Mahigugmaong Pagbantay sa Panon sa Diyos
“Magpastol kamo sa panon sa Diyos nga anaa sa inyong pag-atiman.”—1 PEDRO 5:2.
1, 2. Unsa ang nagalabaw nga hiyas ni Jehova, ug sa unsang paagi kini gipadayag?
SA TIBUOK Balaang Kasulatan, tataw nga ang gugma maoy nagalabaw nga hiyas sa Diyos. “Ang Diyos gugma,” nagaingon ang 1 Juan 4:8. Sanglit ang iyang gugma gipahayag sa buhat, ang 1 Pedro 5:7 nag-ingon nga ang Diyos “may kahangawa kaninyo.” Sa Bibliya ang paagi ni Jehova sa pag-atiman sa iyang katawhan gipakasama sa malumong pag-atiman sa usa ka mahigugmaong magbalantay sa iyang mga karnero: “Tan-awa! Ang Soberanong Ginoong Jehova mismo . . . magabantay sa iyang kaugalingong panon. Pinaagi sa iyang mga bukton iyang tigomon ang mga nating karnero; ug kugoson niya kini diha sa iyang dughan. Kadtong nagapatutoy iyang agakon uban ang kahangawa.” (Isaias 40:10, 11) Nahupayan gayod si David nga siya nakaingon: “Si Jehova mao ang akong Magbalantay. Walay makulang kanako”!—Salmo 23:1.
2 Haom nga ipanag-ing sa Bibliya ang katawhan nga inuyonan sa Diyos sa mga karnero, kay ang mga karnero makigdaiton, mapinasakopon, masinugtanon sa ilang mahangawaong magbalantay. Ingong mahigugmaong Magbalantay, si Jehova dulot nga nahangawa sa iyang karnerohong katawhan. Gipakita niya kini pinaagi sa pagtagana sa ilang materyal ug espirituwal nga panginahanglan ug pinaagi sa paggiya kanila latas sa malisod nga “ulahing mga adlaw” niining daotang kalibotan ngadto sa iyang umaabot nga matarong bag-ong kalibotan.—2 Timoteo 3:1-5, 13; Mateo 6:31-34; 10:28-31; 2 Pedro 3:13.
3. Giunsa paghubit sa salmista ang paagi sa pag-atiman ni Jehova sa iyang mga karnero?
3 Matikdi ang mahigugmaong pag-atiman ni Jehova sa iyang mga karnero: “Ang mga mata ni Jehova anaa sa ibabaw sa mga matarong, ug ang iyang mga igdulungog gikiling sa ilang pagpangayog tabang. . . . Sila nanagtuaw, ug si Jehova mismo nagpatalinghog, ug gikan sa tanan nilang kalisdanan iyang giluwas sila. Si Jehova haduol niadtong mga dugmok ug kasingkasing; ug kadtong naluya sa espiritu iyang ginaluwas. Daghan ang kaalaotan sa usa ka matarong, apan gikan nianang tanan giluwas siya ni Jehova.” (Salmo 34:15-19) Pagkadakong kahupayan ang gitagana sa Unibersohanong Magbalantay alang sa iyang karnerohong katawhan!
Ang Panig-ingnan sa Maayong Magbalantay
4. Unsay papel ni Jesus diha sa pag-atiman sa panon sa Diyos?
4 Ang Anak sa Diyos, si Jesus, nakakat-on ug maayo gikan sa iyang Amahan, kay ang Bibliya nagtawag kang Jesus nga “ang maayong pastol.” (Juan 10:11-16) Ang iyang hinungdanong pagtagad sa panon sa Diyos gipahayag sa Pinadayag kapitulo 7. Sa Pin 7 bersikulo 9, ang mga alagad sa Diyos sa atong adlaw gitawag ug “dakong panon . . . gikan sa tanang kanasoran ug mga tribo ug katawhan ug mga dila.” Dayon ang Pin 7 bersikulo 17 nag-ingon: “Ang Kordero [Jesus] . . . magapastol kanila, ug magagiya kanila ngadto sa mga tuboran sa mga tubig sa kinabuhi. Ug ang Diyos magapahid sa matag luha gikan sa ilang mga mata.” Nagagiya si Jesus sa mga karnero sa Diyos ngadto sa mga tubig sa kamatuoran nga motultol ngadto sa kinabuhing walay kataposan. (Juan 17:3) Matikdi nga si Jesus gitawag “ang Kordero,” nga nagpaila sa iyang karnerohong mga hiyas, ingon nga siya ang pangunang panig-ingnan sa pagpasakop sa Diyos.
