“Kamo Gipalit Na sa Usa ka Bili”
“Kamo gipalit na sa usa ka bili. Busa himayaa ninyo ang Diyos diha sa inyong lawas.”—1 CORINTO 6:20.
1, 2. (a) Unsay nagbukas “sa mga dalan sa kagawasan gikan sa kamatayon”? (b) Unsay angayang pagahimoon aron mahimong legal ang halad ni Kristo, ingon sa gilandongan sa unsa?
“ANG matuod nga Diyos alang kanato maoy Diyos nga nagaluwas,” miingon ang salmista, “ug alang kang Jehova ang Ginoong Soberano iya ang kagawasan gikan sa kamatayon.” (Salmo 68:20) Ang halad ni Jesu-Kristo nagbukas nianang dalana. Apan aron ang halad mahimong tinuod legal, si Kristo angay nga magpakita sa atubangan sa Diyos mismo.
2 Kini gilandongan sa Adlaw sa Pagtabon sa Sala sa dihang ang hataas nga saserdote mosulod sa Labing Balaang dapit sa templo. (Levitico 16:12-15) “Apan,” misulat si apostol Pablo, “sa dihang si Kristo miabot ingong usa ka hataas nga saserdote . . . , siya misulod, dili, dili uban sa dugo sa mga kanding ug mga baka, kondili uban sa iyang kaugalingong dugo, kas-a sa tanang panahon ngadto sa balaang dapit ug nagkuha sa walay kataposang kaluwasan alang kanato. Kay si Kristo misulod, dili sa balaang dapit nga hinimo sa mga kamot sa mga tawo, nga maoy landong sa tinuod, kondili ngadto sa langit mismo, aron magpakita atubangan sa persona sa Diyos alang kanato.”—Hebreohanon 9:11, 12, 24.
Ang Gahom sa Dugo
3. (a) Giunsa paglantaw ang dugo sa mga magsisimba ni Jehova, ug ngano? (b) Unsay nagpakita nga ang dugo adunay legal nga gahom sa pagtabon sa mga sala?
3 Unsang papel ang gidula sa dugo ni Kristo diha sa atong kaluwasan? Sukad sa adlaw ni Noe, ang matuod nga mga magsisimba naglantaw sa dugo nga sagrado. (Genesis 9:4-6) Ang dugo nagadula ug hinungdanong bahin diha sa lakaw sa kinabuhi, kay ang Bibliya nag-ingon nga “ang kalag [o kinabuhi] sa unod anaa sa dugo.” (Levitico 17:11) Busa gikinahanglan sa Kasugoan ni Moises nga sa dihang ihalad ang usa ka hayop, ang dugo niini igabubo atubangan kang Jehova. Usahay ang dugo gibutang usab diha sa mga sungay sa altar. Tin-aw nga ang nagatabong gahom sa usa ka halad anaa sa dugo niini. (Levitico 8:15; 9:9) “Halos tanang butang mahinloan sa dugo sumala sa Kasugoan, ug gawas lamang nga igabubo ang dugo walay mahimong kapasayloan sa mga sala.”—Hebreohanon 9:22.
4. (a) Unsay gialagarang katuyoan sa pagdili sa Diyos sa paggamit ug dugo? (b) Unsay talagsaon bahin sa paagi sa pagpatay kang Jesus?
