Ipakita sa Tanang Panahon ang Gugma ug Pagtuo
“Siya nga nagapabilin nga nahigugma nagapabiling nahiusa uban sa Diyos.” “Ug mao kini ang pagdaog nga nagadaog sa kalibotan, ang atong pagtuo.”—1 JUAN 4:16; 5:4.
SI Jehova maoy larawan sa gugma, ug kadtong nagatinguha sa pagpahimuot kaniya kinahanglang magpakita niining diyosnong hiyas. Gipatin-aw kini ni apostol Juan sa ulahing bahin sa iyang unang dinasig nga sulat.
1, 2. Unsang mga hiyas ang ilabinang gipasiugda sa 1 Juan 4:7–5:21?
2 Ang tinuod nga mga Kristohanon kinahanglang magpakita usab ug pagtuo. Niini lamang paagiha nga ilang madaog ang kalibotan ug piho ang kahimuot ni Jehova. Busa, samtang atong tun-an ang kataposang bahin sa sulat ni Juan, sa mainampoon atong tagdon ang bili sa pagpakitag gugma ug pagtuo.
‘Maghigugmaay Kita sa Usag Usa’
3 Gipasiugda ni Juan ang bili sa gugma. (Basaha ang 1 Juan 4:7, 8.) Ang “mga minahal” nga mga Kristohanon gidasig nga “magpadayon sa paghigugma sa usag usa, tungod kay ang gugma gikan sa Diyos,” si Jehova mao ang Tuboran niini. “Ang tanang nagahigugma gianak gikan sa Diyos [ingong inanak sa espiritu nga indibiduwal] ug makabaton sa kahibalo sa Diyos,” nga nahibalo sa mga hiyas ug mga katuyoan ni Jehova, ug sa paagi sa iyang pagpakita sa gugma. Karon kining maong “kahibalo sa Diyos” nabatonan usab sa “dakong panon” sa “ubang mga karnero” ni Kristo.
3, 4. Unsay kalabotan sa pagpakitag gugma sa atong kahibalo sa Diyos?
4 Ang pagkahibalo sa Diyos nagkahulogan sa pagpakitag tinuod nga pagpabili sa iyang mga hiyas, sa paghigugma kaniya sa bug-os, ug magmaunongon kaniya ingong atong Soberano. Apan “siya nga wala magahigugma wala makaila sa Diyos.” Kadtong dili magpakitag Kristohanong gugma “wala makaila sa Diyos, tungod kay ang Diyos gugma.” Oo, ang gugma mao ang nangibabawng hiyas ni Jehova, nga makita sa iyang espirituwal ug materyal nga mga tagana sa katawhan.
5. Unsa ang labing dakong pamatuod nga ang “Diyos gugma”?
5 Ang sunod nga gikutlo mao ang labing dakong pamatuod nga ang “Diyos gugma.” (Basaha ang 1 Juan 4:9, 10.) Si Juan miingon: “Pinaagi niini ang gugma sa Diyos gipadayag dinhi kanato [ingong mga makasasala nga takos sa kamatayon], tungod kay gipadala sa Diyos ang iyang bugtong Anak nganhi sa kalibotan aron kita makabaton ug kinabuhi pinaagi kaniya.” Ug si Jesus mao ang “bugtong Anak” ni Jehova sa pagkaagi nga siya lamang ang direktang gilalang sa Diyos. (Juan 1:1-3, 14; Colosas 1:13-16) Si Jesus ‘gipadala nganhi sa kalibotan’ pinaagi sa pagkahimong tawo, nagtuman sa iyang ministeryo sa katilingban, ug dayon namatay sa gihalad nga kamatayon. (Juan 11:27; 12:46) ‘Ang pagbaton ug kinabuhing walay kataposan pinaagi kaniya,’ sa langit man kun sa yuta, nagkinahanglag pagtuo sa bili sa iyang halad-lukat.
6. Bisag makasasala pa kita nga wala mahigugma sa Diyos, unsay iyang gihimo?
6 Kita mga makasasala pa nga wala mahigugma sa Diyos sa diha nga “siya nahigugma kanato ug nagpadala sa iyang Anak ingong halad-pasighiuli sa atong mga kasal-anan.” Ang halad ni Kristo ang nagpaposible kanato sa pagbaton ug kapasig-ulian sa tukmang relasyon sa Diyos. (Roma 3:24, 25; Hebreohanon 2:17) Gipabilhan ba nimo kining dakong pagpakitag dili-takos nga gugma sa atong langitnong Amahan?
