Alagara si Jehova nga Maunongon
“Ngadto sa usa nga maunongon ikaw [Jehova] magalihok nga maunongon.”—2 SAMUEL 22:26.
1. Sa unsang paagi nagalihok si Jehova ngadto sa maunongon kaniya?
SI Jehova dili mabayran sa tanan niyang ginahimo alang sa iyang katawhan. (Salmo 116:12) Pagkakatingalahan sa iyang espirituwal ug materyal nga mga gasa ug malumo nga kaluoy! Si Haring David sa karaang Israel nahibalo nga ang Diyos usab nagalihok nga maunongon ngadto sa mga maunongon kaniya. Gipahayag kini ni David diha sa usa ka awit nga iyang gihimo “sa adlaw nga giluwas siya ni Jehova gikan sa kamot sa tanan niyang mga kaaway ug gikan sa kamot ni [Haring] Saul.”—2 Samuel 22:1.
2. Unsa ang pipila ka punto nga gipahayag sa awit ni David nga nasulat diha sa 2 Samuel kapitulo 22?
2 Gisugdan ni David ang iyang awit (managsama sa Salmo 18) pinaagi sa pagdayeg kang Jehova ingon nga mao “ang Tigtagana sa kaikyasan” agig tubag sa pag-ampo. (2 Samuel 22:2-7) Gikan sa iyang langitnong templo, milihok ang Diyos sa pagluwas sa iyang maunongong alagad gikan sa gamhanang mga kaaway. (Bersikulo 8-19) Si David sa ingon gigantihan tungod sa pagsubay ug usa ka matarong nga dalan ug nagbantay sa mga dalan ni Jehova. (Bersikulo 20-27) Sunod nga tagsatagsang gihisgotan mao ang mga buhat nga nahimo sa kusog nga gihatag sa Diyos. (Bersikulo 28-43) Sa kataposan, gihisgotan ni David ang kaluwasan gikan sa mga tigpangitag-sayop sa kaugalingong nasod ug gikan sa mga kaaway sa ubang mga nasod ug nagpasalamat kang Jehova ingong “ang Usa nga nagahimog dagkong mga buhat sa kaluwasan alang sa iyang hari ug nagapakitag mahigugmaong-kalulot sa iyang usa nga dinihogan.” (Bersikulo 44-51) Si Jehova makahatag usab kanato ug kaluwasan kon atong subayon ang matarong nga dalan ug mosalig kaniya alang sa kusog.
Kon Unsay Kahulogan sa Pagkamaunongon
3. Sumala sa baroganan sa Kasulatan, unsay kahulogan sa pagkahimong maunongon?
3 Ang awit ni David sa kaluwasan naghatag kanato niining makahupay nga pasalig: “Ngadto sa usa nga maunongon ikaw [Jehova] nagalihok nga maunongon.” (2 Samuel 22:26) Ang Hebreohanong adhetibo nga cha·sidhʹ nagkahulogang “usa nga maunongon,” o “usa nga may mahigugmaong-kalulot.” (Salmo 18:25, potnot) Ang nombreng cheʹsedh may diwa sa kalulot nga mahigugmaong motapot diha sa usa ka butang hangtod ang katuyoan may kalabotan niana matuman. Si Jehova nagapakita nianang matanga sa kalulot alang sa iyang mga alagad, sama sa ilang pagpakita niana alang kaniya. Kining matarong, balaang pagkamaunongon gihubad nga “mahigugmaong-kalulot” ug “maunongong gugma.” (Genesis 20:13; 21:23) Diha sa Gregong Kasulatan, ang “pagkamaunongon” may diwa sa pagkabalaan ug pagtahod, nga gipahayag diha sa nombreng ho·si·oʹtes ug sa adhetibo nga hoʹsi·os. Ang maong pagkamaunongon naglakip sa pagkamatinumanon ug debosyon ug nagkahulogang pagkahimong debotado ug mabinantayong nagatuman sa tanang mga buluhaton ngadto sa Diyos. Ang pagkahimong maunongon ngadto kang Jehova nagkahulogang pagtapot kaniya nga may malig-on kaayong debosyon nga kini nagsilbing usa ka dikit kaayo nga papilit.
