Gugma ug Hustisya Diha sa Kongregasyon (Bahin 2)

 1. Makaseguro ta sa unsang duha ka butang?

SI Jehova nga Diyos kanunayng nahigugma sa iyang mga magsisimba. Gihigugma sab niya ang hustisya. (Sal. 33:5) Busa makaseguro ta niining duha ka butang: (1) Masakitan si Jehova dihang ang iyang mga alagad makasinatig dili patas nga pagtratar. (2) Seguroon niya nga matapos ang maong inhustisya. Sa unang artikulo niini nga serye,b atong nakat-onan nga ang Balaod nga gihatag sa Diyos sa Israel pinaagi kang Moises gibase sa gugma. Kini nag-awhag sa iyang katawhan nga magpakitag hustisya sa tanan, bisan niadtong dili makapanalipod sa kaugalingon. (Deut. 10:18) Gipakita sa maong Balaod kon unsa ka dako ang gugma ni Jehova sa iyang mga magsisimba.

 2. Unsang mga pangutana ang atong tubagon?

² Ang Balaod ni Moises natapos niadtong 33 C.E. dihang natukod ang Kristohanong kongregasyon. Nagpasabot ba kana nga ang mga Kristohanon wala nay balaod nga gibase sa gugma ug nagpasiugda sa hustisya? Wala! Ang mga Kristohanon may bag-ong balaod. Niining artikuloha, ato unang hisgotan kon unsa kanang balaora. Dayon tubagon nato kining mga pangutanaha: Nganong makaingon ta nga kining balaora gibase sa gugma? Nganong makaingon ta nga kini nagpasiugda sa hustisya? Ubos niining balaora, unsaon pagtratar niadtong may awtoridad ang uban?

 3. Unsay apil sa “balaod sa Kristo” nga gihisgotan sa Galacia 6:2?

³ Basaha ang Galacia 6:2. Ang mga Kristohanon nailalom sa “balaod sa Kristo.” Si Jesus wala maglista ug mga balaod alang sa iyang mga sumusunod, pero gihatagan niya silag mga instruksiyon, sugo, ug prinsipyo nga mogiya nila. Ang “balaod sa Kristo” nag-apil sa tanang gitudlo ni Jesus. Aron mas masabtan kining balaora, tagda ang mosunod.

4-5. Sa unsang mga paagi nanudlo si Jesus, ug kanus-a nâ niya gihimo?

⁴ Sa unsang mga paagi nanudlo si Jesus? Una, nanudlo siya pinaagi sa iyang gisulti. Puwersado ang iyang mga pulong kay kini naghisgot sa kamatuoran bahin sa Diyos, nagtudlo sa tinuod nga katuyoan sa kinabuhi, ug nagpasiugda sa Gingharian ingong solusyon sa tanang pag-antos sa tawo. (Luc. 24:19) Nagtudlo sab si Jesus pinaagig ehemplo. Sa iyang pagkinabuhi, gipakita niya sa iyang mga sumusunod kon sa unsang paagi sila angayng magkinabuhi.​—Juan 13:15.

⁵ Kanus-a nanudlo si Jesus? Nanudlo siya panahon sa iyang ministeryo sa yuta. (Mat. 4:23) Gibuhat sab niya kana wala madugay human siya mabanhaw. Pananglitan, nagpakita siya sa usa ka grupo sa mga tinun-an​—tingali kapig 500 ang gidaghanon—​ug gisugo sila sa ‘paghimog mga tinun-an.’ (Mat. 28:19, 20; 1 Cor. 15:6) Ingong ulo sa kongregasyon, si Jesus padayong naghatag ug instruksiyon sa iyang mga tinun-an dihang mibalik siya sa langit. Pananglitan, sa mga 96 C.E., gisugo sa Kristo si apostol Juan sa pagdasig ug pagtambag sa dinihogang mga Kristohanon.​—Col. 1:18; Pin. 1:1.

6-7. (a) Asa narekord ang mga gitudlo ni Jesus? (b) Sa unsang paagi gisunod nato ang balaod sa Kristo?

⁶ Asa narekord ang mga gitudlo ni Jesus? Daghan sa mga butang nga gisulti ug gibuhat ni Jesus sa yuta narekord sa upat ka Ebanghelyo. Ang ubang bahin sa Kristohanon Gregong Kasulatan nagtabang sab nato nga masabtan ang panghunahuna ni Jesus kay gisulat kini sa mga tawo nga gigiyahan sa balaang espiritu ug nakabaton sa “panghunahuna sa Kristo.”​—1 Cor. 2:16.

