Pagkalagiw Ngadto sa Kaluwasan sa Wala pay “Dakong Kasakitan”
“Inigkakita ninyo sa Jerusalem nga malibotan sa nagkampong kasundalohan, . . . silang anaa sa Judea pakalagiwa na ngadto sa kabukiran.”—LUCAS 21:20, 21.
1. Nganong dinalian ang pagkalagiw alang niadtong bahin pa sa kalibotan?
ALANG sa tanan nga bahin sa kalibotan ni Satanas, dinalian ang pagkalagiw. Aron makalingkawas sila iniglaglag sa presenteng sistema sa mga butang gikan sa yuta, kinahanglang sila mohatag ug makapakombinsir nga ebidensiya nga malig-on silang nagbarog sa kiliran ni Jehova ug dili na sila bahin sa kalibotan diin si Satanas maoy magmamando.—Santiago 4:4; 1 Juan 2:17.
2, 3. Unsang mga pangutana may kalabotan sa mga pulong ni Jesus nga natala sa Mateo 24:15-22 ang atong hisgotan?
2 Sa iyang dakong tagna mahitungod sa katiklopan sa sistema sa mga butang, gipasiugda ni Jesus ang bililhon nga panginahanglan sa maong pagkalagiw. Kami subsob nga naghisgot sa nahitala diha sa Mateo 24:4-14; bisan pa niana, ang nagsunod niana maoy samang mahinungdanon. Kami nagdasig kaninyo sa pag-abli sa inyong Bibliya karon ug pagbasa sa mga bersikulo 15 hangtod 22.
3 Unsay kahulogan sa maong tagna? Sa unang siglo, unsa ba “ang dulumtanang butang nga magpahinabog pagkaawaaw”? Unsay gipaila sa pagkanaa niini “diha sa balaang dapit”? Unsay kahulogan alang kanato sa maong panghitabo?
“Pagamitag Mailahong Pagpangisip ang Magbabasa”
4. (a) Unsay giingon sa Daniel 9:27 nga mosunod sa pagsalikway sa mga Hudiyo sa Mesiyas? (b) Sa paghisgot niini, nganong, sa dayag, si Jesus miingon, “Pagamitag mailahong pagpangisip ang magbabasa”?
4 Matikdi nga sa Mateo 24:15 si Jesus nagtumong sa kon unsay nahisulat diha sa basahon sa Daniel. Sa kapitulo 9 nianang basahona anaa ang usa ka tagna nga mitagna sa pag-abot sa Mesiyas ug sa paghukom nga ipatuman diha sa Hudiyonhong nasod tungod sa pagsalikway kaniya. Ang naulahing bahin sa bersikulo 27 nag-ingon: “Ug diha sa pako sa dulumtanang mga butang anaa unya ang usa nga magpahinabog pagkaawaaw.” Ang unang Hudiyonhong tradisyon nagpadapat nianang bahina sa tagna ni Daniel ngadto sa pagpasipala ni Antiochus IV sa templo ni Jehova sa Jerusalem sa ikaduhang siglo W.K.P. Apan si Jesus mipahimatngon: “Pagamitag mailahong pagpangisip ang magbabasa.” Ang pagpasipala ni Antiochus IV sa templo, bisan pag tinong dulumtanan, wala mosangpot sa pagkaawaaw—sa Jerusalem, sa templo, o sa Hudiyonhong nasod. Busa dayag nga si Jesus nagpahimatngon sa iyang mga mamiminaw nga ang katumanan niini maoy dili sa nangagi kondili sa umaabot pa.
5. (a) Sa unsang paagi ang usa ka pagtandi sa mga talaan sa Ebanghelyo mobulig kanato sa pag-ila sa unang-siglong “dulumtanang butang”? (b) Nganong si Cestius Gallus sa madali nagpadalag Romanong mga tropa ngadto sa Jerusalem sa 66 K.P.?
