Makasalig Ka sa mga Igsoon

 1. Nganong dili na ta matingala nga daghan ang way pagsalig karon?

ANG mga tawo sa kalibotan ni Satanas naglibog kon kang kinsa sila mosalig. Nadismayar sila sa ginahimo sa mga negosyante, politiko, ug lider sa relihiyon. Daghan pod ang way salig sa ilang mga higala, silingan, ug bisan sa ilang pamilya. Dili na ta matingala ini kay ang Bibliya nagtagna: “Sa kataposang mga adlaw . . . , ang mga tawo unya . . . dili maunongon, . . . tigbutangbutang, . . . traydor.” Sa ato pa, sundogon sa mga tawo ang kinaiya sa diyos niini nga sistema sa mga butang, kinsa dili kasaligan.​—2 Tim. 3:1-4; 2 Cor. 4:4.

 2. (a) Kang kinsa ta makasalig? (b) Unsa kahay gihunahuna sa uban?

² Pero ingong mga Kristohanon, bug-os tang makasalig kang Jehova. (Jer. 17:7, 8) Kombinsido ta nga gimahal ta niya ug ‘dili gyod niya biyaan’ ang iyang mga higala. (Sal. 9:10) Makasalig sab ta kang Kristo Jesus kay iyang gihatag ang iyang kinabuhi alang kanato. (1 Ped. 3:18) Ug ato mismong naeksperyensiyahan nga kasaligan gyod ang giya sa Bibliya. (2 Tim. 3:16, 17) Segurado ta nga makasalig ta kang Jehova, kang Jesus, ug sa Bibliya. Pero ang uban tingali maghunahuna, ‘Kanunay ba kong makasalig sa mga igsoon sa kongregasyon?’ Kon oo ang tubag, nganong makasalig ta nila?

 3. Unsay atong talagsaong pribilehiyo? (Marcos 10:29, 30)

³ Gipili ta ni Jehova nga mahimong bahin sa iyang tibuok kalibotang pamilya sa mga magsisimba. Dako kaayo nâ nga pribilehiyo nga moresultag daghang kaayohan! (Basaha ang Marcos 10:29, 30.) Sa tibuok kalibotan, naa tay mga igsoon nga nahigugma kang Jehova sama nato ug naningkamot nga mosunod sa iyang mga sukdanan. Lainlain tag pinulongan, kultura, ug sininaan, pero mibati tang suod nila bisag bag-o pa lang nato silang nailaila. Ganahan kaayo ta nga makauban sila sa pagdayeg ug pagsimba sa atong mahigugmaong langitnong Amahan.​—Sal. 133:1.

 4. Nganong gikinahanglan nato ang atong mga igsoon?

⁴ Mas gikinahanglan nato karon nga magpabilin tang nahiusa sa atong mga igsoon. Usahay, tabangan ta nila sa atong mga problema. (Roma 15:1; Gal. 6:2) Dasigon pod ta nila nga magpabiling aktibo sa pag-alagad kang Jehova ug magpabiling lig-on sa espirituwal. (1 Tes. 5:11; Heb. 10:23-25) Hunahunaa ang atong bation kon wala ang kongregasyon, nga nagsilbing proteksiyon aron masuklan nato ang atong mga kaaway​—si Satanas nga Yawa ug ang iyang daotang kalibotan. Sa dili madugay, atakehon ni Satanas ug sa iyang mga sakop ang mga alagad sa Diyos. Pero nianang panahona, mapasalamaton kaayo ta sa tabang sa atong mga igsoon!

 5. Ngano tingaling nalisdan ang uban nga mosalig sa mga igsoon?

⁵ Pero ang uban nalisdan nga mosalig sa mga igsoon kay tingali naa silay gisulti nga kompidensiyal ngadto sa usa ka igsoon pero iya ning gisulti sa uban. O dihay igsoon nga wala motuman sa iyang saad. O kaha naay gisulti o gibuhat ang usa ka igsoon nga nakapasakit nila. Tungod niana, lisod tingali nga mosalig sa uban. Busa unsa may makatabang nato aron mosalig ta sa mga igsoon?

