Nahiabot na ang Takna sa Paghukom sa Diyos

“Kahadloki ninyo ang Diyos ug kaniya ihatag ninyo ang himaya, tungod kay nahiabot na ang takna sa iyang paghukom.”​—PINADAYAG 14:7.

1. Unsay naapil sa unang mga kapitulo sa Pinadayag?

ANG basahong Pinadayag naundan ug kulbahinam nga mga tagna nga natuman sa atong adlaw. Ang miaging artikulo naghisgot sa pipila kanila, apil ang pagbukas sa unom ka simbolikong timri. Kining nabuksang mga timri nagpadayag sa pagkabayo sa upat ka apokaliptikanhong magkakabayo aron manglaglag niining “kataposang mga adlaw.” (2 Timoteo 3:1; Pinadayag 6:1-8) Gihisgotan usab niana kadtong magamando uban ni Kristo sa langit ug kadtong makalabang-buhi sa “dakong kasakitan” aron magapuyo sa yuta sa walay kataposan. Ang unom ka timri nagapadayag nga ang “tinudlong panahon” sa Diyos nga ipatuman ang paghukom “haduol na.”​—Pinadayag 1:3; 7:4, 9-17.

2. Sa unsang paagi pagagamiton ang pito ka simbolikong trompeta sa Pinadayag kapitulo 8?

² Apan adunay usa pa ka timri, ang ikapito. Ang Pinadayag 8:2 nagasugid kanato kon unsay gipadayag sa dihang kini gibuksan: “Ug nakita ko ang pito ka manulonda nga nagtindog sa atubangan sa Diyos, ug gihatagan silag pito ka trompeta.” Ang bersikulo 6 nagaingon: “Ug ang pito ka manulonda nga may pito ka trompeta nangandam sa paghuyop niini kanila.” Sa panahon sa Bibliya, ang mga trompeta gigamit sa pagpahibalo sa hinungdanong mga okasyon. Sa samang paagi, kining pito ka huyop sa trompeta nagaawhag sa pagtagad sa mga butang maylabot sa kinabuhi o kamatayon sa atong panahon. Ug samtang ang mga manulonda nagahuyop sa mga trompeta, ang tawhanong mga Saksi sa yuta nagasunod niana pinaagi sa pagmantala sa halayo sa bililhong balita nga gimantala sa lanog sa matag trompeta.

Kon Unsay Kahulogan sa mga Lanog sa Trompeta

3. Unsa ang kahulogan sa pito ka lanog sa trompeta?

³ Kining mga lanog sa trompeta nagapahinumdom kanato sa mga hampak nga gibubo ni Jehova diha sa karaang Ehipto. Ang maong mga hampak maoy mga ekspresyon o pamahayag sa paghukom ni Jehova niadtong unang gahom sa kalibotan ug sa bakak nga relihiyon niana, apan kana nagbukas usab sa dalan sa kaluwasan alang sa katawhan sa Diyos. Sa susama, ang mga lanog sa trompeta sa Pinadayag maoy modernong-adlawng mga hampak, nga niining panahona diha sa tibuok kalibotan ni Satanas ug sa bakak nga relihiyon niini. Hinuon, sila dili literal nga mga hampak kondili makasakit nga mga mensahe sa mga paghukom ni Jehova. Kana nagapadayag usab sa dalan sa kaluwasan alang sa katawhan sa Diyos.

4. Sa unsang paagi ang pito ka lanog sa trompeta nangatuman sa atong panahon?

⁴ Nahiuyon sa maong pito ka lanog sa trompeta, ang makasakit nga mga resolusyon batok sa kalibotan ni Satanas gihimo sa pito ka espesyal tinuig nga kombensiyon sa katawhan ni Jehova sukad sa 1922 hangtod 1928. Ginatos ka milyong kopya sa mga resolusyon gipanagtag. Bisan pa niana, ang pagpalanog nianang makapasakit nga mga mensahe wala lang himoa niadtong mga tuiga, kondili kini nagapadayon hangtod sa kataposang mga adlaw. Ug karong adlawa ang pagmantala kanila labi pang kusog kay sukad masukad, samtang ang milyonmilyon nga iya sa “dakong panon” nagdugang sa ilang mga tingog ngadto sa gamayng pundok sa mga dinihogan nga unang nagsangyaw tapos sa Gubat sa Kalibotan I. (Pinadayag 7:9) Matag tuig karon, uban sa nagadakong kusog ug gidaghanon, kining milyonmilyon nagapahayag nga ang kalibotan ni Satanas bug-os nahukman na sa kalaglagan.

