“Wala Igakaulaw ang Maayong Balita”

“Wala ko igakaulaw ang maayong balita; sa pagkamatuod, kini ang gahom sa Diyos alang sa kaluwasan sa matag usa nga nagtuo.”—ROMA 1:16.

1. Sa unsang paagi ang maayong balita kasagarang dawaton, apan unsay pag-isip sa walay-pagtuong mga tawo sa kalibotan sa maayong balita sa Gingharian sa Diyos?

ANG butang mopatim-awng maayong balita alang sa usa ka tawo basin dili isipon sa lain nga maayong balita. Kasagaran na, ang usa ka magdadalag maayong balita dawatong mahinangpon, ug ang igdulongog nga ikag nga makadungog sa balita ipaabong kaniya. Ugaling, gitagna sa Bibliya nga ang mga tawong walay pagtuo sa kalibotan dili mahimuot sa maayong balita sa Gingharian sa Diyos ug sa mensahe niini sa kaluwasan.—Itandi ang 2 Corinto 2:15, 16.

2. Unsay giingon ni apostol Pablo mahitungod sa maayong balita nga iyang gipahayag, ug nganong ang mensaheng iyang gipahayag maayo gihapong balita karong adlawa?

² Si apostol Pablo usa nga gipadala aron sa pagdala sa maayong balita alang sa katawhan. Unsay gibati niya sa iyang komisyon o buluhaton? Siya miingon: “Adunay kaikag sa akong bahin nga ipahayag ang maayong balita nganha usab kaninyo nga anaa sa Roma. Kay wala ko igakaulaw ang maayong balita.” (Roma 1:15, 16) Aron maayo gihapon ang balita karong adlawa, nga halos 2,000 ka tuig tapos sa pagsulat ni apostol Pablo sa mga Kristohanon didto sa Roma, kinahanglang kini malungtarong maayong balita. Kini, sa pagkamatuod, maoy “walay-kataposang maayong balita.”—Pinadayag 14:6.

3, 4. Nganong si apostol Pablo miingon nga siya wala magakaulaw sa maayong balita?

³ Nganong si apostol Pablo miingon nga siya wala magakaulaw sa maayong balita? Nganong siya magakaulaw man unta niana? Tungod kay kadto dili popular nga mensahe, kay kadto may kalabotan sa usa ka tawo nga gilansang sa kahoy sa pagsakit sama sa usa ka tinamay nga kriminal, nga sa gawas nga dagway gibutang siya sa daotan kaayong kahimtang. Sa tulo ka tuig ug tunga, kining tawhana nahadiindiin sa Palestina uban ang maayong balita ug kusog nga gisupak sa mga Hudiyo, ilabina sa relihiyosong mga pangulo. Ug karon si Pablo, nga nagdala sa ngalan nianang tinamay nga tawo, nag-atubang sa susamang pagsupak.—Mateo 9:35; Juan 11:46-48, 53; Buhat 9:15, 20, 23.

⁴ Tungod sa maong pagsupak, si Pablo ug ang iyang isigkatinun-an ni Jesu-Kristo tingali isipong butang nga igakaulaw. Sa pagkamatuod, si Pablo niadtong panahona nagsunod sa butang nga sa nangagi giisip niya mismo nga makauulaw. Personal siyang nakaambit sa pagpahamtang sa pakaulaw diha sa mga sumusunod ni Jesu-Kristo. (Buhat 26:9-11) Apan gihunong na niya ang maong buhat. Ingong sangpotanan, duyog sa ubang nahimong mga Kristohanon, siya nakaagom sa pintas nga paglutos.—Buhat 11:26.