4 Nan, dili ikahibulong nga ubos sa Kasugoan, ang bisan unsa nga paggamit sa dugo sa dili husto nga paagi adunay silot nga kamatayon! (Levitico 17:10) Kitang tanan nasayod nga sa dihang nihit ang usa ka substansiya, o gidili pag-ayo ang paggamit niini, nagauswag ang bili niini. Ang pagdili ni Jehova sa paggamit sa dugo nagpakitang kini pagalantawon, dili ingong ordinaryo, kondili ingong mahal, bililhon. (Buhat 15:29; Hebreohanon 10:29) Kini nahiuyon uban sa binayaw nga katuyoang gidula sa dugo ni Kristo. Sa tukma, siya namatay sa paagi nga ang iyang dugo ginaula. Busa, dayag nga si Kristo naghalad dili lamang sa iyang tawhanong lawas kondili gibubo ang iyang kalag, gihalad ang iyang mismong kinabuhi ingong usa ka hingpit nga tawo! (Isaias 53:12) Wala wad-a ni Kristo ang legal nga katungod niana nga kinabuhi tungod sa pagkadili-hingpit, busa ang iyang gibubo nga dugo may dakong bili ug igapresentar atubangan sa Diyos sa pagtabon sa mga sala sa katawhan.
5. (a) Unsay gidala ni Kristo ngadto sa langit, ug ngano? (b) Unsay ebidensiya nga gidawat sa Diyos ang halad ni Kristo?
5 Dili madala ni Kristo ang literal nga dugo ngadto sa langit. (1 Corinto 15:50) Hinunoa, iyang gituman kon unsay nagsimbolo sa dugo: ang legal nga bili sa iyang gihalad nga hingpit tawhanong kinabuhi. Atubangan sa persona sa Diyos, iyang ikapasundayag nga pormal kana nga kinabuhi ingong usa ka lukat ilis sa makasasalang katawhan. Ang pagdawat ni Jehova niana nga halad nadayag sa Pentekostes 33 K.P., sa dihang ang balaang espiritu mikunsad diha sa 120 ka mga tinun-an sa Jerusalem. (Buhat 2:1-4) Si Kristo, pagaingnon pa, nanag-iya sa tawhanong kaliwat pinaagi sa pagpalit. (Galacia 3:13; 4:5; 2 Pedro 2:1) Busa, ang kaayohan sa lukat moagos na ngadto sa katawhan.
Ang Unang Nakabatog Kaayohan sa Lukat
6. Unsay mga kahikayan ang gihimo sa Diyos alang sa kapadapatan sa mga kaayohan sa lukat ni Kristo?
6 Apan, kini hinoon wala magpasabot nga ang katawhan pagatagan-an ug dihadihang kahingpitan sa panglawas, gawas lamang nga ang makasasalang kinaiyahan sa tawo mabuntog, ang kahingpitan sa panglawas maoy imposible. (Roma 7:18-24) Sa unsang paagi ug kanus-a ang pagkamakasasala mabuntog? Ang Diyos unang naghikay alang sa 144,000 langitnong ‘mga saserdote ngadto sa atong Diyos sa pagmando ingong mga hari ibabaw sa yuta’ uban kang Kristo Jesus. (Pinadayag 5:9, 10; 7:4; 14:1-3) Pinaagi kanila ang mga kaayohan sa lukat sa inanay ipadapat ngadto sa katawhan latas sa usa ka yugto sa usa ka libo ka tuig.—1 Corinto 15:24-26; Pinadayag 21:3, 4.
7. (a) Unsa ang bag-ong tugon, kinsa ang mga partido niana, ug unsa nga katuyoan ang gialagaran niini? (b) Nganong himoon ang usa ka kamatayon aron posible ang usa ka bag-ong pakigtugon, ug unsay gidula sa dugo ni Kristo?
7 Aron mahimo kana, ang 144,000 ka mga hari-saserdote “gipalit taliwala sa katawhan.” (Pinadayag 14:4) Kini mamahimo pinaagi sa “usa ka bag-ong pakigtugon.” Kini nga pakigtugon maoy usa ka kontrata tali kang Jehova nga Diyos ug sa espirituwal nga Israel sa Diyos alang sa mga membro niini sa pag-alagad ingong mga hari ug mga saserdote. (Jeremias 31:31-34; Galacia 6:16; Hebreohanon 8:6-13; 1 Pedro 2:9) Apan, sa unsang paagi posible ang usa ka pakigtugon tali sa Diyos ug sa dili-hingpit nga tawo? Si Pablo nagpatin-aw: “Diin adunay usa ka pakigtugon [tali sa Diyos ug sa dili-hingpit nga tawo], ang kamatayon sa tawo nga mihimog pakigtugon kinahanglang ikatagana. Kay matinuod ang usa ka pakigtugon ibabaw sa namatay nga mga biktima, sanglit kini dili ipadapat sa bisan unsa nga panahon samtang buhi pa ang mihimo sa pakigtugon.”—Hebreohanon 9:16, 17.
