Uswag Ngadto sa Pagkahamtong—‘Haduol Na ang Dakong Adlaw ni Jehova’
“Manag-uswag kita ngadto sa pagkahamtong.”—HEB. 6:1.
1, 2. Unsang kahigayonan sa ‘pagkalagiw ngadto sa kabukiran’ ang nabuksan alang sa mga Kristohanon sa Jerusalem ug Judea sa unang siglo?
SA DINHI si Jesus sa yuta, miduol kaniya ang iyang mga tinun-an ug sila nangutana: “Unsa man unya ang ilhanan sa imong presensiya ug sa kataposan sa sistema sa mga butang?” Ang tagna nga maoy tubag ni Jesus sa ilang pangutana may unang katumanan sa unang siglo. Siya naghisgot ug usa ka talagsaong hitabo nga magpaila nga duol na kaayo ang kataposan. Inigkakita sa maong panghitabo, ‘silang didto sa Judea [kinahanglang] mokalagiw na ngadto sa kabukiran.’ (Mat. 24:1-3, 15-22) Makaila ba niana ang mga tinun-an ni Jesus ug mosunod sa iyang instruksiyon?
2 Paglabay ug mga katloan ka tuig, niadtong 61 K.P., si apostol Pablo misulat ug prangka, makapahinuklog gayod nga mensahe ngadto sa Hebreohanong mga Kristohanon sa Jerusalem ug sa kasilinganan niini. Wala mahibalo niadto si Pablo ug iyang mga isigkamagtutuo nga lima ka tuig sa ulahi mahitabo ang unang bahin sa “dakong kasakitan.” (Mat. 24:21) Niadtong 66 K.P., si Cestius Gallus ang nangulo sa Romanong kasundalohan nga misulong sa Jerusalem ug hapit na silang molampos niadtong panahona. Apan kalit siyang miatras, busa kadtong nameligrong mga Kristohanon nakahigayon sa pagkalagiw ngadto sa luwas nga dapit.
3. Unsay gitambag ni Pablo sa Hebreohanong mga Kristohanon, ug ngano?
3 Angayng masabtan niadtong mga Kristohanon nga kadtong mga panghitabo mao ang katumanan sa mga pulong ni Jesus ug kinahanglan na silang mokalagiw. Apan ang pipila kanila ‘nahabol sa [ilang] pandungog.’ Sila samag espirituwal nga mga bata nga nagkinahanglan pag “gatas.” (Basaha ang Hebreohanon 5:11-13.) Bisan kadtong nagsunod sa kamatuoran sa daghang katuigan nagpakitag mga ilhanan nga ‘nagpahilayo sa buhi nga Diyos.’ (Heb. 3:12) Ang pipila ‘nagbatasan’ sa pagpalta sa Kristohanong mga tigom sa panahong ang ‘adlaw sa kalaglagan nagkaduol na.’ (Heb. 10:24, 25) Si Pablo mihatag kanilag tukma-sa-panahong tambag: “Karon nga ato nang gibiyaan ang pangunang doktrina mahitungod kang Kristo, manag-uswag kita ngadto sa pagkahamtong.”—Heb. 6:1.
4. Nganong hinungdanon nga magmaigmat kita bahin sa pagkatuman sa tagna ug huptang lig-on ang atong relasyon kang Jehova, ug unsay makatabang kanato sa paghimo niana?
4 Nagkinabuhi kita sa panahon sa kataposang katumanan sa tagna ni Jesus. “Ang dakong adlaw ni Jehova”—ang adlaw nga malaglag ang tibuok sistema ni Satanas—“haduol na.” (Sof. 1:14) Angay gayong magmaigmat kita bahin sa pagkatuman sa tagna ug huptang lig-on ang atong relasyon kang Jehova. (1 Ped. 5:8) Naghimo ba kita niana? Ang Kristohanong pagkahamtong makatabang kanato sa paghunahuna kanunay kon hain na kita sa agos sa panahon.
Ang Kahulogan sa Kristohanong Pagkahamtong
5, 6. (a) Unsay nalangkit sa espirituwal nga pagkahamtong? (b) Sa unsang duha ka natad kinahanglang maningkamot kita aron mouswag sa pagkahamtong?
