Kon sa Unsang Paagi ang Bawtismo Makaluwas Nato
“Ang bawtismo . . . nagaluwas kanato.”—1 PEDRO 3:21, The Emphatic Diaglott.
1, 2. Unsay gikinahanglan sa dili pa magpabawtismo sa tubig ang usa ka tawo?
SI Jehova may tinong mga kinahanglanon niadtong nagapangitag kaluwasan. Kinahanglang magbaton silag tukmang kahibalo, magbatog pagtuo, maghinulsol sa ilang mga sala, makombertir, magpahinungod sa Diyos, ug magpabawtismo ingong mga magtutuo. (Juan 3:16; 17:3; Buhat 3:19; 18:8) Ang mga kandidato sa bawtismo kinahanglang mag-ila sa dayag nga pinasukad sa halad ni Jesus sila naghinulsol sa ilang mga sala ug nagpahinungod sa ilang kaugalingon kang Jehova. Kinahanglang makasabot usab sila nga ang pagpahinungod ug bawtismo nagapaila nga sila mga Saksi ni Jehova.
2 Ang tibuok nga kahikayan sa bawtismo, apil ang maong dayag nga pagpahayag sa pagtuo, kinahanglanon alang sa kaluwasan. (Roma 10:10) Kini gipamatud-an sa dihang si apostol Pedro misulat: “Ang bawtismo . . . nagaluwas kanato.” (1 Pedro 3:21, ED) Apan unsaon nato pagsabot sa tukma kining mga pulonga? Unsay gipakita sa konteksto?
Kon sa Unsang Paagi ang Bawtismo Nagaluwas
3. Sa imong kaugalingong mga pulong, unsaon nimo pagsuma ang 1 Pedro 3:18-21?
3 Si Pedro nagpaila nga ingong binanhaw nga espiritu, giwali ni Jesus ang mahukmanong mensahe ngadto sa daotang mga espiritu nga binilanggo, mga demonyo nga gitagana diha sa walay-kataposang talikala sa dakong adlaw sa paghukom ni Jehova. Sila nagmasupilon tungod sa pagsul-ob ug unodnong mga lawas ug pagpakighilawas sa mga babaye “sa dihang ang pailob sa Diyos nagpaabot sa mga adlaw ni Noe, samtang ang arka gibuhat, nga niana ang pipila ra ka tawo, nga mao, walo ka kalag [si Noe, iyang asawa, iyang mga anak, ug ilang mga asawa], gidalang luwas latas sa tubig.” Si Pedro midugang: “Kana nga motumbas niini karon nagaluwas usab kaninyo, nga mao, ang bawtismo, (dili [nga mao gayod ang gikinahanglan] ang paghanaw sa kahugawan sa unod, kondili ang hangyo nga gihimo ngadto sa Diyos alang sa usa ka maayong tanlag,) pinaagi sa pagkabanhaw ni Jesu-Kristo.”—1 Pedro 3:18-21; Genesis 6:1, 2; 2 Pedro 2:4; 2 Corinto 7:1.
4. Unsay gitumong ni Pedro sa dihang siya miingon, “Kanang motumbas niini”?
4 Unsay gipasabot ni Pedro sa miingon siya, “Kanang motumbas niini”? Gipasabot niya nga ang bawtismo nga gipasukad sa pagtuo maoy tumbas sa pagluwas kang Noe ug sa iyang pamilya, si kinsa gidalang luwas latas sa katubigan sa baha nga naglaglag niadtong didto sa gawas sa arka. Ingon nga si Noe nagkinahanglag pagtuo aron matukod ang arka, ang tanan nga mahimong bawtismadong mga tinun-an ni Jesu-Kristo ug mga saksi ni Jehova kinahanglang magbatog pagtuo aron makaagwanta sa mga kalisod nga ipahamtang kanila niining walay-pagtuo nga kalibotan ug sa diyos niini, si Satanas nga Yawa.—Hebreohanon 11:6, 7; 1 Juan 5:19.
