Unsa Gayong Matanga sa mga Tawo Angay Kamo?

¹ Usa ka panahon sa paghusay nagakaduol na alang sa tanang katawhan. Kini ang panahon nga ipahamtang ang balaang paghukom batok sa mga daotan; kini usab usa ka panahon sa kaluwasan alang sa mga matarong. Ang tanang tawo unya nga buhi magapanubag sa paagi sa ilang pagkinabuhi sa ilang mga kinabuhi. Uban sa maong panghunahuna, si Pedro nagapangutana: “Unsa gayong matanga sa mga tawo angay kamo”? Iyang gipasiugda ang kahinungdanon sa ‘balaang mga buhat sa panggawi, mga buhat sa diyosnong pagkamahinalaron, ug kanunayng ginahuptan nga duol sa hunahuna ang pagkaanaa sa adlaw ni Jehova,’ maingon man usab ang panginahanglan nga mahimong ‘walay-buling, walay-lama, ug anaa sa pakigdait.’​—2 Ped. 3:11-14.

² Mga Balaang Buhat sa Panggawi ug mga Buhat sa Diyosnong Pagkamahinalaron: Ang balaang panggawi nagalakip sa mga buhat nga nagapakita ug pagtahod sa mga prinsipyo sa Bibliya. (Tito 2:7, 8) Ang usa ka Kristohanon kinahanglang maglikay sa kalibotanong panggawi nga tinukmod sa mahakogon, unodnong mga tinguha.​—Roma 13:11, 14.

³ Ang “diyosnong pagkamahinalaron” gihubit ingong “personal nga kawili sa Diyos, nga nagasumikad sa kasingkasing nga gipalihok sa halalom nga pagpabili sa iyang madanihong mga hiyas.” Ang atong kadasig sa ministeryo maoy usa ka paagi sa pagpadayag niining hiyasa. Ang atong motibo sa pagsangyaw maoy labaw kay sa yanong katungdanan; kini nagasumikad sa usa ka lalom-dulot nga gugma kang Jehova. (Mar. 12:29, 30) Ingong napatukmod sa maong gugma, atong giisip ang atong ministeryo ingong kapahayagan sa atong diyosnong pagkamahinalaron. Ang atong pakig-ambit diha sa pagsangyawng buluhaton kinahanglan nga makanunayon. Kini kinahanglang mahimong bahin sa atong kinatibuk-ang eskedyul sa senemanang kalihokan.​—Heb. 13:15.

⁴ Ang paghupot sa adlaw ni Jehova nga “duol sa hunahuna” nagapasabot nga padayong huptan kini nga panguna sa atong adlaw-adlaw nga mga hunahuna, nga dili gayod ibutang kini sa likod lamang. Kini nagapasabot nga padayong unahon ang mga interes sa Gingharian sa atong mga kinabuhi.​—Mat.6:33.

⁵ Walay-buling, Walay-lama, ug Anaa sa Pakigdait: Ingong bahin sa dakong panon, ato nang ‘gilabhan ang atong taas-nga-bisti ug nagpaputi niini sa dugo sa kordero.’ (Pin. 7:14) Ang pagka “walay-buling” nagapasabot nga kita nagapanalipod sa atong hinlo, dedikadong mga kinabuhi nga dili masabwagan sa mga hugaw gikan sa kalibotan. Kita padayong nagahupot nga “walay-lama” pinaagi sa dili pagtugot sa di-diyosnon, materyalistikanhong pangagpas nga magdaot sa atong Kristohanong personalidad. (Sant. 1:27; 1 Juan 2:15-17) Atong ginapakita nga kita nagakinabuhi nga “anaa sa kalinaw” pinaagig pagbanaag sa “kalinaw sa Diyos” sa tanan natong mga pakiglabot sa uban.​—Filip. 4:7; Roma 12:18; 14:19.

⁶ Kon kita malamposong nagabantay batok sa pagkatakdan sa kalibotan, ang atong maayong mga buhat makatabang sa uban nga makita ang kalainan “tali sa usa nga nagaalagad sa Diyos ug kaniya nga wala mag-alagad kaniya.”​—Mal. 3:18.

⁷ Ang ngalan ni Jehova mabayaw, ang kongregasyon mapalig-on, ug ang uban mabenepisyohan sa dihang kita sa matanlagon magapadayon sa “maayong mga buhat.” (1 Ped. 2:12) Hinaot nga kita kanunay nga mao kanang matanga sa pagkatawo.