Basahon sa Bibliya Numero 61​—2 Pedro

Magsusulat: Pedro

Dapit Gisulatan: Babilonya (?)

Sinulat Nahuman: k. 64 K.P.

 1. Unsang kamatuoran ang nagmatuod sa pagkamagsusulat ni Pedro sa Ikaduhang Pedro?

SA DIHANG gisulat ni Pedro ang iyang ikaduhang sulat, iyang naamgohan siya sa dimadugay moatubang sa kamatayon. Siya mabalak-on nga mitinguha sa pagpahinumdom sa iyang kaubanang Kristohanon sa importansiya sa hustong kahibalo sa pagtabang kanila sa paghupot sa kalig-on sa ilang ministeryo. Dunay katarongan ba sa pagduda nga si apostol Pedro ang magsusulat sa ikaduhang sulat nga midala sa iyang ngalan? Ang sulat mismo mipapas sa bisan unsang duda nga mahimong mibangon mahitungod sa pagkamagsusulat. Ang magsusulat miingon nga siya si “Simon Pedro, ulipon ug apostol ni Jesu-Kristo.” (2 Ped. 1:1) Iyang gipunting kini ingon “ang ikaduhang sulat nga akong gisulat kaninyo.” (3:1) Misulti siya sa iyang kaugalingon ingon saksing-nakakita sa pag-usab sa dagway ni Jesu-Kristo, pribilihiyo nga giambitan ni Pedro uban nila Santiago ug Juan, ug iyang gisulat kini uban sa tanang pagbati sa saksing-nakakita. (1:16-21) Iyang gihisgotan si Jesus mitagna sa iyang kamatayon.—2 Ped. 1:14; Juan 21:18, 19.

 2. Unsa ang pamatuod sa kanonisidad sa Ikaduhang Pedro?

² Bisan pa, ang pipila ka kritiko mipunting sa kalahian sa estilo sa duha ka sulat ingon rason sa dipagtuo sa ikaduhang sulat ingon buhat ni Pedro. Apan kini dimobangon sa matuod suliran, kay ang ulohan ug katuyoan sa pagsulat lahi. Dugang pa, gisulat ni Pedro ang iyang unang sulat “pinaagi ni Silvano, usa ka matinumanong igsoon,” ug kon si Silvano gihatagan sa pipila ka lugway sa pagbalay sa mga tudlingpulong, kini mahimong hinongdan sa kalahian sa estilo sa duha ka sulat, sanglit si Silvano dayag walay kaambitan sa pagsulat sa ikaduhang sulat. (1 Ped. 5:12) Ang kanonisidad niini gidudahan usab sa sukaranan nga kini “wala kaayo saksihi sa mga Amahan.” Bisan pa, ingon mamatikdan sa tsart “Talagsaon Sayong mga Katalogo sa Kristohanon Gregong Kasulatan,” ang Ikaduhang Pedro giisip ingon bahin sa katalogo sa Bibliya sa pipila ka awtoridad una pa sa Ikatulong Konsilyo sa Kartago.a

 3. Kanus-a ug diin ang Ikaduhang Pedro dayag gisulat, ug kang kinsa kini gipunting?

³ Kanus-a gisulat ang ikaduhang sulat ni Pedro? Lagmit kini gisulat mga 64 K.P. gikan sa Babilonya o sa palibot niini, wala madugay human sa unang sulat, apan waydirektang ebidensiya, labi na sa dapit. Sa panahon sa pagsulat, kadaghanan sa mga sulat ni Pablo gisirkular na taliwala sa mga kongregasyon ug sinati ni Pedro, kinsa miisip kanila ingon dinasig sa Diyos ug gilakip sila “uban sa Kasulatan.” Ang ikaduhang sulat ni Pedro gitumong “ngadto niadtong kinsa mituo, nga gihuptan sa samang pribilihiyo uban kanamo,” ug gilakip niini kadtong kinsa gitumong sa unang sulat ug sa uban nga giwalihan ni Pedro. Ingon nga ang unang sulat gisirkular sa daghang dapit, mao man ang ikaduhang sulat mibaton usab sa heneral nga kinaiya.—2 Ped. 3:15, 16; 1:1; 3:1; 1 Ped. 1:1.