5. Sa unsang paagi nga ang kaluwasan maoy “pinaagi sa pagkabanhaw ni Jesu-Kristo”?
5 Ang bawtismo mismo dili mao ang magaluwas. Ug bisan pag kinahanglang atong ‘hanawon ang kahugawan sa unod,’ kana sa kaugalingon dili magluwas kanato. Hinunoa, ang kaluwasan maoy “pinaagi sa pagkabanhaw ni Jesu-Kristo.” Ang mga kandidato sa bawtismo kinahanglang magbatog pagtuo nga ang kaluwasan posible lamang kay ang Anak sa Diyos namatay sa haladnong kamatayon ug nabanhaw. Kinahanglang dawaton usab nila si Jesus ingong ilang Ginoo nga may pagbulot-an sa paghukom sa mga buhi ug sa mga patay. “Siya anaa sa tuo nga kamot sa Diyos,” matud ni Pedro, “kay siya miadto sa langit; ug ang mga manulonda ug mga pagbulot-an ug mga gahom gipailalom kaniya.”—1 Pedro 3:22.
6. Aron makabaton ug maayong tanlag, kinahanglang unsa nay nahimo sa usa ka kandidato sa bawtismo?
6 Si Pedro naglangkit usab sa bawtismo sa “hangyo nga gihimo sa Diyos alang sa maayong tanlag.” Aron makabaton ug maayong tanlag, ang kandidato sa bawtismo kinahanglang maghinulsol sa iyang mga sala, motalikod sa iyang daotang dalan, ug mohimog walay-ukon-ukon nga pagpahinungod kang Jehova nga Diyos diha sa pag-ampo pinaagi kang Jesu-Kristo. Kon padayong huptan sa usa ka tawong bawtismado ang maong maayong tanlag pinaagi sa pagpahiuyon sa mga sukdanan sa Diyos, siya magapabilin diha sa naluwas nga kahimtang nga dili magkinahanglan sa hukom sa Diyos sa kalaglagan.
Pagkahimong Takos sa Bawtismo
7. Bahin sa bawtismo, unsay nahimo sa mga misyonaryo sa Kakristiyanohan?
7 Sa gisugo ni Jesus ang iyang mga sumusunod sa pagbawtismo sa mga tinun-an, wala siya magsugo kanila nga wisikan ang mga magtutuo nga tinaglibo. Apan unsay gihimo sa mga misyonaryo sa Kakristiyanohan? Mahitungod sa India, ang Heswitang si Francis Xavier misulat niadtong 1545: “Sa gingharian sa Travancore . . . sa yugtong pila ra ka bulan ako nakabawtismog kapin sa napulo ka libong mga lalaki, mga babaye, ug mga bata. . . . Ako miadto sa balangay ngadto sa balangay ug naghimo kanilang mga Kristohanon.” Kana dili mao ang paagi ni Jesus sa ‘paghimog mga Kristohanon.’ Ang mga tawo kinahanglang mahimong takos sa bawtismo.
8. Unsay giingon sa gitawag mga balaang sinulat ni Pablo mahitungod niadtong nagpresentar sa ilang kaugalingon alang sa bawtismo?
