Padayon sa Paglakaw sa Balaang Kahayag
“Ang Diyos kahayag.”—1 JUAN 1:5.
ANG mga Saksi ni Jehova mapasalamaton sa balaang kahayag ug nagatinguhang magpadayon sa paglakaw niana. Apan, dili masayon ang pagbuhat niini, kay bisan ang unang mga disipulo ni Jesu-Kristo giatubang man sa apostasiya. Apan ang maunongong mga apostoles ni Jesus nagpugong sa pagkaylap niini, ug ang usa nga ‘milihok ingong pugong’ mao si apostol Juan. (2 Tesalonica 2:1-12) Ingong tigulang na kaayo nga nagpuyo diha o sa duol sa Efeso sa mga 98 K.P., siya misulat sa iyang unang dinasig sa Diyos nga sulat. Ang tambag niini nakatabang sa unang-siglong mga Kristohanon sa pagpadayon sa paglakaw sa balaang kahayag. Apan komusta kita?
1, 2. Kanus-a ug diin sulata ang Unang Juan, ug ngadto kang kinsa kini aplikado?
2 Ang mga pulong ni Juan makatabang usab sa ika-20ng siglong mga Kristohanon. Busa sa panahon sa pribadong pagtuon ning artikuloha ug sa duha pa nga mosunod niini, paneguroa nga mabasa ang tanang gikutlong mga bahin sa iyang unang dinasig nga sulat sa ginapatin-aw kini. Diha sa sulat sa apostol ug sa atong mga komento niini, ang mga pronombre sama sa “kita” ug “kanato” nagpunting lamang sa dinihogang mga sumusunod ni Jesus. Apan ang pasukaranang mga prinsipyo may kalabotan sa pagkamatarong, gugma, pagtuo, ug ang susama niini, aplikado usab sa mga Kristohanong may yutan-ong mga paglaom.
Ang Pakig-ambitay nga Mohatag Kalipay
3 Unang gihisgotan ni Juan ang malipayong “pakig-ambitay.” (Basaha ang 1 Juan 1:1-4.) Si Jesus, “ang pulong sa kinabuhi,” uban kang Jehova “sukad sa sinugdan” ingong unang linalang sa Diyos, nga pinaagi kaniya ang “tanang butang gilalang.” (Colosas 1:15, 16) Ang mga apostata sa unang-siglo nag-angkong walay sala ug midumili sa matarong nga dapit ni Kristo diha sa balaang kahikayan. Apan ang mga apostol ni Jesus nakadungog kaniya nga misulti, nagpatalinghog kaniyag maayo, ug mihakap kaniya. Sila nasayod nga naglihok ang gahom sa Diyos pinaagi kaniya. Busa diha gayoy nakasaksi nga siya mao ang Anak sa Diyos nga nagkinabuhi, nag-antos, ug namatay ingong tawo. Siya mao “ang pulong sa kinabuhi” tungod kay ang “kinabuhing [dayon] nakita” diha kang Jesus, nga pinaagi kaniya mitagana ang Diyos ug lukat.—Roma 6:23; 2 Timoteo 1:9, 10.
4. Unsay kahulogan sa “pakig-ambitay” nga nabatonan sa mga dinihogan?
4 Pinaagi sa gipamulong ug gisulat sa mga apostoles, sila ‘nagpamatuod’ mahitungod sa walay sala nga tawo nga si Jesu-Kristo. Si Juan ‘mitaho’ niining mga butanga aron ang mga dinihogan “makaambit,” kun makasandurot, uban sa mga manununod sa Gingharian, uban sa Amahan, ug uban sa Iyang Anak. Kining “pakig-ambitay” nagkahulogan sa panaghiusa ug nakahatag ug tumang kalipay. (Salmo 133:1-3; Juan 17:20, 21) Ang mga apostata nga nagdumot sa kanhing mga kauban diha sa pag-alagad ni Jehova wala na nianang pag-ubanay uban sa Diyos ug kang Kristo.
“Kahayag ang Diyos”
5. Unsang “mensahe” ang nadawat sa mga apostoles gikan kang Jesus, ug sa unsang paagi nakaapektar kini sa paggawi sa mga Saksi ni Jehova?
