Huptan Natong Malig-on ang Atong Bililhong Pagtuo!
“Ngadto sa mga nagpakabaton ug pagtuo, nga gihuptan ingong sama nga pribilehiyo sa amoa.”—2 PEDRO 1:1.
1. Unsay giingon ni Jesus sa pagpasidaan sa iyang mga apostoles, apan unsay gipanghambog ni Pedro?
SA GABII una pa namatay si Jesus, siya miingon nga talikdan siya sa tanan niyang mga apostoles. Usa kanila, si Pedro, nanghambog: “Bisan pag ang tanang uban mangapandol labot kanimo, dili gayod ako mapandol!” (Mateo 26:33) Apan si Jesus nahibalo nga lahi ang mahitabo. Maoy hinungdan nga iyang gisultihan si Pedro niana gihapong higayona: “Ako nangamuyo alang kanimo nga unta ang imong pagtuo dili moangka; ug ikaw, sa makabalik ka na, palig-ona ang imong mga igsoon.”—Lucas 22:32.
2. Bisan pa sa sobrang pagsalig ni Pedro, unsay iyang mga lihok nga nagpakita nga mahuyang ang iyang pagtuo?
2 Si Pedro, nga masaligon kaayo bahin sa iyang pagtuo, nangulipas nga nakaila kang Jesus niana mismong gabhiona. Tulo ka higayon nga iyang gilimod nga siya nakaila kang Kristo! (Mateo 26:69-75) Sa dihang siya ‘nakabalik,’ ang mga pulong sa iyang Agalon, “palig-ona ang imong mga igsoon,” dayag nga milanog sa iyang mga dalunggan. Ang nahibilin sa kinabuhi ni Pedro naapektohan kaayo nianang tambaga, sumala sa makita sa duha ka sulat nga iyang gisulat, nga napreserbar diha sa Bibliya.
Kon Nganong Gisulat ni Pedro ang Iyang mga Sulat
3. Nganong gisulat ni Pedro ang iyang unang sulat?
3 Sa mga 30 ka tuig human nga namatay si Jesus, gisulat ni Pedro ang iyang unang sulat, nga gipatunong kini ngadto sa iyang mga igsoon sa Pontus, Galacia, Capadocia, Asia, ug Betania, mga lugar nga karon naglangkob sa amihanan ug kasadpang Turkey. (1 Pedro 1:1) Ang mga Hudiyo, nga ang uban kanila tingali nangahimong mga Kristohanon sa Pentekostes 33 K.P., tinong nalakip taliwala niadtong gisulatan ni Pedro. (Buhat 2:1, 7-9) Daghan maoy mga Hentil nga nag-antos sa kalayonhong mga pagsulay sa mga kamot sa mga magsusupak. (1 Pedro 1:6, 7; 2:12, 19, 20; 3:13-17; 4:12-14) Busa gisulatan ni Pedro kining mga igsoona sa pagdasig kanila. Ang iyang tumong mao ang pagtabang kanila nga madawat “ang sangkoan sa [ilang] pagtuo, ang kaluwasan sa [ilang] mga kalag.” Busa, diha sa iyang tambag sa pagpanamilit, siya nag-awhag: “Bumarog kamo batok [sa Yawa], nga lig-on diha sa pagtuo.”— 1 Pedro 1:9; 5:8-10.
4. Nganong gisulat ni Pedro ang iyang ikaduhang sulat?
4 Sa ulahi, gisulat ni Pedro ang iyang ikaduhang sulat ngadto niining maong mga Kristohanon. (2 Pedro 3:1) Ngano? Tungod kay adunay usa ka mas dako pa nga hulga. Ang imoral nga mga indibiduwal maningkamot sa pagpasiugda sa ilang mahugawng panggawi taliwala sa mga magtutuo ug makapahisalaag sa uban! (2 Pedro 2:1-3) Dugang pa, nagpasidaan si Pedro bahin sa mga mayubiton. Siya nagsulat diha sa iyang unang sulat nga “ang kataposan sa tanang butang duol na,” ug karon ang uban dayag nga nanagbiaybiay sa maong ideya. (1 Pedro 4:7; 2 Pedro 3:3, 4) Atong susihon ang ikaduhang sulat ni Pedro ug tan-awon kon sa unsang paagi napadasig ang mga igsoon niini sa pagpabiling malig-on diha sa pagtuo. Niining unang artikulo, atong konsiderahon ang 2 Pedro kapitulo 1.
