-
Unsay Giingon sa Bibliya Bahin sa Sekso?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 41
Unsay Giingon sa Bibliya Bahin sa Sekso?
Daghan ang dili komportableng estoryahan ang bahin sa sekso. Pero dihang hisgotan sa Bibliya ang bahin sa sekso, kini prangka pero sa matinahorong paagi. Ang giingon niini makahatag natog kaayohan. Ug mao gyod nay atong madahom, kay ang Bibliya naggikan kang Jehova, ang atong Maglalalang. Nahibalo siya kon unsay pinakamaayo para nato. Iyang gipakita kon unsay atong himoon aron mapalipay siya ug kon unsay makatabang aron mabuhi ta hangtod sa hangtod.
1. Unsay panghunahuna ni Jehova bahin sa sekso?
Ang sekso regalo gikan kang Jehova. Gusto niya nga makahatag nig kalipay sa lalaki ug babaye nga kasado. Kini nga regalo dili lang makahatag sa magtiayon ug mga anak kondili paagi pod ni nga mapakita nila ang ilang gugma sa usag usa sa normal ug makapalipay nga paagi. Kanay hinungdan nga ang Pulong sa Diyos nag-ingon: “Maglipay unta ka sa imong asawa nga imong gipangasawa dihang batan-on pa ka.” (Proverbio 5:18, 19) Gidahom ni Jehova nga ang minyong mga Kristohanon magmaunongon sa ilang kapikas aron dili sila makapanapaw.—Basaha ang Hebreohanon 13:4.
2. Unsa ang seksuwal nga imoralidad?
Ang Bibliya nag-ingon nga “kadtong mga nagahimog seksuwal nga imoralidad . . . dili makapanunod sa Gingharian sa Diyos.” (1 Corinto 6:9, 10) Ang mga magsusulat sa Bibliya nga nagsulat niini sa Grego naggamit sa pulong nga por·neiʹa sa paghisgot sa seksuwal nga imoralidad. Apil ana ang (1) pagseksoa sa duha ka tawo nga dili kasado, (2) homoseksuwalidad, ug (3) pagpakigsekso sa hayop. Atong mapalipay si Jehova ug makabenepisyo pod ta dihang atong ‘likayan ang seksuwal nga imoralidad.’—1 Tesalonica 4:3.
TUN-IG DUGANG
Sayra kon unsay imong himoon aron malikayan ang seksuwal nga imoralidad ug kon unsang kaayohan ang imong makuha kon magpabilin kang hinlo sa moral.
3. Pahilayo sa seksuwal nga imoralidad
Ang matinumanong tawo nga si Jose nakigbisog sa pagpabiling hinlo sa moral. Basaha ang Genesis 39:1-12, ug dayon hisgoti kini nga mga pangutana:
Unsay nakapalihok kang Jose sa pagkalagiw, o pagpahilayo, sa seksuwal nga imoralidad?—Tan-awa ang bersikulo 9.
Para nimo, husto ba ang desisyon ni Jose? Ngano?
Sa unsang paagi masundog sa mga batan-on karon si Jose ug makapahilayo sa seksuwal nga imoralidad? I-play ang VIDEO.
Gusto ni Jehova nga isalikway natong tanan ang imoralidad. Basaha ang 1 Corinto 6:18, ug dayon hisgoti kini nga mga pangutana:
Unsang mga situwasyon ang posibleng mahimong hinungdan nga makahimog seksuwal nga imoralidad ang usa?
Unsay imong himoon aron makapahilayo ka gikan sa imoralidad?
4. Kaya nimong suklan ang tentasyon
Nganong lisod usahay suklan ang tentasyon sa paghimog seksuwal nga imoralidad? I-play ang VIDEO, ug dayon hisgoti ang mosunod nga pangutana:
Sa video, dihang nakita sa brader nga ang iyang hunahuna ug binuhatan posibleng mahimong hinungdan nga luiban niya ang iyang asawa, unsay iyang gihimo?
Bisan ang matinumanong mga Kristohanon makigbisog usahay aron magpabiling hinlo ang ilang hunahuna. Unsay imong himoon aron dili ka mag-imadyin ug imoral nga mga butang? Basaha ang Filipos 4:8, ug dayon hisgoti kini nga mga pangutana:
Unsang mga butanga ang angay natong hunahunaon?
