Kon Nganong ang Bibliya Praktikal Karon

“Ang tibuok kasulatan gikan sa Diyos ug mapuslanon . . . sa paggiya sa kinabuhi sa mga tawo.”—2 TIMOTEO 3:16, The Jerusalem Bible.

LATAS sa ginatos ka katuigan, ang Bibliya nakatabang nga mabag-o ang kinabuhi sa daghang tawo. Sumala sa teksto nga gikutlo sa ibabaw, ang Bibliya praktikal nga giya tungod kay ang kaalam niini naggikan sa Diyos. Bisan tuod tawo ang nagsulat sa Bibliya, apan kini nagsulti kon unsay hunahuna sa Diyos. Ang Bibliya nag-ingon: “Ang mga tawo nagsulti gikan sa Diyos samtang sila giagak sa balaang espiritu.”—2 Pedro 1:21.

Ang Bibliya maoy praktikal nga giya sa labing menos duha ka paagi. Una, kini nagtudlo kon unsa gayod ang maayong paagi sa pagkinabuhi. Ikaduha, kini adunay gahom sa pagtabang sa mga tawo sa paghimog gikinahanglang kausaban aron mabag-o ang ilang kinabuhi. Hisgotan nato kining duha ka paagi.

Giya nga Motabang Kanato sa Pagbaton ug Praktikal nga mga Tumong

Atong mabasa ang saad sa Diyos diha sa Bibliya: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw.” (Salmo 32:8) Matikdi nga ang Diyos wala lamang maghatag ug tambag apan hait nga salabotan usab, nga mao ang katakos sa pagsabot sa usa ka kahimtang. Ang pagbaton ug hait nga salabotan makatabang sa pag-ila kon unsang mga tumong ang tinuod gayong mapuslanon aron dili mausik ang atong kinabuhi sa walay hinungdang mga butang.

Pananglitan, gihimong tumong sa daghang tawo nga mainila o madato. Adunay daghang libro nga nagtambag kon sa unsang paagi malabwan sa usa ka tawo ang uban aron makab-ot ang maong tumong. Sa laing bahin, ang Bibliya nag-ingon: “[Ang] pag-indigay sa usag usa . . . kakawangan ug usa ka paggukod sa hangin.” “Ang mahigugmaon lamang sa salapi dili matagbaw sa salapi.” (Ecclesiastes 4:4; 5:10) Praktikal ba kining tambaga sa atong panahon?

Sa pag-ilustrar sa kamapuslanon sa tambag sa Bibliya, tagdon nato ang kasinatian ni Akinori, nga taga-Japan. Bisan pa sa grabeng kompetisyon, iyang nakab-ot ang iyang tumong nga makagraduwar sa usa ka iladong unibersidad ug makatrabaho sa usa ka dakong kompaniya. Daw nagmalamposon siya. Apan kana wala maghatag kaniya sa kalipay nga iyang gipangandoy. Hinunoa, nasakit siya tungod sa sobrang tensiyon ug kakapoy. Ang iyang mga higala sa trabahoan wala makahupay kaniya. Siya naguol pag-ayo, nahimong palainom, ug naghunahuna pa gani nga maghikog. Apan siya misugod pagtuon sa Bibliya uban sa mga Saksi ni Jehova. Ang iyang nakat-onan nakapausab sa iyang panglantaw sa kon unsa gayoy importante sa kinabuhi. Sa wala madugay, ang iyang sakit tungod sa sobrang tensiyon nawala. Imbes gamhan sa garbo ug ambisyon, nasinati mismo ni Akinori ang giingon sa usa ka panultihon sa Bibliya: “Ang kasingkasing nga malinawon makaayo sa lawas.”—Proverbio 14:30, The Holy Bible—New International Version.

Sa imong hunahuna, unsa ang kinamaayohang tumong sa kinabuhi? Unsa gayoy makapalipay kanimo? Ang pagbaton bag malamposong kaminyoon? Paghatag sa imong mga anak ug haruhay nga kinabuhi? Pagbatog daghang higala? O, pagtagamtam ug malipayong kinabuhi? Kining tanan maoy maayong mga tumong. Gani, ang Bibliya nagdasig niana, apan dili kana ang pangunang tumong sa kinabuhi. Ang Bibliya naghisgot sa pangunang kinahanglanon aron kita magmatagbawon sa atong kinabuhi. Kini nag-ingon: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Ecclesiastes 12:13) Kon dili nato kini tumanon, ang kinabuhi mahimong walay tumong ug walay pulos. Sa laing bahin, ang Bibliya nagpasalig kanato: “Malipayon siya nga nagasalig kang Jehova.”—Proverbio 16:20.

Kon sa Unsang Paagi ang Bibliya Makapabag-o sa mga Tawo

“Ang pulong sa Diyos buhi ug gamhanan,” misulat si apostol Pablo. Samag hait, duhay sulab nga espada, kini modulot sa hunahuna ug kasingkasing sa usa ka tawo. (Hebreohanon 4:12) Ang Bibliya adunay gahom sa pagbag-o sa kinabuhi sa mga tawo tungod kay pinaagi niini ilang makita ang ilang tinuod nga personalidad. Kadtong may maayong kasingkasing makaamgo nga sila kinahanglang mohimog kausaban. Pananglitan, bahin sa mga membro sa Kristohanong kongregasyon sa karaang Corinto nga kanhi mga kawatan, palahubog, mananapaw, ug uban pa, si Pablo misulti: “Ingon niana ang pipila kaninyo kaniadto. Apan kamo nahugasan na . . . sa espiritu sa atong Diyos.” (1 Corinto 6:9-11) Ang balaang espiritu ni Jehova gamhanan ug aktibo gihapon karon, ug kini makapalihok sa mga tawo sa paghimog gikinahanglang mga kausaban.

