Determinado nga Moalagad Kang Jehova!

“AYAW pagsangyaw!” “Ayawg paanhia ang imong mga kauban!” Daghang Kristohanong kababayen-an ang nakadungog niini ug sa samang mga pahayag gikan sa ilang magsusupak nga mga bana. Apan kon kining mga tawhana nag-alagad sa armadong kusog, atubangon sa ilang mga asawa ang linaing mga hagit sa ilang pagtuo. (Isaias 2:4; Juan 17:16) Nan, sa unsang paagi nga ang maong Kristohanong mga asawa makapabiling malig-on sa espirituwal ug aktibo sa pag-alagad sa Gingharian?

Ang pagkamaunongon kang Jehova nga Diyos nga inubanag personal nga determinasyon makatabang kanila sa paglahutay. “Ako nagtuo nga nakatabang ang akong hugot nga determinasyon,” miingon si Yvonne, usa ka asawa sa sundalo. “Nasayod ako nga aduna gayoy mga paagi nga mapugngan ang pagsupak sa akong bana.” Oo, aduna gayod.

Laing Kristohanong babaye, nga naminyo sa usa ka sundalo, miasoy kon sa unsang paagi ang iyang hugot nga pagbarog nagpasayon pa sa kinabuhi sa iyang bana. “Nasayod siya sa akong eskedyul maingon man sa iyaha, ug gipabilhan kana sa mga militar,” siya misaysay. Bisan pa niana, ang iyang padayong pag-alagad kang Jehova dili sayon nga dalan.

Pagbuntog sa Kamingaw

Ang mga asawa sa mga sundalo kanunayng nagaatubang sa hagit sa pagbalhin sulod sa pipila lang ka adlaw nga pagpahibalo kon sila mokuyog sa ilang mga bana ngadto sa usa ka asaynment nga halayo sa balay. Unya, kay nahimutang sa dili sinating mga palibot, mabati dayon nga nahilain. Apan dili angayng maingon niini. Kadtong nag-alagad kang Jehova adunay bentaha. Unsa kana? Sumala sa Kristohanong apostol nga si Pedro, kana mao “ang tibuok kapunongan sa mga igsoon.” Karon mikabat na ug minilyon, ang mga Saksi ni Jehova sa 231 ka nasod nagalihok ingong usa ka dakong Kristohanong pamilya, usa ka “panag-igsoonay.” Makita nimo sila halos bisan diin.​—1 Pedro 2:17, potnot.

Si Susan, nga kalit nga gibalhin gikan sa iyang pinuy-anan, miabot sa pagpuyo sa base militar sa kahanginan diin ang iyang bana naasayn. Bag-ohan pa sa pagtuo ug gipugos gikan sa iyang dili-magtutuong bana sa paghunong sa Kristohanong ministeryo, siya miasoy: “Mitambong dayon ako sa lokal nga mga tigom, ug didto ako nakahimo sa pagpakigkita ug pagpakig-estorya sa ubang mga igsoong babaye. Sa pagkatinuod makaingon ako nga kini nga kapunongan ang nakapalahutay kanako.”

Usahay ang kamingaw makapahinabog depresyon. Bisan pa, ang maayong balita makahatag ug makalipayng pagdasig. Si Glenys, nga usa ka Ingles nga igsoong babaye kinsa miuban sa iyang bana dihang naasayn siya sa laing nasod, miasoy: “Sa dihang ako naguol kaayo, sa wala damha, usa ka babaye nga akong nakaila sa katuigan kanhi sa dihang ako mismo diha pa sa militar misulat ug miingon nga dili pa dugay siya nabawtismohan ingong usa sa mga Saksi ni Jehova. Kadto nakapadasig kanako sa tukma gayod nga panahon.”

Si Jane, kinsa mibiyahe uban sa iyang bana ngadto sa Kenya, nakakaplag nga ang Kristohanong mga tigom maoy usa ka panalipod, bisan tuod gidumala sa mga pinulongan nga wala niya masabti. “Nasayod ako nga gusto ni Jehova nga ania ako dinhi,” misaysay siya. “Kauban ko ang akong espirituwal nga mga igsoon, ug sila makapabaskog sa espirituwal. Giabiabi nila ako, ug ako mibati nga kami usa ra ka pamilya.”

