Ang Pagtuo Makabalhin sa mga Bukid!
NAGHINAMHINAM ang mga tawo. Gidala sa amahan ang iyang patolon nga anak nga lalaki sa mga tawong gilantaw nga makaayo kaniya. Sa mahinamon, gipaabot ang pagkaayo. Apan walay nahitabo! Nasubo, milakaw ang amahan.
Niadtong gutloa laing upat ka tawo ang miabot ug taliwala kanila ang ilang lider, si Jesus sa Nazaret. Midagan paingon kaniya, ang amahan mihangyo: “Kaloy-i intawon ang akong anak, kay siya patolon ug masakiton, kay kanunay siyang mahulog sa kalayo ug sa tubig; ug gidala ko siya sa imong mga tinun-an, apan wala sila makaayo kaniya.”
“Dad-a siya dinhi kanako,” miingon si Jesus. Ang resulta? “Ug gibadlong ni Jesus kini, ug ang yawa migula gikan kaniya; ug ang bata naayo niadtong gutloa.” Oo, lain na usab nga milagro! Apan nganong wala makaayo ang mga tinun-an ni Jesus?
Gisaysay ni Jesus kon ngano, nga nagaingon: “Tungod sa kadiyutay sa inyong pagtuo.” Dayon siya mipadayon: “Kon may pagtuo kamo ingon ug liso sa mustasa, makaingon kamo niini nga bukid, ‘Bumalhin ka gikan dinhi ngadto didto,’ ug kini mobalhin, ug walay imposible alang kaninyo.”—Mateo 17:14-20.
Gikan niining tinuod sa kinabuhi nga eksperyensiya, matin-aw nga gamhanan ang pagtuo. Apan unsa gayod ang pagtuo? Kini ba matukod ug mapalig-on? Tinuod ba gayod kining makabalhin sa mga bukid?
Unsa ang Pagtuo?
Gibatbat ni apostol Pablo ang pagtuo ingong “ang seguradong mga butang nga atong ginapaabot, ang tin-aw nga mga kapahayagan [kun, katuohang ebidensiya] sa pagkanaa sa mga butang nga dili makita.” (Hebreohanon 11:1) Sa laing pagkasulti, ang pagtuo maoy katuohan nga ebidensiya sa usa ka butang nga dili makita. Wala kini ipasukad sa yanong hungihong kondili adunay malig-ong pundasyon. Busa, lahi ang pagtuo gikan sa pagkamatuotuohon. Gihubad sa usa ka diksiyonaryo ang pagkamatuotuohon ingong “pagtuo o pagtuo dayon, ila[bina] sa gamay o dili-tino nga ebidensiya.” Kasukwahi, ang tawo nga adunay tinuod nga pagtuo may malig-ong ebidensiya sa iyang gituohan. Busa, siya makasulti kanimo kon nganong kombinsido siya nga mahitabo ang usa ka butang. Ang amahan nga gihisgotan sa sinugdan adunay pipila ka ebidensiya nga nakapatuo kaniya nga makaayo si Jesus sa iyang anak. Unsa nga ebidensiya? Buweno, si Jesus naghimo nag mga milagro kapin sa duha na ka tuig, ug gidungog siya halos sa tibuok Palestina.—Lucas 7:17; Juan 10:25.
Ang pagtuo gibatbat usab nga “ang titulo-dokumento sa mga butang nga ginalaoman.” Ang tawo nga mopalit ug propidad sa layong lugar ug may titulo-dokumento sa iyang kamot adunay katuohang ebidensiya nga anaa ang propidad ug nga siya ang tag-iya niini, bisag wala siya makakita niini. Busa, sa ingon, ang tawo nga may pagtuo makapatunghag makitang ebidensiya sa iyang gituohan. Pananglitan, ingnon ta nga may pagtuo siya nga mopatunghag tinuod nga kalinaw si Jehova nga Diyos niining yutaa pinaagi sa Iyang Gingharian. Dayon ang indibibuwal kinahanglang adunay pamatuod nga naglungtad ang Diyos ug adunay gahom, kabubut-on, ug kaalam nga gikinahanglan sa pagpatunghag kalinaw ug nga Siya adunay natukod nga Gingharian alang nianang maong katuyoan. Kining maong ebidensiya kinahanglang malig-on sa pagkombinsi dili lamang sa tawo nga adunay pagtuo kondili sa uban usab nga ‘mangayo kaniya sa katarongan sa iyang paglaom’ alang sa kalinaw.—1 Pedro 3:15.
Pagtuo nga Makabalhin sa mga Bukid
Apan, may mangutana, ‘Ang gipasabot ba ni Jesus nga kining pagtuoha sa literal makabalhin sa mga bukid?’ Tingali gilakip ni Jesus kana, apan siya kanunayng migamit ug mga ilustrasyon. (Mateo 13:34) Busa anaa tingali sa iyang hunahuna ang mga kababagan nga samag mga bukid sa magtutuo. Sa pagkatinuod, ang pulong “bukid” masubsob nga gigamit nga nagkahulogang dakong kantidad, sama sa “bukid sa mga utang.” Nga makabalhin o makawalag samag-bukid nga kababagan ang tinuod nga pagtuo gipakita diha sa daghang modernong adlawng mga eksperyensiya.
Pananglitan, dili ka ba mouyon nga ang pagkahimong paralitiko gikan sa liog hangtod sa tiil maoy usa ka bukid? Apan, ang usa ka paralitiko nga nagpuyo sa Vancouver, B.C., Canada, dili lamang nakakat-on sa pagdibuho, pinaagi sa brotsa o paleta nga baba ang naghawid, kondili nagsustento sa iyang kaugalingon pinaagi sa pagpamaligya sa iyang mga dibuho. Dugang pa, ang iyang pagtuo nakapalihok kaniya sa pagpakigsulti sa uban mahitungod sa butang nga iyang nakat-onan gikan sa Bibliya, nga ginahimo kini diha sa iyang lingkoranan sa bakol o pinaagi sa pagsulat. Iyang imakinelya ang iyang mga sulat pinaagi sa pagtapoy sa mga tapoyanan sa makinelya ginamit ang gamayng lipak nga gihawiran sa iyang baba. Siya regular nga tigtambongan usab sa Kristohanong mga tigom ug nagahatag mga pakigpulong sa Tunghaan sa Teokratikanhong Ministeryo nga gidumala sa mga Saksi ni Jehova. Ang iyang pananglitan sa pagtuo, inubanan sa kuging pagtrabaho ug determinasyon, maoy tuboran sa pagdasig sa mga tawo sa iyang palibot.
Ang pagtuo sa Pulong sa Diyos ug sa iyang mga saad nakatabang usab sa uban. Pananglitan, daghan ang natabangan niini sa pagdaog sa dili-kristohanong mga batasan ug mga kustombre, sama sa kaduhaduhaang mga batasan sa negosyo, pagpangawat, pagtabako, panugal, paghuboghubog, espiritismo, seksuwal nga imoralidad, ug bakak nga mga relihiyosong mga batasan. Ang kinatibuk-ang basehanan niining tanang mga eksperyensiya mao ang pagkuhag katuohang ebidensiya nga naglungtad si Jehova nga Diyos, nga ang Bibliya mao ang iyang sinulat nga Pulong, ug nga ang iyang mga katuyoan nga gipadayag diha sa Kasulatan kasaligan ug mamatuman. Kining pagtuoha makabalhin sa mga bukid.