5. Giunsa pagpatin-aw ni Pablo ang iyang gipamulong mahitungod sa dili pagkaulaw sa maayong balita?

⁵ Kon ang usa ka tawo mobatig kaulaw tungod sa pagkasumusunod ni Jesu-Kristo, makabaton siyag tawhanong panglantaw bahin sa mga butang. Si apostol Pablo dili ingon niana. Hinunoa, sa pagpatin-aw nga wala niya igakaulaw ang maayong balita nga iyang giwali, siya miingon: “Sa pagkamatuod, kini ang gahom sa Diyos alang sa kaluwasan sa matag usa nga nagtuo.” (Roma 1:16) Ang gahom sa Diyos dili hinungdan sa pagkaulaw kon kini nagalihok pinaagi sa usa ka tinun-an ni Jesus sa pagtuman sa dalayegong katuyoan sa mahimayaong Diyos kang kinsa si Jesu-Kristo mismo usa ka magsisimba ug magdadayeg.—Itandi ang 1 Corinto 1:18; 9:22, 23.

Maayong Balita Gimantala sa Tibuok nga Kalibotan

6, 7. (a) Unsang responsabilidad bahin sa maayong balita ang gipaningkamotan nga tumanon sa mga Saksi ni Jehova, ug uban ang unsang sangpotanan? (b) Bisan pag dili gayod nato buot nga ang kahadlok magapugong kanato sa paghatag ug pamatuod, unsa tingali ang usahay kinahanglan? (Tan-awa ang potnot.)

⁶ Sama kang Pablo, ang mga Saksi ni Jehova karong adlawa maoy mga tinun-an sa Iyang hinimayang Anak, si Jesu-Kristo. Sa maong mga Saksi niya, gitugyan ni Jehova kining bahandi sa “mahimayaong maayong balita.” (1 Timoteo 1:11) Ang mga Saksi ni Jehova wala mapakyas sa pagtuman sa maong bug-at nga responsabilidad, ug sila giagda nga dili magakaulaw niini. (2 Timoteo 1:8) Hinungdanon nga dili gayod itugot nga ang kahadlok o pagkamaulawon magapugong kanato sa paghatag sa pamatuod ug sa pagpaila nga kita mga Saksi ni Jehova.a

⁷ Ang maong maisogon ug dimahadlokong pagsangyaw misangpot nga ang ngalan sa Labing Hataas nga Diyos namantala sa tibuok yuta ug sa pagwali sa maayong balita sa iyang Gingharian sa tibuok nga kalibotang gidak-on. Ang Anak sa Diyos miingon: “Kining maayong balita sa gingharian igawali sa tibuok pinuy-anang yuta alang sa usa ka pamatuod sa tanang nasod; ug unya moabot ang kataposan,” ug dili gayod mahitabong mapakyas ang iyang panagna. (Mateo 24:14) Ang maayong balita karon ginawali na sa kapig 210 ka kayutaan, ug ang kataposan sa maong buluhatong pagwali wala pa modangat. Kita, nga wala magakaulaw sa maayong balita ug nagaatubang sa umaabot uban ang kaisog, nagaampo sama sa unang mga tinun-an ni Jesu-Kristo: “Ug karon, Jehova, . . . itugot nga ang imong mga ulipon magapadayon sa pagsulti sa imong pulong uban ang bug-os nga pagkamaisogon.”—Buhat 4:29.

8. Nganong ang mga Saksi ni Jehova angay nga dili maluya tungod sa pagsupak diha sa tanang nasod sa yuta?

⁸ Bisan pag tinuod nga ang mga Saksi ni Jehova gidumtan ug gisupak diha sa tanang nasod sa yuta, kini maoy katumanan sa gitagna nga mao ang ilhanan sa matuod nga mga magsisimba sa usa ka buhi ug matuod nga Diyos. (Juan 15:20, 21; 2 Timoteo 3:12) Busa inay nga maluya ug maguol niini, ang mga magmamantala sa maayong balita mapalig-on nga sila nakabaton sa balaang pag-uyon ug nahisakop sa inuyonang organisasyon sa Unibersohanong Soberano, si Jehova.

