Hupti “ang Gugma nga Imong Nabatonan sa Sinugdan”
“Pangupti pag-ayo ang imong nabatonan.”—PIN. 3:11.
1, 2. Unsay imong gibati sa dihang ikaw nakombinsir nga ang imong nakat-onan bahin kang Jehova mao ang kamatuoran?
MAHINUMDOM ka pa ba sa dihang una nimong nakat-onan ang kahibulongang palaaboton nga gitanyag ni Jehova sa masinugtanong katawhan? Kon lahi ang imong relihiyon kaniadto, unsay imong gibati sa dihang gisaysayan ka bahin sa mga katuyoan sa Diyos ginamit ang Bibliya, o sa dihang gipatin-aw kanimo ang lisod nga mga pagtulon-an? Tingali nasabtan nimo nga ikaw nahisalaag diay. Apan pagkadako sa imong kalipay nga ikaw nalamdagan na karon! Kon ikaw gimatuto sa Kristohanong mga ginikanan, mahinumdom ka pa ba sa imong gibati sa dihang ikaw nakombinsir nga ang imong nakat-onan bahin kang Jehova mao ang kamatuoran, ug nakadesisyon ka nga magkinabuhi uyon niana?—Roma 12:2.
2 Daghan sa imong mga igsoon sa kongregasyon ang makapamatuod kanimo nga sila nalipay gayod, nasuod kang Jehova, ug nagpasalamat nga ang Diyos nagkabig kanila. (Juan 6:44) Ang ilang kalipay nagdasig kanila sa pagpakigbahin sa mga kalihokan sa kongregasyon. Sa kadako sa ilang kalipay gipaambit nila kini ngadto sa uban. Ingon ba usab niana ang imong gibati?
3. Unsay kahimtang sa kongregasyon sa Efeso sa dihang gipadad-an sila ni Jesus ug mensahe?
3 Sa iyang mensahe sa kongregasyon sa Efeso sa unang siglo, si Jesus naghisgot bahin sa “gugma nga imong nabatonan sa sinugdan.” Daghan silag maayong mga hiyas, apan ang gugma nga una nilang gipakita alang kang Jehova nabugnaw. Busa giingnan sila ni Jesus: “Nahibalo ako sa imong mga buhat, ug sa imong kahago ug paglahutay, ug nga ikaw dili makaagwanta sa daotang mga tawo, ug nga gibutang mo sa pagsulay ang nanag-ingon nga sila mga apostoles, apan dili diay, ug nakaplagan mo nga sila mga bakakon. Nagapakita ka usab ug paglahutay, ug nag-antos ka tungod sa akong ngalan ug wala maluya. Bisan pa, ako adunay ikasulti batok kanimo, nga imong gibiyaan ang gugma nga imong nabatonan sa sinugdan.”—Pin. 2:2-4.
4. Nganong mahinungdanon karon ang mensahe ni Jesus sa mga taga-Efeso?
4 Ang tambag ni Jesus sa mga taga-Efeso ug sa ubang mga kongregasyon nga iyang gitumong sa basahon sa Pinadayag mapadapat usab sa mga kahimtang sulod sa usa ka panahon taliwala sa dinihogang mga Kristohanon gikan sa 1914 paunahan. (Pin. 1:10) Apan, posible nga bisan karon ang pipila ka Kristohanon mawad-an ‘sa gugma nga ilang nabatonan sa sinugdan’ alang kang Jehova ug sa kamatuoran. Atong susihon kon sa unsang paagi imong mahuptan, mapukaw, ug mapalig-on ang gugma ug kasibot nga imong gibati sa sinugdan alang sa Diyos ug sa kamatuoran, pinaagi sa paghinumdom ug pagpamalandong sa imong mga kasinatian.
Unsay Nakapakombinsir Kanimo sa Kamatuoran?