Ang Katuyoan sa Kapitulo 1
5. Sa unsang paagi giandam ni Pedro ang iyang mga magbabasa alang sa panaghisgot sa mga suliran?
5 Wala unaha ni Pedro paghisgot ang mabug-at nga mga suliran. Hinunoa, iyang giandam ang dalan alang sa paghisgot niining mga sulirana pinaagi sa paglig-on sa apresasyon sa iyang mga magbabasa sa ilang nadawat sa dihang sila nangahimong mga Kristohanon. Iyang gipahinumdoman sila sa katingalahang mga saad sa Diyos ug sa pagkakasaligan sa mga tagna sa Bibliya. Iyang gihimo kini pinaagi sa pag-asoy bahin sa pagkausab sa dagway, ang panan-awon nga iyang nakita mismo labot kang Kristo diha sa Gingharianong gahom.—Mateo 17:1-8; 2 Pedro 1:3, 4, 11, 16-21.
6, 7. (a) Unsang leksiyon ang atong makat-onan gikan sa introduksiyon sa sulat ni Pedro? (b) Kon kita manambag, unsang matang sa pagdawat usahay ang makatabang nga himoon?
6 May makat-onan ba kitang leksiyon gikan sa introduksiyon ni Pedro? Dili ba mas sayong dawaton ang tambag kon ato unang sublion uban sa mga mamiminaw ang mga bahin sa dakong paglaom sa Gingharian nga gipakahamili natong tanan? Ug komosta ang bahin sa paggamit ug personal nga kasinatian? Malagmit, human nga namatay si Jesus, si Pedro masubsob nga nag-asoy bahin sa pagkakita niana nga panan-awon ni Kristo diha sa Gingharianong himaya.—Mateo 17:9.
7 Hinumdomi, usab, nga dakog kalagmitan, nga sa panahong gisulat ni Pedro ang iyang ikaduhang sulat, ang Ebanghelyo ni Mateo ug ang sulat ni apostol Pablo ngadto sa mga taga-Galacia kaylap na nga pagkaapod-apod. Busa ang tawhanong mga kahuyangan ni Pedro maingon man ang iyang rekord sa pagtuo hayan nahibaloan pag-ayo sa iyang mga katalirongan. (Mateo 16:21-23; Galacia 2:11-14) Apan, kini wala makakuha sa iyang kagawasan sa pagsulti. Sa pagkamatuod, naghimo hinuon kini sa iyang sulat nga labawng makaiikag ngadto niadtong nakamatikod sa ilang kaugalingong mga kahuyangan. Busa, sa dihang magtabang niadtong adunay mga suliran, dili ba epektibo ang pagdawat nga kita usab may tendensiya nga masayop?—Roma 3:23; Galacia 6:1.
Usa ka Makapalig-ong Pangomosta
8. Sa unsang diwa si Pedro lagmit migamit sa pulong “pagtuo”?
8 Palandonga karon ang pangomosta ni Pedro. Iyang gihisgotan dayon ang ulohan bahin sa pagtuo, nga nagtawag sa iyang mga magbabasa ingong “mga nagpakabaton ug pagtuo, nga gihuptan ingong sama nga pribilehiyo sa amoa.” (2 Pedro 1:1) Dinhi ang ekspresyong “pagtuo” lagmit nagkahulogang “hugot nga pagtuo” ug nagpunting sa hugpong sa Kristohanong mga doktrina o mga pagtulon-an, nga gitawag usahay sa Kasulatan nga “kamatuoran.” (Galacia 5:7; 2 Pedro 2:2; 2 Juan 1) Ang pulong “pagtuo” maoy kasagarang gigamit niini nga diwa imbes sa naandang diwa nga pagsalig o kompiyansa diha sa usa ka tawo o butang.—Buhat 6:7; 2 Corinto 13:5; Galacia 6:10; Efeso 4:5; Judas 3.
