Ayaw Hatagi ug Luna ang Yawa
“Ayaw hatagi ug higayon ang Yawa.”—EFESO 4:27, Byington.
1. Nganong nagduhaduha ang daghang tawo kon tinuod bang naglungtad ang Yawa?
SULOD sa daghang siglo, daghang tawo ang naghunahuna nga ang Yawa maoy sungayan, pikas-ug-kuko nga linalang nga nagbestig pula ug nagagamit ug dakong kahig aron itugpo ang mga tawong daotan ngadto sa nagdilaab nga impiyerno. Wala suportahi sa Bibliya kanang mga ideyaha. Tungod hinuon nianang sayop nga mga ideya nga ang milyonmilyong tawo nagduhaduha kon tinuod bang naglungtad ang Yawa o sila naghunahuna nga kanang terminoha mapadapat lamang sa usa ka prinsipyo sa pagkadaotan.
2. Unsa ang pipila ka Kasulatanhong mga impormasyon bahin sa Yawa?
2 Ang Bibliya adunay ebidensiya nga may nakasaksi kaniya ug sa tin-aw nagpamatuod nga ang Yawa naglungtad. Si Jesu-Kristo nakakita kaniya didto sa langitnong dominyo sa mga espiritu ug nakigsulti kaniya dinhi sa yuta. (Job 1:6; Mateo 4:4-11) Bisag ang Kasulatan wala magpadayag sa orihinal nga ngalan nianang espirituhanong linalang, kini nagtawag kaniya nga Yawa (nga nagkahulogang “Tigbutangbutang”) tungod kay siya nagbutangbutang sa Diyos. Siya ginganlan usab ug Satanas (nga nagkahulogang “Magsusupak”), sanglit siya nagsupak kang Jehova. Si Satanas nga Yawa ginganlang “ang orihinal nga halas,” lagmit kay iyang gigamit ang usa ka halas sa paglimbong kang Eva. (Pinadayag 12:9; 1 Timoteo 2:14) Siya nailhan usab nga ang “usa nga daotan.”—Mateo 6:13.a
3. Unsa ang pangutanang atong hisgotan?
3 Ingong mga alagad ni Jehova, dili gayod nato buot nga mahisama kang Satanas, ang pangunang kaaway sa bugtong matuod nga Diyos. Busa kinahanglan kitang mamati sa tambag ni apostol Pablo: “Ayaw hatagi ug higayon ang Yawa.” (Efeso 4:27, Byington) Unsa ang pipila ka kinaiya ni Satanas nga dili gayod nato sundogon?
Ayaw Sundoga ang Dakong Tigbutangbutang
4. Sa unsang paagi ang “usa nga daotan” nagbutangbutang sa Diyos?
4 Ang “usa nga daotan” takos tawgong Yawa, kay siya tigbutangbutang. Ang pagbutangbutang maoy bakak, madinaoton, ug makadaot-sa-dungog nga mga pahayag batok sa usa ka persona o tawo. Ang Diyos nagsugo kang Adan: “Kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Genesis 2:17) Si Eva gipahibalo niini, apan pinaagi sa usa ka halas, ang Yawa miingon kaniya: “Dili gayod kamo mamatay. Kay nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” (Genesis 3:4, 5) Kadto maoy madinaoton nga pagbutangbutang kang Jehova nga Diyos!
5. Nganong si Diotrefes kinahanglang manubag sa iyang pagbutangbutang?
5 Ang mga Israelinhon gisugo: “Dili ka magsuroysuroy sa taliwala sa imong katawhan aron mamutangbutang.” (Levitico 19:16) Si apostol Juan miingon mahitungod sa usa ka tigbutangbutang sa iyang adlaw: “May gisulat ako sa kongregasyon, apan si Diotrefes, nga gustong makabaton sa unang dapit taliwala kanila, wala modawat sa bisan unsa gikan kanamo nga may pagtahod. Busa, kon ako makaanha na, hinumdoman ko ra unya ang iyang mga buhat nga padayon niyang ginabuhat, nga nagayawit bahin kanamo pinaagi sa daotang mga pulong.” (3 Juan 9, 10) Si Diotrefes nagbutangbutang kang Juan ug kinahanglan siyang manubag sa iyang mga gibuhat. Dili ba ang usa ka maunongong Kristohanon dili buot nga mahisama kang Diotrefes ug manundog kang Satanas, ang dakong tigbutangbutang?
