Ang Kalidad sa Imong Pagtuo—Ginasulayan Karon

“Isipa ingong bug-os kangaya, akong mga igsoon, dihang makahibalag kamo ug nagkadaiyang mga pagsulay, kay kamo nahibalo man nga kining sinulayang kalidad sa inyong pagtuo nagapatunghag pag-agwanta.”​—SANTIAGO 1:2, 3.

 1. Nganong ang mga Kristohanon makadahom ug mga pagsulay sa ilang pagtuo?

ANG matuod nga mga Kristohanon dili gustong mag-antos, ug sila dili malipay sa kasakit o kaulawan. Bisan pa, ilang gisilsil sa hunahuna ang ibabaw nga mga pulong nga gisulat sa igsoon ni Jesus sa inahan nga si Santiago. Gipatin-aw ni Kristo ngadto sa iyang mga tinun-an nga sila makadahom ug paglutos ug ubang mga kalisod tungod sa ilang pagsunod sa mga sukdanan sa Diyos. (Mateo 10:34; 24:9-​13; Juan 16:33) Bisan pa niana, moresultag kalipay ang maong mga pagsulay. Sa unsang paagi?

 2. (a) Sa unsang paagi ang mga pagsulay sa atong pagtuo mosangpot ug kalipay? (b) Sa unsang paagi ang buluhaton sa pag-agwanta mabug-os diha kanato?

² Ang pangunang katarongan nga makahatag kanato ug kalipay ang mga pagsulay sa mga pagtuo mao nga kini mopatungha ug maayong bunga. Sama sa giingon ni Santiago, ang pagsagubang sa mga pagsulay o mga kalisod “nagapatunghag pag-agwanta.” Kita makakuhag kaayohan gikan sa pag-ugmad nianang bililhong Kristohanong kalidad. Si Santiago nagsulat: “Ipabug-os sa pag-agwanta ang buluhaton niini, aron kamo mabug-os ug mahimsog sa tanang bahin, nga dili makulangan sa bisan unsa.” (Santiago 1:4) Ang pag-agwanta adunay trabaho, usa ka “buluhaton.” Ang tinudlong-buluhaton niini mao ang paghimo kanato nga bug-os sa tanang bahin, nga motabang kanato nga mahimong maayong mga Kristohanon. Busa, pinaagi sa pagtugot sa pagsulay nga motapos lag iya nga walay mga pagsulay sa paggamit ug dili-kasulatanhong mga pamaagi sa pagtapos dayon niini, ang atong pagtuo masulayan ug malunsay. Kon kita kulang ug pailob, kaluoy, kalulot, o gugma sa pagpakiglabot sa mga kahimtang o sa isigkatawo, ang pag-agwanta makapabug-os pa kanato. Oo, ang pagkasunodsunod mao: Ang mga pagsulay mopatunghag pag-agwanta; ang pag-agwanta makapauswag sa Kristohanong mga hiyas; kini makahatag ug kalipay.​—1 Pedro 4:14; 2 Pedro 1:5-8.

 3. Nganong dili kita angayng mosibog tungod sa kahadlok sa mga pagsulay sa atong pagtuo?

³ Gipasiugda usab ni apostol Pedro kon nganong dili kita angay mahadlok o mosibog gikan sa mga pagsulay sa atong pagtuo. Siya nagsulat: “Niining butanga kamo nagamaya pag-ayo, bisan tuod nga sa pagkakaron sa makadiyot, kon kinahanglan man, kamo naguol sa nagkadaiyang mga pagsulay, aron nga ang sinulayang kalidad sa inyong pagtuo, nga mas dako pa kaayo ug bili kay sa bulawan nga matunaw bisan tuod nga nasulayan na kini pinaagig kalayo, makaplagan nga usa ka hinungdan sa pagdayeg ug himaya ug dungog diha sa pagpadayag ni Jesu-Kristo.” (1 Pedro 1:6, 7) Kining mga pulonga ilabinang makapadasig karon tungod kay ang “dakong kasakitan”​—ang panahon sa pagdayeg, paghimaya, pagpasidungog, ug pagkaluwas​—mas duol na kaayo kay sa gihunahuna sa uban ug mas duol na kaayo kay sa panahong nangahimo kitang mga magtutuo.​—Mateo 24:21; Roma 13:11, 12.