5 Ang sunod nga gipamulong mao ang “mensahe” nga nadawat sa mga apostoles gikan kang Jesus. (Basaha ang 1 Juan 1:5-7.) Mao kini: “Ang Diyos kahayag ug wala gayoy kangitngitan [walay dili-balaan, imoral, dili-matuod, kun daotan] diha kaniya.” Busa gilikayan sa mga Saksi ni Jehova ang tanang makasasalang mga buhat nga nalangkit sa kangitngit. (Job 24:14-16; Juan 3:19-21; Roma 13:11-14; 2 Corinto 6:14; 1 Tesalonica 5:6-9) Sanglit adunay mga apostata nga wala magtuo nga adunay makasasalang mga buhat, sila anaa sa espirituwal nga kangitngit. Nangangkon sila nga nakabaton sa tinagong kahibalo, apan ang Diyos kahayag, dili mangitngit nga tinago. Siya nagahatag ug espirituwal nga kahayag ngadto lamang sa iyang matinumanong mga saksi.—Mateo 5:14-16; 1 Pedro 2:9.
6. Kon kita ‘nagabuhat sa kamatuoran,’ unsang panalangin ang atong maangkon?
6 Kon kita moingon nga kita may “pakig-ambitay” uban sa Diyos apan “magpadayon sa paglakaw sa kangitngit,” nga mosubay ug makasasalang kinabuhi, kita “namakak ug wala magabuhat sa kamatuoran,” o nagkinabuhi nga kaharmoniya uban niana. Apan kon subayon nato ang dalan nga sibo sa kamatuoran, kita anaa sa kahayag, sama sa Diyos. Kita may “pakig-ambitay” uban sa kaubang mga Kristohanon, diin ang tanan nahiusa sa doktrina, espirituwal nga panglantaw, buluhaton sa paghimog tinun-an, ug sa ubang bahin sa putli nga pagsimba.
7. Nganong ang dugo ni Jesus ‘makahinlo kanato gikan sa tanang kasal-anan’?
7 Dili sama sa ubang unang mga apostata, kita nga ‘naglakaw sa kahayag’ modawat nga dili-mahinlo ang sala. Ang dugo ni Jesus “makahinlo kanato gikan sa tanang kasal-anan” tungod kay dili kita motuyo sa pagpakasala. (Mateo 12:31, 32) Sa pagkatinuod, kita mapasalamaton, nga nagpakita ang Diyos ug kaluoy bisan sa makasasala apan mahinulsolong mga Kristohanon.—Salmo 103:8-14; Miqueas 7:18, 19.
Pasukaranan sa Kapasig-ulian
8, 9. (a) Sa unsang pasukaranan nga pasayloon kita ni Jehova? (b) Kon mahitungod sa sala, unsay gipamulong sa ubang mga apostata, ug nganong sayop sila?
8 Gikutlo sunod ni Juan ang pasukaranan sa paghinlo gikan sa sala. (Basaha ang 1 Juan 1:8–2:2.) Kon kita moingon, “Kita walay sala,” atong gilimod ang kamatuoran nga makasasala ang tanang dili-hingpit nga mga tawo, ug “ang kamatuoran wala kanato.” (Roma 5:12) Apan ang Diyos “matinumanon” ug nagapasaylo kanato “kon atong isugid ang atong mga kasal-anan” kaniya uban ang mahinulsolong tinamdan nga mopalihok kanato sa pagbulag sa daotang buhat. (Proverbio 28:13) Ang Diyos miingon bahin sa bag-ong pakigtugon: “Dili na nako pagahinumdoman pa ang ilang kasal-anan.” (Jeremias 31:31-34; Hebreohanon 8:7-12) Sa pagpasaylo kanila, matinumanon siya niadtong saara.
