Ibutang Kanunay sa Hunahuna ang Adlaw ni Jehova

“Sa ulahing mga adlaw adunay mangabot nga mga mabiaybiayon.”​—2 PEDRO 3:3.

 1. Unsang pagkadinalian ang gibati sa usa ka modernong-adlawng Kristohanon?

USA ka bug-os panahong ministro sa kapin sa 66 ka tuig nagsulat: “Dulot ko gayod nga gibati ang pagkadinalian sa panahon. Ang Armagedon sa tanang higayon moabot, sa akong hunahuna, sa adlaw sa sunod ugma. (Pinadayag 16:14, 16) Sama sa akong amahan, ug sa iyang amahan, ako nagkinabuhi sama sa giawhag sa apostol [Pedro], nga ‘kanunayng naghupot nga duol sa hunahuna ang pagkaanaa sa adlaw ni Jehova.’ Gilantaw ko kanunay ang gisaad nga bag-ong kalibotan ingong ‘katinuoran bisan tuod wala makita.’”​—2 Pedro 3:​11, 12; Hebreohanon 11:1; Isaias 11:​6-9; Pinadayag 21:​3, 4.

 2. Unsay kahulogan sa kanunayng paghupot nga duol sa hunahuna ang adlaw ni Jehova?

² Ang ekspresyon ni Pedro nga “kanunayng ginahuptan nga duol sa hunahuna” may kalabotan sa adlaw ni Jehova nagpasabot nga wala nato kini kalimti. Dili gayod nato kalimtan nga ang adlaw sa dihang pagalaglagon ni Jehova kining sistemaha sa mga butang ingong pasiuna sa pagtukod sa iyang gisaad nga bag-ong kalibotan duol na kaayo. Kini angay nga matuod gayod kanato nga klarong makita nato kini, nga anaa gayod sa atong unahan. Ingon gayod niana ka tinuod kana sa mga manalagna sa Diyos sa karaan, ug kanunay nila kanang gihisgotan nga duol na.​—Isaias 13:​6; Joel 1:​15; 2:​1; Abdias 15; Sofonias 1:​7, 14.

 3. Unsa kahay nakapukaw sa tambag ni Pedro bahin sa adlaw ni Jehova?

³ Nganong giawhag kita ni Pedro sa paglantaw sa adlaw ni Jehova nga daw kini moabot, sa laing pagkasulti, “sa adlaw sa sunod ugma”? Tungod kay ang uban dayag nga nagsugod sa pagbiaybiay sa ideya sa gisaad nga presensiya ni Kristo diin ang mga mamumuhat ug daotan pagasilotan. (2 Pedro 3:​3, 4) Busa diha sa kapitulo 3 sa iyang ikaduhang sulat, nga atong hisgotan karon, gitubag ni Pedro ang mga sumbong niini nga mga mayubiton.

Mabinationg Pangaliyupo nga Hinumdoman

 4. Unsay buot ni Pedro nga atong hinumdoman?

⁴ Ang gugma ni Pedro alang sa iyang mga igsoon gipakita pinaagi sa iyang masubsob nga pagtawag kanila niining kapituloha ingong “mga hinigugma.” Mabinationg naghangyo kanila sa dili pagkalimot sa gitudlo kanila, si Pedro nagsugod: “Mga hinigugma, . . . ginapukaw ko ang tin-aw ninyong mga kagahom sa panghunahuna agig pagpahinumdom, nga kinahanglan ninyong hinumdoman ang mga pulong nga kanhi gisulti sa balaang mga propeta ug ang sugo sa Ginoo ug Manluluwas pinaagi sa inyong mga apostol.”​—2 Pedro 3:​1, 2, 8, 14, 17; Judas 17.

 5. Unsay giingon sa ubang mga manalagna bahin sa adlaw ni Jehova?

⁵ Unsang “mga pulong nga kanhi gisulti sa balaang mga propeta” nga giawhag ni Pedro ang mga magbabasa sa paghinumdom? Aw, kadtong bahin sa presensiya ni Kristo diha sa Gingharianong gahom ug bahin sa paghukom sa mga dili-diyosnon. Nahatagan nag pagtagad ni Pedro kining mga pulonga. (2 Pedro 1:​16-19; 2:​3-10) Si Judas naghisgot bahin kang Enoch, kinsa mao ang unang narekord nga manalagna nga nagpasidaan sa mabug-at nga paghukom sa Diyos batok sa mga mamumuhat ug daotan. (Judas 14, 15) Ang ubang mga manalagna misunod kang Enoch, ug si Pedro dili buot nga atong kalimtan ang ilang gisulat.​—Isaias 66:​15, 16; Sofonias 1:​15-18; Zacarias 14:​6-9.

