PAGLIBAK

Usa kini ka hubad sa Gregong termino nga ka·ta·la·li·aʹ. Ang kaamgid nga berbong ka·ta·la·leʹo sa literal nagkahulogang “pagsulti batok” o “paglibak,” nga nagbuhat niana nga walay igong katarongan ug sagad sa makadaot o mabatokon nga paagi. (1Pe 2:12; 3:16) Gilangkit sa tinun-ang Santiago kini nga ekspresyon ngadto sa sayop nga paghukom o pagkondenar, busa nagpasabot sa dili-makataronganong pagsaway.​—San 4:11; itandi ang Sal 50:20.

Ang mga tiglibak, o mga tawong nagasultig daotan batok sa uban, maoy lakip niadtong gikapungtan ni Jehova, ug gipakita sa iyang Pulong nga ang tanan nga magpadayon sa pagbuhat niana takos sa kamatayon. (Rom 1:​18, 28-30, 32) Dugang pa sa ubang seryosong mga kasaypanan, gipahayag ni apostol Pablo ang dakong kabalaka nga basin ang mga membro sa kongregasyon sa Corinto nalangkit sa pagpanglibak. (2Co 12:20) Aron adunay dakong epekto ang mensahe o Pulong sa Diyos diha sa bag-ong mga tinun-an ni Jesu-Kristo, kinahanglang isalikway nila ang pagpanglibak ug ang tanang ubang matang sa pagkadaotan. Ayha pa nianang panahona nga sila motubo alang sa kaluwasan pinaagi sa “gatas nga iya sa pulong,” ang Kasulatanhong mga kamatuoran nga haom sa ilang mga panginahanglan.​—1Pe 2:​1, 2.