9 Dugang pa, ang Diyos “matarong,” nagapabilin sa tanang panahon sa iyang mga sukdanan sa pagkamatarong. Iyang napatagbaw ang hustisya pinaagi sa lukat ug ‘nakapasaylo sa atong mga kasal-anan ug maghinlo kanato sa tanang pagkadili-matarong’ kon atong isugid ang atong pagkamakasasala pinaagi sa pagtuo sa halad ni Jesus. (Hebreohanon 9:11-15) Pinaagi sa iyang kamatayon gidala sa Mesiyas ang mga sala, sama sa kanding nga nagadala sa sala nga gipadala ngadto sa kamingawan sa Adlaw sa Pagtabon sa Sala. (Levitico 16:20-22; Isaias 53:5, 8, 11, 12; 1 Pedro 2:24) Ang ubang mga apostata miingon, “Kita wala makasala,” busa ‘nagpahimo kang Jehova nga bakakon.’ Apan ang “Diyos . . . dili arang makabakak,” ug ang iyang Pulong nagpakita nga ang tanang dili-hingpit nga mga tawo makasasala. (Tito 1:2; Ecclesiastes 7:20; Roma 3:23) Gani, ang pag-ingon nga “kita wala makasala” wala magkahulogan nga ang pulong sa Diyos wala “diha kanato,” wala sa atong mga kasingkasing!—Itandi sa Hebreohanon 8:10.
10. Sa unsang paagi si Jesus maoy “usa ka halad-pasighiuli”?
10 Gisulat ni Juan “kining mga butanga” mahitungod sa sala, sa kapasayloan, ug sa paghinlo aron dili na kita magabuhat pa ug kasal-anan. Ang iyang mga pulong mopukaw kanato sa matinuorong pagpaningkamot nga dili makasala. (1 Corinto 15:34) Apan kon kita “makasala” ug mahinulsolon, kita adunay “katabang uban sa Amahan”—si “Jesu-Kristo, ang usa nga matarong,” nga nagapangaliyopo alang kanato sa Diyos. (Hebreohanon 7:26; itandi sa Juan 17:9, 15, 20.) Si Jesus maoy “usa ka halad-pasighiuli.” Ang iyang kamatayon nakatagbaw sa hustisya ug nakapaposible sa Diyos sa paghatag kaluoy ug sa pagkuha sa sumbong sa sala may labot sa espirituwal nga mga Israelitas ug ‘sa tibuok kalibotan,’ lakip sa “dakong panon.” (Roma 6:23; Galacia 6:16; Pinadayag 7:4-14) Pagkadako sa atong pagpabili niana nga halad!
Sunda ang Diyos ug Pagpakitag Gugma
11. Pinaagi sa unsang pamatuod nga kita nasayod nga kita “nahiusa uban” sa Diyos?
11 Aron makapadayon sa paglakaw sa balaang kahayag, kinahanglang atong sundon si Jehova. (Basaha ang 1 Juan 2:3-6.) Kita nasayod nga kita “nakadangat sa kahibalo” sa Diyos, nakasabot kaniya ug sa iyang mga hiyas, kon “kita magpadayon sa pagtuman sa iyang mga sugo.” Ang tanang nagaangkong nakaila kang Jehova apan mapakyas sa pagsunod kaniya maoy “usa ka bakakon.” Busa, “ang gugma sa Diyos mahimong hingpit,” o bug-os, kon atong sundon ang iyang pulong. “Pinaagi niini” nga pamatuod sa pagsunod ug sa paghigugma sa Diyos, kita nasayod nga kita “nahiusa kaniya.” Ug kita obligado sa paglakaw sama sa gihimo sa iyang Anak, sa buluhaton sa paghimog tinun-an, sa atong relasyon sa uban, ug uban pa.
