Makataronganon si Jehova!

“Ang kaalam gikan sa itaas maoy . . . makataronganon.”​—SANTIAGO 3:17.

 1. Sa unsang paagi ang pipila naghulagway sa Diyos ingong dili makataronganon, ug unsay imong pagbati sa maong hunahuna bahin sa Diyos?

UNSANG matanga sa Diyos ang imong gisimba? Nagtuo ka ba nga siya maoy usa ka Diyos sa dili-matarog, mapig-otong hustisya, higpit ug gahian sa iyang kinaiya? Alang sa Protestanteng repormador nga si John Calvin, ang Diyos daw sama gayod niana. Gipatuo ni Calvin nga ang Diyos adunay “walay-kataposan ug dili-mausob nga plano” bahin sa matag tawo, kay nagtino-daan alang sa matag usa kon siya mabuhing walay kataposan sa kalipay o sakiton sa walay kataposan sa impiyernong-kalayo. Palandonga ra: Kon tinuod pa kini, walay bisan unsa nga mabuhat nimo, bisan pag unsaon nimog paningkamot, ang makausob sa dugay-na, mapig-otong plano sa Diyos bahin nimo ug sa imong ugma-damlag. Madani ka ba nianang dili-makataronganong Diyos?​—Itandi ang Santiago 4:8.

 2, 3. (a) Sa unsang paagi ikahulagway nato ang pagkadili-makataronganon sa tawhanong mga institusyon ug mga organisasyon? (b) Sa unsang paagi ang panan-awon ni Ezekiel sa langitnong karro ni Jehova nagpadayag sa Iyang pagkamapasiboon?

² Mahupayan gayod kita nga masayod nga ang Diyos sa Bibliya dayag nga makataronganon! Dili ang Diyos apan ang mga tawo maoy makiling nga mahimong estrikto ug dili-mausob, kay gikutohan sa ilang mga pagkadili-hingpit. Ang tawhanong mga organisasyon mahimong lisod dumalahon nga sama sa kargahang mga tren. Sa dihang ang usa ka dako kaayong kargahang tren magadagan paingon sa usa ka babag sa riles, ang pagliso imposible, ug ang paghunong labi pang lisod. Ang pila ka tren kusog kaayong moabante nga gikinahanglan nila ang kapig kilometro sa paghunong human sa pagduot sa brek! Sa susama, ang usa ka dako kaayong kargahang bapor tingali mopadayon paglawig ug walo ka kilometros human sa pagpatay sa mga makina. Bisan pag balihon kini, mopadayon gihapon kini paglawig ug tulo pa ka kilometros! Apan tagda karon ang usa ka sakyanang dako pa kaayo kay niining duha, usa nga naghawas sa organisasyon sa Diyos.

³ Kapig 2,600 ka tuig kanhi, si Jehova mihatag kang propetang Ezekiel ug usa ka panan-awon nga naghulagway sa Iyang langitnong organisasyon sa espiritung mga linalang. Kadto maoy usa ka karro nga adunay makalilisang nga mga sukod, ang kaugalingong “sakyanan” ni Jehova nga kanunayng ubos sa iyang pagmando. Ang paagi sa paglihok niini labing makaiikag. Ang dagko kaayong mga ligid adunay upat ka kilid ug napuno sa mga mata, mao nga sila makakita sa bisan diin ug makausab dihadiha sa direksiyon, nga dili na mohunong o moliso. Ug kining dako kaayong sakyanan dili kinahanglang magbaguod pagdagan nga sama sa dako kaayong kargahang bapor o tren. Kini makalihok ingon sa katulin sa kilat, nga makaderetso pa gani sa pagliso! (Ezekiel 1:1, 14-28) Si Jehova maoy lahi sa Diyos nga giwali ni Calvin sama sa pagkalahi sa Iyang karro gikan sa kiwag nga ginamag-tawong mga makina. Siya sa hingpit mapasiboon. Ang pag-ila niining bahina sa personalidad ni Jehova angayng mobulig kanato sa pagpabilin nga mapasiboon ug paglikay sa lit-ag sa pagkadili-makataronganon.

