Masibotong Ipahayag ang Maayong Balita
“Magmainiton sa espiritu. Pagpaulipon kang Jehova.”—ROMA 12:11.
1, 2. Unsang tinamdan ang gipaningkamotan sa mga Kristohanon nga mahuptan ingong mga magsasangyaw sa maayong balita?
USA ka batan-ong lalaki ang naghinamhinam bahin sa usa ka bag-ong trabaho. Sa iyang unang adlaw sa trabahoan, matinguhaon siyang naghulat sa mga instruksiyon sa iyang amo. Nagpaabot siya sa iyang unang trabaho ug seryoso kaayo niana. Masiboton siyang mohimo sa iyang kinamaayohan.
2 Sa susamang paagi, kita ingong mga Kristohanon makalantaw sa atong kaugalingon ingong bag-ong mga trabahante. Sanglit ang atong paglaom mao ang pagkinabuhi sa walay kataposan, ikaingon nga kita nagsugod pa lang pagtrabaho alang kang Jehova. Tinong ang atong Maglalalang dunay daghang gihunahunang ipabuhat kanato nga magpapuliki kanato sa walay kataposan. Apan ang una gayong sugo nga atong nadawat mao kanang pagpahayag sa maayong balita sa iyang Gingharian. (1 Tesalonica 2:4) Unsay pagbati nato niining maong asaynment gikan sa Diyos? Sama sa batan-ong lalaki, buot natong tumanon kana sa kinamaayohan nga atong maarangan, uban ang kadasig, kalipay—oo, uban ang kasibot!
3. Unsay gikinahanglan aron molampos ingong ministro sa maayong balita?
3 Itugot ta, ang paghupot nianang positibong tinamdan mahimong malisod. Dugang pa sa atong ministeryo, daghan kitag uban pang mga responsibilidad, ang uban niana makapaluya kanato sa pisikal ug emosyonal. Kasagaran kaayo, makahimo kita sa pag-atiman niining mga butanga samtang naghatag ug igong pagtagad sa ministeryo. Sa gihapon, kini mahimong usa ka nagapadayon nga pakigbisog. (Marcos 8:34) Gipasiugda ni Jesus nga ang atong kalamposan ingong mga Kristohanon magkinahanglan ug dakong paningkamot.—Lucas 13:24.
4. Sa unsang paagi ang adlaw-adlawng mga kabalaka makaapektar sa atong espirituwal nga panglantaw?
4 Kay daghan kaayong butang nga himoon, dali rang mobating malumsan o mabug-atan usahay. Ang “mga kabalaka sa kinabuhi” makatuok sa atong kadasig ug apresasyon alang sa teokratikanhong mga kalihokan. (Lucas 21:34, 35; Marcos 4:18, 19) Tungod sa atong dili-hingpit nga tawhanong kinaiya, basin gibiyaan nato ‘ang gugma nga atong nabatonan sa sinugdan.’ (Pinadayag 2:1-4) Ang pipila ka bahin sa atong pag-alagad kang Jehova mahimong morag rutina na lang. Sa unsang paagi ang Bibliya nagtagana ug gikinahanglang pagdasig aron atong mahuptang buhi ang atong kasibot alang sa ministeryo?
Sama sa “Nagdilaab nga Kalayo” Diha sa Atong Kasingkasing
5, 6. Giunsa paglantaw ni apostol Pablo ang iyang pribilehiyo sa pagsangyaw?
5 Ang ministeryo nga gipiyal ni Jehova kanato bililhon kaayo nga dili kini angayng tugotan nga mahimong ordinaryo na lang. Giisip ni apostol Pablo ang pagsangyaw sa maayong balita nga usa ka dako kaayong pribilehiyo, ug iyang gilantaw ang iyang kaugalingon ingong dili-takos nga piyalan niana. Matod niya: “Nganhi kanako, usa ka tawong ubos pa kay sa labing ubos sa tanang mga balaan, kining dili-takos nga kalulot gihatag, aron akong ipahayag ngadto sa kanasoran ang maayong balita bahin sa dili-matugkad nga bahandi sa Kristo ug ipakita sa mga tawo kon sa unsang paagi ang sagradong tinago ginadumala diin sukad sa walay-tinong kagahapon natago diha sa Diyos, kinsa milalang sa tanang butang.”—Efeso 3:8, 9.
