Magpatalinghog sa Sulti sa Espiritu Ngadto sa mga Kongregasyon
“Ang adunay igdulongog magpatalinghog sa sulti sa espiritu ngadto sa mga kongregasyon.”—PINADAYAG 3:22.
Ang impormasyon sa mga panid 10 ngadto 21 gipakigpulong sa Balaang Hustisya Distritong mga Kombensiyon sa mga Saksi ni Jehova sa 1988 ingong unang mga pakigpulong sa symposium nga nag-ulohang “Haduol na ang Tinudlong Panahon.”
1. Unsang mga pulong sa Pinadayag ang maayong balita niining masulob-ong panahon, ug unsa ang “tagna” ug “ang tinudlong panahon” nga gitumong?
MGA pila ka tuig kanhi ang usa ka sosyologo sa Tinipong Bansa mikomento nga ang mga tawo nianang nasora nagbatog dako kaayo nga kagawasan apan kulang ug kalipay. Ang katawhan, midugang siya, “nakakaplag nga ang kalipay wala nila maangkon. Ang paraiso nga gipanaad nila sa ilang kaugalingon nakawang.” Tungod niini, ang mga pulong ni apostol Juan sa Pinadayag 1:3 maoy maayong balita, kay siya nagasugilon kanato kon unsaon pagkaplag ang kalipay. Si Juan misulat: “Malipayon siya nga magabasa sa makusog ug magapatalinghog sa mga pulong niining tagnaa, ug magatuman sa mga butang nahisulat niini; kay ang tinudlong panahon haduol na.” Ang “tagna” nga iyang ginatumong mao ang nahisulat diha sa basahong Pinadayag. Ug “ang tinudlong panahon” mao ang panahon sa diha nga pagatumanon kining tagnaa sa Pinadayag. Ang mga pulong ni Juan may lalom nga kahulogan alang kanato karong adlawa.
2. Unsa kaha ang gikahibulongan ni Juan samtang nagsingabot ang kataposan sa unang siglo?
2 Kapin sa 60 anyos una niya isulat ang basahong Pinadayag, si Juan didto panahon sa Pentekostes sa dihang natukod ang kongregasyon sa dinihogang mga Kristohanon. Karon, sa 96 K.P., kadtong kongregasyona mitubo gikan sa orihinal 120 ka membro niini ngadto sa usa ka dako, internasyonal nga organisasyon. Apan may mga suliran. Sumala sa gipasidaan ni Jesus, Pablo, ug Pedro, misugod sa paggimaw ang mga apostasiya ug mga sekta, ug tinong nahibulong si Juan kon unsa kaha ang umaabot.—Mateo 13:24-30, 36-43; Buhat 20:29, 30; 2 Pedro 2:1-3.
3. Pasalig sa unsa ang mga panan-awon nga nakita ug gisulat ni Juan sa Pinadayag?
3 Nan, labihan gayod ang iyang kalipay sa dihang iyang nadawat “ang usa ka pinadayag ni Jesu-Kristo, nga gihatag kaniya sa Diyos, aron ipakita sa iyang mga ulipon ang mga butang nga duol nang mahitabo.” (Pinadayag 1:1) Sa sunodsunod halangdong mga panan-awon, nakita ni Juan nga mangatuman ang mga katuyoan ni Jehova ug pagagantihan sa kahibulongang paagi ang pagkamainantoson sa matinumanong mga Kristohanon. Nakadawat usab siyag mga mensahe gikan kang Jesus alang sa pito ka kongregasyon; sa pagkamatuod, kini maoy kataposang laktud nga tambag ni Jesus ngadto sa mga Kristohanon una sa Iyang pag-abot diha sa himaya sa Gingharian.
Ang Pito ka Kongregasyon
4. (a) Unsa ang responsabilidad sa matinumanong Kristohanong mga kongregasyon? (b) Unsay gipasabot sa kamatuoran nga ang dinihogang mga ansiano nakita ingong pito ka bituon diha sa tuong kamot ni Kristo?
4 Kining pito ka kongregasyon sa dinihogang mga Kristohanon gihawasan sa pito ka kandiliro, ug ang dinihogang mga ansiano sa ilang taliwala gihawasan sa pito ka bituon diha sa tuong kamot ni Kristo. (Pinadayag 1:12, 16) Pinaagi niining tin-awng hulagway, nakita ni Juan nga ang matinumanong Kristohanong mga kongregasyon maoy mga magdadala sa kahayag, samag nagsigang mga kandiliro diha sa mangitngit nga kalibotan. (Mateo 5:14-16) Ang pagkupot ni Jesus sa mga ansiano diha sa iyang tuong kamot nagpakita nga siya nagaagak sa mga ansiano, nagagiya ug nagamando kanila.