⁷ Leksiyon: Ang mga gitudlo ni Jesus makatabang diha sa tanang bahin sa kinabuhi. Busa ang balaod sa Kristo naggiya sa atong ginabuhat diha sa balay, sa trabahoan o eskuylahan, ug sa kongregasyon. Makat-onan nato kini nga balaod pinaagi sa pagbasa ug pagpamalandong sa Kristohanon Gregong Kasulatan. Gisunod nato ang maong balaod dihang magkinabuhi ta uyon sa mga instruksiyon, sugo, ug prinsipyo nga narekord sa maong mga basahon sa Bibliya. Kon sundon nato ang balaod sa Kristo, gisunod nato ang atong mahigugmaong Diyos, si Jehova, kang kinsa naggikan ang tanang gitudlo ni Jesus.​—Juan 8:28.

 8. Unsa ang pundasyon sa balaod sa Kristo?

⁸ Kon ang balay maayong pagkatukod ug lig-on ang pundasyon, mobating luwas ang nagpuyo niana. Sa susama, kon ang balaod maayo ug lig-on ang pundasyon, mobating luwas ang nagsunod niana. Ang balaod sa Kristo gibase sa kinamaayohang pundasyon​—ang gugma. Nganong makaingon ta niana?

9-10. Unsang mga pananglitan ang nagpakita nga si Jesus gipalihok sa gugma, ug unsaon nato siya pagsundog?

⁹ Una, ang tanang gibuhat ni Jesus gipalihok sa gugma. Ang kaluoy maoy usa ka pamatuod sa gugma. Tungod sa maong kaluoy, gitudloan ni Jesus ang katawhan, giayo ang mga masakiton, gipakaon ang mga gigutom, ug gibanhaw ang mga patay. (Mat. 14:14; 15:32-38; Mar. 6:34; Luc. 7:11-15) Bisag halos mahurot ang iyang panahon ug kusog, kinabubut-ong giuna ni Jesus ang panginahanglan sa uban. Labaw sa tanan, nagpakita siyag dakong gugma pinaagi sa paghalad sa iyang kinabuhi.​—Juan 15:13.

¹⁰ Leksiyon: Masundog nato si Jesus kon unahon nato ang panginahanglan sa uban. Masundog sab nato siya kon maningkamot ta sa pagpakitag kaluoy sa mga tawo diha sa atong teritoryo. Dihang ang maong kaluoy magpalihok nato sa pagsangyaw ug pagtudlo sa maayong balita, atong gisunod ang balaod sa Kristo.

11-12. (a) Unsay nagpakita nga gimahal ta pag-ayo ni Jehova? (b) Unsaon nato pagsundog ang gugma ni Jehova?

¹¹ Ikaduha, gipakita ni Jesus ang gugma sa iyang Amahan. Panahon sa iyang ministeryo, gipakita ni Jesus nga gimahal pag-ayo ni Jehova ang iyang mga magsisimba. Apil sa gitudlo ni Jesus ang mosunod: Ang matag usa kanato bililhon sa atong langitnong Amahan. (Mat. 10:31) Andam kaayo si Jehova nga dawaton pag-usab ang nawalang karnero nga naghinulsol ug mibalik sa kongregasyon. (Luc. 15:7, 10) Gipamatud-an ni Jehova ang iyang gugma kanato pinaagi sa paghatag sa iyang Anak aron lukaton ta.​—Juan 3:16.

¹² Leksiyon: Unsaon nato pagsundog ang gugma ni Jehova? (Efe. 5:1, 2) Isipon nato nga bililhon ang matag usa sa atong mga igsoon, ug andam tang modawat pag-usab sa “nawalang karnero” nga mibalik kang Jehova. (Sal. 119:176) Gipamatud-an nato nga atong gimahal ang mga igsoon pinaagi sa paghatag kanila sa atong panahon ug kusog, sama sa pagtabang kanila dihang manginahanglan sila. (1 Juan 3:17) Kon magpakita tag gugma sa uban, atong gisunod ang balaod sa Kristo.

13-14. (a) Sumala sa Juan 13:34, 35, unsay gisugo ni Jesus sa iyang mga sumusunod, ug nganong bag-o ni nga sugo? (b) Unsaon nato pagtuman ang bag-ong sugo?

¹³ Ikatulo, gisugo ni Jesus ang iyang mga sumusunod sa pagpakitag nagsakripisyong gugma. (Basaha ang Juan 13:34, 35.) Bag-o ni nga sugo kay ang maong gugma wala isugo diha sa Balaod nga gihatag sa Diyos sa Israel. Nagsugo ni nga higugmaon ang mga igsoon sama sa paghigugma ni Jesus kanato. Kana nagkinahanglag nagsakripisyong gugma.c Kinahanglan natong higugmaon ang mga igsoon nga labaw pa gani sa atong kaugalingon. Angay natong higugmaon sila pag-ayo nga andam natong ihatag ang atong kinabuhi para nila, sama sa gibuhat ni Jesus.

