Pagkinabuhi Alang sa Kabubut-on sa Diyos—Karon ug sa Walay Kataposan
“Kamo usab . . . magkinabuhi sa nahibilin [ninyong] panahon sa unod, dili na alang sa mga tinguha sa mga tawo, kondili alang sa kabubut-on sa Diyos.”—1 PEDRO 4:1, 2.
UNSAY imong sanong sa ideya nga ang Diyos maoy magbuot sa imong kinabuhi? Daghan karong adlawa ang moayad sa ideya mismo nga magpailalom sa pagbuot sa laing tawo. Bisan sa gitawag lig-ong mga katilingban adunay nagatubo nga pag-alsa batok sa pagbulot-an o awtoridad. Ang mga rayot, mga pagprotesta, kagubot, ug kapintasan mao ang matag-adlaw nga hitabo. Kon mailalom sa kalisod ang haklap sa sibilisasyon madayag nga nipis ug daling magupok.—2 Timoteo 3:1-3.
1, 2. (a) Unsay sanong sa daghan sa ideya nga magpailalom sa kabubut-on sa lain? (b) Mahimong unsa ang sanong sa pipila sulod sa Kristohanong kongregasyon? (c) Busa unsang mga pangutana ang gipatungha?
2 Sa kaatbang, ang mga Saksi ni Jehova nagapadayag nga sila nagakinabuhi alang sa kabubut-on sa Diyos pinaagi sa ilang pagkamatinumanon, pananglitan, diha sa ilang balay-balay nga ministeryo. Bisan pa niana, may panahong ang espiritu sa pagkinaugalingon gipadayag sa pipila bisan sulod sa Kristohanong kongregasyon. Sila tingali maglagot sa disiplina sa mga ansiano. Ang pipila nagapakitag kawalay-pagtahod sa “matinumanon ug maalamong ulipon” nga matang ug sa Nagamandong Lawas niini. (Mateo 24:45-47; Buhat 15:2, 23) Busa motungha ang mga pangutana: Nganong magpailalom ako sa kabubut-on sa Diyos? Nganong ang Diyos maoy magbuot sa akong kinabuhi?
Ang Dili-Mahakogong Panig-ingnan ni Kristo
3 Si Pedro, kinsa nakasinatig daghang kaagi uban ni Jesus, nagtuo nga may maayo kaayong katarongan sa pagkinabuhi alang sa kabubut-on sa Diyos inay kay sa kaugalingon. Siya miingon: “Busa sanglit si Kristo miantos sa unod, sangkapi usab ninyo ang inyong kaugalingon sa samang panghunahuna; tungod kay ang tawo nga miantos sa unod mihunong na sa mga sala, sa katuyoan nga siya magkinabuhi sa nahibilin niyang panahon sa unod, dili na alang sa mga pangibog sa mga tawo, kondili alang sa kabubut-on sa Diyos.”—1 Pedro 4:1, 2.
4. Giunsa pagpakita ni Jesus ang iyang pagpailalom sa iyang Amahan?
4 Nganong si Jesus miantos sa unod? Kay iyang gipaluyohan ang kiliran sa iyang Amahan sa isyu sa unibersohanong pagkasoberano, o pagmando. Iyang gipamatud-an nga ang Diyos matuod ug si Satanas bakakon. Ug iyang gibuhat kana pinaagi sa pagtugot nga ang iyang yutan-ong kinabuhi pagabut-an sa Diyos, bisan pag kadto misangpot sa kamatayon ingong sinakit.—2 Corinto 5:14, 15.
5. Unsang hagit ang ginahatag sa panig-ingnan ni Kristo sa atong atubangan?
5 Apan kadtong kamatayona usa ka pahayag sa gugma sa Diyos pinaagi kang Kristo. (1 Juan 4:10) Nganong ingon man? Kay ingong sangpotanan niana, ang mga kaayohan mahimong maangkon sa tanang tawo. (Roma 5:8; 6:23) Apan pila ang buot modawat sa maong mga kaayohan? Pila ang andam mosunod kang Kristo ug mosakripisyo sa ilang mga pangibog sa pagpailalom sa kabubut-on sa Diyos?—Hebreohanon 13:15, 17.
