Hatagig Pagtagad ang Matagnaong Pulong

¹ “Atong nabatonan ang propetikanhong pulong nga nahimong labi pang tino.” (2 Ped. 1:19) Nganong misulti si Pedro niini? Ang mga tagna sa Gingharian sa Hebreohanong Kasulatan maingon man kadtong gikan kang Jesu-Kristo mismo napalig-on, o “nahimong labi pang tino,” pinaagi sa nakita ug nadunggan ni Pedro ug sa duha pa ka tinun-an sa pagkabalhin sa dagway nga talan-awon mga 32 ka tuig nga sayo pa. Kining dramatikanhong panan-awon nagpasalig pag-usab kanila nga si Jesu-Kristo moabot gayod nganha sa Gingharianong gahom uban ang bug-os nga pagpaluyo sa iyang Amahan. Ang mga Kristohanon sa unang siglo ‘nagbuhat ug maayo sa pagtagad niini samag nganha sa usa ka lampara nga nagasidlak.’ Ang paghatag ug pagtagad sa matagnaong pulong maghupot kanilang alerto sa pagbanagbanag sa usa ka bag-ong adlaw, sa dihang ang “bituon nga pang-adlaw,” si Kristo, motindog diha sa Gingharianong himaya.​—2 Ped. 1:16-19; Mat. 17:1-9.

² Dili kita presente kaniadto sa pagtan-aw sa mahimayaong pagkabalhin sa dagway uban kang Pedro. Bisan pa niana, ang mga Kristohanon niining kaliwatana nga naghatag ug pagtagad sa matagnaong pulong nakapribilehiyo sa pagkakita sa dili-mabangbang nga ebidensiya nga ang mahimayaong Hari nagamando na gayod! Sa matag tuig sukad sa 1914, ang matagnaong pulong nahimong labi pang tino samtang atong nasaksihan ang katumanan sa daghang bahin sa “ilhanan” nga gihatag ni Jesus maylabot sa iyang harianong “presensiya.” Usa ka hinungdanong bahin nianang maong ilhanan mao nga ang pagpahibalo sa iyang kagamhanan pagahimooon sa tanang kanasoran una pa ang Hari magalaglag niining sistema sa mga butang. Ubos sa pagtultol ni Kristo, ang Gingharianong-pagwaling buluhaton ginahimo na karon sa 231 ka kayutaan. (Mat. 24:3-14) Dugang pa, samtang nagakaduol ang “dakong kasakitan,” ang naentronong Hari nagatigom na “sa usa ka dakong panon” nga nakasabot usab sa iyang presensiya.​—Pin. 7:9, 10, 14.

³ Sanglit kay ang “bituon nga pang-adlaw” misubang na, nga mao, si Kristo miabot na sa iyang Gingharianong gahom, may katarongan pa ba sa paghatag ug pagtagad sa matagnaong pulong? Oo! Ang nahimayang Jesu-Kristo naghatag kang apostol Juan ug usa ka serye sa mga panan-awon nga nagalangkob sa basahon sa Pinadayag. Kini may espesyal nga bili kanato nga nagapuyo sa “adlaw sa Ginoo.” (Pin. 1:10) Maoy hinungdan nga ang tanang katawhan ni Jehova sa dili madugay magahimog dugang pagtuon sa librong Pinadayag.

⁴ “Malipayon siya kinsa nagabasa sa makusog ug kadtong mga nagapaminaw sa mga pulong niini nga propesiya, ug kinsa nagasunod sa mga butang nga nahisulat niini; kay ang tinudlong panahon haduol na.” (Pin. 1:3) Kon kita magmalipayon man, kinahanglang masabtan nato ang diwa, oo, ang tinuod nga pagsabot, niining matagnaong mga panan-awon. Unsa ang gikinahanglan niini? Ang pagsubli gikinahanglan aron ipatuhop gayod sa atong mga kasingkasing ang kahulogan sa asoy sa Pinadayag. Si apostol Pedro, usa ka membro sa unang-siglong nagamandong lawas, nag-ila sa bili sa pagsubli sa pasukaranang mga kamatuoran aron ‘pagpukaw’ sa espirituwal sa iyang mga igsoon. (2 Ped. 1:12, 13) Ang modernong-adlaw nga “kasaligan ug mabuot nga ulipon” nagatabang usab kanato pinaagig sublisubli nga pagdala sa atong pagtagad sa matagnaong pulong.​—Mat. 24:45-47.

