Nagsugo ba ang Diyos nga Ikompisal ang mga Sala?

Ang pagkompisal o pagsugid sa mga sala ngadto sa pari o ministro maoy usa ka rituwal nga padayong gisunod sa daghang relihiyon karon. Apan, sa atong panahon diin liberal na kaayo ang mga tawo, gikinahanglan pa ba ang pagkompisal?

LAINLAIN ang opinyon sa mga tawo bahin niana. Pananglitan, ang National Post sa Canada naghisgot sa usa ka tawo nga miadmitir nga lisod ang pagtug-an ngadto sa uban bahin sa imong sala, apan “mogaan ang imong pagbati kon naa kay kapahungawan niini, nga moampo uban kanimo ug motambag kon unsay imong buhaton.” Sa laing bahin, ang librong Bless Me, Father, for I Have Sinned nagkutlo sa usa ka tawo nga nag-ingon: “Ang pagkompisal maoy usa sa kinalisdang rituwal sa Simbahan kay kanunay kang mobatig kahadlok.” Unsay giingon sa Bibliya bahin niana?

Kon Unsay Giingon sa Bibliya

Sa Balaod nga gihatag sa Diyos sa Israel, dunay espesipikong lagda kon unsay himoon sa tawong makasala. Pananglitan, kon ang usa makasala batok sa iyang isigkatawo o makalapas sa balaod sa Diyos, iya kanang isugid sa usa ka tinudlong saserdote sa tribo ni Levi, kinsa motanyag ug halad ngadto sa Diyos aron mapasaylo ang iyang sala.—Levitico 5:1-6.

Kasiglohan sa ulahi, sa dihang gibadlong ni propetang Natan si Haring David tungod sa iyang sala, unsay iyang sanong? Si David miangkon dayon: “Ako nakasala batok kang Jehova.” (2 Samuel 12:13) Siya nangaliyupo usab sa Diyos nga kaluy-an siya. Unsay resulta? Sa ulahi, siya misulat: “Sa kataposan gisugid ko kanimo ang akong sala, ug wala ko taboni ang akong kasaypanan. Miingon ako: ‘Isugid ko kang Jehova ang akong mga kalapasan.’ Ug ikaw mismo nagpasaylo sa pagkadaotan sa akong mga sala.”—Salmo 32:5; 51:1-4.

Sa unang siglo C.E., ang mga Kristohanon gisugo gihapon sa pagsugid sa ilang mga sala. Si Santiago, nga igsoon ni Jesus sa inahan ug usa sa mga nagdumala sa kongregasyon sa Jerusalem, nag-awhag sa iyang mga isigka-Kristohanon: “Sa dayag isugid ninyo ang inyong mga sala sa usag usa ug pag-ampo alang sa usag usa, aron kamo mangaayo.” (Santiago 5:16) Unsa nga mga sala ang angayng isugid, ug kang kinsa kana isugid?

Unsang mga Salaa ang Angayng Isugid?

Kay dili hingpit, kita masipyat sa pulong ug buhat matag adlaw ug busa makasala kita sa atong isigkatawo. (Roma 3:23) Nagpasabot ba kini nga kinahanglan natong isugid ang matag sala nga atong mahimo ngadto sa usa ka tawo nga may awtoridad?

Tinuod, ang matag sala dulumtanan sa Diyos, apan siya maluluy-ong nagpakita kanatog konsiderasyon tungod sa atong napanunod nga pagkadili-hingpit. Ang salmista miingon: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog? Kay ang matuod nga pagpasaylo anaa kanimo, aron nga ikaw kahadlokan.” (Salmo 130:3, 4) Busa, unsay kinahanglan natong himoon kon kita makasala ngadto sa uban, bisan kon kini dili tinuyo? Hinumdomi nga ang pag-ampo nga gitudlo ni Jesus sa iyang mga tinun-an naglakip niini nga hangyo: “Pasayloa kami sa among mga sala, kay kami usab magapasaylo sa matag usa nga utangan kanamo.” (Lucas 11:4) Oo, ang Diyos magpasaylo kanato kon kita mangayog pasaylo kaniya sa ngalan ni Jesus.—Juan 14:13, 14.

Matikdi nga usa sa mga kondisyon aron kita mapasaylo mao nga kinahanglan usab natong pasayloon kadtong ‘nakautang kanato.’ Gipahinumdoman ni apostol Pablo ang iyang kaubang mga Kristohanon: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.” (Efeso 4:32) Kon atong pasayloon ang ginagmayng kasaypanan sa uban, kita makadahom nga kita pasayloon usab sa Diyos.

Apan pasayloon ba usab sa Diyos ang bug-at nga mga sala sama sa pagpangawat, tinuyong pagpamakak, seksuwal nga imoralidad, paghuboghubog, ug uban pa? Ang naghimo niana nakalapas sa mga balaod sa Diyos ug busa siya nakasala batok sa Diyos. Unsay kinahanglang buhaton?

Kang Kinsa Isugid ang mga Sala?

Ang Diyos wala maghatag ug katungod sa tawo sa pagpasaylo sa mga sala nga nahimo batok sa Diyos. Ang Bibliya tin-awng nag-ingon: “Kon atong isugid ang atong mga sala, [ang Diyos] kasaligan ug matarong nga mopasaylo kanato sa atong mga sala ug mohinlo kanato gikan sa tanang pagkadili-matarong.” (1 Juan 1:9) Busa, kang kinsa isugid ang maong mga sala?

