Kristohanong Kabataan—Magmalig-on sa Pagtuo

“ANG tanan kinahanglang motambong.” Kana mao ang pahibalo. Ang tanang mga estudyante sa usa ka Hapones nga tunghaan kinahanglang motambong sa usa ka heneral nga asembliya diha sa awditoryom. Usa ka batan-on Kristohanong estudyante wala mouyon sa pipila ka ideya nga gipahayag diha sa awit sa tunghaan. “Aw,” siya naghunahuna, “ako nasayod nga ang awit sa tunghaan ipatokar. Apan dili ako maglisod. Molingkod lang ko sa likod sama sa naandan.”

Apan, sa dihang ang batan-ong Saksi ni Jehova misulod sa awditoryom, iyang nakita nga ang tanang mga magtutudlo nanglingkod na diha sa mga lingkoranan sa likod. Busa, napugos siya sa paglingkod atubangan kanila. Dihang ang ubang mga estudyante nanindog aron awiton ang awit sa tunghaan, siya matinahurong nagpabilin sa paglingkod. Apan ang mga magtutudlo nasuko niini. Sila sa pisikal misulay sa pagpugos kaniya sa pagpatindog. Mahanduraw mo ba ang imong kaugalingon sa maong kahimtang? Unsay imong buhaton?

Nganong Gikinahanglan ang Malig-ong Pagtuo

Maayo unta kon pasagdan na lamang sa katawhan ang mga Kristohanon ug tugotan silang magkinabuhi sumala sa ilang binansay-sa-Bibliya nga konsensiya. Kasagaran, hinunoa, ang mga Kristohanon moatubang ug malisod nga mga kahimtang. Dili kini makapatingala kanato, kay ang kaugalingong Anak sa Diyos, si Jesu-Kristo, miingon: “Kon ako ilang gilutos, kamo usab ilang pagalutoson.” (Juan 15:20) Gawas pa sa direkta nga paglutos, ang mga alagad sa Diyos moatubang ug ubang mga pagsulay sa pagtuo.

Ang Kristohanong mga batan-on kasagaran nagkinahanglag malig-ong pagtuo sa pag-atubang sa mga pagsulay nga maagian sa tunghaan. Sila hayan mapugos sa pagpakig-uban sa mga kauban sa klase nga nagagamit sa malaw-ayng pinulongan o dunay mga tinamdan nga makapasipala sa Diyos. Ang batan-ong mga Kristohanon hayan makaatubang ug nagdugang nga pagpasiugda sa nasyonalismo ug pagpugos sa pag-apil ug mga pundok, politika sa tunghaan, o ubang mga kalihokan nga makadaot sa espirituwal. Ang mga magtutudlo o isigka-estudyante tingali mamugos sa batan-ong mga Kristohanon sa pagkompromiso. Busa, ang diyosnong mga batan-on kinahanglang mosalig sa espiritu ni Jehova alang sa gikinahanglang pagtuo sa paghatag tin-aw nga depensa sa ilang paglaom.​—Mateo 10:19, 20; Galacia 5:22, 23.

‘Magmaandam sa Pagdepensa’

Ang tambag ni apostol Pedro maoy tukma alang sa batan-on ug hamtong nga mga Kristohanon. Siya miingon: “Magmaandam sa pagdepensa atubangan sa tanan nga nangayo kaninyo sa katarongan alang sa paglaom nga anaa kaninyo, apan buhaton kini uban ang pagpaubos ug halalom nga pagtahod.” (1 Pedro 3:15) Unsay gikinahanglan aron magmaandam sa paghimo sa maong depensa? Una, ikaw kinahanglang makasabot kon unsa ang gitudlo sa Kasulatan. Aron makabarog diha sa tunghaan maylabot sa nasyonalismo, politika, abuso sa droga, o sa pamatasan, imong sabton pag-una ang katarongan sa Kristohanong baroganan ug kinahanglang tim-os nga nagtuo niana.

Pananglitan, giingnan ni apostol Pablo ang kaubang mga Kristohanon: “Ayaw pagpahisalaag. Ang daotang panagkauban makadaot sa maayong pamatasan.” (1 Corinto 15:33) Mouyon ka ba niana? Ingon sa gipaila ni apostol Pablo, sayon ra nga mahisalaag kon bahin sa panagkauban. Ang usa ka tawo mopatim-aw tingali nga mahigalaon ug maayohon. Apan kon siya walay kabalaka nga sama sa imong kabalaka sa pag-alagad kang Jehova o wala magtuo sa mga saad sa Diyos, siya maoy daotang kauban. Ngano? Tungod kay ang iyang kinabuhi gipasukad sa lahi nga mga prinsipyo, ug ang mga butang nga hinungdanon kaayo sa usa ka Kristohanon tingalig walay bili alang niya.

