Ang Pagtuo Maghimo Kanatong Mapailobon ug Mainampoon
“Magmapailobon; lig-ona ang inyong mga kasingkasing, tungod kay ang pagkaanaa sa Ginoo duol na.”—SANTIAGO 5:8.
1. Nganong angay natong palandongon ang Santiago 5:7, 8?
ANG dugay nang gipaabot nga “pagkaanaa” ni Jesu-Kristo sa pagkakaron maoy usa ka kamatuoran. (Mateo 24:3-14) Labaw pa kay sukad masukad, ang tanan nga nag-angkong nagtuo sa Diyos ug kang Kristo adunay katarongan nga magpalandong niining mga pulonga ni disipulong Santiago: “Magmapailobon, . . . mga igsoon, hangtod sa pagkaanaa sa Ginoo. Tan-awa! Ang mag-uuma nagasigeg hulat sa bililhong bunga sa yuta, nga nagamapailobon niini hangtod nga iyang mabatonan ang sayo nga ulan ug ang ulahi nga ulan. Kamo usab magmapailobon; lig-ona ang inyong mga kasingkasing, tungod kay ang pagkaanaa sa Ginoo duol na.”—Santiago 5:7, 8.
2. Unsa ang pipila sa mga suliran nga giatubang niadtong gisulatan ni Santiago?
2 Kadtong gisulatan ni Santiago sa iyang inspiradong sulat kinahanglang magmapailobon ug magsulbad sa lainlaing mga suliran. Daghan ang nagalihok nga sukwahi sa gidahom niadtong nagaangkong nagtuo sa Diyos. Pananglitan, adunay kinahanglang buhaton bahin sa pipila ka tinguha nga naugmad diha sa mga kasingkasing sa pipila. Ang kalinaw kinahanglang ipasig-uli taliwala niadtong unang mga Kristohanon. Nagkinahanglan usab sila ug tambag bahin sa pagkamapailobon ug pagkamainampoon. Samtang atong konsiderahon kon unsay gisulti ni Santiago kanila, tan-awon nato kon sa unsang paagi ikapadapat nato ang iyang mga pulong sa atong kinabuhi.
Sayop nga mga Tinguha Makadaot
3. Unsa ang mga hinungdan sa panag-away sa kongregasyon, ug unsay makat-onan nato gikan niini?
3 Walay kalinaw taliwala sa pipila nga nag-angkong mga Kristohanon, ug ang sayop nga mga tinguha mao ang lintunganayng hinungdan niining maong kahimtang. (Santiago 4:1-3) Ang panagbingkil nagpahinabog pagkabungkag, ug ang pipila dili-mahigugmaong naghukom sa ilang mga igsoon. Nahitabo kini tungod kay may panagsangka sa pangandoy sa mahilayong kalipay diha sa ilang mga sangkap sa lawas. Hayan kita mismo kinahanglang mag-ampo alang sa tabang sa pagpakigbugno sa unodnong mga pangandoy sa dungog, gahom, ug mga kabtangan aron dili nato mabungkag ang kalinaw sa kongregasyon. (Roma 7:21-25; 1 Pedro 2:11) Taliwala sa pipila ka unang-siglong mga Kristohanon, ang kaibog naugmad nga misangpot sa madinumtanon, mabunoong espiritu. Sanglit ang Diyos wala magtagbaw sa ilang sayop nga mga tinguha, padayon silang nakigbugno sa paningkamot nga makab-ot ang ilang mga tumong. Kon kita adunay susamang sayop nga mga tinguha, kita tingali mangayo apan dili makadawat, sanglit ang atong balaang Diyos dili motubag sa maong mga pag-ampo.—Lamentaciones 3:44; 3 Juan 9, 10.
4. Nganong gitawag ni Santiago ang pipila nga “mga mananapaw,” ug sa unsang paagi angayng mag-apektar kanato ang iyang gipahayag?