5. Unsay pagbati ni Jesus sa mga tawo?
5 Sa yuta si Jesus nagkinabuhi taliwala sa mga tawo ug nakakita sa ilang makaluluoyng kahimtang. Unsay iyang reaksiyon sa ilang kahimtang? “Mibati siya ug kaluoy kanila, tungod kay sila pinanitan ug natibulaag samag mga karnero nga walay pastol.” (Mateo 9:36) Ang mga karnero nga walay magbalantay mag-antos sa hilabihan gikan sa mga manunukob, ingon nga magaantos usab ang mga karnero nga adunay mga magbalantay nga walay kahangawa. Apan si Jesus nahangawa gayod, kay siya miingon: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.”—Mateo 11:28-30.
6. Unsang konsiderasyon ang gipakita ni Jesus alang sa mga naluya?
6 Ang Bibliya nagtagna nga si Jesus mahigugmaong makiglabot sa mga tawo: “Gidihogan ako ni Jehova . . . aron ipasig-uli ang mga dugmok ug kasingkasing, . . . aron hupayon ang tanang nagbangotan.” (Isaias 61:1, 2; Lucas 4:17-21) Wala gayod pakamenosa ni Jesus ang kabos ug alaot. Hinunoa, iyang gituman ang Isaias 42:3: “Walay nagupok nga tangbo nga iyang balion; ug walay nag-awop nga pabilong lino nga iyang palongon.” (Itandi ang Mateo 12:17-21.) Ang mga naalaot maoy susama sa nagupok nga mga tangbo, susama sa mga pabilo sa suga nga nagkaawop tungod kay wala nay tubil. Nakakita sa ilang makaluluoyng kahimtang, gipakitaan sila ni Jesus ug kaluoy ug gihatagan sila ug kusog ug paglaom, nga nag-ayo kanila sa espirituwal ug sa pisikal.—Mateo 4:23.
7. Diin gidala ni Jesus ang pagtagad sa mga tawo nga misanong kaniya?
7 Ang karnerohong mga tawo panonpanon nga misanong kang Jesus. Madanihon kaayo ang iyang pagpanudlo nga ang mga opisyal nga gisugo sa pagdakop kaniya nagtaho: “Wala pa gayoy laing tawo nga nakapamulong ug sama niini.” (Juan 7:46) Tuod man, ang salingkapaw relihiyosong mga pangulo mireklamo: “Ang kalibotan nagasunod na kaniya”! (Juan 12:19) Apan si Jesus wala mag-apas ug pasidungog ug himaya alang sa iyang kaugalingon. Iyang gidala ang pagtagad sa mga tawo ngadto sa iyang Amahan. Gitudloan niya sila nga moalagad kang Jehova nga gipalihok sa gugma sa Iyang dalayegong mga hiyas: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kusog ug sa tibuok mong kaisipan.”—Lucas 10:27, 28.
8. Sa unsang paagi ang pagsugot nga gihatag sa katawhan sa Diyos ngadto kaniya lahi sa pagsugot sa uban ngadto sa kalibotanong mga pangulo?
8 Si Jehova nalipay nga ang iyang unibersohanong soberanya gipaluyohan sa iyang karnerohong katawhan, pinasikad sa ilang gugma kaniya. Kinabubut-on silang mipili sa pag-alagad kaniya tungod sa ilang kahibalo bahin sa iyang hiligugmaong mga hiyas. Pagkalahi niini gikan sa mga pangulo niining kalibotana kansang mga sakop nagsugot lamang kanila tungod sa kahadlok, o nga nagbagulbol, o tungod kay aduna silay pila ka nagpahiping motibo! Dili gayod ikasulti bahin kang Jehova o kang Jesus ang giingon bahin sa usa ka papa sa Romano Katolikong Simbahan: “Gidayeg siya sa kadaghanan, gikahadlokan sa tanan, walay usa ang nahigugma.”—Vicars of Christ—The Dark Side of the Papacy, sinulat ni Peter De Rosa.
Pintas nga mga Magbalantay sa Israel
9, 10. Ihubit ang mga pangulo sa karaang Israel ug sa unang siglo.
