Si Jehova​—Atong Mabination Kaayong Amahan

“Si Jehova malumo kaayo sa pagmahal ug mabination.”—SANTIAGO 5:11, potnot.

 1. Nganong ang mga timawa madani kang Jehova nga Diyos?

ANG uniberso dako kaayo nga ang mga astronomo dili gani makaarang sa pag-ihap sa tanan niining galaksiya. Ang atong galaksiya, ang Milky Way, labihang dakoa nga ang tawo dili gani makaihap sa tanan niining bituon. Ang pipila ka bituon, sama sa Antares, maoy kaliboan ka pilong mas dako ug mas masanag kay sa atong adlaw. Pagkagamhanan gayod sa Dakong Maglalalang sa tanang bituon sa uniberso! Sa pagkatinuod, siya mao “ang Usa nga nagapatungha sa panon kanila nga tinagdaghan, nga ang tanan kanila iya ganing gitawag pinaagi sa ngalan.” (Isaias 40:26) Bisan pa niana, kini mismong makapahinganghang Diyos maoy “malumo kaayo sa pagmahal ug mabination” usab. Makapalig-on gayod kanang kahibaloa alang sa ubos nga mga alagad ni Jehova, ilabina niadtong nag-antos gumikan sa paglutos, sakit, depresyon, o ubang kalisdanan!

 2. Unsay pag-isip sa mga tawo niining kalibotana sa malumong mga emosyon?

² Daghan nag-isip sa mas malumong mga emosyon, sama sa “malumong mga pagmahal ug pagkamabination” ni Kristo, ingong mga kahuyangan. (Filipos 2:1) Kay naimpluwensiyahan sa pilosopiya sa ebolusyon, sila nagdasig sa mga tawo sa pag-una sa ilang kaugalingon bisan pag kana nagpasabot sa pagyatak sa mga pagbati sa uban. Ang ubay-ubayng sulundan diha sa kalibotan sa kalingawan ug mga isport maoy mga lalaking bagison nga dili magpatulo ug mga luha o magpadayag ug malumong pagmahal. Ang pipila ka politikanhong pangulo naglihok sa susamang paagi. Ang Stoic nga pilosopong si Seneca, kinsa maoy nag-edukar sa pintas nga emperador nga si Nero, mipasiugda nga “ang pagkaluoy maoy usa ka kahuyangan.” Ang M’Clintock and Strong’s Cyclopædia nag-ingon: “Ang mga impluwensiya sa Stoicismo . . . nagpadayon pag-impluwensiya sa mga kaisipan sa mga tawo bisan sa kapanahonan karon.”

 3. Giunsa pagbatbat ni Jehova ang iyang kaugalingon ngadto kang Moises?

³ Sa kaatbang, ang personalidad sa Maglalalang sa katawhan makapalipay sa kasingkasing. Gibatbat niya ang iyang kaugalingon ngadto kang Moises niining mga pulonga: “Jehova, Jehova, usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran, . . . nga nagapasaylo sa sayop ug kalapasan ug sala, apan dili gayod siya magpahigawas sa pagsilot.” (Exodo 34:6, 7) Tinuod, gitapos ni Jehova ang maong pagbatbat sa iyang kaugalingon pinaagi sa pagpasiugda sa iyang hustisya. Dili niya ipahigawas ang tinuyong mga makasasala gikan sa angayang silot. Bisan pa, siya nagbatbat sa iyang kaugalingon ingong una sa tanan usa ka Diyos nga maluluy-on, sa literal “puno sa kaluoy.”