4 Ang pagkakalibotanon, kasina, ug garbo naglungtad taliwala sa pipila ka unang mga Kristohanon. (Santiago 4:4-6) Si Santiago nagtawag sa pipila nga “mga mananapaw” tungod kay sila maoy mga higala sa kalibotan ug sa ingon sad-an sa espirituwal nga panapaw. (Ezequiel 16:15-19, 25-45) Segurado, dili nato buot nga mahimong kalibotanon sa tinamdan, sinultihan, ug mga lihok, tungod kay kana maghimo kanatong mga kaaway sa Diyos. Ang iyang Pulong nagpakita kanato nga ang “kiling sa pagkasina” maoy bahin sa daotang hilig, o “espiritu,” diha sa makasasalang mga tawo. (Genesis 8:21; Numeros 16:1-3; Salmo 106:16, 17; Ecclesiastes 4:4) Busa kon kita nakaamgo nga kita kinahanglang makigbugno sa kasina, garbo, o uban pang daotang hilig, pangayoon nato ang tabang sa Diyos pinaagi sa balaang espiritu. Ang maong gahom, nga gitagana pinaagi sa dili-takos nga kalulot sa Diyos, mas labaw pa kay sa “kiling sa pagkasina.” Ug samtang ginasupak ni Jehova ang mga mapahitas-on, hatagan niya kita ug dili-takos nga kalulot kon kita makigbugno sa makasasalang mga kiling.
5. Aron matagamtam ang dili-takos nga kalulot sa Diyos, unsang mga kinahanglanon ang angay natong kab-oton?
5 Sa unsang paagi madawat nato ang dili-takos nga kalulot sa Diyos? (Santiago 4:7-10) Aron mapahimuslan ang dili-takos nga kalulot gikan kang Jehova, kinahanglang sugton nato siya, dawaton ang iyang mga tagana, ug magpasakop sa bisan unsa nga iyang pagbuot. (Roma 8:28) Kinahanglan usab nga kita ‘mosukol,’ o ‘mobarog batok,’ sa Yawa. Siya ‘mokalagiw gikan kanato’ kon kita magpabiling malig-on ingong mga tigpaluyo sa unibersohanong pagkasoberano ni Jehova. Nabatonan nato ang tabang ni Jesus, kinsa nagpugong sa daotang mga ahensiya sa kalibotan aron walay makahimo kanato ug permanenteng kadaot. Ug ayaw gayod kini kalimti: Pinaagi sa pag-ampo, pagkamasinugtanon, ug pagtuo, kita makaduol sa Diyos, ug siya mapamatud-ang haduol kanato.—2 Cronicas 15:2.
6. Nganong si Santiago nagtawag sa pipila ka Kristohanon nga “mga makasasala”?
6 Nganong gipadapat ni Santiago ang pulong nga “mga makasasala” ngadto sa pipila nga nag-angkong nagtuo sa Diyos? Tungod kay sila sad-an sa “mga gubat” ug mabunoong pagdumot—mga tinamdan nga dili-dalawaton alang sa mga Kristohanon. (Tito 3:3) Ang ilang “mga kamot,” nga napuno sa daotang mga buhat, kinahanglang hinloan. Kinahanglan usab nilang lunsayon ang ilang “mga kasingkasing,” ang nahimutangan sa panukmod. (Mateo 15:18, 19) Kadtong “mga maduhaduhaon” nagpalingpaling tali sa pakighigala sa Diyos ug pakighigala sa kalibotan. Gipasidan-an sa ilang daotang pananglitan, dili kita mohunong sa pagtukaw aron ang maong mga butang dili magdaot sa atong pagtuo.—Roma 7:18-20.
7. Nganong gisultihan ni Santiago ang pipila nga ‘magbangotan ug manghilak’?
7 Giingnan ni Santiago ang iyang mga magbabasa nga “panagkaguol kamo ug pagbangotan ug panghilak.” Kon gipakita gayod nila ang diyosnong kasubo, kana maoy pamatuod sa paghinulsol. (2 Corinto 7:10, 11) Karong adlawa, ang pipila nga moingong sila adunay pagtuo nagtinguha sa pagpakighigala sa kalibotan. Kon si bisan kinsa kanato nagapangagpas sa maong dalan, dili ba angayng magbangotan kita sa atong huyang sa espirituwal nga kahimtang ug mohimog dihadihang mga lakang aron sa pagtul-id sa mga butang? Ang paghimog gikinahanglang mga pagpasibo ug pagdawat sa kapasayloan sa Diyos magpatungha ug pagbati sa pagsadya tungod sa hinlong tanlag ug mangayaong palaaboton sa walay-kataposang kinabuhi.—Salmo 51:10-17; 1 Juan 2:15-17.
Ayaw Paghukom sa Usag Usa
8, 9. Nganong dili kita angayng mosultig batok o maghukom sa usag usa?