Si Jehova​—Ang Labing Mapasiboon sa Uniberso

 4. (a) Sa unsang paagi ang ngalan mismo ni Jehova nagpadayag nga siya usa ka mapasiboong Diyos? (b) Unsa ang pipila sa mga titulo nga gipadapat kang Jehova nga Diyos, ug nganong kana sila haom?

⁴ Ang ngalan mismo ni Jehova nagpasabot sa iyang pagkamapasiboon. Ang “Jehova” sa literal nagkahulogang “Siya Nagpahinabo.” Kini dayag nagkahulogan nga si Jehova mismo nagpahinabo nga siya mahimong ang Tigtuman sa tanan niyang mga saad. Sa nangutana si Moises sa Diyos sa iyang ngalan, si Jehova nagbatbat sa kahulogan niini niining paagiha: “Ako mamao kon unsay mamao ako.” (Exodo 3:14) Ang hubad ni Rotherham pintok nga nagpahayag niini: “Ako Mamao bisan kon unsay akong kahimut-an.” Si Jehova mamao, o mopili nga mamao, bisan kon unsay gikinahanglan aron pagtuman sa iyang matarong nga mga katuyoan ug mga saad. Sa ingon, siya nagdala sa talagsaong han-ay sa mga titulo, sama sa Maglalalang, Amahan, Soberanong Ginoo, Magbalantay, Jehova sa mga panon, Tigpatalinghog sa pag-ampo, Maghuhukom, Dakong Magtutudlo, Manlulukat. Siya nagpahinabo nga mamao kining tanan ug dugang pa sa pagtuman sa iyang mahigugmaong mga katuyoan.​—Isaias 8:13; 30:20; 40:28; 41:14; Salmo 23:1; 65:2; 73:28; 89:26; Maghuhukom 11:27; tan-awa usab ang New World Translation, Apendise 1J.

 5. Nganong angay nga dili kita maghinapos nga ang pagkamapasiboon ni Jehova nagpasabot nga ang iyang kinaiya o mga sukdanan mausob?

⁵ Nan, nagpasabot ba kini nga ang kinaiya o mga sukdanan sa Diyos mausob? Wala; sumala sa pagpahayag niini sa Santiago 1:17, “kaniya walay pagkausab sa pag-irog sa landong.” Aduna bay panagsumpaki dinhi? Wala gayod. Pananglitan, kinsa ang mahigugmaong ginikanan nga dili mousab sa iyang mga papel aron ang iyang mga anak makabatog kaayohan? Sa lakat sa usa ka adlaw, ang usa ka ginikanan tingali mahimong magtatambag, kusinero, tig-atiman sa balay, magtutudlo, tigdisiplina, higala, mekaniko, nars​—ang listahan magpadayon ug magpadayon. Ang ginikanan dili magbag-o sa personalidad inigtuman niining mga papela; siya magpasibo lamang sa presenteng mga panginahanglan. Si Jehova maoy ingon usab apan sa labi pang dakong sukod. Sa walay kinutoban iyang ikapahinabo nga siya mamao aron ang iyang mga linalang makabatog kaayohan. Ang giladmon sa iyang kaalam makapahingangha kaayo!​—Roma 11:33.

Pagkamakataronganon Usa ka Timaan sa Balaang Kaalam

 6. Unsa ang literal nga kahulogan ug mga ipasabot sa Gregong pulong nga gigamit ni Santiago sa pagbatbat sa balaang kaalam?