Si Jane maoy usa lamang sa daghan niining mga kahimtanga kinsa nakakaplag ug espirituwal nga mga paryente nga wala gani niya masayri nga iyang nabatonan!​—Marcos 10:29, 30.

Malig-on Bisan pa sa Paglutos

“Ayaw paghunahuna nga mianhi ako aron magbutang ug pakigdait sa yuta,” si Jesus mipasidaan. “Mianhi ako aron magbutang, dili sa pakigdait, apan espada.” (Mateo 10:34) Unsay buot niyang ipasabot? Bisan sulod sa pamilya, diin ang kalinaw pagadahomon, malagmit nga adunay “kalit nga pagbakyaw sa espada,” mikomento si A. T. Robertson diha sa Word Pictures in the New Testament. “Sa pagkatinuod,” si Jesus miingon, “ang mga kaaway sa tawo mao unya ang iyang kaugalingong panimalay.” (Mateo 10:36) Pagkatinuod gayod niining mga pulonga kon ang usa ka kapikas sa kaminyoon mosupak sa kamatuoran!

Sa dihang si Diane misugod sa pagtuon sa Bibliya uban sa mga Saksi ni Jehova, ang iyang bana, nga usa ka sundalo sa kahanginan, nasuko kaayo. Unsay epekto niini diha sa ilang kaminyoon? “Kadto nahisamag bloke sa yelo nga nag-ulang kanamo,” misaysay si Diane. “Malipayon kaniadto ang among kaminyoon. Sa kalit lang daw kami mga estranghero sa samang panimalay.” Nan, sa unsang paagi siya nakasagubang? “Ang akong hugot nga pagtuo ug determinasyon mao ang hinungdanon, uban sa tabang ni Jehova ug sa iyang espiritu.” Gisunod ni Diane ang panig-ingnan sa Bibliya ni manalagnang Daniel.

Sa dihang nadestiyero sa Babilonya ug gitanyagan ug pagkaon nga dili-dalawaton sa usa ka alagad sa Diyos, si Daniel “determinado sa iyang kasingkasing nga dili niya hugawan ang iyang kaugalingon sa kinaham nga mga pagkaon sa hari.” Oo, si Daniel mihimog mabuot nga desisyon. Nakahukom siya diha sa iyang kasingkasing nga dili gayod niya hugawan ang iyang kaugalingon pinaagi sa pagkaon sa maong kan-onon. Pagkadakong kaisog ang iyang gipakita samtang “siya padayong naghangyo sa pangunang opisyal sa gingharian aron dili niya mahugawan ang iyang kaugalingon”! Ang resulta? Gipanalanginan ni Jehova ang iyang hugot nga pagbarog.​—Daniel 1:8, 9, 17.

Sama karong adlawa ang magsusupak nga bana basin momando nga ang iyang asawa mohunong na sa pagtambong sa mga tigom sa kongregasyon. Unsaon niya pagsanong? Nahimutang si Jane niining kahimtanga. Siya misaysay: “Dili gayod ako mosurender ilalom sa kalisod. Nasayod akong dili gayod mahimong mokompromiso. Kinahanglang ipakita ko kon unsa ka hinungdanon kanako ang mga tigom.” Gipanalanginan ni Jehova ang iyang desisyon samtang siya padayong nagatambong.

“Naningkamot ang akong bana sa pagpugong kanako sa pagtambong sa mga tigom, apan wala kadto magdugay,” miasoy ni Glenys. “Mitambong gihapon ako. Sa dihang ako mopauli, usahay kulatahon ako niya, ug sa ubang mga panahon sugaton ako sa kahilom.” Bisan pa niana, siya nakasagubang, nga masubsob nga nag-ampo. Dugang pa, duha sa mga ansiano sa kongregasyon ang kanunayng nag-ampo uban kaniya, nga nakapadasig kaayo kaniya nga mopadayon sa pagtambong.​—Santiago 5:13-15; 1 Pedro 2:23.