 6. Sa unsang paagi ang gugma motabang nato nga mosalig sa mga igsoon? (1 Corinto 13:4-8)

⁶ Gugma ang pundasyon sa pagsalig. Gihisgotan sa 1 Corinto kapitulo 13 ang lainlaing bahin sa gugma nga makatabang nato nga mosalig sa mga igsoon o mabalik ang atong pagsalig kanila. (Basaha ang 1 Corinto 13:4-8.) Pananglitan, ang bersikulo 4 nag-ingon nga ang gugma “taas ug pailob ug maayo.” Si Jehova mapailobon nato bisan dihang makasala ta niya. Busa angay tang magpailob sa mga igsoon kon naa silay masulti o mabuhat nga makapalagot o makapasakit nato. Ang bersikulo 5 nag-ingon: “[Ang gugma] dili masuk-anon. Kini dili maghupot ug listahan sa kadaot.” Dili ta gustong “maghupot ug listahan sa kadaot,” sa ato pa, dili ta magsigeg hinumdom sa mga nahimo sa atong mga igsoon nga nakapasakit nato. Ang Ecclesiastes 7:9 nag-ingon nga dili ta angayng ‘masuko dayon.’ Mas maayong sundon ang giingon sa Efeso 4:26: “Ayaw pasalopi sa adlaw ang inyong kasuko.”

 7. Sa unsang paagi ang mga prinsipyo sa Mateo 7:1-5 motabang nato nga mosalig sa mga igsoon?

⁷ Ang usa pa nga makatabang nato nga mosalig sa mga igsoon mao ang pagsundog sa panglantaw ni Jehova kanila. Gimahal sila sa Diyos ug wala siya magsigeg bantay sa ilang mga sala. Ingon ana pod ang angay natong buhaton. (Sal. 130:3) Imbes magpokus sa ilang mga sayop, angay tang maningkamot nga makita ang ilang maayong mga hiyas ug hinumdoman nga naa pod silay mahimo nga maayong mga butang. (Basaha ang Mateo 7:1-5.) Ang gugma “motuo sa tanang butang,” maong angay tang mosalig nga gusto sa atong mga igsoon nga mohimog maayo ug dili gyod nila gustong pasakitan ta. (1 Cor. 13:7) Wala nâ magpasabot nga gidahom ni Jehova nga basta na lang ta mosalig sa uban, kondili gusto niya nga mosalig ta nila kay kasaligan sila.b

 8. Unsaon nimo pag-ugmad ang imong pagsalig sa mga igsoon?

⁸ Ang pagsalig parehas sa pagtahod. Kinahanglan tang maningkamot nga ipakita nga angayan ta niana, ug nagkinahanglan nag panahon. Unsaon nimo pag-ugmad ang imong pagsalig sa mga igsoon? Ilha sila pag-ayo. Pakig-estorya nila diha sa tigom. Pakig-uban nila sa ministeryo. Pailobi sila, ug hatagi silag kahigayonan nga ipakita nga kasaligan sila. Sa primero, tingali pilion ra nimo ang personal nga mga butang nga imong isulti sa igsoon nga bag-o pa nimong nahigala. Samtang magkasuod mo, tingali mas komportable na kang mosulti niya sa uban pang personal nga mga butang. (Luc. 16:10) Pero unsay puwede nimong himoon kon nadaot sa igsoon ang imong pagsalig niya? Ayaw dayon paghunahuna nga taposon ang inyong panaghigalaay. Hinuon, palabya usa ang panahon. Ayawg tugoti nga ang gihimo sa uban makawala sa imong pagsalig sa mga igsoon. Bahin niini, hisgotan nato ang ehemplo sa pipila ka matinumanong alagad ni Jehova nga bisag nadismayar, padayon gihapong misalig sa uban.

 9. (a) Giunsa pagpakita ni Ana nga padayon siyang nagsalig sa kahikayan ni Jehova bisan pa sa kasaypanan sa pipila Niya ka alagad? (b) Unsay imong nakat-onan kang Ana bahin sa pagpakitag pagsalig sa kahikayan ni Jehova? (Tan-awa ang hulagway.)

⁹ Nadismayar ba ka sa gihimo sa usa ka brader nga naay responsibilidad sa kongregasyon? Kon oo, makatabang nimo ang ehemplo ni Ana. Niadtong panahona, ang hataas nga saserdoteng si Eli ang nanguna sa pagsimba kang Jehova sa Israel. Pero dili maayong ehemplo ang iyang pamilya. Ang iyang mga anak nga saserdote kanunayng naghimog makauulaw ug imoral nga mga buhat, pero wala kaayo sila tul-ira sa ilang amahan. Wala dayon tangtanga ni Jehova si Eli sa iyang katungdanan. Bisag si Eli gihapon ang hataas nga saserdote, padayong gisunod ni Ana ang kahikayan ni Jehova ug wala siya mohunong sa pagsimba didto sa tabernakulo. Dihang nakit-an ni Eli si Ana nga guol kaayong nag-ampo, iyang nasaypan si Ana nga hubog. Iyang gibadlong ang magul-anon nga si Ana bisan pag wala siya mahibalo sa tinuod nga kahimtang niini. (1 Sam. 1:12-16) Bisan pa niana, nanaad si Ana nga kon makabaton siyag anak nga lalaki, iya siyang dad-on sa tabernakulo aron mag-alagad didto ubos sa pagdumala ni Eli. (1 Sam. 1:11) Kinahanglan bang tul-iron ang mga anak ni Eli? Oo, ug sa ngadtongadto gisilotan sila ni Jehova. (1 Sam. 4:17) Dayon gigantihan sa Diyos si Ana ug anak, si Samuel.​—1 Sam. 1:17-20.