⁶ Ang tinun-ang si Santiago migamit ug makaiikag nga pulong sa pagbatbat sa kaalam niining labawng mapasiboong Diyos. Misulat siya: “Ang kaalam sa itaas maoy . . . makataronganon.” (Santiago 3:17) Ang Gregong pulong nga iyang gigamit dinhi (e·pi·ei·kesʹ) lisod hubaron. Ang mga maghuhubad nakagamit sa mga pulong sama sa “malumo,” “matugtanon,” “mainantoson,” ug “mahunahunaon.” Ang New World Translation naghubad niining “makataronganon,” nga may potnot nga nagpailang ang literal nga kahulogan maoy “mapahiuyonon.”a Ang pulong nagdala usab sa kahulogan sa pagkadili-makutihon sa pagsunod sa matag ginagmayng detalye sa nasulat nga instruksiyon, nga dili hingapin kaestrikto o kamapig-oton. Ang eskolar nga si William Barclay mikomento diha sa New Testament Words: “Ang pasukaranan ug paninugdang butang bahin sa epieikeia mao nga kini naggikan sa Diyos. Kon gipugos pa sa Diyos ang iyang mga katungod, kon gipadapat pa sa Diyos kanato ang mapig-otong mga sukdanan lamang sa kasugoan, asa na unta kita karon? Ang Diyos mao ang kinalabwang panig-ingnan sa usa nga maoy epieikēs ug si kinsa makiglabot sa uban uban ang epieikeia.”

 7. Sa unsang paagi si Jehova nagpasundayag sa pagkamakataronganon sa tanaman sa Eden?

⁷ Tagda ang panahon sa dihang ang katawhan misukol sa pagkasoberano ni Jehova. Pagkasayon unta nga patyon sa Diyos kadtong tulo ka ingratong mga rebelde​—si Adan, si Eva, ug si Satanas! Pagkadako untang kasakitan sa kasingkasing ang wala niya batia! Ug kinsa bay makaergo nga wala siyay katungod nga ipatuman kanang estriktong hustisya? Bisan pa niana, wala gayod igakot ni Jehova ang iyang langitnong samag-karrong organisasyon sa mapig-oton, dili-mapasiboong sukdanan sa hustisya. Busa ang maong karro wala mopadayon pagdagan nga mapigsat ang tawhanong pamilya ug ang tanang kalaoman sa malipayong kaugmaon sa katawhan. Sa katugbang, gimaneobra ni Jehova ang iyang karro uban ang samag-kilat nga kakalit. Dihadiha human sa pagrebelde, si Jehova nga Diyos naglaraw ug layog-abotong katuyoan nga nagtanyag sa kaluoy ug paglaom sa tanang anak ni Adan.​—Genesis 3:15.

 8. (a) Sa unsang paagi ang sayop nga hunahuna sa Kakristiyanohan bahin sa pagkamakataronganon lahi sa tiunay nga pagkamakataronganon ni Jehova? (b) Nganong kita makaingon nga ang pagkamakataronganon ni Jehova wala magpasabot nga basin iyang ikompromiso ang balaang mga prinsipyo?

⁸ Hinuon, ang pagkamakataronganon ni Jehova wala magpasabot nga basin siya mokompromiso sa iyang balaang mga prinsipyo. Ang mga iglesya sa Kakristiyanohan karon basin maghunahuna nga sila makataronganon sa dihang sila dili manumbaling sa imoralidad aron makabaton sa pag-uyon sa masukihon nilang mga panon. (Itandi ang 2 Timoteo 4:3.) Dili gayod lapason ni Jehova ang kaugalingon niyang mga balaod, ni ikompromiso niya ang iyang mga prinsipyo. Hinunoa, ipakita niya ang kaandam nga magpahiuyon, nga magpasibo sa mga kahimtang, aron ikapadapat ang maong mga prinsipyo sa matarong ug maluluy-ong paagi. Siya sa kanunay mahunahunaon nga magmatimbang ang paggamit niya sa hustisya ug gahom uban sa iyang gugma ug makataronganong kaalam. Hisgotan nato ang tulo ka paagi diin si Jehova nagpasundayag sa pagkamakataronganon.