8, 9. Sa unsang paagi ang lukat nalangkit sa bag-ong pakigtugon?
8 Busa, ang halad lukat maoy hinungdanon alang sa bag-ong pakigtugon, nga si Jesus mao ang Tigpataliwala. Si Pablo misulat: “Adunay usa ka Diyos, ug usa ka tigpataliwala tali sa Diyos ug sa mga tawo, ang tawo, nga si Kristo Jesus, kinsa nagtugyan sa iyang kaugalingon nga usa ka katumbas nga lukat alang sa tanan—kini maoy pagapamatud-an sa iyang kaugalingong partikular nga mga panahon.” (1 Timoteo 2:5, 6) Kining mga pulonga ilabinang ikapadapat ngadto sa 144,000, uban kang kinsa gihimo ang bag-ong pakigtugon.
9 Sa dihang ang Diyos mihimog usa ka pakigtugon sa unodnong Israel, kini dili mahimong legal hangtod ang dugo sa hayop igaula sa halad. (Hebreohanon 9:18-21) Sa susama, aron mapalihok ang bag-ong pakigtugon, angay nga igaula ni Kristo ang “dugo sa pakigtugon.” (Mateo 26:28; Lucas 22:20) Uban kang Kristo nga nagalihok ingong Hataas nga Saserdote ug “tigpataliwala sa usa ka bag-ong pakigtugon,” ikapadapat sa Diyos ang bili sa dugo ni Jesus ngadto kanilang gidala sa bag-ong pakigtugon, nagpahinungod kanila sa tawhanong pagkamatarong sa legal nga paagi. (Hebreohanon 9:15; Roma 3:24; 8:1, 2) Ang Diyos unya magdala kanila ngadto sa bag-ong pakigtugon aron mahimong mga hari-saserdote sa langit! Sama sa ilang Tigpataliwala ug Hataas nga Saserdote, si Jesus motabang kanila nga mahuptan ang usa ka hinlo nga baroganan atubangan sa Diyos.—Hebreohanon 2:16; 1 Juan 2:1, 2.
Pagtigom sa mga Butang sa Yuta
10, 11. (a) Sa unsang paagi gipaabot nga saylo pa ang lukat sa dinihogang mga Kristohanon? (b) Kinsa ang ‘dakong panon,’ ug unsay ilang baroganan sa Diyos?
10 Ang dinihogang mga Kristohanon ba lamang ang makasinatig kagawasan pinaagi sa lukat, sa kapasayloan sa ilang mga sala? Dili, gipasig-uli sa Diyos nganha kaniya ang tanang ubang mga butang pinaagi sa pagpakig-uliay pinaagi sa giulang dugo diha sa kahoy sa pagsakit, ingon sa gipakita sa Colosas 1:14, 20. Kini naglakip sa mga butang sa langit (ang 144,000) maingon man ang mga butang sa yuta. Ang naulahi mao kadtong nahalinya alang sa kinabuhi sa yuta, mga tawo nga makapahimulos sa hingpit nga kinabuhi sa Paraisong yuta. Ilabina sukad sa 1935 nga dihay gihiusang paningkamot sa pagtigom sa maong mga tawo. Ang Pinadayag 7:9-17 naghubit kanila ingong “usa ka dakong panon” kinsa nakautang ug kaluwasan ngadto sa Diyos ug sa Kordero. Sila sa gihapon nagkinahanglan pa nga makalabang buhi “sa dakong kasakitan” ug ‘pagatultolan ngadto sa mga tubod sa mga tubig sa kinabuhi,’ kay ang Pinadayag 20:5 nagpakita nga ang maong mga tawo mabuhing bug-os, makabaton sa hingpit tawhanong kinabuhi, sa kataposan sa Usa ka Libo ka Tuig nga Pagmando ni Kristo. Kadtong kinsa unya makalabang sa usa ka kataposang pagsulay sa ilang hingpit tawhanong kahimtang ideklarar nga matarong alang sa kinabuhing walay kataposan sa yuta.—Pinadayag 20:7, 8.