8 Bisan ang nag-angkong mga Kristohanon sa tapos-apostolikong yugto nagtuo nga kadtong nagtanyag sa ilang kaugalingon alang sa bawtismo kinahanglang makakab-ot sa higpit nga mga kinahanglanon. Mahitungod nianang mga kandidato sa bawtismo, ang dili-Biblikanhong mga kasulatan, sayop nga nagpasangil ngadto kang apostol Pablo, nga nagaingon: “Pasagding ang ilang mga paagi ug ilang kinabuhi pagasusihon . . . Kon sila dili minyo, patun-a sila nga dili makighilawas, apan mosulod sa sumala-sa-kasugoan nga kaminyoon. . . . Kon moabot ang usa ka bigaon, pabiyaa siya sa pagkabigaon, o kaha isalikway siya. Kon moabot ang magbubuhat ug mga diyosdiyos, pabiyaa siya sa iyang panarbaho, o isalikway siya. . . . Siya nga sad-an sa mga sala nga dili paganganlan, . . . usa ka salamangkero, usa ka manglalamat, usa ka astrologo, usa ka mananagna, usa ka tiggamit sa mahikong mga bersikulo, . . . usa nga nagahimog mga anting-anting, panglumay, mananagna, maghihimalad, tigtan-aw ug palad . . . , pasagding kini mapamatud-an sa taastaas nga panahon . . . ug kon biyaan nila kining mga buhata, dawata sila; apan kon dili sila mouyon niana, isalikway sila.”
9. Nganong ang mga ansiano sa kongregasyon nagahimog mga pakighisgot uban sa tawong buot magpabawtismo?
9 Ang mga Saksi ni Jehova dili mosunod sa dili-kasulatanhong mga sinulat, sama nianang bag-o pang gikutlo, apan ang mga ansiano nagahimog mga pakighisgot uban niadtong gustong magpabawtismo. Ngano? Sa pagtino nga kining mga tawhana maoy mga magtutuo nga nakakab-ot sa balaang mga kinahanglanon ug nakahimog pahinungod kang Jehova. (Buhat 4:4; 18:8; 2 Tesalonica 3:2) Ang paghisgot sa mga pangutana diha sa librong Organisado sa Pagtuman sa Atong Ministeryo nagatabang sa pagtino kon kaha ang usa ka tawo takos mabawtismohan. Kon dili tin-aw kaniya ang pila ka punto, o wala pa niya ipahiuyon ang iyang kinabuhi sa balaang mga sukdanan, ang mga ansiano malipay nga mohatag ug espirituwal nga tabang.
10. Kon buot natong magpabawtismo, unsang tinamdan ang atong pagabatonan?
10 Kon pabilhan nato ang kalulot sa Diyos sa pagtabang nato nga mahibalo bahin sa iyang mga katuyoan, kita mahisama sa mga tawo nga giwalihan ni Pablo sa Antioquia, sa Asia Minor. Bisan pa sa pagsupak sa mga Hudiyo, “sa dihang kadtong mga tawo sa mga nasod [mga Hentil] nakadungog [sa higayon nga pagadawaton sa Diyos], misugod sila sa pagkalipay ug paghimaya sa pulong ni Jehova, ug ang tanan nga tukmang nakiling alang sa kinabuhing walay kataposan nahimong mga magtutuo.” (Buhat 13:48) Ang maong mga magtutuo nabawtismohan.
Bawtismo Samtang Batan-on
11. Tukma ba ang magpahinungod sa Diyos ingong batan-on, ug nganong kana ang imong tubag?
11 Kadtong “tukmang nakiling alang sa kinabuhing walay kataposan” nagaapil sa pila ka batan-on. Ikaingon nga bisan pag si Samuel ug si Juan Bautista gihalad sa Diyos una pa matawo, ang mga ginikanan dili makahimo sa pagpahinungod sa ilang mga anak. (1 Samuel 1:11, 24-28; 2:11, 18, 19; Lucas 1:15, 66) Apan ingong resulta sa maayong pagbansay sa Bibliya, daghang batan-on ang nag-uswag hangtod nabawtismohan. Ang usa ka misyonaryong igsoong babaye nga nabawtismohan samtang tin-edyer misulat: “Mopatim-aw nga ako napahinungod sa pag-alagad sa akong Maglalalang sukad sa edad mismo sa pagkaamgo nga siya naglungtad, apan tungod sa pagkabatog tukmang kahibalo kaniya ug sa iyang mga katuyoan, ako buot mabawtismohan ingong panggawas nga pamatuod nianang kamatuorana. Bisan pa niana, si Mama nagduda nga ako nahibalo kon unsay akong gibuhat, mao nga misugyot siya nga ako maghulat hangtod nga may lain nga andam nang magpabawtismo.” Ang usa ka babayeng buot magpabawtismo nakaplagan, ug ang igsoong babaye midugang: “Walay mga klase sa espesyal nga instruksiyon alang sa mga kandidato niadtong mga adlawa, bisan pag ang tinudlo-sa-Sosyedad nga Direktor sa Pag-alagad . . . nakigsulti kanakong maluluton bahin sa kaugdang sa tikang nga akong gikuha. Ikag akong miuyon sa tanang kondisyon nga gipahimutang, ug sa sanag nga buntag sa Dominggo sa Mayo 1921 [ang babaye] ug ako gibawtismohan.”
