Mga Batan-on Nangutana . . .

Unsaon Nako Pagsagubang ang Pagtamay?

ANG mga batan-ong molihok o mamesti nga lahi sa ilang mga isigkaingon hayan mahimong mga biktima sa mapintas nga pagtamay. Mao kini ang nahitabo sa Kristohanong mga batan-on, kansang panggawi subsob nga lahi kaayo nianang sa ubang mga batan-on. Wala ba moingon si Kristo sa iyang matuod nga mga sumusunod: “Kon sila nagalutos kanako, sila usab magalutos kaninyo”?—Juan 15:20.

Sa unsang paagi kini nag-apektar sa batan-ong mga Saksi ni Jehova? Ang pipila kanila giyubit tungod sa dili pagsaulog sa pipila ka selebrasyon; ang uban gisaway tungod sa dili pagsaludo sa bandera. Daghan kanila ang gilutos pa gani tungod sa dili pag-abuso sa droga, tungod sa pagkamatinud-anon, ug tungod sa pagbayaw sa moral nga mga sukdanan sa Bibliya.

Kining maong kahimtang dili bag-o. Sa pagkatinuod, giingnan ni apostol Pedro ang mga Kristohanon nga nagkinabuhi sa unang siglo: “Tungod kay wala man kamo magpadayon sa pagdagan uban [sa katawhan sa kanasoran] . . . , sila nangahibulong ug nagapamulong nga inabusar kaninyo.” (1 Pedro 4:4) Ang ubang mga hubad nagbadbad niini nga, sila “magtawag kaninyog mapasipalahong mga angga” (Knox) o, “Sila manginsulto kaninyo.”—Today’s English Version.

Giyubit ka na ba sukad tungod sa imong relihiyosong mga hunahuna? Kon mao, magmaisogon. Wala ka mag-inusara! Ug malipay kang mahibalo nga makakat-on ka sa pagsagubang sa kalisdanan nga tamayon tungod sa imong pagtuo.

Kon Nganong Mangyubit Sila

Nganong ang uban magyagayaga niadtong kansang mga pagtuo ug panggawi lahi sa ilaha? Usahay ang mga mayubiton—sama sa mga madaogdaogon—walay-pagsalig sa kaugalingon. Sila tingali magbiaybiay kanimo aron ituboy ang ilang kaugalingon atubangan sa ilang mga isigkaingon. Kalagmitan, kon mag-inusara, pipila lamang sa maong mga bugalbugalon ang interesado—o may kaisog—sa pagsaway kanimo nga dayag.

Sa laing bahin, ang pipila ka mayubiton, sumala sa gisulat ni Pedro, “nangahibulong.” Oo, sila tingali tinuod nga naglibog sa imong panggawi. Pananglitan, kon ikaw usa sa mga Saksi ni Jehova, sila tingali sinserong maghunahuna nga talagsaon nga dili ka moapil sa mga kalihokan nga nalangkit sa pipila ka selebrasyon. Lagmit nakadawat pa gani sila ug tinuis nga impormasyon bahin sa mga Saksi gikan sa pursigidong mga magsusupak.

Bisan unsa pay hinungdan, kon atakehon sa mabiaybiayong mga komento, mouyon ka tingali sa proverbio sa Bibliya: “Adunay nagapamulong nga walay paghunahuna sama sa mga paglagbas sa espada.” (Proverbio 12:18) Apan hinumdomi nga kadtong nagsulti sa maong mga komento lagmit wala magsulti niana tungod kay wala nila maangayi ang imong pagkatawo. Kalagmitan kaayo, gibuhat lamang nila ang giingon sa proverbio sa Bibliya—“nagapamulong nga walay paghunahuna.”

Sa gihapon, masakit nga yubiton, sama gayod sa dinunggaban. Basin maaghat ka pa gani sa pagkompromiso sa imong pagtuo aron pahunongon ang nagpusotpusot nga mga insulto. Nan, unsaon man nimo pagsagubang ang pagtamay tungod sa imong mga tinuohan?

Pagdepensa

Si apostol Pedro nagtambag sa mga Kristohanon: Kanunayng ‘magmaandam sa paghimo ug depensa atubangan sa tanan nga mangayo kaninyo ug katarongan sa paglaom nga anaa kaninyo, apan magabuhat sa ingon uban ang kalumo sa buot ug halawom nga pagtahod.’ (1 Pedro 3:15) Aron mahimo ang maong pagdepensa sa imong pagtuo gikinahanglan nga batonan nimo ang tukmang kahibalo ug nga masabtan nimo ang mga katarongan sa imong mga tinuohan.

