Pasidunggi ang Tanang Matang sa mga Tawo

“Pasidunggi ang tanang matang sa mga tawo, . . . kahadloki ang Diyos, pasidunggi ang hari.”—1 PEDRO 2:17.

 1. (a) Kinsa gawas sa Diyos ug kang Kristo ang angay pasidunggan? (b) Sa unsang mga bahin ang mga tawo pakitaan ug pasidungog sumala sa 1 Pedro 2:17?

ATONG nakita nga katungdanan nato nga pasidunggan si Jehova nga Diyos ug si Jesu-Kristo. Kana ang matarong, manggialamon, ug mahigugmaong butang nga pagabuhaton. Apan gipadayag usab sa Pulong sa Diyos nga kinahanglang pasidunggan nato ang isigkatawo. “Pasidunggi ninyo ang tanang matang sa mga tawo,” kita gisugo. (1 Pedro 2:17) Sanglit kining bersikuloha natapos uban sa sugo, “pasidunggi ninyo ang hari,” ang ipasabot mao nga ang pasidungog igahatag ngadto niadtong may katungod sa pagdawat niana tungod sa ilang katungdanan. Nan, kinsay tukma natong pasidunggan? Ang mga tawong angay pasidunggan basin mag-apil sa daghan pa kay sa tingali gihunahuna sa pipila. Kita makaingon nga adunay upat ka bahin diin kinahanglang ipakita nato ang pasidungog sa ubang tawo.

Pasidunggi ang Politikanhong mga Punoan

 2. Sa unsang paagi nasayran nato nga “ang hari” nga gihisgotan sa 1 Pedro 2:17 nagatumong sa tawhanong hari o politikanhong magmamando?

² Ang una sa maong mga bahin maoy langkit sa sekular nga mga kagamhanan. Kinahanglang pasidunggan nato ang politikanhong mga magmamando. Sa mitambag si Pedro: “Pasidunggi ninyo ang hari,” nganong moingon kita nga diha sa hunahuna ni Pedro ang politikanhong mga magmamando? Kay siya naghisgot mahitungod sa kahimtang sa gawas sa Kristohanong kongregasyon. Bag-o pa siyang nakatapos nga miingon: “Magpasakop kamo sa tanang tawhanong linalang: kon kaha ngadto sa usa ka hari ingon nga labaw o ngadto sa mga gobernador nga gipadala niya.” Matikdi, usab, nga gipalahi ni Pedro ang Diyos gikan sa “ang hari,” nga miingon: “Kahadloki ninyo ang Diyos, pasidunggi ang hari.” (1 Pedro 2:13, 14) Busa “ang hari” si kinsa giawhag kita ni Pedro nga pasidunggan nagtumong sa tawhanong mga hari ug politikanhong mga punoan.

 3. Kinsa “ang labaw nga mga pagbulot-an,” ug unsay igabayad kanila?

³ Si apostol Pablo susamang misugo: “Magpasakop kamo sa labaw nga mga pagbulot-an.” Kining “labaw nga mga pagbulot-an” dili mao si Jehova nga Diyos o si Jesu-Kristo, kondili sila maoy politikanhong mga magmamando, mga opisyales sa gobyerno. Uban kanila sa kaisipan, si Pablo nagpadayon sa pag-ingon: “Ihatag nilang tanan ang angay nga bayran, . . . kaniya nga mangayo sa pasidungog, ang maong pasidungog.” Oo, sila nga gitugotan sa Diyos sa pagmando sa politikanhong paagi angay nga pasidunggan.​—Roma 13:1, 7.

 4. (a) Sa unsang paagi ang pasidungog ikapakita ngadto sa politikanhong mga magmamando? (b) Unsang panig-ingnan ang gihatag ni apostol Pablo sa pagpakitag pasidungog sa mga magmamando?