Mga Kaayohan Karon ug sa Umaabot
6, 7. Unsa ang mga kaayohan sa pagpailalom sa kabubut-on ni Jehova?
6 Busa pagkatukma bisan sa atong mga panahon ang pagdapit nga gipaabot ni Jehova ngadto sa Israel 2,700 ka tuig nga miagi: “Ako, si Jehova, nga imong Diyos, ang Usa nga nagatudlo kanimo sa pagbaton ug kaayohan, ang Usa nga nagapalakat kanimo sa dalan nga imong pagaagian. Oh, kon unta ikaw magpatalinghog sa akong mga sugo! Unya ang imong pakigdait mahisama sa usa ka suba, ug ang imong pagkamatarong sama sa mga balod sa dagat.”—Isaias 48:17, 18; itandi sa Genesis 22:18.
7 Si Jehova nagatudlo kanato sa pagbaton ug kaayohan pinaagi sa pagkinabuhi nato alang sa iyang kabubut-on—ug ang maong mga kaayohan dili lamang pakigdait ug pagkamatarong karon mismo. Kana nagaapil sa umaabot nga mga panalangin sa kinabuhing walay kataposan, sumala sa gisaad ni Jesus: “Kay kini mao ang kabubut-on sa akong Amahan, aron ang tanan nga makakita sa Anak ug motuo kaniya makabaton ug kinabuhing walay kataposan, ug siya akong pagabanhawon sa kataposang adlaw.”—Juan 6:40.
8. Sa unsang paagi ang saad ni Jesus nga pagkabanhaw makalipay karong adlawa?
8 Kanang mga pulonga makalipay ug dako sa matinumanong mga Kristohanon karong adlawa nga tigulang na sa edad. Kining sistema sa mga butang nagasulod na sa iyang ika-72 ka tuig sukad sa hinungdanong petsa sa 1914. Ang kalibotan ni Satanas milungtad ug mas dugay kay sa gidahom sa daghan. Ngani, ang pila ka matinumanong Kristohanon nga naglaom nga makakita sa Armagedon ug sa pagsugod sa bag-ong sistema sa mga butang sa ilang panahon sa pagkinabuhi nangamatay na. Apan ang ilang pagkinabuhi, nga gipahinungod sa pagbuhat sa kabubut-on sa Diyos, wala makawang. Ingong pagtuman sa iyang saad, sila pagabanhawon ni Jesus ug hatagan sila sa kaayohan nga kinabuhing walay kataposan.—Juan 5:28, 29; 1 Corinto 15:58.
Ang Panghunahuna ni Kristo
9, 10. (a) Sa unsa nga atong sangkapan ang atong kaugalingon? (Filipos 2:5-8) (b) Unsay nakapalain sa Gregong pulong nga gihubad nga “panghunahuna”sa 1 Pedro 4:1?
9 Unsay mohimo nga labi pang sayon nga kita magpailalom sa kabubut-on sa Diyos? Sumala sa tambag ni Pedro, nga gikutlo sa parapo 3, kinahanglang sangkapan nato ang atong kaugalingon sa “samang panghunahuna” nga nabatonan ni Jesus.—1 Pedro 4:1.
10 Gigamit dinhi ni Pedro ang Gregong pulong nga kaduha lamang hikaplagan sa Gregong Kasulatan—ang enʹnoi·a. Bisan tuod gihubad kini sa pipila ka maghuhubad nga “hunahuna,” kini dili mao ang kasagarang Gregong pulong alang sa “hunahuna,” nga maoy nous. Busa si Pedro, ilalom sa pagdasig, nakabaton sa ispisipikong punto sa hunahuna sa iyang gipili kining dili kaayo kasagarang nombre. Ang Gregong eskolar si W. E. Vine nag-ingon nga ang enʹnoi·a “nagkahulogan sa katuyoan, intensiyon, laraw.” Ang Greek-English Lexicon ni J. H. Thayer nagbatbat niini ingong “paagi sa paghunahuna ug pagbati.”