10. Giunsa pagpakita ni Haring David nga wala mawala ang iyang pagsalig sa uban bisan pag dihay mga tawo nga mitraydor niya?

¹⁰ Mibati na ba ka nga mora kag gitraydor sa imong suod nga higala? Kon mao, konsideraha ang nahitabo kang Haring David. Naa siyay higala nga si Ahitopel. Pero sa dihang ang anak ni David nga si Absalom misulay pag-ilog sa trono sa iyang amahan, si Ahitopel miapil kang Absalom sa rebelyon. Seguradong sakit gyod to para kang David nga gitraydor siya sa iyang anak ug sa iyang higala! Pero bisan pag gitraydor si David, wala mawala ang iyang pagsalig sa uban. Misalig gihapon siya sa usa pa niya ka maunongong higala nga si Husai, kinsa wala moapil sa rebelyon. Husto gyod ang pagsalig ni David kaniya. Gipamatud-an ni Husai nga maayo siyang higala. Gipameligro pa gani niya ang iyang kinabuhi aron tabangan si David.​—2 Sam. 17:1-16.

11. Giunsa pagpakita sa sulugoon ni Nabal nga naa siyay pagsalig?

¹¹ Konsideraha pod ang ehemplo sa usa sa mga sulugoon ni Nabal. Gipanalipdan ni David ug sa iyang mga tawo ang mga sulugoon sa Israelinhong si Nabal. Sa ulahi, nangayog pagkaon si David sa dato nga si Nabal para sa iyang mga tawo. Modawat silag bisan unsa nga ikahatag ni Nabal. Pero wala ihatag ni Nabal kining simple nga hangyo, maong puwerteng sukoa ni David ug nakadesisyon siya nga patyon ang tanang lalaki sa panimalay ni Nabal. Gisulti ni sa usa ka sulugoon ngadto sa asawa ni Nabal nga si Abigail. Ang maong sulugoon sakop sa panimalay, ug nahibalo siya nga naay mahimo si Abigail aron maluwas ang iyang kinabuhi. Imbes moikyas, misalig siya nga makatabang si Abigail. Ang sulugoon dakog pagsalig kaniya kay nailhan siya nga maalamong babaye. Ug wala masayop ang sulugoon sa pagsalig kang Abigail. Maisogong gikombinsir ni Abigail si David nga dili dayonon ang iyang plano. (1 Sam. 25:2-35) Misalig siya nga himoon ni David kon unsay husto.

12. Giunsa pagpakita ni Jesus nga misalig siya sa iyang mga tinun-an bisan pa sa ilang kasaypanan?

¹² Si Jesus misalig sa iyang mga tinun-an bisan pa sa ilang kasaypanan. (Juan 15:15, 16) Dihang mihangyo si Santiago ug Juan kang Jesus ug espesyal nga posisyon sa Gingharian, wala niya kuwestiyona ang ilang motibo sa pag-alagad kang Jehova ug wala pod niya sila tangtanga ingong apostoles. (Mar. 10:35-40) Sa ulahi, si Jesus gibiyaan sa tanan niyang tinun-an sa gabii nga siya gidakop. (Mat. 26:56) Pero wala gyod mawala ang pagsalig ni Jesus kanila. Nahibalo siya sa ilang mga kahuyangan, pero “padayon niyang gihigugma sila hangtod sa kataposan.” (Juan 13:1) Human mabanhaw si Jesus, gihatagan pa gani niya ang iyang 11 ka matinumanong apostoles ug bug-at nga responsibilidad, nga mao ang pagpanguna sa paghimog tinun-an ug ang pag-atiman sa iyang bililhong mga karnero. (Mat. 28:19, 20; Juan 21:15-17) Wala masayop ang iyang pagsalig niining dili hingpit nga mga tawo. Silang tanan nag-alagad nga matinumanon hangtod sa kamatayon. Maayo gyong ehemplo si Ana, David, ang sulugoon ni Nabal, si Abigail, ug Jesus sa pagsalig sa dili hingpit nga mga tawo.