Usahay ang mga labaw sa bana tingali mopugos kaniya sa pagbugnaw sa iyang asawa sa pagsangyaw sa maayong balita. Nakita ni Diane nga kinahanglang ipatin-aw niya sa iyang bana kon unsa ang butang nga hinungdanon kaniya. “Ako andam,” siya miingon, “sa pagdawat sa mga sangpotanan sa akong padayong pagsangyaw.” Pagkasama gayod kini sa baroganan sa mga apostoles! (Buhat 4:29, 31) Bisan pa niana, siya mabinantayon diha sa iyang pagsangyaw. Siya miasoy: “Naandan ko ang pagpakape ug tanyagan ang tanan nga presente ug librong Kamatuoran.”​—Mateo 10:16; 24:14.

Pagpasakop nga Dili Mokompromiso

Bisan tuod naguol tungod sa kalisod sa kaminyoon, ang Kristohanong mga asawa naglantaw sa umaabot ug nagsalig kang Jehova. Kini makatabang kanila sa paghupot ug usa ka balanseng panglantaw. Gihatagan nila ang ilang bana sa tanang pagpaluyo nga ilang maarangan nga walay pagkompromiso sa ilang pagtuo. Sa pagbuhat niana, gisunod nila ang dinasig nga tambag ni Pedro: “Kamong mga asawa, magpasakop sa inyong kaugalingong mga bana.” (1 Pedro 3:1) Sa The Amplified New Testament, kining sugo sa apostol mabasa: “Ipaubos ang inyong kaugalingon ingong ikaduha kanila ug nagasalig kanila, ug ipahiuyon ang inyong kaugalingon kanila.” Matikdi kon giunsa pagsunod ni Jane kining tambaga. “Gisultihan ako sa akong bana nga ang gusto ko nga buhaton kinahanglang dili makababag sa iyang karera,” siya misaysay. “Busa naningkamot ako sa pagpangitag mga paagi diin ako makatabang kaniya.”

Ang pila ka Kristohanong mga asawa sa ingon miuyon sa pagtambong sa mga salo-salo diin gidapit ang ilang mga bana. Apan hugot ang ilang desisyon nga dili ikompromiso ang ilang pagtuo. Migahin si Jane ug panahon sa pagpakigsulti sa iyang bana bahin niini. Maluloton niyang gisaysay nga siya gustong motambong apan dili buot nga ang iyang presensiya makapakaulaw kaniya. “Nasayod ako nga usahay ang tanang nagtambong gidahom nga motindog ug moapil sa tagay sa pasidungog. Natun-an nako nga ang pagkamaunongon iya lamang kang Jehova, ug ang pagtagay alang sa pasidungog labaw pa kay sa pagpakita lamang ug pagtahod. Naamgohan sa akong bana kon unsa ka salikwaot unya ang kahimtang, busa siya miingon na lang: ‘Ayaw pagtambong!’ Misunod ako.”

Si Glenys, sa laing bahin, miuban sa iyang bana sa ingong salo-salo, apan iyang gibantayan ang mga opisyal nga anaa sa ulo sa lamesa. Sa dihang nakita niyang sila nangandam alang sa tagay sa pasidungog, mabinantayon siyang miadto sa kasilyas! Oo, kining mga babayehana mipasibo sa ilang mga kaugalingon apan wala mokompromiso.

“Makabig nga Walay Pulong”

“Kon pauswagon ko ang akong kaugalingong katakos ingong asawa, makita sa akong bana nga ang kamatuoran nakapausab kanako,” nangatarongan si Yvonne. Busa balikbalik niyang gibasa ang kapitulo sa librong Pamilyahanong Kinabuhi nga nag-ulohang “Ang Asawa nga Gimahal Pag-ayo.”a “Gihatagan ko ug linaing pagtagad ang materyal ubos sa ulohang ‘Mga Palahilak, mga Palaaway’! Apan akong namatikdan nga kon magsige akog sulti sa akong bana, mograbe pa ang kahimtang.” Hinuon, sa kataposan siya milampos sa pag-abag sa iyang bana sa pag-alagad kang Jehova. Sa unsang paagi? Pinaagi sa pagpadapat sa prinsipyo nga gilaraw sa 1 Pedro 3:1, nga ang mga bana “makabig nga walay pulong.”

