Kon sa Unsang Paagi Ikaw Makakaplag ug Tinuod nga Gugma
Unsay imong mahimo aron makakaplag ug gugma ug aron mahimong mas hiligugmaon, nga dili lang sa romantikong diwa? Magpadato? Magpaguwapa o magpaguwapo?
ANG mga lalaki ug mga babaye, kay nalingla sa paanunsiyo ug naimpluwensiyahan sa media, kasagarang maghunahuna nga kini ang solusyon. Siyempre, natural ug angayan lang nga kita mabalaka sa atong panagway, apan ang katahom—nga temporaryo lang bisan ilalom sa labing maayong mga kahimtang—dili maoy lig-ong bugkos sa malungtarong relasyon. Ni ang bahandi. Ang makatabang mao ang pagpakita ug dili-mahakogong gugma ngadto sa uban. “Batasana ang paghatag, ug pagahatagan kamo sa mga tawo,” si Jesus nagtudlo. (Lucas 6:38) Sa laktod nga pagkasulti, kon buot ka nga higugmaon, pagpakita ug gugma ngadto sa uban.
Sa unsang paagi atong mahimo kana? Nagsulat ubos sa pagtultol sa balaang espiritu sa Diyos, gitubag ni apostol Pablo kanang pangutanaha. Siya nag-ingon nga ang gugma aktibo ug kini makita, dili pinaagi sa emosyon, kondili ilabina sa himoon niini ngadto sa uban ug sa kon unsay ginalikayan niini nga himoon. Matikdi ang giingon ni Pablo: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Kini moantos sa tanang butang, motuo sa tanang butang, molaom sa tanang butang, molahutay sa tanang butang.”—1 Corinto 13:4-7.
Unsay imong bation kon ang usa ka tawo buotan kanimo o modawat kanimo bisan pa sa gagmayng mga butang nga imong isulti o buhaton nga makalagot kaniya? Dili ka ba madani sa tawo nga may tim-os nga kabalaka kanimo, nga dili daling masuko, ug nga mapasayloon ug matinud-anon bisag dili sayon nga magpasaylo ug magmatinud-anon?
Busa, buhata kana sa uban. Si Jesus miingon: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Malisod usahay ang pagpakitag gugma, apan kini takos sa paningkamot. Una, mas higugmaon ka sa imong pamilya, mga higala, kapikas, o umaabot nga kapikas. Dugang pa, ikaw magmalipayon tungod sa pagbuhat sa kon unsay husto, sa paghatag sa imong kaugalingon ngadto sa uban. Oo, “adunay labaw nga kalipay sa paghatag kay sa pagdawat.”—Buhat 20:35.
Pagkat-on ug Gugma Gikan sa Kinatas-ang Awtoridad
Si Jehova mao ang Diyos sa gugma, ang kinatas-ang awtoridad maylabot niining hiyasa. (1 Juan 4:8) Ang iyang gugma maoy nagpalihok kaniya sa pagtudlo niining hiyasa sa tanan nga buot mokat-on. Tagda ang pipila ka pananglitan sa mga prinsipyo sa Bibliya nga nagtudlo kanato sa paghigugma ug sa pagkahimong hiligugmaon.
“Magmaabtik sa pagpaminaw, magmahinay sa pagsulti.” (Santiago 1:19) Usa ka surbi sa kapin sa 20,000 ka magtiayon ug managtrato nagpakita nga ang labing malipayong mga tawo mao kadtong dunay mga paris nga maayong mga tigpaminaw. Ang maayong komunikasyon hinungdanon sa usa ka relasyon. Usa ka propesor sa sosyolohiya misulat: “Kon buot ka nga magmagul-anon sa imong relasyon, hala uban sa tawo nga wala gayoy ideya kon unsay imong giantos. Labaw na kon siya nahibalo sa imong giantos apan dili makasabot kon nganong dakong butang alang kanimo ang imong gibating kalisod.” Siya midugang nga bisag magkalahi ang duha ka tawo sa daghang paagi, “kon ang imong paris nakasabot sa imong panglantaw ug sa epekto sa imong mga kasinatian diha sa imong kinabuhi, nan ang maong mga kalainan dili hinungdanon.”
“Kamo hagip-ot ug luna diha sa inyong malumong mga pagmahal. . . . Magpasangkad.” (2 Corinto 6:12, 13) Kita makabenepisyo kon kita magpasangkad sa atong gugma sa uban. Usa ka publikasyon gikan sa Harvard Medical School nag-ingon: “Gipakita diha sa daghang pagtuon nga ang mga tawong dunay makapatagbawng relasyon sa pamilya, mga higala, ug sa ilang komunidad mas malipayon, mas menos ug problema sa panglawas, ug mas taas ug kinabuhi.”
“Magmahunahunaon kita sa usag usa aron sa pagdasig ngadto sa paghigugma ug sa maayong mga buhat.” (Hebreohanon 10:24, 25) Kita maimpluwensiyahan sa atong mga kauban. Pinaagi sa paggugol ug panahon uban niadtong nagpasundayag ug tinuod nga Kristohanong gugma, ikaw mismo makaeksperyensiya niining hiyasa ug makakat-on sa pagpasundayag niini diha sa imong kinabuhi. Ang mga Saksi ni Jehova naningkamot sa pagpasundayag niining gugmaha sa ilang taliwala, kay nahibalo nga kini ilhanan sa matuod nga mga tinun-an ni Jesus. (Juan 13:35) Ikaw kinasingkasing nga gidapit sa pagtambong sa ilang Kristohanong mga tigom.
Kon sa imong hunahuna ikaw wala higugmaa, ayaw kahigawad o ayaw hukmi ang imong kaugalingon. Hinumdomi nga si Jehova nakakita sa imong kahimtang. Nahinumdom ka ba kang Lea, nga gihisgotan sa unang artikulo niini nga serye? Nakita ni Jehova ang iyang kahimtang, ug siya nakabaton ug mga anak nga unom ka lalaki ug usa ka babaye—usa ka dakong panalangin sa usa ka panahon diin ang mga anak giisip ingong bililhong bahandi! Dugang pa, ang tanang anak nga lalaki ni Lea nahimong mga kagikan sa mga tribo sa Israel. (Genesis 29:30-35; 30:16-21) Pagkamakapahupay gayod alang kang Lea ang mahigugmaong kahingawa sa Diyos!
Sa bag-ong kalibotan nga gisaad diha sa Kasulatan, wala na unyay mobati nga siya wala higugmaa. Hinunoa, ang tinuod nga gugma molukop na sa tawhanong katilingban. (Isaias 11:9; 1 Juan 4:7-12) Busa atong ipasundayag na karon nga kita buot nga magkinabuhi didto, pinaagi sa pag-ugmad sa gugma nga gitudlo diha sa Bibliya ug gipasundayag sa Awtor niini. Oo, ang tinuod nga kalipay mabati dili lamang sa dihang kita pakitaan ug gugma kondili pinaagi usab sa atong pagpakitag dili-mahakogong gugma ngadto sa uban.—Mateo 5:46-48; 1 Pedro 1:22.
[Blurb sa panid 8]
“Adunay labaw nga kalipay sa paghatag kay sa pagdawat.”
[Hulagway sa panid 8]
Kon buot ka nga higugmaon, pagpakita ug gugma ngadto sa uban