4. Sa unsang paagi gipakita ang pagkamaunongon ni Jehova?
4 Ang kaugalingong pagkamaunongon ni Jehova gipakita sa daghang mga paagi. Pananglitan, siya nagahimog hudisyal nga aksiyon batok sa daotan tungod sa maunongong gugma alang sa iyang katawhan ug maunongon sa hustisya ug pagkamatarong. (Pinadayag 15:3, 4; 16:5) Ang pagkamaunongon sa iyang pakigtugon kang Abraham ang nagpalihok kaniya sa pagpakitag hataas-ug-pailob ngadto sa mga Israelinhon. (2 Hari 13:23) Kadtong mga maunongon sa Diyos makasalig sa iyang tabang hangtod sa kataposan sa ilang maunongong dalan ug makatino nga iyang hinumdoman sila. (Salmo 37:27, 28; 97:10) Si Jesus napalig-on sa kahibalo nga ingong pangunang “usa nga maunongon” sa Diyos, ang iyang kalag dili pasagdan sa Sheol.—Salmo 16:10; Buhat 2:25, 27.
5. Sanglit maunongon si Jehova, unsay iyang gisugo sa iyang mga alagad, ug unsang pangutana ang hatagag pagtagad?
5 Sanglit maunongon man si Jehova nga Diyos, iyang gipangayo nga ang iyang mga alagad magmaunongon. (Efeso 4:24) Pananglitan, ang mga lalaki kinahanglang maunongon aron mahimong takos sa pagkatinudlo ingong mga ansiano sa kongregasyon. (Tito 1:8) Unsang mga butanga ang angay mopukaw sa katawhan ni Jehova sa pag-alagad kaniya nga maunongon?
Pagpabili sa mga Butang nga Nakat-onan
6. Unsay angay natong bation bahin sa Kasulatanhong mga butang nga atong nakat-onan, ug unsay angay natong hinumdoman bahin sa maong kahibalo?
6 Ang pagkamapasalamaton alang sa Kasulatanhong mga butang nga atong nakat-onan angay mopalihok kanato sa pag-alagad kang Jehova nga maunongon. Giawhag ni apostol Pablo si Timoteo: “Magpadayon ka sa mga butang nga imong nakat-onan ug nakabig sa pagtuo, nga nahibalo kon kang kinsa imong nakat-onan kini ug nga sukad sa pagkabata ikaw nahibalo na sa balaang kasulatan, nga makahimo kanimo nga maalamon sa kaluwasan pinaagi sa pagtuo kang Kristo Jesus.” (2 Timoteo 3:14, 15) Hinumdomi nga ang maong kahibalo nagagikan sa Diyos pinaagi sa “matinumanon ug maalamong ulipon.”—Mateo 24:45-47.
7. Unsay angay bation sa mga ansiano bahin sa espirituwal nga pagkaon nga gitagana sa Diyos pinaagi sa matinumanong ulipon?
7 Ilabinang pabilhan sa tinudlong mga ansiano ang makapabaskog nga espirituwal nga pagkaon nga gitagana sa Diyos pinaagi sa matinumanong ulipon. Sa katuigang milabay may pipila ka mga ansiano nga kulang sa maong apresasyon. Ang usa ka tigpaniid miingon nga kining mga tawhana “hinawayon sa mga artikulo sa Ang Bantayanang Torre, dili gustong modawat niini ingong . . . alagianan sa kamatuoran sa Diyos, naningkamot kanunay sa pag-impluwensiya sa uban sa ilang paagi sa paghunahuna.” Apan, ang maunongong mga ansiano dili gayod mosulay sa pag-impluwensiya sa uban aron isalikway ang bisan unsang espirituwal nga pagkaon nga gitagana sa Diyos pinaagi sa matinumanong ulipon.