⁵ Kon Unsaon sa Paghatag ug Pagtagad: Unsa man nga matang sa pagtagad ang nahiangay sa matagnaong pulong sa Pinadayag? Si apostol Pablo nagapahinumdom kanato nga ang Diyos wala na makigsulti sa mga Kristohanon pinaagig mga manulonda o mga propeta sama sa gihimo niya una pa kang Kristo. Hinunoa, si Jehova nakigkomunikar kanato pinaagi sa iyang labing pinanggang Anak, nga mao ang iyang gitudlong “manununod sa tanang butang.” (Heb. 1:1, 2) “Mao kana kon nganong gikinahanglan nato nga mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod.” (Heb. 2:1) Oo, kinahanglan natong hatagag pagtagad ilabina ang matagnaong pulong nga miabot pinaagi kang Jesu-Kristo. Unsaon man nato paghatag ug espesyal nga pagtagad sa atong pagtuon sa Pinadayag?

⁶ Una, hinungdanon nga anaa kita kada semana sa Pagtuon sa Libro sa Kongregasyon. Matuod, alang sa kadaghanan kanato, kini mao ang ikatulong higayon nga atong tun-an ang librong Pinadayag. Busa, ang pipila mahimong magbaton ug maorag dili-matagdanong panglantaw sa pagtambong sa pagtuon sa libro, nga mobating bisag makapalta silag usa ka tigom, nasinati na man sila sa materyal. Bisan pa niana, sa matag tuig nga molabay, kining matagnaong impormasyon mahimong labaw nga tukma-panahon pa gani kay sa 1989 sa dihang una natong gitun-an ang librong Pinadayag. Kitang tanan angayng magmaalisto sa presenteng-adlaw nga mga hitabo nga tuling nagalihok paunahan sa katumanan sa mga tagna sa Pinadayag. Himoa kanang imong personal nga tumong nga dili mopaltag usa ka pagtuon sa libro, kon posible man gayod, sulod niining hinungdanong pagtagad sa Pinadayag.

⁷ Ikaduha, andama pag-ayo ang imong leksiyon. Tan-awa ang gisitar nga mga kasulatan ug tagda kon sa unsang paagi sila nagasuportar sa pagpatin-aw sa mga bersekulo sa Pinadayag nga ginatun-an. Niining paagiha labaw pa ang imong makuha kay sa yanong mga tubag lamang sa mga pangutana. Paningkamoting mabatonan dili lamang ang kahibalo apan ang kaalam ug pagsabot. (Prov. 4:7) Ikatulo, aktibong makig-ambit pinaagig paghimog mga komento ug pagbasa sa mga kasulatan. Himoang tumong nga makatubag labing menos kausa ug labing maayo sa pipila ka beses sa matag pagtuon. Ang pagbuhat niana makapasentro sa imong hunahuna diha sa leksiyon.

⁸ Ang paghatag ug labaw sa kasagarang pagtagad sa matagnaong pulong nagalakip ug labaw pa kay sa pagpangandam, pagtambong, ug pakig-ambit. Kini nagapasabot usab nga bisan human sa pagtuon, kita magapadayon sa ‘paghinuktok niining mga butanga, magpatuhop diha niini.’ (1 Tim. 4:15) Kon ang matagnaong pulong mahisama man sa usa ka lampara nga nagasidlak sa atong mga kasingkasing, kinahanglang kini lalom nga makaapektar sa atong kinasulorang pagkatawo​—atong mga panghunahuna, mga tinguha, mga emosyon, mga panukmod, ug mga tumong. (2 Ped. 1:19) Busa, angay tang mangutana sa atong kaugalingon: Unsay kahulogan niining impormasyona kanako sa personal? Unsa man ang akong nakat-onan bahin kang Jehova ug sa iyang Anak, si Jesu-Kristo? Nasabtan ba nako ang diwa sa pagtuon diha sa akong kasingkasing? Sa unsang paagi akong ikaaplikar kining mga kamatuorana sa akong kinabuhi? Sa akong pamilya? Sa kongregasyon? Pinaagig praktikal nga pagpadapat sa atong nakat-onan, makaingon kita sama sa salmista: “Ang imong pulong maoy lamparahan sa akong tiil, ug kahayag sa akong alagianan.”​—Sal. 119:105; Job 29:3, 4.