6 Ang positibong tinamdan ni Pablo bahin sa iyang ministeryo maoy maayo kaayong panig-ingnan alang kanato. Sa iyang sulat ngadto sa mga taga-Roma, siya miingon: “Adunay kaikag sa akong bahin nga ipahayag ang maayong balita.” Wala niya ikaulaw ang maayong balita. (Roma 1:15, 16) Nabatonan niya ang hustong tinamdan ug masibotong nagtuman sa iyang ministeryo.
7. Sa iyang sulat sa mga taga-Roma, batok sa unsa nagpasidaan si Pablo?
7 Naila ni apostol Pablo ang panginahanglan sa paghupot ug madasigong panglantaw, busa iyang gitambagan ang mga Kristohanon sa Roma: “Ayaw paglangaylangay sa inyong alatimanon. Magmainiton sa espiritu. Pagpaulipon kang Jehova.” (Roma 12:11) Ang Gregong pulong nga gihubad ug “paglangaylangay” dunay ideya sa pagkahimong “tapolan, taspokan.” Bisan tuod dili tingali kita aktuwal nga maglangaylangay diha sa atong ministeryo, kitang tanan kinahanglang magmaigmat sa bisan unsang unang mga timailhan sa espirituwal nga pagkatapolan ug mohimog angayang mga pagpasibo sa atong tinamdan kon atong mamatikdan ang maong mga timailhan diha sa atong kaugalingon.—Proverbio 22:3.
8. (a) Unsay nahimong sama sa “nagdilaab nga kalayo” diha sa kasingkasing ni Jeremias, ug ngano? (b) Unsang leksiyon ang atong makat-onan gikan sa kasinatian ni Jeremias?
8 Ang espiritu sa Diyos makatabang usab kanato sa dihang kita maluya. Pananglitan, sa usa ka higayon si manalagnang Jeremias mibatig kaluya, ug siya naghunahunang mohunong sa iyang buluhaton isip manalagna. Miingon pa gani siya bahin kang Jehova: “Dili na ako maghisgot mahitungod kaniya, ug dili na ako mosulti pag-usab sa iyang ngalan.” Kini ba maoy pamatuod sa usa ka grabeng espirituwal nga kakulangan diha kang Jeremias? Dili. Sa pagkatinuod, ang lig-ong espirituwalidad ni Jeremias, ang iyang gugma alang kang Jehova, ug ang iyang kadasig alang sa kamatuoran nagpaarang kaniya sa pagpadayon sa pagpanagna. Siya misaysay: “Sa akong kasingkasing [ang pulong ni Jehova] nahisama sa usa ka nagdilaab nga kalayo nga natuob sulod sa akong mga bukog; ug ako gikapoyan sa pagpugong niini, ug dili na ako makaantos niini.” (Jeremias 20:9) Natural lamang nga ang matinumanong mga alagad sa Diyos makasinati ug kaluya matag karon ug unya. Apan sa dihang sila moampo kang Jehova alang sa tabang, iyang basahon ang ilang kasingkasing ug dagayang ihatag kanila ang iyang balaang espiritu kon, sama kang Jeremias, anaa sa ilang kasingkasing ang iyang pulong.—Lucas 11:9-13; Buhat 15:8.
“Ayaw Pagpalonga ang Kalayo sa Espiritu”
9. Unsay makapugong sa paglihok sa balaang espiritu alang kanato?
9 Gitambagan ni apostol Pablo ang mga taga-Tesalonica: “Ayaw pagpalonga ang kalayo sa espiritu.” (1 Tesalonica 5:19) Oo, ang mga lihok ug mga tinamdan nga kasukwahi sa diyosnong mga prinsipyo makapugong sa paglihok sa balaang espiritu alang kanato. (Efeso 4:30) Ang mga Kristohanon karon dunay asaynment sa pagsangyaw sa maayong balita. Giisip nato kining pribilehiyoa uban ang lalom nga pagtahod. Dili nato ikatingala nga kadtong wala makaila sa Diyos magtamay sa atong buluhatong pagsangyaw. Apan sa dihang ang usa ka Kristohanon tinuyong magpasagad sa iyang ministeryo, basin moresulta kini sa pagkapalong sa kalayo sa nagapalihok nga espiritu sa Diyos.
