1 Pedro 5:6, 7—“Pagpailalom Kamo sa Gahom sa Dios . . . Itugyan Kaniya ang Tanan Ninyong Kabalaka”

“Busa paubos mo ilalom sa gamhanang kamot sa Diyos, aron bayawon mo niya sa gitakdang panahon, samtang inyong itugyan kaniya ang tanan ninyong kabalaka, kay gimahal mo niya.”—1 Pedro 5:6, 7, Bag-ong Kalibotang Hubad.

“Busa pagpailalom kamo sa gahom sa Dios aron magtuboy siya kaninyo sa panahon nga iyang gitakda. Itugyan kaniya ang tanan ninyong kabalaka kay siya nag-atiman kaninyo.”—1 Pedro 5:6, 7, Ang Bag-ong Maayong Balita Biblia.

Gipasaligan ni apostol Pedro ang mga Kristohanon nga makaampo sila sa Diyos sa ilang mga problema ug kabalaka. Gipabilhan sa Diyos ang mga mapainubsanon, ug dagaya niya silang gantihan.

“Paubos mo ilalom sa gamhanang kamot sa Diyos.” Sa Bibliya, ang kamot sa Diyos sagad nagtumong sa iyang gahom sa pagluwas ug pagpanalipod. (Exodo 3:19; Deuteronomio 26:8; Esdras 8:22) Ang mga Kristohanon nagpaubos ilalom sa kamot sa Diyos dihang mosalig sila kaniya. Giila nila ang ilang limitasyon ug nahibalo sila nga dili nila makaya ang mga pagsulay nga silasila ra. (Proverbio 3:5, 6; Filipos 4:13) Segurado sila nga ang Diyos naay gahom sa pagtabang nila sa hustong panahon ug sa pinakamaayong paagi.—Isaias 41:10.

“Aron bayawon mo niya sa gitakdang panahon.” Kadtong mapailobong molahutay sa mga pagsulay makaseguro nga sila bayawon, o gantihan, sa Diyos. Dili niya tugotan nga ang iyang mga magsisimba masulayan hangtod sa hangtod o masulayan nga labaw sa ilang maantos. (1 Corinto 10:13) Hinuon, kon padayon nilang buhaton kon unsay maayo, seguradong gantihan sila sa Diyos sa “gitakdang panahon.”—Galacia 6:9.

“Samtang inyong itugyan kaniya ang tanan ninyong kabalaka, kay gimahal mo niya.” Puwedeng itugyan sa mga Kristohanon ang tanan nilang kabalaka ngadto sa Diyos pinaagi sa mapainubsanong pag-ampo kaniya. Ang usa ka reperensiya nag-ingon: “Ang verb nga itugyan nagpasabot ug tinuyo nga pagpaningkamot nga ipalayo ang usa ka butang gikan kanato.” Dihang itugyan sa usa ka Kristohanon ang iyang mga kabalaka ngadto sa Diyos, mamenosan ang iyang kabalaka ug mabatonan niya ang gitawag sa Bibliya nga “kalinaw nga gikan sa Diyos.” (Filipos 4:6, 7) Makaseguro siya nga gusto siyang tabangan sa Diyos kay gimahal siya sa Diyos ug nga gamiton Niya ang Iyang dakong gahom sa pagtabang kaniya.—Salmo 37:5; 55:22.

Ang kapitulo 5 mao ang kataposan sa unang sulat ni apostol Pedro para sa mga Kristohanon. (1 Pedro 1:1) Ang mga sumusunod sa Kristo adtong panahona, sama karon, nag-atubang ug lainlaing pagsulay sa pagtuo ug lagmit nakapabalaka to nila. (1 Pedro 1:6, 7) Kay nahibalo si Pedro sa ilang kalisdanan, nagsulat siyag makapadasig nga sulat niadtong mga 62-64 C.E.—1 Pedro 5:12.

Gitapos ni Pedro ang iyang sulat pinaagig makapadasig nga pahinumdom para niadtong nag-atubang ug pagsulay sa pagtuo. Kon magpabilin silang mapainubsanon ug mosalig sa Diyos, makaseguro sila nga palig-onon sila sa Diyos. (1 Pedro 5:5-10) Ang giingon ni Pedro makapadasig pod sa mga Kristohanon nga gilutos karon.

Tan-awa kining mubo nga video nga nagsumaryo sa basahon sa 1 Pedro.