8. Komosta kon kita wala gayod bug-os makasabot sa pipila ka punto sa Kasulatan nga gipadayag sa matinumanon ug maalamong ulipon?
8 Ingong dedikadong mga Saksi ni Jehova, kitang tanan kinahanglang magmaunongon kaniya ug sa iyang organisasyon. Dili gayod kita magpalandong bisan na lang sa pagsalikway sa katingalahang kahayag sa Diyos, mosubay ug usa ka apostatang dalan nga motultol sa espirituwal nga kamatayon karon ug sa kalaglagan sa ulahi. (Jeremias 17:13) Apan komosta kon malisdan kita sa pagdawat o sa bug-os nga pagsabot sa pipila ka punto sa Kasulatan nga itanyag sa matinumanong ulipon? Nan mapainubsanon natong dawaton kon diin kita nakakat-on sa kamatuoran ug mangayo diha sa pag-ampo ug kaalam sa pagsagubang niini nga pagsulay hangtod kini matapos tungod sa pila ka gipatik nga katin-awan sa mga butang.—Santiago 1:5-8.
Pabilhi ang Kristohanong Panag-igsoonay
9. Sa unsang paagi ang 1 Juan 1:3-6 nagpakita nga ang mga Kristohanon kinahanglang adunay espiritu sa pag-ubanay?
9 Ang kinasingkasing nga apresasyon alang sa espiritu sa pag-ubanay nga naglungtad sa atong Kristohanong panag-igsoonay nagahatag ug laing padasig sa pag-alagad kang Jehova nga maunongon. Sa pagkatinuod, ang atong relasyon sa Diyos ug ni Kristo dili mahimong molig-on sa espirituwal kon wala kining espirituha. Gisultihan ni apostol Juan ang dinihogang mga Kristohanon: “Kadtong among nakita ug nadungog among gisulti usab kaninyo, aron kamo usab adunay pakig-ambitay [“pag-ubanay,” Diaglott] uban kanamo. Dugang pa, kining atong pakig-ambitay maoy pakig-ambitay uban sa Amahan ug sa iyang Anak nga si Jesu-Kristo. . . . Kon kita moingon: ‘Aduna kitay pakig-ambitay uban kaniya,’ ug sa gihapon kita padayong nagalakaw diha sa kangitngit, kita namakak ug wala magkinabuhi subay sa kamatuoran.” (1 Juan 1:3-6) Kining prinsipyoha aplikado sa tanang mga Kristohanon, langitnon man o yutan-on ang ilang paglaom.
10. Bisan tuod si Euodia ug Sintique dayag naglisod sa pagsulbad sa usa ka personal nga suliran, unsay paglantaw ni Pablo niining mga babayehana?
10 Gikinahanglan ang paningkamot aron maampingan ang espiritu sa pag-ubanay. Pananglitan, ang Kristohanong babaye nga si Euodia ug Sintique dayag nga nalisdan sa pagsulbad sa problema taliwala kanilang duha. Sa ingon gitambagan sila ni Pablo nga “magmausa sa hunahuna diha sa Ginoo.” Siya midugang: “Naghangyo usab ako kanimo, tinuod kong isigkamagbubuhat, padayon sa pagtabang niining mga babayehana nga naghago uban kanako sa pagpakaylap sa maayong balita uban kang Clemente ug sa tanan kong isigkamagbubuhat, kansang mga ngalan anaa sa basahon sa kinabuhi.” (Filipos 4:2, 3) Kadtong diyosnong mga babaye nakigbisog duyog kang Pablo ug sa uban “sa maayong balita,” ug siya tino nga sila nalakip niadtong ‘kansang mga ngalan anaa sa basahon sa kinabuhi.’