7 Ang gugma sa Diyos kanato angayng makaimpluwensiya sa atong tinamdan sa uban. (Basaha ang 1 Juan 4:11-13.) Sanglit nahigugma siya kanato samtang mga makasasala pa kita, “kita may kaakohan sa paghigugma sa usag usa.” Tali sa mga tawo, “wala pa gayoy tawo nga nakakita sa Diyos sa bisan unsang panahon.” Busa dili kita makaingon nga atong gihigugma si Jehova tungod kay nakakita kaniya. (Exodo 33:20; Juan 1:18; 4:24) Apan, pinaagi sa pagpakita sa gugma, atong ginapakita nga atong gihigugma ang Tuboran niining hiyasa. Ang atong inigsoong gugma nagpamatuod nga ang “Diyos nagapabilin kanato ug ang iyang gugma gihingpit,” kun napakita sa bug-os, diha kanato. Ug kita nahibalo nga “kita nagapabiling nahiusa uban” kang Jehova “tungod kay kita iyang gihatagan sa iyang espiritu.” Ang atong pagpakita sa inigsoong gugma nagpamatuod nga nagalihok kanato ang espiritu ni Jehova, kay ang gugma maoy usa sa mga bunga niini. (Galacia 5:22, 23) Kini nagpakita nga kita nahibalo sa Diyos ug nakabaton sa iyang pag-uyon.
8. Unsang dugang pamatuod nga kita “nahiusa uban sa Diyos”?
8 Adunay dugang pamatuod nga kita “nahiusa uban sa Diyos.” (Basaha ang 1 Juan 4:14-16a.) Sanglit “nakakita” sa nahimo ni Jesus sa yuta ug sa iyang pag-antos alang sa katawhan, si Juan ‘nakapamatuod nga gipadala sa Amahan ang Iyang Anak ingong Manluluwas sa kalibotan’ sa makasasalang katawhan. (Juan 4:42; 12:47) Dugang pa, ‘ang Diyos nagapabilin nga nahiusa uban kanato ug kita uban kaniya’ kon mohimo kitag kinasingkasing nga pagsugid nga si Jesu-Kristo mao ang iyang Anak. Nagkinahanglan kinig pagtuo ug paghatag pamatuod sa katilingban nga si Jesus mao ang Anak sa Diyos. (Juan 3:36; Roma 10:10) Ang atong pagsalig sa “gugma nga gibatonan sa Diyos alang kanato” nakahatag dugang pamatuod kon iya man kita sa dinihogang nanghibilin o sa “ubang mga karnero,” nga nahiusa kang Jehova.
9. (a) Sa unsang diwa nga ang gugma sa Diyos “gihingpit,” ug sa unsang paagi makaapektar kini sa atong relasyon sa uban? (b) Ang “hingpit” nga gugma makapukaw ug unsa?
9 Sunod gipakita ni Juan nga ang gugma “gihingpit.” (Basaha ang 1 Juan 4:16b, 17.) Kita gipahinumdoman nga “ang Diyos gugma.” Tungod kay kita ‘nagapabiling nahigugma,’ nga nagapakita sa bunga sa espiritu ni Jehova, kita ‘nagapabiling nahiusa uban sa Diyos.’ Kon ang gugma alang kang Jehova “nahingpit diha kanato,” nga napakita sa bug-os diha kaniya, atong higugmaon ang isigkamagtutuo. (Itandi sa bersikulo 12.) Ang “hingpit” nga gugma nagapasiugda usab sa “kagawasan sa pagsulti” sa Diyos diha sa pag-ampo karon ug “sa adlaw sa paghukom” nga nalangkit sa presensiya ni Kristo. Kadtong nagapakita ning gugmaha walay katarongang mahadlok sa mabangis nga paghukom sa Diyos. Kon atong ipakita ang gugma, niadto nga diwa “maingon nga mao siya [Jesus], mao usab kita dinhi sa kalibotan.” Oo, nahisama kita kaniya sa pagtagamtam sa pag-uyon ingong mga anak sa Diyos niining kalibotana sa katawhan nga bulag gikan sa Diyos.