KAUNDAN SA IKADUHANG PEDRO

 4. (a) Sa unsang paagi ang mga igsoon maningkamot aron mahimong mabungahon labot sa hustong kahibalo, ug unsa ang gisaad kanila? (b) Sa unsang paagi ang matagnaong pulong gihimong mas seguro, ug ngano kini patalinghogan?

⁴ Pagpaneguro sa pagkatinawag sa langitnong Gingharian (1:1-21). Si Pedro tulin sa pagpakitag mahigugmaong kabalaka alang “niadtong kinsa mituo.” Iyang gitinguha ang dili takos nga kalolot ug kalinaw modugang kanila “pinaagi sa hustong kahibalo sa Diyos ug ni Jesus nga atong Ginoo.” Libre nga gihatag kanila sa Diyos “ang bililhon ug dako kaayong mga saad,” pinaagi niini sila mahimong mga umalambit sa langitnong kinaiya. Busa, pinaagi sa mahinangpong paningkamot pasagdi sila nga mopuno sa ilang pagtuo sa kaligdong, kahibalo, pagpugong sa kaugalingon, kamainantoson, diyosnong debosyon, inigsoong pagbati, ug gugma. Kon kining mga hiyas dagaya kanila, bisan kanus-a sila dili mahimong diaktibo o dimabungahon labot sa hustong kahibalo. Ang mga igsoon kinahanglan mobuhat taman sa ilang mahimo sa pagpaneguro sa ilang pagkatinawag ug pagkapinili, ingon man sa ilang entrada ngadto sa walay kataposang Gingharian sa ilang Ginoo. Nahibalo nga ‘ang pagbiya sa iyang tabernakulo hapit na,’ buot ni Pedro pahinumdoman sila niining mga butang aron sila mahimong mohisgot kanila human sa iyang pagbiya. Si Pedro saksing-nakakita sa kahalangdon ni Kristo sa balaang bukid kanus-a kining mga pulong “gidawat niya sa himaya nga halangdon: ‘Kini ang anak ko, nga hinigugma ko, kinsa ako mismong giuyonan.’” Sa ingon, ang matagnaong pulong gihimong labi pang seguro, ug kini kinahanglan patalinghogan, kay kini dili pinaagi sa kabubut-on sa tawo, “apan ang mga tawo misulti gikan sa Diyos samtang sila gimandoan sa balaang espiritu.”—1:1, 2, 4, 14, 17, 21.

 5. Unsang pasidaan ang gihatag ni Pedro batok sa mini nga mga magtutudlo, ug unsang gamhanang mga ilustrasyon ang iyang gigamit labot sa katinoan sa mga hukom sa Diyos batok sa maong mga tawo?

⁵ Kusganong pasidaan batok sa mini nga mga magtutudlo (2:1-22). Ang mini nga mga manalagna ug mga magtutudlo mopayuhot sa malaglagong mga sekta, mopatunhay sa haluag nga paggawi, ug modalag kadaotan sa kamatuoran. Apan ang ilang kalaglagan wala mahinanok. Ang Diyos wala mopugong sa pagsilot sa mga manolonda nga nakasala, sa pagdala sa lunop sa adlaw ni Noe, o sa paghimong abo sa Sodoma ug Gomora. Apan iyang giluwas ang magwawali si Noe ug ang matarong Lot, busa “si Jehova nahibalo unsaon sa pagluwas sa katawhan sa diyosnong debosyon gikan sa pagsulay, apan sa pagtipig sa dimatarong katawhan alang sa adlaw sa paghukom aron putlon.” Kay kini sila mapangahason, mabuotbuoton-kaugalingon, ingon sa mga mananap nga dimakapangatarongan, ignorante, abusado manulti, nalipay sa malimbongong pagtulon-an, mananapaw, mailibgon, ug ingon ni Balaam sa gugma sa ganti sa sayop nga buhat. Gisaad nila ang kagawasan apan mismo sa ilang kaugalingon mga ulipon sa kadunot. Mas maayo pa alang kanila nga wala mahibalo sa dalan sa pagkamatarong, kay ang sanglitanan nahitabo kanila: “Ang iro mibalik sa iya mismong suka, ug ang anay nga gidigo sa paglunang usab sa lapok.”—2:9, 22.

