Kaluwasan

Kahubitan: Pagkalingkawas o kaluwasan gikan sa kapilegrohan o kalaglagan. Mahimong ang maong kaluwasan gikan sa mga kamot sa mga tigdaogdaog o mga tiglutos. Alang sa tanang matuod nga mga Kristohanon, si Jehova pinaagi sa iyang Anak nagataganag kaluwasan gikan sa presenteng daotang sistema sa mga butang maingon man kaluwasan gikan sa pagkaulipon sa sala ug kamatayon. Alang sa dakong panon sa matinumanong mga alagad ni Jehova nga nagapuyo sa “kataposang mga adlaw,” ang kaluwasan nagalakip ug pagkalabang-buhi latas sa dakong kasakitan.

Ang Diyos ba, sa iyang dakong kaluoy, sa kataposan magluwas sa tanang katawhan?

Ang 2 Pedro 3:9 ba nagapakita nga adunay unibersohanong kaluwasan? Nag-ingon kini: “Ang Ginoo dili langaylangayan bahin sa iyang saad, nianang paglangaylangay nga maoy pag-isip sa pipila, kondili mapailobon alang kaninyo, dili buot nga may bisan kinsa nga mawagtang [“siya dili gusto nga may bisan kinsa nga malaglag,” TEV], apan ang tanan makadangat gayod sa paghinulsol.” (RS) Maoy maluloy-ong tinguha sa Diyos nga ang tanang kaliwat ni Adan maghinulsol, ug siya sa madagayaon mihimog tagana alang sa kapasayloan sa mga sala niadtong maghinulsol gayod. Pero dili niya pugson ang bisan kinsa sa pagdawat sa maong tagana. (Itandi ang Deuteronomio 30:15-20.) Daghan ang nagasalikway niana. Sama silag talilumos nga tawo nga nagasalikway sa salbabida sa giitsa kini ngadto kaniya sa tawo nga nagatinguha sa pagtabang. Kinahanglang pagamatikdan, hinuon, nga dili walay kataposang impiyernong kalayo ang dulnganan sa dili maghinulsol. Ingon sa gibutyag sa 2 Pedro 3:9, sila nga dili maghinulsol mawagtang, o “malaglag.” Nagpunting usab ang 2Pe 3 bersikulo 7 (RS) sa “kalaglagan sa dili diyosnong mga tawo.” Wala ipasabot dinhi ang unibersohanong kaluwasan.—Tan-awa usab ang lintunganayng ulohang “Impiyerno.”

Ang 1 Corinto 15:22 ba nagapamatuod nga ang tanang tawo sa kaulahian mamaluwas ra? Nag-ingon kini: “Ingon diha kang Adan ang tanan mangamatay, mao man usab diha kang Kristo ang tanan mangabuhi.” (RS) Ingon sa gipakita sa palibot nga mga bersikulo, ang gihisgotan dinhi mao ang pagkabanhaw. Kinsa man ang banhawon? Ang tanan kansang hinungdan sa kamatayon maoy tungod sa sala ni Adan (tan-awang 1Co 15 bersikulo 21) pero wala usab sa personal nagpakasala nga tinuyo nga gihikyad sa Hebreohanon 10:26-29. Maingon nga si Jesus gibanhaw gikan sa Hades (Buh. 2:31), busa ang tanang uban pa nga anaa sa Hades “mangabuhi” pinaagi sa pagkabanhaw. (Pin. 1:18; 20:13) Kini ba silang tanan makahupot ug walay kataposang kaluwasan? Kanang kahigayonana pagabuksan ngadto kanila, pero dili ang tanan mangupot niana, ingon sa gibutyag sa Juan 5:28, 29, nga nagapakita nga ang sangpotanan ngadto sa uban maoy makadaot nga “paghukom.”

Unsa na man ang mga teksto sama sa Tito 2:11, nga nagtumong sa “kaluwasan sa tanang mga tawo,” sumala pa sa paghubad sa RS? Ang ubang mga teksto, sama sa Juan 12:32, Roma 5:18, ug 1 Timoteo 2:3, 4, naghatag ug susamang kahulogan sa RS, KJ, NE, TEV, ubp. Ang Gregong mga pulong nga gihubad “tanan” (all) ug “matag usa” (everyone) niining mga bersikuloha maoy gibawog nga mga porma sa pulong pas. Ingon sa gipakita sa Expository Dictionary of New Testament Words ni Vine (London, 1962, Tomo I, p. 46), ang pas mahimong magkahulogan ug “kada matang o pagkalainlain.” Busa, diha sa mga bersikulo sa itaas, inay kay “tanan,” ang pulong “kada matang sa” mahimong gamiton; o “tanang matang sa,” (all sorts of) sama sa gihimo diha sa NW. Hain man ang husto—“tanan” o ang kahulogang gipasabot sa “tanang matang sa”? Buweno, haing hubad ang mauyonon usab sa ubang bahin sa Bibliya? Ang ulahing hubad. Tagda ang Buhat 10:34, 35; Pinadayag 7:9, 10; 2 Tesalonica 1:9. (Matikdi: Ang ubang mga taghubad nagaila usab niini nga kahulogan sa Gregong pulong, ingon sa gipakita sa ilang mga paghubad niana sa Mateo 5:11—“tanang klase sa,” RS, TEV; “kada matang sa,” NE; “tanang paagi sa,” KJ.)