Si Mario, nga taga-Uropa, maoy usa ka bangis nga tawo nga tiggamit ug tigbaligyag marijuana. Usa ka higayon niana, sa dihang giembargo sa polis ang iyang mga droga, siya nasuko pag-ayo mao nga iyang gikulata ang polis ug giguba ang sakyanan niini. Gawas pa, si Mario walay trabaho ug naputos sa utang. Siya nakaamgo nga dili niya masulbad ang iyang mga problema, busa siya miuyon nga magtuon ug Bibliya. Samtang nag-uswag ang iyang kahibalo, iyang gipadapat ang iyang nakat-onan ug nahapsay na ang iyang panagway. Siya mihunong sa paggamit ug pagpamaligyag droga, ug wala na usab siya malangkit sa kapintasan. Daghan sa nakaila kaniya ang nahibulong. Sila mangutana kaniya, “Mario, ikaw ba gyod na?”

Unsay nakapalihok kang Akinori ug Mario sa pagbag-o sa ilang kinabuhi ug sa pagpangitag tinuod nga kalipay ug katagbawan? Sa walay duhaduha, kana mao ang ilang bag-ong kaplag nga kahibalo bahin sa Diyos pinaagi sa pagtuon sa Bibliya. Ang Diyos lamang ang makataganag praktikal nga giya nga atong gikinahanglan aron kita magmalipayon karon ug makabaton ug kinabuhing walay kataposan sa umaabot. Samag usa ka Amahan, si Jehova nga Diyos nakigsulti kanato pinaagi sa Bibliya: “Pamati, anak ko, ug dawata ang akong mga pulong. Ug modaghan ang katuigan sa imong kinabuhi. . . . Sa dihang ikaw molakaw, ang imong mga lakang dili pinugngan; ug kon ikaw modagan, dili ka mapandol. Hawiri ang disiplina; ug ayaw kini buhii. Ampingi kini, kay kini maoy imong kinabuhi.” (Proverbio 4:10-13) Kita gitambagan nga pangitaon ang giya sa atong Maglalalang. Wala nay mas praktikal pa kay nianang tambaga!

[Kahon/Hulagway sa panid 7]

Praktikal nga mga Tambag sa Atong Panahon

Ang Bibliya nagtaganag simple apan bililhong mga tambag nga mogiya sa tanang bahin sa atong pagkinabuhi. Aniay pipila ka pananglitan:

• Pagbaton ug maayong relasyon sa uban

“Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 7:12.

“Siya nga nagagawi sa iyang kaugalingon ingon nga mas ubos taliwala kaninyong tanan mao ang usa nga dako.”—Lucas 9:48.

“Sunda ang dalan sa pagkamaabiabihon.”—Roma 12:13.

• Pagbuntog sa makadaot nga mga buhat ug batasan

“Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.”—Proverbio 13:20.

“Ayaw pagpakig-uban sa mga labihan ka hinginom ug bino.”—Proverbio 23:20.

“Ayaw pagpakig-uban kang bisan kinsa nga masuk-anon.”—Proverbio 22:24.

• Pagtukod ug lig-ong kaminyoon

“Kinahanglang higugmaon gayod sa matag usa ang iyang asawa sama sa iyang kaugalingon; sa laing bahin, ang asawa angay nga adunay halawom nga pagtahod sa iyang bana.”—Efeso 5:33.

“Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa.”—Colosas 3:12, 13.

• Pagmatuto sa mga anak

“Bansaya ang bata subay sa dalan nga alang kaniya; bisan kon siya matigulang na dili siya motipas gikan niana.”—Proverbio 22:6.

“Kamong mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.”—Efeso 6:4.

• Paglikay sa away

“Ang tubag, kon malumo, makapahilayo sa kaaligutgot, apan ang pulong nga makapasakit makapapukaw sa kasuko.”—Proverbio 15:1.

“Manguna sa pagpakitag pasidungog sa usag usa.”—Roma 12:10.

Bisan tali sa managhigala, ang mga away sa negosyo malikayan pinaagi sa paghimog sinulat nga mga kasabotan. Busa, ang alagad sa Diyos nga si Jeremias misulat: “Ako misulat ug usa ka sulat-kalig-onan ug gitimbrehan kini ug mikuhag mga saksi samtang ako nagtimbang sa salapi diha sa timbangan.”—Jeremias 32:10.

• Pag-ugmad ug positibong tinamdan

“Bisan unsang butang matuod, . . . hiligugmaon, . . . dungganon, kon aduna may pagkahamili ug kon aduna may butang nga dalayegon, magpadayon sa pagpalandong niining mga butanga.”—Filipos 4:8.

Ang Bibliya nagsaway sa negatibong panghunahuna ug sa “mga reklamador bahin sa ilang kahimtang sa kinabuhi.” Kini nag-ingon: “Magmaya diha sa paglaom.”—Judas 4, 16; Roma 12:12.

Ang pagpadapat niining mga tambaga dili lamang makatabang kanato nga makabatog kalinaw ug katagbawan karon kondili makatabang usab nga atong matuman ang mga kinahanglanon sa Diyos ug madawat ang iyang panalangin. Ang Bibliya nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29.

[Mga Hulagway sa panid 5]

Si Akinori sa dihang siya usa pa ka negosyante (wala) ug malipayong nagpaambit sa kamatuoran sa Bibliya karon uban sa iyang asawa