¹⁴ Leksiyon: Unsaon nato pagtuman ang bag-ong sugo? Sa simpleng pagkasulti, pinaagi sa pagsakripisyo para sa atong mga igsoon. Andam tang mohimog dagkong sakripisyo, sama sa paghatag sa atong kinabuhi. Pero andam sad tang mohimog gagmayng sakripisyo. Pananglitan, dihang mohimo tag linaing paningkamot aron tabangan ang usa ka tigulang nga igsoon sa pagtambong sa tigom, o andam tang mosakripisyo sa atong gusto aron malipay ang atong minahal, o mo-leave ta sa trabaho aron motabang sa disaster relief, atong gisunod ang balaod sa Kristo. Makatabang sab ta sa paghimo sa kongregasyon nga usa ka dapit diin ang matag usa mobating luwas ug may kasegurohan.

15-17. (a) Sa unsang paagi ang mga gibuhat ni Jesus nagpakitag hustisya? (b) Unsaon nato pagsundog si Jesus?

¹⁵ Sa Bibliya, ang “hustisya” nagpasabot ug paghimo sa giingon sa Diyos nga husto ug pagbuhat niana nga walay diskriminasyon. Nganong makaingon ta nga ang balaod sa Kristo nagpasiugda sa hustisya?

¹⁶ Una, hunahunaa kon sa unsang paagi ang mga gibuhat ni Jesus nagpakitag hustisya. Sa iyang panahon, ang Hudiyong mga lider sa relihiyon nagdumot sa mga dili Hudiyo, nagtamay sa ordinaryong mga Hudiyo, ug wala magtahod sa mga babaye. Pero si Jesus walay diskriminasyon ug kanunayng patas ang iyang pagtratar sa tanan. Gidawat niya ang mga dili Hudiyo nga mituo niya ug gustong mosunod kaniya. (Mat. 8:5-10, 13) Gisangyawan niya ang tanan, dato ug pobre. (Mat. 11:5; Luc. 19:2, 9) Maayo ang iyang pagtratar sa mga babaye. Siya may pagtahod kanila, bisan niadtong gitamay sa uban.​—Luc. 7:37-39, 44-50.

¹⁷ Leksiyon: Atong masundog si Jesus kon wala tay diskriminasyon ug kon sangyawan nato ang tanan nga andam mamati​—bisag unsay ilang relihiyon o kahimtang sa kinabuhi. Masundog sa mga brader si Jesus pinaagi sa pagpakitag pagtahod sa mga babaye. Kon buhaton nato kana, atong gisunod ang balaod sa Kristo.

18-19. Unsay gitudlo ni Jesus bahin sa hustisya, ug unsay atong makat-onan niini?

¹⁸ Ikaduha, hunahunaa kon unsay gitudlo ni Jesus bahin sa hustisya. Nagtudlo siyag mga prinsipyo nga makatabang sa iyang mga sumusunod sa pagtratar nga patas sa usag usa. Pananglitan, hunahunaa ang Bulawanong Lagda. (Mat. 7:12) Gusto natong tanan nga trataron nga patas. Busa, kinahanglang patas pod ang atong pagtratar sa uban. Kon buhaton nato kana, basin mapalihok sila sa pagtratar kanato sa samang paagi. Pero, komosta kon nakasinati tag inhustisya? Gitudloan usab ni Jesus ang iyang mga sumusunod sa pagsalig nga “hatagan [ni Jehova] ug hustisya [kadtong] nagatuaw kaniya adlaw ug gabii.” (Luc. 18:6, 7) Usa kana ka saad: Ang atong makataronganon nga Diyos nahibalo sa mga pagsulay nga atong giatubang niining kataposang mga adlaw, ug hatagan ta niyag hustisya sa iyang gitakdang panahon.​—2 Tes. 1:6.

¹⁹ Leksiyon: Kon sundon nato ang mga prinsipyo nga gitudlo ni Jesus, atong trataron ang uban sa patas nga paagi. Ug kon nag-antos tag inhustisya niining kalibotan ni Satanas, mahupayan ta sa pagkahibalo nga hatagan ta ni Jehova ug hustisya.

20-21. (a) Unsaon pagtratar niadtong may awtoridad ang uban? (b) Sa unsang paagi ang bana makapakitag nagsakripisyong gugma? Unsay angayng pagtratar sa amahan sa iyang mga anak?

²⁰ Ubos sa balaod sa Kristo, unsaon pagtratar niadtong may awtoridad ang uban? Tungod kay gugma ang pundasyon sa maong balaod, angayng trataron niadtong may awtoridad ang uban sa matinahoron ug mahigugmaong paagi. Kinahanglang hinumdoman nila nga gusto sa Kristo nga magpakita tag gugma sa tanan natong buhaton.