 6. Unsang mga pulong ni Kristo ug sa iyang mga apostoles ang makahatag kanatog kadan-agan bahin sa adlaw ni Jehova?

⁶ Dugang pa, gisultihan ni Pedro ang iyang mga magbabasa sa paghinumdom sa “sugo sa Ginoo ug Manluluwas.” Ang sugo ni Jesus naglakip sa tambag: “Tagda ang inyong kaugalingon nga ang inyong mga kasingkasing dili gayod mabug-atan . . . ug sa kalit kanang adlawa dihadiha modangat nganha kaninyo ingon nga usa ka lit-ag.” “Padayon sa pagtan-aw, padayon sa pagtukaw, kay wala kamo mahibalo kon kanus-a ang tinudlong panahon.” (Lucas 21:​34-36; Marcos 13:33) Si Pedro nag-awhag usab kanato sa pagpatalinghog sa mga pulong sa mga apostoles. Si apostol Pablo, pananglitan, nagsulat: “Ang adlaw ni Jehova moabot nga sama gayod sa usa ka kawatan diha sa kagabhion. Busa, dili kita mangatulog sama sa ginahimo sa uban, kundili managtukaw kita ug managhupot sa atong panimuot.”​—1 Tesalonica 5:​2, 6.

Ang mga Tinguha sa mga Mayubiton

7, 8. (a) Unsang matanga sa mga tawo kadtong nanagbiaybiay sa pasidaang mga mensahe sa Diyos? (b) Unsay gipangangkon sa mga mayubiton?

⁷ Sama sa gipadayag na, ang katarongan sa tambag ni Pedro mao nga ang uban misugod sa pagbiaybiay sa maong mga pasidaan, sama sa pagtamay sa mga Israelinhon sa unang panahon sa mga manalagna ni Jehova. (2 Cronicas 36:16) Si Pedro nagpatin-aw: “Hibaloi ninyo kini nga una, nga sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa ilang kaugalingong mga tinguha.” (2 Pedro 3:3) Si Judas nag-ingon nga ang mga tinguha niining mga mayubiton maoy “alang sa dili-diyosnong mga butang.” Iyang gitawag sila nga “mga tawong hayopnon, walay espirituwalidad.”​—Judas 17-19.

⁸ Ang bakak nga mga magtutudlo kinsa giingon ni Pedro nga “nagaagap sa unod uban sa tinguha nga hugawan kini” malagmit maoy usa niining mga mayubiton nga walay espirituwalidad. (2 Pedro 2:​1, 10, 14) Sila mabiaybiayong nangutana sa matinumanong mga Kristohanon: “Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.”​—2 Pedro 3:4.

 9. (a) Nganong ang mga mayubiton naningkamot sa pagdaot sa pagbati sa pagkadinalian nga tuhop diha sa Pulong sa Diyos? (b) Sa unsang paagi ang pagbutang kanunay diha sa hunahuna sa adlaw ni Jehova maoy usa ka panalipod kanato?

⁹ Nganong may pangyubit? Nganong isugyot nga mahimong dili gayod mahitabo ang presensiya ni Kristo, nga ang Diyos wala gayod makapangilabot sa tawhanong mga kalihokan ug dili gayod mangilabot? Aw, pinaagi sa pagdaot sa pagbati sa pagkadinalian nga tuhop diha sa Pulong sa Diyos, kining samag-mananap nga mga mayubiton nanglimbasog sa pagdaldal sa uban ngadto sa usa ka kahimtang sa pagkawalay-pagtagad sa espirituwal ug busa maghimo kanila nga sayon nga biktima sa hakog nga mga pagpangdaldal. Pagkagamhanang pagpadasig alang kanato karon sa pagpabiling nagamata sa espirituwal! Hinaot nga atong ibutang kanunay sa hunahuna ang adlaw ni Jehova ug hinumdoman kanunay nga ang iyang mga mata anaa kanato! Sa ingon kita mapukaw sa pag-alagad kang Jehova nga madasigon ug huptan ang atong moral nga kaputli.​—Salmo 11:​4; Isaias 29:​15; Ezequiel 8:​12; 12:​27; Sofonias 1:12.