⁴ Sa unsang paagi atong ipakita ang pasidungog nganha sa politikanhong mga punoan? Ang usa ka paagi maoy pinaagi sa pagtagad kanila uban ang lalom nga pagtahod. (Itandi ang 1 Pedro 3:15.) Ug tungod sa ilang posisyon, ang maong pagtahod nahiangay kanila bisan pag sila tingali mga tawong daotan. Ang Romanong historyano si Tacitus nagbatbat kang Gobernador Felix ingong usa ka tawo nga “naghunahuna nga siya makabuhat ug daotang buhat nga dili kasilotan.” Bisan pa niana gisugdan ni Pablo ang iyang depensa atubangan ni Felix sa matinahorong paagi. Sa susama, si Pablo matinahorong nagsulti kang Haring Herodes Agripa II, “Ako nalipay nga sa imong atubangan ako magalaban sa akong kaugalingon,” bisan pag si Pablo nahibalo nga si Agripa naminyog duol nga kabanay. Sa susama, si Pablo nagpakitag pasidungog kang Gobernador Festo, nga nagtawag kaniyang “Imong Kamahalan,” bisan pag si Festo usa ka magsisimbag diyosdiyos.​—Buhat 24:10; 26:2, 3, 24, 25.

 5. Unsang dugang paagi ipakita ang pasidungog ngadto sa kagamhananong mga pagbulot-an, ug sa unsang paagi ang mga Saksi ni Jehova nagahatag ug maayong panig-ingnan sa pagbuhat niini?

⁵ Ang laing paagi atong ipakita ang pasidungog sa opisyales sa gobyerno gipaila ni apostol Pablo sa misulat siya mahitungod sa paghatag sa angay nga bayranan sa kagamhananong mga pagbulot-an. Siya miingon nga ihatag “kaniya nga mangayo sa buhis, ang buhis; kaniya nga mangayo sa alkabala, ang alkabala.” (Roma 13:7) Ang mga Saksi ni Jehova nagahatag nianang mga butang angay bayran bisan diing nasora sa kalibotan sila nagapuyo. Sa Italya ang mantalaang La Stampa miingon: “Sila ang labing maunongong mga lungsoranan nga hiangayan ni bisan kinsa: dili sila molikay sa mga buluhisan o magtinguha sa paglikay sa lisod nga kabalaoran sa kaugalingon nilang kaayohan.” Ug ang The Post sa Palm Beach, Florida, U.S.A., miingon mahitungod sa mga Saksi ni Jehova: “Sila nagabayad sa ilang mga buluhisan. Sila maoy pipila sa labing matinud-anong mga lungsoranon sa Republika.”

Ipakita ang Pasidungog Ngadto sa mga Amo

 6. Kang kinsa pa nga igahatag ang pasidungog sumala ni apostol Pablo ug Pedro?

⁶ Ang ikaduhang bahin nga angay ihatag ang pasidungog maoy diha sa atong mga gitrabahoan. Ang mga apostol Pablo ug Pedro nagpasiugda sa bili nga pasidunggan sa mga Kristohanon kadtong gibutang nga tagdumala nila sa mga relasyong maylabot sa trabaho. Si Pablo misulat: “Himoa nga ang tanan nga maoy mga ulipon ilalom sa usa ka yugo magpadayon sa pag-isip sa ilang mga agalon nga takos sa bug-os nga pasidungog, aron dili kapasipad-an ang ngalan sa Diyos ug ang pagtulon-an. Dugang pa, himoa nga kadtong may matinuohong mga agalon dili magtamay kanila, tungod kay sila mga igsoon. Sa kasukwahi, himoa nga sila labi pang andam nga mahimong mga ulipon.” Ug si Pedro miingon: “Pasagding ang mga sulugoon sa balay magpasakop sa ilang mga agalon uban sa bug-os angayan nga kahadlok, dili lamang sa mga maayo ug makataronganon, apan kadtong lisod usab nga pahimut-an.”​—1 Timoteo 6:1, 2; 1 Pedro 2:18; Efeso 6:5; Colosas 3:22, 23.

 7. (a) Sa unsang paagi ang tambag sa Bibliya nga ang “mga ulipon” magpakitag pasidungog ngadto sa “mga agalon” tukmang ipadapat karong adlawa? (b) Unsay ampingan sa pagsunod sa Kristohanong mga empliyado nga adunay Kristohanong mga amo?

⁷ Hinuon, ang pagpangulipon dili kanat karong adlawa. Apan ang mga prinsipyo nga nagmando sa mga Kristohanon diha sa ulipon-agalon nga relasyon mapadapat nganha sa empliyado-amo nga relasyon. Busa, ang Kristohanong mga empliyado may responsabilidad sa pagpakitag pasidungog bisan ngadto sa mga amo nga lisod pahimut-an. Ug unsa man kon ang amo nahitabong kauban usab nga magtutuo? Inay sa pagdahom ug linaing konsiderasyon o pagpalabi tungod sa maong relasyon, ang empliyado angay mag-alagad sa iyang Kristohanong amo nga labi pang andam, nga dili gayod siya pahimudsan sa bisan unsang paagi.