5. Kinsa ang “ikatulong bahin” sa kalibotan nga unang pagahukman, ug ngano?

⁵ Sa Pinadayag 8:6-12, ang unang upat ka trompeta milanog. Ang ulan-nga-yelo, kalayo, ug dugo gibubo, nga misangpot sa pagkalaglag sa “ikatulong bahin” sa kalibotan. Nganong ang “ikatulong bahin” gihisgotan ingong sad-ang bahin sa kalibotan nga gihukman una? Tungod kay bisan tuod ang tibuok sistema ni Satanas salawayon sa Diyos, ang usa ka bahin labaw nga salawayon. Unsang bahina? Ang bahin nga nagdala sa ngalan ni Kristo​—ang Kakristiyanohan. Ug dihang ang mga mensahe sa paghukom sa Diyos miabot batok kaniya tapos sa Gubat sa Kalibotan I, ang dominyo sa Kakristiyanohan niadtong panahona nagsakop sa mga ikatulong bahin sa katawhan.

6. Nganong si Jehova nagbiya sa Kakristiyanohan ngadto sa kalaglagan?

⁶ Ang relihiyon sa Kakristiyanohan mao ang resulta sa 1,900-tuig-edad nga apostasiya o pagbulag sa pagtuo sa matuod nga Kristiyanidad nga gitagna ni Jesus ug sa iyang mga tinun-an. (Mateo 13:24-30; Buhat 20:29, 30) Ang klero sa Kakristiyanohan nagahawas nga mga magtutudlo sa Kristiyanidad, apan ang ilang mga doktrina halayo kaayo sa kamatuoran sa Bibliya, ug ang ilang hiwing mga buhat padayong nagapakaulaw sa ngalan sa Diyos. Ang ilang pagkasad-an sa dugo tungod sa pagsuportar sa mga gubat niining ika-20ng siglo napadayag. Ang Kakristiyanohan sa bug-os maoy usa ka bahin sa sistema sa mga butang ni Satanas. Busa, siya nagadawat sa kusganon, makapasakit nga mga mensahe gikan ni Jehova nga nagapadayag nga dili gayod siya takos sa balaang kahimuot. Tino nga gibiyaan ni Jehova ang balay sa Kakristiyanohan ngadto sa kalaglagan sama sa iyang gihimo sa Hudiyonhong balay sa unang siglo!​—Mateo 23:38.

Nabuhi Pag-usab Alang sa Tibuok-Yutang Pagwali

7, 8. (a) Sa Pinadayag kapitulo 9, unsay gipadayag sa ikalimang lanog sa trompeta? (b) Kinsay gisimbolohan sa mga dulon?

⁷ Sa Pinadayag 9:1 ang ikalimang manulonda mihuyop sa iyang trompeta, ug ang panan-awon nagpadayag sa usa ka bituon nga nahulog sa yuta. Kining bituona dunay usa ka yawi sa iyang kamot. Pinaagi niana gibuksan niya ang usa ka lungag nga didto ang usa ka panon sa mga dulon. Ang bituon mao ang bag-ong napalingkod langitnong Hari, si Jesu-Kristo. Ang mga dulon maoy mga alagad sa Diyos, nga gilutos ug daw nawagtang sa dihang gibilanggo ang ilang pangulong mga opisyal sa 1918. Apan si Kristo, nga karon nagamando sa Gingharian sa langit, nagabuhi kanila aron sila makapadayon sa ilang tibuok-yutang publikong pagwali, nga gikaguol kaayo sa klero, nga nagsabotsabot aron pukgoon ang ilang buluhaton.​—Mateo 24:14.

⁸ Ang mga dulon gibatbat niining paagiha sa Pinadayag 9:7: “Ug ang mga panagway sa mga dulon daw mga kabayo nga naandam alang sa gubat; ug sa ilang mga ulo dihay morag mga purongpurong nga sama sa bulawan, ug ang ilang mga nawong ingon sa mga nawong sa mga tawo.” Ang bersikulo 10 midugang: “Usab, sila may mga ikog ug mga suyod sama sa mga tanga.” Ang maong mga dulon nagahulagway gayod sa nabuhi pag-usab nga nahibilin sa mga manununod sa Gingharian nga makiggubat na usab sa espirituwal sukad sa 1919 paunahan. Uban ang nabag-o nga kusog, gimantala nila ang makapasakit nga mga mensahe sa paghukom, ilabina batok sa hiwi nga Kakristiyanohan.