5. Sa adlaw ni Juan kang kinsa gitumong ang mga mensahe ngadto sa pito ka kongregasyon?
5 Si Jesus miingon kang Juan: “Ang imong makita isulat sa usa ka linukot nga basahon ug ipadala kini ngadto sa pito ka kongregasyon, sa Efeso ug sa Smirna ug sa Pergamo ug sa Tiatira ug sa Sardis ug sa Piladelpia ug sa Laodicea.” (Pinadayag 1:11) Kining mga kongregasyona naglungtad gayod sa adlaw ni Juan, ug makatino kita nga sa dihang natapos si Juan sa pagsulat sa Pinadayag, ang matag kongregasyon nakadawat ug kopya. Apan matikdi kon unsay giingon sa Hastings’ Dictionary of the Bible bahin sa Pinadayag: “Halos walay laing basahon sa B[ag-ong] T[ugon] ang gipamatud-an pag-ayo sa ika-2ng siglo.” Kini nagkahulogan nga ang basahong Pinadayag nailhan ug gibasa dili lamang sa pito ka kongregasyon kondili sa daghan pang uban nga buot motuon sa mga pulong sa propesiya. Sa pagkamatuod, ang tambag ni Jesus maoy alang sa tanang dinihogang mga Kristohanon.
6, 7. (a) Kanus-a ilabinang mapadapat ang mga pulong sa Pinadayag, ug sa unsang paagi nasayran nato kini? (b) Kinsa karon ang gihawasan sa pito ka bituon ug sa pito ka kongregasyon?
6 Apan kining mga mensahea ngadto sa pito ka kongregasyon dunay mas dakong aplikasyon. Sa Pinadayag 1:10, si Juan nagaingon: “Pinaagi sa pagdasig ako nahiabot sa adlaw sa Ginoo.” Kining bersikuloha maoy hinungdanong yawi sa pagpadayag sa pagsabot sa Pinadayag. Kini nagapaila nga mapadapat kini ilabina sa “ang adlaw sa Ginoo,” nga nagsugod sa dihang si Jesus nahimong Hari sa 1914. Kining pagsabota gilig-on sa mga mensahe ni Jesus ngadto sa pito ka kongregasyon. Diha kanila atong hikaplagan ang mga ekspresyon sama niining mga pulonga ngadto sa Pergamo: “Ako moanha sa madali.” (Pinadayag 2:16; 3:3, 11) Tapos sa 96 K.P., si Jesus ‘mianhi’ sa dakong paagi sa panahong gipalingkod siya nga Hari sa 1914. (Buhat 1:9-11) Dayon, ingong katumanan sa Malakias 3:1, siya ‘mianhi’ na usab sa 1918, sa dihang siya miabot sa templo ni Jehova aron sa paghukom pag-una sa panimalay sa Diyos. (1 Pedro 4:17) Siya ‘moanhi’ sa makausa pa, sa duol na, sa dihang iyang “ipahamtang ang panimalos diha sa wala makaila sa Diyos ug wala magsugot sa maayong balita mahitungod sa atong Ginoong Jesus.”—2 Tesalonica 1:7, 8; Mateo 24:42-44.
7 Uban niini sa hunahuna, atong masabtan nga ang pito ka kongregasyon nagahulagway sa tanang kongregasyon sa dinihogang mga Kristohanon tapos sa 1914, ug ang pito ka bituon nagahawas sa tanang dinihogang mga ansiano sa maong mga kongregasyon. Dugang pa, ang mga ansiano nga iya sa “ubang mga karnero,” pinaagi sa pagpalugway, anaa usab sa tuong kamot sa paggahom ni Jesus. (Juan 10:16) Ug ang tambag ngadto sa pito ka kongregasyon mapadapat sa prinsipyo ngadto sa tanang kongregasyon sa katawhan sa Diyos karong adlawa sa tibuok kalibotan, apil kadtong gilangkoban sa mga Kristohanon nga may yutan-ong paglaom.