10. (a) Sa unsang paagi makaapektar kanato ang panglantaw sa atong isigkatawo? (b) Unsang hamiling panglantaw sa atong ministeryo ang gipahayag diha sa 2 Corinto 2:17?
10 Ang uban nga anaa sa gawas sa Kristohanong kongregasyon maglantaw tingali sa atong ministeryo ingong pagpanagtag lamang ug mga basahon. Ang uban sayop tingaling manghinapos nga mamalaybalay kita aron lamang sa pagdawat ug mga donasyon. Kon tugotan nato ang maong negatibong mga panglantaw nga mag-impluwensiya sa atong tinamdan, basin magpamenos kini sa atong pagkaepektibo diha sa ministeryo. Inay kay tugotan ang maong panghunahuna nga moapektar kanato, huptan nato ang panglantaw ni Jehova ug ni Jesus sa atong ministeryo. Gipahayag ni apostol Pablo kanang hamiling panglantaw sa dihang siya miingon: “Kami dili mga nagasuroyng-tigbaligya sa pulong sa Diyos ingon sa daghang tawo, apan gumikan sa katim-os, oo, ingon nga mga pinadala gikan sa Diyos, ilalom sa panan-aw sa Diyos, kauban ni Kristo, kami nagapamulong.”—2 Corinto 2:17.
11. Unsay nakapaarang sa unang mga Kristohanon sa pagpabiling madasigon bisan ilalom sa paglutos, ug sa unsang paagi ang ilang panig-ingnan mag-apektar kanato?
11 Wala madugay human mamatay si Jesus, ang iyang mga tinun-an sa Jerusalem nag-atubang ug usa ka yugto sa paglutos. Sila gibaharan ug gibaoran nga mohunong na sa pagsangyaw. Bisan pa niana, ang Bibliya nag-ingon nga sila “napuno sa balaang espiritu ug nanagsulti sa pulong sa Diyos uban ang kaisog.” (Buhat 4:17, 21, 31) Ang mga pulong ni Pablo kang Timoteo pipila ka tuig sa ulahi nagpasundayag sa positibong tinamdan nga angayng huptan sa mga Kristohanon. Si Pablo miingon: “Dili usa ka espiritu sa katalaw ang gihatag sa Diyos kanato, apan kanang sa gahom ug sa gugma ug sa pagkamabuot sa hunahuna. Busa ayawg kaulaw sa pagpanaksi bahin sa atong Ginoo, ni kanako man nga usa ka binilanggo tungod ug alang kaniya, apan dawata ang imong bahin sa pag-antos sa daotan tungod sa maayong balita sumala sa gahom sa Diyos.”—2 Timoteo 1:7, 8.
Unsay Obligasyon Nato sa Atong Silingan?
12. Unsa ang pangunang rason kon nganong kita mosangyaw sa maayong balita?
12 Aron mahuptan ang hustong tinamdan alang sa atong ministeryo, kinahanglang duna kitay hustong motibo. Nganong mosangyaw man kita? Ang pangunang rason masabtan diha sa mga pulong sa salmista: “Ang imong mga maunongon magadayeg kanimo [Jehova]. Sila magahisgot mahitungod sa himaya sa imong pagkahari, ug sila magasulti mahitungod sa imong pagkagamhanan, aron ipahibalo ngadto sa mga anak sa mga tawo ang iyang gamhanang mga buhat ug ang himaya sa kahalangdon sa iyang pagkahari.” (Salmo 145:10-12) Oo, kita mosangyaw aron dayegon si Jehova sa publiko ug balaanon ang iyang ngalan atubangan sa tanang katawhan. Bisan pag pipila lamang ang maminaw kanato, ang atong matinumanong pagmantala sa mensahe sa kaluwasan magadayeg kang Jehova.
