Kapitulo 11
Ang mga Maluwas Kinahanglan “Dili Bahin sa Kalibutan”
1, 2. (a) Unsa ang giingon ni Jesus mahitungod sa relasyon sa iyang mga disipulo sa kalibutan? (b) Unsa ang wala ipasabut niini, ug ngano?
UNSA ang gipasabut ni Jesus sa pag-ingon nga ang iyang mga sumusunod “ania sa kalibutan,” apan sila kinahanglang “dili bahin sa kalibutan?” (Juan 17:11, 14) Aron maapil niadtong maluwas sa pagpuyo sa Bag-ong Kahikayan sa Diyos, kinahanglan natong sabton kini.
2 Una konsideraha kon unsa ang wala ipasabut sa pagka “dili bahin sa kalibutan.” Wala kini nagakahulogan nga kita magapahilayo sa atong kaugalingon gikan sa katawhan. Wala kini nagakahulogan nga ibulag ang atong kaugalingon sama sa mga ermitanyo sa usa ka langub o kita mosibug ngadto sa usa ka monasteryo o sa ubang layong dapit. Sukwahi niini, sa gabii una sa iyang kamatayon si Jesus nag-ampo ngadto sa iyang Amahan alang sa iyang mga disipulo, nga nagaingon: “Ako nagahangyo kanimo, dili sa pagkuha kanila gawas sa kalibutan, apan sa pagbantay kanila tungod sa usa nga dautan. Sila dili bahin sa kalibutan, maingon nga ako dili bahin sa kalibutan.”—Juan 17:15, 16.
3, 4. (a) Sa unsang mga kalihokan kinahanglanon alang sa mga Kristohanon nga may kontak sa katawhan sa kalibutan? (b) Apan unsa ang ilang likayan?
3 Inay sa pagtago gikan sa katawhan, ang mga disipulo ni Jesus ‘gipadala sa kalibutan’ sa pagpahibalo sa kamatuoran. (Juan 17:18) Sa pagbuhat niana, sila nag-alagad ingon “ang kahayag sa kalibutan,” nga nagapasidlak sa kahayag sa kamatuoran aron ang mga tawo makakita sa unsang paagi ang kamatuoran sa Diyos nagaapektar sa mga kinabuhi sa katawhan alang sa maayo.—Mateo 5:14-16.
4 Ang mga Kristohanon may kontak uban sa daghang katawhan samtang sila nagatrabaho sa pagsuportar sa ilang kaugalingon ug sa ilang mga panimalay ug samtang sila nagapahayag sa maayong balita sa Gingharian sa Diyos sa katawhan. Busa, ingon sa ginapakita ni apostol Pablo, sila wala dahuma nga “maggawas sa kalibutan” sa pisikal nga paagi. Dili sila sa bug-os “makahunong sa pagpakig-uban” sa katawhan sa kalibutan. Apan makaarang ug kinahanglan magpahilayo sila sa dautang mga buhat sa kadaghanan sa katawhan.—1 Corinto 5:9-11.
5. Sa unsang paagi ang kinahanglanon nga separado sa kalibutan ilustrado sa kaso ni Noe ug sa iyang panimalay?
5 Ang kahimtang maoy susama sa adlaw ni Noe sa namatikdan ni Jehova nga ang “tanang mga tawo nagkinabuhi sa dunot nga mga kinabuhi sa yuta.” (Genesis 6:12, The New English Bible) Apan si Noe ug ang iyang panimalay nagkinabuhi nga lahi. Pinaagi sa pagdumili sa pagduyog sa pagkadaotan sa ilang palibut ug pinaagi sa pagsangyaw sa pagkamatarung, si Noe “nagkondenar sa kalibutan.” Iyang gipakita kini nga dili ikapamalibad nga pagsupak sa kabubut-on sa Diyos. (Hebreohanon 11:7; 2 Pedro 2:5) Mao kanay hinungdan, sa dihang ang globong Lunop nagdala sa katapusan sa dili diyosnong katawhan, siya ug ang iyang panimalay naluwas. Sila “ania sa kalibutan” apan sa samang panahon “dili bahin sa kalibutan.”—Genesis 6:9-13; 7:1; Mateo 24:38, 39.