8 Usa ka sala ang pagsultig batok sa kaubang magtutuo. (Santiago 4:11, 12) Bisan pa niana ang pipila hinawayon sa kaubang mga Kristohanon, tingali ingong resulta sa ilang kaugalingong pagpakamatarong sa kaugalingon nga tinamdan o tungod kay buot nilang ituboy ang ilang kaugalingon pinaagi sa pagpaubos sa uban. (Salmo 50:20; Proverbio 3:29) Ang Gregong pulong nga gihubad ug “pagpamulong batok” nagkahulogan ug pagkamabatokon ug nagsugyot ug paghimog hinobra o bakak nga sumbong. Sama ra kini nga grabeng gihukman ang igsoon. Sa unsang paagi katumbas kini sa ‘pagpamulong batok ug paghukom sa balaod sa Diyos’? Aw, ang mga eskriba ug mga Pariseo ‘maalistohong naghiklin sa sugo sa Diyos’ ug naghukom sumala sa ilang kaugalingong mga sukdanan. (Marcos 7:1-13) Sa susama, kon atong gihusgahan ang usa ka igsoon nga wala husgahi ni Jehova, dili ba kita ‘nagahukom sa balaod sa Diyos’ ug sad-ang nagsugyot nga kana nakulangan? Ug pinaagi sa dili-makataronganong pagsaway sa atong igsoon, wala nato tumana ang balaod sa gugma.—Roma 13:8-10.
9 Hinumdoman nato kini: “Usa lamang ang maghahatag ug balaod ug maghuhukom”—si Jehova. Ang iyang ‘balaod maoy hingpit,’ walay kulang. (Salmo 19:7; Isaias 33:22) Ang Diyos lamang ang adunay katungod sa pagpahimutang ug mga sukdanan ug mga lagda alang sa kaluwasan. (Lucas 12:5) Busa si Santiago nangutana: “Kinsa ka ba nga maghukom sa imong silingan?” Dili nato katungod ang paghukom ug paghusgar sa uban. (Mateo 7:1-5; Roma 14:4, 10) Ang pagpamalandong sa pagkasoberano sa Diyos ug pagkawalay-pinalabi ug ang atong kaugalingong pagkamakasasala angayng motabang kanato sa paglikay sa pagpakamatarong sa kaugalingon nga paghukom sa uban.
Likayi ang Mapasigarbohong Pagsalig sa Kaugalingon
10. Nganong angay natong konsiderahon si Jehova sa atong adlaw-adlaw nga kinabuhi?
10 Kinahanglang konsiderahon nato kanunay si Jehova ug ang iyang balaod. (Santiago 4:13-17) Nga wala-magtagad sa Diyos, ang masaligon sa kaugalingon moingon: ‘Karong adlawa o ugma mangadto kita niining siyudara, mogugol ug usa ka tuig didto, magnegosyo, ug magpaganansiya.’ Kon kita ‘nagatigom ug bahandi alang sa atong kaugalingon apan dili dato ngadto sa Diyos,’ ang atong kinabuhi mahimong matapos ugma ug mahimong wala na kitay kahigayonan sa pag-alagad kang Jehova. (Lucas 12:16-21) Sama sa giingon ni Santiago, nahisama kita sa usa ka gabon sa kabuntagon nga “nagapakita sa makadiyot ug unya mawagtang ra.” (1 Cronicas 29:15) Pinaagi lamang sa pagbaton ug pagtuo kang Jehova nga kita makalaom alang sa dumalayong kangaya ug walay-kataposang kinabuhi.
11. Unsay kahulogan sa pag-ingon, “Kon pagabut-on ni Jehova”?
11 Inay mapasigarbohong ibalewala ang Diyos, angay natong batonan kining maong baroganan: “Kon pagabut-on ni Jehova, kita mabuhi ug usab buhaton kini o kana.” Ang pag-ingon, “Kon pagabut-on ni Jehova” nagpakita nga kita naningkamot sa paglihok nga kaharmonya sa iyang kabubut-on. Basin kinahanglang magnegosyo aron sa pagsuportar sa atong pamilya, sa pagbiyahe sa buluhaton sa Gingharian, ug uban pa. Apan dili kita manghambog. Ang “ingon niana nga mga pagpagarbo maoy tuman-kadaotan” tungod kay gibalewala niana ang pagdepende sa Diyos.—Salmo 37:5; Proverbio 21:4; Jeremias 9:23, 24.