12. Unsang “daang sugo” ang nabatonan sa mga Kristohanon, ug sa unsang paagi “bag-o” usab kini?
12 Ang inigsoong gugma importante usab. (Basaha ang 1 Juan 2:7, 8.) Si Juan nagsulat ug “daang sugo” nga nabatonan sa mga matinumanon “sukad sa sinugdan” sa ilang mga kinabuhi ingong mga Kristohanon. Kini “daan” tungod kay una kining gihatag ni Jesus sa iyang gisugo ang iyang mga tinun-an sa ‘paghigugma sa usag usa sama sa iyang paghigugma kanila.’ (Juan 13:34) Apan “bag-o” usab kini tungod kay labaw pa kini sa gugma sa silingan nga gikinahanglan sa Kasugoan ug nagkinahanglag pagkamainandamon sa pagtanyag sa kaugalingong kalag alang sa isigkamagtutuo. (Levitico 19:18; Juan 15:12, 13) Sanglit nagpamatuod ang atong nagasakripisyo sa kaugalingong gugma nga ang pagsunod niana uban ning “bag-ong sugo” ‘tinuod diha sa kahimtang ni Kristo ug kanato, ang kangitngit nagakahanaw na ug ang tinuod nga kahayag nagasidlak na’ taliwala kanato.
13. Sumala sa 1 Juan 2:9-11, kinsa ang “anaa sa kahayag” ug kinsa ang wala?
13 Apan, kinsa sa pagkatinuod ang “anaa sa kahayag”? (Basaha ang 1 Juan 2:9-11.) Buweno, “siya nga magaingon nga anaa siya sa kahayag apan nagadumot sa iyang igsoon” anaa sa espirituwal nga kangitngit “hangtod karon.” Apan “siya nga nagahigugma sa iyang igsoon nagapabilin sa kahayag,” ug diha kaniya walay “bisan unsa nga kapangdolan.” Dinhi ang Gregong pulong nagsugyot ug pinaonan nga laang sa hayop ug nagpasabot ug usa ka butang nga moresultag pagkahulog sa kasal-anan. Sa pagkatinuod, ang usa nga nagaangkong Kristohanon ug nagadumot sa iyang igsoon “wala siya mahibalo kon hain siya nagapaingon, tungod kay ang kangitngit nakabuta sa iyang mga mata.” (Mateo 13:13-15) Kini bang pasidaana mopalihok kanimo sa paglikay sa espirituwal nga kangitngit pinaagi sa dili pagtugot sa personal nga mga kasungian, sa mga pagpamakak sa mga apostata, o sa bisan unsa pang mga butang nga makadaot sa imong inigsoong gugma?
Pasukaranan sa Pagsalig
14. Kinsa ang “gamayng kabataan” ug ang “mga amahan” nga gipahayagan ni Juan?
14 Sunod gipahayag ni Juan ang pagsalig sa “gagmay [batan-on] nga kabataan,” nga tingali nagpasabot sa tibuok kongregasyon. (Basaha ang 1 Juan 2:12-14.) Ang atong mga sala gipasaylo na ‘tungod sa ngalan ni Jesus,’ kay pinaagi lamang kaniya nga gihimong posible sa Diyos ang kaluwasan. (Buhat 4:12) Ang mga dinihogan “nakaila sa Amahan” tungod kay gianak niya sila pinaagi sa iyang espiritu. Ang uban maoy “mga amahan”—hayan edad-edaran, mas eksperyensiyado, ug hamtong sa espirituwal nga mga magtutuo. Sila nakaila kang Jesus, nga naglungtad “sukad pa sa sinugdan” sa pagkaagi nga siya unang gilalang sa Diyos kay sa ubang mga butang.
15. (a) Kinsa ang “mga batan-ong lalaki” nga gipahayagan ni Juan, ug sa unsang paagi ilang “nadaog ang usa nga daotan”? (b) Paghatag ug pananglitan kon sa unsang paagi ‘madaog’ nato si Satanas karon.
15 Ang “mga batan-ong lalaki” nga gipahayagan ni Juan tingali mao ang bata-bata pa, dili eksperyensiyadong mga Kristohanon. Ilang “nadaog ang usa nga daotan,” si Satanas, tungod kay wala magpapukan sa iyang “mga laraw.” (2 Corinto 2:11) Pananglitan, karon naglakip kini sa paglikay sa dili-mahinlong kalingawan, sa makapukaw sa seksong musika, ug pornograpiya, nga makadaot sa Kristohanong mga prinsipyo ug moresulta sa pagkahulog sa seksuwal nga imoralidad. Ang “mga batan-ong lalaki” madaogon batok kang Satanas tungod kay sila “malig-on” sa espirituwal ug “ang pulong sa Diyos” nagapabilin kanila. Hinaot nga mahisama kita kanila sa pagdawat sa espirituwal nga mga tagana sa Diyos, sa pagsalikway sa apostasiya, ug sa pagpadayon sa paglakaw diha sa balaang kahayag.