10. Unsay dili maeksperyensiyahan niadtong gihimong “hingpit” ang gugma?
10 Taliwala kanila diin ang gugma gihimong “hingpit” dili makasinati sa maong kahadlok nga makababag sa pag-ampo. (Basaha ang 1 Juan 4:18, 19.) “Ang kahadlok makapugong” nga makababag kanato sa libreng pagduol kang Jehova. Kon atong gibati ang maong kahadlok, ‘wala kita mahingpit sa gugma.’ Apan kon kita “gihimong hingpit diha sa gugma,” kining hiyasa motugob sa atong mga kasingkasing, ug makatukmod kanato sa pagbuhat sa balaang kabubut-on, ug mopalihok kanato sa pagpabiling suod sa atong langitnong Amahan diha sa pag-ampo. Kita may rason sa paghigugma kang Jehova ug sa pag-ampo kaniya, kay si Juan miingon, ‘Kita nahigugma, tungod kay ang Diyos ang unang nahigugma kanato.’
11 Siyempre, dili igo ang pag-ingon lamang nga gihigugma nato ang Diyos. (Basaha ang 1 Juan 4:20, 21.) Ang si bisan kinsa nga moingon, “Gihigugma ko ang Diyos” samtang nagadumot sa iyang espirituwal nga igsoon siya “bakakon.” Sanglit kita makakita sa atong igsoon ug makapaniid sa iyang diyosnong mga hiyas, ang pagpakita kaniyag gugma mas masayon kay sa paghigugma sa dili-makitang Diyos. Tinuod, “siya nga wala mahigugma sa iyang igsoon, nga iyang nakita, dili gayod makahimo sa paghigugma sa Diyos, nga wala niya makita.” Busa makataronganon nga atong sundon kining maong “sugo”: “Ang nagahigugma sa Diyos kinahanglan magahigugma sa iyang igsoon usab.”
Kinsa ang Nagadaog sa Kalibotan?
12. Sanglit atong gihigugma ang Diyos, unsang laing gugma nga gilaomang atong nabatonan?
12 Gipakita sunod ni Juan kon unsa gayoy kahulogan sa paghigugma sa Diyos. (Basaha ang 1 Juan 5:1-5.) Una, gipunting sa apostol nga ang “tanang nagatuo nga si Jesus mao ang Kristo,” “gipanganak gikan sa Diyos,” kun inanak sa espiritu ni Jehova. Dugang pa, ang tanang nahigugma sa Nanganak, si Jehova, nahigugma sa tanan nga “gianak niana nga usa.” Oo, ang tanang dinihogang mga anak sa Diyos nahigugma kaniya ug ginalaoman nga maghigugmaay sa usag usa. Ang maong inigsoong gugma maoy kinaiyahan usab sa “dakong panon” sa “ubang mga karnero” nga adunay yutan-ong mga paglaom.—Juan 10:16; Pinadayag 7:9.
13. (a) Nganong dili “mabug-at” ang mga sugo sa Diyos alang kanato? (b) Sa unsang paagi atong ‘madaog ang kalibotan’?
13 ‘Atong maila nga kita nagahigugma sa mga anak sa Diyos kon kita magahigugma sa Diyos ug magatuman sa iyang mga sugo.’ Kay ‘ang paghigugma sa Diyos nagkahulogan nga atong pagabantayan ang iyang mga sugo.’ Sanglit atong gihigugma ang Diyos ug ang pagkamatarong, malipay kita sa pagtuman sa iyang mga sugo. Si Juan miingon nga dili sila “mabug-at” alang kanato “kay ang tanang igaanak sa Diyos modaog sa kalibotan.” Ang “tanan” mahimong magpasabot sa hinatag sa Diyos nga gahom sa ‘pagdaog sa kalibotan,’ kun pagbuntog sa dili-matarong tawhanong katilingban uban sa mga tentasyon niini sa paglapas sa mga sugo ni Jehova. (Juan 16:33) “Ang pagdaog nga nagadaog sa kalibotan” mao ang “atong pagtuo” sa Diyos, sa iyang Pulong, ug sa iyang Anak. Kon kita adunay “pagtuo nga si Jesus mao ang Anak sa Diyos,” atong ‘nadaog ang kalibotan’ pinaagi sa pagsalikway sa sayop nga paghunahuna, ug imoral nga mga paagi pinaagi sa pagtuman sa mga sugo sa Diyos.