Dili kini ikatingala, kay si Jesus miingon sa iyang mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 17:16) Imposible alang sa usa ka tawo nga mahimong tinuod nga Kristohanon ug sa samang panahon maoy bahin niining kalibotana, diin si Satanas mao ang diyos. (2 Corinto 4:4) Imo bang nakita kon sa unsang paagi ang pagdili bahin sa kalibotan mopanalipod sa usa ka Kristohanon gikan sa kadunotan ug kabingkilan nga mihampak sa daghan kaayo karong adlawa? Kon mao, nan ikaw nakasabot kon nganong huptan nimo ang imong pagkahimong bulag, bisan kon kini nagpasabot nga ikaw dili makauban sa pipila ka mga kalihokan sa tunghaan.a

Ang bili sa pagbaton ug malig-ong pagtuo ug paghimo sa mga intereses sa Gingharian nga una sa kinabuhi gipakita diha sa kahimtang sa usa ka Kristohanong dalagita. (Mateo 6:33) Dihang gipahibalo ang ensayo sa iyang graduwasyon, iyang nahibaloan nga kini gieskedyol sa samang adlaw sa sirkitong asembliya sa mga Saksi ni Jehova nga iyang giplanohang tambongan. Siya misulat ug usa ka matinahurong sulat nga nagpatin-aw kon nganong siya dili makaapil sa ensayo ug gihatag kini sa iyang magtutudlo sa wala pa ang klase. Human sa klase, ang magtutudlo nakig-estorya kaniya nga pribado ug gihangyo siya sa pagpatin-aw pag-usab kon nganong dili siya makatambong sa ensayo. Ang dalagita miingon: “Buot niyang tinoon kon ang akong mga isulti mao gihapon. Mao ba gayod kini ang akong gibati, o ang sulat nasudlan lamang sa mga pulong sa akong inahan? Sa pagkakita sa akong personal nga pagtuo sa butang, siya wala mosupak kanako.”

“Pagdepensa Atubangan sa Tanan”

Kasagaran nakaplagan sa Kristohanong mga kabataan nga kon himoon nilang matin-aw ang ilang baroganan diha sa mga magtutudlo ug mga estudyante sa dili pa mobangon ang mga isyu, ang pagpiit dili kaayo dako dihang mag-atubang sa problema. Usa ka batan-on Kristohanong Hapones miasoy nga sa dihang siya nag-edad ug 11 anyos, ang iyang tunghaan mibaod nga ang tanang mga estudyante kinahanglang motambong sa parti sa Pasko. Ang mga estudyante sa hataas nga ang-ang namugos kaniya sa pag-apil, apan siya wala motambong, ug ang iyang magtutudlo nakasabot sa iyang baroganan. Ngano? Tungod kay sa wala pa magsugod ang tuig sa pagtungha, ang Saksi ug ang iyang mga ginikanan nakigkita uban sa magtutudlo ug gipatin-aw ang nagkalainlaing mga bahin sa ilang Kristohanong baroganan.

Samtang makig-ambit sa ministeryo sa kanataran, ang pipila ka batan-ong mga Kristohanon mahadlok nga mahinagbo ang ilang mga kauban sa klase o mga magtutudlo. Ingon ba usab niana ang imong gibati? Kon mao, nganong dili ikaw ang mouna ug ipahibalo sa imong mga kauban sa klase nga ikaw nagasangyaw sa balay ug balay ug kon nganong gibuhat mo kana. Usa ka 14-anyos nga Saksi ni Jehova miingon: “Ang tanan sa tunghaan nahibalo sa akong baroganan ingong usa ka Kristohanon. Sa pagkamatuod, sila nasayod niini pag-ayo nga kon ako may ikahinagbong kauban sa klase samtang nagasangyaw, dili ko bation ang kaulaw. Ang mga isigka-estudyante sa kasagaran maminaw, ug sa makadaghan sila modawat sa literatura sa Bibliya.” Usa ka 12-anyos nagtaho nga siya nagpaabot nga makahinagbo sa iyang mga kauban sa klase dihang siya makig-ambit sa ministeryo. Imbes maguol sa paghunahuna niini, siya sa regular nag-ensayo kon unsay iyang isulti kon kini mahitabo. Sa ingon, siya andam sa paghatag ug maayong mga katarongan alang sa iyang pagtuo.