5 Unsa ba “ang dulumtanang butang” nga ilang pagabantayan? Mamatikdan nga ang asoy ni Mateo nag-ingon: “Sa dihang inyong malantawan ang dulumtanang butang nga magpahinabog pagkaawaaw . . . nga magabarog diha sa balaang dapit.” Ugaling, ang samang asoy sa Lucas 21:20 mabasa: “Inigkakita ninyo sa Jerusalem nga malibotan sa nagkampong kasundalohan, nan hibaloi nga ang paghimong awaaw niya haduol na.” Sa 66 K.P., ang mga Kristohanon nga nagpuyo sa Jerusalem nakakita sa gitagna ni Jesus. Ang sunodsunod nga mga hitabo nga naglangkit sa panagbangi tali sa mga Hudiyo ug sa Romanong opisyales misangpot sa pagkahimo sa Jerusalem nga pugaran sa pag-alsa batok sa Roma. Ingong sangpotanan, ang kapintasan misilaob sa tibuok nga Judea, Samaria, Galilea, sa Decapolis, ug Fenisya, sa amihanan ngadto sa Sirya, ug sa habagatan ngadto sa Ehipto. Aron mapasig-uli ang usa ka sukod sa kalinaw ngadto nianang bahina sa Romanhong Empiryo, si Cestius Gallus sa madali nagpadalag kasundalohan gikan sa Sirya ngadto sa Jerusalem, nga gitumong sa mga Hudiyo ingong ilang “balaang siyudad.”—Nehemias 11:1; Isaias 52:1.
6. Sa unsang paagi natuman nga ang usa ka “dulumtanang butang” nga nakapahinabog pagkaawaaw ‘nagbarog diha sa balaang dapit’?
6 Naandan sa dakong panon sa Romanong mga sundalo ang pagdalag mga estandarte, o mga bandera, nga giisip nilang sagrado apan giisip sa mga Hudiyo ingong idolatroso. Makaiikag, ang Hebreohanong pulong nga gihubad nga “dulumtanang butang” diha sa basahong Daniel gigamit sa panguna bahin sa mga idolo ug idolatriya.a (Deuteronomio 29:17) Bisan pa sa pagsukol sa mga Hudiyo, ang Romanong mga sundalo nga nagdala sa ilang idolatrosong mga bandera nakasulod sa Jerusalem sa Nobyembre sa 66 K.P. ug dayon misugod sa pagguba sa paril sa templo sa amihanan. Walay duhaduha—ang usa ka “dulumtanang butang” nga makapahinabog bug-os nga pagkaawaaw sa Jerusalem ‘nagbarog diha sa balaang dapit’! Apan sa unsang paagi si bisan kinsa makakalagiw?
Dinalian ang Pagkalagiw!
7. Unsay wala damhang gibuhat sa Romanong kasundalohan?
7 Sa kalit ug sa walay dayag nga hinungdan gikan sa tawhanong punto de bista, sa dihang mipatim-aw nga ang Jerusalem sayon nang mabihag, ang Romanong kasundalohan misibog. Ang Hudiyong mga rebelde migukod sa misibog nga Romanong mga sundalo apan hangtod lamang sa Antipatris, mga 50 kilometros gikan sa Jerusalem. Unya sila namalik ngadto sa Jerusalem. Sa pag-abot sa Jerusalem, sila nagtigom sa templo aron sa pagplano sa ilang dugang nga estratehiya sa pakiggubat. Ang mga batan-on gipangrekluta aron palig-onon ang mga kuta ug mag-alagad sa militaryo. Angay bang mag-apil-apil niini ang mga Kristohanon? Bisan pag sila makalikay niana, sila anaa ba gihapon sa peligrosong dapit inigbalik sa Romanong mga sundalo?
