Nganong Nabahin ang Akong Iglesya?

ANG pagbahinbahin taliwala sa Katolikong Iglesya dayag kaayo nga tungod niini daghang sinserong mga Katoliko mibati sama kang apostol Pablo, kinsa misulat sa nabahing mga Kristohanon sa Corinto: “Dayag kaayo nga kamo may giawayan. . . . Nabahin na ba diay si Kristo?”—1 Corinto 1:11, 13, The New Jerusalem Bible.

Daghang mapaniirong mga Katoliko nahibalo kaayo nga angay dili “mabahin” ang Kristiyanidad. Ang mga Katoliko, labaw pa kay sa ubang nagaangkong mga Kristohanon, mahunahunaon sa panaghiusa sa tinuod nga Kristohanong relihiyon. Sila nagtuo nga nagapraktis sila sa nahiusang relihiyon diha sa Katolikong Iglesya. Ilang giisip ang Protestantismo nga makalibog nga panagsagol sa nagkasumpakiayng mga relihiyon. Alang kanila, ang Katolikong Iglesya nagahawas sa kalig-on ug, labaw sa tanan, panaghiusa. Karon sila naglibog.

Nganong Nabahin?

Ang Katolikong Iglesya nabahin tali sa radikal nga mga progresibo, ug konserbatibong mga tradisyonalista, ug sa regular nga Batikano II. Daghang radikal nga matugtanong mga Katoliko nagawalig nagkalainlaing mga teolohiya bahin sa kagawasan nga nagapakamatarong sa politikanhong rebolusyon. Ang uban haduol na kaayo sa pagsagop sa paagi sa Marxismo ug gipakamatarong pa gani ang armadong pag-alsa. Apan, gisultihan sa Tagmugna sa Kristiyanidad ang iyang mga disipulo: “Dili kamo iya sa kalibotan, tungod kay ang pagpili ko kaninyo nakapagawas kaninyo gikan sa kalibotan. . . . Ang akong gingharian dili bahin niining kalibotana.”—Juan 15:19; 18:36, NJB.

Gipanalipdan sa mga tradisyonalista ang hinimog-tawong mga tradisyon ug ang Latin nga liturhiya nga wala mobalik sa mga panahon sa Bibliya, sanglit Grego man ang pinulongan sa karaang Kristiyanidad, dili Latin. Dugang pa, tungod sa ilang pagkamatugoton ug sa ilang pagkaagresibo, dili ba ilang gipanghimakak ang ilang pag-angkon nga mga Kristohanon? Si Henri Fesquet, kolumnista niadto sa relihiyon diha sa mantalaan sa Pransiya nga Le Monde, misulat: “Ang gipakita sa mga Kristohanon [mga Katoliko] nga nagpakaulaway sa usag usa ug nag-awayay batok sa mga simbahan maoy sukwahi nga pamatuod nga mosumbalik ra kanila. Unsay kapuslanang magsangyaw sa ngalan sa Ebanghelyo kon ang mga buhat sa usa ka tawo nagapanghimakak sa kaugalingong mga pulong?”

Gisultihan ni Jesus ang mga Pariseo: “Busa tungod lang sa inyong gikabilinbilin nga kalagdaan, inyong gipakawalay pulos ang pulong sa Diyos.” (Mateo 15:6, The New American Bible) Sama usab nianag gibati ang kadaghanang sinserong mga Katoliko bahin sa modernong-adlawng mga tradisyonalista.

Ang mga progresibo ug ang mga tradisyonalista (tungod sa nagkaatbang nga mga katarongan) nag-isip nga ang konsilyo sa Batikano II nakapatunghag masa sa mahuyang regular nga mga Katoliko. Giinterbiyo sa mga awtor nga si Puyo ug si Van Eersel ang Pranses nga pilosopong Katoliko nga si Jean Guitton, membro sa French Academy. Ilang gisumariya ang iyang mga pagbati sumala sa mosunod: “Ang Kredong Katoliko, ang diwa sa Iglesya, nagkasumpakiay, ang labing mainiton taliwala sa matinumanon debotado kaayo sa politika, ang batan-ong mga Kristohanon [mga Katoliko] kalmadong nakigsekso sa dili pa maminyo, walay usa ang makamao sa pagpadapat sa hustong paagi sa Konsilyo [Batikano], ug ang katawhan sa Diyos naglibog.”

Busa ang sinserong mga Katoliko nangutana, ‘Nganong nabahin ang akong iglesya?’ Ang tubag mao: Tungod kay walay usa sa nagkalainlaing mga pundok niini ang nagtuo sa Bibliya ingong usa ka tinuod nga awtoridad nga makahatag katin-awan sa baroganan sa tinuod nga mga Kristohanon bahin sa tanang butang. Busa nabahin sila sa nagkalainlaing mga teolohiya ug mga interpretasyon sa mga tradisyon.

Unsay Mahimo sa Sinserong mga Katoliko?