 6. (a) Nganong misulat si Pedro, ug unsa ang iyang giingon labot sa saad sa Diyos? (b) Kasukwahi sa mga mayubiton, sa unsang paagi ipakita sa mga Kristohanon ang ilang kaugalingon nga mabinantayon?

⁶ Paghupot suod sa hunahuna sa adlaw ni Jehova (3:1-18). Misulat si Pedro sa pagpukaw sa mga hiyas sa klarong pagpanghunahuna sa mga Kristohanon, aron sila mahinumdom sa mga pulong gisulti kanhi. Ang mga mayubiton moabot sa kataposang mga adlaw, nga moingon: “Hain na man kining gisaad nga presensiya” ni Kristo? Nakaikyas sa pagtagad niining mga tawo nga gilaglag sa Diyos ang kalibotan sa karaang panahon pinaagi sa tubig ug “pinaagi sa samang pulong ang mga langit ug yuta karon gitagana alang sa kalayo” ug “gireserba sa adlaw sa paghukom ug sa paglaglag sa didiyosnong mga tawo.” Ang usa ka libo ka tuig ingon sa usa ka adlaw kang Jehova, busa “si Jehova dili hinayan mahitungod sa iyang saad,” apan siya mapailobon, wala motinguha sa bisan kinsa nga malaglag. Busa, ang mga Kristohanon kinahanglan mobantay sa ilang paggawi ug mobatasan sa mga buhat sa diyosnong debosyon samtang sila mihulat ug huptan suod sa hunahuna ang presensiya sa adlaw ni Jehova, nga pinaagi niini ang mga langit tunawon sa kalayo ug ang mga elemento hilison uban sa tumang kainit. Apan dunay “bag-ong mga langit ug usa ka bag-ong yuta” sumala sa saad sa Diyos.—3:4, 7, 9, 13.

 7. Duna niining abante nga kahibalo, sa unsang paagi ang mga Kristohanon mohago sa ilang kaugalingon?

⁷ Busa, sila kinahanglan mohimo taman sa ilang mahimo “aron makaplagan sa kaulahian niya nga waybuling ug waymansa ug sa kalinaw.” Kinahanglan ilang isipon ang pailob sa ilang Ginoo ingon kaluwasan, ingon gisulat kanila sa hinigugmang si Pablo. Uban niining abante nga kahibalo, pasagdi sila nga mobantay nga dili mapakyas sa ila mismong kalig-on. “Dili,” tiklop ni Pedro, “apan padayon sa pagtubo sa dili takos nga kalolot ug kahibalo sa atong Ginoo ug Manluluwas si Jesu-Kristo. Ngadto kaniya ang himaya karon ug hangtod sa adlaw sa kahangtoran.”—3:14, 18.

NGANONG MAPUSLANON

 8. (a) Sa unsang paagi si Pedro testigo sa kadinasig sa Hebreohanon ug Gregong Kasulatan? (b) Sa unsang paagi kita makabaton ug kaayohan pinaagi sa paghawid nga malig-on sa hustong kahibalo?