“Andam sa Pagpasaylo”

9, 10. (a) Unsay kalabotan sa pagkahimong “andam sa pagpasaylo” sa pagkamakataronganon? (b) Sa unsang paagi si David nakabatog kaayohan sa pagkaandam ni Jehova sa pagpasaylo, ug ngano?

⁹ Si David misulat: “Kay ikaw, Oh Jehova, maoy maayo ug andam sa pagpasaylo; ug ang mahigugmaong-kalulot ngadto sa tanang nagasangpit kanimo madagayaon.” (Salmo 86:5) Sa gihubad ang Hebreohanong Kasulatan ngadto sa Grego, ang pulong alang sa “andam sa pagpasaylo” gihubad nga e·pi·ei·kesʹ, o “makataronganon.” Sa pagkatinuod, ang pagkaandam sa pagpasaylo ug pagpakitag kaluoy mahimong mao ang labing hinungdanong paagi sa pagpasundayag sa pagkamakataronganon.

¹⁰ Si David mismo nasayod pag-ayo kon unsa ka makataronganon si Jehova niining bahina. Sa dihang nakapanapaw si David uban kang Batseba ug gihikay nga ang iyang bana ipapatay, siya ug si Batseba angay sa silot nga kamatayon. (Deuteronomio 22:22; 2 Samuel 11:2-27) Kon ang estriktong mga tawong maghuhukom mao pay naghusay sa kaso, ang duha nawad-an na unta sa ilang mga kinabuhi. Apan si Jehova nagpakitag pagkamakataronganon (e·pi·ei·kesʹ), nga, sumala sa pagpahayag niini sa Vine’s Expository Dictionary of Biblical Words, “nagpahayag nianang pagkamahunahunaon nga molantaw ‘sa tinuod nga mga panghitabo sa kaso sa maluluy-on ug makataronganong paagi.’” Ang mga panghitabo nga nag-impluwensiya sa maluluy-ong desisyon ni Jehova lagmit naglakip sa tim-os nga paghinulsol sa mga mamumuhat ug daotan ug sa kaluoy nga gipakita mismo ni David sa nangagi alang sa uban. (1 Samuel 24:4-6; 25:32-35; 26:7-11; Mateo 5:7; Santiago 2:13) Bisan pa niana, sumala sa pagbatbat ni Jehova sa iyang kaugalingon diha sa Exodo 34:4-7, makataronganon nga badlongon ni Jehova si David. Iyang gipadala ang propetang si Nathan ngadto kang David uban ang ugdang nga mensahe, nga nagsilsil kang David sa kamatuoran nga gitamay niya ang pulong ni Jehova. Si David naghinulsol ug sa ingon wala mamatay tungod sa iyang sala.​—2 Samuel 12:1-14.

11. Giunsa pagpakita ni Jehova ang kaandam sa pagpasaylo sa kahimtang ni Manases?

¹¹ Ang panig-ingnan ni Haring Manases sa Juda mas talagsaon niining bahina, sanglit si Manases, lahi kang David, tuman ka daotan sa taas nga panahon. Si Manases nagpasiugda sa dulumtanang relihiyosong mga tulomanon diha sa nasod, apil ang paghalad ug tawo. Mahimo nga siya usab ang responsable nga ang matinumanong propetang si Isaias “giputol pinaagig paggabas.” (Hebreohanon 11:37) Sa pagsilot kang Manases, gitugot ni Jehova nga madala siya ingong binihag ngadto sa Babilonya. Hinuon, si Manases naghinulsol sulod sa bilanggoan ug nangaliyupo alang sa kaluoy. Ingong tubag nianang tim-os nga paghinulsol, si Jehova “andam sa pagpasaylo”​—bisan niining hingaping kaso.​—2 Cronicas 33:9-13.