Nganong ang pagbasag Bibliya ug ang pagkahimong busy sa pag-alagad kang Jehova makatabang nga masuklan nato ang tentasyon sa paghimog sala?
5. Ang mga sukdanan ni Jehova makahatag natog kaayohan
Si Jehova nahibalo kon unsay pinakamaayo para nato. Iya tang gisultihan kon unsay atong himoon aron magpabiling hinlo sa moral ug kon unsay mga kaayohan sa paghimo niana. Basaha ang Proverbio 7:7-27 o i-play ang VIDEO, ug dayon hisgoti ang mosunod nga mga pangutana:
Sa unsang paagi gibutang sa usa ka batan-on ang iyang kaugalingon sa makapatental nga situwasyon?—Tan-awa ang Proverbio 7:8, 9.
Sumala sa Proverbio 7:23, 26, ang seksuwal nga imoralidad naay grabeng mga resulta. Kon magpabilin tang hinlo sa moral, unsang mga problema ang atong malikayan?
Nganong ang moral nga kahinlo motabang nato nga mabuhi hangtod sa hangtod?
Ang uban naghunahuna nga dili mahigugmaon ang giingon sa Bibliya bahin sa homoseksuwalidad. Pero gusto ni Jehova, ang Diyos sa gugma, nga ang tanan mabuhi hangtod sa hangtod. Aron mokuwalipikar ta ana, kinahanglang magkinabuhi ta subay sa iyang mga sukdanan. Basaha ang 1 Corinto 6:9-11, ug dayon hisgoti kini nga pangutana:
Ang homoseksuwal lang ba nga mga tinguha ang dili maayo sa panan-aw sa Diyos?
Aron mapalipay ang Diyos, kitang tanan kinahanglang mohimog mga kausaban. Naa bay kaayohan kon ato nang paningkamotan? Basaha ang Salmo 19:8, 11, ug dayon hisgoti kini nga mga pangutana:
Para nimo, rasonable ba ang moral nga mga sukdanan ni Jehova? Nganong nakaingon ka ana?
Daghag natabangan si Jehova nga mosunod sa iyang moral nga mga sukdanan. Matabangan pod ka niya
ANG UBAN MOINGON: “Dili man sayop nga magsekso ang duha ka tawo, basta nagkahigugmaay sila.”
Unsay imong isulti?
SUMARYO
Ang sekso regalo ni Jehova nga makapalipay sa bana ug asawa.
Review
Unsay apil sa seksuwal nga imoralidad?
Unsay makatabang nato aron malikayan ang seksuwal nga imoralidad?
Unsay kaayohan kon sundon nato ang moral nga mga sukdanan ni Jehova?
SUSIHA
Susiha kon nganong importante sa Diyos nga ang lalaki ug babaye magpakasal.
“Unsay Giingon sa Bibliya Bahin sa Pag-ipon nga Walay Kasal?” (Web article)
Sayra kon nganong ang sukdanan sa Bibliya bahin sa homoseksuwalidad wala magpasabot nga dumtan nato ang mga homoseksuwal.
Sayra kon nganong ang mga balaod sa Diyos bahin sa tanang buhat sa pagpakigsekso makahatag natog proteksiyon.
Sa eksperyensiya nga “Sila Naghatag Kanakog Dignidad,” tan-awa kon unsay nakapalihok sa usa ka homoseksuwal nga magbag-o aron mapalipay niya ang Diyos.
“Ang Bibliya Makabag-o sa Kinabuhi” (Ang Bantayanang Torre, Abril 1, 2011)
a Kini nga mga buhat nga wala uyoni sa Diyos naglakip sa daghang buhat sama sa pagpakigsekso, pagpakigsekso pinaagi sa baba o sa lubot, ug paghikap sa kinatawo sa uban sa seksuwal nga paagi.
-
-
Unsay Giingon sa Bibliya Bahin sa Pagkatagsaanon ug Kaminyoon?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 42
Unsay Giingon sa Bibliya Bahin sa Pagkatagsaanon ug Kaminyoon?
Sa ubang kultura, ang mga tawo naghunahuna nga dili sila magmalipayon kon dili sila magminyo. Pero dili tanang minyo malipayon ug dili tanang tagsaanon dili malipayon. Ang tinuod, ang Bibliya nag-ingon nga ang pagkatagsaanon ug ang kaminyoon parehong regalo.