12. Unsay pag-isip ni Igsoong Russell sa pagpahinungod sa usa ka menor de edad?
12 Niadtong 1914, si C. T. Russell (ang presidente niadto sa Watch Tower Society) nakadawat ug sulat nga niana ang isigka-Kristohanon nangutana kon ang iyang 12-anyos nga batang lalaki awhagon ba sa paghimog pagpahinungod sa Diyos. “Kon ako pa nimo,” mitubag si Russell, “dili ko ipugos ang konsagrasyon [dedikasyon] kaniya, apan akong ibutang sa atubangan sa iyang hunahuna ingong bugtong tukmang dalan alang sa tanang intelihenteng tawo nga nahidangat sa kahibalo sa Diyos ug sa iyang maluluy-on nga mga katuyoan . . . Kon walay pagkonsagrar wala gayoy makabatog kinabuhing walay kataposan . . . Ang imong anak lalaki dili madaot sa pagpakonsagrar, apan mahimong matabangan pag-ayo. . . . Kinsay moingon nga ang usa ka batang diyes anyos dili pa bug-os ug kompleto kaayong mahidangat sa pagpabili sa bug-os nga pagkonsagrar sa hunahuna ug pulong ug buhat? Sa paghinumdom akong makita nga ang tibuok kong pagkonsagrar unang gihimo nga abanteg diyutay—sa lapas sa dose anyos sa edad.”
13. Unsay giingon niining magasina ngadto sa mga batan-on mga 94 ka tuig kanhi?
13 Ang Zion’s Watch Tower sa Hulyo 1, 1894, miingon: “Sa tanang minahal nga mga anak ug mga batan-on nga naghatag sa ilang mga kasingkasing ngadto sa Diyos, ug si kinsa nagasingkamot sa matag adlaw sa pagsunod kang Jesus, ang WATCH TOWER nagapadala sa pangomosta niini. Kami nakaila sa pipila sa mga bata pa nga nahigugma kang Jesus, ug dili maulaw nga mobarog dapig kang Jesus taliwala sa ubang mga bata nga wala mahigugma kaniya o maningkamot sa pagpahimuot kaniya; ug kinsa maisogon ug matinumanon sa Diyos, bisan pag kataw-an ug isipong katingad-anan sa ilang mga kauban sa eskuylahan nga ilang ginasultihan sa maayong balita sa gingharian. Ug kami malipay sa pagkakita sa pila ka batan-on, kinsa maisogong nagasalikway sa kalibotan ug sa mga ambisyon ug mga kalingawan niini, apil sa labing matinuohon niadtong [nagpahinungod] sa ilang mga kinabuhi sa Ginoo. Ang pipila sa among mga katabang sa opisina, ingon man daghan sa malamposong mga colporteur, batan-on pa sa edad.” Bisan pag kamo bata pa, nganong dili makigsulti sa inyong mga ginikanan mahitungod sa pagpahinungod kang Jehova nga Diyos?