12. Unsay kahulogan sa mga pulong sa Santiago 4:17?
12 Dayag nga sa pagtapos sa iyang mga pahayag bahin sa pagsalig sa kaugalingon ug pagpasigarbo, si Santiago miingon: “Kon ang usa mahibalo sa pagbuhat sa kon unsay maayo apan wala magabuhat niini, kini usa ka sala alang kaniya.” Ang matag Kristohanon kinahanglang mapainubsanong moila sa iyang pagdepende sa Diyos. Kon dili niya buhaton kana, “kini usa ka sala alang kaniya.” Siyempre, ang samang prinsipyo mapadapat sa bisan unsang kapakyasan sa pagbuhat kon unsay gikinahanglan kanato sa pagtuo sa Diyos.—Lucas 12:47, 48.
Pasidaan Bahin sa mga Dato
13. Unsay giingon ni Santiago bahin niadtong naggamit sa ilang mga bahandi sa sayop nga paagi?
13 Tungod kay ang pipila ka unang mga Kristohanon nahimong materyalistiko o nagdayeg sa mga adunahan, si Santiago namulong ug hait nga mga pulong bahin sa pipila ka datong mga tawo. (Santiago 5:1-6) Ang kalibotanong mga tawo nga naggamit sa ilang mga bahandi sa sayop nga paagi ‘manghilak, nga managtiyabaw tungod sa mga kaalaotan nga nagasingabot kanila’ sa dihang gibalosan sila sa Diyos sumala sa ilang mga binuhatan. Niadtong mga adlawa, ang bahandi sa daghang tawo sa kinadak-ang bahin gilangkoban sa mga butang sama sa mga sapot, lugas, ug bino. (Joel 2:19; Mateo 11:8) Ang pipila niini mahimong madunot o ‘mahimong kutkoton sa anunugba,’ apan si Santiago nagpasiugda sa kawalay-pulos sa bahandi, dili sa pagkamadunoton niini. Bisan tuod ang bulawan ug plata dili tay-on, kon tagoan nato kana, sama kana ka walay-bili sa mga butang nga gitay-an. Ang “taya” nagpakita nga ang materyal nga bahandi wala gamita sa maayong paagi. Busa, kitang tanan kinahanglang mahinumdom nga “sama sa kalayo” ang “ginatigom sa ulahing mga adlaw” niadtong nagasalig sa ilang materyal nga mga kabtangan sa dihang ang kasuko sa Diyos modangat kanila. Sanglit nagkinabuhi kita “sa panahon sa kataposan,” ang maong mga pulong adunay linaing kahulogan alang kanato.—Daniel 12:4; Roma 2:5.
14. Sa unsang paagi ang mga dato kasagarang molihok, ug unsay angay natong buhaton bahin niana?
14 Ang adunahan kasagarang manglimbong sa ilang mga mag-aani, kansang gihikaw nga mga suhol ‘mituaw’ alang sa panimalos. (Itandi ang Genesis 4:9, 10.) Ang datong mga tawo sa kalibotan ‘nagpuyo sa kaluho.’ Nagpatuyang sa mahilayong kalipay, ilang gipatambok, gipatig-a ang ilang mga kasingkasing ug magahimo gihapon niini sa “adlaw” nga gitakda alang sa pagpatay kanila. Ilang ‘gihusgahan ug gibuno ang usa nga matarong.’ Si Santiago nangutana: “Wala ba siya magasupak kaninyo?” Apan ang laing hubad mao, “ang usa nga matarong; siya wala magasupak kaninyo.” Bisan unsa pa man, kinahanglang dili kita magmapihigon sa mga dato. Kinahanglang huptan natong una sa kinabuhi ang espirituwal nga mga intereses.—Mateo 6:25-33.
Pagtuo Motabang Kanato nga Magmapailobon
15, 16. Nganong hinungdanon kaayo nga magmapailobon?
15 Sanglit nakakomento na bahin sa madaogdaogong mga dato sa kalibotan, si Santiago nagdasig dayon sa gidaogdaog nga mga Kristohanon nga magmapailobon. (Santiago 5:7, 8) Kon ang mga magtutuo mapailobong moantos sa ilang mga kalisdanan, sila pagagantihan tungod sa pagkamatinumanon panahon sa pagkaanaa ni Kristo, sa dihang ang paghukom modangat sa ilang mga tigdaogdaog. (Mateo 24:37-41) Kadtong unang mga Kristohanon kinahanglang mahisama sa mag-uuma nga mapailobong nagahulat sa unang ulan sa tinghunlak, sa dihang siya makatanom, ug sa ulahing ulan sa tingpamulak nga moresulta sa bunga. (Joel 2:23) Kita usab kinahanglang magmapailobon ug maglig-on sa atong mga kasingkasing, ilabina nga “ang pagkaanaa sa Ginoo” nga si Jesu-Kristo ania na!