9, 10. (a) Unsay gipadayag sa ikaunom nga lanog sa trompeta? (b) Kinsay naapil sa napulo ka libo ka mga napulo ka libong gamhanang mga kabayo?

⁹ Sunod, ang ikaunom nga manulonda mihuyop sa iyang trompeta. (Pinadayag 9:13) Kini nagpadayag sa pagbuhi sa mga panon sa mga mangangabayong kasundalohan. Ang bersikulo 16 nagaingon nga ang ilang gidaghanon maoy “duha ka napulo ka libo ka mga napulo ka libo,” nga maoy 200 milyon! Ug sila gibatbat sa mga bersikulo 17 ug 19 ingon sa mosunod: “Ang mga ulo sa mga kabayo morag mga ulo sa mga leyon, ug gikan sa ilang mga baba nanggula ang kalayo ug aso ug asupre. . . . Ang ilang mga ikog morag mga bitin.” Ang maong mga panon nagadasdas nga daw dalugdog ubos sa pagdumala sa Hari, si Kristo Jesus. Ug makalilisang kaayo sila nga tan-awon!

¹⁰ Unsay gihawasan niining gamhanang mga kabayo? Sanglit ang ilang gidaghanon maoy minilyon, sila dili mahimong mao ang dinihogang nahibilin, nga karon aduna lamay mga 8,800 sa yuta. Ang maong daghan kaayong kabayo nagaapil gayod sa “dakong panon” sa Pinadayag kapitulo 7, kadtong may paglaom sa pagkinabuhing walay kataposan sa yuta. Sa Bibliya, ang pulong “myriad” o napulo ka libo ka mga napulo ka libo kadaghanan nagatumong sa dako kaayo, walay-tinong gidaghanon. Busa, kining simbolikong mga kabayo wala lamang mag-apil sa nagkagamayng gidaghanon sa mga dinihogan kondili sa nagatubo ug nagakakusog ang tingog nga minilyong sakop sa “dakong panon” sa “ubang mga karnero” nga nagapadayon sa publikong buluhaton nga gisugdan sa samag-dulon dinihogang nahibilin.​—Juan 10:16.

11. Nganong ikaingon nga “ang gahom sa mga kabayo anaa sa ilang mga baba,” ug sa unsang paagi sila ‘nagapangdaot pinaagi sa ilang mga ikog’?

¹¹ Ang Pinadayag 9:19 nagaingon: “Ang gahom sa mga kabayo anaa sa ilang mga baba,” ug “pinaagi sa [ilang mga ikog] sila nagapangdaot.” Sa unsang paagi ang gahom anaa sa ilang mga baba? Sa pagkaagi nga sa tinagpulo ka katuigan, pinaagi sa Tunghaan sa Teokratikanhong Ministeryo ug sa ubang mga miting, ang mga alagad sa Diyos gitudloan kon unsaon sa pagwali sa iyang mga mensahe sa paghukom sa gamhanang paagi nga binaba. Ug sa unsang paagi sila nagapangdaot pinaagi sa ilang mga ikog? Sa pagkaaging sila nanagtag ug bilyonbilyong gibase-sa-Bibliya nga mga basahon sa tibuok kalibotan, sa ingon nagbilin sa mosakit nga mga mensahe batok sa kalibotan ni Satanas. Alang sa ilang mga magsusupak, kining mga panon sa mangangabayong kasundalohan daw samag napulo ka libo ka mga napulo ka libo.

12. Unsay ipadayon sa pagbuhat sa simbolikong mga dulon ug mga kabayo, ug uban ang unsang epekto?

¹² Busa, ang simbolikong mga dulon ug mga kabayo kinahanglang magpahayag sa mga mensahe sa paghukom sa Diyos nga mas tin-aw ug kusog samtang nagasingabot ang iyang adlaw sa panimalos. Alang niadtong may matinud-anong kasingkasing, ang maong mga mensahe mao ang labing maayong balita sa yuta. Apan alang niadtong mopalabi sa kalibotan ni Satanas, kana maoy daotang balita, kay kana nagkahulogan nga ang ilang kalibotan duol nang laglagon.