Pasidungog sa Sulod sa Pamilya

 8, 9. (a) Kinsa ang kinahanglang pasidunggan sa mga anak? (b) Nganong ang mga anak angay magpakita sa maong pasidungog, ug sa unsang paagi sila makapakita niini?

⁸ Ang ikatulong bahin nga angay ang pasidungog maoy sulod sa pamilya. Pananglitan, ang mga anak obligado nga magpasidungog sa ilang mga ginikanan. Kini dili lang usa ka kinahanglanon sa Kasugoan nga gihatag kang Moises kondili usa ka obligasyon usab alang sa mga Kristohanon. Si apostol Pablo misulat: “Mga anak, magmasinugtanon kamo sa inyong mga ginikanan nga nahiusa sa Ginoo, kay kini matarong: ‘Pasidunggi ang imong amahan ug ang imong inahan.’”​—Efeso 6:1, 2; Exodo 20:12.

⁹ Nganong ang mga anak angay magpasidungog sa ilang mga ginikanan? Angay silang magpasidungog kanila tungod sa hinatag-Diyos nga pagbulot-an sa ilang mga ginikanan ug tungod usab sa nabuhat sa ilang mga ginikanan, nga nagpakatawo kanila ug nag-atiman ug nagmatuto kanila sukad sa pagkabata. Sa unsang paagi ang mga anak magpasidungog sa ilang mga ginikanan? Angay nilang buhaton kini pinaagi ilabina sa pagkamasinugtanon ug pagkamapasakopon kanila. (Proverbio 23:22, 25, 26; Colosas 3:20) Ang paghatag sa maong pasidungog basin magkinahanglan nga ang dagkong mga anak mohatag ug dugang nga suportar, materyal ingon man espirituwal, ngadto sa tigulang nilang mga ginikanan o mga apohan. Kini kinahanglang timbangon nga maalamon sa ubang mga responsabilidad, sama sa pag-atiman sa kaugalingong mga anak ug pagpakig-ambit sa bug-os sa Kristohanong pakig-uban ug sa pagsangyaw sa kanataran.​—Efeso 5:15-17; 1 Timoteo 5:8; 1 Juan 3:17.

10. Ang mga asawa may obligasyon sa pagpakitag pasidungog kang kinsa, ug sa unsang mga paagi sila makabuhat niini?

¹⁰ Apan ang mga anak dili mao lamang sulod sa pamilya ang obligado sa paghatag ug pasidungog sa uban. Ang mga asawa angay magpasidungog sa ilang mga bana. Si apostol Pablo miingon usab nga “ang asawa angay magbaton ug lalom nga pagtahod sa iyang bana.” (Efeso 5:33; 1 Pedro 3:1, 2) Ang pagpakitag “lalom nga pagtahod” sa mga bana tinong naglangkit sa paghatag kanilag pasidungog. Gipasidunggan ni Sara ang iyang bana, si Abraham, sa dihang siya nagtawag kaniya nga “ginoo.” (1 Pedro 3:6) Busa mga asawa, sundoga ninyo si Sara. Ihatag sa inyong mga bana ang pasidungog pinaagi sa pagdawat sa ilang mga desisyon ug paningkamot nga kana molampos. Pinaagi sa pagbuhat sa inyong maarangan sa pagtabang sa inyong mga bana sa pagpas-an sa ilang mga lulan, inay dugangan kana, kamo magpakita kanilag pasidungog.

11. Bahin sa pagpakitag pasidungog, unsang obligasyon ang nabatonan sa mga bana, ug ngano?

¹¹ Komosta ang mga bana? Sila gipahimangnoan diha sa Pulong sa Diyos: “Kamong mga bana, makig-ipon sa samang paagi sa [inyong mga asawa] sumala sa kahibalo, nga magahatag kanilag pasidungog ingon nga ngadto sa mahuyang nga sudlanan, ang babaye, sanglit kamo usab mga manununod uban kanila sa dili-takos nga gasa sa kinabuhi, aron ang inyong mga pag-ampo dili mababagan.” (1 Pedro 3:7) Kana tinong magpahunahuna sa tanang bana. Kini samag ang usa ka asawa may dalang marka “Mahal. Delikado. Ampingi! Hatagig pasidungog!” Busa ipahinumdom sa mga bana nga gawas kon hatagan nilag pasidungog ang ilang mga asawa pinaagi sa pagpakita kanilag angay nga konsiderasyon, ilang madaot ang ilang relasyon uban kang Jehova nga Diyos, kay mababagan ang ilang mga pag-ampo. Sa pagkamatuod, mapuslanon sa mga sakop sa usa ka pamilya ang pagpasidungog sa usag usa.