9 Dili sama kang Jesus, ang relihiyosong mga pangulo sa Israel sa iyang adlaw walay gugma sa mga karnero. Sama sila sa mas unang mga magmamando sa Israel kang kinsa si Jehova miingon: “Alaot ang mga magbalantay sa Israel, nga nagpasibsib hinuon sa ilang kaugalingon! Dili ba nga ang panon mao ang angay pasibsibon sa mga magbalantay? . . . Ang mga masakiton wala ninyo palig-ona, ug ang may balatian wala ninyo tambali, ug ang nabalian wala ninyo bendahii, ug ang natibulaag wala ninyo pabalika, ug ang nawala wala ninyo pangitaa, apan uban sa kabangis inyo silang giharian, gani inyo pang gidaogdaog.”—Ezekiel 34:2-4.
10 Sama niadtong politikal nga mga magbalantay, ang Hudiyong relihiyosong mga pangulo sa unang siglo mga gahig-kasingkasing. (Lucas 11:47-52) Sa pag-ilustrar niini, si Jesus misugilon bahin sa usa ka Hudiyo nga gitulis, gibunalan, ug gibiyaan nga hapit mamatay sa daplin sa karsada. Milabay ang usa ka Israelinhong saserdote, apan sa pagkakita sa Hudiyo, miagi siya sa pikas nga dalan. Mao usab ang gihimo sa usa ka Levihanon. Dayon usa ka dili-Israelinhon, usa ka tinamay nga Samaritanhon, ang milabay ug naluoy sa biktima. Iyang gibugkosan ang iyang mga samad, gikarga sa usa ka hayop ug gidala sa usa ka sak-anan, ug giatiman siya. Iyang gibayran ang tigbantay sa sak-anan ug miingon nga mobalik siya aron bayaran ang bisan unsang dugang galastohan.—Lucas 10:30-37.
11, 12. (a) Sa unsang paagi ang pagkadaotan sa relihiyosong mga pangulo nakaabot sa kinatayoktokan sa adlaw ni Jesus? (b) Sa kataposan unsay gihimo sa mga Romano ngadto sa relihiyosong mga pangulo?
11 Dunot kaayo ang relihiyosong mga pangulo sa mga adlaw ni Jesus nga sa dihang gibanhaw ni Jesus si Lazaro gikan sa mga patay, gitigom sa pangulong mga saserdote ug sa mga Pariseo ang Sanhedrin ug miingon: “Unsay atong buhaton, tungod kay kining tawhana [si Jesus] nagabuhat ug daghang ilhanan? Kon pasagdan lang nato siya niining paagiha, silang tanan magabutang ug pagtuo kaniya, ug ang mga Romano manganhi ug kuhaon ang atong dapit ug ang atong nasod.” (Juan 11:47, 48) Dili sila interesado sa maayo nga nahimo ni Jesus alang sa patay nga lalaki. Interesado sila sa ilang mga posisyon. Busa “sukad niadtong adlawa sila nagsabot sa pagpatay [kang Jesus].”—Juan 11:53.
12 Sa pagpasamot sa ilang pagkadaotan, ang pangulong mga saserdote “nagsabot nga patyon usab si Lazaro, tungod kay gumikan kaniya daghan sa mga Judio ang nangadto ug nagbutang ug pagtuo kang Jesus.” (Juan 12:10, 11) Ang mahakogon nilang mga paningkamot aron panalipdan ang ilang mga posisyon nakawang, kay giingnan sila ni Jesus: “Ang inyong balay gibiyaan nganha kaninyo.” (Mateo 23:38) Ingong katumanan niadtong mga pulonga, nianang maong kaliwatan miabot ang mga Romano ug miilog sa ‘ilang dapit ug sa ilang nasod,’ ug maingon man sa ilang mga kinabuhi.
Mahigugmaong mga Magbalantay Diha sa Kristohanong Kongregasyon
13. Kinsa ang gisaad ni Jehova nga ipadala sa pagbantay sa iyang panon?
13 Inay sa pintas, hakog nga mga magbalantay, si Jehova magabangon ug Maayong Magbalantay, si Jesus, aron moatiman sa Iyang panon. Misaad usab siya nga magbangon ug mahigugmaong luyoluyong mga magbalantay aron moatiman sa mga karnero: “Ako magbutang ug mga magbalantay sa ibabaw nila nga magapakaon kanila; ug sila dili na mahadlok pag-usab.” (Jeremias 23:4) Mao nga, sama sa gihimo niadto sa unang-siglong Kristohanong mga kongregasyon mao usab karon, ‘ang mga ansiano gitudlo diha sa siyudad ngadto sa laing siyudad.’ (Tito 1:5) Kining hamtong sa espirituwal nga mga lalaki nga nakakab-ot sa mga kuwalipikasyon nga gipahayag sa Kasulatan mahimong ‘mga pastol sa panon sa Diyos.’—1 Pedro 5:2; 1 Timoteo 3:1-7; Tito 1:7-9.