8. Unsang dinaliang lihok ang gihimo sa mga Kristohanon sa pagsunod sa matagnaong mga pulong ni Jesus?
8 Ang mga Kristohanon sa Jerusalem ug sa tibuok Judea sa wala madugay mituman sa matagnaong pasidaan nga gipahayag ni Jesu-Kristo ug mikalagiw gikan sa peligrosong dapit. Dinalian ang pagkalagiw! Sa nahaigong panahon sila nakaabot sa bukirong mga rehiyon, nga ang pipila lagmit nanimuyo sa Pella, sa probinsiya sa Perea. Kadtong misunod sa pasidaan ni Jesus sa pagkahungog wala mamalik aron mosulay pagluwas sa materyal nilang mga kabtangan. (Itandi ang Lucas 14:33.) Nga mibiya ubos nianang mga kahimtanga, ang mabdos nga kababayen-an ug nagpasusong mga inahan tinong nalisdan sa panaw nga nagbaktas. Ang ilang pagkalagiw wala mababagi sa mga pagdili sa adlawng Igpapahulay, ug bisan tuod duol na ang tingtugnaw, kana wala pa moabot. Kadtong misunod sa pasidaan ni Jesus nga mokalagiw dayon sa wala madugay maoy luwas na didto sa gawas sa Jerusalem ug Judea. Nag-agad niana ang ilang mga kinabuhi.—Itandi ang Santiago 3:17.
9. Unsa ka dali nga mibalik ang Romanong kasundalohan, ug unsay sangpotanan?
9 Sa misunod nga tuig mismo, sa 67 K.P., gipadayon sa mga Romano ang pagpakiggubat batok sa mga Hudiyo. Sa sinugdan, ang Galilea ang napukan. Sa misunod nga tuig, ang Judea nagun-ob. Pagka-70 K.P., ang Romanong mga sundalo milibot sa Jerusalem mismo. (Lucas 19:43) Migrabe pag-ayo ang kagutmanan. Kadtong wala makagawas sa siyudad nag-atakehay sa usag usa. Si bisan kinsa nga misulay pag-ikyas gipatay. Ang ilang naagoman maoy, sumala pa ni Jesus, “dakong kasakitan.”—Mateo 24:21.
10. Kon kita mobasa nga may pag-ila, unsa pay atong mamatikdan?
10 Bug-os ba kadtong nagtuman sa gitagna ni Jesus? Wala, umaabot pa ang dugang nga mga panghitabo. Kon, sumala sa gitambag ni Jesus, atong basahon ang Kasulatan nga may pag-ila, sa walay sipyat atong mamatikdan kon unsa pay umaabot. Maugdang usab natong palandongon ang mga kahulogan niana diha sa ato mismong mga kinabuhi.
Modernong-Adlawng “Dulumtanang Butang”
11. Sa unsang laing duha ka kasulatan nga si Daniel naghisgot sa “dulumtanang butang,” ug unsang yugto sa panahon ang ginahisgotan dinha?
11 Matikdi nga, dugang sa atong nakita sa Daniel 9:27, sa Daniel 11:31 ug 12:11, adunay dugang nga mga pagtumong sa “dulumtanang butang nga magpahinabog pagkaawaaw.” Sa bisan hain niining ulahing mga higayon ang pagkalaglag sa Jerusalem wala hisgoti. Ngani, ang giingon sa Daniel 12:11 makita sa duha lamang ka bersikulo human sa pagtumong sa “panahon sa kataposan.” (Daniel 12:9) Kita nagkinabuhi sa maong yugto sa panahon sukad sa 1914. Busa kinahanglang kita magmaigmat sa pag-ila sa modernong-adlawng “dulumtanang butang nga magpahinabog pagkaawaaw” ug unya tinoon nga kita mogawas sa peligrosong dapit.
12, 13. Nganong angay ang pagbatbat sa Liga sa Kanasoran ingong ang modernong-adlawng “dulumtanang butang”?