5 Si Pablo wala lang magdasig sa Hebreohanong mga Kristohanon sa pag-uswag ngadto sa pagkahamtong kondili siya nagsulti usab kanila kon unsay nalangkit sa espirituwal nga pagkahamtong. (Basaha ang Hebreohanon 5:14.) Ang “mga tawong hamtong” dili matagbaw nga moinom lamang ug “gatas.” Mokaon silag “gahing pagkaon.” Busa, sila nahibalo kon unsa ang “paninugdang mga butang” ug “ang lawom nga mga butang” sa kamatuoran. (1 Cor. 2:10) Dugang pa, nabansay ang ilang mga katakos sa pagsabot pinaagi sa pagpadapat sa ilang nahibaloan, nga nagtabang kanila sa pag-ila sa maayo ug sa daotan. Sa dihang kinahanglan silang modesisyon, mahibalo sila kon unsang mga prinsipyo sa Kasulatan ang nalangkit ug kon unsaon kana pagpadapat.
6 “Kinahanglan kitang mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod,” misulat si Pablo. (Heb. 2:1) Mahimong dili kita makamatikod nga kita naanod na. Makalikay kita niana pinaagi sa paghatag ug “labaw pa kay sa kasagarang pagtagad” sa dihang magtuon kita sa Bibliya. Busa, ang matag usa kanato angayng mangutana: ‘Ang paninugdang mga butang ba gihapon ang akong ginatagad? Rutina ba lamang ang akong mga kalihokan ug wala sa akong kasingkasing ang kamatuoran? Sa unsang paagi mouswag ko sa espirituwal?’ Kinahanglan kitang maningkamot sa duha ka natad aron mouswag sa pagkahamtong. Kinahanglang masinati kita pag-ayo sa Pulong sa Diyos ug makakat-on kita nga magmasinugtanon.
Masinati Pag-ayo sa Pulong
7. Sa unsang paagi makatabang kanato ang pagsinati pag-ayo sa Pulong sa Diyos?
7 “Ang matag usa nga nagainom ug gatas wala masinati sa pulong sa pagkamatarong, kay bata pa man siya,” misulat si Pablo. (Heb. 5:13) Aron makakab-ot sa pagkahamtong, kinahanglang masinati kita pag-ayo sa mensahe sa Diyos kanato. Sanglit kanang mensahea anaa sa iyang Pulong, ang Bibliya, kinahanglang tun-an nato pag-ayo ang Kasulatan ug ang mga publikasyon sa “matinumanon ug maalamong ulipon.” (Mat. 24:45-47) Kon magtuon kita pag-ayo, atong masayran ang panghunahuna sa Diyos ug kini makatabang aron mabansay ang atong mga gahom sa pagsabot. Tagda ang panig-ingnan sa usa ka Kristohanong babaye nga ginganlag Orchid.a Siya nag-ingon: “Ang pahinumdom bahin sa regular nga pagbasag Bibliya dakog epekto sa akong kinabuhi. Mikabat ug mga duha ka tuig una nako mahuman pagbasa ang tibuok Bibliya, apan samag nailhan ko sa unang higayon ang akong Maglalalang. Akong nahibaloan ang iyang mga paagi, mga gusto ug dili-gusto, iyang pagkagamhanan, ug iyang halalom nga kaalam. Ang pagbasa sa Bibliya kada adlaw nakapalig-on kanako panahon sa pipila ka masulub-on kaayong mga yugto sa akong kinabuhi.”
8. Sa unsang paagi magamhan kita sa Pulong sa Diyos?
8 Kon regular kitang nagbasag usa ka bahin sa Pulong sa Diyos, gitugotan natong ‘magamhan’ kita sa mensahe niini. (Basaha ang Hebreohanon 4:12.) Kana makaumol sa atong pagkatawo ug kita mahimong mas kahimut-anan kang Jehova. Kinahanglan ka bang mag-eskedyul ug dugang oras sa pagbasa sa Bibliya ug pagpamalandong sa mga pulong niini?
9, 10. Unsay nalangkit sa pagkasinati sa Pulong sa Diyos? Iilustrar.