1. Unsa ang mga kaayohan kon ang usa dili minyo?
Ang Bibliya nag-ingon: “Ang usa nga magminyo naghimog maayong desisyon, apan ang usa nga dili magminyo naghimog mas maayong desisyon.” (Basaha ang 1 Corinto 7:32, 33, 38.) Sa unsang mga paagi nga ang pagkadili-minyo “mas maayong desisyon”? Ang dili minyong mga Kristohanon walay atimanon nga panginahanglan sa kapikas. Busa mas naa silay kagawasan. Pananglitan, ang uban nagpalapad sa ilang ministeryo sa makapainteres nga mga paagi, sama sa pag-adto sa ubang lugar aron isangyaw ang maayong balita. Labaw sa tanan, mas daghan silag panahon sa pagpakigsuod kang Jehova.
2. Unsa ang mga kaayohan kon ang usa minyo sa legal nga paagi?
Ang kaminyoon, sama sa pagkatagsaanon, naay nindot nga mga benepisyo. Ang Bibliya nag-ingon nga “ang duha mas maayo kay sa usa.” (Ecclesiastes 4:9) Tinuod ni ilabina sa mga Kristohanon nga nagpadapat sa mga prinsipyo sa Bibliya sa ilang kaminyoon. Ang mga magtiayon nga nagminyo sa legal nga paagi nanaad nga kanunay nilang higugmaon, tahoron, ug pabilhan ang usag usa. Ingong resulta, sagad mas mobati silag seguridad kay sa niadtong nag-ipon-ipon lang. Ug ang ilang mga anak mas mobati pod ug seguridad.
3. Unsay panghunahuna ni Jehova bahin sa kaminyoon?
Dihang gihimo ni Jehova ang unang kasal, siya miingon: “Ang lalaki mobiya sa iyang amahan ug inahan ug siya moipon sa iyang asawa.” (Genesis 2:24) Gusto ni Jehova nga ang bana ug asawa maghigugmaay ug mag-unongay samtang silang duha buhi. Iya lang itugot ang diborsiyo kon ang kapikas nakapanapaw. Sa ingon ana nga kahimtang, hatagan ni Jehova ug katungod ang inosenteng kapikas sa pagdesisyon kon makigdiborsiyo ba siya o dili.a (Mateo 19:9) Wala itugot ni Jehova ang poligamiya sa mga Kristohanon.—1 Timoteo 3:2.
TUN-IG DUGANG
Sayra kon unsay imong himoon aron magmalipayon ka—ug mapalipay nimo si Jehova—minyo man ka o dili.
4. Pahimusli pag-ayo ang regalo nga pagkatagsaanon
Giisip ni Jesus nga regalo ang pagkatagsaanon. (Mateo 19:11, 12) Basaha ang Mateo 4:23, ug dayon hisgoti kini nga pangutana:
Giunsa paggamit ni Jesus ang regalo nga pagkatagsaanon sa pag-alagad sa iyang Amahan ug sa pagtabang sa uban?
Ang mga Kristohanon puwedeng magmalipayon sa ilang pagkatagsaanon sama kang Jesus. I-play ang VIDEO, ug dayon hisgoti ang mosunod nga pangutana:
Sa unsang makapalipay nga mga paagi nga mapahimuslan sa mga Kristohanon ang ilang pagkatagsaanon?
Nahibalo ba ka?
Ang Bibliya wala mag-ingon kon unsa nga edad angayng magminyo ang usa. Pero nagdasig ni nga ang usa maghulat una nga ‘molapas siya sa pagbuswak sa pagkabatan-on,’ panahon nga kusog kaayo ang seksuwal nga tinguha nga makapalisod sa batan-on sa paghimog maalamong mga desisyon.—1 Corinto 7:36.
5. Piliag maayo kon kinsay imong minyoan
Ang pagpilig kapikas mao ang usa sa pinakaimportanteng desisyon nga imong himoon sa imong kinabuhi. Basaha ang Mateo 19:4-6, 9, ug dayon hisgoti kini nga pangutana:
Nganong dili angayng magdalidali ug minyo ang usa ka Kristohanon?