Ang Papel sa mga Ginikanan
14. Unsang mga kaayohan ang gipahimuslan sa mga batan-on nga nagapahinungod kang Jehova?
14 Palandonga ang mga kaayohan nga gipahimuslan sa mga bata nga nagadawat sa giya sa mga ginikanan nga motultol sa bawtismo. (Efeso 6:4) Ang paghunahuna sa espirituwal nga mga butang motabang kanila sa paglikay sa mga lit-ag ug mga pagkalambiggit sa kalibotan. (1 Juan 2:15-17) Dili nila maani ang mapait nga ani nga sangpotanan sa ‘pagpugas nga nagahunahuna sa unod.’ (Galacia 6:7, 8) Sanglit gitudloan sila sa pagkinabuhig diyosnong kinabuhi, gipasundayag nila ang mga bunga sa espiritu sa Diyos. (Galacia 5:22, 23) Kay nagpahinungod sa Diyos, gipahimuslan nila ang suod nga relasyon uban niya. Ug kay sila nakatuon sa “pagsalig kang Jehova,” sila gigiyahan sa langitnong kaalam ug nagalakaw sa mga dalan sa pagkamaayo ug pakigdait.—Proverbio 3:5, 6, 13, 17.
15. Unsay mahimo sa Kristohanong mga ginikanan sa pag-umol sa mga kinabuhi sa ilang mga anak?
15 Sanglit ang pagpahinungod sa Diyos mapuslanon kaayo sa mga batan-on, angay buhaton sa Kristohanong mga ginikanan ang tanang ilang maarangan nga umolon ang mga kinabuhi sa ilang mga anak. Sama kang Timoteo, ang mga batan-on matudloan sa Kasulatan sukad sa pagkabata aron sila ‘makapadayon sa mga butang ilang nakat-onan ug nadani sa pagtuo.’ (2 Timoteo 3:14, 15) Mapalibotan sa diyosnong mga ginikanan ang ilang mga anak sa impluwensiya sa ilang sulundang mga kinabuhi mismo, nga magapasa nganha sa ilang mga anak sa kahibalo nga ikatagana sa ilang relasyon mismo sa Diyos, kasinatian, ug hamtong nga panghukom. Kon tukmang pagkadumala, ang maong paningkamot dili malimtan sa mga batan-on.—Proverbio 22:6.
16. Unsay angay makita sa inyong mga anak diha sa inyong panig-ingnan ug pagtudlo?
16 Pinaagi sa panig-ingnan ug pagtudlo, tabangi ang inyong mga anak sa pagsabot sa tin-aw sa kalainan tali sa organisasyon ni Jehova ug nianang kang Satanas. Ipakita kanila nga dili mahimo nga mokompromiso niining kalibotana, nga kinahanglang isalikway sa mga Kristohanon ang sinuwitik nga mga paagi, dili-diyosnong mga kalingawan, mga ambisyon, ug mga pakig-uban niini. (1 Corinto 15:33; 2 Corinto 4:2) Pinaagi sa inyong tinamdan, ingon man sa pagtudlo ug panig-ingnan, ipakita sa inyong mga anak unsa ka walay-pulos ang kalibotanong mga kalingawan, unsa ka pagkatonto sa mga tawo sa kalibotan kon itandi sa mga Saksi ni Jehova. Isaysay kon giunsa kamo pag-agak sa Diyos pinaagi sa iyang balaang espiritu, pagbantay aron kamo dili mahisalaag ngadto sa mga dalan nga motultol sa kasakitan, paglig-on kaninyo sa mga panahon sa kalisdanan ug kagul-anan. Ayaw pagkasayop sa paghunahuna nga kon tugotan ninyo ang mga batan-on sa pagsubay sa kalibotanong mga dalan sa garbo, ambisyon, kasadyaan, ug kabuangan, sila mahimong mga magtutuo. Sa dili pa malit-agan sa kalibotan ang inyong mga anak, panalipdi sila gikan sa daotang mga impluwensiya niini ug tabangi sila sa pagsentro sa ilang mga gugma ug paglaom diha kang Jehova.