6, 7. Nganong angay natong likayan ang pagbutangbutang kang bisan kinsa?
6 Ang mabutangbutangong mga pahayag ug bakak nga mga sumbong subsob ipahayag batok sa mga alagad ni Jehova. “Ang pangulong mga saserdote ug ang mga eskriba nagbalikbalik sa pagtindog ug mainitong nagsumbong [kang Jesus].” (Lucas 23:10) Si Pablo sa binakak gisumbong sa Hataas nga Saserdoteng si Ananias ug sa uban pa. (Buhat 24:1-8) Ug ang Bibliya naghisgot kang Satanas ingong “ang magsusumbong sa atong mga igsoon . . . , kinsa nagsumbong kanila adlaw ug gabii atubangan sa atong Diyos.” (Pinadayag 12:10) Kadtong mga igsoon nga sa binakak gisumbong maoy dinihogang mga Kristohanon sa yuta niining kataposang mga adlaw.
7 Ang Kristohanon dili angayng magbutangbutang kang bisan kinsa o mopahayag ug bakak nga mga sumbong. Bisan pa niana, kana mahitabo kon wala kita makabaton sa tanang impormasyon sa dili pa mosaksi batok sa usa ka tawo. Ubos sa Moisesnong Balaod, ang tinuyong pagsaksi ug bakak mahimong moresulta sa kamatayon sa magsusumbong. (Exodo 20:16; Deuteronomio 19:15-19) Dugang pa, ang mga butang nga dulumtanan kang Jehova naglakip sa “usa ka bakakong saksi nga nagasabwag ug kabakakan.” (Proverbio 6:16-19) Nan, buot gayod natong likayan ang pagsundog sa pangunang tigbutangbutang ug bakakong magsusumbong.
Likayi ang mga Paagi sa Orihinal nga Mamumuno
8. Sa unsang paagi ang Yawa maoy “usa ka mamumuno sa iyang pagsugod”?
8 Ang Yawa maoy mamumuno. “Kana siya usa ka mamumuno sa iyang pagsugod,” matod ni Jesus. (Juan 8:44) Si Satanas maoy mamumuno sugod sa iyang unang buhat sa pagpatalikod kang Adan ug Eva gikan sa Diyos. Siya ang nakaingon sa kamatayon sa unang tawhanong magtiayon ug sa ilang mga anak. (Roma 5:12) Angayng matikdan nga kanang buhata ikapasangil lamang sa usa ka persona, dili sa usa lamang ka prinsipyo sa pagkadaotan.
9. Sumala sa gipasabot sa 1 Juan 3:15, sa unsang paagi mahimo kitang mga mamumuno?
9 “Dili ka magbuno,” nag-ingon ang usa sa Napulo ka Sugo nga gihatag sa Israel. (Deuteronomio 5:17) Sa pagsulat ngadto sa mga Kristohanon, si apostol Pedro miingon: “Ayaw tugoti nga aduna kaninyoy mag-antos ingong usa ka mamumuno.” (1 Pedro 4:15) Busa ingong mga alagad ni Jehova, kita dili mopatay. Bisan pa niana, kita masad-an atubangan sa Diyos kon atong gidumtan ang usa ka isigka-Kristohanon ug gipanghinaot nga siya mamatay unta. “Ang matag usa nga nagadumot sa iyang igsoon maoy usa ka mamumuno,” misulat si apostol Juan, “ug kamo nahibalo nga walay mamumuno nga kaniya nagpabilin ang kinabuhing walay kataposan.” (1 Juan 3:15) Ang mga Israelinhon gisugo: “Dili ka magdumot sa imong igsoon diha sa imong kasingkasing.” (Levitico 19:17) Hinaot nga ato dayong sulbaron ang bisan unsang kabingkilan nga motungha tali kanato ug sa isigkamagtutuo, aron ang mamumuno nga si Satanas dili makabungkag sa atong Kristohanong panaghiusa.—Lucas 17:3, 4.
Barog nga Lig-on Batok sa Pangunang Bakakon
10, 11. Unsay kinahanglan natong buhaton aron makabarog nga lig-on batok sa pangunang bakakon, si Satanas?