Pag-usob sa Direksiyon Inigtungha sa Bag-ong mga Kahimtang

12, 13. (a) Sa kahimtang sa Nineve, unsang kausaban sa kahimtang ang nagtukmod kang Jehova sa pag-usob sa direksiyon? (b) Sa unsang paagi si Jonas napamatud-ang dili kaayo makataronganon kay kang Jehova nga Diyos?

¹² Ang pagkamakataronganon ni Jehova madayag usab diha sa iyang kaandam sa pag-usob sa iyang gihunahunang buhaton inigtungha sa bag-ong mga kahimtang. Pananglitan, sa dihang ang propetang si Jonas milatas sa kadalanan sa karaang Nineve, ang iyang inspiradong mensahe maoy yano kaayo: Ang gamhanang siyudad pagalaglagon sa 40 ka adlaw. Ugaling lamang, nausob ang mga kahimtang​—sa kulbahinam nga paagi! Naghinulsol ang mga taga-Nineve.​—Jonas, kapitulo 3.

¹³ Matulon-anon nga itandi ang pagkalahi sa sanong ni Jehova ug ni Jonas nianang nausob nga mga kahimtang. Sa pagkamatuod giusob ni Jehova ang direksiyon sa iyang langitnong karro. Niining higayona siya mipasibo, nga nagpahinabo nga siya mahimong tigpasaylo sa mga sala inay usa ka “tawhanong persona sa gubat.” (Exodo 15:3) Sa laing bahin, si Jonas dili gayod mapasiboon. Inay monunot sa karro ni Jehova, siya milihok nga mas sama sa kargahang tren o bapor nga gihisgotan nga sayosayo. Gisangyaw niya ang kalaglagan, busa ang kalaglagan kinahanglang matuman! Mahimong gibati niya nga ang pag-usob sa direksiyon magpakaulaw kaniya sa panan-aw sa mga taga-Nineve. Hinuon, sa kamapailobon gitudloan ni Jehova ang iyang gahig-ulong propeta sa usa ka halandumong pagtulon-an bahin sa pagkamakataronganon ug kaluoy.​—Jonas, kapitulo 4.

14. Nganong giusob ni Jehova ang iyang kalihokan kon bahin sa iyang propetang si Ezekiel?

¹⁴ Si Jehova nag-usob sa direksiyon sa laing mga higayon​—bisan tungod sa gagmay kaayong mga butang. Pananglitan, sa gisugo niya kas-a ang propetang si Ezekiel nga pagadulaon ang usa ka matagnaong drama, ang mga tugon ni Jehova naglakip sa usa ka sugo nga lutoon ni Ezekiel ang iyang pagkaon sa kalayong sinugnoran sa tai sa tawo. Kadto maoy hingapin na alang sa propeta, kinsa mituaw, “Pastilan, Oh Soberano Ginoong Jehova!” ug mihangyo nga dili siya pabuhaton sa butang nga makaluod kaayo alang kaniya. Si Jehova dili kay wala magtagad sa mga pagbati sa propeta ingon nga kana dili makataronganon; sa kapulihay, gitugotan Niya si Ezekiel nga mogamit sa tai sa baka, nga naandang tinubdan sa igsusugnod sa daghang kayutaan hangtod karong adlawa.​—Ezekiel 4:12-15.

15. (a) Unsang mga panig-ingnan ang nagpakita nga si Jehova andam magpatalinghog ug mosanong ngadto sa mga tawo? (b) Unsang pagtulon-an ang mahimong itudlo niini kanato?