Sa usa ka higayon sa 1981, gibungkag sa tradisyonalistang mga Katoliko ang ekumenikal nga serbisyo nga gihimo sa simbahang Katoliko sa Paris. Gisultihan ni Arsobispo (karon Kardinal) Lustiger sa Paris kadtong nagpabilin sa simbahan tapos sa kagubot: “Kita nanganhi dinhi sa pagpangayog mga gasa sa Espiritu nga nagapahiusa sa nagkatibulaag nga mga anak. Hinunoa, nakakita kitag salamin sa pagbahinbahin taliwala sa mga Kristohanon, ang multo sa Babel.”

Ang Babel mao ang dapit nga gilibog sa Diyos ang pinulongan niadtong nagsunod sa bakak nga pagsimba. (Genesis 11:1-9) Sa ulahi, kadtong lugara nahimong siyudad sa Babilonya, ang tinubdan sa naglibog nga mga panteyon sa mga diyosdiyos ug mga diyosa. Sa Bibliya kadto nahimong simbolo sa tibuok-yutang relihiysong sistema sa naglibog nga relihiyon. Ang Theological Wordbook of the Old Testament nag-ingon: “Bisan sa ulahi sa unang siglo A.D., [si apostol] Juan naghisgot sa relihiyosong sistema, ang Babilonya, nga ‘Amahan sa mga babayeng bigaon ug sa mga dulumtanang mga butang sa yuta’ (Pin 17:5).”

Naghisgot niining simbolikong Babilonya, o kalibotanong imperyo sa bakak nga relihiyon, gidapit sa Bibliya ang tanang sinserong mga tawo sa paglihok dayon, nga nagaingon: “Gumula kamo kaniya, katawhan ko, kay basin ug makaapil kamo sa iyang kasal-anan ug makaambit sa iyang mga hampak!”—Pinadayag 18:4, NAB.

Daghang sinserong mga tawo nanagpamiya na sa organisadong mga relihiyon sa Kakristiyanohan. Pananglitan, ang sarado Katoliko niadto nga nagpuyo sa Alps sa Pransiya misulat sa mosunod sa sangang buhatan sa mga Saksi ni Jehova sa Pransiya: “Sumala sa 1,000 ka tuig nga tradisyon sa Katolikong Iglesya, gibawtismohan ako sukad sa pagkatawo sa Katolikong relihiyon. Aktibo akong Katoliko duolan na sa 50 ka tuig. Sa mga 1980, nakombinsir ako nga sayop ang Katolikong Iglesya. Naglibog ako ug nakurat. Daghang higayon nga nakadebati ako sa mga pari nga wala magtahod sa ilang mga panaad. Dugay nang katuigang nakadungog ako bahin sa mga Saksi ni Jehova, ang kadaghanan dili maayo. Tapos sa dugayng yugto sa pagpalandong, akong gibuksan ang pultahan kanila. Ila akong gitabangan sa pagkakita nga nasudlan ang Bibliya sa mga tubag sa atong mga pangutana. Naamgohan ko usab nga tapos sa 50 ka tuig sa aktibong pagserbisyo sulod sa Katolikong Iglesya, wala gayod akoy nahibaloan bahin sa Bibliya, bisag aduna akoy Bibliya. Ang mga Saksi ang mitabang kanako sa ‘pagsabot’ sa Bibliya.”

Si Ginette, nga nagpuyo duol sa Paris, debotado usab nga Katoliko. Sa pagkatinuod, dihang misugod ang iyang bana sa pagtuon sa Bibliya uban sa mga Saksi ni Jehova, iyang gihimo kutob sa iyang maarangan sa pagpahunong kaniya, ug padayon siyang misupak sa daghang mga tuig. Unsay nakapabag-o kaniya? Siya misulat: “Nawad-an akog pagsalig. Wala nay nahimong maayo alang kanako ang iglesya. Busa, mihikay ako ug nawong-sa-nawong nga pagtagbo tali sa akong pari ug sa mga Saksi. Apan akong nakita nga dili makatubag ang pari sa ilang mga pangutana.” Gidawat ni Ginette ang pagtuon sa Bibliya uban sa mga Saksi. Karon siya ug ang iyang bana malipayong nag-alagad sa Diyos sulod sa nahiusa internasyonal nga pamilya sa mga Saksi ni Jehova.

Kon naglibog ug nasubo ka tungod sa mga pagbahinbahin sa imong iglesya, among gidapit kamo sa pagpangayog dugang impormasyon gikan sa Saksi nga nagtagana kanimo ning magasina o pagsulat sa mga editor. Malipay ang mga Saksi ni Jehova sa pagtabang kanimo sa pagkaplag ug mahigugmaon internasyonal nga pamilya sa mga Kristohanon kinsa tinuod nga nahiusa sa ilang pagsimba sa Diyos.

[Blurb sa panid 11]

“Unsay kapuslanang magsangyaw sa ngalan sa Ebanghelyo kon ang mga buhat sa usa ka tawo nagapanghimakak sa kaugalingong mga pulong?”—Mantalaang “Le Monde” sa Pransiya

[Blurb sa panid 12]

“Nakakita kitag salamin sa pagbahinbahin taliwala sa mga Kristohanon, ang multo sa Babel.”—Kardinal Lustiger sa Paris