Kapitulo Dos

Bayawa si Jehova Ingong Bugtong Matuod nga Diyos

 1. Kinsa ang bugtong matuod nga Diyos?

ANG Bibliya nag-ingon nga bisan tuod adunay daghan nga giilang mga diyos, “alang kanato sa pagkatinuod adunay usa lamang ka Diyos nga Amahan.” (1 Corinto 8:​5, 6) Kanang ‘usa ka Diyos’ mao si Jehova, ang Maglalalang sa tanang butang. (Deuteronomio 6:4; Pinadayag 4:11) Si Jesus nagtumong kaniya ingon nga “akong Diyos ug inyong Diyos.” (Juan 20:17) Siya miuyon kang Moises, kinsa unang miingon: “Si Jehova mao ang matuod nga Diyos; wala nay lain gawas kaniya.” (Deuteronomio 4:35) Si Jehova labaw kaayo kay sa bisan unsang mga butang sa pagsimba, sama sa mga idolo, sa mga tawo nga gipakadiyos, o sa iyang kaaway nga si Satanas nga Yawa, “ang diyos niini nga sistema sa mga butang.” (2 Corinto 4:​3, 4) Kasukwahi niining tanan, si Jehova, sumala sa pagtawag kaniya ni Jesus, mao “ang bugtong matuod nga Diyos.”​—Juan 17:3.

 2. Samtang kita makakat-on bahin sa Diyos, sa unsang paagi maapektohan ang atong kinabuhi?

² Ang mapasalamatong mga tawo nga nakakat-on bahin sa makapadasig nga mga hiyas sa Diyos, maingon man sa iyang nahimo ug pagahimoon pa alang kanato, madani kaniya. Samtang ang ilang gugma kang Jehova motubo, matukmod sila sa pagbayaw kaniya. Sa unsang paagi? Usa ka paagi mao ang pagsulti sa uban bahin kaniya. “Pinaagi sa baba ang usa nagahimog pagpahayag sa dayag alang sa kaluwasan,” matod sa Roma 10:10. Ang laing paagi mao ang pagsundog kaniya pinaagi sa pulong ug sa buhat. “Mahimong mga tigsundog sa Diyos, ingon nga hinigugmang mga anak,” matod sa Efeso 5:1. Aron mahimo kana sa mas bug-os nga paagi, kita kinahanglang mahibalo bahin kang Jehova kon kinsa gayod siya.

 3. Unsa ang pangunang mga hiyas sa Diyos?

³ Daghag gisulti ang tibuok Bibliya nga magpaila sa talagsaong mga hiyas sa Diyos. Ang iyang upat ka pangunang mga hiyas mao ang kaalam, hustisya, gahom, ug gugma. “Kaniya anaa ang kaalam.” (Job 12:13) “Ang tanan niyang dalan hustisya.” (Deuteronomio 32:4) Siya “mabaskog sa gahom.” (Isaias 40:26) “Ang Diyos gugma.” (1 Juan 4:8) Bisan pa niana, sa upat ka pangunang mga hiyas sa Diyos, unsa ang labing talagsaong hiyas, nga labawng nagpaila kaniya kay sa ubang mga hiyas kon unsa siyang matanga sa Diyos?

“Ang Diyos Gugma”

 4. Sa mga hiyas sa Diyos hain niini ang nagpalihok niya sa paglalang sa uniberso ug sa tanang buhing butang?

⁴ Tagda kon unsay nagpalihok kang Jehova sa paglalang sa uniberso ug sa intelihenteng mga espiritu ug sa tawhanong mga linalang. Ang iya bang kaalam o gahom? Dili, kay bisan tuod gigamit kini sa Diyos, dili kini mao ang nagapalihok nga mga puwersa. Ug ang iyang hustisya wala mag-obligar nga ipaambit niya ang gasa sa kinabuhi. Hinunoa, ang dakong gugma sa Diyos maoy nagpalihok kaniya nga ipaambit sa uban ang mga kalipay sa kinabuhi sa intelihenteng mga linalang. Ang gugma nagtukmod kaniya sa pagpahayag sa iyang katuyoan nga ang masinugtanong katawhan kinahanglang mabuhi sa walay kataposan sa Paraiso. (Genesis 1:​28; 2:15) Ang gugma nagpalihok kaniya sa paghikay sa pagwagtang sa tunglo nga naagoman sa katawhan tungod sa kalapasan ni Adan.