Sulod sa Kongregasyon

12. (a) Kinsa ang may responsabilidad sa pagpakitag pasidungog diha sa kongregasyon? (b) Giunsa pagpakita ni Jesus nga angay ang pagdawat ug pasidungog?

¹² Anaa usab ang responsabilidad nga angay ipakita sa tanan sulod sa Kristohanong kongregasyon. Kita gitambagan: “Sa pagpakitag pasidungog sa usag usa manguna kamo.” (Roma 12:10) Gipaila ni Jesus sa usa sa iyang mga ilustrasyon nga angay ang pagdawat ug pasidungog. Siya miingon nga sa dihang kita dapiton sa usa ka kombira, angay nga molingkod kita sa labing ubos nga dapit, kay unya ang atong tagbalay mohangyo nga kita molingkod sa labaw nga lingkoranan, ug kita mapasidunggan atubangan sa tanang kauban natong mga dinapit. (Lucas 14:10) Karon, sanglit kitang tanan buot mang pasidunggan, dili ba angay kita magbatog empatiya ug mohatag ug pasidungog sa usag usa? Sa unsang paagi mahimo nato kini?

13. Unsa ang pila ka paagi kita makapakitag pasidungog sa uban diha sa kongregasyon?

¹³ Ang mga pagpahayag ug apresasyon alang sa usa ka buluhaton nga maayong pagkabuhat maoy katumbas sa paghatag ug pasidungog. Busa kita makapasidungog sa usag usa pinaagi sa paghatag pagdayeg, tingali alang sa usa ka pakigpulong o komento nga gihatag sa usa diha sa kongregasyon. Dugang pa, kita makapasidungog sa usag usa pinaagi sa pagsangkap sa atong kaugalingon sa pagpaubos sa hunahuna ngadto sa atong Kristohanong mga igsoong lalaki ug babaye, pinaagi sa pagtagad kanila uban sa lalom nga pagtahod. (1 Pedro 5:5) Sa ingon atong ipasundayag nga gipabilhan nato sila ingong madungganong mga isigkaalagad ni Jehova nga Diyos.

14. (a) Sa unsang paagi ang mga igsoon diha sa kongregasyon makapakitag nahiangay nga pasidungog sa mga igsoong babaye? (b) Unsay nagapakita nga ang paghatag ug mga gasa maoy usa ka paagi sa paghatag pasidungog?

¹⁴ Gitambagan ni apostol Pablo ang batan-ong si Timoteo nga tagdon ang Kristohanong mga igsoong babaye ingong mga inahan ug ang mga batan-ong babaye ingong mga igsoon sa unod, “uban sa bug-os nga kaputli.” Oo, sa dihang ang mga igsoong lalaki magbantay nga dili magsayonsayon sa ilang Kristohanong mga babaye, sama sa pagpakitag hinobrang pakigsandurot, sila nagahatag kanilag pasidungog. Si Pablo nagpadayon sa pagsulat: “Pasidunggi ninyo ang mga babayeng balo nga tinuod nga mga babayeng balo.” Usa ka paagi nga pasidunggan ang usa ka babayeng balo nga anaa sa kawalad-on maoy pinaagi sa materyal nga suportar. Apan aron makuwalipikado niini, kinahanglang siya “gipanghimatud-an sa maayong mga binuhatan.” (1 Timoteo 5:2-10) Maylabot sa materyal nga mga gasa, si Lucas misulat mahitungod sa katawhan sa isla sa Malta: “Kami ilang gipasidunggan usab sa daghang mga gasa ug, sa among paggikan, kami ilang gipabalonan sa among mga kinahanglanon.” (Buhat 28:10) Busa ang pasidungog ikapakita sa lain pinaagi sa pagtaganag materyal nga mga gasa.

15. (a) Kang kinsa kita may espesyal nga obligasyon sa pagpakitag pasidungog? (b) Unsa ang usa ka paagi kita makapakitag pasidungog ngadto niadtong nagapanguna?