Ang Gugma nga Dili Nato Angay Huptan
16. Unsang gugma ang kinahanglan natong huptan, apan unsay matuod kanato kon kita adunay kalibotanong mga panglantaw ug tingusbawan?
16 Kon batan-on o edad-edaran man kita nga mga Kristohanon, adunay gugma nga dili gayod nato angay huptan. (Basaha ang 1 Juan 2:15-17.) Kinahanglan ‘dili gayod [nato] higugmaon ang kalibotan o ang bisan unsang butang nga anaa niana.’ Hinunoa, kinahanglang magpabilin kitang walay buling sa kahugawan sa dili-matarong tawhanong katilingban ug dili gayod mohingos sa “espiritu” niini, o mapukaw sa makasasala nangibabawng tinamdan niini. (Efeso 2:1, 2; Santiago 1:27) Kon maghupot kita ug kalibotanong mga panglantaw ug mga tingusbawan, “ang gugma sa Amahan” wala diha kanato. (Santiago 4:4) Butang kana nga angayng hatagag mainampoong pagpalandong, dili ba?
17. Kinahanglang dili patagbawon sa mga Kristohanon ang unsang nga mga kailibgon?
17 “Ang tanang butang nga anaa sa kalibotan” wala magagikan sa Diyos. Lakip niini mao “ang kailibgon sa unod,” ang pagtagbaw niini nagkahulogan sa pagpatagbaw niining makasasalang mga pangibog sama sa daotang seksuwal nga mga kailibgon. (1 Corinto 6:15-20; Galacia 5:19-21) Ilabinang likayan mao ang pagpadaog “sa kailibgon sa mga mata.” Ang madanihon kaayong tan-awon gidiling bunga nakadaldal kang Eva, ug ang pagtan-aw ni David kang Batsheba samtang siya naligo miresultag dakong kasal-anan. (Genesis 3:6; 2 Samuel 11:2-17) Nan, aron padayong makalakaw sa balaang kahayag, kinahanglang likayan nato ang malaw-ayng kalingawan ug ubang mga butang nga madanihon sa makasasalang mga tinguha ug makadunot sa kasingkasing.—Proverbio 2:10-22; 4:20-27.
18. Nganong “ang pagpagarbo sa kahimtang sa kinabuhi,” walay kapuslanan, ug kini dili mapakyas sa pagpatunghag unsa?
18 Lain pa nga nagagikan sa kalibotan mao “ang pagpagarbo sa kahimtang sa kinabuhi.” Ang tawong mapahitas-on magpasiatab bahin sa iyang bahandi, sa iyang besti, ug ang susama niini, diin ang tanan mahimong mawala. Ang iyang “pagpagarbo” tingali makadayeg sa ubang tawo ug moresultag lumalabay nga kadayegan apan dili sa balaang panalangin.—Mateo 6:2, 5, 16, 19-21; Santiago 4:16.
19. Unsay mahitabo niining kalibotana, ug sa unsang paagi naapektohan kita niining kamatuorana?
19 Hinumdomi nga “ang kalibotan mahanaw” ug pagalaglagon. (2 Pedro 3:6) Ang mga kailibgon ug mga kalaoman mahanaw uban niini, maingon man sa mga indibiduwal nga nagahigugma niini. “Apan,” miingon si Juan, “siya nga nagabuhat sa kabubut-on sa Diyos magapabilin sa walay kataposan.” Busa atong ibutang sa unahan ang kinabuhing walay kataposan pinaagi sa ‘pagsalikway sa kalibotanong mga kailibgon’ ug magpadayon sa paglakaw sa balaang kahayag.—Tito 2:11-14.