10 Ang Yawa maoy bakakon. “Inigsulti niya sa bakak,” matod ni Jesus, “siya nagsulti sumala sa iyang kinaiya, tungod kay siya usa ka bakakon ug ang amahan sa bakak.” (Juan 8:44) Si Satanas namakak kang Eva, samtang si Jesus mianhi sa kalibotan aron sa pagpamatuod sa kamatuoran. (Juan 18:37) Aron makabarog kitang lig-on batok sa Yawa ingong mga sumusunod ni Kristo, dili kita mahimong mogamit sa kabakakan ug panglimbong. Kita kinahanglang ‘mosulti nga matinud-anon.’ (Zacarias 8:16; Efeso 4:25) Si “Jehova nga Diyos sa kamatuoran” magapanalangin sa iyang matinud-anon lamang nga mga Saksi. Ang mga daotan walay katungod sa paghawas kaniya.—Salmo 31:5; 50:16; Isaias 43:10.
11 Kon gimahal nato ang atong espirituwal nga kagawasan gikan sa satanasnong kabakakan, kinahanglan kitang mopadayon sa pagsubay sa Kristiyanidad, “ang dalan sa kamatuoran.” (2 Pedro 2:2; Juan 8:32) Ang kahugpongan sa Kristohanong mga pagtulon-an mao ang naglangkob sa “kamatuoran sa maayong balita.” (Galacia 2:5, 14) Ang ato mismong kaluwasan nagdepende sa atong “paglakaw diha sa kamatuoran”—ang padayong pagsubay niana ug pagbarog nga lig-on batok sa “amahan sa bakak.”—3 Juan 3, 4, 8.
Sukli ang Kinalabwang Apostata
12, 13. Unsaon nato pagtratar ang mga apostata?
12 Ang espiritung linalang nga nahimong Yawa nagsubay kanhi sa kamatuoran. Apan “siya wala mobarog nga lig-on diha sa kamatuoran,” matod ni Jesus, “tungod kay ang kamatuoran wala kaniya.” (Juan 8:44) Kining kinalabwang apostata nagpadayon sa pagsukol sa “Diyos sa kamatuoran.” Ang pipila ka Kristohanon sa unang siglo nahulog sa “lit-ag sa Yawa,” lagmit nahimong iyang mga biktima tungod kay napahisalaag ug mibulag sa kamatuoran. Busa giawhag ni Pablo ang iyang kaubang-magbubuhat nga si Timoteo nga pahimangnoan sila uban ang kalumo aron sila maulian unta sa espirituwal nga kahimsog ug makagawas sa lit-ag ni Satanas. (2 Timoteo 2:23-26) Hinuon, labi pang maayo nga panguptang hugot ang kamatuoran ug dili gayod malit-agan sa apostatang mga panghunahuna.
13 Tungod sa pagpatalinghog sa Yawa ug sa dili pagsalikway sa iyang kabakakan, ang unang tawhanong magtiayon nahimong mga apostata. Nan, angay ba kitang magpatalinghog sa mga apostata, magbasa sa ilang literatura, o magsusi sa ilang mga Web site diha sa Internet? Kon gihigugma nato ang Diyos ug ang kamatuoran, dili nato buhaton kana. Dili angay natong pasudlon ang mga apostata sa atong mga balay o bisan pangomostahon sila, kay ang maong mga buhat maghimo kanato nga ‘mga mag-aambit sa ilang daotang mga buhat.’ (2 Juan 9-11) Hinaot nga dili gayod kita magpadaog sa mga panglingla sa Yawa pinaagi sa pagbiya sa Kristohanong “dalan sa kamatuoran” aron mosunod sa mini nga mga magtutudlo nga nagtinguha nga “magpasulod ug makapadaot nga mga pagtulon-an” ug naningkamot nga ‘magpahimulos kanato pinaagi sa maayong-pagkahan-ay nga mga pulong.’—2 Pedro 2:1-3, Byington.
14, 15. Unsang pasidaan ang gihatag ni Pablo sa mga ansiyano nga taga-Efeso ug sa iyang kaubang-magbubuhat nga si Timoteo?
14 Giingnan ni Pablo ang Kristohanong mga ansiyano nga taga-Efeso: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak. Ako nahibalo nga sa akong pagbiya ang malupigong mga lobo mosulod sa inyong taliwala ug dili magtagad sa panon uban ang kalumo, ug gikan sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ngadto kanila.” (Buhat 20:28-30) Nanungha gayod sa wala madugay ang maong mga apostata ug sila ‘nanultig tinuis nga mga butang.’