8. Unsang kahimtang ang nakaplagan ni Jesus sa miabot siya sa pagsusi sa nag-angkong mga Kristohanon sa 1918?
8 Sa dihang si Jesus miabot aron sa pagsusi sa nag-angkong mga Kristohanon sa 1918, iyang nakaplagan nga ang dinihogang mga Kristohanon naningkamot kaayo sa pagtuman sa mga pulong sa tagna. Sukad sa katuigang 1870 sila nagpasidaan sa katawhan sa pagkabililhon sa tuig 1914. Dako ang ilang giantos diha sa mga kamot sa Kakristiyanohan panahon sa unang gubat sa kalibotan, ug sa 1918 ang ilang buluhaton halos mihunong sa dihang ang pangunang opisyales sa Watch Tower Society gibilanggo pinasukad sa bakak nga mga sumbong. Apan ang ilang mga kasinatian niadtong panahona motumbas sa mga tagna sa Pinadayag sa kahibulongang gidak-on. Ug ang ilang determinasyon sa pagpamati sa mga pulong ni Jesus ngadto sa pito ka kongregasyon nagpaila nga walay pagduhaduha nga sila lamang ang nagdalag-kahayag nga mga Kristohanon niining mangitngit nga kalibotan. Karong adlawa, kining nahibilin naglangkob sa Juan nga matang nga nagakinabuhi aron makakita ug makaapil sa mga katumanan sa daghang bahin sa Pinadayag.
Tambag ug Pagdayeg
9, 10. Ang pagkatuman sa unsang mga pulong ni Jesus ang naghatag ug dakong kalipay sa modernong-adlawng mga Kristohanon? Ipatin-aw.
9 Sa Pinadayag 3:8, si Jesus miingon ngadto sa kongregasyon sa Piladelpia: “Nasayod ako sa imong mga binuhatan—tan-awa! gibutang ko sa imong atubangan ang pultahan nga inablihan, nga walay makasira—nga ikaw diyutay rag kusog, ug gibantayan mo ang akong pulong ug wala mo ilimod ang akong ngalan.” Lagmit, ang mga Kristohanon sa Piladelpia aktibo, ug sa maong panahon ang pultahan sa kahigayonan giablihan alang kanila.
10 Ang modernong-adlaw nga pagkatuman niining mensahea nakalipay kaayo sa katawhan sa Diyos. Tapos sa ilang masulayong mga kasinatian sa 1918, sila sa espirituwal gipasig-uli, ug sa 1919 giablihan ni Jesus ang usa ka pultahan sa kahigayonan alang kanila. Misulod sila nianang pultahana sa dihang gidawat nila ang gisugong buluhaton nga iwali ang maayong balita sa Gingharian ngadto sa tanang nasod. Tungod kay ang espiritu ni Jehova diha kanila, walay makapugong niining buluhatona, ug kining matinumanong mga Kristohanon nakabaton sa dakong pribilehiyo sa pagtuman sa usa ka dakong bahin sa ilhanan sa pagkaania o presensiya ni Jesus. (Mateo 24:3, 14) Ingong resulta sa ilang matinumanong buluhaton sa pagwali, ang mga nahibilin sa 144,000 gitawag ug gidihogan, ug ang “dakong panon” gitigom sa dagkong mga gidaghanon. (Pinadayag 7:1-3, 9) Pagkadako sa kalipay nga gihatag niini nganha sa katawhan sa Diyos!
11. Sa unsang paagi gisulayan sa mga tigsekta-sekta ang pagdaot sa organisasyon ni Jehova sa adlaw ni Juan, ug sa unsang paagi gihimo nila kana sa atong adlaw mismo?
11 May makahikaw ba kanila sa maong kalipay? Oo. Pananglitan, ang mga ansiano sa Pergamo, bisan pa sa maayong rekord sa pagkamainantoson, wala makapagawas sa pagtulon-an sa sekta sa mga Nicolaita gikan sa kongregasyon. (Pinadayag 2:15) Ang pagsekta-sekta nakahawid. Sa susama, niining kataposang mga adlaw, ang pila ka indibiduwal mibulag sa pagtuo ug misulay sa pagdaot sa organisasyon ni Jehova. Ang mga ansiano sa katibuk-an nagasukol kanila, apan, ikasubo, ang pipila nalimbongan. Hinaot dili gayod nato itugot nga ang mga mibulag sa pagtuo o apostata maghikaw kanato sa atong kalipay!
12. (a) Unsa ang Balaam ug Jezebel nga impluwensiya? (b) Gisulayan ba ni Satanas ang pagpasulod sa Balaam o Jezebel nga impluwensiya sa Kristohanong kongregasyon sa modernong panahon?