9. Nganong ang pangomosta ni Pedro puno sa pagmahal sa pamati sa mga Hentil?
9 Ang pangomosta ni Pedro dayag nga puno sa pagmahal sa pamati sa mga magbabasang Hentil. Ang mga Hudiyo walay mga pagpakiglabot sa mga Hentil, ila pa gani silang gitamay, ug may pagpihig batok sa mga Hentil taliwala sa mga Hudiyo nga nangahimong mga Kristohanon. (Lucas 10:29-37; Juan 4:9; Buhat 10:28) Bisan pa niana, si Pedro, nga usa ka Hudiyo tungod sa pagkatawo ug usa ka apostoles ni Jesu-Kristo, miingon nga ang iyang mga magbabasa—mga Hudiyo ug mga Hentil—nag-ambitay sa samang pagtuo ug nagtagamtam sa samang pribilehiyo uban kaniya.
10. Unsang mga leksiyon ang atong makat-onan gikan sa pangomosta ni Pedro?
10 Hunahunaa ang maayong mga leksiyon nga gitudlo kanato karon sa pangomosta ni Pedro. Ang Diyos dili mapihigon; siya walay gipaborang usa ka rasa o nasyonalidad batok sa lain. (Buhat 10:34, 35; 11:1, 17; 15:3-9) Sumala sa gitudlo mismo ni Jesus, ang tanang Kristohanon maoy mga igsoon, ug walay usa kanato ang angay mobati nga labaw. Dugang pa, ang pangomosta ni Pedro nagpasiugda nga kita sa pagkamatuod maoy usa ka tibuok-kalibotan nga panag-igsoonay, kinsa adunay “sama nga pribilehiyo” sa pagtuo nga nabatonan ni Pedro ug sa iyang mga isigkaapostol.—Mateo 23:8; 1 Pedro 5:9.
Kahibalo ug mga Saad sa Diyos
11. Pagkahuman sa iyang pangomosta, unsang hinungdanong mga butang ang gipasiugda ni Pedro?
11 Pagkahuman sa iyang pangomosta, si Pedro nagsulat: “Hinaot nga ang dili-takos nga kalulot ug ang kalinaw mouswag nganha kaninyo.” Sa unsang paagi ang dili-takos nga kalulot ug kalinaw mouswag diha kanato? “Pinaagi sa tukmang kahibalo sa Diyos ug kang Jesus nga atong Ginoo,” mitubag si Pedro. Dayon siya miingon: “Ang diyosnong gahom bukas nga naghatag kanato sa tanang butang labot sa kinabuhi ug sa diyosnong pagkamahinalaron.” Apan sa unsang paagi atong madawat kining hinungdanong mga butang? ‘Pinaagi sa tukmang kahibalo sa usa nga nagtawag kanato pinaagi sa himaya ug kaligdong.’ Mao nga duha ka higayong gipasiugda ni Pedro nga ang tukmang kahibalo sa Diyos ug sa iyang Anak hinungdanon.—2 Pedro 1:2, 3; Juan 17:3.
12. (a) Nganong gipasiugda ni Pedro ang pagkahinungdanon sa tukmang kahibalo? (b) Aron matagamtam ang mga saad sa Diyos, unsa ang atong kinahanglang buhaton una?