9. Nganong dili hinungdanon nga ang tibuok kalibotan nagasupak kanato?

⁹ Ayaw gayod hikalimti: Kita nakabaton sa pagpaluyo sa Labing Hataas nga Diyos sa tibuok nga uniberso. Busa, hinungdanon ba kon ang kalibotan uban sa tanan niining relihiyosong sekta ug politikanhong mga partido mosupak kanato? Ang bugtong-inanak nga Anak sa Diyos gisupak sa tibuok nga kalibotan, ug kita dili magakaulaw nga makaagom niana. Sumala sa giingon niya ngadto sa iyang mga apostol: “Kon ang kalibotan nagadumot man kaninyo, hibaloi nga kini nagdumot na kanako sa wala pa kini magdumot kaninyo. Kon kamo bahin pa sa kalibotan, higugmaon sa kalibotan ang mga iya. Karon tungod kay kamo dili bahin sa kalibotan, apan gipili ko kamo gikan sa kalibotan, tungod niini ang kalibotan nagadumot kaninyo.”—Juan 15:18, 19.

10. Diin gikan ang kadaghanan sa paglutos sa mga Saksi, ug nganong sila dili magakaulaw niana?

¹⁰ Busa giantos sa mga Saksi ni Jehova ang paglutos sa tibuok nga kalibotan apan ilabina gayod diha sa mga nasod nga naglangkob sa gitawag nga Kakristiyanohan. Ang maong paglutos pinaagi sa Kakristiyanohan wala magpamatuod nga ang mga Saksi dili mga Kristohanon. Hinunoa, kini nagapaluyo sa ilang pangangkon nga maoy matuod nga mga Kristohanon, mga Saksi sa Diyos ug Amahan ni Jesu-Kristo, nga mao, si Jehova. Tungod kay sila mga Saksi sa Diyos, sila dili magakaulaw kon maagoman nila ang paglutos tungod sa relihiyosong mga hinungdan. Busa, ang tambag ni apostol Pablo ngadto sa unang-siglong mga Kristohanon nga dili magakaulaw tukmang mapadapat nganha sa mga Saksi ni Jehova karon.—Tan-awa ang Filipos 1:27-29.

Labing Maayong Balita nga Ikamantala

11. Sa pagsagop sa ngalang mga Saksi ni Jehova, nganong kita wala mohunong sa pagkahimong mga sumusunod ni Jesu-Kristo?

¹¹ Maisogong gidawat sa mga Saksi ni Jehova ang ilang ngalan ingong katumanan sa saad ni Jehova ngadto sa iyang katawhan sa tugon sa Isaias 43:10. Hinuon, kini wala magpasabot nga sila dili na mosunod kang Jesu-Kristo. Si Jesus mao ang ilang Pangulo, ang usa kansang sulundan maoy ilang ginasunod. Siya mismo maoy usa sa mga Saksi ni Jehova. Ngani, siya mao ang pangunang Saksi ni Jehova.—1 Timoteo 6:13; Pinadayag 1:5.

12. Unsang matang sa balita ang ginawali sa mga Saksi ni Jehova sa tibuok kalibotan, ug ngano?

¹² Ang mensahe nga ginawali niining mga Saksi ni Jehova sa tibuok nga kalibotan mao ang labing maayong balita nga ikamantala. Walay kagamhanan ang labi pang maayo alang sa katawhan kay sa Mesiyanikong Gingharian nga gitukod na ni Jehova aron sa pagmando sa kalibotan sa katawhan, nga pagalukaton nga tungod niana gipadala niya ang iyang bugtong-inanak nga Anak. (Isaias 9:6, 7) Ang mga molupyo sa yuta nga ginawalihan sa maayong balita sa Gingharian ginahatagag higayon sa pagdawat niini ug sa pagpamatuod nga takos sa gasang kinabuhing walay kataposan diha sa tawhanong kahingpitan sa usa ka paraisong yuta.

13. Nganong kita makatino nga ang Mesiyanikong Gingharian nga kagamhanan mao unya ang labing maayo, ug unsay ginasugyot sa mga Saksi nga walay pagkaulaw?