Ang paagi sa pag-atiman sa Kristohanong kababayen-an sa ilang mga pamilya nakahimog dako sa pagrekomendar sa Kristiyanidad ngadto sa uban. “Naningkamot ako sa paghimo sa kamatuoran nga madanihon kutob sa maarangan,” miasoy si Diane. “Sa dihang motambong ako sa mga tigom, ang akong bana mobating nag-inusara, busa gitino nako nga mapahimangnoan ang mga bata nga magbinuotan pag-ayo sa dihang mouli kami sa balay. Gipaningkamotan usab nako nga hatagan siyag dugang pagtagad sa dihang kami mouli.” Sa hinayhinay ang tinamdan sa iyang bana nausab sa dihang siya misanong sa malulutong pagtagad sa iyang pamilya.

Ang isigka-alagad ni Jehova makatabang usab. Si Jane miasoy nga ang iyang bana nalipay sa pagpakig-uban sa mga misyonaryong Saksi nga iyang nahibalag sa Kenya. “Gihigala nila siya ug nakig-estoryahay bahin sa potbol, ug sila maabiabihon kaayo. Sa pila ka higayon, kami gidapit sa lainlaing mga puy-anan sa mga misyonaryo sa pagpangaon.” Ang iyang bana sa ulahi misaysay: “Nagsugod ako sa paglantaw sa pagtuo ni Jane gikan sa bug-os lahing panglantaw. Ang iyang mga higala intelihente kaayong mga tawo nga makasulti bahin sa nagkalainlaing mga ulohan.” Sa susama, ang bana ni Diane nagbag-o sa iyang panglantaw sa kamatuoran. Sa dihang ang kotse nga iyang gidrayban naaberiya, usa ka batan-ong Saksi mitabang kaniya. “Kana nakapadani kaayo kanako,” siya miingon.

Siyempre, dili tanang kapikas sa kaminyoon makabig sa kamatuoran. Unsa na man? Si Jehova magtagana ug tabang aron makalahutay ang mga matinumanon. (1 Corinto 10:13) Tagda ang pagdasig ni Glenys alang niadtong sama kaniyag kahimtang: “Ayaw, ayaw gayod pagduhaduha nga si Jehova mao ang Usa nga tigpasiugda sa kaminyoon ug nga buot siya nga ang mga magtiayon magpabiling nahiusa. Busa bisan unsa pay buhaton sa bana o bisan unsang pagsupak ang imong madawat gikan niadtong naglibot kanimo, si Jehova dili gayod motugot kanimo nga matarog.” Bisan tuod ang iyang bana wala gihapon mosimba kang Jehova, ang iyang tinamdan kaniya ug sa kamatuoran miarang-arang.

‘Magpugas ug mga Luha; Magaani ug Kalipay’

Sa pagkatinuod, kining Kristohanong kababayen-an determinadong moalagad kang Jehova. Kon sama niini ang imong kahimtang, himoa usab kini nga imong desisyon. Hinumdomi ang tambag: “Kahadloki si Jehova nga imong Diyos. Kaniya mag-alagad ka, ug kaniya motapot ka.”​—Deuteronomio 10:20.

“Siya nga molakaw, bisag naghilak, nga nagdalag bag nga puno sa binhi nga igpupugas, tino nga mobalik nga malipayon, nga magdala sa iyang mga binangan nga mga uhay,” mipahayag ang salmista. (Salmo 126:6) “Tinuod nga motubod gayod ang imong daghang luha sa dihang maningkamot ka sa pagpakita sa imong kapikas sa kamatuoran, sa hilom o sa binaba,” miangkon ang usa ka Saksi. “Apan sa kataposan malipay ka tungod kay bisan dili siya modawat sa kamatuoran, panalanginan ni Jehova ang imong pagpaningkamot.”

Ang tanang matinumanong nag-alagad kang Jehova bisan pa sa pagsupak diha sa balay angayan sa tinuod nga pagdayeg. Sila takos sa pagpaluyo ug gugma. Hinaot magpabilin sila sa ilang walay-pagkompromisong baroganan, nga determinado nga moalagad kang Jehova!

[Footnote]

[Hulagway sa panid 28]

Ang mainampoong pagtuon molig-on sa Kristohanong determinasyon