Tagong Katahom
GEODE. Usa ka langyawng pulong. Kini gikan sa Gregong ge·oʹdes, nagkahulogang “samag-yuta.” Kini maoy usa ka bato nga may pagkalingin, lungaggan sa ilalom, ug may sukod nga tres sentimetros ngadto sa kapin sa 0.3 ka metro sa diyametro. Ang usa nga gipakita dinhi taason inay linginon ug gikan kini sa Brazil. Ang hitsura niini sa atubangan dili-kaayo nindot, sama sa mga bato.
Apan buk-a kana! Tan-awa ang sulod! Tagbawa ang imong mga mata nianang nagdasok nga tapok sa nagsidlaksidlak nga purpurang mga kristal! Ang geode moporma libot sa lungag sa sedimentaryong bato. Sa dihang modako kini, moporma ang mga liki diha sa nawong niini, nga makapasulod sa tubig nga dunay mineral, ug sa dihang manibug-ok ang mga mineral, motubo ang mga kristal pasulod gikan sa likos sa lungag. Sa dili madugay kita dunay nahapinag-kristal nga geode. Ang geode nga gipakita dinhi nagpagulag purpurang klase sa nahimong kristal nga quartz nga gitawag amethyst. Ang hitsura niya sa gawas dili matahom, apan makasulaw ang katahom niini sa sulod!
Wala ka bay nailhang mga tawo nga samag mga geode? Hilomon, tingali maulawon, hayan dili kaayo matahom tan-awon sa gawas? Apan paggugol ug panahon aron sila makaila, ug sila mobukas ug mopakita kanimog katahom sa sulod nga mosiga. Ang mainit, malulotong espiritu motungha, mobukhad ang makalilipayng personalidad. Ikaw makadiskobreg kaladmon nga wala nimo damha.
Ikaw mosugod sa pagpabili sa gipamulong ni apostol Pedro: “Himoa nga ang pagpaanyag ninyo sa inyong kaugalingon dili anha sa inyong dayag nga panagway pinaagi sa pagsalapid sa buhok ug sa pagdayandyan ug mga alahas nga bulawan o sa pagsul-ob ug mga hamiling besti, kondili anha hinoon sa pagkatawo nga natago sulod sa kasingkasing pinaagi sa dili madunot nga alahas sa maaghop ug malinawon nga espiritu, nga bililhon uyamot sa atubangan sa Diyos.”—1 Pedro 3:3, 4.
Ug sulayi ang pagpraktis sa pagtan-aw sa paagi sa Diyos sa pagtan-aw: “Ang tawo tawo nagatan-aw sa panagway sa gawas; apan alang kang Jehova, siya nagatan-aw sa kasingkasing.”—1 Samuel 16:7.