14. (a) Sa unsang paagi mianhi si Jesus “pinaagi sa tubig”? (b) Sa unsang paagi gipakita nga si Kristo mao ang Anak sa Diyos “pinaagi sa dugo”? (c) Sa unsang paagi ang balaang espiritu “nagamapatuod” mahitungod kang Jesu-Kristo?
14 Sanglit hinungdanon ang pagtuo kang Jesus sa atong pagkahimong ‘magdadaog sa kalibotan,’ mikutlo si Juan ug pamatuod nga gihatag bahin kang Kristo pinaagi sa “tulo ka tigpamatuod.” (Basaha ang 1 Juan 5:6-8.) Ang gisultig una ni Juan mao nga si Jesus “mianhi pinaagi sa tubig.” Sa gibawtismohan si Jesus sa tubig sa pagsimbolo sa pagtanyag sa iyang kaugalingon ngadto sa Diyos, si Jehova miingon: “Kini mao ang akong Anak, nga pinalangga, nga akong gikahimut-an.” (Mateo 3:17) Nakita usab si Kristo nga mao ang Anak sa Diyos “pinaagi sa dugo” nga iyang gibubo diha sa iyang kamatayon ingong lukat. (1 Timoteo 2:5, 6) Dugang pa, si Juan miingon, “ang [balaang] espiritu mao ang nagapamatuod, tungod kay ang espiritu mao man ang kamatuoran.” Ang pagkunsad sa espiritu diha kang Jesus sa iyang bawtismo nagpamatuod nga siya Anak sa Diyos. (Mateo 3:16; Juan 1:29-34) Ang espiritu ni Jehova ang nakahimo kang Jesus sa pagtuman sa iyang sugo ug sa pagbuhat ug gamhanong mga buhat. (Juan 10:37, 38; Buhat 10:38) Pinaagi sa espiritu, gipahinabo sa Diyos ang tagsaong kangitngit, linog, paggilis sa tabil sa templo sa namatay si Jesus, ug unya gibanhaw siya sa mao gihapon nga espiritu sa Diyos.—Mateo 27:45-54.
15. Unsa ang “tulo ka tigpamatuod”?
15 Busa “adunay tulo ka tigpamatuod” sa kamatuoran nga si Jesus mao ang Anak sa Diyos. Kini sila mao (1) ang balaang espiritu, (2) ang tubig sa bawtismo ni Jesus ug sa gihulagwayan niini alang (sa pagtanyag sa iyang kaugalingon kang Jehova), ug (3) ang dugo nga iyang gibubo diha sa kamatayon ingong lukat. Kining tulo “nagakauyon” sa paghatag pamatuod nga si Jesus mao ang Anak sa Diyos, diin kaniya kita magpakitag tinuod nga pagtuo kon nagatinguha kita sa pagdawat sa kinabuhing walay kataposan.—Itandi sa Deuteronomio 19:15.
Pagpamatuod sa Diyos
16. Sa unsang paagi nagapamatuod si Jehova mahitungod kang Jesus?
16 Ang Diyos mismo nakapamatuod mahitungod sa iyang Anak. (Basaha ang 1 Juan 5:9-12.) “Kon ginadawat nato [ingong tinuod] ang pamatuod nga gikan sa mga tawo [dili-hingpit] [sama sa atong naandang himoon diha sa pagsultihay ug sa korte], ang pagpamatuod nga gihatag sa Diyos labaw pa niini.” (Juan 8:17, 18) Sanglit ang ‘Diyos dili arang makabakak,’ kita bug-os makasalig ‘sa pagpamatuod nga gihimo sa Diyos mahitungod sa iyang Anak.’ Ug si Jehova miingon nga si Jesu-Kristo mao ang iyang Anak. (Tito 1:2; Mateo 3:17; 17:5) Dugang pa, ang Diyos mao ang nagpaluyo sa “tulo ka tigpamatuod,” nga mao, ang Iyang balaang espiritu, ang tubig sa bawtismo ni Jesus, ug ang giulang dugo ni Kristo.