14, 15. (a) Unsang tinamdan nga nalisdan ang mga tinun-an sa pag-ugmad? (b) Unsay gihimo ni Jesus aron ipakita kanila nga ang mga ansiano kinahanglang mahimong mapaubsanong mga alagad?
14 Sa pag-atiman sa mga karnero, ang mga ansiano kinahanglang “labaw sa tanang butang” magbaton ug “mainit nga gugma” alang kanila. (1 Pedro 4:8) Apan ang mga tinun-an ni Jesus, kay interesado kaayo sa dungog ug posisyon, kinahanglan pang makakat-on niini. Busa sa dihang ang inahan sa duha ka tinun-an miingon kang Jesus: “Ipamulong nga kining akong duha ka anak unta molingkod, usa sa imong tuong kamot ug usa sa imong wala, sa imong gingharian,” naglagot ang ubang mga tinun-an. Si Jesus miingon kanila: “Ang mga magmamando sa kanasoran nagahinawod ibabaw kanila ug ang bantogang mga tawo nagagamit ug awtoridad ibabaw kanila. Dili ingon niini taliwala kaninyo; kundili si bisan kinsang buot mahimong dako taliwala kaninyo kinahanglan nga mainyong alagad, ug si bisan kinsang buot mahimong una taliwala kaninyo kinahanglan nga mainyong ulipon.”—Mateo 20:20-28.
15 Sa laing okasyon, human “nag-ergohay ang mga tinun-an nga taliwala sa ilang kaugalingon kon kinsa ang labaw,” si Jesus miingon kanila: “Kon adunay buot nga mauna, kinahanglan siyang maulahi sa tanan ug mag-alagad sa tanan.” (Marcos 9:34, 35) Ang mapaubsanong hunahuna ug ang kaandam nga moalagad kinahanglang mahimong bahin sa ilang personalidad. Apan ang mga tinun-an nalisdan gihapon sa maong mga ideya, kay sa gabii mismo una sa kamatayon ni Jesus, sa iyang kataposang panihapon, usa ka “init nga panaglalis” ang nahitabo taliwala kanila kon kinsay kinalabwan! Kana nahitabo bisan pa gipakita na ni Jesus kanila kon sa unsang paagi ang ansiano mag-alagad sa panon; nagpaubos siya sa iyang kaugalingon ug gihugasan ang ilang mga tiil. Siya miingon: “Kon ako, bisan tuod Ginoo ug Magtutudlo, mihugas sa inyong mga tiil, kamo usab angay nga maghinugasay sa tiil sa usag usa. Kay ako nagtagana sa sumbanan alang kaninyo, nga, ingon sa akong gibuhat kaninyo, kamo angay usab nga mobuhat.”—Lucas 22:24; Juan 13:14, 15.
16. Niadtong 1899, unsang mga komento ang gihimo sa Watch Tower bahin sa labing hinungdanong hiyas sa mga ansiano?
16 Ang mga Saksi ni Jehova kanunay nga nagatudlo nga ang mga ansiano kinahanglang mahisama niini. Hapit usa ka siglo kanhi, gihatagag pagtagad sa Abril 1, 1899, nga Watch Tower ang mga pulong ni Pablo sa 1 Corinto 13:1-8 ug dayon miingon: “Gipaila ug tin-aw sa Apostol nga ang kahibalo ug maayong pagkamamumulong dili mao ang labing hinungdanong mga pagsulay, kondili ang gugma nga nagadulot sa kasingkasing ug nagapabilin sa bug-os nga dalan sa kinabuhi, ug nagatukmod ug nagapalihok sa atong mamatay nga mga lawas, mao ang tinuod nga pagsulay—ang tinuod nga pamatuod sa atong relasyon sa Diyos. . . . Ang pangunang hiyas nga pangitaon sa matag usa nga gidawat ingong alagad sa iglesya, sa pag-alagad sa balaang mga butang, kinahanglang una sa tanan mao ang espiritu sa gugma.” Kini miingon nga ang mga lalaki kinsa dili moalagad nga mapainubsanon tungod sa gugma “maoy peligrosong mga magtutudlo, ug malagmit mohatag ug kadaot kay sa kaayohan.”—1 Corinto 8:1.