⁸ Kakinahanglanon sa hustong kahibalo! Gilala mismo ni Pedro sa iyang mga argumento ang hustong kahibalo nga iyang nabatonan gikan sa Hebreohanong Kasulatan. Testigo siya nga kini dinasig sa balaang espiritu: “Kay ang tagna wala sa bisan unsang panahon gidala pinaagi sa kabubut-on sa tawo, apan ang mga tawo misulti gikan sa Diyos samtang sila gimandoan sa balaang espiritu.” Iyang gipunting, usab, nga ang kaalam ni Pablo “gihatag kaniya.” (1:21; 3:15) Dako kaayo ang atong kaayohan sa pagkonsiderar niining dinasig nga Kasulatan ug sa paghupot nga malig-on sa hustong kahibalo. Unya bisan kanus-a dili kita mahimong kontento-kaugalingon, ingon niadtong gihubit ni Pedro: “Ang tanang butang padayon nga mao ra gihapon sukad sa sinugdan sa paglalang.” (3:4) Ni kita mahulog sa mga lit-ag sa mini nga mga magtutudlo ingon niadtong gihubit ni Pedro sa kapitulo 2 sa iyang sulat. Hinonoa, kinahanglan kita kanunay mopalandong sa mga pahinumdom nga gitagana ni Pedro ug sa ubang magsusulat sa Bibliya. Kini motabang kanato sa pagpabilin nga “malig-on sa kamatuoran” ug mapailobon ug dimatarog nga “mopadayon sa pagtubo sa dili takos nga kalolot ug kahibalo sa atong Ginoo ug Manluluwas si Jesu-Kristo.”—1:12; 3:18.

 9. Unsang mahinangpong paningkamot kita gidasig sa paghimo, ug ngano?

⁹ Ingon tabang sa pag-uswag sa “hustong kahibalo sa Diyos ug ni Jesus nga atong Ginoo,” girekumenda ni Pedro ang mahinangpong paningkamot sa pagtukod niadtong Kristohanong mga hiyas nga gitala sa kapitulo 1, bersikulo 5 ngadto 7. Unya, sa 1 bersikulo 8, siya midugang: “Kay kon kining mga butang milungtad diha kaninyo ug dagaya, kini mopugong kaninyo nga mahimong diaktibo o dimabungahon labot sa hustong kahibalo sa atong Ginoong Jesu-Kristo.” Matuod, kini nindot nga pagdasig sa paglihok ingon mga ministro sa Diyos niining kritikal nga mga adlaw!—1:2.

10. (a) Unsang mga saad ang gipasiugda ni Pedro, ug unsa ang iyang giawhag labot kanila? (b) Unsang pasalig ang gihatag ni Pedro labot sa mga tagna sa Gingharian?

¹⁰ Kaimportante kini nga mohago sa kaugalingon taman sa mahimo aron mahimong segurado sa pagpakig-ambit sa “bililhon ug dako kaayong mga saad” ni Jehova nga Diyos! Busa giawhag ni Pedro ang dinihogang mga Kristohanon sa pagpunting sa ilang mga mata sa tumong sa Gingharian, nga miingon: “Buhata ang taman sa inyong mahimo sa paghimo sa pagtawag ug pagpili kaninyo nga segurado alang sa inyong kaugalingon; kay kon kamo mopadayon sa pagbuhat niining mga butang kamo sa bisan unsang paagi dili mapakyas. Sa matuod, dato nga itagana kaninyo ang entrada ngadto sa walay kataposang gingharian sa atong Ginoo ug Manluluwas si Jesu-Kristo.” Unya, gidapit ni Pedro ang pagtagad sa kahalangdon sa himaya sa Gingharian ni Jesus, diin siya saksing-nakakita pinaagi sa panan-awon sa pag-usab sa dagway, ug midugang: “Ingon sangpotanan duna kita sa matagnaong pulong nga gihimong mas seguro.” Matuod, ang tanang tagna labot sa halangdon nga Gingharian ni Jehova tino nga matuman. Busa, kini uban sa kumpiyansa nga kita mopalanog sa mga pulong ni Pedro nga gikutlo sa tagna ni Isaias: “Dunay bag-ong mga langit ug usa ka bag-ong yuta nga atong gipaabot sumala sa iyang saad, ug niini ang pagkamatarong mopuyo.”—2 Ped. 1:4, 10, 11, 19; 3:13; Isa. 65:17, 18.

[Footnote]