 4. Unsay gibati sa usa ka igsoon bahin sa mga pagsulay nga iyang giagoman duyog sa ubang dinihogang mga Kristohanon?

⁴ Diha sa nag-unang artikulo, atong nahisgotan ang mga pagsulay nga giatubang sa dinihogang mga nanghibilin gikan sa 1914 paunahan. Kini ba basehanan sa kalipay? Si A. H. Macmillan naghatag niini nga mahandomong hunahuna: “Ako nakakita ug daghang grabeng mga pagsulay nga midangat sa organisasyon ug mga pagsulay sa pagtuo niadtong sakop niana. Pinaagi sa tabang sa espiritu sa Diyos kini nakalahutay ug nagpadayon sa paglambo. Ako nakakita sa kaalam sa mapailobong paghulat kang Jehova sa pagpatin-aw sa atong pagsabot sa Kasulatanhong mga butang imbes masuko bahin sa usa ka bag-ong hunahuna. . . . Bisag unsa pay mga pagpasibong atong himoon matag karon ug unya sa atong mga hunahuna, kana dili magpabag-o sa mapuangorong tagana sa lukat ug sa saad sa Diyos nga kinabuhing walay kataposan. Busa dili angay nga tugotan nato ang atong pagtuo nga mapaluya sa wala matuman nga mga pagdahom o sa mga kausaban sa mga hunahuna.”​—The Watchtower, Agosto 15, 1966, panid 504.

 5. (a) Unsang mga kaayohan ang misangpot sa pagkaagom ug mga pagsulay sa mga nanghibilin? (b) Nganong kining butang bahin sa pagsulay makapaikag kanato karon?

⁵ Ang dinihogang mga Kristohanon nga nakalahutay sa panahon sa pagsulay sa 1914-19 napagawas gikan sa gamhanang impluwensiya sa kalibotan ug gikan sa daghang relihiyosong mga buhat nga Babilonyanhon. Ang mga nanghibilin miabante ingong nahinloan ug nalunsayng katawhan, nga kinabubut-ong nagtanyag ug mga halad sa pagdayeg ngadto sa Diyos ug nakabaton ug pagsalig nga sila ingong usa ka katawhan dalawaton kaniya. (Isaias 52:11; 2 Corinto 6:14-18) Ang paghukom nagsugod diha sa balay sa Diyos, apan kini dili pagataposon sa usa ka tinong panahon. Ang pagsulay ug pag-ayag sa katawhan sa Diyos magpadayon. Ang pagtuo niadtong naglaom nga makalabang-buhi sa nagsingabot nga “dakong kasakitan” ingong bahin sa “dakong panon” ginasulayan usab. (Pinadayag 7:9, 14) Kini ginahimo sa mga paagi nga kaamgid sa giatubang sa dinihogang nga nanghibilin maingon man sa ubang mga paagi.

Sa Unsang Paagi Ikaw Masulayan?

 6. Unsa ang usa ka matang sa grabeng pagsulay ang naagoman sa daghan?

⁶ Daghang Kristohanon naghunahuna bahin sa hagit sa pagbarog sa mga pagsulay diha sa matang sa direkta atubangang mga pag-atake. Sila nahinumdom niining tahoa: “Gipatawag [sa Hudiyohanong mga pangulo] ang mga apostol, gibunalan sila, ug nagmando kanila nga mohunong na sa pagsulti pinasukad sa ngalan ni Jesus, ug gibuhian sila. Busa, kini sila milakaw gikan sa atubangan sa Sanhedrin, nga nagmaya tungod kay giisip sila nga takos pakaulawan tungod ug alang sa iyang ngalan.” (Buhat 5:40, 41) Ug ang modernong kasaysayan sa katawhan sa Diyos, ilabina sa panahon sa mga gubat sa kalibotan, klarong nagpakita nga daghan sa mga Saksi ni Jehova aktuwal nga nakasinatig mga pagbunal, ug mas grabe pa, diha sa mga kamot sa mga maglulutos.