Unsa ang Hustong Gugma Alang sa Katawhan sa Kalibutan?
6. Husto ba ang pagpakita sa bisan unsang gugma sa katawhan sa kalibutan?
6 Ang pagkahimong “dili bahin sa kalibutan” nagakahulogan ba usab sa pagkahimong usa nga nagadumot sa katawhan? Ang pagbuhat niana maoy pagdumot kang Jehova nga Diyos, kinsa, ang iyang Anak nga si Jesus nag-ingon, “nahigugma sa kalibutan [sa katawhan] sa hilabihan nga siya naghatag sa iyang bugtong nga Anak, aron nga ang bisan kinsa nga nagatuo kaniya dili malaglag apan makabaton sa walay katapusang kinabuhi.” Busa ang kalolot ug kaluoy sa Diyos sa katawhan sa tanang matang nagapahaluna sa panig-ingnan alang kanato nga sundon.—Juan 3:16; Mateo 5:44-48.
7, 8. (a) Unsa ang giingon sa Bibliya mahitungod sa paghigugma sa kalibutan? (b) Unsa ang kalibutan nga kita kinahanglang separado? (c) Nganong kinahanglang likayan ta ang kalibutan ug mga tinguha niini?
7 Apan wala ba ang apostol Juan nag-ingon kanato, “Ayaw higugmaa bisan ang kalibutan o ang mga butang sa kalibutan. Kon ang bisan kinsa nahigugma sa kalibutan, ang gugma sa Amahan wala kaniya”? Kon ang Diyos mismo nahigugma sa kalibutan, nganong ang apostol nagaingon niini?—1 Juan 2:15.
8 Ang Bibliya nagapakita nga ang Diyos nahigugma sa kalibutan sa katawhan simple ingon nga mga tawo kinsa anaa sa dili hingpit, mamalatyong kahimtang ug anaa sa desperadong panginahanglan alang sa tabang. Sa laing bahin, si Satanas nag-organisar sa kadaghanan sa katawhan sa pagsupak sa Diyos. Mao kanang “kalibutana”—tawhanong katilingban nga nahimulag sa Diyos ug ubos sa pagkontrol ni Satanas—nga ang matuod nga mga Kristohanon kinahanglang mahimulag. (Santiago 1:27) Ang Pulong sa Diyos nagpasidaan batuk sa paghigugma sa sayup nga mga tinguha ug sa mga buhat sa maong kalibutan: “Ang tanang butang sa kalibutan—ang tinguha sa unod ug ang tinguha sa mga mata ug ang pagpagarbo sa paagi sa kinabuhi sa usa—wala nagagikan sa Amahan, apan nagagikan sa kalibutan. Dugang pa, ang kalibutan mahanaw ug mao man ang iyang mga tinguha, apan siya nga nagabuhat sa kabubut-on sa Diyos nagapabilin sa walay katapusan.”—1 Juan 2:15-17.
9, 10. (a) Sa unsang paagi ikaingon nga kining mga tinguha ‘nagagikan sa kalibutan’? (b) Unsa ang epekto niining mga tinguha sa katawhan?
9 Oo, kadtong mga tinguha sa unod ug sa mga mata ug sa personal nga pagpagarbo ‘nagagikan sa kalibutan.’ Mao kini ang naugmad sa unang mga ginikanan sa katawhan ug naghatud kanila ngadto sa pagpangitag independensiya gikan sa Diyos aron sila makasunod sa hakug nga mga interes. Ang pagsunod niining hakug kalibutanong mga tinguha naghatud ngadto sa paglapas sa mga balaod sa Diyos.—Genesis 3:1-6, 17.