Aduna ba ing mga kasulatan nga tinong nagapakita nga ang uban dili gayod maluwas?

2 Tes. 1:9, RS: “Ilang maagoman ang silot sa walay kataposang kalaglagan ug pagkahininginlan gikan sa atubangan sa Ginoo ug gikan sa himaya sa iyang kagahom.” (Italiko gidugang.)

Pin. 21:8, RS: “Alang sa mga talawan, sa mga dili matinuohon, mga malaw-ay, alang sa mga mamumuno, mga makihilawason, mga lumayan, mga magsisimbag diyosdiyos, ug sa tanang mga bakakon, ang ilang bahin mao ang linaw nga nagasilaob sa kalayo ug asupre, nga mao ang ikaduhang kamatayon.”

Mat. 7:13, 14, RS: “Sumulod agi sa pultahan nga masigpit; kay dako ang pultahan ug sayon ang dalan, nga padulong sa kalaglagan, ug kadtong nagasulod niini maoy daghan. Kay masigpit ang pultahan ug ang dalan malisod, nga padulong sa kinabuhi, ug ang nakatultol niini maoy diyutay ra.”

Sa dihang luwas na ang usa ka tawo, siya ba padayon nang luwas?

Jud. 5, RS: “Buot ko nga ipahinumdom kaninyo, bisan tuod sa makausa ug sa dayon nasayran na ninyo ang tanan, nga siya nga nagluwas ug usa ka katawhan gikan sa yuta sa Ehipto, sa kapulihay milaglag kanilang wala managpanuo.” (Italiko gidugang.)

Mat. 24:13, RS: “Siya nga nagalahutay ngadto sa kataposan mamaluwas.” (Busa ang kataposang kaluwasan sa usa ka tawo dili ginatino sa panahon nga siya nagasugod sa pagtuo diha kang Jesus.)

Filip. 2:12, RS: “Ingon nga kamo sa kanunay nagmasinugtanon, busa karon, dili lamang maingon sa akong atubangan apan ilabina sa akong pagkawala, panlimbasogi ang inyong kaugalingong kaluwasan uban ang kahadlok ug pagkurog.” (Kini gipatumong ngadto sa “mga santos,” o mga balaan, didto sa Filipos, ingon sa gibutyag sa Filipos 1:1. Giaghat sila ni Pablo nga dili maghinobra pagsalig kondili sa pag-amgo nga ang ilang kataposang kaluwasan wala pa maseguro.)

Heb. 10:26, 27, RS: “Kon kita magpakasala sa tinuyo human makadawat sa kahibalo sa kamatuoran, wala nay nahibilin nga halad alang sa mga sala, kondili ang usa ka makalilisang nga pagpaabot sa hukom, ug usa ka kabangis sa kalayo nga magaut-ot sa mga kaaway.” (Busa dili uyon ang Bibliya sa ideya nga bisan unsang mga sala nga mahimo sa usa ka tawo human siya “maluwas” dili na mawala kaniya ang iyang kaluwasan. Kini nagadasig ug pagkamatinumanon. Tan-awa usab ang Hebreohanon 6:4-6, diin gipakita niana nga bisan ang usa ka tawong dinihogan sa balaang espiritu mahimong mawad-an sa iyang paglaom sa kaluwasan.)

Aduna bay gikinahanglan nga labaw pa sa pagtuo aron makabaton ug kaluwasan?

Efe. 2:8, 9, RS: “Pinaagig grasya [“dili-takos nga kalulot,” NW] kamo nangaluwas pinaagi sa pagtuo; ug kini dili sa inyong kaugalingong paghago, kini maoy gasa sa Diyos—dili tungod sa mga binuhatan, basin ang bisan kinsang tawo magpasigarbo gayod.” (Ang tibuok tagana sa kaluwasan maoy pagpasundayag sa dili-takos nga kalulot sa Diyos. Walay paagi nga ang usa ka kaliwat ni Adan makabaton ug kaluwasan sa iyang kaugalingon, bisan unsa pa ka halangdon ang iyang mga binuhatan. Ang kaluwasan maoy gasa gikan sa Diyos nga ihatag kanilang nagatuo sa nagapasaylo-sala nga bili sa halad sa iyang Anak.)

Heb. 5:9, RS: “Siya [Jesus] nahimong tuboran sa dayong kaluwasan ngadto sa tanan nga nagasugot kaniya.” (Italiko gidugang.) (Kini ba nahasupak sa pahayag nga ang mga Kristohanon “nangaluwas pinaagi sa pagtuo”? Dili gayod. Ang pagkamasinundanon nagapasundayag lamang nga ang ilang pagtuo maoy dalisay.)