12 Unsa ba ang maong modernong-adlawng “dulumtanang butang”? Ang ebidensiya mopunting ngadto sa Liga sa Kanasoran, nga nagsugod sa 1920, wala madugay human mosulod ang kalibotan sa iyang panahon sa kataposan. Apan sa unsang paagi kana mahimong “dulumtanang butang nga magpahinabog pagkaawaaw”?
13 Hinumdomi, ang Hebreohanong pulong alang sa “dulumtanang butang” gigamit diha sa Bibliya nga nagtumong ilabina sa mga idolo ug idolatrosong mga buhat. Giidolo ba ang Liga? Sa pagkatinuod giidolo gayod! Ang klero nagbutang niana “diha sa balaang dapit,” ug ang ilang mga sumusunod mihatag niana ug mabinationg debosyon. Ang Pederal nga Konsilyo sa mga Iglesya ni Kristo sa Amerika mipahayag nga ang Liga mamahimong “ang politikanhong kapahayagan sa Gingharian sa Diyos sa yuta.” Ang Senado sa T.B. nakadawat ug baha sa mga sulat gikan sa relihiyosong mga grupo nga miagda niana sa pagratipikar sa Pakigtugon sa Liga sa Kanasoran. Ang katibuk-ang pundok sa mga Baptist, mga Kongregasyonalista, ug mga Presbiteriano sa Britanya nagdayeg niana ingong “ang bugtong magamit nga instrumento sa pagkab-ot ug [kalinaw sa yuta].”—Tan-awa ang Pinadayag 13:14, 15.
14, 15. Sa unsang paagi ang Liga ug sa ulahi ang Hiniusang Kanasoran nahianha “diha sa balaang dapit”?
14 Ang Mesiyanikong Gingharian sa Diyos natukod sa mga langit sa 1914, apan ang mga nasod nakigbisog alang sa kaugalingon nilang pagmando. (Salmo 2:1-6) Sa dihang ang Liga sa Kanasoran gisugyot, ang mga nasod nga bag-o pang nakiggubat sa unang gubat sa kalibotan, ingon man ang klero nga nagbendisyon sa ilang mga tropa, nagpasundayag na nga gibiyaan nila ang balaod sa Diyos. Wala sila mosalig kang Kristo ingong Hari. Sa ingon gihatag nila ngadto sa usa ka tawhanong organisasyon ang papel sa Gingharian sa Diyos; gibutang nila ang Liga sa Kanasoran “diha sa balaang dapit,” usa ka dapit nga wala kini mahisakop.
15 Ingong usa ka kapuli sa Liga, ang Hiniusang Kanasoran misugod paglihok niadtong Oktubre 24, 1945. Sa ulahi, ang mga papa sa Roma nagdayeg sa Hiniusang Kanasoran ingong “ang kataposang paglaom alang sa panag-uyon ug pakigdait” ug “ang kinalabwang tigom sa kalinaw ug hustisya.” Oo, ang Liga sa Kanasoran, duyog sa kapuli niini, ang Hiniusang Kanasoran, tinuod nga nahimong usa ka idolo, usa ka “dulumtanang butang” sa panan-aw sa Diyos ug sa iyang katawhan.
Kalagiw Gikan sa Unsa?
16. Gikan sa unsa nga ang mga nahigugma sa pagkamatarong kinahanglang mokalagiw karong adlawa?
16 ‘Iniglantaw’ niini, inigkaila kon unsa ang maong internasyonal nga organisasyon ug kon sa unsang paagi giidolo kini, ang mga nahigugma sa pagkamatarong kinahanglang mokalagiw ngadto sa kaluwasan. Kalagiw gikan sa unsa? Gikan nianang maoy modernong-adlaw nga antitipo sa di-matinumanong Jerusalem, nga mao, ang Kakristiyanohan, ug gikan sa tibuok nga Dakong Babilonya, ang tibuok-kalibotang sistema sa bakak nga relihiyon.—Pinadayag 18:4.