11. Kon ang maunongong Kristohanon makaatubang ug espirituwal nga suliran, unsay angay nga isilsil sa hunahuna?
11 Ang mga Kristohanon walay tsapa sa pagpakita kon unsa ang ilang nabatonang pribilehiyo sa pagbuhat diha sa organisasyon ni Jehova ug sa unsang paagi sila nagaalagad kaniya nga maunongon. Kon sila adunay espirituwal nga suliran, pagkadili-mahigugmaon kon ilang kalimtan ang ilang mga tuig sa maunongong pag-alagad kang Jehova! Lagmit, ang usa nga gitawag “tinuod nga isigkamagbubuhat” maoy usa ka maunongong igsoon nga maikagon sa pagtabang sa uban. Kon usa ikaw ka ansiano, ikaw ba maoy usa ka “tinuod nga isigkamagbubuhat,” andam sa pagtabang sa mahangawaong paagi? Hinaot palandongon natong tanan ang nahimo sa isigkamagtutuo, sama sa ginahimo sa Diyos, ug mahigugmaong tabangan sila sa pagpas-an sa ilang mga lulan.—Galacia 6:2; Hebreohanon 6:10.
Wala nay Lain Pang Kaadtoan
12. Sa dihang ang mga pulong ni Jesus nagpahinabo sa ‘daghang mga tinun-an sa pagbalik sa mga butang nga ilang gitalikdan,’ unsang baroganan ang gikuha ni Pedro?
12 Kita matukmod sa pag-alagad kang Jehova nga maunongon uban sa iyang organisasyon kon atong hinumdoman nga wala nay lain pang kaadtoan alang sa kinabuhing dayon. Sa dihang may gisulti si Jesus nga nagpahinabo sa ‘daghang mga tinun-an sa pagbalik sa mga butang nga ilang gitalikdan,’ iyang gipangutana ang iyang mga apostol: “Buot ba usab kamong mobiya?” Si Pedro mitubag: “Ginoo, kang kinsa man kami moadto? Ikaw ang may mga pulong sa kinabuhing dayon; ug kami nagatuo ug among nasinati nga ikaw mao ang Balaang Usa sa Diyos.”—Juan 6:66-69.
13, 14. (a) Nganong ang unang-siglong Hudaismo wala kahimut-i sa sa Diyos? (b) Unsay gisulti sa usa ka dugay nang Saksi ni Jehova bahin sa makitang organisasyon sa Diyos?
13 Ang “mga pulong sa kinabuhing dayon” dili makaplagan sa Hudaismo sa unang siglo K.P. Ang dakong sala niini mao ang pagdumili sa pagdawat kang Jesus ingon nga mao ang Mesiyas. Wala sa porma niini nga bug-os gipasukad ang Hudaismo sa Hebreohanong Kasulatan. Ang mga Saduseo nagdumili sa pagtuo nga adunay mga manulonda ug wala magtuo sa pagkabanhaw. Bisan tuod ang mga Pariseo misupak kanila niining bahina, sila nakasala sa paghimo sa Pulong sa Diyos nga walay kapuslanan tungod sa ilang dili-kasulatanhong mga tradisyon. (Mateo 15:1-11; Buhat 23:6-9) Naulipon niining mga tradisyona ang mga Hudiyo ug nalisdan ang kadaghanan sa pagdawat kang Jesu-Kristo. (Colosas 2:8) Ang kasibot alang sa ‘mga tradisyon sa iyang mga amahan’ ang nagpahimo kang Saulo (Pablo) nga usa ka mabangis nga maglulutos sa mga sumusunod ni Kristo tungod sa iyang kakulang ug kahibalo.—Galacia 1:13, 14, 23.
