman’! Ang matinud-anong pagtimbangtimbang sa atong mga kahuyangan angayng magpugong kanato sa paghimog mga pagpanghukom nga isipon sa Diyos nga dili matarong.
Huyang Apan Dungganon
19. Unsaon nato paglantaw ang atong mga isigkamagtutuo?
19 Kon determinado kitang moalagad sa Diyos abaga sa abaga uban sa mga isigkamagsisimba, dili kay maglikay lang kita sa pagkahimong mahukmanon. Manguna kita sa pagpasidungog kanila. (Roma 12:10) Sa pagkatinuod, tinguhaon nato ang ilang kaayohan, dili ang atoa, ug malipayon kitang mohimog ubos nga mga trabaho alang kanila. (Juan 13:12-17; 1 Corinto 10:24) Sa unsang paagi mahuptan nato kanang maayong espiritu? Pinaagi sa paghunahuna nga ang matag magtutuo bililhon kang Jehova ug gikinahanglan nato ang usag usa, maingon nga ang matag sangkap sa lawas sa tawo nagsalig sa uban.—1 Corinto 12:14-27.
20, 21. Unsay kahulogan sa giingon sa 2 Timoteo 2:20, 21 alang kanato?
20 Tinuod, ang mga Kristohanon maoy huyang nga mga sudlanang kulonon nga gipiyalan sa mahimayaong bahandi sa ministeryo. (2 Corinto 4:7) Aron mapadayon nato kining balaang kalihokan alang sa kadayeganan ni Jehova, kinahanglang huptan nato ang dungganong baroganan atubangan kaniya ug sa iyang Anak. Pinaagi lamang sa pagpabiling putli sa moral ug sa espirituwal nga makapabilin kitang usa ka dungganong sudlanan nga andam gamiton sa Diyos. Bahin niini, si Pablo misulat: “Karon sa usa ka dakong balay adunay mga sudlanan nga dili lamang hinimo sa bulawan ug plata kondili usab sa kahoy ug kulonon, ug ang pipila alang sa katuyoang dungganon apan ang uban alang sa katuyoang dili dungganon. Busa, kon ang usa magpahilayo gikan niining naulahi, siya mahimong sudlanan alang sa katuyoang dungganon, binalaan, mapuslanon sa iyang tag-iya, andam alang sa tanang maayong buhat.”—2 Timoteo 2:20, 21.
21 Ang mga tawo nga dili maggawi nga kaharmonya sa mga kinahanglanon sa Diyos maoy ‘mga sudlanan nga dili dungganon.’ Apan, pinaagi sa pagsubay sa diyosnong dalan kita mahimong ‘mga sudlanan alang sa katuyoang dungganon, binalaan, o nahilain, alang sa pag-alagad kang Jehova ug andam alang sa tanang maayong buhat.’ Busa maayong pangutan-on nato ang atong kaugalingon: ‘Ako ba usa ka “sudlanan alang sa katuyoang dungganon”? Ako ba usa ka maayong impluwensiya sa mga isigkamagtutuo? Ako ba usa ka membro sa kongregasyon nga nagbuhat abaga sa abaga uban sa mga isigkamagsisimba?’
Padayon sa Pag-alagad Abaga sa Abaga
22. Sa unsa ikatandi ang Kristohanong kongregasyon?
22 Ang Kristohanong kongregasyon maoy samag-pamilya nga kahikayan. Dunay mahigugmaon, matinabangon, ug maanindot nga kahimtang diha sa pamilya kon ang tanang membro niini nagsimba kang Jehova. Ang usa ka pamilya gilangkoban tingali sa daghang indibiduwal nga lainlaig mga personalidad, apan ang tanan adunay dungganong dapit. Ang situwasyon susama diha sa kongregasyon. Bisan tuod kitang tanan magkalahi—ug dili hingpit—gidani kita sa Diyos ngadto kaniya pinaagi kang Kristo. (Juan 6:44; 14:6) Si Jehova ug si Jesus nahigugma kanato, ug sama sa usa ka nahiusang pamilya, kita kinahanglan gayong magpakitag gugma alang sa usag usa.—1 Juan 4:7-11.
23. Unsay angay natong hinumdoman ug determinadong buhaton?
23 Ang samag-pamilya nga Kristohanong kongregasyon maoy dapit usab diin kita angayng magdahom nga makakaplag ug pagkamaunongon. Si apostol Pablo misulat: “Gitinguha ko nga sa tanang dapit ang mga lalaki magpadayon sa pag-ampo, nga magbayaw sa maunongong mga kamot, nga walay kapungot ug mga panaglalis.” (1 Timoteo 2:8) Busa gilangkit ni Pablo ang pagkamaunongon sa publikong pag-ampo diha “sa tanang dapit” diin magtigom ang mga Kristohanon. Ang maunongon lamang nga mga lalaki ang angayng maghawas sa kongregasyon diha sa publikong pag-ampo. Siyempre, ang Diyos magdahom nga kitang tanan magmaunongon kaniya ug sa usag usa. (Ecclesiastes 12:13, 14) Busa magmadeterminado kita sa pagtinabangay nga may kaharmonya, sama sa mga sangkap sa lawas sa tawo. Hinaot nga magkahiusa usab kita sa pag-alagad ingong bahin sa pamilya ni Jehova sa mga magsisimba. Labaw sa tanan, hinumdoman nato nga kita nagkinahanglan sa usag usa ug makatagamtam sa pag-uyon ug mga panalangin sa Diyos kon kita padayong mag-alagad kang Jehova abaga sa abaga.
Unsaon Nimo Pagtubag?
• Unsay nakapaarang sa katawhan ni Jehova sa pag-alagad kaniya abaga sa abaga?
• Nganong likayan sa mga Kristohanon ang pagpihigpihig?
• Sa imong hunahuna, unsay daotan sa pagbagulbol?
• Nganong angay natong pasidunggan ang mga isigkamagtutuo?
[Hulagway sa panid 15]
Naila ni Pedro nga “ang Diyos dili mapihigon”
[Hulagway sa panid 16]
Nahibalo ka ba kon nganong gipakaulawan sa Diyos si Miriam?
[Hulagway sa panid 18]
Ang maunongong mga Kristohanon malipayong nag-alagad kang Jehova abaga sa abaga