15 Sa mga 65 K.P., ang apostol miawhag kang Timoteo nga ‘gamiton ang pulong sa kamatuoran sa hustong paagi.’ “Apan,” misulat si Pablo, “likayi ang mga sulting walay-pulos nga nagpasipala kon unsay balaan; kay sila mosamot pa gayod pagkadili-diyosnon, ug ang ilang pulong mokanap samag gangrena. Apil kanila si Himeneo ug si Fileto. Kining mga tawhana mismo mitipas gikan sa kamatuoran, nga nag-ingon nga ang pagkabanhaw nahitabo na; ug ilang gidaot ang pagtuo sa pipila.” Nagsugod na ang apostasya! “Bisan pa nianang tanan,” midugang si Pablo, “ang lig-ong patukoranan sa Diyos pabiling nagbarog.”—2 Timoteo 2:15-19.
16. Bisan pa sa mga panglingla sa kinalabwang apostata, nganong kita nagmaunongon sa Diyos ug sa iyang Pulong?
16 Gigamit kanunay ni Satanas ang mga apostata sa paningkamot nga daoton ang matuod nga pagsimba—apan kana napakyas. Sa mga tuig 1868, gisugdan ni Charles Taze Russell ang makutihong pagtuki sa dugay-nang-gituohang mga doktrina sa mga simbahan sa Kakristiyanohan ug siya nakakaplag ug sayop nga mga interpretasyon sa Kasulatan. Giporma ni Russell ug sa pipila ka ubang nangitag kamatuoran ang usa ka klase sa pagtuon sa Bibliya sa Pittsburgh, Pennsylvania, T.B.A. Sa mga 140 ka tuig sukad niadto, miuswag ang kahibalo sa mga alagad ni Jehova ug ang ilang gugma sa Diyos ug sa iyang Pulong. Bisan pa sa mga panglingla sa kinalabwang apostata, ang espirituwal nga pagkamabinantayon sa matinumanon ug maalamong ulipon nga matang nakatabang niining matuod nga mga Kristohanon sa pagpabiling maunongon kang Jehova ug sa iyang Pulong.—Mateo 24:45.
Ayaw Gayod Pagpaimpluwensiya sa Magmamando sa Kalibotan
17-19. Unsa ang kalibotan nga nailalom sa gahom sa Yawa, ug nganong dili angay natong higugmaon kini?
17 Ang laing paagi nga si Satanas nagtinguha sa paglit-ag kanato maoy pinaagi sa paghaylo kanato sa paghigugma niining kalibotana nga gilangkoban sa dili-matarong nga tawhanong katilingban nga nahibulag sa Diyos. Si Jesus nagtawag sa Yawa “ang magmamando niining kalibotana” ug miingon: “Siya walay gahom kanako.” (Juan 14:30) Hinaot nga dili gayod kita magpailalom sa gahom ni Satanas! Hinuon, nahibalo kita nga “ang tibuok kalibotan nailalom sa gahom [nianang] usa nga daotan.” (1 Juan 5:19) Busa ang Yawa makatanyag kang Jesus sa “tanang gingharian sa kalibotan” baylo sa usa ka apostatang buhat sa pagsimba—butang nga gisalikway sa dayag sa Anak sa Diyos. (Mateo 4:8-10) Ang kalibotan nga gimandoan ni Satanas nagdumot sa mga sumusunod ni Kristo. (Juan 15:18-21) Dili katingad-ang si apostol Juan nagpasidaan kanato nga dili higugmaon ang kalibotan!
18 Si Juan misulat: “Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya; tungod kay ang tanan nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa—wala magagikan sa Amahan, apan nagagikan sa kalibotan. Dugang pa, ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:15-17) Dili gayod nato higugmaon ang kalibotan, kay ang pagkinabuhi niini madanihon sa makasasala nga unod ug bug-os nahasupak sa mga sukdanan ni Jehova nga Diyos.
19 Unsa na man kon ang gugma niining kalibotana anaa sa atong kasingkasing? Nan mag-ampo kita alang sa tabang sa Diyos aron mapukgo ang maong gugma ug ang unodnong mga tinguha nga nalangkit niini. (Galacia 5:16-21) Seguradong manlimbasog kita sa pagpabiling “dili mahugawan sa kalibotan” kon ibutang nato sa hunahuna nga ang “daotang mga puwersa nga espirituhanon” mao ang dili-makitang “mga magmamando sa kalibotan” sa dili-matarong nga tawhanong katilingban.—Santiago 1:27; Efeso 6:11, 12; 2 Corinto 4:4.