⁹ Magtukaw sa Makuyaw nga mga Panahon: Sa tuig 33 K.P., si Jesus nagpasidaan sa iyang mga tinun-an sa umaabot nga kalaglagan sa Jerusalem ug ang ilhanan sa dihang sila kinahanglang mokalagiw ngadto sa usa ka dapit nga hilwas. (Luc. 19:41-44; 21:7-21) Unya, kapin sa 30 ka tuig ang milabay. Maorag gihunahuna sa pipila ka Hudiyanong mga Kristohanon nga diyutay ra ang kausaban sa duol nga umaabot. Pagkatukma-panahon ang tambag gikan kang apostol Pedro sa iyang ikaduhang sulat, nga gisulat mga 64 K.P., sa ‘paghatag ug pagtagad sa matagnaong pulong’! (2 Ped. 1:19) Sa wala madugay human niana, sa 66 K.P., ang Jerusalem gilibotan sa Romanhong kasundalohan. Sa dihang misibog ug kalit ang Romanhong puwersa, ang Hudiyanong mga Kristohanon nga nagtukaw nagsunod sa pahimangno ni Jesus ug mikalagiw. Unya, sa 70 K.P., ang Romanhong kasundalohan mibalik ug bug-os nga naglaglag sa Jerusalem. Pagkamalipayon gayod kadtong maong mga Kristohanon nga sila naghatag ug suod nga pagtagad sa matagnaong pulong ni Jesus!

¹⁰ Alang sa unsa man kita nga modernong-adlaw nga mga Kristohanon magabantay? Sa mga panan-awon sa Pinadayag, si Jesus nagpaalisto sa mga Kristohanon nga nagapuyo sa adlaw sa Ginoo sa daghang hitabo nga sa dili madugay mahitabo. Sulod sa milabay nga 80 ka tuig, ubay-ubay niining mga hitaboa ang nahitabo na: ang pagkatawo sa Gingharian; ang gubat sa langit, nga gisundan sa pagtanggong kang Satanas ug iyang mga demonyo sa kasilinganan sa yuta; ang pagkapukan sa Babilonyang Bantogan; ug ang pagbaton sa pagkainila sa pulag-kolor nga mananap nga mapintas, ang ikawalong gahom sa kalibotan. Ang katumanan niining mga bahina sa matagnaong pulong sa Pinadayag nagahimo niining labaw pang tino nga sa dili madugay atong makita kining nahibilin pang dramatikanhong mga hitabo: ang pagpatik sa kataposang mga membro sa 144,000, ang kompletong pagtigom sa dakong panon, ang kalaglagan sa Babilonyang Bantogan, ang gubat sa Armageddon, ang pagtambog sa bung-aw kang Satanas, ug ang Milenyong Pagmando ni Kristo. Pagkahinungdanon nga kita nagahatag ug pagtagad sa pasidaan ni Jesus: “Tan-awa! Ako moabot ingon sa usa ka kawatan. Malipayon ang usa nga pabiling nagatukaw ug nagabantay sa iyang panggawas nga mga bisti.”​—Pin. 16:15.