11. Unsay atong makat-onan gikan sa panig-ingnan ni Jesus mahitungod sa paagi sa paggamit nato sa atong mga kinabuhi?
11 Ang nagsakripisyo-sa-kaugalingong pagkinabuhi ni Jesus tin-awng nagpadayag sa iyang katuyoan, o laraw. Siya wala magkinabuhi sa mapagawalong kinabuhi, nga nagtinguha lamag kalipayan ug kalingawan. Siya nasayod nga wala niya biyai ang iyang kanhing kinabuhi sa langit aron usikan ang pila ka tuig sa yuta diha sa mahakogong mga pangagpas. (Tan-awa ang kalainan sa Genesis 6:1, 2, 4, ug Judas 6.) Busa siya miingon: “Ako nanaog sa langit aron sa pagbuhat, dili sa akong kabubut-on, kondili sa kabubut-on sa nagpadala kanako.” (Juan 6:38) Si Jesus usag hunahuna sa iyang debosyon ngadto sa kawsa sa iyang Amahan, nga kanunayng nagbutang niana nga labaw sa iyang kaugalingong kabubut-on, bisan hangtod sa makauulaw nga kamatayon.—Lucas 22:42.
12, 13. (a) Giunsa ni Jesus pagpadayag ang iyang panghunahuna didto sa atabay ni Jacob? (b) Unsay gipasabot ni Jesus sa miingon siya, “Ako adunay pagkaon nga wala ninyo hisayri”? (Juan 4:32)
12 Bisan dihang gikapoy ug gigutom, tin-awng gipakita ni Jesus ang iyang panghunahuna sa kabubut-on sa iyang Amahan. Sa usa ka higayon, samtang ang iyang mga tinun-an nanglakaw sa pagpangitag pagkaon, siya mipahulay sa daplin sa atabay ni Jacob. Inay nga himoon ang angay nga pagtagpilaw hangtod mahibalik ang mga tinun-an, siya naningkamot sa pagbuhat sa kabubut-on sa Diyos. Siya mihimo sa talagsaong tikang alang sa usa ka Hudiyo. Siya nakigsulti sa usa ka babayeng Samarianhon. Gibuksan niya ang iyang mga mata sa pagsabot sa matuod nga Diyos. Ingong sangpotanan, “daghang Samarianhon nga gikan niadtong siyudara ang nagtuo kaniya tungod sa pulong sa babaye.”—Juan 4:6-26, 39-42.
13 Sa nahibalik ang iyang mga tinun-an, ilang giagda siya nga mokaon. Unsay iyang tubag kanila? “Ako adunay pagkaon nga wala ninyo hisayri.” Sila nalibog sa iyang tubag hangtod siya midugang: “Ang akong pagkaon mao ang pagbuhat sa kabubut-on sa nagpadala kanako ug sa pagtapos sa iyang buluhaton.” Tin-aw, si Jesus nagkalipay sa pagpasakop sa kabubut-on sa iyang Amahan. Alang kaniya kadto nahisamag pagkaon, ug sama sa pagkaon sa lamiang pagkaon, siya tinuod nga natagbaw ingong sangpotanan. Kon buot natong mobati sa tinuod nga katagbawan sa atong mga kinabuhi, kita dili makabuhat ug labaw pa kay sa pagsunod sa panig-ingnan ni Jesu-Kristo.—Juan 4:31-38.