Kay Diyos lamang ang makapasaylo nianang mga salaa, angay nga isugid kana kaniya. Mao kanay gihimo ni David, sumala sa ato nang nahisgotan. Apan, unsay basehanan aron ang usa mapasaylo? Ang Bibliya nagtubag: “Paghinulsol kamo, ug pamalik kamo aron mapapas ang inyong mga sala, aron ang mga panahon sa kahayahay moabot gikan sa atubangan ni Jehova.” (Buhat 3:19) Aron mapasaylo, dili igo nga ang usa moangkon sa iyang sala ug mosugid niana. Kinahanglan siyang mohunong sa pagbuhat niana. Sagad nga lisod kanang buhaton, apan adunay tabang.

Balikan nato ang giingon sa disipulong si Santiago: “Sa dayag isugid ninyo ang inyong mga sala sa usag usa ug pag-ampo alang sa usag usa, aron kamo mangaayo.” Siya midugang: “Ang pangamuyo sa usa ka tawong matarong, sa dihang kini nagalihok, adunay dakong puwersa.” (Santiago 5:16) Ang “tawong matarong” mahimong magtumong sa “ansiyano sa kongregasyon,” nga gihisgotan ni Santiago sa bersikulo 14. Ang mga “ansiyano” o mga tigdumala maoy gisangonan sa pagtabang niadtong nagtinguha sa kapasayloan sa Diyos. Apan ang mga “ansiyano” dili makahimo sa pagpasaylo sa mga sala nga nahimo ni bisan kinsa batok sa Diyos kay walay tawo nga gihatagag awtoridad sa paghimo niana.a Bisan pa niana, sila gitudlo sa Diyos sa pagdisiplina ug pagtul-id sa usa nga nakahimog bug-at nga sala pinaagi sa pagtabang kaniya nga masabtan ang kaseryoso sa iyang nahimo ug ang panginahanglan nga siya maghinulsol.—Galacia 6:1.

Nganong Kinahanglang Isugid ang Sala?

Bug-at man ang sala o dili, ang tawo nga nakahimo niini nagdaot sa iyang relasyon sa iyang isigkatawo ug sa Diyos. Tungod niana, siya dili mahimutang ug maguol. Kana maoy epekto sa paglihok sa konsensiya, nga gihatag sa Maglalalang kanato. (Roma 2:14, 15) Unsay kinahanglan niyang himoon?

Kon atong tagdon pag-usab ang giingon ni Santiago, kini ang iyang makapadasig nga mga pulong: “Aduna bay masakiton kaninyo [sa espirituwal]? Magpatawag siyag mga ansiyano sa kongregasyon, ug paampoa sila alang kaniya, nga maghaplas kaniya ug lana sa ngalan ni Jehova. Ug ang pag-ampo sa pagtuo mag-ayo sa usa nga naluya, ug si Jehova magbangon kaniya. Dugang pa, kon siya nakasala, siya pagapasayloon.”—Santiago 5:14, 15.

Kining tekstoha naghisgot nga kinahanglang atimanon sa mga ansiyano ang panginahanglan sa mga membro sa kongregasyon. Sa unsang paagi? Dili igo nga sila mamati sa isugid nga sala. Sanglit ang usa nga nakasala nagmasakiton man sa espirituwal, kinahanglan nga dunay himoon aron ‘maayo ang usa nga naluya.’ Si Santiago naghisgot ug duha ka butang nga kinahanglang himoon.

Una, kinahanglang ‘haplasan siyag lana.’ Kini nagtumong sa gahom sa Pulong sa Diyos nga makaayo sa usa nga nakasala. Si apostol Pablo nag-ingon nga “ang pulong sa Diyos buhi ug gamhanan . . . ug makatugkad sa mga hunahuna ug mga tuyo sa kasingkasing.” (Hebreohanon 4:12) Pinaagi sa paggamit sa Bibliya, ang mga ansiyano makatabang sa usa nga nagmasakiton sa espirituwal nga makita ang hinungdan sa iyang problema ug siya makahimog mga lakang aron mapasig-uli ang iyang relasyon sa Diyos.

Ang ikaduha mao ang “pag-ampo sa pagtuo.” Bisan tuod ang pag-ampo sa mga ansiyano dili makapausab sa ipahamtang sa Diyos nga hustisya, kini nga mga pag-ampo giisip sa Diyos nga hinungdanon aron mapasaylo ang sala pinasukad sa halad lukat ni Kristo. (1 Juan 2:2) Ang Diyos andam nga motabang sa usa nga tiunayng naghinulsol sa iyang sala ug nagpakita niana pinaagi sa buhat.—Buhat 26:20.

Ang kinalabwang hinungdan kon nganong isugid ang sala nga nahimo batok sa tawo o sa Diyos maoy aron makabaton ug maayong relasyon uban sa Diyos. Si Jesu-Kristo nag-ingon nga kinahanglan natong ipasig-uli ang maayong relasyon sa atong isigkatawo una kita makasimba sa Diyos uban ang hinlong konsensiya. (Mateo 5:23, 24) Ang Proverbio 28:13 nag-ingon: “Siya nga nagatabon sa iyang kalapasan dili molampos, apan siya nga nagasugid ug nagabiya niini pagakaluy-an.” Kon atong ipaubos ang atong kaugalingon sa atubangan ni Jehova nga Diyos ug mangayog pasaylo kaniya, kita iyang kaluy-an ug pagabayawon sa takdang panahon.—1 Pedro 5:6.

[Footnote]

[Blurb sa panid 23]

Ang Diyos magpasaylo sa atong mga kasaypanan kon kita mangaliyupo kaniya sa ngalan ni Jesus

[Hulagway sa panid 24]

Ang kinalabwang hinungdan kon nganong isugid ang sala maoy aron makabaton ug maayong relasyon uban sa Diyos