Diha sa daghang mga tunghaan, ang tapos-klase nga mga kalihokan giingon nga depende lang kanimo. Apan sa aktuwal nga batasan, ang mga magtutudlo ug mga estudyante mohatag dakong pagpiit sa mga indibiduwal sa pag-apil sa maong mga kalihokan. Usa ka 20-anyos nga Kristohanon nakadiskobre ug maayong paagi nga masagubang kini nga pagpiit. Siya miingon: “Ako nag-alagad ingong auxiliary payunir sa tanang ang-ang sa hayskol. Ang tanan nasayod nga ako puliki kaayo sa akong relihiyosong mga kalihokan nga sa ingon wala nay panahon sa pag-apil sa ubang mga butang.” Ang manghod nga igsoong babaye niini nga Saksi misunod sa samang kurso. Ang pipila ka Kristohanong mga batan-on nagpadayon sa pag-alagad gikan sa auxiliary payunir sa mga tuig sa klase ngadto sa regular payunir nga kalihokan ingong bug-os panahong mga magmamantala sa Gingharian sa dihang natapos na ang ilang pagtungha.

Ayaw kalimti ang maayong mga epekto sa imong maayong paggawi ug madasigong pagpamatuod. Inay kay magpakahilom, nganong dili ipakita nga ikaw malig-on sa pagtuo pinaagi sa pagpakigsulti nga matinahuron ug maisogon? Kana ang gibuhat sa usa ka dalagitang Israelita nga nabihag ug nahimong sakop sa panimalay sa Sirianhong heneral nga si Naaman. (2 Hari 5:2-4) Nadayeg ang ngalan ni Jehova tungod sa tikang sa maong batang babaye. Ang susamang pagtuo sa imong bahin usab makahatag pasidungog sa Diyos ug makatabang sa uban nga makabarog ingong mga magdadayeg sa iyang ngalan.

Ang kamatuoran mao nga dili nato ikakompromiso ang atong pagtuo ug sa gihapon magpabiling mga Kristohanon. Si Jesus miingon: “Nan, ang bisan kinsa nga moila kanako atubangan sa mga tawo, ilhon ko usab siya atubangan sa akong Amahan nga anaa sa mga langit; apan ang bisan kinsa nga dili moila kanako atubangan sa mga tawo, dili ko usab siya ilhon atubangan sa akong Amahan nga atua sa mga langit.” (Mateo 10:32, 33) Ang pagkahimong malig-on sa pagtuo ingong sumusunod ni Jesus maoy usa ka seryosong responsabilidad, dili ba?

Tabang nga Mabatonan

Aron makabarog nga malig-on ingong usa sa mga Saksi ni Jehova, imong gikinahanglan ang malig-ong pagtuo. Aron mabatonan mo kana, ikaw kinahanglang madasigon sa pagtuon sa Bibliya, sa pagtambong sa Kristohanong mga tigom, ug sa pakig-ambit sa ministeryo sa kanataran. Kon sa gihapon gibati mo nga may kulang, unsay imong mahimo? Ang tinun-ang si Santiago miingon: “Kon usa kaninyo nakulangan sa kaalam, pasagdi nga magpadayon siya sa pagpangayo sa Diyos, kay siya nagahatag nga madagayaon ngadto sa tanan nga walay pagpamoyboy; ug kini igahatag kaniya.” (Santiago 1:5) Ipakigsulti kang Jehova diha sa pag-ampo ang imong mga suliran; siya makalig-on kanimo sa pag-atubang sa mga pagsulay sa imong pagtuo.

Unsa pa ang mahimo sa usa ka batan-ong Kristohanon? Ang basahon sa Proverbio nagtug-an kanato: “Patalinghogi ang imong amahan nga nagpahimugso kanimo, ug ayaw tamaya ang imong inahan tungod lang kay siya tigulang na.” (Proverbio 23:22) Gipaluyohan kining tambaga ni apostol Pablo, kay siya miingon: “Kamong mga anak, magmasinugtanon kamo sa inyong mga ginikanan sa tanang butang, kay kini makapahimuot sa Ginoo.” (Colosas 3:20) Ang Kristohanong mga ginikanan makatabang kanimo nga magmalig-on sa pagtuo. Pamati sa ilang mga sugyot. Uban sa ilang tabang, tukia ang Kasulatan ug ang pinasukad-sa-Bibliya nga mga publikasyon, mangitag mga ideya, tambag, ug mga kasinatian. Ikaw ug ang imong mga ginikanan malingaw niini, ug kini motabang kanimo nga mabuntog ang kaulaw ug kahadlok.​—2 Timoteo 1:7.