Paglantaw Saylo sa Bawtismo
17. (a) Nganong ang pila ka bawtismadong Kristohanon makaagom ug espirituwal nga pagkahulog pag-usab? (b) Unsaon nato pag-isip ang atong pagpahinungod?
17 Bisan kon bata o tigulang, pihong ang usa ka kandidato sa bawtismo buot magpabiling matinumanon kang Jehova. Busa nganong ang pila ka bawtismadong mga Kristohanon makaagom ug espirituwal nga pagkahulog pag-usab? Bisan tingalig nalangkit ang lainlaing mga hinungdan, mopatim-aw nga adunay pangunang hinungdan—pagkawala makasabot kon unsay kahulogan sa pagpahinungod. Kini dili pagpahinungod sa atong kaugalingon ngadto sa usa ka buluhaton. Kana makapapuliki kanato apan dili maghimo kanatong espirituwal nga mga tawo. Kinahanglang atong hinumdoman nga kita gipahinungod dili ngadto sa usa ka buluhaton kondili ngadto sa usa ka Persona—si Jehova nga Diyos. Kini motabang nato sa paglikay sa sayop sa pag-isip sa atong pahinungod ingong wala-sa-buot nga tikang nga atong pagahimoon sa dili pa atrakahon ang buluhaton. Ang paghimog pahinungod angay isipon ingong pagsulod sa bililhong relasyon nga kanunay bantayan ug huptan. Niining bahina, nakabaton kita sa panig-ingnan ni Jesu-Kristo. Nagpahayag sa iyang kinasingkasing nga tinamdan sa gipresentar ang iyang kaugalingon kang Jehova mao ang matagnaong mga pulong: “Ako mianhi . . . Sa pagbuhat sa imong kabubut-on, Oh Diyos ko, ako nagakalipay, ug ang imong kasugoan ania sa akong kahiladmang mga bahin.”—Salmo 40:6-8; Hebreohanon 10:5-10.
18. Sa unsang paagi ang kasugoan sa Diyos anaa sa “kahiladmang mga bahin” ni Jesus?
18 Sa unsang paagi nahitabo nga ang kasugoan ni Jesus maoy diha sa “kahiladmang mga bahin” ni Jesus? Giingnan niya ang usa ka Hudiyong eskriba nga si Jehova nga atong Diyos maoy usa ug wala nay lain, sa ingon nagpasiugda sa pagkalabaw ni Jehova. Unya gipakita ni Jesus nga ang diwa sa kasugoan sa Diyos nalangkoban sa paghigugma kang Jehova uban sa tibuok natong kasingkasing, pagsabot, ug kusog, samtang nagahigugma sa atong silingan sama sa atong kaugalingon. (Marcos 12:28-34) Kana ang pangunang hinungdan si Jesus nakaingon, ‘Ako nagakalipay sa pagbuhat sa kabubut-on sa Diyos.’ Siya nakapabilin sa iyang dalan nga matinumanon bisan pa sa kinadak-ang mga pagsulay ug mga pag-antos, dili lang kay gisabot niya nga kini maayong buluhaton kondili tungod kay nabatonan niya ang suod nga relasyon uban ni Jehova nga Diyos. Kon susama natong ilhon ang pagkalabaw ni Jehova ug higugmaon siya uban ang dili-mabugto nga pagmahal, kita magkinabuhi sumala sa atong pahinungod ug bawtismo.