5, 6. (a) Ang matag Kristohanon angayng makombinsir sa unsa? (b) Unsay nakapakombinsir kanimo nga ang mga Saksi ni Jehova nagtudlo sa kamatuoran? (c) Unsay makatabang sa usa ka tawo sa pagpukaw sa gugma nga iyang nabatonan sa sinugdan?
5 Ang matag usa nga nagpahinungod kang Jehova kinahanglang ‘magpamatuod’ una sa iyang kaugalingon kon unsay “maayo ug dalawaton ug hingpit nga kabubut-on sa Diyos.” (Roma 12:1, 2) Sa bahin, naglakip kana sa pagkat-on sa kamatuoran sa Bibliya. Mahimong lainlain ang rason sa mga tawo sa ilang pagkakombinsir nga ang mga Saksi ni Jehova nagtudlo sa kamatuoran. Ang uban nakombinsir sa dihang ilang nabasa ang ngalang Jehova diha sa Bibliya o sa dihang ilang nasabtan ang tinuod nga kahimtang sa mga patay. (Sal. 83:18; Eccl. 9:5, 10) Ang uban nakadayeg sa gugma taliwala sa katawhan ni Jehova. (Juan 13:34, 35) Nadani usab ang uban sa dihang ilang nasabtan ang kahulogan sa pagkadili-bahin sa kalibotan. Sila nakahinapos nga ang tinuod nga mga Kristohanon dili diay makigbahin sa mga kagubot sa politika o sa mga gubat sa mga nasod.—Isa. 2:4; Juan 6:15; 17:14-16.
6 Kining mga katarongana ug daghan pang uban ang nakadasig sa daghang tawo sa paghigugma sa Diyos sa unang higayon. Gahinig panahon ang paghinumdom kon unsay nakapakombinsir kanimo sa kamatuoran. Ikaw lahi ug mga kahimtang ug kinaiya, busa ang imong pangunang mga rason sa paghigugma kang Jehova ug pagtuo sa iyang mga katuyoan tingali lahi sa uban. Lagmit kining mga katarongana anaa gihapon kanimo karon sama sa dihang una nimo kining nakat-onan. Wala mausab ang kamatuoran. Busa, ang paghinumdom sa maong mga panghunahuna ug pagbati makapukaw sa imong unang gugma sa kamatuoran.—Basaha ang Salmo 119:151, 152; 143:5.
Palig-ona ang Imong Unang Gugma
7. Nganong kinahanglang palig-onon nato ang atong unang gugma sa kamatuoran, ug unsaon man nato kini paghimo?
7 Lagmit daghan ang nabag-o sa imong kinabuhi sukad nga ikaw nagpahinungod kang Jehova. Mahinungdanon ang imong unang gugma sa kamatuoran, apan sa paglabay sa panahon, nagkinahanglan kag mas lalom nga gugma aron sa pag-atubang sa bag-ong mga problema nga nagsulay sa imong pagtuo. Bisan pa niana, si Jehova nagpalig-on kanimo. (1 Cor. 10:13) Busa ang imong mga kasinatian latas sa katuigan bililhon usab kanimo. Nakatabang kini sa pagpalambo sa gugma nga imong nabatonan sa sinugdan, ug kini maoy laing paagi sa pagpamatuod sa imong kaugalingon sa maayo ug dalawatong kabubut-on sa Diyos.—Jos. 23:14; Sal. 34:8.
8. Giunsa pagpaila ni Jehova ang iyang kaugalingon kang Moises, ug sa unsang paagi nailhan pa gayod sa mga Israelinhon ang Diyos?