10 Konsideraha kon unsa ang imong makita sa imong palibut. Dili ba ang kadaghanan sa katawhan karon nagatukod sa ilang mga kinabuhi libut sa mga tinguha sa unod ug sa mga mata ug sa “pagpagarbo sa paagi sa kinabuhi sa usa”? Dili ba mao kini ang mga butang nga nagahulma sa mga paglaum ug mga interes, nagagahum sa paagi nga sila nagalihok ug sa ilang kalabutan sa usa ug usa? Tungod niini, ang kasaysayan sa katawhan usa ka taas nga rekord sa walay paghiusa ug gubat, sa imoralidad ug krimen, sa komersiyal nga kahakug ug pagdaugdaug, sa garbosong ambisyon, ug pagpanlimbasug alang sa kadungganan ug gahum.
11. Busa, ngano ang gugma sa Diyos alang sa kalibutan wala nagasupak sa ginatunglo diha sa iyang Pulong?
11 Nan, atong makita, nga ang paghigugma sa kalibutan sama sa gugma sa Diyos maoy lahi kaayo gikan sa paghigugma sa sayup nga mga tinguha ug mga buhat niini, nga ginatunglo niya. Ang gugma sa Diyos alang sa katawhan nagbukas sa dalan sa kagawasan gikan sa maong makasasalang mga tinguha ug sa ilang dautang mga resulta, lakip ang kamatayon mismo. Siya nagpahayag nianang gugma pinaagig paghatag sa iyang kaugalingong Anak sa paglukat sa katawhan. Apan alang kang bisan kinsa nga nagasalikway sa maong sakripisyo ug nagapadayon sa pagsupak, ang Bibliya nagaingon nga “ang kasuko sa Diyos nagapabilin kaniya.”—Juan 3:16, 36; Roma 5:6-8.
Pagpabiling Libre sa Pagkontrolar sa “Magmamando Niining Kalibutan”
12. Sa unsang paagi atong maanalisar kon ang atong gugma ba alang sa mga tawo sa kalibutan makapahimuot sa Diyos o dili?
12 Nan, kumusta na man kita? Kita ba “nahigugma” sa mga tawo sa kalibutan diha sa kahulogan sa sinserong pagkagusto sa pagtabang kanilang makakaplag sa dalan sa kinabuhi diha sa pabor sa Diyos? O kita ba nahigugma sa mismong mga butang nga nagapugong kanila nga mahimong mga alagad sa Diyos—ang ilang espiritu sa independensiya, ang ilang mapasiatabong pagpasundayag sa ilang mga butang, ilang pagsalig sa ilang kaugalingong importansiya ug himaya? Kon kita nahigugma nga mahauban sa mga tawo alang sa maong mga kinaiya, nan kita ‘nagahigugma sa kalibutan’ sa paagi nga gitunglo sa apostol.
13. Sa unsang paagi ang gugma sa kalibutan makapugong sa usa ka tawo sa pag-alagad sa Diyos?
13 Daghang mga tawo sa adlaw ni Jesus nahigugma sa mga paagi sa kalibutan. Busa sila naglikay sa pagbaton sa usa ka isug nga pagbarug ingon nga mga disipulo ni Jesus. Dili nila buot nga mawad-an sa ilang popularidad ug katungdanan taliwala sa katawhan sa ilang mga sirkulo sosyal ug relihiyoso. Sila nahigugma sa pagdayeg sa mga tawo nga labaw kay sa pag-uyon sa Diyos. (Juan 12:42, 43) Tinuod, ang uban nagbuhat sa mga buhat sa kaluoy ug sa uban relihiyosong mga buhat. Apan una sa tanan gibuhat nila kana tungod kay sila buot nga dayegon sa mga tawo. (Mateo 6:1-6; 23:5-7; Marcos 12:38-40) Wala ba nimo makita ang mga tawo nga nagapakita niining samang gugma sa sayup nga kurso sa kalibutan karon? Apan ang Bibliya nagapakita nga kining matanga sa “gugma” mosangput lamang sa kalaglagan.