 4. Unsa ang makapalipay-sa-kasingkasing nga kahulogan sa Hebreohanong pulong nga sagad gihubad nga “kaluoy”?

⁴ Usahay ang pulong “kaluoy” giisip lamang sa way-pagbati, hudisyal nga diwa nga pugngan ang pagsilot. Bisan pa, ang pagtandi sa mga hubad sa Bibliya magpagawas sa tugob nga kahulogan sa Hebreohanong adhetibo nga naggikan sa berbong ra·chamʹ. Sumala sa pipila ka eskolar, ang lintunganayng kahulogan niini maoy “mahimong malumo.” Ang “racham,” misaysay ang librong Synonyms of the Old Testament, “nagpahayag sa dulot ug malumong pagbati sa pagkamabination, sama nianang mapukaw inigkakita sa kahuyangan o sa pag-antos niadtong minahal nato o nagkinahanglan sa atong panabang.” Ang ubang makapalipay-sa-kasingkasing nga mga kabatbatan niining dalayegong hiyas hikaplagan diha sa Insight on the Scriptures, Tomo 2, mga panid 375-9.

 5. Sa unsang paagi ang kaluoy dayag diha sa Moisesnong Kasugoan?

⁵ Ang malumong pagkamabination sa Diyos dayag diha sa Kasugoan nga iyang gihatag ngadto sa nasod sa Israel. Ang mga naalaot, sama sa mga babayeng balo, mga ilo, ug mga kabos, kinahanglang tagdon nga mabination. (Exodo 22:22-27; Levitico 19:9, 10; Deuteronomio 15:7-11) Ang tanan, apil ang mga ulipon ug mga hayop, kinahanglang makabenepisyo gikan sa senemanang Igpapahulay. (Exodo 20:10) Dugang pa, gitagad sa Diyos ang mga tawo nga sa malumong paagi nagtagad sa mga timawa. Ang Proverbio 19:17 nag-ingon: “Siya nga nagapakitag pabor sa usang timawa nagapahulam kang Jehova, ug Siya magabalos kaniya sa iyang pagtagad.”

Mga Kinutoban sa Balaang Pagkamabination

 6. Nganong si Jehova nagpadalag mga propeta ug mga mensahero ngadto sa iyang katawhan?

⁶ Ang mga Israelinhon nagdala sa ngalan sa Diyos ug nagsimba didto sa templo sa Jerusalem, nga maoy “usa ka balay alang sa ngalan ni Jehova.” (2 Cronicas 2:4; 6:33) Bisan pa niana, sa kadugayan sila nagmatinugoton sa imoralidad, pagsimbag diyosdiyos, ug pagpatay, nga nagdalag dakong pakaulaw sa ngalan ni Jehova. Nahiuyon sa iyang mabinationg personalidad, sa kamapailobon ang Diyos misulay pagtul-id niadtong daotang kahimtang nga wala ipahinabo ang katalagman diha sa tibuok nasod. Siya “nagpadayon pagpadala batok kanila pinaagi sa iyang mga mensahero, nga nagpadala nga balikbalik, tungod kay siya nagmabination sa iyang katawhan ug alang sa iyang puy-anan. Apan sila nagpadayon pagbugalbugal sa mga mensahero sa matuod nga Diyos ug nagtamay sa iyang mga pulong ug nagyagayaga sa iyang mga propeta, hangtod ang kapungot ni Jehova miabot batok sa iyang katawhan, hangtod nga wala nay pagkaayo.”​—2 Cronicas 36:15, 16.

 7. Sa dihang miabot sa kinutbanan ang pagkamabination ni Jehova, unsay nahitabo sa gingharian sa Juda?

⁷ Bisan pag si Jehova mabination ug mahinay sa kasuko, sa dihang gikinahanglan siya nagpadayag ug matarong nga kasuko. Niadtong panahona, ang balaang pagkamabination nakaabot sa kinutbanan niini. Atong mabasa ang bahin sa sangpotanan: “Busa [si Jehova] nagdala batok kanila sa hari sa mga Caldeanhon, kinsa mipatay sa ilang batan-ong mga lalaki pinaagi sa espada diha sa balay sa ilang sangtuwaryo, ni siya nagmabination sa batan-ong lalaki o sa ulay, sa tigulang o maluyahon. Ang tanan Iyang gihatag ngadto sa iyang kamot.” (2 Cronicas 36:17) Sa ingon ang Jerusalem ug ang iyang templo nalaglag, ug ang nasod gidalang binihag ngadto sa Babilonya.