17. Unsa lamang ang paagi nga mahimong posible ang kaluwasan?
17 “Ang magatuo sa Anak sa Diyos nagabaton sa pagpamatuod diha sa iyang kahimtang,” o “sa iyang kaugalingon,” tungod kay ang tanang pamatuod nakapatuo kaniya nga si Jesus mao ang Anak sa Diyos. Apan “ang wala magatuo sa Diyos” ingong kasaligang saksi mahitungod sa Iyang Anak nagpahimo kang Jehova nga bakakon. Sa pagkatinuod, ang bug-os nga pagpamatuod nga gihatag mao “nga gihatagan kita sa Diyos ug kinabuhing walay kataposan, ug kining kinabuhia anaa sa iyang Anak.” Pinaagi lamang sa pagtuo kang Jesus ingong Anak sa Diyos nga mahimong posible ang kaluwasan ngadto sa kinabuhing dayon. (Juan 11:25, 26; 14-6; 17:1-3) Busa “ang makabaton sa Anak” pinaagi sa pagtuo kaniya makabaton ug dili-takos nga gasa sa kinabuhing dayon. (Juan 20:31) Apan “kining kinabuhia” dili tagamtamon sa tawong walay pagtuo kang Jesus ingong Anak sa Diyos.
Ang Pag-ampo Nagalihok!
18. Nganong gisulat “kining mga butanga” ni Juan?
18 Sunod mihatag si Juan sa nagpaluyong katuyoan sa iyang sulat ug naghisgot sa pag-ampo. (Basaha ang 1 Juan 5:13-15.) Iyang gisulat “kining mga butanga” aron mahibaloan ‘nga kita adunay kinabuhing walay kataposan.’ Kini mao ang atong pagtuo sama niadtong nagatuo sa “ngalan” sa Anak sa Diyos. (Itandi sa 1 Juan 3:23.) Ug ang mga apostata, nga dili sama kanato, dili makalaglag nianang pagtuoha.—1 Juan 2:18, 19.
19. (a) Sumala sa 1 Juan 5:14, 15, unsang “pagsalig” ang atong nabatonan diha sa Diyos? (b) Unsa ang pila ka butang nga mahimo natong iampo?
19 Diha sa Diyos kita may “pagsalig,” kun “pagkamadaygon,” nga bisan unsa pay atong pangayoon diha sa pag-ampo “sumala sa iyang kabubut-on, siya magapatalinghog kanato.” Kita tukmang makaampo niining mga butanga sama sa pagbalaan sa ngalan ni Jehova, sa iyang espiritu, sa diyosnong kaalam, ug kaluwasan gikan sa usa nga daotan. (Mateo 6:9, 13; Lucas 11:13; Santiago 1:5-8) Ug “kita nahibalo nga atong mabatonan ang mga butang nga gipangayo sanglit atong gipangayo kini kaniya,” nga “Tigpatalinghog sa pag-ampo.”—Salmo 65:2.
20, 21. (a) Unsa nga “sala nga dili makamatay”? (b) Nganong daotan ang pag-ampo may labot sa “sala nga makamatay”?
20 Sunod naghisgot si Juan sa pag-ampo ug sa duha ka matang sa sala. (Basaha ang 1 Juan 5:16, 17.) “Ang sala nga dili makamatay” dili tinuyo, ug dili daotan ang pag-ampo nga mapasaylo ang mahinulsolong mamumuhat ug daotan. (Buhat 2:36-38; 3:19; Santiago 5:13-18) Apan daotan ang pag-ampo mahitungod sa “sala nga makamatay” tungod kay tinuyo kini nga pagpakasala batok sa balaang espiritu, diin imposible ang kapasayloan sa sala. (Mateo 12:22-32; Hebreohanon 6:4-6; 10:26-31) Kining maong mga makasasala moadto sa Gehenna, makaeksperyensiya ug walay kataposang kalaglagan diha sa “ikaduhang kamatayon.” (Pinadayag 21:8; Mateo 23:15 21:8) Samtang si Jehova mao ang kataposang Maghuhukom, dili kita mangahas nga dili-makapahimuot kaniya pinaagi sa pag-ampo alang sa makasasala sa makita ang ebidensiya nga siya sad-an sa tinuyo nga “sala nga makamatay.”
21 Busa, “kon makakita siya [ilabina usa ka dinihogan sa espiritu nga ansiano] nga ang iyang igsoon nakahimog sala nga dili makamatay [“ikaduhang kamatayon”], siya mangaliyopo, ug [ang Diyos] mohatag kinabuhi sa [makasasala],” nagaluwas kaniya gikan sa walay kataposang kalaglagan. Sa tinuod, “ang tanang pagkadili-matarong sala,” o misipyat sa punto may kalabotan sa matarong nga mga sukdanan sa Diyos. “Apan adunay sala nga dili makamatay” sanglit mga resulta kini sa atong pagkadili-hingpit, kita mahinulsolon, ug matabonan ang sala pinaagi sa halad ni Kristo.