11 Bisan pa niana, sa unang lakang, ang dakong panon “naghugas na sa ilang mga bisti ug gipaputi kini diha sa dugo sa Kordero.” (Pinadayag 7:14) Si Kristo wala mag-alagad ingong Tigpataliwala sa bag-ong pakigtugon ngadto kanila, apan sila makabenepisyo niini nga pakigtugon pinaagi sa kalihokan sa Gingharian sa Diyos. Apan, sa gihapon si Kristo nag-alagad ngadto kanila, ingong Hataas nga Saserdote, pinaagi kang kinsa si Jehova makahimo ug makapadapat sa lukat ngadto sa gidak-on sa ilang pagkahimong matarong karon ingong mga higala sa Diyos. (Itandi ang Santiago 2:23.) Sa panahon sa Milenyo, sila sa ngadto-ngadto “mahigawas gikan sa pagkaulipon sa kadunotan [hangtod sila sa kataposan] makabatog mahimayaong kagawasan sa mga anak sa Diyos.”—Roma 8:21.
12. Diha sa unsang pasikaranan ang Diyos nakiglabot uban sa matinumanong mga tawo sa wala pa ang kapanahonang Kristohanon?
12 Bahin sa ilang baroganan ngadto sa Diyos, mopatim-aw nga kadtong anaa sa dakong panon may diyutay nga kalainan gikan sa una-Kristohanong mga magsisimba. Bisan pa niana, ang Diyos makiglabot sa naulahi uban sa paglantaw sa umaabot nga tagana sa lukat. (Roma 3:25, 26) Sila makapahimulos sa kapasayloan sa ilang mga sala diha sa probisyonal nga paagi. (Salmo 32:1, 2) Imbes nga sa bug-os magpahigawas kanila sa “pagkahibalo sa mga sala,” ang mga halad sa hayop nahimong “usa ka tigpahinumdom sa mga sala.”—Hebreohanon 10:1-3.
13. Unsang mga bentaha ang atong nabatonan kay sa una-Kristohanong mga alagad sa Diyos?
13 Kini lahi sa mga Kristohanon karong adlawa. Sila nagasimba sumala sa usa ka lukat nga ginabayad na! Pinaagi sa ilang Hataas nga Saserdote, sila “makaduol uban ang kagawasan sa pagsulti ngadto sa trono sa dili takos nga kalulot.” (Hebreohanon 4:14-16) Ang pagkanapasig-uli ngadto sa Diyos dili maoy pipila ka kaugmarang pagalaoman pa kondili usa ka presenteng kamatuoran! (2 Corinto 5:20) Sa dihang sila makasala, sila makadawat ug tinuod nga kapasayloan. (Efeso 1:7) Sila makapahimulos sa usa ka tinuod nahinloang tanlag. (Hebreohanon 9:9; 10:22; 1 Pedro 3:21) Kini nga mga panalangin maoy usa ka pasiuna sa mahimayaong kagawasan sa mga anak sa Diyos nga mapahimuslan sa mga alagad ni Jehova sa umaabot!