 7. Sa unsang sukod nahimo sa ubang modernong-adlawng mga Kristohanon ang pagpasundayag sa pagtuo?

⁷ Labot sa mga Kristohanon nga nangahimong mga tumong sa paglutos, ang kalibotan walay giila mahimong dinihogang mga nanghibilin man ug dakong panon sa “ubang mga karnero.” (Juan 10:16) Sa daghang katuigan, ang mga sakop sa duha ka pundok grabeng nasulayan pinaagi sa pagkapriso ug bisan pagkamatay tungod sa ilang gugma sa Diyos ug sa ilang pagtuo kaniya. Ang duha ka pundok nagkinahanglan sa espiritu sa Diyos, bisag unsa pay ilang paglaom. (Itandi Ang Bantayanang Torre, Hunyo 15, 1996, panid 31.) Sa mga tuig sa 1930 ug 1940 sa Nazi Alemanya, daghan sa mga alagad ni Jehova, lakip sa kabataan, nagpasundayag ug talagsaong pagtuo, ug daghan ang nasulayan kutob sa mahimo. Sa dili pa kaayo dugayng mga panahon, ang katawhan ni Jehova nakaatubang ug mga pagsulay sa paglutos sa kayutaan sama sa Burundi, Eritrea, Ethiopia, Malawi, Mozambique, Rwanda, Singapore, ug Zaire. Ug ang mga pagsulay nga sama niini nagpadayon.

 8. Sa unsang paagi ang komento sa usa ka Aprikanong igsoon nagpakita nga labaw pa ang nalangkit sa pagsulay sa atong pagtuo kay sa pag-agwanta sa paglutos pinaagig mga pagbunal?

⁸ Apan, sumala sa giingon na, ang atong pagtuo sulayan usab sa mas malalangong mga paagi. Ang ubang mga pagsulay dili kaayo direkta ug maila dayon. Palandonga kon unsay imong reaksiyon sa pipila sa mosunod. Usa ka igsoon sa Angola nga adunay napulo ka anak sakop sa usa ka kongregasyon nga sa usa ka higayon walay komunikasyon uban sa mga igsoon nga may kaakohan. Sa ulahi nakatigayon ang pipila sa pagduaw sa kongregasyon. Siya gipangutana kon sa unsang paagi napakaon niya ang iyang pamilya. Naglisod siya sa pagtubag, ug ang iyang nasulti lamang mao nga lisod ang kahimtang. Napakaon ba niya ang iyang mga anak labing menos kas-a sa usa ka adlaw? Siya mitubag: “Aw, halos dili gayod. Kami nakakat-on sa pagtigayon kon unsay among nabatonan.” Dayon uban sa tingog nga puno sa pagtuo, siya miingon: “Apan dili ba mao man kanay atong madahom niining kataposang mga adlaw?” Ang maong pagtuo talagsaon diha sa kalibotan, apan kini kasagaran taliwala sa maunongong mga Kristohanon, kinsa adunay bug-os nga pagsalig nga ang mga saad sa Gingharian matuman.

 9. Sa unsang paagi kita ginasulayan may kalabotan sa 1 Corinto 11:3?

⁹ Ang dakong panon ginasulayan usab may kalabotan sa teokratikanhong mga paagi. Ang tibuok-kalibotang Kristohanong kongregasyon gidumala sumala sa diyosnong mga prinsipyo ug teokratikanhong mga sukdanan. Kini nagkahulogan una sa tanan sa pag-ila kang Jesus ingon nga mao ang Pangulo, ang usa nga gitudlo ingong Ulo sa kongregasyon. (1 Corinto 11:3) Ang kinabubut-ong pagpasakop kaniya ug sa iyang Amahan makita diha sa atong pagtuo sa teokratikanhong mga tinudlo ug mga desisyon labot sa atong hiusang pagtuman sa kabubut-on ni Jehova. Dugang pa, diha sa matag lokal nga kongregasyon, adunay mga lalaki nga gitudlo sa pagpanguna. Sila maoy mga tawong dili-hingpit kansang mga sayop tingali ato dayong makita; bisan pa kita giawhag sa pagtahod sa maong mga magtatan-aw ug nga magmapinasakopon. (Hebreohanon 13:7, 17) Nakita ba nimo usahay kana nga malisod? Usa ba gayod kini ka pagsulay kanimo? Kon mao, ikaw ba nakabatog kaayohan gikan niining pagsulay sa imong pagtuo?