12 Ang ‘bakak nga mga magtutudlo’ nga maoy gipasidaan ni Pedro diha sa kapitulo 2 nagagamit ug “mini nga mga pulong” sa paglimbong sa mga Kristohanon. Niining paagiha sila naningkamot sa pagdaldal kanila balik sa imoralidad nga gikan niini sila napahigawas. Ang resulta sa tanang nangaluwas pinaagi sa “tukmang kahibalo sa Ginoo ug Manluluwas nga si Jesu-Kristo” ug sa ulahi nagpadaog sa maong panlimbong maoy malaglagon. (2 Pedro 2:1-3, 20) Seguro nagdahom nga pagahisgotan kining maong suliran sa ulahi, gipasiugda ni Pedro diha mismo sa sinugdanan sa iyang sulat ang papel sa tukmang kahibalo sa paghupot ug mahinlong baroganan uban sa Diyos. Si Pedro nag-ingon nga ang Diyos “bukas nga mihatag kanato sa bililhon ug dagko kaayong mga saad, aron nga pinaagi niini nila kamo mahimong mag-aambit sa kinaiyahan nga iya-sa-Diyos.” Apan, aron matagamtam kining mga saara, nga maoy usa ka hinungdanong bahin sa atong pagtuo, nag-ingon si Pedro, kita kinahanglang ‘nakaikyas na gikan sa pagkadunot nga ania sa kalibotan pinaagi sa daotang pangibog.’—2 Pedro 1:4.
13. Unsa ang determinadong huptan nga malig-on sa dinihogang mga Kristohanon ug sa “ubang mga karnero”?
13 Unsay imong panglantaw sa mga saad sa Diyos? Sama ba sa panglantaw sa nahibilin sa dinihogang mga Kristohanon? Sa 1991, si Frederick Franz, nga maoy presidente niadto sa Watch Tower Bible and Tract Society, nga nangagpas sa bug-os panahong ministeryo sa kapin sa 75 ka tuig, naglatid sa mga pagbati niadtong kinsa naglaom nga magmando uban kang Kristo: “Kami nagpabiling malig-on hangtod niini mismong taknaa, ug kami magpabiling malig-on hangtod mapamatud-an gayod sa Ginoo nga siya tinuod sa iyang ‘bililhon ug dagko kaayong mga saad.’” Si Igsoong Franz nagpabiling masaligon sa saad sa Diyos bahin sa usa ka langitnong pagkabanhaw, ug siya nagpabiling malig-on sa pagtuo hangtod sa iyang kamatayon sa edad 99. (1 Corinto 15:42-44; Filipos 3:13, 14; 2 Timoteo 2:10-12) Sa susama, minilyon ang nagpabiling malig-on sa pagtuo, nga nagpunting sa ilang panan-aw diha sa saad sa Diyos bahin sa usa ka yutan-ong paraiso nga niini ang mga tawo mabuhing walay kataposan diha sa kalipay. Usa ba ikaw kanila?—Lucas 23:43; 2 Pedro 3:13; Pinadayag 21:3, 4.
Sanong sa mga Saad sa Diyos
14. Nganong gilista ni Pedro ang kaligdong ingong unang hiyas nga idugang sa pagtuo?
14 Mapasalamaton ba kita sa Diyos alang sa iyang gisaad? Kon mao, si Pedro nangatarongan, angay natong ipakita kana. “Oo, tungod niini nga katarungan mismo” (tungod kay gihatagan kita sa Diyos ug hamili kaayong mga saad), kinahanglang maningkamot gayod kita sa paglihok. Dili kita magmatagbaw lamang sa pagkahimong anaa sa pagtuo o sa pagkahibalo lamang ug diyutay sa kamatuoran sa Bibliya. Dili pa kana igo! Tingali sa panahon ni Pedro ang uban diha sa mga kongregasyon naghisgot kanunay sa pagtuo apan nalangkit sa imoral nga panggawi. Ang ilang batasan kinahanglang mahimong maligdong, busa si Pedro nag-awhag: ‘Ipuno sa inyong pagtuo ang kaligdong.’—2 Pedro 1:5; Santiago 2:14-17.
15. (a) Nganong ang kahibalo gilista human sa kaligdong ingong hiyas nga idugang sa pagtuo? (b) Unsang ubang mga hiyas nga magsangkap kanato sa paghupot nga malig-on sa pagtuo?