¹⁵ Sa pagpadayon sa iyang sulat kang Timoteo, si Pablo misulat: “Ang [mga ansiano] nga maayo sa ilang pagdumala kinahanglang pagaisipon nga takos sa dobleng pasidungog, ilabina kadtong nagapangabudlay sa pagpahayag ug pagpanudlo.” (1 Timoteo 5:17) Sa unsang mga paagi makapasidungog kita sa mga ansiano, o mga magtatan-aw? Si Pablo miingon: “Mahimong mga manunundog kanako, maingon nga ako nanundog kang Kristo.” (1 Corinto 11:1) Sa dihang atong pamation ang mga pulong ni Pablo nga mahimong mga manunundog niya, ato siyang gihatagag pasidungog. Kini mapadapat ngadto niadtong nagapanguna sa atong taliwala karong adlawa. Sa gidak-on nga kita nagasundog kanila, pinaagi sa pagsunod sa ilang panig-ingnan, kita magahatag kanilag pasidungog.

16. Unsa ang dugang mga paagi nga ang pasidungog ikapakita niadtong nagapanguna?

¹⁶ Ang laing paagi kita magpakitag pasidungog sa mga magtatan-aw maoy pinaagi sa pagpamati sa tambag: “Magmasinugtanom kamo sa mga nagapanguna sa inyong taliwala ug magpasakop kamo, kay sila nagabantay sa inyong mga kalag ingon nga maoy magahatag ug husay.” (Hebreohanon 13:17) Oo, sa samang paagi nga ang mga anak magpasidungog sa ilang mga ginikanan pinaagi sa pagkamasinugtanon kanila, kita usab magpasidungog niadtong nagapanguna sa atong taliwala pinaagi sa pagkamasinugtanon ug pagpasakop kanila. Ug, maingon nga si Pablo ug ang iyang mga kauban gipasidunggan sa materyal nga mga gasa niadtong malulutong mga molupyo sa Malta, daghang nagapanawng mga hawas sa Sosyedad susamang gipasidunggan niining paagiha matag karon ug unya. Apan, siyempre, dili gayod angay nga mangayo sila sa maong mga gasa o magpasumbingay nga kana apresyahon o nga kana gikinahanglan.

17. Unsang obligasyon ang nabatonan niadtong may mga pribilehiyo sa pagdumala kon bahin sa pagpakitag pasidungog?

¹⁷ Sa laing bahin, ang tanan nga anaa sa mga katungdanan sa pagdumala diha sa teokratikanhong organisasyon​—kon kaha sa lokal nga kongregasyon, sa usa ka sirkito o distrito ingong nagapanawng magtatan-aw, sa usa sa mga sangang-buhatan sa Watch Tower Society, o sulod sa pamilya​—may obligasyon sa paghatag pasidungog niadtong ilang gidumalahan. Nagkinahanglan kini sa ilang pagbatog empatiya ingon man pagkamabination. Kinahanglang sila maduolan sa tanang panahon, nga malumo ug mapaubsanon sa kasingkasing ug hunahuna, sama sa giingon ni Jesu-Kristo nga siya maoy ingon.​—Mateo 11:29, 30.

Paningkamot sa Pagpasidungog sa Usag Usa

18. (a) Unsay makapugong nato sa pagpakitag pasidungog niadtong takos? (b) Nganong dili makataronganon ang negatibo ug hinawayong kaisipan?

¹⁸ Kinahanglan nga kitang tanan maningkamot sa pagpasidungog sa usag usa, kay adunay usa ka gamhanang pugong sa atong pagbuhat niana. Ang maong pugong, o babag, mao ang atong dili-hingpit nga kasingkasing. “Ang kiling sa kasingkasing sa tawo maoy daotan sukad sa iyang pagkabata,” matud sa Bibliya. (Genesis 8:21) Usa sa tawhanong mga kiling nga tingali makababag sa atong pagpakitag nahiangayng pasidungog sa uban mao ang pagbaton ug negatibo, hinawayong kaisipan. Kitang tanan mahuyang, dili-hingpit nga mga tawo, nga nagkinahanglan sa kaluoy ug dili-takos nga kalulot ni Jehova. (Roma 3:23, 24) Sa pag-ila niini, magbantay kita nga dili maghunahuna sa mga kahuyangan sa atong mga igsoon o magpasangil sa kaduhaduhaang mga motibo sa atong mga igsoon.