10. Unsang pagsulay ang atong atubangon labot sa pag-alagad sa kanataran?

¹⁰ Kita usab sulayan may kalabotan sa pribilehiyo ug kinahanglanon sa pagpakigbahing regular diha sa pag-alagad sa kanataran. Aron kita makapasar niining pagsulaya, kinahanglang atong amgohon nga ang bug-os nga pagpakigbahin sa pag-alagad naglangkit ug labaw pa kay sa gamay, o kinaubsan, nga gidaghanon sa pagsangyaw. Hinumdomi ang mauyonong komento ni Jesus bahin sa kabos nga babayeng balo nga mihatag sa iyang tanan. (Marcos 12:41-44) Kita mahimong mangutana sa atong kaugalingon, ‘Ako ba usab nagahatag sa akong kaugalingon labot sa akong pag-alagad sa kanataran?’ Kitang tanan kinahanglang mahimong mga Saksi ni Jehova sa tibuok adlaw, nga andam sa matag higayon sa pagpadan-ag sa atong kahayag.​—Mateo 5:16.

11. Sa unsang paagi ang mga kausaban sa pagsabot o tambag sa paggawi mahimong usa ka pagsulay?

¹¹ Ang lain pang pagsulay nga basin atong maatubang maoy bahin sa sukod sa atong pag-apresyar sa nagkadan-ag nga kahayag nga gipasidlak diha sa kamatuoran sa Bibliya ug alang sa tambag nga gitagana sa matinumanong ulipon nga matang. (Mateo 24:45) Usahay nagkinahanglan kini ug mga pagpasibo sa personal nga paggawi, sama sa dihang natin-aw nga kadtong kinsa nanabako kinahanglang moundang kon buot silang magpabilin diha sa kongregasyon.a (2 Corinto 7:1) O tingali may kalabotan ang pagsulay sa atong pagdawat sa panginahanglan sa pagbag-o sa atong pagpamilig musika o sa pipila pa ka matang sa kalingawan.b Ato bang kuwestiyonon ang kaalam sa tambag nga gihatag? O tugotan ba nato ang espiritu sa Diyos sa pag-umol sa atong panghunahuna ug sa pagtabang kanato sa pagsul-ob sa Kristohanong personalidad?​—Efeso 4:20-24; 5:3-5.

12. Unsay gikinahanglan aron malig-on ang pagtuo sa usa nga gibawtismohan?

¹² Sa daghang dekada, ang gidaghanon niadtong dakong panon nagkauswag, ug human sa ilang bawtismo sila nagpadayon sa paglig-on sa ilang relasyon kang Jehova. Kini naglangkit ug labaw pa kay sa pagtambong sa Kristohanong asembliya, pagtambong sa pipila ka tigom sa Kingdom Hall, o panalagsang pagpakigbahin sa pag-alagad sa kanataran. Sa pag-ilustrar: Ang usa ka tawo tingali sa pisikal anaa sa gawas sa Dakong Babilonya, ang kalibotang imperyo sa bakak nga relihiyon, apan tinuod ba gayod niya kining gibiyaan? Siya ba nagpabilin gihapon sa mga butang nga nagpabanaag sa espiritu sa Dakong Babilonya​—usa ka espiritu nga nagabiaybiay sa matarong nga mga sukdanan sa Diyos? Gipakamenos ba niya ang moralidad ug pagkamaunongon diha sa kaminyoon? Mao bay iyang gihatagag dakong pagtagad ang personal ug materyal nga mga intereses kay sa espirituwal nga mga intereses? Oo, siya ba nagpabiling walay buling sa kalibotan?​—Santiago 1:27.