12 Nagpasidaan usab si Jesus sa kongregasyon sa Pergamo batok niadtong “nagsunod sa pagtulon-an ni Balaam.” (Pinadayag 2:14) Unsa ba kadtong pagtulon-ana? May nagdaot sa mga Kristohanon sa Pergamo sa samang paagi nga si Balaam nagdaot sa mga Israelinhon sa kamingawan: pinaagi sa pagdasig kanila “sa pagkaon sa mga hinalad ngadto sa mga diyosdiyos ug sa pagpakighilawas.” (Numeros 25:1-5; 31:8) Nagpasidaan si Jesus sa kongregasyon sa Tiatira batok “nianang babayeng si Jesebel.” Kining bayhana usab nagtudlo sa mga Kristohanon “nga makighilawas ug mokaon sa mga hinalad sa mga diyosdiyos.” (Pinadayag 2:20) Si Satanas misulay ba sa pagpasulod sa impluwensiya ni Balaam o ni Jesebel sa Kristohanong kongregasyon karong adlawa? Tinuod nga nakapasulod siya, sa gidak-on nga halos 40,000 sa usa ka tuig ang mapalagpot, ang kadaghanan tungod sa imoralidad. Pagkamakapasubo! Ang mga lalaking sama kang Balaam ug mga babayeng sama kang Jesebel nanukol sa mga ansiano ug nagsulay sa pagdaot sa kongregasyon. Hinaot atong suklan ang maong mahugawng mga impluwensiya uban sa bug-os natong kusog!—1 Corinto 6:18; 1 Juan 5:21.
13. (a) Batbata ang pag-ayad ni Jesus sa pagkadagaang. (b) Nganong dagaang ang mga taga-Laodicea, ug sa unsang paagi malikayan nato ang maong kahuyangan karong adlawa?
13 Sa Pinadayag 3:15, 16 si Jesus miingon ngadto sa kongregasyon sa Laodicea: “Nasayod ako sa imong mga binuhatan, nga ikaw dili mabugnaw o mainit. Maayo untag ikaw mabugnaw o kaha mainit. Busa, tungod kay ikaw dagaang man ug dili mainit o mabugnaw, igasuka ko ikaw gikan sa akong baba.” Pagkatin-aw nga paghubit sa pag-ayad nga gibati ni Jesus sa pagkadagaang! Siya nagpadayon: “Ikaw nagaingon: ‘Ako dato ug nakabatog mga bahandi ug walay nakulang kanako.’” Oo, ang materyalismo nagdaldal sa mga Kristohanon sa Laodicea. Sila nagmatagbawon sa kaugalingon ug dili mabination. Apan si Jesus miingon kanila: “Ikaw wala masayod nga ikaw alaot ug makaluluoy ug kabos ug buta ug hubo.” (Pinadayag 3:17) Buot ba natong mahimong “alaot ug makaluluoy ug kabos ug buta ug hubo” sa mga mata ni Jesus? Siyempre dili! Busa sa bug-os makigbisog kita batok sa pagkahimong materyalistiko o dagaang.—1 Timoteo 6:9-12.
Pag-antos Hangtod sa Kataposan
14. (a) Unsang mga kalisdanan ang giatubang sa kongregasyon sa Smirna? (b) Unsa ang modernong mga katumbas sa mga kasinatian sa Smirna?
14 Ang usa ka kongregasyon nga dili dagaang mao ang sa Smirna. Sa maong mga Kristohanon, si Jesus miingon: “Nasayod ako sa inyong kasakitan ug kakabos—apan kamo dato—ug ang pasipala niadtong nagaingon nga sila mga Hudiyo, ug ngani sila dili apan usa ka sinagoga ni Satanas. Ayaw kalisangi ang mga butang nga sa dili madugay imo nga pagaantoson. Tan-awa! Ang uban kaninyo igabalhog sa Yawa sa bilanggoan aron pagasulayon kamo sa bug-os, ug kamo makabaton ug kasakit sa napulo ka adlaw.” (Pinadayag 2:8-10) Tukma kaayo kini sa kasinatian sa mga Kristohanon karong adlawa! Ang mga Kristohanon karong adlawa, nga dinihogan ug ubang karnero, nagaantos usab sa mabangis nga pagsupak gikan sa “sinagoga ni Satanas” karong adlawa, ang Kakristiyanohan. Sukad sa unang gubat sa kalibotan hangtod karon, libolibong mga lalaki, mga babaye, ug mga bata ang gibunalan, gibilanggo, gisakit, gilugos, o gipatay tungod kay wala mokompromiso sa ilang integridad o pagkamatinumanon.