13. Unsay magtukmod kanato sa pagpahibalo sa uban sa paglaom sa kaluwasan?
13 Mosangyaw usab kita tungod sa gugma alang sa katawhan ug aron malikayan ang pagkasad-an sa dugo. (Ezequiel 33:8; Marcos 6:34) Nalangkit niini ang mga pulong ni Pablo sa dihang naghisgot bahin niadtong anaa sa gawas sa Kristohanong kongregasyon: “Ngadto sa mga Griego ug mga Barbaro, sa mga maalamon ug sa mga walay-salabotan ako utangan.” (Roma 1:14) Gibati ni Pablo nga iyang obligasyon sa katawhan nga ipahayag ang maayong balita ngadto kanila, sanglit kabubut-on sa Diyos nga ang “tanang matang sa mga tawo maluwas.” (1 Timoteo 2:4) Karon, gibati nato ang samang gugma ug obligasyon ngadto sa atong silingan. Ang gugma ni Jehova sa katawhan nagpalihok kaniya sa pagpadala sa iyang Anak sa yuta aron mamatay alang kanila. (Juan 3:16) Usa kadto ka dakong pagsakripisyo. Atong ginasundog ang gugma ni Jehova sa dihang mogugol kita ug panahon ug paningkamot sa pagpahibalo sa uban sa maayong balita sa kaluwasan nga gipasukad diha sa halad ni Jesus.
14. Sa unsang paagi gihubit sa Bibliya ang kalibotan nga anaa sa gawas sa Kristohanong kongregasyon?
14 Ang mga Saksi ni Jehova nag-isip sa isigkatawo ingong posibleng mga membro sa Kristohanong panag-igsoonay. Kinahanglang mosangyaw kita nga maisogon, apan ang atong pagkamaisogon dili pagkamakiawayon. Tinuod, ang Bibliya naggamit ug bug-at nga mga termino sa dihang naghisgot bahin sa kalibotan sa katibuk-an. Ang pulong “kalibotan” mismo gigamit ni Pablo sa negatibong diwa sa dihang naghisgot siya bahin sa “kaalam niining kalibotana” ug sa “kalibotanong mga tinguha.” (1 Corinto 3:19; Tito 2:12) Gipahinumdoman usab ni Pablo ang mga Kristohanon sa Efeso nga sa dihang sila naglakaw “uyon sa sistema sa mga butang niining kalibotana,” sila “patay” sa espirituwal. (Efeso 2:1-3) Kining mga pulonga ug ang uban pang sama niini kaharmonya sa mga pulong ni apostol Juan: “Ang tibuok kalibotan nahimutang diha sa gahom sa tuman-kadaotang usa.”—1 Juan 5:19.
15. Bahin sa tagsatagsa ka tawo nga anaa sa gawas sa Kristohanong kongregasyon, unsay dili nato buhaton, ug nganong dili?
15 Apan, hinumdomi nga ang maong mga pahayag nagtumong sa kalibotan sa katibuk-an nga nahimulag sa Diyos, dili sa tagsatagsa ka tawo. Ang mga Kristohanon dili maghunahuna nga hukman daan kon sa unsang paagi si bisan kinsa mosanong sa buluhatong pagsangyaw. Wala silay pasukaranan sa paghubit ni bisan kinsa ingong mga kanding. Dili nato katungod ang pag-ingon kon unsay sangpotanan sa dihang si Jesus moabot aron sa paglain sa “mga karnero” gikan sa “mga kanding.” (Mateo 25:31-46) Si Jesus mao ang tinudlo nga maghuhukom; dili kita. Gawas pa, gipakita sa kasinatian nga ang pipila nga nagumon pag-ayo bisan sa kinangil-arang panggawi midawat sa mensahe sa Bibliya, nag-usab, ug nahimong hinlog-kinabuhi nga mga Kristohanon. Busa, bisan tuod may pipila ka tawo nga dili nato pakig-ubanan, dili kita magpanuko sa pagsulti kanila bahin sa paglaom sa Gingharian segun sa itugot sa kahigayonan. Ang Kasulatan naghisgot bahin sa pipila ka tawo kinsa, bisan dili pa mga magtutuo, “sa husto nahimutang alang sa kinabuhing walay-kataposan.” Sa ngadtongadto sila nahimong mga magtutuo. (Buhat 13:48) Wala gayod kita masayod kon kinsay mahiligon sa pagkamatarong hangtod nga kita makapamatuod na—tingali sa makadaghan. Nga naghunahuna niini, atong isipon kadtong wala pa modawat sa mensahe sa kaluwasan uban ang “kalumo” ug “halawom nga pagtahod,” nga maglaom nga ang pipila kanila basin mosanong sa mensahe sa kinabuhi.—2 Timoteo 2:25; 1 Pedro 3:15.