20. Nganong ikaingon nga kita “dili bahin sa kalibotan”?
20 Bahin sa iyang mga tinun-an, si Jesus miingon: “Sila dili bahin sa kalibotan, ingon nga ako dili bahin sa kalibotan.” (Juan 17:16) Ang dinihogang mga Kristohanon ug ang ilang nagpahinungod nga mga kauban nanlimbasog sa pagpabiling hinlo sa moral ug sa espirituwal, nga bulag gikan niining kalibotana. (Juan 15:19; 17:14; Santiago 4:4) Kining dili-matarong nga kalibotan nagdumot kanato tungod kay kita nagpabiling bulag niini ug maoy ‘mga magwawali sa pagkamatarong.’ (2 Pedro 2:5) Tinuod, kita nagpuyo taliwala sa tawhanong katilingban, nga naglakip sa mga makihilawason, mananapaw, mangingilkil, tigsimbag idolo, kawatan, bakakon, ug mga palahubog. (1 Corinto 5:9-11; 6:9-11; Pinadayag 21:8) Apan wala kita makahanggab sa “espiritu sa kalibotan,” kay wala man kita magamhi niining makasasala nga puwersa.—1 Corinto 2:12.
Ayaw Hatagi ug Luna ang Yawa
21, 22. Sa unsang paagi mahimo nimong ipadapat ang tambag ni Pablo nga natala sa Efeso 4:26, 27?
21 Imbes gitukmod sa “espiritu sa kalibotan,” kita giagak sa espiritu sa Diyos, nga nagapatungha diha kanato sa mga hiyas sama sa gugma ug pagpugong-sa-kaugalingon. (Galacia 5:22, 23) Kining mga hiyasa makatabang kanato sa pagsagubang sa mga atake sa Yawa sa atong pagtuo. Gusto niyang kita ‘manginit nga mosangko lamang sa pagbuhat ug daotan,’ apan ang espiritu sa Diyos makatabang kanato sa ‘paglikay sa kasuko ug pagbiya sa kaaligutgot.’ (Salmo 37:8) Tinuod, makataronganong masuko kita usahay, apan si Pablo nagtambag kanato: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.”—Efeso 4:26, 27.
22 Ang atong kasuko mahimong mosangko sa sala kon kita magpadayong nasuko. Ang atong pagpadayon sa pagkasuko mohatag sa Yawa ug higayon nga pausbawon ang kawalay-panaghiusa diha sa kongregasyon o magtukmod kanato sa pagbuhat ug daotang mga buhat. Busa, kinahanglang husayon dayon nato sa diyosnong paagi ang mga kabingkilan batok sa uban. (Levitico 19:17, 18; Mateo 5:23, 24; 18:15, 16) Busa magpagiya kita sa espiritu sa Diyos, nga ipasundayag ang pagpugong-sa-kaugalingon ug dili nato tugotang mograbe bisan ang makataronganong kasuko nga kana mahimo nang kayugot, tinguha sa pagdaot, ug pagdumot.
23. Unsang mga pangutana ang atong hisgotan sa sunod artikulo?
23 Ato nang nahisgotan ang pipila ka kinaiya sa Yawa nga dili gayod angay natong sundogon. Apan ang pipila ka magbabasa mahimong mahibulong: Angay ba kitang mahadlok kang Satanas? Nganong siya nagdasig sa paglutos sa mga Kristohanon? Ug sa unsang paagi makalikay kita nga madaog sa Yawa?
[Footnote]
a Tan-awa ang serye sa hapin nga “Tinuod ba ang Yawa?” diha sa Ang Bantayanang Torre sa Nobyembre 15, 2005.
Unsay Imong Tubag?
• Nganong dili angay kitang magbutangbutang kang bisan kinsa?
• Nahiuyon sa 1 Juan 3:15, sa unsang paagi makalikay kita nga mahimong mga mamumuno?
• Unsaon nato pag-isip ang mga apostata, ug ngano?
• Nganong dili angay natong higugmaon ang kalibotan?
[Hulagway sa panid 23]
Dili gayod nato tugotan ang Yawa sa pagbungkag sa atong Kristohanong panaghiusa
[Mga hulagway sa panid 24]
Nganong giawhag ni Juan nga dili nato higugmaon ang kalibotan?