17. Giunsa pagpasiugda sa Bibliya ang mga hiyas nga kinahanglang huptan sa mga ansiano?
17 Mao nga, ang gulang nga mga lalaki kinahanglang ‘dili maghinawod’ ibabaw sa mga karnero. (1 Pedro 5:3) Hinunoa, kinahanglang manguna sila sa pagkahimong ‘maluloton ngadto sa usag usa, mabination uban ang kalumo.’ (Efeso 4:32) Gipasiugda ni Pablo: “Isul-ob sa inyong kaugalingon ang malumong mga pagmahal sa pagkamabination, kalulot, pagkamapaubsanon sa hunahuna, kalumo, ug hataas-nga-pailob. . . . Apan, gawas pa niining tanang butanga, isul-ob sa inyong kaugalingon ang gugma, kay kini usa ka hingpit nga bugkos sa panaghiusa.”—Colosas 3:12-14.
18. (a) Unsang maayong panig-ingnan ang gihatag ni Pablo diha sa pagpakiglabot sa mga karnero? (b) Nganong dili angay pasagdan sa mga ansiano ang mga panginahanglan sa mga karnero?
18 Si Pablo nakakat-on sa paghimo niini, nga nag-ingon: “Kami nagmalumo taliwala kaninyo, sama sa usa ka nagapasusong inahan nga nagapangga sa iyang kaugalingong mga anak. Busa, kay may malumong pagmahal kaninyo, kami nahimuot pag-ayo nga ipaambit kaninyo, dili lamang ang maayong balita sa Diyos, apan usab ang among kaugalingong mga kalag, tungod kay kamo nahimo mang hinigugma alang kanamo.” (1 Tesalonica 2:7, 8) Uyon niana, siya nag-ingon: “Pamulong nga mahupayon sa magul-anong mga kalag, buligi ang mga maluya, magmataas-ug-pailob sa tanan.” (1 Tesalonica 5:14) Bisan unsa pang matang sa suliran ang dad-on kanila sa mga karnero, angay nga hinumdoman sa mga ansiano ang Proverbio 21:13: “Bisan kinsa nga magasampong sa iyang mga igdulungog sa pagtuaw sa kabos, siya usab magatuaw ug dili pagapatalinghogan.”
19. Nganong ang mahigugmaong mga ansiano usa ka panalangin, ug sa unsang paagi ang mga karnero nagasanong sa maong gugma?
19 Ang gulang nga mga lalaki nga mahigugmaong nagabantay sa panon maoy usa ka panalangin sa mga karnero. Ang Isaias 32:2 nagtagna: “Ang matag usa mahimong ingon sa usa ka tagoanan batok sa hangin, ug usa ka tabon batok sa bagyo, ingon sa mga sapa sa tubig sa usa ka dapit nga mamala, ingon sa usa ka landong sa usa ka dako nga bato didto sa usa ka umaw nga yuta.” Kita nalipay sa pagkahibalo nga daghan sa atong mga ansiano karon nagalihok nga uyon nianang matahom nga kahubitan sa pagpalagsik. Nakakat-on sila sa pagpadapat sa mosunod nga prinsipyo: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Sa dihang ipakita sa mga ansiano kining matanga sa gugma ug pagkamapaubsanon, ang mga karnero mosanong pinaagi sa paghatag kanila ug “labi pa kay sa labaw-ordinaryo nga pagtagad diha sa gugma tungod sa ilang buhat.”—1 Tesalonica 5:12, 13.
