Kinsay Nagpaluyo Niining Tanan?

NANGHABAS sa kasagbotan sa iyang pagsuotsuot sa lasang sa Cambodia, si Henri Mouhot, usa ka ika-19ng siglong Pranses nga eksplorador, nakaabot sa usa ka lapad nga kanalkanal nga naglibot sa templo. Halos usa ka kilometro gikan sa iyang gibarogan, lima ka torre sa templo nagtuybo nga kapin sa 60 metros ngadto sa kahanginan. Kadto mao ang Angkor Wat, ang kinadak-ang relihiyosong monyumento sa yuta. Kini nakalahutay na sa mga elemento sulod sa pito ka siglo sa dihang nadiskobrehan kini ni Mouhot.

Maila ni Mouhot sa usa ka pagtan-aw nga ang natabonan sa mga lumot nga mga tinukod maoy buhat sa tawhanong mga kamot. “Gitukod sa usa ka karaang Michelangelo, kini mas maanindot pa kay sa bisan unsang butang nga gibilin kanato sa Gresya o Roma,” siya nagsulat. Bisan pa sa pagkabiniyaan niini sulod sa daghang siglo, segurado siya nga luyo sa matahom nga mga tinukod, adunay usa ka tigdisenyo.

Makaiikag, usa ka basahon sa kaalam nga gisulat sa daghang kasiglohan kanhi migamit ug samang pangatarongan sa pagpatin-aw kon nganong ang kalibotan sa atong palibot maoy produkto gayod sa usa ka Tigdisenyo. Gilalang gayod kini. Si apostol Pablo nagsulat: “Dayag, ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Ang uban tingali mosupak niini nga pagpaamgid, nga moingon: ‘Ang pag-obra sa kinaiyahan lahi nianang hinimo-sa-tawo.’ Apan, dili tanan sa mga siyentipiko ang mouyon niana nga pagsupak. Human midawat nga ang “biokemikal nga mga sistema dili maoy mga butang nga walay-kinabuhi,” si Michael Behe, kaubang propesor sa biokemistriya sa Lehigh University, nangutana: “Mahimo ba nga ang buhing biokemikal nga mga sistema madisenyo sa intelihenteng paagi?” Siya mipadayon sa pagpakita nga ang mga siyentipiko karon nagdisenyo sa paninugdang kausaban sa buhing mga organismo pinaagi sa maong mga metodo sama sa inhenyeriya sa genetika. Matin-aw, ang dili-buhi ug buhing mga butang madisenyo ug matukod! Sa pagtuki sa mikroskopikong kalibotan sa buhing mga selula, gihisgotan ni Behe ang labihan ka komplikadong mga sistema nga gilangkoban ug mga sangkap nga nagadepende sa usag usa aron makaobra. Ang iyang konklusyon? “Ang resulta niining tingob nga mga paningkamot sa pagtuki sa selula​—sa pagtuki sa kinabuhi sa molekula​—klarong nagpadayag nga ang selula maoy produkto sa ‘disenyo!’”

Ang mga kosmologo ug mga pisiko nakapanukiduki usab ug maayo sa kalibotan ug sa uniberso ug nakadangat ug pipila ka katingalahang mga kamatuoran. Pananglitan, sila karon nahibalo nga kon aduna may bisan usa ka gamay kaayong kausaban sa bili sa bisan unsang mga constant sa uniberso, ang uniberso mahimong wala gayoy kinabuhi.a Gitawag sa kosmologong si Brandon Carter kining mga kamatuorana nga katingalahang mga pagkaatol. Apan kon makasugat ka ug mga seryal sa misteryoso, konektadong mga pagkaatol, dili ka ba sa labing menos magduhaduha nga adunay usa nga nagpaluyo niini?

Sa pagkatinuod, adunay Tigdisenyo luyo niining tanang komplikadong mga sistema ug maayo kaayong pagkaangayng “mga pagkaatol.” Kinsa? “Ang pag-ila sa tigdisenyo pinaagi sa siyentipikanhong mga metodo mahimong malisod kaayo,” miangkon si Propesor Behe, ug iyang gisalig ang pangutana ngadto sa “pilosopiya ug teolohiya” sa pagsulay sa pagtubag. Ikaw mismo tingali maghunahuna nga dili hinungdanon kanimo ang pangutana. Apan, kon makadawat ka ug maanindot nga pagkaputos nga pakete nga nasudlan sa butang nga imo gayod nga gikinahanglan, dili ka ba magtinguha sa pagkahibalo kon kinsay nagpadala niana kanimo?

Kita, sa mahulagwayong pagkasulti, nakadawat ug ingon niana nga pakete​—usa ka pakete nga nasudlan sa maanindot nga mga gasa nga nagpaposible kanato sa pagkabuhi ug sa pagkalipay sa kinabuhi. Kana nga pakete mao ang yuta, uban sa tanang talagsaong mga sistema niini nga makasustento ug kinabuhi. Dili ba kita magtinguha sa pagsusi kon kinsay naghatag kanato niining mga gasaha?

Makalipay, ang Tigpadala sa pakete nagpatapot ug usa ka nota diha niana. Ang “nota” mao kanang karaang basahon sa kaalam nga gikutlo sa sinugdan​—ang Bibliya. Diha sa pangbukas nga mga pulong niini, ang Bibliya nagtubag nga may pagkatalagsaong kayano ug katin-aw sa pangutana kon kinsa ang naghatag kanato sa pakete: “Sa sinugdanan gibuhat sa Diyos ang mga langit ug ang yuta.”​—Genesis 1:1.

Diha sa iyang “nota” gipaila sa Maglalalang ang iyang kaugalingon pinaagi sa ngalan: “Mao kini ang giingon sa matuod nga Diyos, si Jehova, ang Maglalalang sa mga langit . . . , ang Usa nga nagbuklad sa yuta ug sa mga abot niini, ang Usa nga naghatag ug gininhawa sa katawhan nga anaa niini.” (Isaias 42:5) Oo, si Jehova mao ang ngalan sa Diyos nga nagdisenyo sa uniberso ug nagbuhat sa mga lalaki ug mga babaye sa yuta. Apan kinsa si Jehova? Unsang matanga siya nga Diyos? Ug nganong ang tanang tawo sa yuta angay magpatalinghog kaniya?

[Mga footnote]

[Hulagway sa panid 3]

Ang Angkor Wat gitukod sa mga tawo

[Hulagway sa panid 4]

Sa dihang makadawat ka ug gasa, dili ka ba magtinguha sa pagkahibalo kon kinsay nagpadala niini?