Ang Kalalom sa Kaalam ug Gugma sa Diyos
14, 15. Sa unsang paagi gipasiugda sa lukat ang dili matugkad nga kaalam ni Jehova, maingon man ang iyang pagkamatarong ug gugma?
14 Pagkakahibulongang gasa gikan kang Jehova ang lukat! Kini dali nga hisabtan, apan makapahingangha gayod alang sa mga maalamon. Ang atong pagrepaso sa mga pag-obra sa lukat maoy pahapyaw lamang. Apan, kita makatuwaw duyog kang apostol Pablo: “O kalalom gayod sa kadagaya ug sa kaalam ug sa kahibalo sa Diyos! Pagkadili matugkad ang iyang mga paghukom ug pagkadili matukib ang iyang mga paagi!” (Roma 11:33) Ang kaalam ni Jehova gipakita nga niana siya makaarang sa pagluwas sa katawhan ug sa pagbayaw sa iyang pagkasoberano. Pinaagi sa lukat, “ang pagkamatarong sa Diyos gipadayag . . . Gihimo sa Diyos si [Kristo] ingong usa ka halad pasig-uli pinaagi sa pagtuo diha sa iyang dugo.”—Roma 3:21-26.
15 Walay pagsaway ang ikahan-ok ngadto sa Diyos sa pagpasaylo sa mga sala nga nahimo sa nangagi sa una-Kristohanong mga magsisimba. Dugang pa, wala pagsaway ang ikahan-ok batok kang Jehova sa pagdeklarar sa mga dinihogan nga matarong ingong iyang mga anak o sa dakong panon ingong iyang mga higala. (Roma 8:33) Sa dakong kapildihan sa iyang kaugalingon, ang Diyos sa bug-os legal, o matarong, sa iyang mga pakiglabot, sa bug-os nagtubag sa bakak nga pangangkon ni Satanas nga si Jehova maoy usa ka dili matarong nga magmamando! Ang dili mahakogong gugma sa Diyos alang sa iyang mga linalang sa ingon gipasundayag nga dili gayod kaduhaduhaan.—Roma 5:8-11.
16. (a) Diha sa unsang paagi gitagana ang lukat sa paghusay sa isyu sa pagkamaunongon sa mga alagad sa Diyos? (b) Sa unsang paagi ang lukat naghatag nato ug usa ka pasikaranan alang sa pagtuo diha sa usa ka umaabot bag-ong kalibotan sa pagkamatarong?
16 Ang paagi sa pagtagana sa lukat naghusay usab sa mga isyu nga naglangkit sa pagkamaunongon sa mga alagad sa Diyos. Ang pagkamasinugtanon lamang ni Jesus nakahimo niana. (Proverbio 27:11; Roma 5:18, 19) Apan dugang niana ang kurso sa kinabuhi sa 144,000 ka mga Kristohanon kinsa, bisan pa sa pagsupak ni Satanas, nagpabiling maunongon hangtod sa kamatayon! (Pinadayag 2:10) Ang lukat naghimo nga posible alang niini sa pagdawat sa ilang ganti sa pagkadili-mamatay—kinabuhing walay pagkadunot! (1 Corinto 15:53; Hebreohanon 7:16) Kini nagpanghimakak sa pangangkon ni Satanas nga ang mga alagad sa Diyos dili kasaligan! Ang lukat naghatag usab kanato sa usa ka malig-ong pasukaranan sa pagtuo sa mga saad sa Diyos. Atong makita ang usa ka gambalay sa kaluwasan nga sa “legal nga paagi naestablisar” pinaagi sa halad lukat. (Hebreohanon 8:6) Ang usa ka bag-ong kalibotan sa pagkamatarong sa ingon gipasalig!—Hebreohanon 6:16-19.
Ayaw Pakyasa ang Katuyoan Niini
17. (a) Sa unsang paagi gipakita sa uban nga gipakyas nila ang katuyoan sa lukat? (b) Unsay motukmod kanato nga magpabiling hinlo sa moral?