 5. Sumala sa Bibliya, si Jehova maoy personipikasyon sa unsang hiyas, ug ngano?

⁵ Busa, sa tanang hiyas sa Diyos, ang kinalabwan mao ang iyang gugma. Kini mao ang iyang kinaiyahan. Bisag hinungdanon ang iyang kaalam, hustisya, ug gahom, ang Bibliya wala gayod mag-ingon nga si Jehova maoy ingon sa bisan hain niini. Apan kini nag-ingon nga siya maoy gugma. Oo, si Jehova mao ang personipikasyon sa gugma. Kini maoy gugma nga gigiyahan sa prinsipyo, dili sa emosyon. Ang gugma sa Diyos gigamhan sa mga prinsipyo sa kamatuoran ug pagkamatarong. Kini mao ang kinalabwang matang sa gugma, sumala sa gipakita mismo ni Jehova nga Diyos. Kanang gugmaha maoy kapahayagan sa bug-os nga pagkadili-mahakogon ug kanunayng giduyogan sa makitang pamatuod nga kini nagalihok.

 6. Unsay magpaposible nga atong masundog ang Diyos, bisan tuod siya labaw kanato?

⁶ Kining kahibulongang hiyas sa gugma mao ang makapaarang nato sa pagsundog sa maong Diyos. Ingong ubos, dili-hingpit, masalaypon nga mga tawo, basin maghunahuna kita nga dili gayod nato mahimo kana sa malamposong paagi. Apan aniay laing pananglitan sa dakong gugma ni Jehova: Nakasabot siya sa atong mga kahuyangan ug wala mangayog kahingpitan kanato. Nasayod siya nga dili gayod kita hingpit sa pagkakaron. (Salmo 51:5) Maoy hinungdan nga ang Salmo 130:​3, 4 nag-ingon: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog? Kay ang matuod nga pagpasaylo anaa kanimo.” Oo, si Jehova maoy “usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.” (Exodo 34:6) “Ikaw, Oh Jehova, maayo ug andam sa pagpasaylo.” (Salmo 86:5) Pagkamakapahupay! Pagkamakapalagsik ang pag-alagad niining kahibulongang Diyos ug pagtagamtam sa iyang mahigugmaon, maluluy-ong pag-atiman!

 7. Sa unsang paagi ang gugma ni Jehova makita diha sa iyang kalalangan?

⁷ Ang gugma ni Jehova makita usab diha sa iyang kalalangan. Hunahunaa ang daghang maayong butang nga gihatag ni Jehova alang sa atong kalipay, sama sa matahom nga kabukiran, kalasangan, kalanawan, ug kadagatan. Naghatag siya kanatog pagkaon sa katingalahang kadaiyahan aron sa pagtagbaw sa atong gana ug sa pagsustento kanato. Gawas pa, gihatag ni Jehova ang hilabihan ka daghang maanindot ug nangalimyon nga kabulakan ingon man ang makalingaw nga mga mananap. Naghimo siyag mga butang nga makapahimuot sa mga tawo, bisan tuod dili unta kinahanglang himoon niya kana. Tinuod, kay nagkinabuhi niining daotang kalibotan diha sa atong presenteng dili-hingpit nga kahimtang, dili nato mapahimuslan sa bug-os ang iyang kalalangan. (Roma 8:22) Apan handurawa lamang ang pagahimoon ni Jehova alang kanato sa Paraiso! Ang salmista nagpasalig kanato: “Imong ginabukhad ang imong kamot ug ginatagbaw ang [maayong] tinguha sa tanang buhing butang.”​—Salmo 145:16.

 8. Unsa ang labing talagsaong pananglitan sa gugma ni Jehova kanato?

⁸ Unsa ang labing talagsaong pananglitan sa gugma ni Jehova alang sa katawhan? Ang Bibliya nagsaysay: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (3:16) Gumikan ba sa pagkamaayo sa tawo nga gibuhat kini ni Jehova? Ang Roma 5:8 nagtubag: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” Oo, gipadala sa Diyos ang iyang hingpit nga Anak dinhi sa yuta aron ihatag ang iyang kinabuhi ingong halad lukat aron sa pagtubos kanato gikan sa tunglo sa sala ug kamatayon. (Mateo 20:28) Kini nagbukas sa dalan aron ang katawhan nga nahigugma sa Diyos makaangkon sa walay kataposang kinabuhi. Sa kamapasalamaton, ang gugma sa Diyos gipaabot ngadto sa tanang buot mobuhat sa iyang kabubut-on, kay ang Bibliya nagsulti kanato: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”​—Buhat 10:​34, 35.