17, 18. Unsang kalaglagan ang ipahinabo sa modernong-adlawng “dulumtanang butang”?
17 Hinumdomi, usab, nga sa unang siglo, sa dihang ang Romanong kasundalohan uban sa idolatrosong mga estandarte niini nakasulod ngadto sa balaang siyudad sa mga Hudiyo, kadto didto aron ipahinabo ang kalaglagan ngadto sa Jerusalem ug sa iyang sistema sa pagsimba. Sa atong adlaw ang pagkalaglag mahitabo, dili lamang sa usa ka siyudad, ni sa Kakristiyanohan lamang, kondili sa bug-os nga tibuok-kalibotang sistema sa bakak nga relihiyon.—Pinadayag 18:5-8.
18 Sa Pinadayag 17:16, gitagna nga ang usa ka masambingayong sanag-pulang bulok nga mapintas nga mananap, nga napamatud-ang mao ang Hiniusang Kanasoran, mobalitok sa samag-bigaon nga Dakong Babilonya ug mapintasong maglaglag kaniya. Nga nagagamit ug tin-aw nga pinulongan, kini nag-ingon: “Ang napulo ka sungay nga imong nakita, ug ang mapintas nga mananap, kini sila magadumot sa bigaon ug magahimo kaniya nga pinayhag ug hubo, ug magakaon sa iyang unod nga mga bahin ug magaugdaw kaniya pinaagi sa kalayo.” Kon unsay ipasabot niini maoy makalilisang nga palandongon. Mosangpot kini sa kalaglagan sa bakak nga relihiyon sa tanang matang diha sa tanang bahin sa yuta. Kini magpadayag gayod unya nga nagsugod na ang dakong kasakitan.
19. Unsang mga elemento ang bahin sa Hiniusang Kanasoran sukad sa pagkaporma niini, ug nganong kini makahuloganon?
19 Mamatikdan nga sukad ang Hiniusang Kanasoran nagsugod sa paglihok sa 1945, ang ateyistikanhon, batok-relihiyon nga mga elemento maoy iladong mga membro niini. Sa lainlaing mga panahon sa tibuok kalibotan, ang maong radikal nga mga elemento nahimong galamiton sa pagpig-ot pag-ayo kaha o bug-os nga pagdili sa relihiyosong mga tulomanon. Bisan pa niana, sa miaging pipila ka tuig, adunay paghunong sa daghang dapit sa pagpig-ot sa gobyerno sa relihiyosong mga pundok. Alang sa pipila ka tawo mahimong mopatim-aw nga wala na ang kapeligrohan ngadto sa relihiyon.
20. Unsang matang sa dungog ang nahimo sa mga relihiyon sa kalibotan sa ilang kaugalingon?
20 Ang mga relihiyon sa Dakong Babilonya nagpadayon sa pagkahimong mapintason nga samokang puwersa sa kalibotan. Ang mga ulohan sa balita subsob nagpaila sa nagsangkaay nga mga pundok ug teroristang mga grupo pinaagi sa pagngalan sa relihiyon nga ilang gilabanan. Ang mga polis ug mga sundalo para sa rayot kinahanglang mopugos sa pagsulod sa mga templo aron pahunongon ang kapintasan tali sa nag-indigay nga relihiyosong mga pundok. Ang relihiyosong mga organisasyon nagsuportar sa politikanhong rebolusyon. Ang relihiyosong pagdumtanay nagpakyas sa mga paningkamot sa Hiniusang Kanasoran sa paghupot nga padayon sa malig-ong mga relasyon taliwala sa etnikong mga grupo. Sa pagpangagpas sa tumong nga kalinaw ug kasegurohan, ang mga elemento sulod sa Hiniusang Kanasoran buot nga makakita nga mahanaw ang bisan unsang relihiyosong impluwensiya nga nagababag kanila.