15 Human sa paghisgot sa kaligdong, si Pedro naglista ug laing unom ka hiyas nga kinahanglang ipuno, o idugang, sa atong pagtuo. Ang matag usa niini kinahanglan aron kita mahimong “malig-on diha sa pagtuo.” (1 Corinto 16:13) Sanglit ang mga apostata ‘naglubag sa Kasulatan’ ug nagpakaylap sa ‘malimbongong mga pagtulon-an,’ gilista sunod ni Pedro ang kahibalo ingong hinungdanon, nga nag-ingon: ‘Sa inyong kaligdong [idugang ang] kahibalo.’ Dayon siya nagpadayon: “Sa inyong kahibalo [idugang ang] pagpugong-sa-kaugalingon, sa inyong pagpugong-sa-kaugalingon pag-agwanta, sa inyong pag-agwanta diyosnong pagkamahinalaron, sa inyong diyosnong pagkamahinalaron inigsoong pagbati, sa inyong inigsoong pagbati gugma.”—2 Pedro 1:5-7; 2:12, 13; 3:16.
16. Unsay mahitabo kon ang mga hiyas nga gilista ni Pedro idugang sa pagtuo, apan unsay mahitabo kon kini dili idugang?
16 Unsay mahitabo kon kining pito ka butang idugang diha sa atong pagtuo? “Kon kining mga butanga nagalungtad diha kaninyo ug nagaawas,” si Pedro mitubag, “kini sila mopugong kaninyo sa pagkahimong dili-aktibo o dili-mabungahon labot sa tukmang kahibalo sa atong Ginoong Jesu-Kristo.” (2 Pedro 1:8) Sa laing bahin, si Pedro nag-ingon: ‘Kon kining mga butanga wala kang bisan kinsa, siya buta, nga nagpiyong sa iyang mga mata ngadto sa kahayag, ug nahimong malimtanon sa paghinlo kaniya gikan sa iyang dugay na kanhing mga sala.’ (2 Pedro 1:9) Matikdi nga nagbag-o si Pedro gikan sa paggamit sa “kaninyo” ug “atong” ngadto sa “kang bisan kinsa,” “siya,” ug “iyang.” Bisan tuod, makasubo, ang uban buta, malimtanon, ug mahugaw, si Pedro sa maluloton wala magsugyot nga usa niini ang magbabasa.—2 Pedro 2:2.
Nagpalig-on sa Iyang mga Igsoon
17. Unsay nakapukaw sa malulotong hangyo ni Pedro sa pagbansay “niining mga butanga”?
17 Tingali nakaamgo nga ang mga bag-ohan dali nga malimbongan, malulotong gidasig sila ni Pedro: “Mga igsoon, buhata nga labi pa kutob sa inyong maarangan nga himoong tino alang sa inyong kaugalingon ang pagtawag ug pagpili kaninyo; kay kon magapadayon kamo sa pagbuhat niining mga butanga kamo dili gayod mapakyas.” (2 Pedro 1:10; 2:18) Ang dinihogang mga Kristohanon nga nagdugang niining pito ka butang diha sa ilang pagtuo magatagamtam ug dakong ganti, ingon sa gipamulong ni Pedro: “Dagayang ihatag kaninyo ang pagsulod sa walay-kataposang gingharian sa atong Ginoo ug Manluluwas nga si Jesu-Kristo.” (2 Pedro 1:11) Ang “ubang mga karnero” makadawat ug usa ka walay kataposang panulondon diha sa yutan-ong dapit sa Gingharian sa Diyos.—Juan 10:16; Mateo 25:33, 34.