 9. Sa unsang paagi maimpluwensiyahan kita sa kamatuorang si Jehova naghatag sa iyang Anak isip lukat alang kanato?

⁹ Sa unsang paagi ang kamatuoran nga si Jehova naghatag sa iyang Anak isip lukat alang kanato, nga sa ingon nagbukas sa dalan sa walay kataposang kinabuhi, makaimpluwensiya sa paggamit nato sa atong kinabuhi karon? Kini angayng magpalalom sa atong gugma sa matuod nga Diyos, si Jehova. Sa samang panahon, kini angayng magpalihok nato nga maminaw gayod kang Jesus, nga maoy naghawas sa Diyos. “[Si Jesus] namatay alang sa tanan aron sila nga nagakinabuhi magkinabuhi dili na alang sa ilang kaugalingon, kondili alang kaniya nga namatay alang kanila.” (2 Corinto 5:15) Makapalipay gayod ang pagsunod sa mga lakang ni Jesus, kay siya sulondan sa pagsundog sa gugma ug pagkamabination ni Jehova! Gipakita kini diha sa gisulti ni Jesus ngadto sa mga mapaubsanon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.”​—Mateo 11:28-30.

Pagpakitag Gugma Alang sa Uban

10. Unsa ang pipila ka paagi nga ikapakita nato ang gugma alang sa mga isigka-Kristohanon?

¹⁰ Sa unsang paagi ikapakita nato nga nabatonan nato ang matang sa gugma alang sa mga isigka-Kristohanon nga nabatonan usab ni Jehova ug ni Jesus alang kanato? Tagda ang daghang paagi nga atong mahimo kini: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Kini moantos sa tanang butang, motuo sa tanang butang, molaom sa tanang butang, moagwanta sa tanang butang. Ang gugma dili gayod mapakyas.”​—1 Corinto 13:4-8; 1 Juan 3:​14-​18; 4:​7-​12.

11. Kang kinsa pa kita angayng magpakitag gugma, ug sa unsang paagi?

¹¹ Kang kinsa pa kita angayng magpakitag gugma, ug sa unsang paagi? Si Jesus miingon: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mateo 28:​19, 20) Naglakip kini sa pagpaambit sa maayong balita sa umaabot nga paraisonhong bag-ong kalibotan sa Diyos ngadto kanilang dili pa nato mga isigka-Kristohanon. Tin-awng gipakita ni Jesus nga ang atong gugma dili angayng ipakita ngadto lamang kanilang sama kanatog tinuohan, kay matod niya: “Kon inyong higugmaon [lamang] sila nga nahigugma kaninyo, unsa may inyong ganti? Dili ba ang mga maniningil ug buhis nagabuhat man usab sa samang butang? Ug kon inyong komostahon ang inyong mga igsoon lamang, unsang talagsaong butang ang inyong ginabuhat? Dili ba ang katawhan sa kanasoran nagabuhat man usab sa samang butang?”​—Mateo 5:​46, 47; 24:14; Galacia 6:10.

“Magalakaw sa Ngalan ni Jehova”

12. Nganong ang ngalan sa Diyos ikapadapat lamang kaniya?

¹² Ang laing hinungdanong bahin sa pagbayaw sa matuod nga Diyos mao ang pagkaila, paggamit, ug pagtudlo sa uban sa iyang talagsaong ngalan nga Jehova. Ang salmista nagpahayag niining kinasingkasing nga pangandoy: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” (Salmo 83:18) Ang ngalang Jehova nagkahulogang “Siya Nagpahinabo nga Mamao.” Siya mao ang Usang Halangdon, nga kanunayng naghimo sa iyang mga katuyoan ngadto sa malamposong katumanan niini. Ug ang bugtong matuod nga Diyos lamang ang tukmang magbaton nianang ngalana, kay ang mga tawo dili gayod makatino nga ang ilang mga paningkamot magmalamposon. (Santiago 4:​13, 14) Si Jehova lamang ang makasulti nga ang iyang pulong “tinong magpalampos” nga tungod niana kini iyang gipadala. (Isaias 55:11) Daghan ang nahinam sa dihang una nilang nakita ang ngalan sa Diyos diha sa ilang mga Bibliya ug nakakat-on sa kahulogan niini. (Exodo 6:3) Apan sila makabaton lamag kaayohan pinaagi niining kahibaloa kon sila “magalakaw sa ngalan ni Jehova . . . hangtod sa kahangtoran.”​—Miqueas 4:5.

13. Unsay nalambigit sa pagkaila sa ngalan ni Jehova ug sa paglakaw diha sa iyang ngalan?

¹³ Maylabot sa ngalan sa Diyos, ang Salmo 9:10 nag-ingon: “Kadtong nakaila sa imong ngalan mosalig kanimo.” Kini naglakip dili lamang sa pagkaila sa ngalang Jehova, nga dili awtomatikong magpasabot nga nagsalig na kaniya. Ang pagkaila sa ngalan sa Diyos nagpasabot sa pagpabili kon unsang matanga nga Diyos si Jehova, pagtahod sa iyang awtoridad, pagsugot sa iyang mga sugo, pagsalig kaniya sa tanang butang. (Proverbio 3:​5, 6) Sa susama, ang paglakaw sa ngalan ni Jehova nagpasabot sa pagkanapahinungod ngadto kaniya ug paghawas kaniya ingong usa sa iyang mga magsisimba, sa tinuoray nagagamit sa atong kinabuhi uyon sa kabubut-on sa Diyos. (Lucas 10:27) Nagabuhat ka ba niana?