15, 16. (a) Sa unsang paagi ang dinihogang mga Kristohanon magmalipayon bisan pag nagaantos sa paglutos? (b) Unsang linaing mga ganti ang nagapaabot sa ubang mga karnero sa pagtabang kanila nga magmalipayon usab?
15 Mohatag bag kalipay ang maong mga kasinatian? Dili sa kaugalingon. Apan sama sa mga apostol, ang matinumanong mga Kristohanon nga nagaantos sa mga pagsulay makasinatig dulot nga kalipay sa kahiladman tungod kay “giisip nga takos nga mapakaulawan tungod sa ngalan [ni Jesus].” (Buhat 5:41) Ug sila nagapabiling malipayon bisan unsay buhaton kanila sa ilang mga kaaway kay nasayod sila nga haduol na ang tinudlong panahon nga pagagantihan ang ilang pagkamatinumanon, ug ang ganti dako gayod. Si Jesus miingon ngadto sa mga Kristohanon sa Smirna: “Magpamatuod nga matinumanon bisan hangtod sa kamatayon, ug igahatag ko kanimo ang purongpurong sa kinabuhi.” (Pinadayag 2:10) Ug niadtong sa Sardis siya miingon: “Siya nga magmadaogon pagasul-oban sa mga biste nga maputi; ug dili ko pagapapason ang iyang ngalan gikan sa basahon sa kinabuhi.”—Pinadayag 3:5.
16 Tinuod, kining mga saara tinong mapadapat ngadto sa dinihogang mga Kristohanon, nga nagpahinumdom kanila sa ganting dili-mamatay langitnong kinabuhi nga nagahulat kanila. Apan kadtong iya sa ubang mga karnero mapalig-on usab niining mga pulonga. May ganting giandam usab ni Jehova alang kanila, basta sila madasigon ug moantos. Sila may mahimayaong palaaboton nga makapanunod sa kinabuhing walay kataposan sa usa ka paraisong yuta ubos sa Gingharian diha sa mga kamot ni Kristo. Didto ilang makaplagan ang Paraiso nga wala makaplagi sa katawhan niining kalibotana.
17. Pinaagi sa unsang mga pulong nga gitapos ni Jesus ang matag mensahe, ug unsay kahulogan sa iyang mga pulong alang kanato karong adlawa?
17 Gitapos ni Jesus ang matag usa sa iyang mga mensahe ngadto sa mga kongregasyon pinaagi sa mga pulong: “Ang adunay igdulongog magapatalinghog sa sulti sa espiritu ngadto sa mga kongregasyon.” (Pinadayag 3:22) Oo, kinahanglan kita magapatalinghog ug magasugot sa mga pulong sa Pangulong Magbalantay. Kinahanglang likayan nato ang kahugawan ug apostasiya, ug ipadayon gayod nato ang atong kadasig. Ang pagdawat nato sa ganti nagadepende niana. Ug sa dihang atong palandongon ang dugang impormasyon sa Pinadayag, labaw pa kitang mahimong determinado sa pagbuhat gayod niana.
Ang mga Timri sa Basahon
18. (a)Unsay gidawat ni Jesus sa langitnong hukmanan? (b) Unsay kahulogan sa pagsakay sa tulo ka magkakabayo sa Pinadayag kapitulo 6 alang sa katawhan nga buhi karong adlawa?
18 Sa mga kapitulo 4 ug 5, pananglitan, nakita ni Juan ang usa ka kahibulongang panan-awon sa langitnong hukmanan ni Jehova. Ang Kordero sa Diyos, si Jesu-Kristo, anaa niana, ug ginadawat niya ang usa ka basahon nga may pito ka timri. Sa kapitulo 6, giablihan ni Jesus ang unom sa pito ka timri, nga sunodsunod. Sa dihang giablihan ang una, nakita ang usa ka magkakabayo sa usa ka maputing kabayo. Siya gihatagan sa usa ka purongpurong ug nagkabayo “nga nagapanaog ug sa paghuman sa iyang pagpanaog.” (Pinadayag 6:2) Kini mao si Jesus, ang bag-ong gipurongpurongang Hari. Sa gisugdan niya ang iyang madaogon, harianong pagsakay sa 1914, ang adlaw sa Ginoo misugod. Sa dihang giablihan ang sunod tulo ka timri, mitungha ang tulo pa ka kabayo uban sa mga nagkabayo niana. Kini makahahadlok nga mga pagpadayag, nga nagahawas sa tawhanong pakiggubat, kagutmanan, ug kamatayon pinaagi sa kamatay ug sa ubang hinungdan. Ilang gilig-on ang dakong tagna ni Jesus nga ang iyang langitnong presensiya diha sa harianong gahom pagatiman-an diha sa yuta sa dagkong mga gubat, mga kagutmanan, mga kamatay, mga linog, ug sa ubang katalagman. (Mateo 24:3, 7, 8; Lucas 21:10, 11) Sa pagkamatuod, ang mga Kristohanon kinahanglang magpatalinghog sa mga pulong ni Jesus ngadto sa pito ka kongregasyon aron sila makaantos sa maong panahon.
