Batoni ang Maayong Panghunahuna Samtang ang Kataposan Haduol Na
1 Ang Pulong sa Diyos sublisubling naghubit sa adlaw ni Jehova nga moabot “sama sa kawatan”—nga mao, sa kalit, dihadiha, ug sa hilom nga paagi. (1 Tes. 5:2; Mat. 24:43; 2 Ped. 3:10; Pin. 3:3; 16:15) “Tungod niini,” matod ni Jesus, “pamatud-i usab ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.” (Mat. 24:44) Sa unsang paagi mahuptan nato ang atong pagkaandam sa espirituwal samtang ang kataposan haduol na? Ang usa ka paagi nga mahimo kini makaplagan diha sa inspiradong tambag: “Batoni ang maayong panghunahuna.”—1 Ped. 4:7.
2 Ang maayong panghunahuna naglangkit sa paglantaw sa mga butang sumala sa panglantaw ni Jehova. (Efe. 5:17) Kini motabang kanato sa pag-isip sa atong kaugalingon ingong “mga langyaw ug temporaryong mga pumoluyo” taliwala sa presenteng sistema sa mga butang. (1 Ped. 2:11) Kini makapaarang kanato sa pagsabot kon unsa gayoy hinungdanon, paghikay sa mga unahonon, ug paghimog maayong mga desisyon.—Filip. 1:10.
3 Paghikay ug Espirituwal nga mga Tumong: Ang paghikay ug pagkab-ot sa espirituwal nga mga tumong motabang kanato sa pagbaton ug maayong panghunahuna. Aduna ka bay espirituwal nga mga tumong nga gipangab-ot nimo karon? Gipaningkamotan mo ba ang pagbasa sa Bibliya kada adlaw, pagtambong sa tanang Kristohanong mga tigom, pagbasa sa matag gula sa Ang Bantayanang Torre ug Pagmata!, o tingali pagpauswag sa imong pagpakig-ambit diha sa ministeryo? Kon maghikay kag mga tumong nga haom kanimo, padayona gayod ang pagkab-ot niana, ug hangyoa si Jehova nga panalanginan ang imong mga panikaysikay, lagmit mahingangha ka sa mga resulta.
4 Gipangutana sa usa ka ansiyano ang batan-ong magtiayon bahin sa ilang espirituwal nga mga tumong. Ang maong pangutana nakapahunahuna kanila nga kon ilang payanohon ang ilang kinabuhi ug isalindot ang nakapabug-at nga utang, mahimo silang magpayunir. Nakahukom sila sa paghimo niana nga ilang tumong. Makugihon nilang gibayran ang utang ug nakakaplag ug mga paagi sa pagpamenos sa wala-kinahanglanang mga kalihokan nga nagahurot sa ilang panahon ug kusog. Eksaktong usa ka tuig sa ulahi, nakab-ot nila ang ilang tumong. Uban sa unsang resulta? Ang bana nag-ingon: “Kon wala pay mga tumong, wala unta kami sa among nahimutangan karon. Kami mas malipayon. Mas malinawon ug mas maayo ang among kinabuhi. Aduna kiniy tinuod nga kahulogan ug katuyoan.”
5 Samtang nagapaabot kita sa adlaw ni Jehova, hinaot huptan nato kanunay ang atong espirituwal nga pagkaandam pinaagi sa pagkinabuhi nga may maayong panghunahuna, nga nakapunting kanunay sa pagbuhat sa kabubut-on sa Diyos.—Tito 2:11-13.