PAKIG-UBAN, KAPUNONGAN
Gigamit ni apostol Pablo ang Gregong nombre nga ho·mi·liʹa sa dihang nagpasidaan sa mga Kristohanon bahin sa kapeligrohan sa daotang “pakig-uban.” (1Co 15:33) Kining Grego nga pulong kaamgid sa berbong ho·mi·leʹo, nga nagkahulogang “kokabildo.” (Buh 20:11) Kini nagpasabot ug pakig-uban o pakiglabot sa laing tawo, nga sagad pinaagig pagsultianay apan usahay pinaagig seksuwal nga mga relasyon. Gigamit sa Gregong Septuagint kining pulonga sa paghubad sa Hebreohanong pulong alang sa “pangdani” diha sa Proverbio 7:21 ug alang sa “katungod sa kaminyoon” diha sa Exodo 21:10.
Kadtong nagtinguha sa pag-uyon sa Diyos mopili ingong ilang mga kauban ug mga tawong debotado sa pagkamatarong ug kamatuoran. (2Ti 2:22) Sila mohunong usab sa “pagpakig-uban [sa literal, sa pagpakighugoyhugoy]” diha sa mga lingawlingaw uban sa mga membro sa kongregasyon kansang paagi sa pagkinabuhi dayag nga gisaway tungod sa ilang badlonganon nga panggawi. Bisan tuod padayong nagpakitag gugma ngadto sa maong mga tawo, ilang gipakita nga sila dili mouyon sa ilang badlonganon nga panggawi. (2Te 3:6-15) Samtang ang maayong mga kauban mahimong usa ka tinuod nga tabang sa padayong paglakaw sa usa ka tawo nga nahiuyon sa kaalam sa Diyos, dili gayod ikasalindot ang makadaot nga mga sangpotanan sa daotang pakig-uban. Ang inspiradong proverbio nag-ingon: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Pr 13:20; itandi ang Pr 22:24, 25; 28:7; 29:3.) Ang Hebreohanong pulong nga ra·ʽahʹ, nga gihubad ingong “may pakiglabot sa” diha sa Proverbio 13:20, gihubad usab nga ‘pakig-uban sa’ ug kaamgid sa Hebreohanong pulong nga reʹaʽ, nga nagkahulogang “isigkatawo; kauban.”—Huk 14:20; Lev 19:18; Sal 15:3.
Gipakita sa daghang Kasulatanhong mga panig-ingnan nga ang dili-maayong mga kauban makadaot gayod sa kaayohan sa usa ka tawo. Ang anak nga babaye ni Jacob nga si Dina sa pagkadili-maalamon mipili sa Canaanhong mga babaye ingong iyang mga kauban o higala, ug kini misangpot sa pag-among-among kaniya ni Sekem, ang anak nga lalaki sa usa ka Hivihanong pangulo. (Gen 34:1, 2) Ang anak nga lalaki ni David nga si Amnon namati sa dili-maayong tambag sa iyang higala nga si Jehonadab ug gilugos ang iyang igsoon sa amahan nga si Tamar. Busa siya gidumtan ni Absalom, ang pursosong igsoong lalaki ni Tamar, ug sa ulahi nagpapatay kang Amnon. (2Sa 13:3-29) Sukwahi sa mga sugo ni Jehova, ang mga Israelinhon misugod sa pagpakig-uban sa mga Canaanhon, mihimog pakig-alyansa sa kaminyoon uban kanila, ug misagop sa ilang dunot nga matang sa pagsimba, nga miresulta sa dili pag-uyon ug pagsalikway ni Jehova. (Deu 7:3, 4; Huk 3:5-8) Bisan si Solomon mitalikod sa pagsimba kang Jehova sa dihang siya mikuhag mga magsisimba sa bakak nga mga diyos ingong iyang mga asawa. (Neh 13:26) Ang impluwensiya sa magsisimba ni Baal nga si Jezebel ang naghimo kang Ahab nga mas daotan pa kay sa tanang ubang Israelinhong mga hari una pa sa iyang panahon. (1Ha 21:25) Ang suod nga pagpakig-uban sa harianong balay ni Ahab ang hapit maghunos sa kinabuhi sa diyosnong si Jehosapat, ug ang pagpakig-alyansa sa kaminyoon nga iyang gihimo sa ulahi uban kang Ahab ang halos naggun-ob sa harianong balay ni David.—2Cr 18:1-3, 29-31; 22:10, 11.
Ang hiniusang hugpong sa matuod nga mga Kristohanon, bisan tuod gilangkoban sa gagmayng mga pundok, mga kongregasyon, o bulag nga mga indibiduwal, naglangkob sa usa ka “kapunongan sa mga igsoon,” o usa ka panag-igsoonay, nga gipaila sa Gregong ekspresyon nga a·del·phoʹtes. (1Pe 2:17; 5:9) Aron magpabiling bahin niana nga panag-igsoonay, likayan sa matuod nga mga Kristohanon ang tanang pagpakig-uban ni bisan kinsa diha sa ilang taliwala nga mahimong mga tigpasiugda sa bakak, nagpabahin nga mga pagtulon-an. (Rom 16:17, 18) Ang Kristohanong si apostol Juan nagsugo sa mga isigkamagtutuo nga dili gayod dawaton ang maong bakak nga magtutudlo ngadto sa ilang mga balay o sa pagpangomosta kaniya, nga maghatag kaniyag higayon sa pagpahayag sa iyang tinuis, hiwi nga doktrina. Ang pagpangomosta sa maong tawo magpaila ug usa ka sukod sa pag-uyon ug maghimo sa usa ka tawo nga mag-aambit sa “iyang daotang mga buhat.” (2Ju 10, 11) Bisan pa sa daghang ebidensiya labot sa pagkatino sa pagkabanhaw gikan sa mga patay, si apostol Pablo nahibalo nga ang pagpakig-uban niadtong misalikway niining Kristohanong pagtulon-an mahimong makadaot sa pagtuo. Mao nga siya misulat: “Ayaw pagpahisalaag. Ang daotang pakig-uban makadaot sa mapuslanong pamatasan.”—1Co 15:12-22, 33; tan-awa ang APOSTASYA.