13. Unsay posibleng makapawala sa atong pagsalig?

¹³ Nakasulay ba ka nga naa kay gisulti nga kompidensiyal ngadto sa usa ka brader, pero nahibaloan nimo sa ulahi nga iya tong gisulti sa uban? Makapawala gyod nâ sa pagsalig. Dihay sister nga misultig kompidensiyal nga impormasyon ngadto sa usa ka ansiyano. Pagkaugma, ang sister gitawgan sa asawa sa ansiyano ug gidasig siya, nga nagpakita nga gisultihan sa ansiyano ang iyang asawa bahin sa gisulti sa sister. Tungod adto, nalisdan nag salig ang sister sa maong ansiyano. Pero gibuhat sa sister kon unsay husto. Miduol siyag laing ansiyano ug nangayog tabang. Ang maong ansiyano mitabang niya nga mabalik ang iyang pagsalig sa mga ansiyano.

14. Unsay nakatabang sa usa ka brader nga mabalik ang iyang pagsalig?

¹⁴ Dihay brader nga dugay nang naglain ang buot sa duha ka ansiyano ug nawad-an siyag pagsalig nila. Pero gihunahuna niya ang gisulti sa usa ka brader nga iyang gitahod pag-ayo, kinsa miingon niining simple pero makapatandog nga mga pulong: “Si Satanas ang kaaway, dili ang mga igsoon.” Gipamalandong ni sa maong brader ug nag-ampo siya. Sa ngadtongadto, iyang nabalik ang iyang maayong relasyon sa duha ka ansiyano.

15. Nganong kinahanglan tingalig panahon aron mabalik ang pagsalig? Paghatag ug pananglitan.

¹⁵ Nawad-an ba kag pribilehiyo? Dili gyod nâ lalim. Si Grete ug ang iyang mama maunongong mga Saksi sa Nazi Germany niadtong katuigan sa 1930 dihang gidili ang atong buluhaton. Si Grete nakapribilehiyo sa pag-type ug mga kopya sa Bantayanang Torre para sa mga igsoon. Pero dihang nahibaloan sa mga brader nga ang iyang papa supak sa kamatuoran, ilang gikuha ang maong pribilehiyo kay nahadlok sila nga mosumbong ang iyang papa sa mga magsusupak. Pero dili lang kay kana nga pagsulay ang naatubang ni Grete. Panahon sa Ikaduhang Gubat sa Kalibotan, si Grete ug ang iyang mama dili hatagan sa mga brader ug kopya sa mga magasin, ug dili sila tagdon sa mga brader dihang magkatagbo sila sa dalan. Sakit kaayo to kang Grete maong dugay niyang napasaylo ang mga brader ug dugay nabalik ang iyang pagsalig kanila. Pero sa ngadtongadto, naamgohan niya nga seguradong napasaylo na sila ni Jehova, maong angay pod niya silang pasayloon.c

16. Nganong angay tang maningkamot nga mabalik ang atong pagsalig sa mga igsoon?

¹⁶ Kon nakaagi kag ingon ani nga eksperyensiya, paningkamot nga mabalik ang imong pagsalig. Nagkinahanglan nig panahon, pero dili masayang ang imong paningkamot. Pananglitan, kon nakasulay ta nga naospital tungod sa food poisoning, mas mag-amping na ta sa atong kaonon. Pero wala ni magpasabot nga tungod sa nahitabo, moundang na tag kaon. Sa susama, dili nato tugotan nga tungod sa usa ka dili maayong kasinatian, madaot ang atong pagsalig sa tanang igsoon, kay nahibalo ta nga dili sila hingpit. Kon maningkamot ta nga mabalik ang atong pagsalig, mas magmalipayon ta ug mas makapokus ta sa kon unsay atong mahimo aron molig-on ang pagsalig sa mga igsoon sa usag usa sulod sa kongregasyon.

17. Nganong importante kaayo ang pagsalig, ug unsay atong hisgotan sa sunod nga artikulo?

¹⁷ Sa kalibotan ni Satanas, daghan ang walay pagsalig. Pero may pagsalig ta sa mga igsoon kay duna tay gugma sa usag usa. Ang maong pagsalig nakatabang nga magmalipayon ug magkahiusa ta karon, ug manalipod ni nato dihang mag-atubang tag mga kalisdanan sa umaabot. Unsay imong himoon kon nadaot ang imong pagsalig sa mga igsoon? Paningkamoti nga masundog ang panglantaw ni Jehova, maugmad ang lawom nga gugma para sa mga igsoon, ug makakat-on sa mga ehemplo sa Bibliya. Dili ta magpadala sa kasakit nga atong gibati. Hinuon, maningkamot ta nga mabalik ang atong pagsalig sa uban. Dihang ato nang himoon, makabaton tag daghang higala nga “mounong labaw pa sa igsoon.” (Prov. 18:24) Pero dili lang igo nga mosalig ta sa uban. Kinahanglang makasalig pod sila nato. Sa sunod nga artikulo, atong hisgotan kon unsay atong himoon aron makasalig nato ang mga igsoon.