13. “Ang ikatulong kaalaotan” nga nalangkit sa ikapitong lanog sa trompeta nagalangkit sa unsa, ug sa unsang paagi kini usa ka “kaalaotan”?

¹³ Ang nagahampak nga mga dulon ug ang mga panon sa mangangabayong kasundalohan gibatbat ingon nga una ug ikaduha sa tulo ka gihukom sa Diyos nga “mga kaalaotan.” (Pinadayag 9:12; 11:14) Unsa ang “ikatulong kaalaotan”? Sa Pinadayag 10:7 kita giingnan: “Sa mga adlaw sa pagpalanog sa ikapitong manulonda, . . . pagatumanon na ang balaang tinago sa Diyos sumala sa maayong balita nga iyang gipahibalo ngadto sa iyang mga ulipon nga mao ang mga propeta.” Kining balaang sekreto naglangkit sa “binhi” nga unang gisaad sa Eden. (Genesis 3:15) Ang maong “binhi” sa panguna mao si Jesus apan kana nagaapil usab sa iyang dinihogang mga kauban nga magamando kauban niya sa langit. Busa ang balaang tinago maoy kabahin sa langitnong Gingharian sa Diyos. Kining Ginghariana mopatungha sa ikatulong gituyo sa Diyos nga “kaalaotan,” kay kini mopatuman sa bug-os sa mga paghukom sa Diyos batok sa kalibotan ni Satanas.

Ang Gingharian Natukod Na

14. Unsay gipahibalo sa ikapitong lanog sa trompeta sa Pinadayag 11:15?

¹⁴ Unya nahitabo kadto! Ang Pinadayag 11:15 nagaingon: “Ug ang ikapitong manulonda mihuyop sa iyang trompeta. Ug nahitabo ang makusog nga mga tingog sa langit, nga nag-ingon: ‘Ang gingharian sa kalibotan nahimong ang gingharian sa atong Ginoo [Jehova] ug sa iyang Kristo, ug siya magamando ingon nga hari hangtod sa kahangtoran.’” Oo, gipahibalo nga ang Gingharian sa Diyos pinaagi ni Kristo natukod sa langit sa tuig 1914. Ug sa dihang ang nahibilin gibuhi pag-usab human sa Gubat sa Kalibotan I, ilang gipaila ang maong balita.

15. Sa 1922, unsang hitabo ang nagpasidaan sa bag-ong bul-og sa pagwali sa Gingharian?

¹⁵ Sa usa ka 1922 nga kombensiyon sa mga alagad ni Jehova sa Cedar Point, Ohio, U.S.A., ang libolibong mitambong nakadungog sa makapaukyab nga pahibalo: “Kini ang adlaw sa tanang adlaw. Tan-awa, ang Hari nagamando na! Kamo mao ang iyang mga galamiton sa pagmantala. Busa imantala, imantala, imantala, ang Hari ug ang iyang gingharian.” Kadto nagpasugod sa dakong bul-og sa publikong pagwali sa Gingharian nga nag-apil sa mga paghukom nga gimantala sa pito ka tigtrompeta nga manulonda. Karong adlawa, mga tulog tunga sa milyong alagad ni Jehova diha sa kapin ug 57,000 ka kongregasyon sa tibuok kalibotan nalangkit niining tibuok-yutang pagwali sa Gingharian. Tinuod gayong napulo ka libo ka mga napulo ka libo!

16. Sa Pinadayag kapitulo 12, unsang dugang hitabo nga naglangkit sa langit ug yuta ang gipadayag sa ikapitong lanog sa trompeta?

¹⁶ Apan ang pito ka manulonda may dugang ikabutyag. Ang Pinadayag 12:7 nagaingon nga unya “ang gubat miulbo sa langit.” Ang bersikulo 9 nagahatag kanato niining sangpotanan sa aksiyon ni Kristo ang Hari: “Busa gitambog ang dakong dragon, ang unang bitin, ang usang gitawag Yawa ug Satanas, nga nagalimbong sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.” Ang bersikulo 12 nagadugang: “Tungod niini managlipay, kamong mga langit ug kamong nagapuyo niana!” Oo, ang mga langit gihinloan sa impluwensiya ni Satanas, usa ka hinungdan sa dakong paglipay taliwala sa matinumanong mga manulonda. Apan unsay kahulogan niana alang sa katawhan? Kanang samang bersikulo nagatubag: “Alaot ang yuta ug ang dagat, tungod kay ang Yawa nanaog nganha kaninyo, nga may dakong kapungot, kay nahibalo nga siya may hamubo na lamang panahon.”