14. Kinsa ang nagtintal kang Jesus dinhi sa yuta, ug uban sa unsang sangputanan?
14 Ang mismong Anak sa Diyos gitintal niining samang mga linya. Ang pagpanlimbasug gihimo sa pagpalihok kaniya sa hakug nga tinguha sa pagpagarbo sa pagdani sa katawhan—nga mahimong sama sa kalibutan. Siya gitanyagan ngani sa pagmando sa tanang mga kanasuran sa kalibutan uban sa ilang himaya. Apan prangka nga iyang gisalikway ang maong mga pagdani sa hakug nga mga tinguha. Kini gikan sa usa nga unang naghagit sa pagkasoberano ni Jehova nga Diyos, si Satanas nga Yawa.—Lucas 4:5-12.
15. Ipakita gikan sa imong Bibliya kon kinsa “ang magmamando niining kalibutan.”
15 Ang pagkahibalo sa tanyag ni Satanas sa pagmando maoy hinungdanon kon ngano nga kita kinahanglang “dili bahin sa kalibutan.” Kana nagapakita nga ang kalibutan sa katawhan sa kasagaran, lakip ang mga pagmando niini, nakabaton sa Kaaway sa Diyos ingon nga dili makitang magmamando niini. Si Jesus mismo naghisgot kang Satanas ingon nga “magmamando niining kalibutan.” (Juan 12:31; 14:30; 2 Corinto 4:4) Ang apostol Pablo naghisgut usab sa “dautan espirituhanong mga puwersa,” mga demonyo ubos sa pagkontrolar ni Satanas, ingon nga mao ang dili makitang “mga magmamando sa kalibutan niining kangitngitan.” Si Pablo nagpasidaan sa mga Kristohanon sa panginahanglan sa espirituwal nga hinagiban sa pagpanalipud batuk niining “mga magmamandoa.”—Efeso 6:10-13.
16. Pila sa kalibutan ang gipasalaag ni Satanas ug anaa sa iyang gahum?
16 Usa ka minoridad lamang ang sukad nakapabiling libre sa pagkontrolar niining dili makitang magmamando ug sa iyang mga puwersa. Busa ang “kalibutan,” nga mao, ang masa sa katawhan nga nahimulag sa Diyos, “anaa sa gahum sa usa nga dautan.” Pinaagi sa demonyohanong inpluensiya siya ‘nagapasalaag sa tanang gipuy-ang yuta,’ lakip ang yutan-ong mga magmamando niini, nga nagamaniho kanila batuk sa Diyos ug sa iyang Gingharian.—1 Juan 5:19; Pinadayag 12:9; 16:13, 14; 19:11-18.
17. (a) Unsa ang ginapamatud-an sa panghunahuna nga ginapasundayag sa kalibutan mahitungod sa usa kinsa nagatultul sa katawhan? (b) Makapahimuot ba sa Maglalalang kon kita magapasundayag sa maong espiritu?
17 Maorag lisud kining tuohan. Apan, dili ba ang kadaghanan sa katawhan niining kalibutan klarong nagapadayag sa panghunahuna ug mga buhat iya sa Kaaway sa Diyos? Sa tibuok kalibutan atong makita ang pagpamakak, pagdumot, pagkamaharuson, ug pagpatay nga nagapaila niadtong ‘nagagikan sa Yawa,’ nga nagabaton kaniya ingon nga ilang espirituhanong “amahan.” (1 Juan 3:8-12; Juan 8:44; Efeso 2:2, 3) Dayag na lamang nga kining espiritu wala nagagikan sa usa ka Mahigugmaong Maglalalang.