18. Nganong si Pedro kiling sa ‘pagpahinumdom kanunay’ sa iyang mga igsoon?
18 Si Pedro tim-os gayod nga nagtinguha nga mabatonan sa iyang mga igsoon kanang maong dakong ganti. “Tungod niini nga katarungan,” siya nagsulat, “kanunay akong makiling sa pagpahinumdom kaninyo bahin niining mga butanga, bisan kon kamo nahibalo niini nila ug malig-on na diha sa kamatuoran.” (2 Pedro 1:12) Gigamit ni Pedro ang Gregong pulong nga ste·riʹzo, nga gihubad dinhi nga “malig-on na” apan gihubad nga “palig-ona” diha sa unang tambag ni Jesus kang Pedro: “Palig-ona ang imong mga igsoon.” (Lucas 22:32) Ang paggamit nianang pulonga lagmit nagsugyot nga si Pedro nakahinumdom sa gamhanang tambag nga iyang nadawat gikan sa iyang Ginoo. Si Pedro karon nag-ingon: “Giisip ko nga husto, samtang ania ako niini nga tabernakulo [tawhanong lawas], nga pukawon kamo agig pagpahinumdom kaninyo, kay nahibalo man ako nga ang paghiklin sa akong tabernakulo hapit na.”—2 Pedro 1:13, 14.
19. Unsang mga tabang ang atong gikinahanglan karon?
19 Bisag malulotong nag-ingon si Pedro nga ang iyang mga magbabasa maoy “malig-on na diha sa kamatuoran,” siya nahibalo nga ang ilang pagtuo makaagom ug pagkalunod. (1 Timoteo 1:19) Sanglit nahibalo siya nga siya mamatay sa dili madugay, iyang gilig-on ang iyang mga igsoon pinaagi sa paghisgot sa mga butang nga ilang mahinumdoman sa ulahi aron sila makapabiling malig-on sa espirituwal. (2 Pedro 1:15; 3:12, 13) Sa susama, kita karon nagkinahanglan kanunay ug mga pahinumdom aron makapabiling malig-on sa pagtuo. Bisan kon kinsa pa kita o kon unsa na kita ka dugay diha sa kamatuoran, dili mahimong pasagdan nato ang regular nga pagbasa sa Bibliya, personal nga pagtuon, ug pagtambong sa mga tigom sa kongregasyon. Ang uban mangitag mga pasangil sa dili pagtambong, nga moingon nga sila usab kapoy na kaayo o nga ang mga tigom balikbalik na o dili maayong pagkapresentar, apan si Pedro nahibalo kon unsa ka dali nga mawad-an ang bisan kinsa kanato ug pagtuo kon kita mahimong sobra kaayo ka masaligon.—Marcos 14:66-72; 1 Corinto 10:12; Hebreohanon 10:25.
Malig-ong Pasikaranan sa Atong Pagtuo
20, 21. Sa unsang paagi ang pagkabalhin sa dagway nakapalig-on sa pagtuo ni Pedro ug sa mga magbabasa sa iyang mga sulat, lakip na kanato karon?
20 Ang ato bang pagtuo gipasukad lamang sa maayong pagkaimbentong mga sulosugilanon? “Dili,” puwersadong mitubag si Pedro, “dili pinaagig pagsunod sa inantigong pagkamugna nga mga sugilanong bakak nga kami nagsinati kaninyo sa gahom ug pagkaanaa sa atong Ginoong Jesu-Kristo, hinunoa maoy pinaagi sa pagkahimong mga saksing-nakakita sa iyang kahalangdon.” Si Pedro, Santiago, ug Juan didto uban kang Jesus sa dihang nakakita sila ug panan-awon kaniya diha sa Gingharianong gahom. Si Pedro nagbatbat: “Nakadawat siya gikan sa Diyos nga Amahan ug dungog ug himaya, sa diha nga ang mga pulong sama niini gipadangat kaniya pinaagi sa halangdong himaya: ‘Kini mao ang akong anak, ang akong hinigugma, kinsa ako mismong giuyonan.’ Oo, kining mga pulonga among nadungog nga gipadangat gikan sa langit samtang didto kami uban kaniya sa balaang bukid.”—2 Pedro 1:16-18.