9 Ang pagkasinati sa Bibliya wala lang maglangkit sa pagkahibalo sa ginaingon niini. Sa adlaw ni Pablo, kadtong mga bata sa espirituwal nahibalo sa inspiradong pulong sa Diyos. Ugaling lang, wala nila makita ang kabililhon niini kay wala nila kini ipadapat. Wala sila masinati niini kay wala sila magpagiya niini sa paghimog maalamong mga desisyon sa ilang kinabuhi.
10 Aron masinati sa Pulong sa Diyos, kinahanglang mahibalo ka sa giingon niini ug ipadapat ang maong kahibalo. Ang kasinatian sa usa ka sister nga ginganlag Kyle nagpakita kon sa unsang paagi mahimo kini. Gikalalis ni Kyle ang iyang isigkatrabahante. Unsay iyang gihimo aron kadto mahusay? Misaysay siya: “Nahinumdom ko dayon sa Roma 12:18, nga nag-ingon: ‘Kon mahimo, kutob sa inyong maarangan, makigdinaitay sa tanang tawo.’ Busa gihangyo ko siya nga mag-estorya mi human sa trabaho.” Nagmalamposon kaayo ang ilang panag-estoryahay, ug ang kauban ni Kyle sa trabaho nakadayeg kaniya tungod sa paghimo niadto. “Nasayran ko nga maayo gayod ang resulta kon ipadapat nato ang mga prinsipyo sa Bibliya,” matod ni Kyle.
Makakat-on nga Magmasinugtanon
11. Unsay nagpakita nga dili sayon nga magmasinugtanon ilabina kon lisod ang mga kahimtang?
11 Dili sayon ang pagpadapat sa atong nahibaloan sa Kasulatan, ilabina kon lisod ang mga kahimtang. Pananglitan, wala madugay human pagawsa ni Jehova ang mga anak sa Israel gikan sa pagkaulipon sa Ehipto, sila “nakiglalis kang Moises” ug nagpadayon “sa pagbutang kang Jehova sa pagsulay.” Ngano? Tungod kay sila walay tubig nga mainom. (Ex. 17:1-4) Wala pa dangtig duha ka bulan human nga sila nakigsaad sa Diyos ug miuyon sa pagbuhat sa “tanang pulong nga gisulti ni Jehova,” gilapas na nila ang iyang balaod bahin sa pagsimbag diyosdiyos. (Ex. 24:3, 12-18; 32:1, 2, 7-9) Ang pagdugay ba ni Moises didto sa Bukid sa Horeb, sa dihang siya midawat ug instruksiyon, maoy hinungdan nga sila nangahadlok? Naghunahuna kaha sila nga ang mga Amalekanhon mosulong pag-usab kanila ug ang mga Israelinhon walay mahimo kon wala si Moises, nga gigamit ni Jehova kaniadto sa pagpildi sa mga Amalekanhon? (Ex. 17:8-16) Kana posible, apan bisan kon unsa pay hinungdan, ang mga Israelinhon “wala magmasinugtanon.” (Buh. 7:39-41) Si Pablo nag-awhag sa mga Kristohanon nga ‘buhaton ang kutob sa ilang maarangan’ aron dili “mahulog sa samang sumbanan sa pagkadili-masinugtanon” nga gipakita sa mga Israelinhon sa dihang nangahadlok sila sa pagsulod sa Yutang Saad.—Heb. 4:3, 11.
12. Sa unsang paagi nakakat-on si Jesus sa pagkamasinugtanon, ug unsay kaayohan niana?
12 Aron mouswag ngadto sa pagkahamtong, kinahanglang buhaton nato ang kutob sa atong maarangan sa pagsugot kang Jehova. Sumala sa panig-ingnan ni Jesu-Kristo, ang pagkamasinugtanon kasagarang makat-onan gikan sa mga butang nga giantos. (Basaha ang Hebreohanon 5:8, 9.) Una moanhi si Jesus sa yuta, siya nagmasinugtanon na sa iyang Amahan. Apan, nag-antos siyag pisikal ug mental nga kasakitan sa yuta tungod sa pagbuhat sa kabubut-on sa iyang Amahan. Pinaagig pagkamasinugtanon ilalom sa grabeng kalisdanan, si Jesus ‘nahimong hingpit’ alang sa bag-ong posisyon ingong Hari ug Hataas nga Saserdote, nga gitagana sa Diyos alang kaniya.