Sant. 2:14, 26, RS: “Unsa may kapuslanan, mga igsoon ko, kon ang usa ka tawo magaingon nga siya adunay pagtuo apan walay binuhatan? Makaluwas ba kaniya ang iyang pagtuo? Kay maingon nga ang lawas nga bulag sa espiritu maoy patay, mao man usab ang pagtuo nga bulag sa binuhatan maoy patay.” (Ang tawo dili mahimong makahago sa kaluwasan pinaagig iyang mga binuhatan. Apan ang bisan kinsa nga adunay dalisay nga pagtuo magbaton ug mga buhat nga nagaduyog niana—mga buhat sa pagkamasinundanon sa mga sugo sa Diyos ug ni Kristo, mga buhat nga nagapasundayag sa iyang pagtuo ug gugma. Kon wala kanang mga buhata, ang iyang pagtuo maoy patay.)

Buh. 16:30, 31, RS: “‘Mga tawo, unsay gikinahanglan kong buhaton aron maluwas?’ Ug sila [Pablo ug Silas] miingon, ‘Tumuo ka sa Ginoong Jesus, ug maluwas ka, ikaw ug ang imong panimalay.’” (Kon ang maong tawo ug iyang panimalay nagtuo gayod, dili ba sila mobuhat nga uyon sa ilang pagtuo? Mobuhat gayod.)

Kon Adunay Moingon—

‘Ako luwas na’

Mahimong tubagon mo: ‘Nalipay ako sa pagkasayod niana, kay nagatug-an kana kanako nga ikaw nagatuo kang Jesu-Kristo. Ang buluhatong akong gipakig-ambitan mao ang gitudlo ni Jesus nga buhaton sa iyang mga sumusunod, nga mao, ang pagtug-an sa uban maylabot sa katukoran sa iyang Gingharian. (Mat. 24:14)’ Dayon tingali modugang: (1) ‘Unsa man kanang Ginghariana? Ang pag-abot niana magkahulogan ug unsa ngadto sa kalibotan? (Dan. 2:44)’ (2) ‘Unsang mga kahimtanga ang ania dinhi sa yuta ubos nianang langitnong kagamhanan? (Sal. 37: 11; Pin. 21:3, 4)’

O ikaw makaingon: ‘Nan pabilhan mo ang giingon ni apostol Pedro, dinhi sa Buhat 4:12, di ba? . . . Naghunahuna ka ba sukad kon pinaagi kang kinsa ang ngalang Jesus gihatag nganhi kanato aron motuo niana?’ Dayon tingali modugang: (1) ‘Si Jesus mismo nagtug-an kanato. (Juan 17:3)’ (2) ‘Matikdi nga miingon si Jesus nga iyang gipaila ang ngalan sa iyang Amahan. (Juan 17:6) Unsa ang Iyang personal nga ngalan? Unsang mga pagkalambigit ang mosantop sa imong hunahuna? (Ex. 3:15; 34:5-7)’

‘Ikaw ba naluwas na?’

Mahimong tubagon mo: ‘Hangtod karon, ako naluwas na. Nag-ingon ako niana kay nahibalo man usab ako sa tambag sa Bibliya nga dili mahinobra sa pagsalig sa atong baroganan. Nasinati ka ba niining tekstoha? (1 Cor. 10:12)’ Dayon tingali modugang: ‘Unsa ang katarongan alang niana? Ngadto sa mga tawong gianak pag-usab ug nakahupot sa langitnong paglaom (Heb. 3:1), ang apostol nga si Pablo misulat . . . (Heb. 3:12-14) Maoy pinaagi sa pag-uswag diha sa kahibalo sa Pulong sa Diyos nga atong mapalig-on ang atong pagtuo.’

O ikaw makaingon: ‘Akong matubag kana pinaagig pag-ingon lamang, Oo. Pero nahibalo ka ba nga ang Bibliya naghisgot ug labaw kay sa usa ka kaluwasan? Pananglitan, imo na ba natagad sukad ang kahinungdanon sa Pinadayag 7:9, 10, 14? . . . Busa, adunay mga tawo nga pagaluwason latas sa umaabot nga dakong kasakitan, aron magpuyo dinhi mismo sa yuta. (Mat. 5:5)’

‘Gidawat mo ba si Jesus ingong imong personal nga Manluluwas?’

Tan-awang mga panid 230, 231, ubos sa ulohang “Jesu-Kristo.”

‘Nag-ingon ka nga 144,000 lamang ang maluwas’

Mahimong tubagon mo: ‘Nalipay akong gipatungha mo kana aron katug-anan ka nako kon unsa gayod ang among gituohan. Ang kaluwasan bukas alang sa daghang katawhan basta sila gayod magpakitag tinuod nga pagtuo sa tagana nga gihimo sa Diyos pinaagi ni Jesus. Apan ang Bibliya nag-ingon nga 144,000 lamang ang moadto sa langit aron mahiuban kang Kristo. Imo na ba gayong nakita kana diha sa Bibliya? . . . Ania kini dinhi sa Pinadayag 14:1, 3.’ Dayon tingali modugang: (1) ‘Unsa may ilang buhaton didto sa langit? (Pin. 20:6)’ (2) ‘Maoy dayag nga sila magmando ibabaw sa lain. Kinsa man kaha kana? . . . (Mat. 5:5; 6:10)’