Mga Epekto sa Panghunahuna ni Kristo
14. Unsay atong gikinahanglan aron mabatonan ang panghunahuna ni Kristo? Iilustrar.
14 Sa unsang paagi kita maapektahan sa panghunahuna ni Kristo? Kon kita makatuon sa paghunahuna sama kang Kristo, nan atong mabatonan ang usa ka gahom sa kahiladman nga magagiya kanato sa pagbuhat sa pagabuhaton ni Jesus ilalom sa bisan unsang kahimtang. (Lucas 22:42; Efeso 4:23, 24) Kining gahoma dili lamang sangpotanan sa kahadlok sa silot, sama sa disiplina gikan sa mga ansiano sa kongregasyon, kondili magagikan sa dako kaayong pagpabili sa mga balaod ug mga prinsipyo ni Jehova. Atong ikatandi ang kahimtang ngadto sa tawong nagasugot lamang sa mga balaod sa trapiko kon adunay polis nga makita—siya mopasakop lamang ngadto sa gawas nga impluwensiya. Apan ang tawong nagamahal sa kinabuhi, nahigugma sa iyang silingan, ug nakasabot sa kaalam sa pagbatog mga balaod sa trapiko mosugot tungod kay siya nagatahod sa balaod. Siya dunay kusganong motibo sa kahiladman.—Salmo 51:10.
15. (a) Unsay nagapamatuod nga si Jesus may gahom sa kahiladman nga nagpalihok sa iyang hunahuna? (Efeso 4:23) (b) Unsang mga panig-ingnan ang nagahatag pamatuod sa panghunahuna ni Kristo diha sa mga Kristohanon karong adlawa?
15 Nabatonan ni Jesus ang maong ‘gahom nga nagapalihok sa iyang hunahuna’ sa kahiladman. Siya miantos sa kasakitan nga wala magreklamo o magpanamastamas sa iyang mga maglulutos. (1 Pedro 2:21-24) Usahay kita ingong mga Kristohanon mailalom sa susamang mga kalisod. Ang supak nga mga awtoridad tingali mosulay sa pagpugong sa atong buluhaton sa pagsangyaw ug sa mga tigom, sama sa ilang gibuhat sa Espanya panahon ni Franco ug sa nagkalainlaing Uropanhong kayutaan panahon sa okupasyong Nazi. Daghang igsoong lalaki ug babaye ang gidagmalan sa paningkamot nga ilang traidoran ang mga igsoong may katungdanan sa lokal nga kongregasyon. Bisan pa sa paglutos ang kinabag-an nagpabiling lig-on. (Tan-awa ang 1978 Yearbook of Jehovah’s Witnesses, mga panid 171-2, 182-3; 1986 Yearbook of Jehovah’s Witnesses, mga panid 137-59.)
16. Unsa ang pipila ka paagi nga niana kita masulayan karong adlawa? Sa unsang paagi kita makasukol?
16 Tingali kita makaagom ug kalisod maylabot sa Kristohanong neyutralidad o sa paggamit sa abuno sa dugo. (Buhat 5:29; 15:28, 29) Unya motungha ang isyu, Kita nagakinabuhi ba alang sa kabubut-on sa Diyos o sa kabubut-on sa tawo? O ang pagpanulay tingali motungha tungod sa pagkatapo sa unodnong mga pangibog ug dili-maayong mga kauban? Tingali sa tunghaan o sa atong dapit trabahoan, ang higayon motungha sa pagtabako o paggamit ug mga droga nga walay lain sa kongregasyon ang mahibalo niana. O komosta ang tentasyon sa pagsugal sa usa ka loteriya? O sa pagbuhat sa pakighilawas o panapaw? Subsob kaayong ang kalibotanong palibot sa dapit trabahoan makapadani sa daotang panghunahuna ug daotang buhat—gawas kon atong batonan ang hugot nga hukom nga sama sa kang Kristo mahitungod sa pagbuhat sa kabubut-on sa Diyos. Unsay imong buhaton? Batonan ba nimo ang matul-id nga gahom nga mopalihok sa imong hunahuna mao nga imong sundon ang gibuhat ni Kristo ilalom nianang mga kahimtanga?—Efeso 4:17-20; 1 Juan 2:15, 16.