17. Nganong nahiangay ang paghulagway sa kagamhanan sa kalibotan ingong “usa ka mapintas nga mananap” sa Pinadayag kapitulo 13?

¹⁷ Ang Pinadayag 12:3 nagabatbat kang Satanas ingong ‘usa ka dakong dragon, nga may pito ka ulo ug napulo ka sungay,’ usa ka mangtason mananapon nga manglalaglag. Kini nagapakita nga siya mao ang maglalaraw sa yutan-on politikanhong “mapintas nga mananap” nga gibatbat sa kapitulo 13, bersikulo 1 ug 2. Kanang mananapa usab may pito ka ulo ug napulo ka sungay, nga nagsundog kang Satanas. Ang bersikulo 2 nagaingon: “Ang dragon [Satanas] mihatag sa mananap sa gahom niini ug trono niini ug dakong pagbulot-an.” Tinong nahiangay ang paghulagway sa politikanhong mga kagamhanan ingong mapintas nga mananap, kay niini lang ika-20ng siglo, kapin sa usa ka gatos ka milyong tawo ang gipatay sa mga gubat sa kanasoran.

18. Unsa ang duhag-sungay nga mananap sa Pinadayag 13:11, ug sa unsang paagi ang mga kalihokan niini motabang nga mailhan kini?

¹⁸ Ang sunod nga talan-awon sa Pinadayag 13 nagapadayag, sama sa ginaingon sa bersikulo 11, “sa laing mapintas nga mananap nga migimaw sa yuta, ug kini may duha ka sungay daw nating karnero, apan kini misulti samag dragon.” Kining duhag-sungay nga mananap mao ang Anglo-Amerikanhong politikanhong kombinasyon. Kini samag nating karnero sa pagkaaging kini nagapakaaron-ingnon nga dili-makadaot, labing nalamdagan nga matang sa kagamhanan. Apan nagasulti kining samag dragon, sama kang Satanas, ug gitawag “laing mapintas nga mananap” kay ang mga kalihokan niini sa pagmando maoy sama sa mananap. Kini nagapugos ug nagabahad ug nagagamit pag pakusog sa bisan diin nga dili dinawat ang bersiyon niini sa pagmando. Kini nagadasig, dili sa pagpasakop sa Gingharian sa Diyos, kondili, hinunoa, sa pagpasakop sa kalibotan ni Satanas. Kana ang hinungdan ang bersikulo 14 nagaingon: “Kini nagalimbong niadtong nagapuyo sa yuta.”

19, 20. (a) Unsay gipasundayag sa integridad o pagkamatinumanon sa mga alagad ni Jehova? (b) Sa unsang paagi nasayod kita nga ang dinihogang nahibilin tinong magmadaogon batok sa kalibotan ni Satanas?

¹⁹ Kining kalibotana ubos sa pagmando ni Satanas maoy lisod nga dapit nga puy-an niadtong si kinsa, nga nahiuyon sa sugo ni Jesus ngadto sa matuod nga mga Kristohanon, dili bahin niini. (Juan 17:16) Busa, usa ka talagsaong pasundayag sa gahom ug panalangin ni Jehova nga ang iyang mga alagad sa tibuok kalibotan karong adlawa nagapabiling matinumanon ug padayong nagabayaw kang Jehova ug sa iyang matarong nga mga dalan. Ginabuhat nila kini sa atubangan sa grabeng pagsupak, paglutos, ug bisan sa kamatayon.

²⁰ Ang dinihogang nahibilin ilabina mao ang mga tumong ni Satanas tungod kay sila mahimong kaubang mga magmamando ni Kristo. Apan ang Pinadayag kapitulo 14 nagapakita nga ang bug-os nilang gidaghanon, ang 144,000, madaogong gitigom uban ni Kristo nga nagamando na sa Gingharian. Maunongon silang nagasunod sa ilang Agalon, kay sumala sa ginaingon sa bersikulo 4: “Kini sila mao ang nagapadayon sa pagsunod sa Kordero bisan diin siya moadto”​—kini bisan pa sa mapintas nga paglutos nga gipahinabo ni Satanas diha kanila.