Tinuyo ug Talamayon

10. Sa unsang paagi gipamatud-an ni Pedro nga sayop ang mga mayubiton?

¹⁰ Gisalikway sa maong mga mayubiton ang hinungdanong hitabo. Gituyo nila kini pagsalikway ug naningkamot nga ang uban madala sa pagkalimot niana. Ngano? Aron mas daling madaldal ang mga tawo. “Kay, sumala sa buot nila,” si Pedro nagsulat, “ilang nasayloan pagmatikod kining hitaboa.” Unsang hitaboa? “Nga dihay mga langit gikan sa kakaraanan ug usa ka yuta nga lig-ong nagbarog gikan sa tubig ug taliwala sa tubig ug taliwala sa tubig pinaagi sa pulong sa Diyos; ug pinaagi kanila ang kalibotan niadtong panahona nakaagom sa kalaglagan sa dihang gilunopan kini sa tubig.” (2 Pedro 3:​5, 6) Oo, gipaphaan ni Jehova ang yuta ug pagkadaotan panahon sa Lunop sa mga adlaw ni Noe, usa ka hitabo nga gipasiugda usab ni Jesus. (Mateo 24:​37-39; Lucas 17:​26, 27; 2 Pedro 2:5) Busa, sukwahi sa gipamulong sa mga mayubiton, ang tanang butang wala magpadayon nga “mao ra gayod sukad sa sinugdan sa kalalangan.”

11. Unsang ahat-sa-panahong mga pagpaabot sa unang mga Kristohanon ang nag-agak sa uban sa pagbiaybiay kanila?

¹¹ Gibiaybiay sa mga mayubiton ang matinumanong mga Kristohanon tungod kay sila adunay mga gipaabot nga wala pa matuman. Sa dihang hapit nang mamatay si Jesus, ang iyang mga tinun-an “naghunahuna nga ang gingharian sa Diyos magapadayag sa kaugalingon niini dihadiha.” Dayon, human nga siya gibanhaw sila nangutana kon tukoron ba dihadiha ang Gingharian. Lain pa, mga napulo ka tuig una pa gisulat ni Pedro ang iyang ikaduhang sulat, ang uban ‘naukyab’ sa “binaba nga mensahe” o sa “usa ka sulat,” nga gikaingon nga gikan kang apostol Pablo o sa iyang mga kauban, “sa diwang ang adlaw ni Jehova ania na.” (Lucas 19:11; 2 Tesalonica 2:2; Buhat 1:​6) Apan, ang maong mga pagpaabot sa mga tinun-an ni Jesus dili sayop, ahat lang sa panahon. Ang adlaw ni Jehova moabot!

Ang Pulong sa Diyos Kasaligan

12. Sa unsang paagi ang Pulong sa Diyos napamatud-ang kasaligan sa mga tagna niini bahin sa “adlaw ni Jehova”?

¹² Ingon sa gipadayag na sa nag-una, ang una-Kristohanong mga manalagna kanunayng nagpasidaan nga ang adlaw sa pagpanimalos ni Jehova duol na. Usa ka gamayng katumanan sa “adlaw ni Jehova” nahitabo sa 607 W.K.P. sa dihang gipakanaog ni Jehova ang iyang panimalos diha sa iyang badlongong katawhan. (Sofonias 1:​14-18) Sa ulahi, ang ubang mga nasod, lakip ang Babilonya ug Ehipto, nag-antos ug samang gamayng katumanan sa “adlaw ni Jehova.” (Isaias 13:​6-9; Jeremias 46:​1-10; Adbias 15) Ang kataposan sa unang-siglong Hudiyohanong sistema sa mga butang gitagna usab, ug kini nahitabo sa dihang gilaglag sa kasundalohang Romano ang Judea sa 70 K.P. (Lucas 19:​41-44; 1 Pedro 4:7) Apan si Pedro nagpunting sa umaabot nga “adlaw ni Jehova,” usa nga wala ra sa kumingking bisan ang tibuok-yutang Lunop sa gidak-on!