Pagkamabination Alang sa Iyang Ngalan

 8, 9. (a) Nganong gipahayag ni Jehova nga siya magbaton ug pagkamabination alang sa iyang ngalan? (b) Sa unsang paagi gipahilom ang mga kaaway ni Jehova?

⁸ Ang kanait nga mga nasod nagsadya tungod sa maong katalagman. Sa matamayong paagi, sila nag-ingon: “Kini sila mao ang katawhan ni Jehova, ug gikan sa iyang yuta sila nanggula.” Kay natukmod sa maong pakaulaw, si Jehova mipahayag: “Ako magbaton ug pagkamabination sa akong balaang ngalan . . . Ug ako gayong balaanon ang akong dakong ngalan, . . . ug ang mga nasod makaila nga ako mao si Jehova.”​—Ezekiel 36:20-23.

⁹ Human sa pagkabinihag sa iyang nasod sulod sa 70 ka tuig, ang mabinationg Diyos, si Jehova, nagpagawas kanila ug nagtugot nga sila mobalik ug magtukod pag-usab sa templo sa Jerusalem. Kadto nakapahilom sa kanait nga mga nasod, kinsa mitan-aw nga natingala. (Ezekiel 36:35, 36) Hinuon, ikasubo nga ang nasod sa Israel nahulog pag-usab ngadto sa daotang mga buhat. Usa ka matinumanong Hudiyo, si Nehemias, mitabang pagtul-id sa kahimtang. Sa usa ka katilingbanong pag-ampo, gisubli niya ang mabinationg mga pakiglabot sa Diyos uban sa nasod, nga miingon:

10. Giunsa pagpasiugda ni Nehemias ang pagkamabination ni Jehova?

¹⁰ “Sa panahon sa ilang kasakitan sila magatuaw kanimo, ug ikaw mismo mamati gikan sa mga langit mismo; ug nahiuyon sa imong dagayang kaluoy ihatag mo kanila ang mga manluluwas nga magaluwas kanila gikan sa kamot sa ilang mga kaaway. Apan sa diha nga sila makapahulay na, sila magabuhat na usab kon unsay daotan sa imong atubangan, ug imo silang itugyan ngadto sa kamot sa ilang mga kaaway, si kinsa magatamak kanila. Unya sila mobalik ug magasangpit kanimo alang sa tabang, ug ikaw mismo mamati gikan sa mga langit mismo ug magaluwas kanila nahiuyon sa imong dagayang kaluoy, nga balikbalik. . . . Ikaw nagmatinugotan kanila sa daghang tuig.”​—Nehemias 9:26-30; tan-awa usab ang Isaias 63:9, 10.

11. Unsang kalainan ang naglungtad tali kang Jehova ug sa mga diyosdiyos sa mga tawo?

¹¹ Sa kataposan, human sa pagsalikway nga mapintason sa minahal nga Anak sa Diyos, ang Hudiyonhong nasod nawad-an sa pribilehiyadong kahimtang niini sa walay kataposan. Ang maunongong pagmahal sa Diyos kanila milungtad ug kapin sa 1,500 ka tuig. Kini maoy usa ka walay-kataposang pamatuod sa kamatuoran nga si Jehova sa pagkatinuod maoy usa ka Diyos sa kaluoy. Pagkasukwahi gayod sa mapintas nga mga diyosdiyos ug dili-mabinationg mga diyos nga gimugna sa mga tawong makasasala!​—Tan-awa ang panid 8.