Sa pagpilig maayong kapikas, ang Bibliya makatabang nimo kon unsa nga mga hiyas ang imong tan-awon. Labaw sa tanan, pangitag kapikas nga nahigugma kang Jehova.b Basaha ang 1 Corinto 7:39 ug 2 Corinto 6:14. Dayon hisgoti kini nga mga pangutana:
Nganong angay nga alagad lang ni Jehova ang atong minyoan?
Unsa kahay bation ni Jehova kon magminyo tag wala mahigugma Niya?
Kon ang duha ka hayop nga lahi kaayo iuban pagyugo, mag-antos sila. Sa susama, ang Kristohanon nga magminyog dili alagad ni Jehova mag-antos ug daghang problema
6. Isipa ang kaminyoon sama sa pag-isip ni Jehova niini
Sa karaang Israel, gidiborsiyohan sa ubang lalaki ang ilang asawa tungod sa hinakog nga mga rason. Basaha ang Malaquias 2:13, 14, 16, ug dayon hisgoti kini nga pangutana:
Nganong ang supak sa Bibliya nga pagdiborsiyo gidumtan ni Jehova?
Ang pagpanapaw ug pagdiborsiyo makahatag ug dakong kasakit sa inosenteng kapikas ug sa mga anak
I-play ang VIDEO, ug dayon hisgoti ang mosunod nga pangutana:
Kon ang imong kapikas dili alagad ni Jehova, unsay imong mahimo aron magmalamposon ang imong kaminyoon?
7. Ipadapat ang mga sukdanan ni Jehova sa kaminyoon
Kinahanglan tingaling maningkamot pag-ayo ang usa sa pagpadapat sa mga sukdanan ni Jehova sa kaminyoon.c Pero panalanginan ni Jehova kadtong naghimo niana. I-play ang VIDEO.
Basaha ang Hebreohanon 13:4, ug dayon hisgoti kini nga mga pangutana:
Para nimo, rasonable ba ang mga sukdanan ni Jehova sa kaminyoon? Nganong kanay imong tubag?
Gidahom ni Jehova nga iparehistro sa mga Kristohanon ang ilang kaminyoon o diborsiyo, kay sa kadaghanang nasod balaod sa gobyerno nga himoon na. Basaha ang Tito 3:1, ug dayon hisgoti kini nga pangutana:
Kon minyo ka, segurado ba ka nga narehistro sa gobyerno ang imong kasal?
KON NAAY MANGUTANA: “Nganong magpakasal man gyod? Dili ba puwedeng ipon-ipon lang?”
Unsay imong itubag?
SUMARYO
Ang pagkatagsaanon ug kaminyoon regalo gikan kang Jehova. Minyo man ta o dili, kita magmalipayon kon magkinabuhi ta sumala sa kabubut-on ni Jehova.
Review
Unsay himoon sa usa aron mapahimuslan niya pag-ayo ang iyang pagkatagsaanon?
Nganong ang Bibliya nag-ingon nga alagad lang ni Jehova ang atong minyoan?
Sumala sa Bibliya, unsa lang ang rason sa pagpakigdiborsiyo?
SUSIHA
Unsay gipasabot sa pagminyo “diha lang sa Ginoo”?
“Mga Pangutana Gikan sa mga Magbabasa” (Ang Bantayanang Torre, Hulyo 1, 2004)
Tan-awa ang duha ka video nga makatabang nimo sa paghimog maayong mga desisyon bahin sa pagpakigdeyt ug kaminyoon.
Sayra kon nganong mibati ang usa ka brader nga labaw kaayo ang gihatag ni Jehova niya kay sa iyang gisakripisyo.
Unsa ang angayng konsiderahon sa usa sa dili pa siya maghunahuna nga makigdiborsiyo o makigbulag?
“Pasidunggi ang ‘Gihiusa Pagyugo sa Diyos’” (Ang Bantayanang Torre, Disyembre 2018)
b Sa ubang kultura, mga ginikanan ang mopilig minyoan sa ilang anak. Kon kanay kahimtang, konsiderahon una sa mahigugmaong mga ginikanan, dili ang kuwarta o kahimtang sa kinabuhi sa ilang pilion, kondili kon siya ba nahigugma kang Jehova.
c Kon naa kay kaipon ug wala pa mo makasal, personal nga desisyon kon imo ba siyang bulagan o pakaslan.
-