13. Unsang panig-ingnan sa kasaysayan ang nagpakita sa pagkatinuod sa kataposan sa sistema sa mga butang?

¹³ Gipresentar ni Pedro ang iyang paghubit nianang umaabot nga kalaglagan, nga nag-ingon: “Apan pinaagi sa mao ra nga pulong.” Mao pay iyang pag-ingon nga “pinaagi sa pulong sa Diyos,” ang wala-pay-Lunop nga yuta nagbarog “gikan sa tubig ug taliwala sa tubig.” Kining kahimtanga, nga gibatbat diha sa asoy sa Bibliya sa paglalang, nagpaposible sa Lunop sa dihang gibubo ang tubig pinaagi sa direksiyon, o pulong, sa Diyos. Si Pedro nagpadayon: “Pinaagi sa mao ra nga pulong [sa Diyos] ang mga langit ug ang yuta nga mao karon gikatagana alang sa kalayo ug gikagahin sa adlaw sa paghukom ug sa kalaglagan sa mga tawong dili-diyosnon.” (2 Pedro 3:​5-7; Genesis 1:​6-8) Kita adunay kasaligang pulong ni Jehova alang niana! Iyang pagataposon “ang mga langit ug ang yuta”​—niining sistema sa mga butang​—diha sa kalayonhong kasuko sa iyang dakong adlaw! (Sofonias 3:8) Apan kanus-a?

Maikagon Alang sa Pag-abot sa Kataposan

14. Nganong kita makasalig nga kita karon nagkinabuhi na “sa kataposang mga adlaw”?

¹⁴ Ang mga tinun-an ni Jesus buot masayod kon kanus-a moabot ang kataposan, busa ilang gipangutana siya: “Unsa man unya ang ilhanan sa imong pagkaanaa ug sa katiklopan sa sistema sa mga butang?” Sila dayag nga nangutana kon kanus-a matapos ang Hudiyohanong sistema, apan ang tubag ni Jesus nagpunting ilabina kon kanus-a mag-antos sa kalaglagan ang presenteng ‘mga langit ug yuta.’ Si Jesus nagtagnag mga butang sama sa dagkong mga gubat, kakulangan sa pagkaon, mga linog, mga sakit, ug krimen. (Mateo 24:3-14; Lucas 21:​5-36) Sukad sa tuig 1914, kita nagpakakita sa ilhanan nga nagakatuman nga gihatag ni Jesus alang “sa katiklopan sa sistema sa mga butang” maingon man sa mga butang nga gihisgotan ni apostol Pablo nga magtimaan “sa kataposang mga adlaw.” (2 Timoteo 3:​1-5) Sa pagkamatuod, hilabihan kaayo ka daghan ang ebidensiya nga kita nagkinabuhi na sa panahon sa kataposan niining sistemaha sa mga butang!

15. Ang mga Kristohanon kiling sa pagbuhat ug unsa bisan pa sa pasidaan ni Jesus?

¹⁵ Ang mga Saksi ni Jehova maikagon kaayong mahibalo kon kanus-a mahitabo ang adlaw ni Jehova. Sa ilang kaikag sila usahay misulay sa pagbanabana kon kanus-a kaha kini moabot. Apan sa pagpamanabana, sila napakyas, sama sa unang mga tinun-an ni Jesus, sa pagpatalinghog sa pasidaan sa ilang Agalon nga kita “wala mahibalo kon kanus-a ang tinudlong panahon.” (Marcos 13:​32, 33) Gibiaybiay sa mga mayubiton ang matinumanong mga Kristohanon sa ilang ahat nga mga pagpaabot. (2 Pedro 3:​3, 4) Bisan pa niana, ang adlaw ni Jehova moabot, gilig-on kini ni Pedro, sumala sa Iyang orasan.

Kinahanglan ang Hunahuna ni Jehova

16. Unsang tambag ang maalamon natong patalinghogan?

¹⁶ Kinahanglan nato ang hunahuna ni Jehova maylabot sa panahon, ingon sa gipahinumdom kanato karon ni Pedro: “Apan, ayaw sayloi sa pagmatikod kining butanga, mga hinigugma, nga ang usa ka adlaw kang Jehova maoy ingon sa usa ka libo ka tuig ug ang usa ka libo ka tuig ingon sa usa ka adlaw.” Pagkamubo kon itandi ang atong gitas-on sa kinabuhi nga 70 o 80 ka tuig! (2 Pedro 3:8; Salmo 90:​4, 10) Busa kon ang katumanan sa mga saad sa Diyos daw nalangan, angay natong dawaton ang tambag sa manalagna sa Diyos: “Bisan kon [ang tinudlong panahon] malangan, padayon sa pagpaabot niini; kay kini moabot gayod. Kini dili magalangan.”​—Habacuc 2:3.