14 Ang Hudaismo wala kahimut-i sa Diyos, apan gipanalanginan ni Jehova ang organisasyon nga gilangkoban sa mga sumusunod sa iyang Anak—‘usa ka katawhan nga masiboton sa maayong mga binuhatan.’ (Tito 2:14) Kanang organisasyona naglungtad gihapon, ug bahin niana ang usa ka dugay na kaayong Saksi ni Jehova miingon: “Kon may butang pa nga labing hinungdanon kanako, kini mao ang pagpabiling suod sa makitang organisasyon ni Jehova. Ang akong sayo nga kasinatian nagtudlo kanako kon unsa ka dili makataronganon ang pagsalig sa tawhanong pangatarongan. Sa dihang matin-aw na sa akong hunahuna ang maong punto, ako desidido sa pagpabiling matinumanon sa organisasyon. Sa unsa pa nga paagi nga makabaton ang usa sa pag-uyon ug panalangin ni Jehova?” Wala nay lain pang kaadtoan alang sa balaang pag-uyon ug kinabuhing dayon.
15. Nganong mokooperar sa makitang organisasyon ni Jehova ug niadtong nangabaga sa responsabilidad diha niana?
15 Ang atong mga kasingkasing angay motukmod kanato sa pakigkooperar sa organisasyon ni Jehova tungod kay nahibalo kita nga kini lamang ang gitultolan sa iyang espiritu ug nga nagapahibalo sa iyang ngalan ug mga katuyoan. Siyempre, kadtong nangabaga sa responsabilidad diha niana mga dili-hingpit. (Roma 5:12) Apan “misilaob ang kaligutgot ni Jehova” batok kang Aaron ug Miriam dihang ilang gisaway si Moises ug nakalimot nga siya, dili sila, ang gisaligan sa hinatag-sa-Diyos nga responsabilidad. (Numeros 12:7-9) Karong adlawa, ang maunongong mga Kristohanon mokooperar “niadtong nagapanguna” tungod kay mao kanay gisugo ni Jehova. (Hebreohanon 13:7, 17) Ang pamatuod sa atong pagkamaunongon naglakip sa regular nga pagtambong sa Kristohanong mga tigom ug sa paghatag ug mga komento nga ‘makadasig sa uban sa paghigugma ug sa maayong mga binuhatan.’—Hebreohanon 10:24, 25.
Pagkahimong Makapalig-on
16. Ang tinguha sa pagbuhat ug unsa ang angay mopukaw kanato sa pag-alagad kang Jehova nga maunongon?
16 Ang tinguha nga mahimong makapalig-on sa uban angay usab motukmod kanato sa pag-alagad kang Jehova nga maunongon. Si Pablo misulat: “Ang kahibalo magapaburot, apan ang gugma magapalig-on.” (1 Corinto 8:1) Sanglit ang usa ka matang sa kahibalo magapaburot sa mga nakapanag-iya niini, dayag nga gipasabot ni Pablo nga ang gugma usab magapalig-on niadtong nagapakita sa maong hiyas. Usa ka libro nila ni Propesor Weiss ug English nag-ingon: “Ang tawo nga may kapasidad sa paghigugma sagad baslan ug gugma. Ang kapasidad sa paghatag ug maayong kabubut-on ug konsiderasyon ngadto sa tanang bahin sa kinabuhi . . . adunay dako maayong epekto diha sa tawo nga nagahatag sa maong mga pagbati maingon man diha sa tawo nga nagadawat niana ug busa nakahatag kalipay sa duha.” Pinaagi sa pagpakitag gugma, atong ginapalig-on ang uban ug ang atong kaugalingon, sama sa gipasabot sa mga pulong ni Jesus: “Adunay labaw nga kalipay ang paghatag kay sa pagdawat.”—Buhat 20:35.