16. Unsa ang usa ka rason kon nganong buot natong maugmad ang “arte sa pagpanudlo”?
16 Ang pag-ugmad ug mga kahanas ingong mga magtutudlo magpasamot sa atong kasibot nga mopahayag sa maayong balita. Sa pag-ilustrar: Ang usa ka kulbahinam nga dula o esport dili tingali makaiikag alang sa usa ka tawo nga dili makamaong modula niana. Apan alang sa usa nga maayong modula niana, kini makalingaw. Sa susama, ang mga Kristohanon nga mag-ugmad sa “arte sa pagpanudlo” magpauswag sa ilang kalipay diha sa ministeryo. (2 Timoteo 4:2; Tito 1:9) Gitambagan ni Pablo si Timoteo: “Buhata ang kutob sa imong maarangan nga ikapakita ang imong kaugalingon nga inuyonan sa Diyos, usa ka mamumuo nga walay angay ikaulaw, nga sa husto nagagamit sa pulong sa kamatuoran.” (2 Timoteo 2:15) Sa unsang paagi maugmad nato ang atong mga kahanas sa pagpanudlo?
17. Sa unsang paagi kita ‘makaugmad ug pangandoy’ alang sa kahibalo sa Bibliya, ug sa unsang paagi ang maong kahibalo makabenepisyo sa atong ministeryo?
17 Ang usa ka paagi mao ang pagbaton ug dugang tukmang kahibalo. Si apostol Pedro nag-awhag kanato: “Sama sa bag-o pang nahimugso nga mga bata, ugmara ang pagpangandoy sa walay-sambog nga gatas nga iya sa pulong, aron nga pinaagi niini managtubo kamo ngadto sa kaluwasan.” (1 Pedro 2:2) Ang usa ka himsog nga bata kinaiyanhong mangandoy ug gatas. Apan, ang usa ka Kristohanon tingali kinahanglang ‘mag-ugmad sa pangandoy’ alang sa kahibalo sa Bibliya. Mahimo kini pinaagi sa pag-ugmad ug maayong mga batasan sa pagtuon ug pagbasa. (Proverbio 2:1-6) Ang paningkamot ug pagdisiplina-sa-kaugalingon gikinahanglan aron kita mahimong hanas nga mga magtutudlo sa Pulong sa Diyos, apan ang maong mga paningkamot magantihon. Ang kalipay nga nagsumikad sa pagsusi sa Pulong sa Diyos maghimo kanatong magmainiton sa espiritu sa Diyos, nga masibotong makig-ambit sa uban sa mga butang nga atong nakat-onan.
18. Sa unsang paagi ang Kristohanong mga tigom magsangkap kanato sa pagdumala sa pulong sa kamatuoran sa hustong paagi?
18 Ang Kristohanong mga tigom maoy hinungdanon usab nga bahin diha sa atong hanas nga paggamit sa Pulong sa Diyos. Sa dihang ang mga teksto sa Bibliya ginabasa panahon sa mga pakigpulong publiko ug sa ubang mga panaghisgot sa Kasulatan, maayong sundan nato kana diha sa atong mga Bibliya. Maalamon kon maminaw kita pag-ayo sa mga bahin sa panagkatigom, lakip niadtong espesipikong naghisgot sa atong buluhatong pagsangyaw. Dili gayod nato pakamenoson ang bili sa mga demonstrasyon, tingali tugotan ang atong kaugalingon nga malinga. Sa makausa pa, ang pagdisiplina-sa-kaugalingon ug pagsentro sa pagtagad gikinahanglan. (1 Timoteo 4:16) Ang Kristohanong mga tigom magpalig-on sa atong pagtuo, motabang kanato sa pag-ugmad ug pangandoy sa Pulong sa Diyos, ug magbansay kanato nga mahimong masibotong mga magmamantala sa maayong balita.