Ang Kinalabwang Pagpadayag sa Pagkamabination

12. Unsa ang kinalabwang pagpadayag sa pagkamabination sa Diyos?

¹² Ang kinalabwang pagpadayag sa pagkamabination sa Diyos mao ang iyang pagpadala sa iyang minahal nga Anak nganhi sa yuta. Tinuod, ang kinabuhi ni Jesus sa pagkamatinumanon naghatag ug dakong kalipay kang Jehova, nga naghatag kaniya ug hingpit nga tubag sa bakak nga mga sumbong sa Yawa. (Proverbio 27:11) Hinuon, sa samang panahon ang pagtan-aw sa iyang minahal nga Anak nga nag-antos sa mapintas ug makauulaw nga kamatayon sa walay duhaduha mipahinabog labawng kasakit kang Jehova kay sa pagaantoson gayod ni bisan kinsang tawhanong ginikanan. Kadto usa ka mahigugmaon kaayong sakripisyo, nga nagbukas sa dalan alang sa kaluwasan sa katawhan. (Juan 3:16) Sumala sa gitagna ni Zacarias, ang amahan ni Juan nga Tigbawtismo, kadto nagpadako sa “malumong pagkamabination sa atong Diyos.”​—Lucas 1:77, 78.

13. Sa unsang hinungdanong paagi gibanaag ni Jesus ang personalidad sa iyang Amahan?

¹³ Ang pagpadala sa Anak sa Diyos nganhi sa yuta mihatag usab sa katawhan ug mas matin-aw nga panud-ong sa personalidad ni Jehova. Sa unsang paagi matuod kana? Sa pagkaaging si Jesus hingpit nga nagbanaag sa personalidad sa iyang Amahan, ilabina sa malumong pagkamabination sa iyang pagtagad sa mga timawa! (Juan 1:14; 14:9) Niining bahina, ang tulo ka magsusulat sa Ebanghelyo nga si Mateo, Marcos, ug Lucas naggamit sa usa ka Gregong berbo, splag·khniʹzo·mai, nga naggikan sa Gregong pulong alang sa “tinai.” “Gikan sa pulong mismo nga gigikanan niini,” misaysay ang eskolar sa Bibliya nga si William Barclay, “makita nga kini dili ordinaryong pagkaluoy o pagkamabination, kondili usa ka emosyon nga magatandog sa usa ka tawo hangtod sa kahiladman mismo sa iyang pagkatawo. Kini mao ang labing kusganong pulong diha sa Grego alang sa pagbati sa pagkamabination.” Kini sa lainlaing paagi gihubad nga ‘pagbati sa kaluoy’ o ‘natukmod sa kaluoy.’​—Marcos 6:34; 8:2.

Sa Dihang si Jesus Gibatig Kaluoy

14, 15. Sa usa ka siyudad sa Galilea, sa unsang paagi si Jesus natukmod sa kaluoy, ug unsay gihulagway niini?

¹⁴ Ang dapit mao ang usa ka siyudad sa Galilea. Usa ka lalaking “napuno sa sanla” miduol kang Jesus nga walay paghatag sa naandang pasidaan. (Lucas 5:12) Sa inisog gibadlong ba siya ni Jesus tungod sa dili pagsinggit ug, “Mahugaw, mahugaw,” sumala sa gibaod sa Kasugoan sa Diyos? (Levitico 13:45) Wala. Sa kapulihay, si Jesus namati sa mainitong pangaliyupo sa lalaki: “Kon buot mo lamang, mapahinlo mo ako.” ‘Natukmod sa kaluoy,’ si Jesus mikab-ot ug mihikap sa sanlahon, nga miingon: “Buot ko. Mamahinlo ka.” Ang maayong panglawas sa lalaki nahibalik dihadiha. Sa ingon gipasundayag ni Jesus dili lamang ang iyang milagroso, hinatag-sa-Diyos nga mga gahom kondili ang malumong mga pagbati usab nga nagpalihok kaniya sa paggamit nianang mga gahoma.​—Marcos 1:40-42.