17 Aron makabenepisyo sa lukat, gikinahanglan nga ang usa mokuhag kahibalo, magatuo, ug magkinabuhi nga nahiuyon sa mga sukdanan sa Bibliya. (Juan 3:16; 17:3) Diyutay lamang, hinunoa, ang buot nga mobuhat niana. (Mateo 7:13, 14) Bisan taliwala sa matuod nga mga Kristohanon, ang pipila tingali “modawat sa dili takos nga kalulot sa Diyos ug nagpakyas sa katuyoan niini.” (2 Corinto 6:1) Pananglitan, sa milabay nga mga tuig linibo ang napalagpot tungod sa dili maayong paggawi sa sekso. Pagkamakauulaw kon lantawon ang nabuhat ni Jehova ug ni Kristo alang kanato! Dili ba ang pagpabili sa lukat moagda sa usa ka tawo nga molikay nga “hikalimtan ang pagkanahinloan na sa iyang mga sala sa nangagi”? (2 Pedro 1:9) Nan, sa tukma si Pablo nagpahinumdom sa mga Kristohanon: “Kamo gipalit na sa usa ka bili. Busa himayaa ninyo ang Diyos diha sa inyong lawas.” (1 Corinto 6:20) Ang paghinumdom niini mohatag kanatog kusganong panukmod nga magpabiling hinlo sa moral!—1 Pedro 1:14-19.
18. Sa unsang paagi ang usa ka Kristohanon nga nahulog sa seryosong sala sa gihapon makapahimulos sa lukat?
18 Komosta man kon ang tawo nahulog na ngadto sa seryosong sala? Angay niyang pahimuslan ang bentaha sa kapasayloan nga gitagana sa lukat, modawat sa tabang gikan sa mahigugmaong mga magtatan-aw. (Santiago 5:14, 15) Bisan kon gikinahanglan ang kusganong disiplina, ang usa ka mahinulsolong Kristohanon dili angay nga motalikod sa maong pagtul-id. (Hebreohanon 12:5) Kita aduna niining kahibulongang pasalig sa Bibliya: “Kon isugid nato ang atong mga sala, siya matinumanon ug matarong aron kita pasayloon sa atong mga sala ug maghinlo kanato gikan sa tanang pagkadili-matarong.”—1 Juan 1:9.
19. Unsay angayng panglantaw sa usa ka Kristohanon sa iyang dili maayong paggawi nga nahimo una pa makakat-on sa kamatuoran?
19 Usahay ang mga Kristohanon naminghoy pag-ayo tungod sa miaging dili maayong paggawi. “Una pa mahidangat sa kamatuoran,” misulat ang naminghoy nga igsoong lalaki, “ako ug ang akong asawa natakdan ug sakit sa kinatawo. Usahay bation namo nga mahugaw, ingon sa daw kami dili ‘angayan’ sa mahinlong organisasyon ni Jehova.” Tugotan nato, bisan human nga nahimong Kristohanon, ang pipila nakaanig pag-antos gikan sa miaging kasaypanan. (Galacia 6:7) Sa gihapon, walay katarongan nga mobatig kahugaw diha sa mga mata ni Jehova kon ang usa naghinulsol. “Ang dugo ni Kristo” makahimo sa “paghinlo sa atong mga tanlag gikan sa patayng binuhatan.”—Hebreohanon 9:14.
20. Sa unsang paagi ang pagtuo sa lukat makahupay sa usa ka Kristohanon sa wala kinahanglanang pagbati sa pagkasad-an?
20 Oo, ang pagtuo sa lukat motabang sa paghupay sa wala kinahanglanang mga palas-anon sa pagkasad-an. Usa ka batan-on igsoong babaye miangkon: “Ako nakigbisog sa mahugaw nga batasan sa masturbasyon sulod sa 11 na ka tuig karon. Halos ko na nga biyaan ang kongregasyon, mibati nga si Jehova dili buot sa usa ka tawong dulumtanan kaayo sa paghugaw sa iyang kongregasyon.” Apan, atong hinumdoman nga si Jehova maoy “maayo ug andam sa pagpasaylo.” basta kita sa mahunahunaon makig-away sa pagkadili-matarong, dili magpadaog niana!—Salmo 86:5.