Unang Magadawat sa mga Paghukom sa Diyos

21, 22. (a) Unsang mga pahibalo ang gihimo sa mga manulonda sa Pinadayag 14:7, 8? (b) Nganong ang usa ka manulonda nagapahibalo sa pagkahulog sa relihiyosong Babilonya sa dihang siya nagalungtad pa man?

²¹ Sa Pinadayag 14:7 ang usa ka manulonda mipatugbaw: “Kahadloki ninyo ang Diyos ug kaniya ihatag ninyo ang himaya, tungod kay nahiabot na ang takna sa iyang paghukom, ug busa simbaha ang Usa nga nagbuhat sa langit ug sa yuta ug sa dagat ug sa mga tuboran sa mga tubig.” Kinsay unang magadawat sa dili-maayong paghukom sa Diyos? Ang bersikulo 8 nagatubag: “Ug ang lain, ikaduhang manulonda, misunod, nga miingon: ‘Siya nahulog na! Ang Dakong Babilonya nahulog na, siya nga nagpainom sa tanang nasod sa bino sa kasuko sa iyang pakighilawas!’” Dinhi sa unang panahon, apan dili ang kataposan, ang Pinadayag nagahisgot sa “Dakong Babilonya,” ang tibuok-yutang imperyo sa bakak nga relihiyon.

²² Sanglit ang relihiyon may impluwensiya gihapon sa nagkadaiyang mga bahin sa yuta, nganong ang manulonda nagpahibalo nga nahulog na ang Dakong Babilonya? Aw, unsay misangpot sa 539 W.K.P. sa dihang ang karaang Babilonya nahulog apan wala pa sa bug-os malaglag? Aw, ang nabihag nga mga alagad ni Jehova namalik ngadto sa ilang yutang-natawhan duha ka tuig sa ulahi ug nagpasig-uli sa matuod nga pagsimba! Sa samang paagi, ang pagpasig-uli sa mga alagad sa Diyos ngadto sa nabag-ong kalihokan ug espirituwal nga kauswagan nga nagsugod sa 1919 maoy tin-awng ebidensiya nga niadto, sa 1919, naagoman sa Dakong Babilonya ang pagkapukan sumala sa pag-isip ni Jehova. Niadto iya siyang gihukman sa kalaglagan sa kaulahian.

23. (a) Sa unsang paagi ang dalan naandam alang sa paglaglag sa Dakong Babilonya? (b) Unsang dugang mga tagna ang pagahisgotan sa sunod isyu sa Ang Bantayanang Torre?

²³ Ingong pasiuna sa nagsingabot niyang pagkalaglag, ang modernong Babilonya nahisugamak na sa dakong suliran. Ang iyang kahiwian, dakong imoralidad, pagkadili-matinud-anon, ug politikanhong pag-apil-apil giyagyag sa bisan diin. Sa kinadak-ang bahin sa Uropa, diyutay na lang tawo ang nagasimba. Sa daghang sosyalistang kanasoran, ang relihiyon giisip nga “ang opio sa katawhan.” Gawas pa, ang modernong Babilonya gipakaulawan sa panan-aw sa tanang mahigugmaon sa Pulong sa Diyos sa kamatuoran. Busa karon siya nagahulat, ingnon ta, diha sa atob sa mga patyonon alang sa iyang angayan nga kalaglagan. Oo, “ang tinudlong panahon haduol na” alang sa makapauyog-sa-kalibotan nga mga panghitabo! Ug sa sunod nga isyu sa Bantayanang Torre, ang dugang mga tun-anang artikulo maghisgot sa mga tagna diha sa Pinadayag bahin sa umaabot nga paglaglag sa relihiyosong “bigaon,” ingon man sa tibuok sistema sa mga butang ni Satanas.

Unsay Imong Tubag?

◻ Unsay kahulogan sa atong adlaw sa pito ka lanog sa trompeta nga nagsugod sa Pinadayag kapitulo 8?

◻ Nganong ang Kakristiyanohan mao ang unahon sa paghukom?

◻ Sa unsang paagi ang buluhatong pagwali sa dinihogang nahibilin ug sa “dakong panon” gibatbat sa Pinadayag kapitulo 9?

◻ Unsay kahulogan sa pahibalo sa Pinadayag 11:15 alang sa langit ug sa yuta?

◻ Sumala sa gibatbat sa Pinadayag 14:8, sa unsang paagi ang relihiyosong Babilonya nahulog sa 1919, ug unsay kahulogan niini alang kaniya?