17. Bisag ang kataposang mga adlaw nagpadayon nga mas dugay kay sa gilaoman sa daghan, bahin sa unsa nga kita masaligon?

¹⁷ Nganong ang kataposang mga adlaw niining sistemaha nagpadayon nga mas dugay kay sa gilaoman sa daghan? Tungod sa usa ka maayong katarongan, ingon sa sunod nga gipatin-aw ni Pedro: “Si Jehova dili hinayan labot sa iyang saad, ingon sa pagkahinayan nga giisip sa pipila ka tawo, kundili mapailobon siya kaninyo tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Gikonsiderar ni Jehova kon unsa ang labing maayo alang sa tanang katawhan. Ang iyang kabalaka maoy alang sa mga kinabuhi sa mga tawo, kay siya nag-ingon: “Ako walay kalipay sa kamatayon sa tawong daotan, apan nga motalikod ang daotan gikan sa iyang dalan ug magkinabuhi.” (Ezequiel 33:11) Busa kita makasalig nga ang kataposan moabot sa tukma gayod nga panahon sa katumanan sa katuyoan sa atong maalamon-sa-tanan, mahigugmaong Maglalalang!

Unsay Mahanaw?

18, 19. (a) Nganong determinado si Jehova sa paglaglag niining sistemaha sa mga butang? (b) Giunsa paghubit ni Pedro ang kataposan niini nga sistema, ug unsa man gayoy pagalaglagon?

¹⁸ Tungod kay gihigugma gayod ni Jehova kadtong nag-alagad kaniya, iyang pagapaphaon ang tanan nga maghatag kanila ug kaguol. (Salmo 37:​9-11, 29) Nagpasiugda, sama sa gisulat ni Pablo nga sayo pa, nga kining kalaglagan moabot sa wala dahomang panahon, si Pedro nagsulat: “Ang adlaw ni Jehova moabot ingon sa usa ka kawatan, diin ang mga langit motaliwan uban ang nagasagitsit nga kabanha, apan ang mga elemento kay hilabihan kainit mangatunaw, ug ang yuta ug ang mga buhat diha niana mahikyad.” (2 Pedro 3:10; 1 Tesalonica 5:​2) Ang literal nga mga langit ug yuta wala mawagtang sa Lunop, ni mawagtang kini sa adlaw ni Jehova. Nan, unsay “motaliwan,” o malaglag?

¹⁹ Ang tawhanong mga kagamhanan nga nagmando sa katawhan samag “mga langit” matapos ug maingon man ang “yuta,” o ang dili-diyosnong katilingban sa tawo. Ang “nagasagitsit nga kabanha” tingali magtimaan sa kalit nga paglabay sa mga langit. “Ang mga elemento” nga naglangkob sa nagakadaot nga tawhanong katilingban “mangatunaw,” o malaglag. Ug ang “yuta,” lakip sa “mga buhat diha niana,” “mahikyad.” Bug-os nga iyagyag ni Jehova ang daotang mga buhat sa mga tawo samtang iyang dalhon ang tibuok kalibotang sistema sa angay niini nga kataposan.

Padayong Isentro ang Panan-aw Diha sa Inyong Paglaom

20. Sa unsang paagi ang atong mga kinabuhi maapektohan sa atong kahibalo sa mga hitabo nga anaa sa unahan?

²⁰ Sanglit duol na kining dramatikanhong mga hitabo, si Pedro nag-ingon nga angay kitang makiglangkit “sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug kanunayng ginahuptan nga duol sa hunahuna ang pagkaanaa sa adlaw ni Jehova.” Dili gayod kana kaduhaduhaan! “Ang mga langit kay nagakalayo maugdaw ug ang mga elemento kay hilabihan kainit mangatunaw!” (2 Pedro 3:​11, 12) Ang kamatuoran nga kining dramatikanhong mga hitabo mahimong magsugod sa pagkahitabo ugma angay makaapektar sa tanang butang nga atong himoon o giplanong himoon.