Tahora ang Paggamit sa Kagawasan sa Pagpili
20. Nganong angay tahoron sa mga ansiano ang kagawasan sa pagpili?
20 Gilalang ni Jehova ang mga tawo nga may kagawasan sa pagpili aron sa paghimo sa ilang kaugalingong mga desisyon. Bisan pag ang mga ansiano kinahanglang magtambag ug gani magpahamtang ug disiplina, dili nila angay but-an ang kinabuhi o pagtuo sa uban. Si Pablo miingon: “Dili nga kami mao ang mga agalon sa inyong pagtuo, kundili kami mga isigkamagbubuhat alang sa inyong kangaya, kay maoy pinaagi sa inyong pagtuo nga kamo nagabarog.” (2 Corinto 1:24) Oo, “ang matag usa magapas-an sa iyang kaugalingong luwan.” (Galacia 6:5) Gihatagan kita ni Jehova ug dakong kagawasan sulod sa mga utlanan sa iyang mga balaod ug mga prinsipyo. Mao nga ang mga ansiano kinahanglang maglikay sa paghimog mga lagda kon walay nalapas nga Kasulatanhong mga prinsipyo. Ug kinahanglang ilang suklan ang bisan unsang kiling sa paghatag sa ilang kaugalingong personal nga mga opinyon nga daw doktrina o tugotan ang ilang garbo nga mangibabaw kon adunay mosupak sa maong mga hunahuna.—2 Corinto 3:17; 1 Pedro 2:16.
21. Unsay makat-onan gikan sa tinamdan ni Pablo kang Filemon?
21 Matikdi kon giunsa ni Pablo, samtang nabilanggo sa Roma, pagdumala kang Filemon, usa ka Kristohanong tag-iyag ulipon sa Colosas sa Asia Minor. Ang ulipon ni Filemon nga ginganlag Onesimus mikalagiw ngadto sa Roma, nahimong Kristohanon, ug nagtabang kang Pablo. Si Pablo misulat kang Filemon: “Buot ko unta siyang hawiran alang sa akong kaugalingon aron nga puli kanimo siya makapadayon sa pag-alagad kanako diha sa mga gapos sa prisohan nga akong giagwanta tungod ug alang sa maayong balita. Apan dili ko buot mobuhat ug bisan unsa nga wala kay pag-uyon, aron nga ang imong maayong buhat mahimo nga, dili ilalom sa pagpugos, kundili maoy sa imong gawasnong pagbuot.” (Filemon 13, 14) Giuli ni Pablo si Onesimus, nga mihangyo kang Filemon sa pagtratar kaniya ingong usa ka Kristohanong igsoon. Si Pablo nasayod nga ang panon dili iya; kini iya sa Diyos. Dili siya ang agalon niini kondili ang alagad niini. Si Pablo wala magdiktar kang Filemon; iyang gitahod ang iyang kagawasan sa pagpili.
22. (a) Unsay angayng masabtan sa mga ansiano bahin sa ilang posisyon? (b) Unsang matanga sa organisasyon ang ginaugmad ni Jehova?
22 Samtang nagatubo ang organisasyon sa Diyos, dugang mga ansiano ang ginatudlo. Sila, ingon man sa mas eksperyensiyadong mga ansiano, kinahanglang makasabot nga ang ilang posisyon maoy usa ka ubos nga pag-alagad. Niining paagiha, samtang ginadala sa Diyos ang iyang organisasyon ngadto sa bag-ong kalibotan, kini magpadayon sa pagtubo sumala sa iyang gusto—nga organisado kaayo apan wala isakripisyo ang gugma ug pagbati alang sa pagkaepisyente. Mao nga, ang iyang organisasyon mahimong labi pang madanihon ngadto sa mga karnerohon nga makakita diha niana sa ebidensiya nga “ang Diyos nagahimo sa tanan niyang mga buhat nga magtambayayongay alang sa ikaayo niadtong mga nahigugma sa Diyos.” Angay kana nga damhon gikan sa usa ka organisasyon nga natukod ibabaw sa gugma, tungod kay “ang gugma dili gayod mapakyas.”—Roma 8:28; 1 Corinto 13:8.
Unsaon Nimo Pagtubag?
◻ Giunsa pagbatbat sa Bibliya ang kahangawa ni Jehova alang sa iyang katawhan?
◻ Unsang papel ang gidula ni Jesus diha sa pag-atiman sa panon sa Diyos?
◻ Unsang pangunang hiyas ang kinahanglang mabatonan sa mga ansiano?
◻ Nganong kinahanglang konsiderahon sa mga ansiano ang kagawasan sa pagpili sa mga karnero?
[Hulagway sa panid 16]
Si Jesus, ang “maayong pastol,” nagpakitag kaluoy
[Hulagway sa panid 17]
Ang dunot relihiyosong mga pangulo nagsabot sa pagpatay kang Jesus