Apan, kinahanglan usab nimong makat-onan kon unsaon pagpahayag sa imong kaugalingon ngadto sa ubang tawo uban sa “halawom nga pagtahod” o, sumala sa paghubad niana sa The Bible in Basic English, “walay garbo.” Ang imong kahibalo sa Bibliya ug sa mga pagtulon-an niini dili angayng magpabati kanimo nga labaw sa uban. Sa kasukwahi, kinahanglang maningkamot ka sa pag-ugmad sa tinamdan ni apostol Pablo, kinsa misulat bahin sa iyang ministeryo: “Akong gihimo ang akong kaugalingon nga ulipon sa tanan, aron akong makabig ang labing daghang tawo.”—1 Corinto 9:19.

Kon mahadlok ka sa pagdepensa sa imong pagtuo, ayawg kawala ug paglaom. Daghang batan-ong Saksi ang mibati ug ingon niana. “Sa dihang nagtungha pa ako sa elementarya,” matod ni Jamal, “wala ko mahibalo kon unsaon pagpatin-aw ngadto sa uban kon nganong dili ako magsaulog ug mga selebrasyon o mosaludo sa bandera o bisan gani kon nganong ako mosangyaw sa balay-balay.” Unsay nakatabang kaniya? “Ang akong amahan kanunayng nagtabang kanako hangtod nga sa kataposan makapatin-aw na ako niining mga butanga, ug kini naghimog dakong kalainan.” Kon malisdan ka sa pagpatin-aw sa imong mga tinuohan ngadto sa uban, tingali makapangayo ka ug tabang sa usa ka ginikanan o sa laing hamtong nga membro sa Kristohanong kongregasyon sa pagtabang kanimo nga makabaton ug bug-os nga pagsabot sa kahibalo sa Diyos.—Efeso 3:17-19.

Usa ka 16-anyos nga batan-ong Saksi miingon nga ang usa ka programa sa personal nga pagtuon sa Bibliya nagtabang kaniya sa pagbaton ug kaisog sa pagpahayag sa iyang hunahuna diha sa tunghaan. “Kaniadto, sa dihang sulogsulogon ko sa akong mga klasmet tungod sa akong pagka-Saksi, wala ko mahibalo kon unsay isulti,” siya miangkon. “Karon, ingong bug-os-panahong ebanghelisador, nagsige ko ug tuon sa Bibliya, ug makahimo na ako sa pagtubag. Ang pagbasa sa kinaulahiang mga artikulo sa mga magasing Bantayanang Torre ug Pagmata! nagtabang kanako sa pagpakigsulti sa akong mga kauban sa tunghaan bahin sa akong mga tinuohan.”

Siyempre, lainlain ang mga kahimtang. Busa ang lainlaing mga kahimtang nagkinahanglag lainlaing mga tubag. Apan, kon ikaw nahagit sa usa ka dili-malulotong komento, dili gayod husto nga ‘balosag daotan ang daotan.’ (Roma 12:17-21) Ang mainsultohong pagsumbalik, bisag unsa ka matistison, makapagrabe lamang sa kahimtang ug mag-awhag pa gani ug dugang mga pagtamay. Busa, nakaplagan sa uban nga mas maayo nga dili-panumbalingon ang insulto.

Sa pipila ka kaso, sama sa dihang ang komento mao lamay hinigalang pagsulay sa pagpakatawa, basin maalamon pa ganing mokatawa duyog sa komento inay kay masilo niana. (Ecclesiastes 7:9) Kon ang nagyubit makamatikod nga ang iyang mga pulong diyutay ra o walay epekto, basin mohunong ra siya sa paglutos.—Itandi ang Proverbio 24:29; 1 Pedro 2:23.