Kaayohan Gikan sa Nasulayang Pagtuo

13, 14. Unsay nahimo sa uban human nagsugod paingon sa dalan sa matuod nga pagsimba?

¹³ Kon kita tinuod gayod nga nakakalagiw na gikan sa Dakong Babilonya ug migula usab sa kalibotan, kita dili angay molingi sa mga butang sa luyo. Nahiuyon sa prinsipyo nga makita diha sa Lucas 9:62, ang si bisan kinsa kanato nga molingi sa luyo dili mahimong sakop sa Gingharian sa Diyos. Si Jesus nag-ingon: “Walay tawo nga nakabutang na sa iyang kamot diha sa daro ug molingi sa mga butang nga anaa sa luyo ang angayan alang sa gingharian sa Diyos.”

¹⁴ Apan ang uban nga nahimong mga Kristohanon sa milabay nagtugot sa ilang kaugalingon nga maumol niini nga sistema sa mga butang. Wala nila sukli ang espiritu sa kalibotan. (2 Pedro 2:20-22) Ang kalibotanong mga palinga nakakuha sa ilang interes ug panahon, busa nakababag sa ilang pag-uswag. Imbes ibutang ang ilang mga hunahuna ug mga kasingkasing nga nagatutok gayod sa Gingharian sa Diyos ug sa iyang pagkamatarong, nga giuna kini diha sa kinabuhi, sila mitipas sa pagpangagpas sa materyalistikanhong mga tumong. Gawas kon sila mapukaw sa pagdawat sa ilang mahuyang nga pagtuo ug sa dagaang nga kahimtang ug magbag-o sa ilang dalan pinaagi sa pagpangayog diyosnong tambag, sila nameligro nga mawad-an sa ilang bililhong relasyon kang Jehova ug sa iyang organisasyon.​—Pinadayag 3:15-19.

15. Unsay gikinahanglan aron magpabiling dalawaton sa Diyos?

¹⁵ Ang atong pagkahimong inuyonan ug nahilinya sa pagkalabang-buhi sa kusog nga nagsingabot nga dakong kasakitan nagadepende sa atong pagpabiling mahinlo, nga ang atong mga besti ‘nalabhan sa dugo sa Kordero.’ (Pinadayag 7:9-14; 1 Corinto 6:11) Kon kita dili maghupot ug usa ka mahinlo, matarong nga baroganan atubangan sa Diyos, ang atong balaang pag-alagad dili madawat. Sa pagkamatuod, angay amgohon sa matag usa kanato nga ang nasulayang kalidad sa pagtuo motabang kanato sa pag-agwanta ug sa paglikay nga mawad-an sa kahimuot sa Diyos.

16. Sa unsang mga paagi ang kabakakan mahimong usa ka pagsulay sa atong pagtuo?

¹⁶ Usahay, ang mga palaumagian sa balita ug sekular nga mga awtoridad mangdaot sa katawhan sa Diyos, nga mohatag ug sayop nga impormasyon bahin sa atong Kristohanong mga pagtulon-an ug paagi sa kinabuhi. Dili kita angay matingala niini, kay si Jesus klarong nagpakita nga ang ‘kalibotan magdumot kanato tungod kay kita dili man bahin sa kalibotan.’ (Juan 17:14) Tugotan ba nato kadtong gibutaan ni Satanas sa pagpahadlok ug pagpaluya kanato ug sa pagpabati kanatog kaulaw sa maayong balita? Tugotan ba nato ang kabakakan mahitungod sa kamatuoran nga mag-apektar sa atong regular nga pagtambong sa tigom ug sa atong buluhatong pagsangyaw? O mobarog ba kitang malig-on ug magmaisogon ug mas determinado pa kay sa kaniadto sa pagpadayon sa pagmantala sa kamatuoran bahin kang Jehova ug sa iyang Gingharian?