¹⁵ Kinahanglan bang duolon si Jesus una siya mopakitag mga pagbati sa pagkamabination? Dili. Sa pila ka panahon sa ulahi, iyang nahinagbo ang usa ka panon nga may iglulubong nga nagagula sa siyudad sa Nain. Sa walay duhaduha, si Jesus nakakita na ug daghang paglubong sa nangagi, apan ang maong paglubong ilabinang makapasubo. Ang namatay maoy bugtong nga anak lalaki sa usa ka babayeng balo. “Natukmod sa kaluoy,” si Jesus miduol kaniya ug miingon: “Hunong na sa paghilak.” Unya gibuhat niya ang talagsaong milagro sa pagbanhaw sa anak niyang lalaki.​—Lucas 7:11-15.

16. Nganong si Jesus naluoy sa dakong panon nga nagsunod kaniya?

¹⁶ Ang talagsaong pagtulon-an nga makat-onan gikan sa mga panghitabo sa ibabaw mao nga sa dihang si Jesus “natukmod sa kaluoy,” siya may positibong gibuhat aron motabang. Usa ka higayon sa ulahi, si Jesus nagsusi sa daghang mga panon sa katawhan nga nagpadayon sa pagsunod kaniya. Si Mateo mitaho nga “siya mibatig kaluoy kanila, tungod kay sila pinanitan ug natibulaag samag mga karnero nga walay usa ka magbalantay.” (Mateo 9:36) Ang mga Pariseo walay gibuhat aron pagtagbaw sa espirituwal nga kagutmanan sa ordinaryong mga tawo. Hinunoa, gipabug-atan nila ang mga timawa pinaagi sa daghang wala-kinahanglanang mga lagda. (Mateo 12:1, 2; 15:1-9; 23:4, 23) Ang ilang panghunahuna bahin sa ordinaryong katawhan nabutyag sa dihang sila miingon bahin niadtong nagpatalinghog kang Jesus: “Apan kining panon sa katawhan nga wala mahibalo sa Balaod maoy tinunglong katawhan.”​—Juan 7:49.

17. Sa unsang paagi ang kaluoy ni Jesus alang sa mga panon nagtukmod kaniya, ug unsang layog-abot nga giya ang iyang gitagana didto?

¹⁷ Sa kaatbang, si Jesus dulot nga natandog sa dili-maayong kahimtang sa espirituwal sa mga panon. Apan hilabihan ka daghan ang mga tawong interesado nga dili siya makaatiman kanila nga tinagsatagsa. Mao nga gisugo niya ang iyang mga tinun-an sa pag-ampo alang sa dugang mga magbubuhat. (Mateo 9:35-38) Nahiuyon nianang mga pag-ampoa, gipadala ni Jesus ang iyang mga apostol uban sa mensahe: “Ang gingharian sa mga langit haduol na.” Ang mga instruksiyon nga gihatag niadtong higayona nagsilbing usa ka bililhong giya alang sa mga Kristohanon hangtod niining adlawa karon. Sa walay duhaduha, ang mga pagbati ni Jesus sa kaluoy nagpalihok kaniya aron tagbawon ang espirituwal nga kagutmanan sa katawhan.​—Mateo 10:5-7.

18. Unsa ang pagsanong ni Jesus sa dihang ang mga panon mibalda sa iyang pagkinaugalingon, ug unsang pagtulon-an ang atong makat-onan gikan niini?

¹⁸ Sa laing higayon, si Jesus mibati na usab ug kabalaka sa espirituwal nga mga panginahanglan sa mga panon. Niadtong panahona siya ug ang iyang mga apostol gikapoy human sa puliking paglibot nga nagwali, ug sila nangitag dapit nga kapahulayan. Apan sa wala madugay sila nakit-an sa mga tawo. Inay mapikal si Jesus sa maong pagbalda sa ilang pagkinaugalingon, si Marcos nagtala nga siya ‘natukmod sa kaluoy.’ Ug unsay hinungdan sa dulot nga mga pagbati ni Jesus? “Sila maoy sama sa mga karnero nga walay usa ka magbalantay.” Sa makausa pa, gipahayag ni Jesus ang iyang mga pagbati pinaagi sa lihok ug misugod pagtudlo sa mga panon “mahitungod sa gingharian sa Diyos.” Oo, siya dulot kaayong natandog sa ilang espirituwal nga kagutmanan nga gisakripisyo niya ang gikinahanglang pahulay aron sa pagtudlo kanila.​—Marcos 6:34; Lucas 9:11.