8 Sa pag-ilustrar, tagda ang kahimtang sa mga Israelinhon sa dihang gibutyag ni Jehova ang iyang katuyoan sa pagluwas kanila sa pagkaulipon sa Ehipto. Nagpaila siya kang Moises nga nag-ingon: “Ako mamao kon unsay mamao ako.” (Ex. 3:7, 8, 13, 14) Nagpasabot kini nga si Jehova molihok kon unsay angay niyang himoon aron luwason ang iyang katawhan. Sa misunod nga mga panghitabo, nakita sa mga Israelinhon nga gibutyag ni Jehova ang lainlaing bahin sa iyang personalidad sumala sa gipangayo sa mga kahimtang—ingon nga Labing Gamhanan, Maghuhukom, Lider, Manluluwas, Manggugubat, ug Tigtagana.—Ex. 12:12; 13:21; 14:24-31; 16:4; Neh. 9:9-15.
9, 10. Unsang kahimtanga ang makatabang sa usa sa pagkahibalo bahin sa Diyos, ug nganong maayong handomon ang maong mga kasinatian?
9 Lahi ang imong kahimtang sa karaang mga Israelinhon. Apan lagmit may mga kasinatian ka nga nakapakombinsir kanimo nga ang Diyos interesado gayod kanimo, ug kini nagpalig-on sa imong pagtuo. Sa pipila ka paagi, mahimong si Jehova nakapamatuod kanimo ingong Tigtagana, Tighupay, o Magtutudlo. (Basaha ang Isaias 30:20b, 21.) O basin imong nakita nga gitubag gayod ang imong pag-ampo. May problema ka tingali, ug dayon gitabangan ka sa usa ka igsoon. O sa imong pagtuon nakabasa kag tukmang mga teksto nga mapadapat sa imong kahimtang.
10 Kon imong iasoy kini sa uban, basig dili ra kaayo sila matandog niini. Dili kini milagro aron sila mahinam. Apan alang kanimo kini makahuloganon kaayo. Oo, gihimo gayod ni Jehova kon unsay angay niyang himoon alang kanimo. Hinumdomi ang katuigan nga imong gigugol sa kamatuoran. Makahinumdom ka bag pipila ka okasyon nga imong gibati ang personal nga pag-atiman ni Jehova kanimo? Kon mao, ang paghinumdom niadtong mga okasyona ug sa imong gibati niadto makapukaw gayod sa imong kasingkasing sa samang pagbati sa gugma alang kang Jehova. Pabilhi gayod ang maong mga kasinatian. Pamalandonga kini. Pamatuod kini nga si Jehova interesado gayod kanimo, ug walay makapahunong kanimo sa pagsalig kaniya.
Susiha ang Imong Kaugalingon
11, 12. Kon ang gugma sa kamatuoran sa usa ka Kristohanon nabugnaw, unsay posibleng hinungdan, ug unsay gitambag ni Jesus?
11 Kon dili na sama kaniadto ang imong gugma sa Diyos ug sa kamatuoran, wala kini magpasabot nga nausab ang Diyos. Dili gayod mausab si Jehova. (Mal. 3:6; Sant. 1:17) Interesado siya kanimo kaniadto, ug siya interesado gihapon kanimo karon. Nan, nganong nausab man ang imong relasyon kang Jehova? Dili kaha kay nag-atubang kag dugang kapit-os o napunog mga kabalaka? Kaniadto tingali mas dulot ang imong pag-ampo, mas kugi ang imong pagtuon, ug kanunay kang namalandong. Mas masiboton ka ba sa ministeryo ug regular nga nagtambongan sa mga tigom kaniadto kay sa karon?—2 Cor. 13:5.
12 Wala ka tingali makamatikod niini, apan kon imo kining namatikdan, unsay hinungdan niini? Dili kaha nga ang nahiangay nga mga kabalaka, sama sa pagtaganag igong panginahanglan sa imong pamilya, pag-atiman sa panglawas, o susama niini, maoy nakapabugnaw sa imong pagbati sa pagkadinalian sa adlaw ni Jehova? Giingnan ni Jesus ang iyang mga apostoles: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag. Kay moabot kini sa tanang nagapuyo ibabaw sa tibuok nawong sa yuta. Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo.”—Luc. 21:34-36.
