Pagkahimong Ordinadong Ministro—Ang Paagi sa Diyos!
ANG usa ka bisita lagmit mahingangha—tingali malibog pa—sa iyang madungog. Ang esena maoy usa ka kombensiyon sa mga Saksi ni Jehova. Ang usa ka pakigpulong gihimo alang sa usa ka pundok sa mga tawong hapit nang bawtismohan. Katingalahan, ang mamumulong nagsulti sa maong mga kandidato sa bawtismo: “Ang inyong presensiya niining grupo sa mga kandidato sa bawtismo nagapaila sa inyong tinguha nga mahimong ordinadong ministro sa Gingharian.”
‘Sa unsang paagi mahitabo kana?’ tingali mangutana ang usa ka bisita. ‘Dili ba ang bawtismo alang sa mga tawong bag-o pang nasinati sa Kristiyanidad—ug alang sa mga masuso? Dili ba kinahanglan ang mga tuig sa dakong pagbansay ug edukasyon aron mahimong ordinadong ministro’? Tingali sama ang imong pangatarongan. Apan kon unsay ginaingon sa Bibliya mahitungod sa bawtismo ug ordinasyon tingali makapatingala kanimo.
Sa Dili pa ang Usa Mabawtismohan
Una sa tanan, ang bawtismo dili alang sa mga tawong bag-o pang nasinati sa Kristohanong mensahe. Ang Bibliya, sa Buhat 8:12, nagapakitang ang mga tawo sa unang siglo nabawtismohan human nga “sila nagtuo.” Ang Mateo 28:19 nagapakita usab nga ang usa ka tawo kinahanglan mahimong ‘disipulo’ sa dili pa ang bawtismo. Ug sa unsang paagi ang usa mahimong ‘magtutuo,’ o ‘disipulo,’ (‘tinudloan’)? Pinaagi sa mainampingong pagtuon sa Bibliya! Niining paagiha, ang usa ka tawo makabatog tukmang kahibalo kang Jesus ug kang Jehova nga Diyos. (Juan 17:3) Tapos lamang makabaton sa maong kahibalo nga ang usa ka estudyante makapalandong nga magpabawtismo. Sa unang siglo, ang establisado nang mga Kristohanon naghatag sa maong instruksiyon ngadto sa bag-ong mga kinabig.—Buhat 8:31, 35, 36.
Sa mga kongregasyon sa mga Saksi ni Jehova karong adlawa, gihimo ang susamang mga kahikayan alang sa interesadong mga tawo aron makapahimulos sa libreng pagtuon sa Bibliya. Ang usa ka tawong may kasingkasing nga mosanong inanay makapabili kon unsay iyang makat-onan. Siya madasig sa pagpaambit sa iyang bag-ong-kaplag nga mga pagtuo sa uban. (Roma 10:8-10) Siya mosugod sa regular nga pagtambong sa Kristohanong mga tigom, diin siya makabatog dugang instruksiyon sa Bibliya. (Hebreohanon 10:24, 25) Ug tapos ang mga semana o mga bulan niini, ang bag-ong magtutuo makaugmad ug tinguha sa pagtuman sa tambag sa Bibliya sa Roma 12:1: “Busa ako nagahangyo kaninyo tungod sa mga kaluoy sa Diyos, mga igsoon, sa pagtanyag sa inyong mga lawas nga usa ka halad nga buhi, dalawaton sa Diyos, usa ka sagradong pag-alagad uban ang inyong gahom sa pangatarongan.”
Hinuon, ang kahibalo lamang dili magpatakos sa usa sa paghimo niining maong pahinungod. Ang usa kinahanglan usab nga maghinulsol ug “magbag-o.” (Buhat 3:19) Ngano man kini? Sa prangka, ang pipila may imoral nga mga kinabuhi una pa makakat-on sa mga sukdanan sa Diyos. Ang uban napuliki kaayo sa hinakog nga mga pangagpas. Apan sa pagtanyag sa ilang kaugalingon sa Diyos ingong “balaan, dalawaton,” kinahanglang sila magpakitag paghinulsol sa maong nangaging mga kalihokan. Kinahanglang sila magbasol nga gigamit ang ilang kinabuhi, kusog, ug mga katakos sa dili-kasulatanhong mga pangagpas. Ang maong paghinulsol kinahanglang duyogan usab sa nahiangayng aksiyon aron gayod “magbag-o,” o mag-usab sa ilang dalan sa kinabuhi.
Sa pagtabang sa dugang sa bag-ong magtutuo, ang Kristohanong mga ansiano maghikay nga makigtagbo kaniya ug mogugol ug panahon sa pagsubli sa paninugdang mga pagtulon-an sa Bibliya. Kini, sa usa ka butang, nagapasalig sa mga ansiano nga ang umaabot nga Kristohanon nakabatog tukmang kahibalo sa mga katuyoan sa Diyos. Ug, siyempre, ang pagsubli labing mapuslanon alang sa estudyante. Sumala sa panginahanglan, ang pila ka butang nga wala hisabting tukma matin-aw.
