Nakahinumdom Ka Ba?

Napalandong ba nimog maayo ang dili pa dugay nga mga gula sa Ang Bantayanang Torre? Kon mao, tingali nakahinumdom ka sa mosunod:

◻ Sa unsang diwa nga gigamit ni Pablo ang terminong “tigpataliwala” sa dihang naghisgot kang Jesus diha sa 1 Timoteo 2:5, 6?

Niining tekstoha, gigamit ni Pablo ang Gregong pulong me·siʹtes alang sa “tigpataliwala,” diin ang maong termino dunay legal nga kahulogan, busa wala niya gamita kining pulonga sa dako nga diwa nga kumon sa daghang pinulongan. Busa, si Pablo wala mag-ingon nga si Jesus maoy Tigpataliwala sa Diyos ug sa tanang katawhan. Hinunoa, siya naghisgot kang Kristo ingong legal nga Tigpataliwala sa bag-ong pakigtugon, nga maoy nagpahimutang sa pasukaranan alang sa dinihogang mga sumusunod ni Kristo sa pag-ambit uban kaniya diha sa iyang langitnong Gingharian. (2 Corinto 5:1, 5; Efeso 1:13, 14; Hebreohanon 8:7-13)​—8/15, panid 30, 31.

◻ Diha sa Mateo 25:34, unsay gipasabot ni Jesus sa dihang siya miingon sa samag-karnero nga mga tawo: “Panunda ninyo ang gingharian nga giandam alang kaninyo sukad pa sa pagkatukod sa kalibotan”?

Si Jesus wala magpasabot nga kining samag-karnero nga mga tawo magmando uban kaniya sa langit. Hinunoa, panundon sa mga karnero ang yutan-ong dominyo sa Gingharian nga giandam kanila “sukad pa sa pagkatukod sa kalibotan” sa matubos nga katawhan. Niining paagiha sila mahimong yutan-ong mga anak sa ilang “Walay Kataposang Amahan,” ang Hari, si Jesu-Kristo. (Isaias 9:6, 7)​—9/1, panid 20.

◻ Gikinahanglan ba alang sa dinihogang nanghibilin nga mabuhi dinhi sa yuta sa pag-abiabi ug balik sa nabanhawng mga matinumanon nga nangamatay sa wala pa ang 33 K.P.?

Dili, kana dili na kinahanglan. Daghan sa dakong panon nga maluwas sa dakong kasakitan ginabansay na karon sa pag-atiman sa organisasyonal nga responsabilidad. Busa, sila makahimo sa pag-atiman sa kahimtang ug pagpasinati sa mga binanhaw sa “bag-ong yuta” ilalom sa “bag-ong mga langit.” (1 Pedro 3:13)​—9/1, panid 20, 21.

◻ Unsang mga butang ang nalangkit aron “maluwas”? (Buhat 16:30)

Ang pangunang kinahanglanon mao: “Tumuo kang Ginoong Jesus ug kamo maluwas.” (Buhat 16:31) Nalangkit niini ang pagkuhag tukmang kahibalo sa mga katuyoan sa Diyos ug sa iyang paagi sa pagluwas. Unya ang pagtuo kinahanglang ipakita diha kang Jesu-Kristo ingong Pangulong Ahente sa kaluwasan. (Juan 3:16; Tito 2:14) Kini nagbutang sa Kristohanon diha sa usa ka luwas nga kahimtang, apan siya karon kinahanglang molahutay sa pagbuhat sa kabubut-on sa Diyos ug magpadayon sa pagsunod sa tanang mga kinahanglanon sa Diyos alang sa nahibilin sa iyang kinabuhi. Diha lamang nga siya maluwas ngadto sa kinabuhing dayon. (Mateo 24:13)​—9/15, panid 7.

◻ Sa unsang paagi ang pagtuo ni Noe nagtunglo sa kalibotan? (Hebreohanon 11:7)

Ang pagkamasinundanon ni Noe ug ang matarong nga mga buhat nagpakita nga ang uban gawas kaniya ug sa iyang pamilya maluwas unta sa Lunop kon sila andam pa sa pagbag-o sa ilang paagi sa kinabuhi. Bisan pa sa mga pagpiit sa iyang dili-hingpit nga lawas, sa kalibotan sa iyang palibot, ug sa Yawa, napamatud-an ni Noe nga posible ang pagkinabuhi ug usa ka kinabuhi nga makapahimuot sa Diyos.​—10/1, panid 11.

◻ Nganong magbantay kita bisan sa pagtabi lamang?

Basin ug makasulti kita nga walay tuyo sa pagsakit kang bisan kinsa, apan kining dili-seryosong pagtabi mahimong makasakit kon soblion, dugangan o tuison, busa makabuong sa kadungganan sa tawo nga gilibak, nagakuha kaniya sa iyang maayong ngalan. (Proverbio 20:19)​—10/15, panid 13.

◻ Unsa ang mga bentaha kon ang mga kapikas sa kaminyoon managsamang pagkayugo?

Ang bana ug asawa makadasig sa usag usa sa pagsimba sa ilang Diyos. Dugang pa, sila makasalig sa Kasulatan sa paghusay sa ilang mga kabingkilan.​—11/1, panid 20.

◻ Sa unsang paagi ang Napulo ka Sugo makatabang kanato karong adlawa?

Gipadayag niini ang hunahuna ni Jehova bahin sa mga butang ug nag-alagad ingong mga pahinumdom sa atong kaakohan sa paghigugma sa Diyos ug sa silingan. (Mateo 22:37-39; 2 Timoteo 3:16, 17)​—11/15, panid 5, 6.

◻ Unsang tulo ka higayon nga misulti ang Diyos nga nadunggan ni Jesus ug sa ubang mga tawo?

Ang unang higayon mao ang panahon sa pagbawtismo ni Juan Bawtista kang Jesus (Mateo 3:17); ikaduha mao ang transpigurasyon ni Jesus nga nakita ni Santiago, Juan, ug Pedro (Mateo 17:5); ug ang ikatulo mao ang sa Nisan 10, upat ka adlaw sa wala pa mamatay si Jesus, sa dihang nadunggan ang tingog sa Diyos sa panon sa mga tawo nga nagtindog sa templo. (Juan 12:28)​—12/1, panid 8.