18. Sa unsang paagi ang atong pagpangisip bahin sa pagmando nagapakita kon kita ba libre sa pagkontrolar sa “magmamando niining kalibutan”?
18 Labut pa, dili ba ang dakung kadaghanan sa katawhan nagasalig sa tawhanong mga paagi aron sa pagpatungha sa kalinaw ug kasegurohan? Pila ka tawo ang imong nahibaloan kinsa sa matuod nagatutok sa Diyos ug sa iyang Gingharian sa pagsulbad sa mga suliran sa katawhan? Apan sayup ang pagpahimutang sa ilang pagsalig diha sa tawhanong politikal nga mga sistema, sama sa giingon ni Jesus: “Ang akong gingharian dili bahin niining kalibutan.” Ang iyang Gingharian wala “magagikan” niining kalibutan, tungod kay ang mga tawo wala magtukod niini o naghupot niini sa poder. Kini tagana sa Diyos mismo. (Juan 18:36; Isaias 9:6, 7) Busa, aron mahimong apil niadtong nagalaum nga maluwas kon kanang Gingharian magaabut batuk sa tanang mga kaaway niini, kinahanglan atong ilhon ang malig-ong kamatuoran nga si Satanas ang nagadominar niining kalibutan ug sa mga sistema niini. Kana nagaapil sa politikal nga mga kahikayan niini sama sa ‘United Nations.’ Kinahanglan maghupot kita nga libre niini pinaagi sa atong lig-ong pagbarug dapig sa matarung gobiyerno ni Jehova pinaagi kang Kristo Jesus.—Mateo 6:10, 24, 31-33.
19. Sumala sa gipamatud-an sa kasaysayan, sa unsang mga paagi ang unang mga Kristohanon nagpakita nga sila “dili bahin sa kalibutan”?
19 Ang kasaysayan nagapakita sa unang mga Kristohanon nga matinahuron, nagasunod sa balaod nga mga lungsoranon. Apan determinado sila nga “dili bahin sa kalibutan,” walay sapayan nga kini nagdala kanila sa paglutos. Atong mabasa ang mga pahayag sama niini:
“Ang unang Kristiyanidad wala kaayo masabti ug giisip uban sa diyutay nga pabor niadtong kinsa nagmando sa paganong kalibutan. . . . Ang mga Kristohanon nagdumili sa pagpakig-ambit sa pipila ka katungdanan sa Romanong mga lungsoranon. . . . Dili sila mokupot sa politikal nga katungdanan.”—On the Road to Civilization, A World History.57
“Sila nagdumili sa pagbaton sa bisan unsang aktibong bahin sa administrasyon sibil o sa depensa militar sa imperyo. . . . Maoy imposible nga ang mga Kristohanon, nga dili magbiya sa mas sagradong katungdanan, sa pagpangako sa kinaiya sa mga sundalo, mga mahistrado, o mga prinsipe.”—History of Christianity.58
“Si Origen [kinsa nagkinabuhi sa ikaduha ug ikatulong siglo sa Kumong Panahon] . . . nag-ingon nga ‘ang Kristohanong Iglesya dili makahimo sa pagpakig-ambit sa gubat batuk sa bisan unsang nasud. Sila nakatuon sa ilang Lider nga sila mga anak sa kalinaw.’ Nianang panahon daghang mga Kristohanon ang nahimong martir kay nagdumili sa serbisyo militar.”—Treasury of the Christian World.59
20. Aron libre sa pagkontrolar sa “magmamando niining kalibutan,” unsang nagabahing mga kalihokan sa kalibutan ang ginadumilian sa mga alagad ni Jehova?