21. Unsay mopuli sa presenteng mga langit ug yuta?

²¹ Si Pedro karon nagsugid kanato kon unsay mopuli sa daang sistema, nga nag-ingon: “Apan adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.” (2 Pedro 3:13; Isaias 65:​17) Ah, pagkadakong kahupayan! Si Kristo ug ang iyang 144,000 ka kaubang mga magmamando maoy molangkob sa “bag-ong” kagamhananong “mga langit,” ug ang mga tawong makalabang buhi sa kataposan niining kalibotana maglangkob sa “bag-ong yuta.”​—1 Juan 2:​17; Pinadayag 5:​9, 10; 14:​1, 3.

Hupti ang Pagbati sa Pagkadinalian ug Moral nga Kaputli

22. (a) Unsay makatabang kanato sa paglikay sa bisan unsang espirituwal nga buling o lama? (b) Unsang kapeligrohan ang gipasidaan ni Pedro?

²² “Busa, mga hinigugma,” nagpadayon si Pedro, “sanglit nagapaabot man kamo niining mga butanga, buhata kutob sa inyong maarangan nga makaplagan niya sa kataposan nga walay-buling ug walay-lama ug anaa sa pakigdait. Dugang pa, isipa ang pailob sa atong Ginoo ingong kaluwasan.” Ang maikagong pagpaabot ug paglantaw sa daw nalangan nga adlaw ni Jehova ingong usa ka ekspresyon sa pagpailob sa Diyos motabang kanato sa paglikay sa bisan unsang espirituwal nga buling o lama. Apan, adunay kapeligrohan! Si Pedro nagpasidaan nga diha sa mga sinulat sa “atong hinigugmang igsoon nga si Pablo . . . may pipila ka butang nga lisod sabton, nga ginalubag sa mga wala-matudloi ug sa mga mabalhinon, ingon sa ilang ginahimo usab sa uban pa sa mga Kasulatan, ngadto sa ilang kaugalingong kalaglagan.”​—2 Pedro 3:​14-16.

23. Unsa ang panghinapos nga tambag ni Pedro?

²³ Dayag nga gituis sa bakak nga mga magtutudlo ang mga sinulat ni Pablo bahin sa dili-takos nga kalulot sa Diyos, nga gigamit kini ingong pasangil sa malaw-ayng panggawi. Tingali mao kini ang anaa sa hunahuna ni Pedro sa dihang iyang gisulat ang iyang panamilit nga tambag: “Busa, kamo, mga hinigugma, kay nakabaton man niining nahiuna nga kahibalo, pagbantay kamo nga dili kamo madala palayo uban kanila pinaagi sa sayop sa mga masupilon-balaod nga katawhan ug mangahulog gikan sa kaugalingon ninyong kalig-on.” Dayon iyang gitapos ang iyang sulat, nga nag-awhag: “Padayon kamo sa pagtubo diha sa dili-takos nga kalulot ug sa kahibalo sa atong Ginoo ug Manluluwas nga si Jesu-Kristo.”​—2 Pedro 3:​17, 18.

24. Unsang tinamdan ang angay huptan sa tanang alagad ni Jehova?

²⁴ Matin-aw, si Pedro nagtinguha sa paglig-on sa iyang mga igsoon. Iyang gitinguha nga ang tanan makabaton sa tinamdan nga gipahayag sa matinumanong 82-anyos nga Saksi nga gikutlo sa sinugdan: “Ako nagkinabuhi sama sa giawhag sa apostol, nga ‘kanunayng naghupot nga duol sa hunahuna ang pagkaanaa sa adlaw ni Jehova.’ Gilantaw ko kanunay ang gisaad nga bag-ong kalibotan ingong ‘katinuoran bisan tuod wala makita.’” Hinaot nga kitang tanan magkinabuhi sa samang paagi.

Unsay Imong Tubag?

◻ Unsay kahulogan sa “ginahuptan nga duol sa hunahuna” ang adlaw ni Jehova?

◻ Unsay gituyo pagsalikway sa mga mayubiton, ug ngano?

◻ Unsang katarongan nga gibiaybiay sa mga mayubiton ang matinumanong mga Kristohanon?

◻ Unsang panghunahuna ang angay natong huptan?

[Hulagway sa panid 23]

Ibutang kanunay sa hunahuna ang adlaw ni Jehova . . .

[Hulagway sa panid 24]

. . . ug ang bag-ong kalibotan nga mosunod