¹⁵ Dili ba makapasadya sa kasingkasing ang pagpalandong sa pagkamapaubsanon sa atong Diyos nga Jehova? (Salmo 18:35) Siya taas kaayo kay kanato; apan siya mamating mapailobon sa dili-hingpit nga mga tawo ug mag-usob pa usahay sa iyang direksiyon sumala niana. Gitugotan niya si Abraham nga mangaliyupo kaniya sa dugay nga panahon mahitungod sa paglaglag sa Sodoma ug Gomora. (Genesis 18:23-33) Ug gitugotan Niya si Moises nga magpatungha sa mga pagsupak sa Iyang sugyot nga laglagon ang masuklanong mga Israelinhon ug himoon ang usa ka dakong nasod gikan ni Moises. (Exodo 32:7-14; Deuteronomio 9:14, 19; itandi ang Amos 7:1-6.) Sa ingon siya naghatag ug hingpit nga panig-ingnan alang sa iyang tawhanong mga alagad, kinsa angay magpakita ug susamang kaandam sa pagpatalinghog sa uban sa dihang makataronganon ug posible kanang himoon.​—Itandi ang Santiago 1:19.

Pagkamakataronganon sa Paggamit ug Awtoridad

16. Sa unsang paagi si Jehova lahi sa daghang tawo sa paagi sa iyang paggamit sa iyang awtoridad?

¹⁶ Nakamatikod ka ba nga samtang maangkon sa mga tawo ang dugang awtoridad, daghan maorag mahimong dili kaayo makataronganon? Si Jehova, sa katugbang, nakabaton sa kinatas-ang katungdanang may awtoridad sa uniberso, apan siya mao ang kinalabwang panig-ingnan sa pagkamakataronganon. Siya nagagamit sa iyang awtoridad sa way-sipyat makataronganong paagi. Lahi sa daghang tawo, si Jehova dili mobati nga walay kasegurohan ang iyang awtoridad, busa dili siya mobati nga mapugos nga bantayan kini uban sa pagkaigihan​—nga daw ang pagtugot ug gamayng awtoridad sa uban basin makapameligro sa iyaha. Sa pagkatinuod, sa dihang dihay usa lang ka linalang sa uniberso, si Jehova mihatag kaniyag dakong awtoridad. Gihimo niya ang Logos nga iyang “batid nga magbubuhat,” nga sukad niadto nagpahinabo sa kalungtaran sa tanang butang pinaagi nianang minahal nga Anak. (Proverbio 8:22, 29-31; Juan 1:1-3, 14; Colosas 1:15-17) Sa ulahi iyang gitugyan kaniya “ang tanang awtoridad . . . sa langit ug sa yuta.”​—Mateo 28:18; Juan 5:22.

17, 18. (a) Nganong si Jehova nagpadalag mga manulonda ngadto sa Sodoma ug Gomora? (b) Nganong si Jehova nangayog mga sugyot sa mga manulonda kon unsaon paglansis kang Ahab?

¹⁷ Sa susama, si Jehova nagtugyan ngadto sa daghan niyang mga linalang ug mga buluhaton nga iya untang mabuhat nga mas maayo pa. Pananglitan, sa gisultihan niya si Abraham, “Molugsong ako [sa Sodoma ug Gomora] aron tan-awon ko kon kaha sila bug-os nagalihok sumala sa pagtuaw nga miabot kanako,” siya wala magpasabot nga siya moadto didto nga linawas. Hinunoa, si Jehova nagpalabi sa pagtugyan ug awtoridad, nga nagatudlo sa mga manulonda aron paghipos ug mga kasayoran alang kaniya. Siya naghatag kanilag awtoridad sa pagpanguna niining misyon sa pagpangita sa kamatuoran ug pagtaho ngadto kaniya.​—Genesis 18:1-3, 20-22.

¹⁸ Sa laing higayon, sa dihang si Jehova mihukom nga pahamtangan ug silot ang daotan kaayong Haring Ahab, Iyang gidapit ang mga manulonda panahon sa usa ka panagkatigom sa langit nga mohatag ug mga sugyot kon unsaon “paglansis” ang apostatang hari sa pagduyog sa pakiggubat nga maghunos sa iyang kinabuhi. Sa pagkatinuod, si Jehova, ang Tinubdan sa tanang kaalam, wala magkinahanglan ug tabang nga sugyotan sa labing maayong buhaton! Bisan pa, iyang gipasidunggan ang mga manulonda sa pribilehiyo nga mosugyot ug mga solusyon ug sa awtoridad nga mobuhat sa solusyon nga iyang napili.​—1 Hari 22:19-22.