17. Unsang pasalig ang makapadasig kanato sa pagpadayon sa pagpasundayag ug pagtuo?

¹⁷ Sumala sa natuman nga tagna sa Bibliya, kita karon nagkinabuhi na sa kinailadman sa panahon sa kataposan. Ang atong pinasukad-sa-Bibliya nga mga pagdahom alang sa usa ka bag-ong kalibotan sa pagkamatarong tino nga mahimong usa ka makapalipayng kamatuoran. Hangtod moabot kanang adlawa, hinaot nga kitang tanan magpasundayag ug dili-matarog nga pagtuo sa Pulong sa Diyos ug pamatud-an ang atong pagtuo pinaagi sa dili paghunong sa pagsangyaw sa maayong balita sa Gingharian sa tibuok-kalibotan. Hunahunaa ang libolibong bag-ong mga tinun-an nga ginabawtismohan matag semana. Dili ba igong katarongan kana kanato sa pag-apresyar nga ang pailob ni Jehova labot sa pagpahamtang sa iyang paghukom mosangpot ug kaluwasan sa daghan pang mga tawo? Dili ba malipayon kita nga gitugotan sa Diyos ang makaluwas-ug-kinabuhing buluhatong pagsangyaw sa Gingharian sa pagpadayon? Ug dili ba mahimuot kita nga minilyon ang midawat sa kamatuoran ug nagapasundayag sa ilang pagtuo?

18. Unsay imong determinasyon labot sa pag-alagad kang Jehova?

¹⁸ Kon hangtod kanus-a ang presenteng pagsulay sa atong pagtuo magpadayon kita walay ikasulti. Apan kini ang tino: Si Jehova nagtakda na ug adlaw sa panudya alang sa presenteng daotang mga langit ug yuta. Kasamtangan, magmadeterminado kita sa pagsundog sa maayo kaayong hiyas sa nasulayang pagtuo nga gipasundayag sa Maghihingpit sa atong pagtuo, si Jesus. Ug sundon nato ang panig-ingnan sa tigulang nga dinihogang nahibilin ug sa uban pa nga maisogong nagaalagad taliwala kanato.

19. Unsay imong matino nga modaog niining kalibotana?

¹⁹ Kita magmadeterminado pa sa pagmantala nga walay hunong sa walay kataposang maayong balita ngadto sa matag nasod, tribo, pinulongan, ug katawhan sa pagtabang sa manulonda nga naglupad sa kinatung-ang-langit. Padungga sila sa gipamulong sa manulonda: “Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na.” (Pinadayag 14:6, 7) Sa dihang kanang paghukom sa Diyos ipahamtang na, unsay mosangpot sa nasulayang kalidad sa atong pagtuo? Dili ba usa kini ka mahimayaong kadaogan​—kaluwasan gikan sa presenteng sistema sa mga butang ngadto sa matarong nga bag-ong kalibotan sa Diyos? Pinaagi sa pag-agwanta sa mga pagsulay sa atong pagtuo, kita makaingon, sama kang apostol Juan: “Mao kini ang pagpangdaog nga nagdaog sa kalibotan, ang atong pagtuo.”​—1 Juan 5:4.

[Mga footnote]

Nakahinumdom Ka Ba?

◻ Sa unsang paagi nga ang mga pagsulay sa atong pagtuo mahimong tuboran sa kalipay?

◻ Unsa ang pipila ka pagsulay sa atong pagtuo nga dili dayon maila?

◻ Sa unsang paagi kita makabaton ug kaayohan pinaagi sa pagbuntog sa mga pagsulay sa atong pagtuo?

[Hulagway panid 17]

Si A. H. Macmillan (atubangan sa wala) sa hapit na nga siya ug ang mga opisyal sa Watch Tower Society prisohon nga dili makataronganon

Usa siya ka delegado sa kombensiyon sa Detroit, Michigan, 1928

Sa iyang kataposang mga tuig, si Igsoong Macmillan nagpasundayag gihapon ug pagtuo

[Hulagway sa panid 18]

Sama niining pamilyaha, daghang Kristohanon sa Aprika nagpasundayag ug usa ka nasulayang kalidad sa pagtuo