Pangunang mga Punto sa Sulat ni Juan
22. Kinsa ang “dili magahilabot” sa maunongong Kristohanon, ug unsay ikaampo ning tawhana nga may pagsalig?
22 Karon gilatid ni Juan ang sukaranang mga punto sa iyang sulat. (Basaha ang 1 Juan 5:18-21.) Ang tanan nga “gianak sa Diyos” ingong dinihogan sa espiritu nga Kristohanon “dili magpakasala.” Si Jesu-Kristo, “ang Usa nga gianak gikan sa Diyos” pinaagi sa balaang espiritu, “nagabantay kaniya, ug ang usa nga daotan [Satanas] dili magahilabot kaniya.” Kining maunongon dinihogang Kristohanon masaligong makaampo sa kaluwasan gikan sa usa nga daotan ug makahimo pinaagi sa “dakong kalasag sa pagtuo,” sa pag-ikyas sa espirituwal nga kadaot gikan sa “nagadilaab nga udyong” ni Satanas.—Mateo 6:13; Efeso 6:16.
23. Sa unsang paagi ‘ang tibuok kalibotan anaa sa gahom sa usa nga daotan’?
23 Sanglit ang mga dinihogan may pamatuod nga sila maoy mga espirituwal nga mga Anak ni Jehova, sila makaingon, “Kita nasayod nga kita iya sa Diyos.” Ang kamatuoran nga sila may pagtuo diha kang Kristo ug dili magpakasala nagpamatuod nga sila mga anak sa Diyos nga kanila “siya dili magahilabot.” “Apan ang tibuok kalibotan [dili-matarong tawhanong katilingban] anaa sa gahom sa usa nga daotan,” si Satanas nga Yawa. (Efeso 2:1, 2; Pinadayag 12:9) Ang kalibotan nagpadaog sa daotang impluwensiya ug pagmando ni Satanas, nga walay paningkamot sa pagbulag aron makabuhat sa balaang kabubut-on.
24. Sa unsang katuyoan nga “gihatagan kita [ni Jesus] ug kinaadman”?
24 Ang pipila ka bakak nga mga magtutudlo nagpatuo nga si Kristo wala mianhi sa unod. (2 Juan 7) Apan ang pamatuod nga gikutlo niining sulata nakapahimo kang Juan sa pag-ingon, “Kami nahibalo nga ang Anak sa Diyos mianhi.” (1 Juan 1:1-4; 5:5-8) Dugang pa, si Jesus “mihatag kanato ug kinaadman,” kun “salabotan,” aron “atong mabatonan ang kahibalo sa usa nga tinuod,” ang anam-anam nga pagsabot sa Diyos. (Mateo 11:27) Busa “kita nahiusa uban sa tinuod nga usa [si Jehova nga Diyos], pinaagi sa iyang Anak si Jesu-Kristo.”—Itandi sa Juan 17:20, 21.
25. Ingong mga Kristohanon, sa unsang paagi atong mapadapat ang tambag sa 1 Juan 5:21?
25 Kadtong nahiusa uban sa tinuod nga Diyos, si Jehova, madinihogang nanghibilin man siya o “ubang mga karnero,” nagatinguha sa pagpahimuot kaniya sa tanang paagi. Apan ang mga pagsulay sa pakigbahin sa pagsimbag diyosdiyos naglungtad sa unang siglo, sama usab karon. Busa tukmang gitapos ni Juan ang iyang sulat pinaagi sa inamahang tambag: “Mga anak, likayi ninyo ang mga diyosdiyos.” Ingong mga Kristohanon, dili kita moyukbo atubangan sa mga rebulto. (Exodo 20:4-6) Kita nahibalo usab nga daotan ang pag-una sa atong kaugalingon, sa kalingawan, o bisan unsa baylo sa Diyos. (2 Timoteo 3:1, 2, 4) Ug ang atong pagpahinungod kaniya nakasanta sa atong pagsimba sa politikal nga “mapintas nga mananap” ug sa “larawan” niini. (Pinadayag 13:14-18; 14:9-12) Busa uban sa panglantaw sa pagpahimuot sa atong langitnong Amahan ug sa pagdawat sa iyang kinabuhing walay kataposan, kinahanglang matinguhaon kita sa atong determinasyon sa paglikay sa tanang pagsimbag diyosdiyos, dili gayod tugotang madaot ang atong bililhong relasyon kang Jehova pinaagi ni Jesu-Kristo.