¹³ Sa pagkamatuod, kon si Jesus andam nga makaagom sa mapintas nga kamatayon aron sa paglukat niadtong mahimong iyang mga ginsakpan, sa tino iyang ihatag kanila ang kagamhanan nga labing maayo. Ginasugyot namo sa tanang tawhanong linalang sa yuta: Mahimong matinumanon, masinugtanong sakop sa maong kagamhanan. Kami dili magakaulaw sa kagamhanan nga tim-os namong ginasugyot alang sa tanang tawo. Kami dili mosibog sa pagwali sa Gingharian, bisan pag tungod sa maong kalihokan maagoman namo ang paglutos. Sama kang apostol Pablo, ang matag usa kanamo magaingon: “Ako wala magakaulaw sa maayong balita.”

14. Sumala kang Jesus, unsa ka kaylap ang pagwali sa Gingharian sa atong adlaw?

¹⁴ Gitagna ni Jesus nga ang pagwali sa maayong balita sa Gingharian maoy sa tibuok-kalibotang gidak-on, ug kining luag, malukopong tagna haom sa maong mensahe. (Marcos 13:10) Siya wala magpanuko sa pagtagna sa pagwali sa Gingharian ni Jehova sa kinalay-ang dapit—oo, ngadto sa mga kinatumyan mismo sa yuta. (Buhat 1:8) Nasayod si Jesus nga bisan diin may mga tawong hikaplagan, ang iyang matinumanong mga sumusunod tim-os nga maningkamot sa pag-abot kanila uban sa maayong balita sa Gingharian.

15, 16. (a) Kinsay angay nga maabot sa maayong balita? (b) Nganong ang buluhatong pagwali mapalampos bisan pa sa paglutos sa organisasyon sa Yawa?

¹⁵ Ang mga molupyo sa yuta karong adlawa nakaabot na sa linibong milyon ug nangakatag sa tanan nga kontinente ug dagkong kaislahan sa kadagatan. Bisan pa niana, walay bahin sa pinuy-anang yuta ang layo kaayo alang sa mga Saksi ni Jehova aron maningkamot nga maabot kini uban sa maayong balita. Ang tanang pinuy-anang yuta mao ang simbolikong tumbanan ni Jehova nga Diyos. (Isaias 66:1) Ang tawhanong mga linalang nga nagapuyo sa bisan unsang bahin sa iyang tumbanan takos nga maabot sa maong mensahe sa kaluwasan.

¹⁶ Ang maayong balita karong adlawa makalipay nga balita bahin sa usa ka harianong kagamhanan nga natukod na diha sa mga kamot sa Mesiyas. Nasayod si Jesus nga bisan pa sa labing mapintas nga paglutos sa bahin sa organisasyon sa Yawa, ang espiritu sa Diyos magadasig sa matuod nga mga sumusunod sa Mesiyas nga mohimo sa labing maarangan aron nga “kining maayong balita sa gingharian” ingong natinong kamatuoran “ikawali sa tibuok nga pinuy-anang yuta.”—Mateo 24:14.

Wala Igakaulaw si Jesu-Kristo ug si Jehova

17. (a) Sa unsa wala magakaulaw ang matuod nga mga magsisimba? (b) Unsang lagda ang gipahayag ni Jesus sa Marcos 8:38, ug unsa ang kahulogan niini?

¹⁷ Ang Labing Hataas nga Diyos wala magpanuko sa paghatag sa iyang kaugalingon ug ngalan, Jehova; ni ang iyang matinumanong mga magsisimba angay magakaulaw nianang ngalana. Ang matuod nga mga magsisimba malipayon nga mahibaloan ug mailhan nga mao ang nagahatag sa wala-mabahing pagsimba ug pagkamasinugtanon kaniya. Mahitungod sa iyang kaugalingon, gipahayag ni Jesus ang lagda, o prinsipyo, sa Marcos 8:38: “Si bisan kinsa nga magakaulaw kanako ug sa akong mga pulong niining mananapawon ug makasasalang kaliwatan, igakaulaw usab siya sa Anak sa tawo inig-abot niya sa himaya sa iyang Amahan uban sa balaang mga manulonda.” Sa susama, si bisan kinsa nga magakaulaw sa Diyos ug Amahan sa Ginoong Jesu-Kristo, angay nga igakaulaw siya ni Jehova. Ug si bisan kinsang linalang nga igakaulaw ni Jehova tungod sa iyang dili-matinumanong kalihokan dili angay magpahimulos sa kinabuhi sa bisan haing bahin sa dominyo sa Diyos sa langit o sa yuta.—Lucas 9:26.