Bug-os pahimusli ang mga tagana nga gihimo ni Jehova nga Diyos pinaagi sa Kristohanong kongregasyon. Pangandam pag-ayo sa mga tigom. Pakigsulti sa tinudlong mga ansiano ug sa uban nga nakaagi sa mga kasinatian nga sama nianang imong giatubang karon. Si Solomon miingon: “Ang tawong maalamon mamati ug mokuhag dugang instruksiyon, ug ang tawong masinabtanon maoy usa nga modawat ug maayong pagtultol.” (Proverbio 1:5) Busa pagtuon gikan niini nga mga tigulang. Ikaw makakat-on, usab, gikan sa Kristohanong mga batan-on nga malamposong nakasagubang sa mga suliran nga sama sa imoha.

Pagkamatinumanon Modalag mga Panalangin

Pinaagi sa pagbarog nga malig-on sa pagtuo, ikaw nagapadapat sa tambag ni Pablo nga “magmalig-on, dili-matarog, sa kanunay magmadagayaon sa buluhaton sa Ginoo.” (1 Corinto 15:58) Si Jehova nasayod ug nakasabot sa mga suliran nga imong giatubang. Siya nakapalig-on na sa daghang mga batan-on nga nakaatubang sa samang mga kalisdanan, ug siya mopalig-on kanimo. Kon ikaw mosalig sa Diyos, siya motabang kanimo, kay ang salmista miingon: “Itugyan ang imong palas-anon kang Jehova, ug siya magasapnay kanimo. Dili gayod niya pasagdan nga matarog ang matarong.”​—Salmo 55:22.

Si Pedro misulat: “Hupti ang maayong tanlag, aron nga sa dihang pagalibakon kamo maulawan hinoon sila nga managsultig pagdaot sa inyong maayong kagawian diha kang Kristo.” (1 Pedro 3:16) Kon ikaw modumili sa pagkompromiso labot sa matarong nga mga balaod ug mga prinsipyo sa Diyos, mabatonan mo ang usa ka maayong tanlag, nga maoy usa ka tinuod nga panalangin gikan kang Jehova. Dugang pa, ikaw nagahatag ug maayong panig-ingnan alang sa Kristohanong mga kabataan kansang pagtuo tingali huyang. (1 Timoteo 4:15, 16) Ang imong paggawi modasig kanila nga maningkamot aron mahimong malig-on sa pagtuo ug sa ingon makalahutay sa mga pagsulay.

Tingali ikaw makatabang pa niadtong kinsa sa sinugdan mosupak sa imong Kristohanong baroganan. Hinumdomi kining makadasig-ug-paglaom nga mga pulong: “Inigkabuntag ipugas ang imong binhi ug sa gabii ayaw pagpugngi ang imong kamot; kay ikaw wala masayod hain ang mouswag, kini ba o kana ba, kon managsama ba silang duha nga maayo.” (Ecclesiastes 11:6) Kinsay nasayod sa maayong resulta nga modangat gikan sa imong pagsabod ug maayong binhi pinaagi sa imong matinumanong mga buhat?

Lakip sa labing dakong mga panalangin nga imong maani mao ang usa ka inuyonang baroganan uban kang Jehova. Sa kataposan, ang pagkamalig-on sa pagtuo mosangpot ug kinabuhing walay kataposan. (Juan 17:3; itandi ang Santiago 1:12.) Walay lumalabayng pahulay gikan sa pagsulay ang makuha tungod sa pagkompromiso nga takos sa pagwala niana nga gasa.

Komosta ba ang batan-on nga gihisgotan sa sinugdan niini nga artikulo? Buweno, siya milahutay sa iyang pagsulay. Sa natapos ang asembliya sa tunghaan, siya mataktikanhong misulay sa pagpatin-aw sa iyang baroganan sa mga magtutudlo. Bisag ang iyang mga pulong walay maayong pagsanong, siya may katagbawan sa pagkasayod nga iyang napahimut-an ang kasingkasing ni Jehova. (Proverbio 27:11) Siya nagpadayon sa pagdepensa sa iyang pagtuo hangtod nga natapos niya ang iyang pagtungha. Unya siya nagpayunir. Hinaot ang imong matinumanong paglahutay dunay samang malipayong sangpotanan. Ingon niana ang mosangpot kon magpamatuod ka nga malig-on sa pagtuo.

[Footnote]

[Kahon sa panid 25]

TABANG NGA MABATONAN

◻ Pamati sa kaalam sa imong mahadlokon-sa-Diyos nga mga ginikanan.

◻ Pahimusli ang espirituwal nga mga tagana diha sa Kristohanong kongregasyon.

◻ Pakigsulti sa tinudlong mga ansiano ug sa uban nga dunay mga suliran nga sama sa imoha.

◻ Pakigsulti sa ubang Kristohanong kabataan nga malamposong nakasagubang sa samang mga kakulian.