Pagpahayag sa Imong Hunahuna

Apan, dunay mga panahon sa dihang posible tingali nga mohatag ug mubo, mataktikanhong katin-awan sa imong mga tinuohan. Usa ka 13-anyos nga batang babaye misulay niini ug dihay maayo kaayong mga resulta. “Nagpaingon pa lang ko sa klase,” matod niya, “sa dihang daghang estudyante ang nagsugod pagyagayaga sa mga Saksi ni Jehova. Gusto kong mopahayag sa akong hunahuna, apan sila namiya lamang ug nagpadayon sa pagyagayaga kanako—gawas sa usa ka estudyante.” Ang estudyanteng Saksi misaysay: “Usa ka dalagita nga ginganlag Jaimee miatubang kanako ug miingon kanako nga may libro siyang Ikaw Mabuhing Walay Kataposan sa Paraiso sa Yuta.a Matod niya hapit na niya mahuman ug basa kana ug interesado nga makabaton ug dugang impormasyon bahin sa atong mga tinuohan. Nagsugod ako sa pagtuon sa Bibliya uban kang Jaimee.” Nadasig sa iyang eksperyensiya, ang batan-ong Saksi nagsugod sa pagpakigsulti ngadto sa ubang mga batan-on. “Kanunay akong nagduawan sa upat ka kaubang mga estudyante kinsa nagpakitag interes ug kinsa segurado akong magtuon sa dili madugay,” matod niya.

Katuigan kanhi usa ka estudyante sa Aprikanhong nasod sa Liberia may susamang eksperyensiya. Panahon sa klase sa sosyologo, matinahuron siyang nagpatin-aw nga ingong usa sa mga Saksi ni Jehova, nagtuo siya sa paglalang inay kay sa ebolusyon. Sa sinugdan, daghan sa iyang mga klasmet nanaway pag-ayo. Apan gitugotan siya sa magtutudlo sa pagpatin-aw sa iyang mga tinuohan atubangan sa klase, nga human niana ang magtutudlo midawat sa librong Life—How Did It Get Here? By Evolution or by Creation?b

Human mabasa ang libro, giingnan sa magtutudlo ang klase: “Walay katumbas kining libroha. Usa kini sa kinamaayohang mga libro sa siyensiya bahin sa paglalang nga akong nabasa sukad.” Dayon ang magtutudlo misaysay nga nagplano siyang gamiton ang librong Creation duyog sa teksbok sa klase alang sa sunod nga duha ka semester, ug iyang giingnan ang klase nga mokuhag mga kopya gikan sa estudyanteng Saksi. Daghang libro ang napahimutang, ug daghang estudyante ang nagbag-o sa ilang panglantaw sa mga Saksi ni Jehova!

Ang Sinulayang Pagtuo Maoy Lig-on nga Pagtuo

Ibutang ta, usahay bation tingali nimong madaog sa gidaghanon niadtong dili sama—o wala magpabili—sa imong pinasukad-sa-Bibliya nga baroganan. (Itandi ang Salmo 3:1, 2.) Busa, maalamon ang pagpakig-uban niadtong sama nimog mga hunahuna ug tinuohan. (Proverbio 27:17) Apan komosta kon walay mga batan-on nga sama nimog pagtuo diha sa imong tunghaan o sa imong silinganan?

Kon mao, hinumdomi nga ang imong kinalabwang Higala mao si Jehova nga Diyos, ug siya makapaluyo kanimo. Siya mao ang pangunang tumong sa mga pagtamay ni Satanas nga Yawa sulod sa libolibong katuigan. Busa, makaseguro kita nga magpalipay sa kasingkasing ni Jehova kon mobarog ka nga malig-on dapig sa imong pagtuo. Ang maong dalan maghatag kaniya ug kahigayonan sa ‘pagtubag kang Satanas, kinsa nagtamay kaniya.’—Proverbio 27:11.

Pagadahomon lamang nga matag karon ug unya, sulayan ang imong pagtuo. (2 Timoteo 3:12) Bisan pa niana, gipasaligan kita ni apostol Pedro nga ang sinulayang kalidad sa atong pagtuo “mas dako pa kaayo ug bili kay sa bulawan nga madugta bisan tuod nga nasulayan na kini pinaagig kalayo.” (1 Pedro 1:7) Busa, sa dihang pakaulawan ka tungod sa imong pagtuo, isipa kana nga kahigayonan sa pagpalig-on sa imong pagtuo ug pagpasundayag sa imong paglahutay. Si apostol Pablo misulat nga ang paglahutay motultol sa “inuyonang kahimtang.” (Roma 5:3-5) Oo, ang tinguha sa pagbaton sa pabor ni Jehova nagtagana ug kusganong panukmod nga makasagubang ka sa dihang tamayon ka tungod sa imong pagtuo!

[Mga footnote]

[Hulagway sa panid 13]

Makadepensa ka ba sa imong pagtuo?