17. Sa unsang paagi ang gugma nagapalig-on, ug makapugong kini kanato sa paghimog unsa?
17 Diha sa 1 Corinto 8:1, gigamit ni Pablo ang Gregong pulong a·gaʹpe, nga nagpasabot ug may prinsipyo nga gugma. Kini nagapalig-on, kay kini hataas-ug-pailob ug malulot, mopailob ug moantos sa tanang butang, ug dili gayod mapakyas. Wad-on niining gugmaha ang makadaot nga mga emosyon, sama sa garbo ug kasina. (1 Corinto 13:4-8) Ang maong gugma mopugong kanato batok sa pagreklamo sa atong mga igsoon, kinsa dili mga hingpit sama kanato. Kini mosanta kanato gikan sa pagkahimong sama sa “mga tawong dili-diyosnon” kinsa “nakasulod” taliwala sa matuod nga mga Kristohanon sa unang siglo. Kining mga tawhana “nagsalikway sa pamunoan ug nagpasipala sa mga mahimayaon,” dayag nagpanamastamas sa maong mga indibiduwal ingong dinihogan Kristohanong mga magtatan-aw nga gikahatagan ug himaya. (Judas 3, 4, 8) Diha sa pagkamaunongon kang Jehova, dili gayod kita magpadala sa tintasyon sa pagbuhat ug bisan unsang butang nga susama niini.
Sukli ang Yawa!
18. Unsay buot buhaton ni Satanas diha sa katawhan ni Jehova, apan nganong dili kana niya mahimo?
18 Ang kahibalo nga si Satanas nagtinguha sa pagdaot sa atong panaghiusa ingong katawhan sa Diyos angay mopahugot sa atong determinasyon sa pag-alagad kang Jehova nga maunongon. Nagtinguha pa gani sa Satanas sa pagpukan sa tanang katawhan sa Diyos, ug may mga panahong patyon sa yutan-ong mga alagad sa Yawa ang matuod nga mga magsisimba. Apan dili tugotan sa Diyos si Satanas nga mapapha silang tanan. Si Jesus namatay “aron malaglag niya ang naghupot sa gahom sa kamatayon, nga sa ato pa, ang Yawa.” (Hebreohanon 2:14) Ang gingharian ni Satanas ug pagpasundayag sa gahom pinig-otan na ilabina sukad sa pagtambog kaniya gikan sa langit human nga nahimong Hari si Kristo sa 1914. Ug sa gitakda nga panahon ni Jehova, laglagon ni Jesus si Satanas ug ang iyang organisasyon.
19. (a) Unsang pasidaan bahin sa mga paningkamot ni Satanas ang gihatag niining basahona sa mga katuigang milabay? (b) Aron malikayan ang mga lit-ag ni Satanas, unsang pagbantay ang kinahanglan natong himoon diha sa pagpakiglabot sa isigkamagtutuo?
19 Kining basahona miingon sa miagi: “Kon si Satanas, nga yawa, makapahinabog kagubot taliwala sa katawhan sa Diyos, makapukaw kanila sa pag-awayay sa usag usa, o sa pagpakita ug pag-ugmad ug hakog nga paggawi nga motultol sa pagkalaglag sa gugma alang sa kaigsoonan, siya sa ingon milampos sa pagtukob kanila.” (The Watchtower, Mayo 1, 1921, panid 134) Dili nato tugotan ang Yawa sa paglaglag sa atong panaghiusa, tingali pinaagi sa pagpukaw kanato sa pagbutangbutang, o mag-awayay sa usag usa. (Levitico 19:16) Hinaot nga dili kita malingla ni Satanas sa usa ka paagi nga ato mismong daoton kadtong maunongong nag-alagad kang Jehova o lisodlisoron ang ilang kinabuhi. (Itandi ang 2 Corinto 2:10, 11.) Hinunoa, atong ipadapat ang mga pulong ni Pedro: “Magmalinawon kamo sa hunahuna, pagtukaw kamo. Ang inyong kaaway, ang Yawa, nagalibotlibot sama sa leon nga nagangulob, nga nangitag tukbonon. Apan bumarog kamo batok kaniya, malig-on diha sa pagtuo.” (1 Pedro 5:8, 9) Pinaagi sa paghupot ug malig-on nga baroganan batok kang Satanas, atong maampingan ang atong bulahan nga panaghiusa ingong katawhan ni Jehova.—Salmo 133:1-3.