¹¹ Kita ba nagatukaw? Unsa ka seryoso natong gitagad ang matagnaong pulong? Bisan kon gipahinungod nato ang atong mga kinabuhi kang Jehova 5 ka tuig kanhi o 50 ka tuig kanhi, ang mga pulong ni Pablo ngadto sa Romanhong mga Kristohanon haom nga mapadapat kanato: “Kamo nahibalo sa panahon, nga maoy takna na aron kamo momata gikan sa pagkatulog, kay karon ang atong kaluwasan mas duol kay sa dihang kita nahimong mga magtutuo. Lawom na kaayo ang kagabhion; ang adlaw nagakaduol na.” Dayon si Pablo nagaawhag sa mga Kristohanon nga “tangtangon nato ang mga buhat nga iya sa kangitngit” ug “maglakaw nga may kahapsay.” (Roma 13:11-13) Kita nagapuyo sa usa ka kalibotan nga nahiluna sa kangitngit sa moral. Ang makapakurat nga panggawi sa miagi lamang nga 30 o 40 ka tuig maoy kasagaran sa daghang kalibotanon niining kataposang dekada sa ika-20ng siglo. Pagbantay, mga igsoon, nga dili gayod ninyo tugotan ang inyong kaugalingon nga maanod ngadto sa kalibotanong kangitngit ug mahimong magaduka sa moral. Kon imong tugotan ang imong kaugalingon nga mapasagdanon bahin sa daotang paagi sa kinabuhi sa kalibotan, mawala kanimo ang pagsabot sa dagkong mga isyu nga sa dili madugay pagahusayon sa walay-kataposan: ang pagbayaw sa soberanya ni Jehova ug ang pagbalaan sa iyang ngalan. Ang espirituwal nga pagduka magpamilegro sa atong kaluwasan, nga karon haduol na kaayo.

¹² Pagtubo sa Kinasingkasing nga Pagpabili sa Matagnaong Pulong: Ang karaang Hebreohanong mga propeta interesado kaayo sa katumanan sa ilang mga tagna maylabot sa Mesiyas. Ilang gihimo “ang usa ka makuging pakisayod ug usa ka maampingong pagpangita” maylabot sa pagpalampos sa katuyoan sa Diyos. (1 Ped. 1:10, 11) Sa susama, samtang ikaw magahatag ug pagtagad sa matagnaong pulong sa basahon sa Pinadayag, ikaw magatubo diha sa pagpabili sa espirituwal nga mga butang. Ang imong espirituwal nga gana magauswag, mao nga ikaw mapalihok sa pagkalot sa “lawom nga mga butang sa Diyos.” (1 Cor. 2:10) Samtang pun-on nimo ang imong kasingkasing uban sa pagpabili sa matagnaong pulong, walay panginahanglan alang kang bisan kinsa sa pag-agda kanimo sa pagtambong sa mga tigom; ikaw mapalihok gayod sa pagtambong ug pagpakig-ambit nga makanunayon. (Luc. 6:45) Ug kon ang ‘pulong anaa sa imong kaugalingong kasingkasing,’ ikaw mapalihok sa ‘pagpahayag diha sa dayag alang sa kaluwasan.’​—Roma 10:8-10.

¹³ Samtang nagakalawom kita sa panahon sa kataposan, ang dugang pang mga mabiaybiayon magayubit kanato tungod sa pagpabilin sa atong pagtuo sa matagnaong mga kapahayagan sa Diyos. (2 Ped. 3:3, 4) Bisan pa niana, kita magpabiling magtukaw sa matagnaong pulong. Ang kahayag sa Pulong sa Diyos nagapakita kanato kon diin na kita sa agos sa panahon. Kini sa pagkamasanagon nagadan-ag sa kamatuoran nga kita ania na sa kataposang mga adlaw niining mangiob nga kalibotan. Ang bituon nga pang-adlaw misubang na! Si Kristo anaa na sa Gingharianong gahom! Sa unahan ato nang makita ang banagbanag sa usa ka bag-ong adlaw. Hinaot nga ang sinaad nga bag-ong kalibotan sa Diyos magapadayong tinuod kanato sama sa Gingharian ngadto sa tulo ka apostol kinsa may pribilehiyo sa pagtan-aw-daan niana diha sa milagrosong panan-awon sa pagkabalhin sa panagway ni Jesus!