19. (a) Nganong si Jehova nagalimite sa gidaghanon sa mga balaod nga iyang gibuhat? (b) Sa unsang paagi si Jehova nagpakita nga siya makataronganon kon bahin sa iyang gidahom gikan kanato?

¹⁹ Si Jehova dili mogamit sa iyang awtoridad aron ipatuman ang hingaping pagmando sa uban. Dinhi usab siya nagpakita ug way-samang pagkamakataronganon. Siya mainampingong nagalimite sa gidaghanon sa mga balaod nga iyang gibuhat ug nagadili sa iyang mga alagad sa ‘paglapas sa mga butang nga nahisulat’ pinaagi sa pagdugang ug mabug-at nga mga balaod nga ilang ginama. (1 Corinto 4:6; Buhat 15:28; itandi ang kalainan sa Mateo 23:4.) Siya dili gayod mangayo ug dili-makataronganong pagkamasinugtanon gikan sa iyang mga linalang, apan sagad nga iyang itagana ang igong impormasyon aron giyahan sila ug ibutang ang kapilian atubangan nila, nga ipahibalo kanila ang mga kaayohan sa pagkamasinugtanon ug ang mga sangpotanan sa pagkadili-masinugtanon. (Deuteronomio 30:19, 20) Inay pugson ang mga tawo pinaagi sa pagbati sa pagkasad-an, kaulaw, o kahadlok, siya magtinguha nga tandogon ang mga kasingkasing; buot niyang ang mga tawo mag-alagad kaniya tungod sa tiunayng gugma inay sa pagpugos. (2 Corinto 9:7) Kanang tanang bug-os-kalag nga pag-alagad magpasadya sa kasingkasing sa Diyos, busa siya sa pagkamakataronganon dili “lisod pahimut-an.”​—1 Pedro 2:18; Proverbio 27:11; itandi ang Miqueas 6:8.

20. Sa unsang paagi apektado ka sa pagkamakataronganon ni Jehova?

²⁰ Dili ba talagsaon nga si Jehova nga Diyos, kinsa adunay labawng gahom kay ni bisan kinsang linalang, dili gayod mogamit nianang gahoma sa dili-makataronganong paagi, nga dili gayod mogamit niana aron pugson ang uban? Bisan pa niana, ang mga tawo, nga way-pulos kon itandi, adunay kasaysayan sa pagdominar sa usag usa. (Ecclesiastes 8:9) Tin-aw, ang pagkamakataronganon maoy bililhong hiyas, nga maoy magpalihok kanato sa paghigugma sa dugang kang Jehova. Kana, sa baylo, basin magpalihok kanato sa pag-ugmad niining hiyasa sa atong kaugalingon. Sa unsang paagi ato kanang mahimo? Ang sunod nga artikulo maghisgot niining butanga.

[Footnote]

Unsay Imong Tubag?

◻ Sa unsang paagi ang ngalan ni Jehova ug ang panan-awon sa iyang langitnong karro nagpasiugda sa iyang kamapasiboon?

◻ Unsa ang pagkamakataronganon, ug nganong kini usa ka timaan sa balaang kaalam?

◻ Sa unsang mga paagi si Jehova nagpakita nga siya “andam sa pagpasaylo”?

◻ Nganong gipili ni Jehova ang pag-usob sa gihunahunang mga lihok sa pila ka higayon?

◻ Sa unsang paagi si Jehova nagpasundayag sa pagkamakataronganon sa paagi sa iyang paggamit ug awtoridad?

[Hulagway sa panid 10]

Nganong gipasaylo ni Jehova ang daotan kaayong Haring Manases?