20 Pinaagi sa pagpabiling libre sa mga kalihokan sa kalibutan, ang mga alagad ni Jehova wala nagaamot sa nagabahing nasyonalismo, sa rasyalismo niini, o sa sosyal nga mga gubot niini. Ang ilang gitultulan sa Diyos nga pagpangisip nagaamot ngadto sa kalinaw ug kasegurohan taliwala sa mga tawo sa tanang matang. (Buhat 10:34, 35) Ang mga maluwas sa nagasingabut nga “dakung kasakitan,” sa pagkamatuod, magagikan “sa tanang mga nasud ug mga tribo ug mga katawhan ug mga sinultihan.”—Pinadayag 7:9, 14.
Mga Higala sa Kalibutan o mga Higala sa Diyos?
21. Nganong ang usa ka tawo nga nagasunod sa Bibliya usab dili makadahum nga higugmaon sa kalibutan?
21 Si Jesus nag-ingon sa iyang mga disipulo: “Kon kamo bahin sa kalibutan, ang kalibutan mahigugma sa kon unsa ang iya. Karon tungod kay kamo dili bahin sa kalibutan, apan ako nagpili kaninyo gikan sa kalibutan, tungod niini ang kalibutan nagadumot kaninyo. . . . Kon sila naglutos kanako, sila usab magalutos kaninyo.” (Juan 15:19, 20) Ang simple nga kamatuoran mao nga ang bugtong paagi nga mahimong higala sa kalibutan mao ang mahimong sama niini—makig-ambit sa mga tinguha niini, mga ambisyon, ug mga pagdapigdapig, magdayeg sa mga panghunahuna ug mga pilosopiya niini, ug magsunod sa mga buhat ug mga paagi niini. Apan ang mga nagasuportar niining kalibutan maligutgot nga ihikyad ang ilang mga sayup o kon pasidan-an sa mga peligro kon asa magasangko ang ilang kurso. Mao kana ngano, kon ang usa ka tawo nagasunod sa mga pagtulon-an sa Bibliya sa paggawi ug sa paagi sa kinabuhi ug nagasulti pabor niini, siya simple nga dili makaikyas sa pagdumot sa kalibutan.—Juan 17:14; 2 Timoteo 3:12.
22. Unsang pagpili mahitungod sa mga higala ang nagaatubang sa matag usa kanato?
22 Busa, ang Bibliya nagapakita nga kita dunay klarong pilion. Sa Santiago 4:4 atong mabasa: “Wala ba kamo mahibalo nga ang pagpakighigala sa kalibutan maoy pagpakig-away sa Diyos? Busa, ang bisan kinsa, nga buot nga mahimong higala sa kalibutan nagahimo sa iyang kaugalingon nga kaaway sa Diyos.” Ang Diyos usab duna sa iyang mga suntoan sa mga higala, ug kini dili harmonya niadtong sa kalibutan sa makasasalang katawhan.—Salmo 15:1-5.
23. (a) Unsa ang magapakita nga ang usa ka tawo usa ka higala sa kalibutan? (b) Sa unsang paagi makapakita kita nga mga higala sa Diyos?
23 Ang atong pagbaton sa pagpakighigala sa Diyos nagadepende kapin pa sa atong pagpasakup o dili pagpasakup sa usa sa mga organisasyon niining kalibutan. Kon kita nagapadayag sa espiritu sa kalibutan, nagapakig-ambit sa pagpanglantaw sa kinabuhi niini, nan kita nagapaila sa atong kaugalingon nga mga higala sa kalibutan, dili sa Diyos. Ang espiritu sa kalibutan nagapatungha sa “mga buhat sa unod” sama sa “pagpakighilawas, kahugaw, kaulag, idolatriya, espiritismo, mga bingkil, gubot, pangabugho, kapungot, mga away, mga pagbahinbahin, mga sekta, mga kasina, mga pagpahubog, mga hudyaka, ug mga butang sama niini.” Ang Bibliya klarong nagaingon nga “kadtong kinsa nagabuhat sa maong mga butang dili makapanunod sa gingharian sa Diyos.” Sa laing bahin, kon kita mga higala sa Diyos batonan nato ang iyang espiritu uban sa mga bunga niini sa “gugma, kasadya, kalinaw, pagpailub, kalolot, kaayo, pagtuo, kaaghup, pagpugong sa kaugalingon.”—Galacia 5:19-23.