²¹ Diha sa pamilya. Angayng higugmaon sa bana ang iyang asawa “sama sa ginahimo sa Kristo sa kongregasyon.” (Efe. 5:25, 28, 29) Kinahanglang sundogon sa bana ang nagsakripisyong gugma sa Kristo pinaagi sa pag-una sa mga panginahanglan ug kaayohan sa iyang asawa. Ang pipila ka lalaki basin malisdan sa pagpakita niana nga gugma, tungod tingali kay nagdako sila sa kultura diin wala maandi ang pagtratar sa uban sa patas ug mahigugmaong paagi. Basin malisdan sila sa pagtul-id sa dili maayong batasan, pero kinahanglan nilang mohimog mga kausaban aron masunod ang balaod sa Kristo. Ang bana nga magpakitag nagsakripisyong gugma tahoron sa iyang asawa. Ang amahan nga tinuod nga nahigugma sa iyang mga anak dili mopasakit nila sa pulong o sa buhat. (Efe. 4:31) Hinunoa, ipakita niya sa iyang mga anak nga gihigugma ug giuyonan niya sila aron mobati silang luwas ug may kasegurohan. Maangkon sa maong amahan ang gugma ug pagsalig sa iyang mga anak.

22. Sumala sa 1 Pedro 5:1-3, kinsay tag-iya sa “mga karnero,” ug unsay angayng pagtratar kanila?

²² Diha sa kongregasyon. Angayng hinumdoman sa mga ansiyano nga ang “mga karnero” dili ila. (Juan 10:16; basaha ang 1 Pedro 5:1-3.) Ang ekspresyong “panon sa Diyos,” “atubangan sa Diyos,” ug “gipanag-iya sa Diyos” nagpahinumdom sa mga ansiyano nga ang mga karnero iya ni Jehova. Gusto niya nga ang iyang mga karnero mahalon ug panggaon. (1 Tes. 2:7, 8) Ang mga ansiyano nga mahigugmaong nagtuman sa ilang responsibilidad ingong mga magbalantay makabaton sa pag-uyon ni Jehova. Maangkon sab nila ang gugma ug pagtahod sa mga igsoon.

23-24. (a) Unsay papel sa mga ansiyano kon dunay makahimog seryosong sala? (b) Dihang magdumala sa maong mga kaso, unsay angayng hinumdoman sa mga ansiyano?

²³ Unsay papel sa mga ansiyano dihang magdumalag mga kaso sa seryosong sala? Lahi ang ilang papel nianang sa mga maghuhukom ug mga ansiyano ubos sa Balaod nga gihatag sa Diyos sa Israel. Ubos sa maong Balaod, dumalahon sa tinudlong mga lalaki dili lang ang may kalabotan sa espirituwal nga mga butang kondili ang sibil ug kriminal sab nga mga kaso. Pero ubos sa balaod sa Kristo, ang papel sa mga ansiyano mao ang pagdumala sa mga bahin nga may kalabotan sa pagsimba. Ilang giila nga ang sekular nga awtoridad gihatagan sa Diyos ug responsibilidad sa pagdumala sa sibil ug kriminal nga mga kaso. Apil niana ang awtoridad sa pagpahamtang ug silot sama sa multa o pagkapriso.​—Roma 13:1-4.

²⁴ Unsay buhaton sa mga ansiyano kon dunay makahimog seryosong sala diha sa kongregasyon? Gamiton nila ang Kasulatan sa pagtimbangtimbang niana ug sa pagdesisyon. Hinumdoman nila nga gugma ang pundasyon sa balaod sa Kristo. Ang gugma magpalihok sa mga ansiyano sa pagkonsiderar niini: Unsay kinahanglang buhaton sa pagtabang sa mga membro sa kongregasyon nga nahimong biktima sa sala? Maylabot sa nakasala, ang gugma magpalihok sa mga ansiyano sa pagkonsiderar sa mosunod: Mahinulsolon ba siya? Matabangan ba namo siya nga mahibalik sa espirituwal nga kahimsog?

25. Unsay hisgotan sa sunod nga artikulo?

²⁵ Mapasalamaton gyod ta nga nailalom ta sa balaod sa Kristo! Kon kitang tanan maningkamot sa pagsunod niana, mitabang ta sa paghimo sa kongregasyon nga usa ka dapit diin ang mga membro mobating gimahal, gipabilhan, ug luwas. Pero, nagkinabuhi ta sa kalibotan diin “ang mga tawong daotan” ‘misamot pa ka daotan.’ (2 Tim. 3:13) Busa, kinahanglang magbantay ta kanunay. Sa unsang paagi masundog sa kongregasyon ang hustisya sa Diyos kon may mahitabong pag-abuso ug bata? Tubagon kana sa sunod nga artikulo.