Mapinadayonong Tabang Alang Kanato
26. Unsa ang pila ka bililhong bahin sa Unang Juan?
26 Ang unang dinasig nga sulat ni Juan nakatabang sa unang mga Kristohanon sa paglikay sa pagsimbag diyosdiyos. Kini nakahimo kanila sa pagtubag sa mga kabakakan sa mga apostata, ug nakaalagad kini sa sama nga katuyoan karon. Pananglitan, kini nagpamatuod nga nabuhi si Jesu-Kristo ingong tawo ug namatay ingong “halad-pasighiuli” alang sa mga kasal-anan. Ang sulat nagpaila sa “mga anti-kristo” ug naglain sa mga anak sa Diyos ug nianang sa Yawa. Kini nagpakita kon unsaon sa pagsuta sa “dinasig nga mga pahayag” sa pagtino kon sila ba iya ni Jehova. Dugang pa, ang mga pulong ni Juan nakakabig kanato nga ang “Diyos gugma,” nga ang tinuod nga pagtuo magadaog sa kalibotan, ug nga si Jehova magpatalinghog sa mga pag-ampo sa iyang maunongong mga saksi.
27. Sa unsang mga paagi nga makatabang kanato ang unang dinasig nga sulat ni Juan?
27 Atubangan sa mga tentasyon sa kalibotan, unsa ka maalamon ang paghinumdom sa pasidaan ni Juan batok sa paghigugma sa kalibotan! Kon may mahitabong mga away-away nga makadaot sa atong relasyon sa usa ka isigkamagtutuo, ang mga pulong ni apostol Pablo makapahinumdom kanato nga kita makapamatuod sa atong kaugalingon nga mga mahigugmaon sa Diyos pinaagi sa pagpakitag inigsoong gugma. Pinaagi sa balaang tabang ug sa pagpadapat sa tambag ni Juan, atong malikayan ang pagpakasala ug makapatunhay sa pagtuo nga magadaog sa kalibotan. Busa atong ipakita ang atong pasalamat alang niining dinasig nga sulat samtang magpadayon kita sa paglakaw sa balaang kahayag, nga magpadayon sa pagkinabuhi ingong mga anak sa Diyos, ug magpakita kanunay sa gugma ug pagtuo sa kahimayaan sa atong langitnong Amahan, si Jehova.
Unsaon Nimo sa Pagtubag?
◻ Kon atong gihigugma si Jehova, sa unsang paagi nakaapektar kini sa atong relasyon sa isigkamagtutuo?
◻ Sa unsang paagi atong ‘madaog ang kalibotan’?
◻ Unsa ang “tulo ka tigpamatuod” mahitungod sa Anak sa Diyos?
◻ Mahitungod sa pag-ampo, unsang “pagsalig” ang atong nabatonan?
◻ Sa unsang paagi makatabang kanato ang Unang Juan?
7. (a) Sanglit dili man kita makaingon nga kita nahigugma kang Jehova tungod kay nakakita kaniya, sa unsang paagi atong ikapakita nga tinuod kitang nahigugma kaniya? (b) Ang atong pagpakitag inigsoong gugma nagapamatuod sa unsa?
11. Nganong makataronganon nga atong tumanon ang sugo: “Ang usa nga nagahigugma sa Diyos kinahanglang magahigugma usab sa iyang igsoon”?
[Blurb sa panid 22]
Sanglit gihigugma kita ni Jehova bisag mga makasasala pa kita, ‘kita may kaakohan sa pagpakitag gugma sa usag usa’
[Blurb sa panid 23]
Ang atong pagtuo sa Diyos, sa iyang Pulong, ug sa iyang bugtong Anak nakahimo kanato sa ‘pagdaog sa kalibotan’
[Hulagway sa panid 25]
Ang balaang espiritu, ang tubig sa bawtismo ni Jesus, ang iyang naulang dugo, ug si Jehova mismo nagpamatuod nga si Jesu-Kristo mao ang Anak sa Diyos