21 Sa dihang nakita ni Pedro, Santiago, ug Juan kadto nga panan-awon, ang Gingharian sa pagkamatuod nahimong tinuod alang kanila! “Tungod niana,” nag-ingon si Pedro, “atong nabatonan ang propetikanhong pulong nga nahimong labi pang tino; ug nagabuhat kamo ug maayo sa pagtagad niini.” Oo, ang mga magbabasa sa sulat ni Pedro, apil na kita karong adlawa, adunay puwersadong katarongan sa pagpatalinghog sa mga tagna bahin sa Gingharian sa Diyos. Sa unsang paagi kita angay magpatalinghog? Si Pedro nagtubag: “Samag nganha sa usa ka lampara nga nagasidlak sa usa ka ngitngit nga dapit, hangtod nga ang adlaw mobanagbanag ug ang bituon nga pang-adlaw mosubang, sa inyong mga kasingkasing.”—2 Pedro 1:19; Daniel 7:13, 14; Isaias 9:6, 7.
22. (a) Ngadto sa unsa nga kinahanglang magmabinantayon ang atong mga kasingkasing? (b) Sa unsang paagi patalinghogan nato ang matagnaong pulong?
22 Ang atong mga kasingkasing mongiob kon walay kahayag sa matagnaong pulong. Apan pinaagi sa pagpatalinghog niini, ang mga kasingkasing sa mga Kristohanon nagpadayon sa pagbantay sa pagbanagbanag sa adlaw sa dihang ang “bituon sa kabuntagon,” si Jesu-Kristo, mosubang diha sa himaya sa Gingharian. (Pinadayag 22:16) Sa unsang paagi kita karon nagapatalinghog sa matagnaong pulong? Pinaagi sa pagtuon sa Bibliya, pinaagi sa pagpangandam ug pagpakigbahin sa mga tigom, ug pinaagi sa ‘paghinuktok niining mga butanga, ug pagkalinga diha niini.’ (1 Timoteo 4:15) Aron ang matagnaong pulong mahimong usa ka lampara nga nagasidlak sa “ngitngit nga dapit” (atong mga kasingkasing), kinahanglang atong tugotan kini nga mag-apektar ug maayo kanato—sa atong mga tinguha, mga pagbati, mga panukmod, ug mga tumong. Kita kinahanglang mahimong mga estudyante sa Bibliya, kay gitapos ni Pedro ang kapitulo 1: “Walay propesiya sa Kasulatan nga nagsumikad sa kinaugalingong pagbadbad. Kay ang propesiya wala sa bisan kanus-a gipadangat pinaagi sa kabubut-on sa tawo, hinunoa namulong ang mga tawo gikan sa Diyos samtang giagak sila sa balaang espiritu.”—2 Pedro 1:20, 21.
23. Alang sa unsa giandam sa unang kapitulo sa 2 Pedro ang mga magbabasa?
23 Sa pangbukas nga kapitulo sa iyang ikaduhang sulat, si Pedro naghatag ug kusganong panukmod alang kanato aron huptang malig-on ang atong bililhong pagtuo. Kita karon andam na alang sa panaghisgot sa seryosong mga butang nga mosunod. Hisgotan sa sunod nga artikulo ang kapitulo 2 sa 2 Pedro, diin gihatagag pagtagad sa apostol ang hagit sa imoral nga mga impluwensiya nga nakasulod sa mga kongregasyon.
Nakahinumdom Ka Ba?
◻ Nganong gipasiugda ni Pedro ang pagkahinungdanon sa tukmang kahibalo?
◻ Unsay katarongan nga ang kaligdong gilista ingong unang hiyas nga igadugang sa pagtuo?
◻ Nganong kiling kanunay si Pedro sa paghatag sa iyang mga igsoon ug mga pahinumdom?
◻ Unsang malig-ong basehanan nga si Pedro nagtagana alang sa atong pagtuo?
[Hulagway sa panid 9]
Ang mga kahuyangan ni Pedro wala magpahinabo kaniya sa pagbiya sa iyang pagtuo