13. Gipakasama ni Santiago ang Pulong sa Diyos sa unsa?
13 Ang inspiradong magsusulat sa Bibliya nga si Santiago nag-awhag sa iyang kaubang mga magtutuo sa pagsusi sa ilang kaugalingon sa matinud-anong paagi ginamit ang Pulong sa Diyos. Siya misulat: “Mahimong mga magtutuman sa pulong, ug dili tigpaminaw lamang, nga limbongan ang inyong kaugalingon pinaagi sa bakak nga pangatarongan. Kay kon ang usa tigpaminaw lamang sa pulong, ug dili usa ka magtutuman, siya sama sa usa ka tawo nga nagtan-aw sa iyang kinaiyanhong nawong diha sa salamin. Kay siya motan-aw sa iyang kaugalingon, ug siya molakaw ug dihadiha malimot kon unsang matanga siya nga tawo. Apan siya nga magasud-ong pag-ayo sa hingpit nga balaod nga iya sa kagawasan ug magpadayon diha niana, kini nga tawo, tungod kay siya dili usa ka malimtanong tigpaminaw, kondili usa ka magtutuman sa buluhaton, malipayon siya sa iyang pagbuhat niini.”—Sant. 1:22-25.
14, 15. (a) Sa unsang paagi ang Bibliya makatabang kanimo nga mohamtong sa espirituwal? (b) Unsa nga mga pangutana ang angay nimong palandongon?
14 Ang usa ka tawo manamin aron maseguro nga siya presentable. Pananglitan, kon iyang makita nga nahiwi ang iyang korbata, iya kining tul-iron. Kon makita sa babaye nga gubot ang iyang buhok, iya kining sudlayon. Sa samang paagi, ang Kasulatan makatabang kanato sa pagsusi kon unsa kita. Kon itandi nato ang atong kaugalingon sa gisulti sa Bibliya nga angay natong buhaton, nan gigamit nato kini samag salamin. Apan unsay pulos sa pagpanamin kon dili nato tul-iron ang dili maayo nga atong nakita? Maalamon kita kon kita molihok sumala sa atong makita sa “hingpit nga balaod” sa Diyos ug mahimong “mga magtutuman” niini. Busa kon imong namatikdan nga nabugnaw ang imong unang gugma kang Jehova ug sa kamatuoran, maayong palandongon nimo kining mga pangutanaha: ‘Unsang mga pagpit-os ang akong ginaatubang, ug giunsa nako kini pagtagad karon? Giunsa man nako kini pagtagad kaniadto? Duna bay kalainan?’ Kon sa imong pagsusi makita nimo ang bisan unsang mga kahuyangan, nan tagda kana. Kon kinahanglan kang magbag-o, nan buhata dayon kana.—Heb. 12:12, 13.
15 Ang maong pagpamalandong makatabang usab kanimo sa paghimog makataronganong mga tumong aron mohamtong sa espirituwal. Gitambagan ni apostol Pablo ang iyang isigka-magbubuhat nga si Timoteo aron mouswag ang iyang ministeryo. Giawhag ni Pablo ang batan-on: “Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.” Angay usab kitang mamalandong kon unsaon nga kita mouswag ginamit ang Bibliya.—1 Tim. 4:15.