16 Nganong magmapailobon kita? (Santiago 5:9-12) Ang pagkamapailobon motabang kanato nga dili magmulo o manghupaw sa dihang ang kaubang mga magtutuo makapapikal kanato. Kon kita ‘manghupaw batok sa usag usa’ uban ang makadaot nga espiritu, kita husgahan sa Maghuhukom nga si Jesu-Kristo. (Juan 5:22) Karon nga ang iyang “pagkaanaa” nagsugod na ug siya “nagabarog atubangan sa mga pultahan,” ipasiugda nato ang kalinaw pinaagi sa pagpailob sa atong mga igsoon, kinsa nag-atubang ug daghang pagsulay sa pagtuo. Ang atong kaugalingong pagtuo mapalig-on sa dihang hinumdoman nato nga ang Diyos nagganti kang Job tungod kay mapailobon siyang miagwanta sa mga pagsulay. (Job 42:10-17) Kon kita magpakita ug pagtuo ug pagkamapailobon, makita nato nga “si Jehova malumo kaayo sa pagmahal ug maluluy-on.”—Miqueas 7:18, 19.
17. Nganong miingon si Santiago, “Hunonga na ang pagpanumpa”?
17 Kon dili kita mapailobon, basin magamit nato ang dila sa sayop nga paagi sa dihang nailalom sa kapit-os. Pananglitan, basin mahinayak kita sa pagpanumpa. “Hunonga na ang pagpanumpa,” matod ni Santiago, nga nagpasidaan batok sa dili-ugdang nga pagpanumpa. Ang kanunayng pagpalig-on sa mga pahayag pinaagig mga panumpa daw sinalingkapaw usab. Busa, kinahanglang mosulti lamang kita sa kamatuoran, nga tugotang ang atong oo magkahulogang oo, ug ang atong dili, dili. (Mateo 5:33-37) Siyempre, si Santiago wala mag-ingon nga sayop ang pagpanumpa aron mosugid sa kamatuoran diha sa korte.
Pagtuo ug Atong mga Pag-ampo
18. Ubos sa unsang mga kahimtang nga kita ‘magpadayon sa pag-ampo’ ug ‘moawit ug mga salmo’?
18 Ang pag-ampo kinahanglang adunay dakong bahin sa atong kinabuhi aron makontrolar ang atong sinultihan, magmapailobon, ug maghupot ug maayong pagtuo sa Diyos. (Santiago 5:13-20) Ilabina sa dihang nahiagom sa pagsulay kinahanglang kita ‘padayong mag-ampo.’ Kon kita malipayon, kita ‘moawit ug mga salmo,’ sama sa gibuhat ni Jesus ug sa iyang mga apostol sa dihang gisugdan niya ang Memoryal sa iyang kamatayon. (Marcos 14:26, potnot) Usahay, mahimong matugob kita sa dakong pasalamat sa Diyos nga kita moawit ug mga pagdayeg bisan sa atong kasingkasing. (1 Corinto 14:15; Efeso 5:19) Ug pagkadakong kalipay ang pagbayaw kang Jehova diha sa awit panahon sa Kristohanong mga tigom!
19. Unsay angay natong buhaton kon kita masakit sa espirituwal, ug nganong himoon ang maong lakang?
19 Hayan dili kita ganahang moawit kon kita masakiton sa espirituwal, tingali tungod sa sayop nga panggawi o kapakyasan sa pagkaon nga regular sa lamesa ni Jehova. Kon anaa kita sa maong kahimtang, mapainubsanon kitang motawag sa mga ansiyano aron sila ‘moampo alang kanato.’ (Proverbio 15:29) Sila usab ‘magahaplas kanato ug lana sa ngalan ni Jehova.’ Ingong makahupay nga lana diha sa samad, ang ilang makalipayng mga pulong ug Kasulatanhong tambag motabang sa pagpuypoy sa depresyon, pagduhaduha, kahadlok. ‘Ang pag-ampo sa pagtuo magpaayo kanato’ kon kana gipaluyohan sa atong kaugalingong pagtuo. Kon madiskobrehan sa mga ansiyano nga ang atong espirituwal nga sakit gipahinabo sa seryosong sala, sila malulotong magpatin-aw kon unsa ang atong kasaypanan ug maningkamot sa pagtabang kanato. (Salmo 141:5) Ug kon kita mahinulsolon, kita makabaton ug pagtuo nga ang Diyos modungog sa ilang mga pag-ampo ug magpasaylo kanato.