24. (a) Nganong dili maalamon ang pagpanig-ingon sa mga tawo nga gipasidunggan sa kalibutan? (b) Sa unsang paagi ang atong pagpangisip sa materyal nga mga kabtangan nagapakita kon kinsang pagpakighigala ang atong ginapanlimbasugan?
24 Kansang espiritu, nan, ang atong ginapasundayag? Kana makatabang kanato sa pagtino kon kang kansang mga higala kita. Nagakinabuhi ingon sa atong ginahimo, nga ubos sa inpluensiya niining karon dautang kalibutan, dili kita matingala sa pagkaplag sa panginahanglan sa paghimog mga kausaban sa atong mga kinabuhi aron makapahimuot sa Diyos. Ang kalibutanong katawhan, pananglitan, nagatambak sa dungog ug himaya niadtong kansang ambisyosong pagpanlimbasug naghatud kanila ngadto sa dakung bahandi, gahum, o kabantug. Ang katawhan nagsunod sa ilang kaugalingon sa maong kalibutanong mga bayani ug mga idolo, nagapanig-ingon kanila sa sinultihan, paggawi, panagway, ug pamisti. Buot ba nimong ipaila ang imong kaugalingon nga nagadayeg sa maong mga tawo? Ang ilang ginahimo sukwahi sa ginaawhag sa Pulong sa Diyos kanato nga himuong atong tumong sa kinabuhi. Ang Bibliya nagatumong kanato ngadto sa espirituhanong bahandi ug kalig-on ug sa dungog sa pag-alagad ingon nga mga representante ug mga tigsulti sa Diyos sa yuta. (1 Timoteo 6:17-19; 2 Timoteo 1:7, 8; Jeremias 9:23, 24) Ang komersiyal nga propaganda sa kalibutan nagaliso sa katawhan ngadto sa materyalismo, nga nagatuo nga ang kalipay nagadepende sa mga kabtangan. Busa sila nagahatag niini sa mas dakung importansiya kay sa mga butang dunay espirituhanong balor. Oo, ang pagsunod sa dalan sa kalibutan makadaug alang kanimo sa pagpakighigala sa kalibutan. Apan kana magaputol kanimo sa pagpakighigala sa Diyos. Unsa man ang mas importante kanimo? Hain man ang magasangko ngadto sa dakudaku ug labaw malungtarong kalipay?
25. (a) Unsa ang atong madahum sa kalibutan kon kita magabiya sa iyang mga paagi? (b) Unsa ang makapahinabo kanato sa matuod nga ‘pagbag-o sa atong mga hunahuna’ sa pagpanglantaw sa mga butang sama sa Diyos?
25 Sayon kaayong magpasakup sa pagsunod sa kalibutan. Ug, tungod sa dautang espiritu niini, ang mga nagasuportar niining kalibutan malagut kon magasunod ka sa lahi nga kurso. (1 Pedro 4:3, 4) Ang pagpig-ut dad-on kanimo sa pagpahiuyon, sa pagtugot sa kalibutanon tawhanong katilingban sa paghulma kanimo sama niini. Ang kaalam sa kalibutan, ang mga pilosopiya niini kon unsa ang nagadala sa kalampusan sa kinabuhi, pagagamiton sa pagkontrolar sa imong pagpangisip. Busa, nagakinahanglan ug matuod nga panlimbasug ug pagtuo sa ‘pagbag-o sa imong hunahuna’ sa pagtan-aw sa mga butang sumala sa pagpanglantaw sa Diyos, sa pagsabut kon ngano ‘ang kaalam niining kalibutan kabuangan sa iyang panan-aw.’ (Roma 12:2; 1 Corinto 1:18-20; 2:14-16; 3:18-20) Pinaagi sa kugihang pagtuon sa Pulong sa Diyos atong masabtan gayod ang palso nga kaalam sa kalibutan. Atong makita ang kadaut nga miresulta na gikan sa maong “kaalam,” ug ang malaglagong katapusan diin kini magahatud. Unya atong maila usab sa bug-os ang kaalam sa paagi sa Diyos ug sa siguro nga mga panalangin nga garantiya niini.