21. Sa unsang paagi ang lukat makaapektar sa atong panglantaw niadtong kinsa nakasala kanato?
21 Ang lukat angay usab nga makaapektar kon sa unsang paagi kita makiglabot sa uban. Pananglitan, unsay imong reaksiyon sa dihang ang usa ka isigka-Kristohanon nakasala kanimo? Ikaw ba bukas nga nagpaabot sa samag-Kristo nga pagkamapasayloon? (Lucas 17:3, 4) Ikaw ba “maluloton ug kasingkasing, nga nagapasaylo sa [uban] sama nga ang Diyos usab nagapasaylo kanimo tungod kang Kristo”? (Efeso 4:32) O mohambin ka bag mga kabingkilan o moamoma ug kayugot? Kana sa pagkatinuod magpakyas sa katuyoan sa lukat.—Mateo 6:15.
22, 23. (a) Unsay epekto ang lukat diha sa atong mga tumong ug estilo sa kinabuhi? (b) Unsay angayng himoon sa tanang mga Kristohanon maylabot sa lukat?
22 Sa kataposan, ang pagpabili sa lukat angay nga adunay halalom nga epekto diha sa atong mga tumong ug estilo sa kinabuhi. Si Pablo miingon: “Kamo gipalit na sa usa ka bili; hunong na sa pagpaulipon sa mga tawo.” (1 Corinto 7:23) Ang mga panginahanglan ba sa ekonomiya—balay, trabaho, pagkaon, pamisti—sa gihapon mao ang sentro sa imong kinabuhi? O ikaw ba nagapangita pag-una sa Gingharian, nagbutang ug pagtuo sa saad sa Diyos sa pagtagana alang kanimo? (Mateo 6:25-33) Tingalig ikaw ulipon sa imong amo apan napakyas sa paghatag igong luna alang sa mga kalihokan nga teokratikanhon? Hinumdomi, si Kristo “nagtugyan sa iyang kaugalingon alang kanato nga iya unta nga . . . mahinloan ang usa ka katawhan nga iya gayod, masiboton alang sa maayong binuhatan.”—Tito 2:14; 2 Corinto 5:15.
23 “Salamat sa Diyos pinaagi ni Jesu-Kristo” alang niining pinakalabaw nga gasa—ang lukat! (Roma 7:25) Hinaot nga dili nato pakyason ang katuyoan sa lukat kondili magtugot niini nga mahimong usa ka tinuod nga puwersa sa atong mga kinabuhi. Sa hunahuna, sa pulong, ug sa buhat, hinaot nga sa kanunay atong mahimaya ang Diyos, mapasalamatong nahinumdom nga kita gipalit na sa usa ka bili.
Repasong mga Pangutana
◻ Nganong ang dugo giisip nga sagrado, ug sa unsang paagi ang dugo ni Kristo gitanyag atubangan kang Jehova sa langit?
◻ Unsang papel ang gidula sa dugo ni Kristo sa pagpamatuod sa bag-ong pakigtugon?
◻ Sa unsang paagi ang mga dinihogan ug ang dakong panon makabenepisyo sa lukat?
◻ Sa unsang paagi atong ikapakita nga wala nato pakyasa ang katuyoan sa lukat?
[Hulagway sa panid 16]
Ang nagatabong gahom sa usa ka halad mao ang dugo sa kinabuhi niini
[Hulagway sa panid 17]
Ang usa nga nagpabili sa pagpasaylo sa Diyos maoy andam nga magpaabot ug kapasayloan ngadto sa uban