20. Nganong angay natong isugid ang atong mga sala ug mag-ampo alang sa usag usa?
20 Ang ‘dayag nga pagsugid sa atong mga sala ngadto sa usag usa’ angayng magsilbing pugong batok sa padayong pagpakasala. Kinahanglang magdasig kana ug pagbinatiay sa usag usa, usa ka hiyas nga mopalihok kanato sa “pag-ampo alang sa usag usa.” Makatuo kita nga kini makaayo tungod kay ang pag-ampo sa “usa ka tawong matarong”—usa nga nagpakitag pagtuo ug gilantaw sa Diyos nga matul-id—dakog malampos uban kang Jehova. (1 Pedro 3:12) Ang propetang si Elias may mga kahuyangan sama sa atoa, apan ang iyang mga pag-ampo epektibo. Siya miampo, ug wala moulan sulod sa tulo ka tuig ug tunga. Sa dihang miampo siya pag-usab, miulan gayod.—1 Hari 17:1; 18:1, 42-45; Lucas 4:25.
21. Unsay mahimo nato kon ang kaubang Kristohanon “mahisalaag gikan sa kamatuoran”?
21 Komosta kon ang usa ka membro sa kongregasyon “mahisalaag gikan sa kamatuoran,” nga mitipas gikan sa hustong pagtulon-an ug panggawi? Makapabalik kita kaniya gikan sa iyang sayop pinaagi sa tambag sa Bibliya, pag-ampo, ug ubang tabang. Kon kita molampos, kini maghupot kaniya ubos sa lukat ni Kristo ug magluwas kaniya gikan sa espirituwal nga kamatayon ug pagkahinukman sa kalaglagan. Pinaagi sa pagtabang sa usa nga nakasala, atong gitabonan ang daghan niyang kasal-anan. Sa dihang ang gibadlong nga makasasala mobalik gikan sa iyang sayop nga dalan, maghinulsol, ug mangayog pasaylo, kita magmaya nga kita naghago sa pagtabon sa iyang mga sala.—Salmo 32:1, 2; Judas 22, 23.
Usa ka Butang Alang Kanatong Tanan
22, 23. Sa unsang paagi angay kitang maapektahan sa mga pulong ni Santiago?
22 Dayag, ang sulat ni Santiago naundan sa usa ka butang nga mapuslanon kanatong tanan. Kini nagpakita kanato kon unsaon pag-atubang sa mga pagsulay, nagtambag kanato batok sa paboritismo, ug nag-awhag kanato nga makig-ambit sa matarong nga mga buhat. Giawhag kita ni Santiago sa pagkontrolar sa dila, sa pagpakigbisog sa kalibotanong impluwensiya, ug sa pagpasiugda sa kalinaw. Ang iyang mga pulong kinahanglang maghimo usab kanatong mapailobon ug mainampoon.
23 Tinuod, ang sulat ni Santiago sa sinugdan gipadala ngadto sa dinihogang unang mga Kristohanon. Bisan pa niana, angayng tugotan natong tanan nga ang tambag niana motabang kanato sa paghawid sa atong pagtuo. Ang mga pulong ni Santiago makapalig-on sa pagtuo nga magtukmod kanato nga molihok nga may determinasyon diha sa pag-alagad sa Diyos. Ug kining dinasig-sa-Diyos nga sulat nagtukod ug maagwantahong pagtuo nga maghimo kanatong mapailobon, mainampoong mga Saksi ni Jehova karong adlawa, panahon sa “pagkaanaa sa Ginoo” nga si Jesu-Kristo.
Unsaon Nimo Pagtubag?
◻ Nganong ang pipila ka unang mga Kristohanon kinahanglang mag-usab sa ilang mga tinamdan ug panggawi?
◻ Unsang pasidaan ang gihatag ni Santiago sa mga dato?
◻ Nganong angay kitang magmapailobon?
◻ Nganong angay kitang mag-ampo kanunay?
[Picture Credit Line sa panid 19]
Pictorial Archive (Near Eastern History) Est.
[Kapsiyon sa panid 23]
Ang pipila ka unang mga Kristohanon kinahanglang mas mapailobon sa kaubang mga magtutuo
[Kapsiyon sa panid 24]
Ang mga Kristohanon kinahanglang magmapailobon, mahigugmaon, mainampoon