18. (a) Nganong ang mga pulong ni Jesus sa Mateo 10:32, 33 angay masilsil diha sa atong mga kasingkasing ug mga hunahuna? (b) Unsay mahitabo niadtong dili moila kang Jesus ug kang Jehova tungod sa kahadlok sa mga tawo? (Paghatag ug mga pananglitan nga gibase sa potnot.)

¹⁸ Pasagding ang mosunod nga mga pulong ni Jesu-Kristo masilsil diha sa atong mga kasingkasing ug mga hunahuna: “Nan, ang matag usa nga moila nga nahiusa kanako sa atubangan sa mga tawo, pagailhon ko usab ang pakighiusa uban kaniya sa atubangan sa akong Amahan nga anaa sa mga langit; apan si bisan kinsa nga dili moila kanako sa atubangan sa mga tawo, dili ko usab siya ilhon sa atubangan sa akong Amahan nga anaa sa mga langit.” (Mateo 10:32, 33; Lucas 12:8, 9) Sa samang pasikaranan, si bisan kinsa nga dili moila sa Diyos ug Amahan sa Ginoong Jesu-Kristo dili Niya pagailhon. Siya dili isipong takos nga mahimong sakop sa panimalay diin si Jesu-Kristo mao ang pangunang Anak. Busa siya malaglag sa tinudlong panahon sa Diyos.b

19, 20. (a) Nganong kadtong nagaampo nga ang ngalan ni Jehova pagabalaanon walay angay nga igakaulaw? (b) Unsay nalampos sa dili-mahadlokong mga magmamantala sa Gingharian, ug uban sa unsang pagpaluyo?

¹⁹ Ang sulundang pag-ampo nga gitudlo ni Jesus sa iyang mga tinun-an pagatubagon: “Amahan namo sa mga langit, balaana ang imong ngalan. Umanhi ang imong gingharian. Matuman ang imong kabubut-on, maingon sa langit, mao usab sa yuta.” (Mateo 6:9, 10) Sa dihang kana mahitabo, ang mahigugmaong mga tinun-an ni Jesus walay igakaulaw. Ang ngalan ni Jehova pagatahoron, pagabalaanon, dili lamang sa minilyon nga buhi karon nga dili na kinahanglang mamatay kondili sa linibong milyon usab sa katawhan nga iyang pagatawgon gikan sa ilang mga lubnganan panahon sa iyang usa ka libo ka tuig nga pagmando sa Gingharian. Makabaton sila sa higayon nga mabuhi sa usa ka paraisong yuta sa walay kataposan.

²⁰ Nga walay pagkaulaw, kining dimahadlokong mga magmamantala sa maayong balita sa Gingharian nakahimog tibuok-yutang pagpamatuod bisan pa sa tibuok-kalibotang pagsupak kay nakabaton sila sa labaw-tawhanong gahom sa ilang luyo—ang pagpaluyo sa langitnong mga manulonda. Busa, ang mga Saksi ni Jehova “nahadlok sa Diyos ug nagahatag kaniya sa himaya.”—Pinadayag 14:6, 7.

Wala Magakaulaw sa Pagkahadlok sa Diyos ug Paghatag Kaniyag Himaya

21. Unsay wala igakaulaw sa mga Saksi ni Jehova nga buhaton, ug uban ang unsang sangpotanan?

²¹ Ang mga Saksi ni Jehova nagpamatuod nga wala sila magakaulaw sa pagkahadlok sa Diyos ug paghatag kaniyag himaya, nga nagagamit pa sa iyang kaugalingong personal nga ngalan, si Jehova. Kini misangpot sa dili-ikabatbat nga mga panalangin alang kanila. Ang maong mga panalangin miabot ingong matinumanong katumanan sa mga saad sa Labing Hataas nga Diyos. Dako kaayo ang pagkabayaw niya ingong usa ka buhi ug matuod nga Diyos, ang Soberano sa uniberso!