19. Sa unsang paagi ang paghunahuna ni Jesus sa mga panon milapaw pa sa ilang espirituwal nga mga panginahanglan?

¹⁹ Bisan tuod pangunang nabalaka sa espirituwal nga mga panginahanglan sa katawhan, si Jesus wala gayod mahikalimot sa ilang pangunang pisikal nga mga kinahanglanon. Nianang higayona mismo, siya usab “nag-ayo niadtong nanginahanglag pag-ayo.” (Lucas 9:11) Sa usa ka higayon sa ulahi, ang mga panon mikuyog kaniya sa taas nga panahon, ug sila halayo na sa ilang pinuy-anan. Kay nakamatikod sa ilang pisikal nga panginahanglan, giingnan ni Jesus ang iyang mga tinun-an: “Gibati ako ug kaluoy alang sa panon sa katawhan, tungod kay tulo na ka adlaw nga mipabilin sila uban kanako ug wala silay makaon; ug dili ko buot nga palakwon sila nga nagapuasa. Hayan sila panguyapan sa dalan.” (Mateo 15:32) Niadtong panahona si Jesus may gibuhat aron masanta ang posibleng pag-antos. Sa milagroso iyang gitagana sa libolibong lalaki, babaye, ug mga bata ang pagkaon nga napatungha gikan sa pito ka buok tinapay ug pipila ka gagmayng isda.

20. Unsay atong makat-onan gikan sa kataposang nahitalang higayon sa pagkanatukmod ni Jesus sa kaluoy?

²⁰ Ang kataposang higayon nga nahitala sa pagkanatandog ni Jesus sa kaluoy maoy sa iyang kataposang panaw paingon sa Jerusalem. Ang daghang panon sa katawhan nagapanaw kauban niya aron saulogon ang Paskuwa. Sa dalan duol sa Jerico, duha ka makililimos nga buta nagpadayon pagsinggit: “Ginoo, kaluy-i kami.” Ang mga panon misulay pagpahilom kanila, apan gitawag sila ni Jesus ug gipangutana kon unsay gusto nilang pagabuhaton niya. “Ginoo, himoa nga mabuka ang among mga mata,” sila nangaliyupo. “Kay natukmod sa kaluoy,” gihikap niya ang ilang mga mata, ug sila nakadawat sa panan-aw. (Mateo 20:29-34) Pagkahinungdanon sa pagtulon-an nga atong makat-onan gikan niini! Si Jesus talisulod na sa kataposang semana sa iyang yutan-ong ministeryo. Siya daghan ug buluhaton nga buhaton una magaantos ug mapintasong kamatayon diha sa mga kamot sa mga ahente ni Satanas. Bisan pa, wala niya itugot nga ang pagpit-os niadtong halandumong gutlo magpugong kaniya sa pagpadayag sa iyang malumong mga pagbati sa pagkamabination alang sa menos ug bili nga mga panginahanglan sa tawo.

Mga Ilustrasyon nga Nagpasiugda sa Pagkamabination

21. Unsay gihulagway sa pagpapas sa agalon sa dakong utang sa iyang ulipon?

²¹ Ang Gregong berbong splag·khniʹzo·mai, nga gigamit niining mga asoya sa kinabuhi ni Jesus, gigamit usab diha sa tulo sa mga ilustrasyon ni Jesus. Sa usa ka sugilanon ang usa ka ulipon mihangyo nga hatagan siyag panahon aron makabayad sa usa ka dakong utang. Ang iyang agalon, kay “natukmod sa kaluoy,” nagpapas sa utang. Kini naghulagway nga si Jehova nga Diyos nagpakitag dakong pagkamabination sa pagpapas sa usa ka dakong utang sa sala alang sa matag Kristohanon nga magpadayag ug pagtuo sa halad lukat ni Jesus.​—Mateo 18:27; 20:28.