19. Unsay motabang nato sa pagbuntog sa negatibong tinamdan?

¹⁹ Ang pangontra nianang negatibong kiling mao ang gugma ug pagpugong-sa-kaugalingon. Kinahanglang magbaton kitag mabination, maunongon, positibong tinamdan bahin sa atong mga igsoon, nga pagamatikdan ang ilang maayong mga hiyas. Kon adunay butang dili nato hisabtan, sa kanunay maandam kita sa dili pagpakasala sa atong mga igsoon ug pamation ang tambag ni Pedro: “Labaw sa tanang butang, magbaton ug mainit nga gugma sa usag usa, tungod kay ang gugma magatabon sa kapid-an nga mga sala.” (1 Pedro 4:8) Kinahanglang batonan nato kanang matanga sa gugma aron atong kahatagan ang atong mga igsoon sa pasidungog nga nahiangay kanila.

20, 21. (a) Unsay laing kiling nga lagmit mobalda sa atong pagpakitag pasidungog sa usag usa? (b) Unsay motabang nato sa pagbuntog sa maong kiling?

²⁰ Ang laing hiyas nga lagmit makabalda sa atong pagpakitag angay nga pasidungog sa uban mao ang kiling nga mahimong tandogon, o sobra ka sensitibo. Ang pagkasensitibo may kaugalingong dapit. Ang mga tawo sa arte kinahanglang masensitibo sa mga paningog o mga kolor ingong bahin sa ilang propesyon. Apan ang pagkahimong sobra ka sensitibo o tandogon, diha sa atong pakiglabot sa uban maoy usa ka matang sa kahakog nga makahikaw kanato sa atong kalinaw ug makapugong nato sa pagpakitag pasidungog sa uban.

²¹ Nagahatag kanatog maayong tambag niining bahina mao ang mga pulong nga makita sa Ecclesiastes 7:9: “Dili nimo pagdalidalion ang imong espiritu sa pagkasilo, kay ang pagkasilo nagapuyo sa sabakan sa mga buangbuang.” Busa ang pagkahimong sobra ka sensitibo o pagkadaling masilo nagapadayag sa kakulang sa kaalam ug maayong panabot, ingon man kakulang sa gugma. Kinahanglang magbantay kita kay basi ang mga kiling nato nga daotan, sama sa pagkanegatibo, sobra ka hinawayon, o sobra ka sensitibo, magpugong nato sa pagpakitag pasidungog sa tanan nga angayan niana.

22. Sa unsang paagi masumaryo ang atong obligasyon sa pagpakitag pasidungog?

²² Sa pagkamatuod, kita may daghang katarongan sa pagpakitag pasidungog sa uban. Ug, sumala sa atong nakita, adunay daghan, daghang paagi nga kita makapakita sa maong pasidungog. Sa tanang panahon kinahanglang kita magbantay basi ang hakogan o negatibong tinamdan mobalda sa atong pagpakitag pasidungog. Sa linain, kita kinahanglang magbantay sa pagpakitag pasidungog ngadto niadtong anaa sa atong pamilya, mga bana ug mga asawa sa usag usa ug mga anak ngadto sa ilang mga ginikanan. Ug diha sa kongregasyon, kita may obligasyon sa pagpakitag pasidungog ngadto sa kaubang mga magsisimba ug, ilabina, ngadto niadtong nagapangabudlay sa atong taliwala diha sa mga katungdanan sa pagdumala. Niining tanang bahin, sa atong kaayohan ang paghatag ug tukmang pasidungog ngadto niadtong gihisgotan sa ibabaw, sanglit, sumala sa giingon ni Jesus: “Adunay labaw nga kalipay sa paghatag kay sa pagdawat.”​—Buhat 20:35.

Unsaon Nimo Pagtubag?

◻ Ngano ug sa unsang paagi kita magpasidungog sa kagamhananong mga pagbulot-an?

◻ Unsang tambag sa Bibliya ang ikapadapat ngadto sa empliyado-amo nga relasyon?

◻ Sa unsang paagi igapakita ang pasidungog sa sulod sa pamilya?

◻ Unsang linaing pasidungog ang ikapakita diha sa kongregasyon, ug ngano?

◻ Sa unsang paagi mabuntog ang tawhanong mga kahuyangan sa pagkapakyas sa pagpasidungog sa uban?