13. Unsay nagpakita nga kita nakakat-on sa pagkamasinugtanon?
13 Komosta kita? Determinado ba natong sugton si Jehova bisan pag magsagubang kitag makapaguol nga mga problema? (Basaha ang 1 Pedro 1:6, 7.) Tin-aw ang tambag sa Diyos bahin sa moralidad, pagkamatinud-anon, tukmang paggamit sa dila, personal nga pagbasa ug pagtuon sa Kasulatan, pagtambong sa Kristohanong mga tigom, ug pagpakigbahin sa pagsangyaw. (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Masinugtanon ba kita kang Jehova niining mga butanga bisan ilalom sa kalisdanan? Ang atong pagkamasinugtanon maoy usa ka ilhanan nga kita nag-uswag ngadto sa pagkahamtong.
Kristohanong Pagkahamtong—Nganong Mapuslanon?
14. Iilustrar kon sa unsang paagi mahimong panalipod ang pag-uswag ngadto sa pagkahamtong.
14 Usa gayod ka panalipod nga ang mga gahom sa pagsabot sa usa ka Kristohanon tukmang nabansay aron iyang maila ang maayo ug daotan diha sa kalibotang “nawad-an na sa tanang moral nga pagbati.” (Efe. 4:19) Pananglitan, tagda ang usa ka brader nga ginganlag James, nga regular nagbasa ug nagpabili sa mga basahon bahin sa Kasulatan. Iyang gidawat ang usa ka trabaho diin ang tanan niyang kauban pulos babaye. “Bisag daghan kanila ang adunay luag nga sukdanan sa moral,” matod ni James, “usa ka empleyado ang morag may maayo nga panggawi ug nagpakitag interes sa kamatuoran sa Bibliya. Apan, usa ka higayon niana nga kami rang duha sa lawak-trabahoan, gusto niyang makigromansa kanako. Abi kog nangomedya lang siya apan naglisod gyod ko sa pagpugong kaniya. Nahinumdom ko dayon sa kasinatian nga giasoy sa Ang Bantayanang Torre bahin sa usa ka brader nga gitental usab sa iyang trabahoan. Ang artikulo naghisgot sa panig-ingnan ni Jose ug sa asawa ni Potipar.b Giwakli ko dayon ang maong babaye, ug siya midagan sa gawas.” (Gen. 39:7-12) Mapasalamaton si James nga walay laing nahitabo ug iyang nahuptan ang hinlong tanlag.—1 Tim. 1:5.
15. Sa unsang paagi ang pag-uswag ngadto sa pagkahamtong makapalig-on sa atong kasingkasing?
15 Mapuslanon usab ang pagkahamtong kay makapalig-on kini sa atong kasingkasing ug makapugong kanato nga ‘madani sa nagkadaiya ug langyaw nga mga pagtulon-an.’ (Basaha ang Hebreohanon 13:9.) Sa dihang maningkamot kitang mouswag sa pagkahamtong, kita maghunahuna kanunay sa “mas hinungdanong mga butang.” (Filip. 1:9, 10) Busa kita mahimong mas mapasalamaton sa Diyos ug sa iyang tanang tagana alang sa atong kaayohan. (Roma 3:24) Ang usa ka Kristohanon nga ‘hingkod sa mga gahom sa pagsabot’ makaugmad sa ingon nga pagkamapasalamaton ug mas masuod kang Jehova.—1 Cor. 14:20.
16. Unsay nakatabang sa usa ka sister sa pag-ugmad ug ‘lig-ong kasingkasing’?
16 Usa ka sister nga ginganlag Louise miadmitir nga sa dugaydugayng panahon human sa iyang bawtismo, ang pangunang hinungdan sa iyang pag-alagad mao ang pagpahimuot sa uban. “Wala ako magbuhat ug daotan,” matod pa niya, “apan sa akong kasingkasing kulang kog kadasig sa pag-alagad kang Jehova. Nakaamgo ko nga angay kong mag-usab aron bation ko nga gihatag nako kang Jehova ang tanan kutob sa akong maarangan. Ang labing dakong kausaban mao nga gihimo kong bug-os kasingkasing ang akong pagsimba kaniya.” Pinaagi sa maong pagpaningkamot, si Louise nakaugmad ug ‘lig-ong kasingkasing,’ ug kadto napamatud-ang hinungdanon sa dihang nagsagubang siyag makapaguol nga suliran sa panglawas. (Sant. 5:8) Si Louise miingon, “Nakigbisog ako pag-ayo, apan nasuod gyod ko kang Jehova.”