Pagbantay Batok sa Apostasiya
20. Unsay gitawag niadtong ‘batok kang Kristo,’ ug ang ilang pagtungha nagpamatuod nga miabot na ang unsa?
20 Karon mipasidaan si Juan batok sa mga anti-kristo. (Basaha ang 1 Juan 2:18, 19.) Iyang gipahinumdoman ang kaubang mga magtutuo nga gikan sa mga apostoles sila “nakadungog nga moabot ang anti-kristo.” Ang pagtungha sa “daghang anti-kristo” nagpamatuod nga kadto maoy “kataposang takna,” sa kataposang bahin sa panahon sa mga apostoles. Bisan ug kadtong ‘nagabatok kang Kristo’ napormang daghang bahing “anti-kristo,” daghang indibiduwal nga mga anti-kristo nagpakaaron-ingnong nagasimba sa Diyos apan “dili sama nato” ug mibulag sa tinuod nga Kristiyanidad. Kita nalipay nga ang pagbiya o pagpalagpot niadtong sama kanila karon nakasanta sa pagkadunot sa kongregasyon.
21 Ang apostatang mga hunahuna gisalikway sa maunongon inanak sa espiritung mga Kristohanon. Sanglit ang “pagdihog gikan sa usa nga balaan,” si Jehova, nakatabang kanila sa pagsabot sa iyang Pulong, ‘silang tanan may kahibalo.’ (Basaha ang 1 Juan 2:20, 21.) Sila sa pagkatinuod nahibalo sa “kamatuoran” mahitungod kang Jesu-Kristo, samtang ang mga apostata may sayop nga mga ideya bahin kaniya. Sanglit “walay bakak nga nagagikan sa kamatuoran,” ang tanang mga nahigugma kang Jehova nagasalikway niining bakak nga mga hunahuna ug niadtong nagalaban kanila.
22. Unsay gihimo ni C. T. Russell sa dihang ang usa sa iyang unang kauban midumili sa lukat?
22 Gawas pa, “kinsa ang bakakon kon dili ang usa nga nagalimod nga si Jesus mao ang Kristo,” ang Usa nga Dinihogan sa Diyos? (Basaha ang 1 Juan 2:22-25.) Gani, ‘ang usa nga nagalimod sa Amahan ug Anak mao ang anti-kristo’! Makapaikag, sa dihang wala modawat ang unang kauban sa estudyante sa Bibliya ni Charles T. Russell sa lukat, mibulag si Russell sa pakig-uban kaniya ug misugod sa pagpatik niining basahona, nga sa tanang panahon nagpahayag sa kamatuoran bahin sa sinugdan ni Kristo, sa Mesiyanikong papel, ug sa mahigugmaong pag-alagad ingong “hulad-pasighiuli.”
23. Sa unsang paagi ang ‘pag-ila sa Anak’ nakaapektar sa atong relasyon sa Diyos, ug sa atong mga palaabuton?
23 Ang mga apostata nga dili modawat kang Kristo wala makabaton kang Jehova ingong ilang Higala. (Juan 5:23) Apan kita kinsa sa atubangan sa katilingban ‘moila sa Anak nakabaton sa Amahan,’ diha sa inuyonang relasyon uban sa Diyos. (Mateo 10:32, 33) Ang maunongon unang mga sumusunod ni Jesus nagpabilin sa mga butang nga ilang nadunggan bahin sa Anak sa Diyos “sukad sa sinugdan” sa ilang mga kinabuhi ingong mga Kristohanon. Ug kon ang samang kamatuoran anaa sa atong mga kasingkasing, kita “padayong nahiusa” uban sa Diyos ug kang Kristo ug makadawat sa “gisaad nga butang,” ang kinabuhing walay kataposan.—Juan 17:3.
Gitudloan ni Jehova nga Diyos
24. Kinsa ang “gidihogan” sa balaang espiritu, ug nganong sila “wala magkinahanglan kang bisan kinsa nga magtudlo” kanila?