19. (a) Panahon sa presensiya ni Kristo, unsang ganti ang gihatag ngadto sa matinumanong dinihogang mga Kristohanon nga nangamatay na? (b) Unsang makalilisang nga mga hitabo ang gilandongan sa pagbukas sa ikaunom nga timri, nga misangpot sa unsang pangutana?
19 Sa pag-abli sa ikalimang timri, gipadayag ang usa ka hitabo sa dili-makitang dominyo sa espiritu. Ang dinihogang mga Kristohanon nga nangamatay tungod sa ilang pagtuo gihatagan ang matag usa sa usa ka bisteng maputi. Lagmit, tungod kay natuman na ang presensiya ni Kristo, nagsugod na ang langitnong pagkabanhaw. (1 Tesalonica 4:14-17; Pinadayag 3:5) Dayon giablihan ang ikaunom nga timri, ug “ang yuta,” ang yutan-ong sistema sa mga butang ni Satanas, giuyog sa usa ka dakong linog. (2 Corinto 4:4) “Ang langit” sa tawhanong pagmando ubos sa paggahom ni Satanas gilukot samag karaang basahon, nga andam ilabay. Kay nangalisang, ang rebelyosong mga tawo mopatugbaw sa kawalay-paglaom ngadto sa dagkong mga bato: “Tumpagi kami ug tagoi kami gikan sa nawong sa Usa nga naglingkod sa trono ug gikan sa kapungot sa Kordero, tungod kay miabot na ang dakong adlaw sa ilang kapungot, ug kinsa bay arang makabarog?”—Pinadayag 6:13, 14, 16, 17.
20. Kinsay arang makabarog panahon sa dakong adlaw sa kapungot ni Jehova ug sa Kordero?
20 Ug kinsa bay arang makabarog? Aw, gitubag na ni Jesus kanang pangutanaha. Kadtong “magapatalinghog sa sulti sa espiritu ngadto sa mga kongregasyon” mobarog sa maong dakong adlaw sa kapungot. Ug sa pagpamatuod niini, si Juan nahibalo bahin sa pagtimri sa kataposang mga sakop sa 144,000 ug sa pagtigom sa usa ka dakong panon gikan sa tanang nasod nga makalabang-buhi sa “dakong kasakitan.” (Pinadayag 7:1-3, 14) Apan karon panahon na nga buksan ang ikapitong timri sa basahon ug ipakita kang Juan, ug pinaagi kaniya kanato, ang dugang kulbahinam nga mga panan-awon karong adlawa. Ang sunod nga artikulo mohisgot sa pila niini.
Nahinumdom Ka Ba?
◻ Unsa ang relasyon ni Jesus ug sa mga ansiano sa kongregasyon?
◻ Unsang mga problema ang naatubang sa mga ansiano sa Pergamo ug sa Tiatira, ug sa unsang paagi ang susamang mga suliran nag-apektar sa mga kongregasyon karong adlawa?
◻ Unsang seryosong sayop ang nahimo sa kongregasyon sa Laodicea, ug sa unsang paagi malikayan nato ang susamang sayop karong adlawa?
◻ Sa unsang paagi ang mga Kristohanon kinahanglang mag-antos niining ika-20ng siglo, ug unsang mga saad ni Jesus ang nakatabang nila sa paghimo niana?
◻ Sa unsang paagi makalikay kita sa kadesperado ug kawalay paglaom nga maagoman sa mga nasod sa Armageddon?
[Mga hulagway sa panid 13]
Ang pipila sa matinumanong mga Kristohanon nga nag-antos sa mga kampong konsentrasyon sa Nazi
[Kapsiyon]
DÖW, Vienna, Austria