14. Kon alagaron nato si Jehova hangtod sa hangtod, unsay gikinahanglan gawas pa sa pagbati nga kini usa ka obligasyon?

¹⁴ Kon alagaron nato si Jehova hangtod sa hangtod, kinahanglang palihokon kita dili lamang tungod sa pagbati nga kini obligasyon. Giawhag ni apostol Pablo si Timoteo, nga nag-alagad na kang Jehova sa daghang tuig: “Bansaya ang imong kaugalingon nga maoy tumong ang diyosnong pagkamahinalaron.” (1 Timoteo 4:7) Ang pagkamahinalaron magsumikad sa kasingkasing nga puno sa pagkamapasalamaton alang sa persona nga ngadto kaniya ang pagkamahinalaron gitumong. Ang “diyosnong pagkamahinalaron” nagpasabot sa halalom nga pagpasidungog ug pagtahod kang Jehova sa personal. Nagpakita kinig mahigugmaong kalangkitan ngadto kaniya tungod sa walay-kinutobang pagtamod alang kaniya ug sa iyang mga dalan. Kini magpahinabo nga gusto natong ang tanan mohatag ug dakong pagpabili sa iyang ngalan. Angay natong ugmaron ang diyosnong pagkamahinalaron sa atong kinabuhi kon buot natong magalakaw sa ngalan ni Jehova, ang bugtong matuod nga Diyos, hangtod sa hangtod.​—Salmo 37:4; 2 Pedro 3:11.

15. Sa unsang paagi ikahatag nato sa Diyos ang bug-os nga pagkamahinalaron?

¹⁵ Aron makaalagad sa Diyos sa madinawatong paagi, kinahanglang ihatag nato kaniya ang bug-os nga pagsimba, kay siya maoy “Diyos nga nagapangayog bug-os nga pagkamahinalaron.” (Exodo 20:5) Dili kita mahimong mahigugma sa Diyos ug sa samang panahon mahigugma sa daotang kalibotan, nga niana si Satanas mao ang diyos. (Santiago 4:4; 1 Juan 2:​15-​17) Si Jehova nahibalo pag-ayo sa matang sa pagkatawo diin ang matag usa kanato naningkamot nga mamaingon. (Jeremias 17:10) Kon gihigugma gayod nato ang pagkamatarong, siya nahibalo niana ug siya motabang kanato sa pagsagubang sa matag adlaw natong mga pagsulay. Kay nagpalig-on kanato pinaagi sa iyang gamhanang balaang espiritu, siya motabang kanato nga magmadaogon batok sa pagkadaotan nga kaylap kaayo niining kalibotana. (2 Corinto 4:7) Motabang usab siya kanato sa pagmentinar sa atong lig-ong paglaom sa walay kataposang kinabuhi sa paraisong yuta. Pagkamahimayaong palaaboton niana! Kinahanglang tim-os natong pasalamatan kana ug kinabubut-ong moalagad sa matuod nga Diyos, si Jehova, nga maoy magpaposible niana.

16. Unsay angay gayod nimong buhaton, duyog sa milyonmilyong uban pa?

¹⁶ Milyonmilyong tawo sa tibuok kalibotan malipayong nagdawat sa pagdapit sa salmista nga misulat: “Oh padakoa ninyo si Jehova uban kanako, ug usahan ta ang pagbayaw sa iyang ngalan.” (Salmo 34:3) Ikaw gidapit ni Jehova aron mahimong bahin sa nagatubong panon sa katawhan sa tanang kanasoran nga nagabuhat niini.

Repasong Panaghisgot

• Unsang matanga sa persona si Jehova? Sa unsang paagi makabaton kitag kaayohan pinaagi sa pagbaton ug tin-awng pagsabot sa iyang mga hiyas?

• Sa unsang paagi makatabang kita sa ubang mga tawo nga makakat-on sa kamatuoran bahin sa Diyos?

• Unsay nalangkit sa pagkaila kang Jehova ug paglakaw diha sa iyang ngalan?

[Mga hulagway sa panid 14]

Tungod sa iyang dakong gugma, si Jehova ‘magabukhad sa iyang kamot ug magatagbaw sa tinguha sa tanang buhing butang’