22. Unsay gihulagway sa sambingay sa anak nga mausikon?

²² Unya anaa ang sugilanon sa anak nga mausikon. Hinumdomi kon unsay nahitabo sa dihang mipauli ang anak nga masukihon. “Samtang layo pa siya, nalantawan siya sa iyang amahan ug natukmod kini sa kaluoy, ug siya midagan ug migakos sa iyang liog ug mihalok nga mabination kaniya.” (Lucas 15:20) Kini nagpakita nga sa dihang ang usa ka Kristohanon nga nahimong masukihon magpakitag tiunay nga paghinulsol, si Jehova mobatig kaluoy ug malumong magdawat kaniya pag-usab. Sa ingon, pinaagi niining duha ka ilustrasyon, si Jesus nagpakita nga ang atong Amahan, si Jehova, “malumo kaayo sa pagmahal ug mabination.”​—Santiago 5:11, potnot.

23. Unsang pagtulon-an ang atong makat-onan gikan sa ilustrasyon ni Jesus sa matinagdanong Samarianhon?

²³ Ang ikatulong paggamit diha sa sambingay sa splag·khniʹzo·mai maoy bahin sa mabinationg Samarianhon nga “natukmod sa kaluoy” sa gidangatan sa usa ka Hudiyo nga gitulisan ug gibiyaan nga halos patay na. (Lucas 10:33) Kay milihok sumala sa maong mga pagbati, gibuhat sa Samarianhon ang tanan niyang maarangan aron tabangan ang estranghero. Kini nagpasundayag nga gidahom ni Jehova ug ni Jesus nga ang matuod nga mga Kristohanon mosunod sa ilang panig-ingnan sa pagpadayag sa kalumo ug pagkamabination. Ang pipila ka paagi nga mahimo nato kini pagahisgotan sa sunod artikulo.

Mga Pangutana Agig Pagsubli

◻ Unsay kahulogan nga mahimong maluluy-on?

◻ Giunsa pagpakita ni Jehova ang pagkamabination alang sa iyang ngalan?

◻ Unsa ang kinalabwang pagpadayag sa pagkamabination?

◻ Sa unsang talagsaong paagi nga si Jesus mibanaag sa personalidad sa iyang Amahan?

◻ Unsay atong makat-onan gikan sa mabinationg mga kalihokan ni Jesus ug gikan sa iyang mga ilustrasyon?

[Kahon sa panid 12, 13]

USA KA TIN-AWNG TERMINO ALANG SA “MAPINANGGAONG PAG-ATIMAN”

“OH ANG akong tinai, ang akong tinai!” agulo sa propetang si Jeremias. Nagreklamo ba siya sa usa ka balatian sa tiyan tungod kay nakakaon siyag daot nga butang? Wala. Si Jeremias nagagamit ug usa ka Hebreohanong ilustrasyon sa pagbatbat sa iyang dulot nga kabalaka labot sa umaabot nga kaalaotan sa gingharian sa Juda.​—Jeremias 4:19.