17 Dugang gipasiugda ni Pedro ang panginahanglan nga buhaton ang kabubut-on sa Diyos sa mitambag siya: “Kay ang panahon nga miagi igo na sa inyong pagbuhat sa kabubut-on sa kanasoran sa dihang inyong gibuhat ang mga buhat sa malaw-ay nga kagawian, sa kaulag, mga pagpatuyang sa bino [o ubang alkoholikong ilimnon], mga hudyaka-bahakhak, mga bangga sa inom, ug sa gidili nga mga pagsimbag diyosdiyos. Tungod kay kamo wala mopadayon sa pagpakighugoyhugoy kanila ngadto sa samang pagpatuyang, sila nalibog ug nagapadayon sa pagsultig pasipala bahin kaninyo. Apan kining mga tawhana mohatag ug husay sa usa nga andam mohukom sa mga buhi ug sa mga patay.”—1 Pedro 4:3-5.
17, 18. (a) Unsang kusganong punto ang gihimo ni Pedro mahitungod niadtong nagabatasan sa sala? (b) Unsay gikinahanglan sa pagsukol sa mga kadaot sa sala?
18 Si Pedro dinhi mipahayag sa kusganong punto—kadtong dili manumbaling sa kabubut-on sa Diyos pagapanilngon. (Itandi ang Roma 14:12 ug Hebreohanon 13:17.) Si Pablo nahidangat sa susamang paghinapos sa iyang sulat ngadto sa mga taga-Colosas, diin siya misulat: “Busa, patya ninyo ang inyong mga sangkap sa lawas nga anaa sa yuta kon mahitungod sa pakighilawas, kahugawan, gana sa sekso, makadaot nga tinguha, ug pagkaibog, nga maoy pagsimbag diyosdiyos. Tungod niining mga butanga ang kapungot sa Diyos umaabot.” Ang tanang nagabuhat nianang mga butanga tinong wala magkinabuhi alang sa kabubut-on sa Diyos apan, hinunoa, alang sa pagtagbaw sa kaugalingon nilang mahakogong mga agda. Bisan pa niana ang katawhan makabulag nianang moral nga kadaotan, kay, sumala sa ginaingon ni Pablo, “Nianang mga butanga mismo kamo, usab, kaniadto nagbuhat dihang kamo nagkinabuhi niana kanila.”—Colosas 3:5-7; Efeso 4:19; tan-awa usab ang 1 Corinto 6:9-11.
Pagsabot Kon Unsa ang Kabubut-on sa Diyos
19. Sa unsang paagi ang daghan karon nagapakitang sila nagakinabuhi alang sa kabubut-on ni Jehova? (Roma 12:1, 2)
19 Niining kataposang mga tuig sa ika-20ng siglo, kapin sa tulo ka milyong katawhan ang nakasabot kon unsa ang kabubut-on sa Diyos alang kanila. Ingong sangpotanan sila madasigong nagasangyaw sa maayong balita sa Ginghariang kagamhanan sa Diyos. (Buhat 8:12; Marcos 13:10) Sila wala magkinabuhi lamang alang sa ilang kaugalingon, sama sa ginabuhat sa kinabag-ang uban. Sila nasayod nga duol nang taposon sa Diyos kining daotang sistema, ug sila nagahimog mga sakripisyo sa pagtabang sa uban sa pagbaton niining tukmang kahibalo, sama sa gitambag ni apostol Pablo: “Bantayi ninyo pag-ayo nga ang inyong linaktan dili sama sa mga dili maalamon kondili sama sa mga tawong maalamon, nga nagapalit sa higayon sa inyong kaugalingon, tungod kay daotan ang mga adlaw. Tungod niini hunong na kamo sa pagkahimong dili makataronganon, kondili magpadayon sa pagsabot kon unsa ang kabubut-on ni Jehova.”—Efeso 5:15-17.
20, 21. (a) Unsaon nato pag-isip ang gasa sa kinabuhi? (Santiago 4:13-17) (b) Sa unsang paagi kita makalikay nga mahiuyon sa kalibotan?