16. Unsang kapeligrohan ang angay nimong bantayan sa dihang magsusi sa kaugalingon ginamit ang Kasulatan?
16 Ang matinud-anong pagsusi sa kaugalingon lagmit magbutyag sa pipila nato ka kahuyangan. Makapaluya kini sa buot, apan ayawg paluya. Ang imong tumong sa pagsusi sa kaugalingon mao ang pag-ila kon unsay angayng pauswagon. Siyempre, buot ni Satanas nga ang usa ka Kristohanon mobating way pulos tungod sa iyang mga kahuyangan. Ngani, ang Yawa nangangkon nga ang Diyos nagsalikway sa tanang paningkamot sa pag-alagad kaniya. (Job 15:15, 16; 22:3) Kabakakan kini nga gipaningkamotan pagpukgo ni Jesus; si Jehova nag-isip sa matag kanato nga bililhon. (Basaha ang Mateo 10:29-31.) Ang pagkaamgo sa imong mga kahuyangan mopalig-on kanimo aron mapaubsanong maningkamot nga mabuntog kana, sa tabang ni Jehova. (2 Cor. 12:7-10) Kon ang sakit o katigulangon naglimite sa imong mahimo, nan paghimog makataronganong mga tumong, apan ayaw paghunong, ni tugotang mobugnaw ang imong gugma.
Mga Tagana nga Angayng Pasalamatan
17, 18. Unsang mga kaayohan ang maangkon kon palig-onon nimo ang gugma nga imong nabatonan sa sinugdan?
17 Daghang kaayohan ang maangkon kon padayon nimong lig-onon ang unang gugma nga imong nabatonan sa sinugdan. Mapalalom nimo ang imong kahibalo sa Diyos ug ang pagpabili sa iyang mahigugmaong paggiya. (Basaha ang Proverbio 2:1-9; 3:5, 6.) “Sa pagtuman [sa hudisyal nga mga desisyon ni Jehova] adunay dakong ganti,” ang salmista miingon. “Ang pahinumdom ni Jehova kasaligan, nga nagahimo nga maalamon sa walay kasinatian.” Dugang pa, “malipayon ang mga walay-ikasaway diha sa ilang dalan, ang mga nagasubay sa balaod ni Jehova.”—Sal. 19:7, 11; 119:1.
18 Ikaw mouyon gayod nga nabatonan mo ang daghang maayong mga tagana nga angayng pasalamatan. Nasabtan mo kon nganong ingon niini ang dagan sa kalibotan. Nakabenepisyo ka sa espirituwal nga pag-atiman ug pagtagad nga gihatag sa Diyos sa iyang katawhan karon. Sa walay duhaduha mapasalamaton ka usab nga si Jehova nagkabig kanimo diha sa iyang tibuok-kalibotang kongregasyon ug naghatag kanimog pribilehiyo nga mahimong usa sa iyang mga Saksi. Ipha ang imong mga panalangin! Lagmit daghan kini kon imong ilista. Kon himoon nimo kini kanunay, makatabang gayod kini kanimo sa pagpadapat sa tambag: “Pangupti pag-ayo ang imong nabatonan.”—Pin. 3:11.
19. Gawas pa sa pagpamalandong sa imong relasyon sa Diyos, unsa pay gikinahanglan sa paghupot ug lig-ong espirituwalidad?
19 Ang pagpamalandong kon sa unsang paagi nalig-on ang imong pagtuo latas sa katuigan maoy usa lamang ka paagi nga makatabang kanimo sa paghupot sa imong gugma kang Jehova. Kining magasina sublisubling nagtagad sa ubang mga kinahanglanon sa paghupot ug lig-ong espirituwalidad. Lakip niini ang pag-ampo, pagtambong ug pagpakigbahin sa Kristohanong mga tigom, ug masibotong pagsangyaw. Kini makatabang kanimo sa pagpukaw ug pagpalig-on sa gugma nga imong nabatonan sa sinugdan.—Efe. 5:10; 1 Ped. 3:15; Jud. 20, 21.
Unsaon Nimo Pagtubag?
• Sa unsang paagi makadasig kanimo karon ang imong mga katarongan sa paghigugma kang Jehova kaniadto?
• Ang pagpamalandong sa imong mga kasinatian latas sa katuigan makapakombinsir kanimo sa unsa?
• Nganong angay nimong susihon ang imong gugma sa Diyos?
[Hulagway sa panid 23]
Unsa nga kamatuoran ang nakadani ug nakapakombinsir kanimo?
[Hulagway sa panid 25]
Duna ka bay nakita sa imong kaugalingon nga angayng bag-ohon?