‘Magmasinugtanon Gikan sa Kasingkasing’
17. Nganong ang pagkamasinugtanon hinungdanon ilabina sa unang siglo?
17 Ang tambag ni Pablo nga ‘mouswag sa pagkahamtong’ nakaluwas sa mga Kristohanon nga nagpuyo sa Jerusalem ug sa Judea sa unang siglo. Kadtong misunod sa tambag nakabaton ug espirituwal nga pagsabot mao nga ilang nasabtan ang ilhanan nga gihatag ni Jesus ug sila ‘mikalagiw ngadto sa kabukiran.’ Sa ilang pagkakita sa “dulumtanang butang nga magpahinabog kalaglagan . . . nga nagabarog diha sa usa ka balaang dapit,” nga mao ang kasundalohan sa Roma nga naglibot ug nakasulod sa Jerusalem, sila nahibalo nga kadto panahon na sa pagkalagiw. (Mat. 24:15, 16) Sa pagtuman sa pasidaan ni Jesus, ang mga Kristohanon mikalagiw pagawas sa Jerusalem una pa kini malaglag ug sila mipuyo sa siyudad sa Pella sa bukirong rehiyon sa Gilead, sumala sa historyano sa relihiyon nga si Eusebius. Sa ingon ilang nalikayan ang kinagrabehang katalagman sa nahitala nga kasaysayan sa Jerusalem.
18, 19. (a) Nganong ang pagkamasinugtanon hinungdanon gayod sa atong adlaw? (b) Unsay hisgotan sa sunod artikulo?
18 Ang pagkamasinugtanon tungod sa pag-uswag ngadto sa pagkahamtong makaluwas usab ug kinabuhi sa dihang atong maatubang ang dakong katumanan sa tagna ni Jesus nga “aduna unyay dakong kasakitan” nga ang ingon niana wala pa mahitabo. (Mat. 24:21) Magmasinugtanon ba kita sa bisan unsang umaabot nga pahimangno nga atong madawat gikan sa “matinumanong piniyalan”? (Luc. 12:42) Pagkahinungdanon nga makakat-on kitang ‘magmasinugtanon gikan sa kasingkasing’!—Roma 6:17.
19 Kinahanglan natong bansayon ang atong mga gahom sa pag-ila aron modangat kita sa pagkahamtong. Mahimo nato kini pinaagi sa pagpaningkamot nga mas masinati sa Pulong sa Diyos ug makakat-on sa pagkamasinugtanon. Ang pag-uswag ngadto sa Kristohanong pagkahamtong mopatunghag mga suliran alang sa mga batan-on. Hisgotan sa sunod artikulo kon sa unsang paagi malamposong masagubang ang maong mga suliran.
[Mga footnote]
a Giilisan ang pipila ka ngalan.
b Tan-awa ang artikulo nga nag-ulohang “Gipalig-on sa Pag-ingong Dili sa Buhat nga Daotan,” diha sa Oktubre 1, 1999 nga isyu sa Ang Bantayanang Torre.
Unsay Imong Nakat-onan?
• Unsa ang espirituwal nga pagkahamtong, ug sa unsang paagi makab-ot nato kana?
• Sa unsang paagi ang pagkasinati sa Pulong sa Diyos makatabang sa atong pag-uswag ngadto sa pagkahamtong?
• Sa unsang paagi makakat-on kitang magmasinugtanon?
• Unsa ang mga kaayohan sa espirituwal nga pagkahamtong?
[Hulagway sa panid 10]
Ang pagpadapat sa tambag sa Bibliya makatabang kanato sa pagsulbad sa mga suliran sa hinamtong nga paagi
[Hulagway sa panid 12, 13]
Ang pagsunod sa tambag ni Jesus nakaluwas sa unang mga Kristohanon