Sanglit si Jehova nga Diyos dunay halalom nga mga pagbati, ang Hebreohanong pulong alang sa “tinai,” o “mga ginhawaan” (me·ʽimʹ), gigamit usab sa paghubit sa iyang malumong mga pagbati. Pananglitan, mga dekada una pa sa mga adlaw ni Jeremias, ang napulo-ka-tribong gingharian sa Israel gibihag sa hari sa Asirya. Gitugotan kini ni Jehova ingong silot sa ilang pagkadili-matinumanon. Apan gikalimtan ba sila sa Diyos sa ilang pagkadistiyero? Wala. Siya dulot gihapon nga nalangkit kanila ingong bahin sa iyang katawhan sa pakigtugon. Nga nagtawag kanila sa ngalan sa iladong tribo nga Efraim, si Jehova nangutana: “Si Efraim ba usa ka anak nga bililhon alang kanako, o usa ka bata nga gikahimut-an? Kay kon unsa ka daghan nga ako magasulti batok kaniya dili gayod ako mapakyas sa paghinumdom kaniya ug dugang. Mao nga ang akong tinai nahimong masamokon tungod kaniya. Sa pagkamatuod ako magakaluoy gayod kaniya.”​—Jeremias 31:20.

Sa pag-ingon nga “ang akong tinai nahimong masamokon,” si Jehova migamit ug sambingay sa paghubit sa iyang halalom nga mga pagbati sa pagmahal alang sa iyang nadistiyerong katawhan. Sa iyang komentaryo bahin niining bersikuloha, ang ika-19ng siglo nga eskolar sa Bibliya nga si E. Henderson nagsulat: “Bahin sa mahinuklogong pasundayag sa malumong pagbati sa ginikanan ngadto sa naghinulsol nga usikang anak, dili hilabwan ang gipasundayag dinhi ni Jehova. . . . Bisan tuod nagsulti siya batok [sa tigsimbag diyosdiyos nga mga taga-Efraim] ug nagsilot kanila . . . , wala gayod niya sila kalimti, apan, sa kasukwahi, nalipay hinuon sa paghunahuna sa panahon nga sila ngadtongadto magahinulsol.”

Ang Gregong pulong alang sa “mga ginhawaan,” o “tinai,” gigamit sa susamang paagi diha sa Kristohanon Gregong Kasulatan. Sa dihang wala gamita sa literal, sama sa Buhat 1:18, kini nagtumong sa malumong mga pagbati sa pagmahal o pagkamabination. (Filemon 12) Ang pulong usahay gisumpay sa Gregong pulong nga nagkahulogang “maayo.” Sila apostol Pablo ug Pedro migamit sa gitingob nga ekspresyon sa dihang nagdasig sa mga Kristohanon aron mahimong “magmabination uban ang kalumo,” sa literal nagpasabot ug “dali kaayong maluoy.” (Efeso 4:32; 1 Pedro 3:8) Ang Gregong pulong alang sa “mga ginhawaan” mahimo usab isumpay sa Gregong pulong pol·yʹ. Ang kombinasyon sa literal nagkahulogan ug “daghag ginhawaan.” Kining talagsaon kaayong Gregong ekspresyon kas-a lamang gamita sa Bibliya, ug kini nagtumong kang Jehova nga Diyos. Ang New World Translation naghubad niini ning paagiha: “Si Jehova malumo kaayo sa pagmahal.”​—Santiago 5:11.

Pagkamapasalamaton nato nga ang labing gamhanan sa uniberso, si Jehova nga Diyos, lahi gayod sa mapintas nga mga diyosdiyos nga giimbento sa di-mabinationg mga tawo! Sa pagsundog sa ilang “mabination kaayong” Diyos, ang matuod nga mga Kristohanon madasig sa paglihok sa susamang paagi sa ilang mga pagpakiglabot sa usag usa.​—Efeso 5:1.

[Hulagway sa panid 10]

Sa dihang ang balaang pagkamabination miabot sa kinutbanan niini, gitugotan ni Jehova ang mga Babilonyanhon sa pagsakop sa iyang masukihong katawhan

[Hulagway sa panid 11]

Ang pagtan-aw sa iyang minahal nga Anak nga namatay mipahinabog labing dakong kasakit kang Jehova nga Diyos kay sa pagaantoson gayod ni bisan kinsa

[Hulagway sa panid 15]

Hingpit nga gibanaag ni Jesus ang mabinationg personalidad sa iyang Amahan