20 Ang kinabuhi samag usa ka baso sa bugnaw, preskong tubig. Sa unang mga dekada sa kinabuhi sa usa ka tawo, siya “moinom” ug daghan ug dinalidali—hangtod siya mosugod pagkahibulong kon pila na lang ka tuig ang nahibilin sa “baso.” Kana ang tanghaga nga nakalibog sa tanan. Nan, pagkahinungdanon ang pagkinabuhi uban ang salabotan sa pagkamay-tulubagon ngadto sa Diyos ug sa isigkatawo! Pagkabililhon ang pagtagad sa kabubut-on sa Diyos ug dili lamang sa kaugalingong mahakogong kabubut-on!—Mateo 7:21, 24, 26.
21 Ugaling, kay kita nagakinabuhi sa kalibotang gigamhan sa espiritu ni Satanas, dili kanunay sayon ang pagkinabuhi alang sa kabubut-on sa Diyos. (Pinadayag 12:9) Sa tanang panahon anaa ang mga pagpit-os aron umolon kita nga mahiuyon sa kabubut-on ug tinamdan sa hunahuna sa kalibotan. Ang mga urog sa sinina ug mga gikabuangan makapaimpluwensiya pa sa pipila sa kongregasyon, mao nga sila daw samag mga hitsura sa bantog nga maglilingaw. Nan, pagkatukma ang tambag ni Pablo: “Hunong na kamo sa pagpahiuyon niining sistema sa mga butang, apan magbag-o kamo pinaagi sa pagbag-o sa inyong hunahuna, aron inyong mapamatud-an sa inyong kaugalingon ang maayo ug dalawaton ug hingpit nga kabubut-on sa Diyos”!—Roma 12:2.
22. (a) Unsa ba ang kabubut-on sa Diyos alang sa atong panahon? (b) Sa unsang paagi kita makapakita nga kita nagakinabuhi alang sa kabubut-on sa Diyos? (c) Unsang panalangin ang nagapaabot niadtong nagakinabuhi alang sa kabubut-on sa Diyos?
22 Ang kabubut-on sa Diyos mao nga “kining maayong balita sa Gingharian” igasangyaw sa tibuok kalibotan una pa niya laglagon ang kahikayan sa kalibotan karon. (Mateo 24:14; Pinadayag 14:6, 7) Kini nagahatag ug labaw nga katarongan sa pagsanong sa panawag alang sa dugang bug-os-panahong mga ministro kon itugot kana sa inyong mga kahimtang. Kini katarongan, usab, nga ang mga ansiano ug ministeryal nga mga alagad motanyag sa ilang kaugalingon sa pagbalhin ngadto sa mga kongregasyon diin tingali gikinahanglan ang ilang tabang. Ug kini labaw nga katarongan nga ang matag Saksi mahimong tinuod Kristohanong saksi—dili lamang nagadala sa ngalan kondili aktuwal nagakinabuhi alang sa kabubut-on sa Diyos karon ug sa walay kataposan. Hibaloi nga pinaagi sa pagbuhat niana ‘inyong ginapabilhan sa kaluwas alang sa inyong kaugalingon ang maayong patukoranan alang sa umaabot, aron inyong makuptan nga malig-on ang tinuod nga kinabuhi.’—1 Timoteo 6:19.
Unsay Imong Tubag?
◻ Giunsa ni Jesus pagpakita nga siya nagkinabuhi alang sa kabubut-on sa Diyos?
◻ Unsang mga kaayohan ang mabatonan niadtong nagakinabuhi alang sa kabubut-on sa Diyos?
◻ Unsa ba ang panghunahuna ni Kristo bahin sa kabubut-on sa Diyos?
◻ Sa unsang paagi ang ‘gahom nga magapalihok sa hunahuna’ magaapektar kanato?
◻ Unsaon nato pag-isip ang kinabuhi?
3. Unsang tambag ang gihatag ni Pedro mahitungod sa atong panghunahuna?
[Hulagway sa panid 21]
Tungod ba sa pagpabili sa balaod nga ikaw mosugot, o tungod lamang kay anaay polis?