Makasalig Kita sa Pagpaluyo ni Jehova
19. Nganong hinungdanon ang makanunayong pagpakig-ambit diha sa buluhatong pagsangyaw?
19 Ang mga Kristohanon nga ‘mainiton sa espiritu’ ug masiboton sa pagpahayag sa maayong balita maningkamot nga makig-ambit nga makanunayon diha sa ministeryo. (Efeso 5:15, 16) Tinuod, lainlain ang mga sirkumstansiya, ug dili tanan ang makagugol sa samang gitas-on sa panahon diha niining nagaluwas-kinabuhi nga buluhaton. (Galacia 6:4, 5) Bisan pa niana, tingali mas hinungdanon pa kay sa katibuk-ang panahon nga atong gigugol diha sa buluhatong pagsangyaw mao ang kasubsob sa atong pagsulti bahin sa atong paglaom ngadto sa uban. (2 Timoteo 4:1, 2) Kon magsige kitag sangyaw, mas maapresyar nato ang kahinungdanon niining buluhatona. (Roma 10:14, 15) Mouswag ang atong pagkamaluluy-on ug pagbati sa isigkaingon sa dihang kanunay natong mahibalag ang sinserong mga tawo nga nanghupaw ug nag-agulo ug walay paglaom.—Ezequiel 9:4; Roma 8:22.
20, 21. (a) Unsang buluhatona ang anaa pa sa atong unahan? (b) Sa unsang paagi si Jehova nagpaluyo sa atong mga paningkamot?
20 Gipiyalan kita ni Jehova sa maayong balita. Mao kini ang unang sugo nga atong nadawat gikan kaniya ingong iyang “mga isigkamagbubuhat.” (1 Corinto 3:6-9) Masiboton kitang motuman niining hinatag-sa-Diyos nga responsibilidad nga bug-os kalag, sa labing maayo nga atong maarangan. (Marcos 12:30; Roma 12:1) Dunay daghan pang mga tawo nga mahiligon sa pagkamatarong diha sa kalibotan nga gigutom sa kamatuoran. Daghan pa ang buluhaton, apan makasalig kita sa pagpaluyo ni Jehova samtang bug-os natong ginatuman ang atong ministeryo.— 2 Timoteo 4:5.
21 Si Jehova naghatag kanato sa iyang espiritu ug nagsangkap kanato sa “espada sa espiritu,” ang Pulong sa Diyos. Uban sa iyang tabang makabuka kita sa atong mga baba “aron ipahibalo ang sagradong tinago sa maayong balita uban ang kagawasnon sa pagsulti.” (Efeso 6:17-20) Hinaot ipamulong bahin kanato ang gisulat ni apostol Pablo sa mga Kristohanon sa Tesalonica: “Ang maayong balita nga among giwali wala makaplagi taliwala kaninyo uban ang mga sulti lamang apan usab uban ang gahom ug uban ang balaang espiritu ug hugot nga pagtuo.” (1 Tesalonica 1:5) Oo, ipahayag nato ang maayong balita nga masiboton!
Mubo nga Repaso
• Tungod sa mga kabalaka sa kinabuhi, unsay mahimong mahitabo sa atong kadasig diha sa ministeryo?
• Sa unsang paagi ang atong tinguha sa pagpahayag sa maayong balita mahisama sa “nagdilaab nga kalayo” diha sa atong kasingkasing?
• Unsang negatibong mga tinamdan ngadto sa ministeryo ang angay natong likayan?
• Sa katibuk-an, unsaon nato paglantaw kadtong dili nato parehas ug pagtuo?
• Sa unsang paagi si Jehova motabang kanato sa paghupot sa atong kadasig diha sa buluhatong pagsangyaw?
[Mga hulagway sa panid 9]
Ang mga Kristohanon nagasundog sa kadasig ni Pablo ug Jeremias
[Mga hulagway sa panid 10]
Ang atong kasibot diha sa ministeryo gipalihok sa gugma sa Diyos ug silingan