Ang mga bawtismo sa kadaghanan himoon maylabot sa mga kombensiyon o mga asembliya sa mga Saksi ni Jehova. Sa maong mga okasyon, ang pintok nga pakigpulong ihatag ngadto sa mga kandidato sa bawtismo. Sila pahinumdoman nga ang bawtismo dili lamang kay pagkuyog sa usa ka bag-ong relihiyon. Si Jesus miingon: “Kon adunay buot mosunod kanako, ipasalikway niya ang iyang kaugalingon ug ipapas-an ang iyang kahoy sa pagsakit ug magpadayon sa pagsunod kanako.”—Mateo 16:24.
Ang mga kandidato sa dugang pahinumdoman sa lalom nga kahulogan sa bawtismo. Ang teksto sa 1 Pedro 3:21 kadaghanan basahon: “Ang butang nga motumbas niini karon nagaluwas usab kaninyo, nga mao, ang bawtismo, (dili ang paghugas sa kahugawan sa unod, kondili ang paghangyo sa Diyos alang sa usa ka maayong tanlag,) pinaagi sa pagkabanhaw ni Jesu-Kristo.” Dinhi, si Pedro nagatandi sa bawtismo ngadto sa kasinatian ni Noe sa paglatas sa katubigan sa Lunop. Samtang kadtong maong katubigan nakapatay sa daotang katawhan sa yuta, kadto nakaluwas sa kinabuhi ni Noe samtang kana nagluwas kaniya didto sa arka. Sa samang paagi, ang bawtismo ‘nagaluwas’ sa mga Kristohanon gikan niining daotang kalibotan. Sa dihang ang usa, pinasukad sa iyang pagtuo sa mga kaayohan sa kamatayon ug pagkabanhaw ni Jesu-Kristo, mabawtismohan, ang maong tawo, sa usa ka diwa, anaa sa ‘luwas’ nga kahimtang sa atubangan sa Diyos. Siya dili na isipong bahin niining daotang kaliwatan nga gihukman sa kalaglagan.—Tan-awa ang Buhat 2:40.
Busa, ang pagpabawtismo dili usa ka tikang nga pagahimoon tungod sa silaob sa emosyon, sumala sa subsob mahitabo sa relihiyosong mga revival nga miting. Nagapasiugda niining kamatuorana mao ang kamatuorang una ituslob sa aktuwal ang bag-ong mga disipulo, ang ministrong nagadumala sa bawtismo mangutana kanilag duha ka makapatuhop nga pangutana. Ang ilang mga tubag nga apirmatibo maoy “dayag nga pagpahayag” sa ilang pagtuo sa lukat ug sa kamatuorang sila sa walay-pagpanuko nagpahinungod sa ilang kaugalingon kang Jehova. (Roma 10:9, 10) Karon sila andam na alang sa bawtismo sa tubig.
Ordinado Ingong mga Ministro sa Gingharian
Ang kompletong pagtuslob sa tubig maoy haom nga simbolo sa ilang pagpahinungod sa Diyos. Samtang anaa sa ilalom sa tubig, samag sila namatay sa ilang kanhing dalan sa kinabuhi. Sa pagkagawas sa tubig, kana nahisamag sila karon buhi alang sa usa ka bag-ong dalan sa pagsakripisyo sa kaugalingon diha sa pag-alagad sa Diyos.—Itandi ang Roma 6:2-4.
Apan, sa unsang paagi ang ordinasyon mohaom sa buhat sa bawtismo? Matikdi ang ginaingon sa M’Clintock and Strong’s Cyclopcedio of Biblical, Theological, and Ecclesiastical Literature (1877), Tomo VII, panid 411: “Ang ordinasyon nagapasabot sa pagkatudlo o pagtawag sa usa ka tawo alang sa usa ka ministeryal nga katungdanan, kon kaha duna o walay nagaubang mga seremonya.” (Italiko amoa.) Kini nagaila nga dili kinahanglan ang maartihong seremonyas o sertipiko sa ordinasyon aron mahimong usa ka Kristohanong ministro.
Apan ang Bibliya nagatudlo ba niini? Palandonga si Jesu-Kristo. Walay pagduhaduhang siya mao ang kinalabwang ministro sa Diyos. Bisan pa niana, siya ba may maartihong seremonyas una mosugod sa iyang buluhaton sa pagsangyaw? May sertipiko ba siya nga nagapaila kaniya nga ministro? Sa kasukwahi. Maoy sa pagkatapos lamang sa iyang pagkabawtismado sa tubig nga gipahayag sa Diyos ang iyang pag-uyon kang Jesus ingong iyang Anak ug nag-ordinar kaniya ingong Iyang ministro.—Marcos 1:9-11; Lucas 4:18-21.
Komosta ang unang-siglong mga Kristohanon? Walay taho sa bisan unsang mapagawalong ordinasyon alang niadtong unang Kristohanong mga ministro. Ang rekord sa Mga Buhat balikbalik nagasugid sa paghimo sa yanong mga bawtismo sa mga magtutuo. Kadto gisundan sa ilang madasigong pagpakig-ambit sa dayag nga ministeryo.—Tan-awa ang Buhat 2:41-47; 8:36-39; 22:14-16.