Walay Pulos ang Paghatag sa Kinabuhi ug Kusog sa usa ka Kalibutan nga Mahanaw
26. Maalamon ba ang malangkit sa bulohaton sa mga organisasyon sa kalibutan nga matabangon sa katawhan uban sa katuyoan sa pagpauswag sa mga kahimtang?
26 Ang uban magasupak: ‘Apan daghan sa mga organisasyon sa kalibutan nagahimo ug maayo, nagabuhat sa pagpanalipud, kahimsog, edukasyon, ug kagawasan sa katawhan.’ Matuod, ang pipila ka organisasyon nagahatag sa pipila ka temporaryong kahupayan sa pipila sa kalisdanan sa katawhan. Apan sila tanan bahin sa kalibutan nga nahilayo sa Diyos. Ug sila nagaliso sa pagtagad sa katawhan sa pagpalambo niining sistema sa mga butang karon. Walay usa kanila ang nagalaban sa gobiyerno sa Diyos alang sa yuta, sa iyang Gingharian pinaagi sa iyang Anak. Total, bisan ang pipila ka kriminal mahimong magatukod ug mga panimalay, magatagana kanila, ug magahimog mga buhat sa kaluoy sa komunidad. Apan kining mga butang ba magapamatarung sa atong pagsuportar sa kriminal nga mga organisasyon sa bisan unsang paagi?—Itandi ang 2 Corinto 6:14-16.
27. Unsa ang bugtong paagi nga kita makatabang sa katawhan niining kalibutan nga maapil sa mga maluwas ngadto sa Bag-ong Kahikayan sa Diyos?
27 Kita ba sa pagkamatuod makapakita sa matuod nga gugma alang sa katawhan pinaagi sa pagpakig-uban sa bisan unsang mga plano sa kalibutan, sa paghalad sa panahon ug kusog ngadto niana? Kon buot ka magtabang ug tawo nga nagsakit ug nagbalatian, buhaton mo ba kana pinaagi sa pagsuod kaayo nga matakdan ka sa samang sakit o balatian? O dili ba ikaw makatabang ug mas dako pa kon ikaw mismo magpabiling mahimsog sa panglawas ug manlimbasog sa pag-abag sa maong tawo sa pagpangitag paagi nga maulian ngadto sa kahimsog? Ang tawhanong katilingban karon masakiton sa espirituwal ug nagbalatian. Walay usa kanato ang makaluwas niini, kay ang Pulong sa Diyos nagapakita nga ang sakit niini nagahatud ngadto sa kamatayon. (Itandi ang Isaias 1:4-9.) Apan kita makatabang sa mga indibiduwal sa kalibutan sa pagkaplag sa dalan sa espirituhanong kahimsog ug sa kaluwasan ngadto sa Bag-ong Kahikayan sa Diyos—basta kita mismo maghupot nga separado sa kalibutan. (2 Corinto 6:17) Nan, sa maalamon, likayi ang kalangkitan sa mga plano o paagi sa kalibutan. Panlimbasug sa imong kaugalingon sa paglikay nga matakdan sa espiritu sa kalibutan ug sa pagpanig-ingon sa dili matarung mga paagi niini. Ayaw kalimti: “Ang kalibutan mahanaw ug mao man ang iyang mga tinguha niini, apan siya nga nagabuhat sa kabubut-on sa Diyos nagapabilin sa walay katapusan.”—1 Juan 2:17.