22. Nganong atubangon sa mga Saksi ni Jehova ang mapintasong paglutos, apan unsang kalipay ang mabatonan nila?

²² Sa umaabot, ang sekular nga mga kagamhanan mosumbalik sa relihiyosong mga pagmando ug magapapas kanilang tanan—apil ang Kakristiyanohan—sa pagkahanaw. (Pinadayag 17:16, 17) Busa, ang mga Saksi ni Jehova moatubang unya sa usa ka yugto sa mapintasong paglutos sa kalibotanong mga elemento. Dili sila makaantos ug makalabang niana kon ang walay-kataposang Diyos dili magauban kanila. Apan siya nagauban kanila, ug busa makabaton sila sa kalipay nga makakita nga ang tanang batok-Kristohanon, batok-Jehova nga mga kaaway mangahanaw pinaagi sa Diyos si kinsa ginasimba nga walay-pagtipas sa mga Saksi. Dili sila makaagom sa kaulawan nga iyagyag ug laglagon ingong mga kaaway sa matuod nga teokrasya apan makaagom sa di-ikabatbat nga kalipay sa pag-awit kang Jehova: “Bisan gikan sa panahong walay tino hangtod sa panahong walay tino ikaw mao ang Diyos.”—Salmo 90:2.

23. Nganong ang mga Saksi ni Jehova walay igakaulaw, ug unsay mosangpot?

²³ Sila magmahimayaon diha sa Diyos, ang Amahan ni Jesu-Kristo, nga pinaagi kaniya ang tawhanong banay pagalukaton aron makatagamtam ug kinabuhing walay kataposan diha sa tawhanong kahingpitan ug kalipay sa usa ka paraisong yuta. Pagkagamhanan gayod nga Diyos si Jehova nagpadayag sa iyang kaugalingon pinaagi kang Kristo Jesus! Pagkatahom nga gipasundayag ni Jehova ang iyang kaugalingon nga usa ka maalamon ug mahigugmaong tig-usar, dili tig-abusar, sa iyang labing dakong gahom! Uyon niana, kita walay angay igakaulaw maylabot kaniya o sa iyang bugtong-inanak nga Anak, si Jesu-Kristo. Kita dili maulaw nga mahimong mga magmamantala sa mahimayaong maayong balita, nga nagapahayag sa nagabuntog-sa-tanan nga gahom ni Jehova nga Diyos pinaagi kang Kristo Jesus, kinsa miingon sa kataposang mga takna sa iyang yutan-ong kinabuhi: “Magmaisogon kamo! Gidaog ko ang kalibotan!” (Juan 16:33) Sa pagsubay sa maong dalan, sundon nato sa kanunay ang panig-ingnan ni apostol Pablo, kinsa wala gayod magakaulaw sa maayong balita. Kon himoon nato kana, ang Diyos nga Labing Gamhanan dili magakaulaw kanato.

[Mga footnote]

Mga Pangutana sa Sumaryo

◻ Sama kang apostol Pablo, unsang tinamdan ang angay natong batonan kon bahin sa pagpahayag sa maayong balita, ug ngano?

◻ Nganong ang mensahe nga ginamantala sa mga Saksi ni Jehova mao ang labing maayong balita sukad masukad?

◻ Unsang pasidaan ang gihatag ni Jesus mahitungod kang bisan kinsa nga magakaulaw niya inig-abot niya sa himaya sa Gingharian?

◻ Unsay mahitabo niadtong dili moila kang Jesus ug kang Jehova?

◻ Unsay nalampos sa mga magmamantala sa maayong balita nga wala magakaulaw, ug ngano?