24 Aron makalakaw sa balaang kahayag ug dili mapahisalaag sa mga apostata, kita nagkinahanglan ug tukmang espirituwal nga instruksiyon. (Basaha ang 1 Juan 2:26-29.) Ang mga inanak sa espiritu “gidihogan” sa balaang espiritu, nakadangat sa pag-ila sa Diyos ug sa iyang Anak, ug “wala magkinahanglan kang bisan kinsa [apostata] nga magtudlo” kanila. Pinaagi sa iyang nagadihog nga espiritu, ang Diyos “nagatudlo” sa espirituwal nga mga Israelitas “bahin sa tanang mga butang” nga gikinahanglan aron makasimba kaniya nga madinawaton. (Juan 4:23, 24; 6:45) Kita nalipay nga ingong mga Saksi ni Jehova kita nakadawat sa maong espirituwal nga instruksiyon gikan sa Diyos pinaagi sa “matinumanon ug maalamong ulipon.”—Mateo 24:45-47.
25, 26. (a) Nganong ang mga dinihogan may “kagawasan sa pagsulti”? (b) Unsay kahulogan sa ‘pagbuhat ug pagkamatarong’?
25 Gidasig ni Juan ang maayong pagkatudlong mga dinihogan nga “magpabiling nahiusa uban” sa Diyos. Kadtong “nahiusa uban” kang Jehova nahiusa usab sa iyang Anak. (Juan 14:19-21) Kining maong paghiusa gidasig aron nga “sa igapadayag na siya [Kristo] kita makabaton ug kagawasan sa pagsulti ug dili kita maulaw kaniya sa iyang presensiya,” nga mao, sa panahon sa iyang Parousia.
26 Sanglit nagkinabuhi na kita karon sa panahon sa “presensiya” ni Jesus, sa unsang paagi kita makatino nga kita walay angay ikaulaw ug tinuod nga nagalakaw sa balaang kahayag? Pinaagi sa ‘pagbuhat sa pagkamatarong.’ ‘Kon kita nahibalo nga matarong ang Diyos,’ nangatarongan si Juan, ‘kita nakahibalo nga ang tanang nagabuhat sa pagkamatarong gipanganak gikan kaniya.’ ‘Ang pagbuhat sa pagkamatarong’ nagkahulogan sa pagsunod sa mga sugo sa Diyos, nagalikay sa pagkadili-matarong, ug nagabuhat ug maayong mga buhat sama sa paghimog mga tinun-an ug sa pagtabang sa kaubang mga magtutuo. (Marcos 13:10; Filipos 4:14-19; 1 Timoteo 6:17, 18) Ang pagkahimong “gipanganak gikan” sa Diyos nagkahulogang “igaanak pag-usab” ingong iyang espirituwal nga mga anak.—Juan 3:3-8.
27. Unsay gipadayag ni apostol Juan kanato sa sunod?
27 Busa gipakita ni Juan kon unsaon sa paglakaw diha sa balaang kahayag. Sunod iyang gipakita kon unsaon sa paglakaw ingong mga anak sa Diyos. Unsay gikinahanglan niini?
Unsay Imong Tubag?
◻ Unsay pamatuod ang gihatag ni Juan nga nagkinabuhi, nag-antos, ug namatay ingong tawo ang Anak sa Diyos?
◻ Sa unsang paagi si Jesu-Kristo maoy “usa ka halad-pasighiuli”?
◻ Unsang “daan” ug “bag-o” nga sugo ang nabatonan sa mga Kristohanon?
◻ Unsay mahitabo niining kalibotana, ug sa unsang paagi nakaapektar kanato kining kamatuorana ingong mga Kristohanon?
◻ Sa unsang paagi makatino ang mga dinihogan nga sila nagalakaw diha sa balaang kahayag?
3. Unsay pamatuod nga nagkinabuhi, nag-antos, ug namatay ingong tawo ang Anak sa Diyos, ug nganong gitawag siya nga “ang pulong sa kinabuhi”?
21. Nganong ang inanak sa espiritu nga mga Kristohanon “nahibalo,” ug unsang “kamatuoran” ang ilang nahibalon?
Sa panahon sa pagtuon sa kongregasyon bahin ning artikuloha ug ang duha nga mosunod niini, maayong ipabasa una sa konduktor ang gikutlong mga bahin sa Unang Juan sumala sa itugot sa panahon
[Blurb sa panid 12]
Nagpakita ka bag pagpabili sa halad ni Jesus?