Mainampoong Sumalig sa Diyos
20, 21. Sa unsang paagi ang mainampoong pagsalig kang Jehova nalangkit sa pag-alagad kaniya nga maunongon?
20 Ang mainampoong pagsalig sa Diyos makatabang kanato sa pagpadayon sa pag-alagad kang Jehova nga maunongon. Kon atong makita nga iyang gitubag ang atong mga pag-ampo, kita labi pang masuod kaniya. Ang mainampoong pagsalig kang Jehova nga Diyos giawhag sa dihang misulat si apostol Pablo: “Ginatinguha ko nga sa tanang dapit ang mga lalaki magpadayon sa pag-ampo, nga magbayaw sa maunongong mga kamot, nga walay kasuko ug mga pakiglalis.” (1 Timoteo 2:8) Pananglitan, pagkahinungdanon nga ang mga ansiano mainampoong mosalig sa Diyos! Ang ingon niini nga pagpasundayag sa pagkamaunongon kang Jehova kon magtigom aron maghisgot sa mga butang maylabot sa kongregasyon makatabang sa pagsanta sa walay kataposang mga panaglalis ug posible nga mga pagsilaob sa kasuko.
21 Ang mainampoong pagsalig kang Jehova nga Diyos motabang kanato sa pag-atiman sa mga pribilehiyo diha sa iyang pag-alagad. Usa ka tawo nga nakaalagad kang Jehova nga maunongon sa daghan nang dekada nakaingon: “Ang atong malipayong pagdawat sa bisan unsang buluhaton nga gihatag kanato sa tibuok-kalibotang organisasyon sa Diyos, ug ang atong pagpabilin diha sa atong buluhaton, nga dili-matarog, makapahimuot sa Diyos tungod sa atong kinasingkasing nga mga paningkamot. Bisan pa kon ang gihatag nga buluhaton daw ubos ra, ang dangatan mao nga kon dili matinumanong buhaton ang ubos nga trabaho daghang ubang hinungdanong mga pag-alagad dili matapos. Busa kon kita mapainubsanon ug interesado gayod sa paghimaya sa ngalan ni Jehova ug dili sa atong kaugalingon, nan kita makatino nga kita kanunay nga ‘malig-on, dili-matarog, nga madagayaon sa buluhaton ni Jehova.’”—1 Corinto 15:58.
22. Sa unsang paagi ang daghang panalangin ni Jehova makaapektar sa atong pagkamaunongon?
22 Siyempre, bisan unsa pay atong buhaton diha sa pag-alagad kang Jehova, dili kita makabalos kaniya sa iyang ginahimo alang kanato. Pagkamasaligon nato diha sa organisasyon sa Diyos, nga gilibotan sa iyang mga higala! (Santiago 2:23) Gipanalanginan kita ni Jehova ug panaghiusa nga nagagikan sa inigsoong gugma nga lalom kaayo nga pagkagamot nga si Satanas mismo dili makaluka niana. Busa magpabilin kita sa atong maunongon langitnong Amahan ug magtambayayongay sa pagtrabaho ingong iyang katawhan. Karon ug sa walay kataposan, alagaron nato si Jehova nga maunongon.
Unsaon Nimo Pagtubag?
◻ Unsay kahulogan sa pagkahimong maunongon?
◻ Unsa ang pila ka butang nga angay mopukaw kanato sa pag-alagad kang Jehova nga maunongon?
◻ Nganong kinahanglan natong suklan ang Yawa?
◻ Sa unsang paagi ang pag-ampo makatabang kanato nga mahimong maunongong mga alagad ni Jehova?
[Hulagway sa panid 23]
Ang maunongong mga alagad ni Jehova dili motugot sa ilang samag-leon nga Kaaway, ang Yawa, sa pagdaot sa ilang panaghiusa