19. Unsa ang koneksiyon tali sa atong relasyon kang Jehova ug sa buluhatong atong ginabuhat?
19 Hinuon, may koneksiyon ang atong relasyon uban sa Diyos ug ang buluhaton nga atong ginabuhat. Gipaila nato ang gugma kang Jehova pinaagi sa pagbuhat sa buluhatong pagwali sa Gingharian. Niining bahina, ang anhing Grant Suiter, kanhi sakop sa Nagamandong Lawas sa mga Saksi ni Jehova, kas-a misulat: “Samtang namati ako sa [usa ka nagpanawng magtatan-aw] nga naghisgot bahin sa mga pribilehiyo sa pag-alagad kang Jehova ug sa responsabilidad sa pagbuhat niana, nakaamgo ako kon unsay angay nakong buhaton ug kon unsay buot nakong buhaton. Busa gihimo ko ang personal nga pahinungod kang Jehova, ug sa maomaong panahon ang ubang sakop sa akong pamilya nagbuhat usab niana. Sa Oktubre 10, 1926, sa San Jose, California, kaming tanan nagdungan sa pagpasimbolo sa among pagpahinungod kang Jehova nga Diyos pinaagi sa pagpatuslob sa tubig. . . . Tapos sa bawtismo . . . gisultihan sa akong amahan ang ansiano nga nagdumala sa bawtismo: ‘Kamo nagalakaw uban sa mga basahon, dili ba? Buot usab namong buhaton kanang buluhatona, karon.’ Busa ang among pamilya misugod sa pagsangyaw sa kanataran.” Karong adlawa, ang mga tawong may katakos mosugod sa pagbatog dakong bahin sa pag-alagad sa kanataran sa dili pa magpabawtismo.
Ang Bawtismo Makaluwas Kanato
20, 21. (a) Sa unsang paagi ang mga ulipon ni Jehova ‘gipatikan’? (b) Unsa ang maong “patik,” ug ang pagbaton niana nagkahulogan sa unsa?
20 Pinaagi sa atong mga buhat, kita makapakita nga “kita iya ni Jehova.” Aw, ang kaluwasan nagadepende sa pagbuhat nga matinumanon ingong iyang dedikadong mga ulipon! (Roma 6:20-23; 14:7, 8) Sa karaang mga panahon, ang mga ulipon kadaghanan patikan sa agtang. Pinaagi sa buluhatong pagwali karong adlawa, ang antitipikal nga ‘lalaking nagsul-ob ug lino’—ang nahibilin sa dinihogang mga sumusunod ni Jesus—‘nagapatik’ niadtong makalabang-buhi sa kataposan niining sistemaha. Niining buluhatona ang dinihogan giabagan sa ilang mga kauban, ang “ubang mga karnero.” (Ezekiel 9:1-7; Juan 10:16) Ug unsa man ang “patik”? Kini mao ang ebidensiya nga kita dedikado kang Jehova ug maoy bawtismadong mga tinun-an ni Jesus nga dunay samag-Kristo nga personalidad.
21 Bililhon ilabina karon nga kita magbaton sa “patik” ug maghawid niana, kay kita halalom na sa “panahon sa kataposan.” (Daniel 12:4) Aron maluwas kinahanglang kita ‘moantos hangtod sa kataposan’ sa atong kinabuhi o niining sistemaha. (Mateo 24:13) Sa diha lamang nga kita magpabiling matinumanong mga saksi ni Jehova nga ang bawtismo magluwas kanato.
Mga Pangutana sa Pagsubli
◻ Aron maluwas, unsay kinahanglang atong buhaton?
◻ Nganong ang mga ansiano mohimog mga pakighisgot uban niadtong buot magpabawtismo?
◻ Unsay mahimo sa mga ginikanan sa paghatag sa ilang mga anak ug espirituwal nga giya nga mosangpot sa bawtismo?
◻ Kita ba nagapahinungod ngadto sa usa ka buluhaton?
◻ Sa unsang paagi ang bawtismo makaluwas kanato?
[Hulagway sa panid 16]
Nasayod ka ba sa unsang paagi ang bawtismo katumbas sa pagkaluwas ni Noe ug sa iyang pamilya diha sa arka?
[Hulagway sa panid 18]
Ang pagpahinungod ug bawtismo makahatag ug kaayohan sa mga batan-on. Nasayod ka ba sa unsang paagi?