Unsang ebidensiya ang nabatonan sa maong mga ministro sa ilang ordinasyon? Si Pablo nag-ingon sa 2 Corinto 3:1-3: “Kita ba nagsugod na usab sa pagpaila sa atong kaugalingon? O kita kaha, sama sa pipila ka tawo, nagkinahanglan sa mga sulat sa pagpaila nganha kaninyo o gikan kaninyo? Kamo mismo mao ang among sulat, nga gisulat sa among mga kasingkasing ug nahibaloan ug gibasa sa tanang tawo. Kay kamo gipakita nga usa ka sulat ni Kristo nga gisulat namo ingong mga ministro, nga gisulat dili pinaagi sa tinta kondili pinaagi sa espiritu sa usa ka buhing Diyos, dili diha sa papan nga mga bato, kondili sa unodnong mga papan, diha sa mga kasingkasing.” Ang epekto sa espiritu sa Diyos diha sa mga kasingkasing sa maong mga tinudloan nagpatunghag bag-ong Kristohanong pagkatawo, nga mabasa sa tanang makakita. Kadto igong pamatuod nga ang Diyos tinuod nag-ordinar sa mga nakig-ambit sa pagtudlo sa maong bag-ong mga disipulo.
Pagpanlimbasog sa Ministeryo
Susama karong adlawa, ang usa ka ministro mailhan pinaagi sa iyang mga buhat. Siya madasigon sa ‘pagpanlimbasog sa iyang kaugalingon’ diha sa iyang ministeryo. (Lucas 13:24) Giisip niya ang iyang ministeryo ingong dakong pribilehiyo gikan sa Diyos. Dili niya kana ibalewala lamang.—1 Timoteo 1:12-16.
Ang pagsangyaw sa Gingharian mao ang pangunang katungdanan sa maong mga ministro. Ang tanang ubang pangagpas kinahanglang limitado aron sila ‘bug-os makatuman sa ilang ministeryo.’ (2 Timoteo 4:2, 5) Hinuon, kinahanglang ilang atimanon sa ilang kaugalingon ingon man ang pisikal nga mga panginahanglan sa ilang pamilya. Ugaling lamang, sila ‘matagbawon sa pagkaon ug panapot.’ Dili sila motugot nga ang personal nga mga pangagpas o personal nga mga tinguha magbalda kanila gikan sa ministeryo. (1 Timoteo 5:8; 6:7, 8; Filipos 2:20-22) Gitino nila ang “labi pang hinungdanong mga butang.” (Filipos 1:10) Sila naningkamot nga ibutang nila sa ilang atubangan ang maayong panig-ingnan ni Jesu-Kristo, kansang kinabuhi nasentro sa pagsangyaw sa Gingharian.—Lucas 4:43; Juan 18:36, 37.
Bisan pa niana, dihang ang usa ka tawo bawtismohan ingong ordinadong ministro, siya sa aktuwal anaa sa unang mga ang-ang sa iyang pag-alagad sa Diyos. Matuod, iyang nabatonan ang kahibalo kang Kristo Jesus ug kang Jehova nga Diyos. Siya nakahimo usab ug daghang kausaban sa iyang kinabuhi mao nga ang iyang Kristohanong ministeryo dili masaway. (2 Corinto 6:3) Ang bag-ong bawtismadong Kristohanon kinahanglan pag dakong pag-uswag. Ang iyang bawtismo, nga nagapasabot sa iyang ordinasyon, maoy usa lamang ka hinungdanong milyahan sa iyang pagtubo ingong Kristohanon. (Filipos 3:16) Busa, ang matag ordinadong ministro kinahanglang mopadayon sa pag-ugmad ug apresasyon sa espirituwal nga mga butang. Kinahanglang siya mogahin ug panahon alang sa personal nga pagtuon. Angay nga iyang pahimuslan ang tanang tagana aron ang kongregasyon magtigom. Angay nga siya maningkamot sa pagpauswag sa kalidad sa iyang mga pag-ampo, nga mosangpot sa mas suod personal nga relasyon sa Diyos.—Lucas 6:45; 1 Tesalonica 5:11; 1 Pedro 4:7.
Nagalaom kami nga kining Kasulatanhong mga hunahuna nakatabang kanimo sa pagsabot nganong ang usa ka silid sa unibersidad dili usa ka kinahanglanon niadtong buot mag-alagad nga mga ministro sa Diyos. Kapin sa tulo ka milyong Saksi ni Jehova matinumanong nagaalagad sa Diyos ingong iyang mga ministro, nga nagapahayag sa mga kamatuorang gilaraw diha sa iyang Pulong. Nganong dili magpatabang sa usa kanila sa pagbatog kahibalo sa Bibliya?
[Hulagway sa panid 29]
Sumala sa Bibliya, ang Kristohanong ministro maordinahan panahon sa bawtismo