21. (a) Kinsay magtino kon kanus-a pagalaglagon ang Dakong Babilonya? (b) Unsay dinalian nga pagabuhaton una pa niana?
21 Adunay lain usab nga hinungdanong butang nga pagatagdon. Bisan pag ang militarisadong mga sungay gikan sa sulod sa Hiniusang Kanasoran pagagamiton aron sa paglaglag sa Dakong Babilonya, ang maong kalaglagan sa pagkatinuod mao unyay usa ka kapahayagan sa balaang paghukom. Ang pagpatuman sa paghukom mahitabo sa tinudlong panahon sa Diyos. (Pinadayag 17:17) Unsay angay natong buhaton kasamtangan? ‘Gumula kaniya’—gumula sa Dakong Babilonya—mao ang tubag sa Bibliya.—Pinadayag 18:4.
22, 23. Unsay nalangkit sa maong pagkalagiw?
22 Kining pagkalagiw ngadto sa kaluwasan maoy dili usa ka pagbalhing geograpiko, sama sa gibuhat sa Hudiyong mga Kristohanon sa dihang mipahawa sa Jerusalem. Kini maoy pagkalagiw gikan sa mga relihiyon sa Kakristiyanohan, oo, gikan sa bisan unsang bahin sa Dakong Babilonya. Nagkahulogan kini sa bug-os nga pagbulag sa kaugalingon dili lamang gikan sa bakak nga relihiyosong mga organisasyon kondili gikan usab sa ilang mga kostumbre ug sa espiritung ilang gipatungha. Kini maoy pagkalagiw ngadto sa luwas nga dapit sulod sa teokratikanhong organisasyon ni Jehova.—Efeso 5:7-11.
23 Sa dihang unang gipaila sa dinihogang mga alagad ni Jehova ang modernong-adlaw nga dulumtanang butang, ang Liga sa Kanasoran, human sa Gubat sa Kalibotan I, unsay sanong sa mga Saksi? Ila nang natangtang ang ilang pagkamembro sa mga iglesya sa Kakristiyanohan. Apan sa inanay ilang naamgohan nga sila nagsunod pa sa pipila ka kostumbre ug mga tulomanon sa Kakristiyanohan, sama sa paggamit sa krus ug pagsaulog sa Pasko ug ubang paganong mga pangilin. Sa dihang nasayran nila ang kamatuoran bahin niining mga butanga, sila milihok dayon. Ilang gipamatian ang tambag sa Isaias 52:11: “Talikod, talikod, gumula gikan dinha, ayaw paghikap sa bisan unsang mahugaw; gumula gikan sa iyang taliwala, hupti ang inyong kaugalingon nga hinlo, kamo nga nagadala sa mga sudlanan ni Jehova.”
24. Sukad ilabina sa 1935, kinsay mikuyog sa pagkalagiw?
24 Sukad ilabina sa 1935, ang nagdakong panon sa uban pa, nga mga tawong midawat sa palaaboton nga mabuhing walay kataposan sa usa ka paraisong yuta, misugod sa paglihok nga susama. Sila usab ‘nakalantaw sa dulumtanang butang nga nagbarog diha sa balaang dapit,’ ug ilang nailhan kon unsay kahulogan niini. Human sa paghimo sa ilang desisyon nga mokalagiw, ilang gipapala ang ilang mga ngalan gikan sa mga talaan sa mga membro sa mga organisasyon nga bahin sa Dakong Babilonya.—2 Corinto 6:14-17.
25. Unsay gikinahanglan gawas pa sa pagkaputol sa bisan unsang mga koneksiyon nga tingali nabatonan sa usa ka tawo uban sa bakak nga relihiyon?
25 Bisan pa niana, ang pagkalagiw gikan sa Dakong Babilonya wala lamang maglangkit sa pagbiya sa bakak nga relihiyon. Adunay labaw pa kay sa pagtambong ug pipila ka tigom sa usa ka Kingdom Hall o paggawas sa pagsangyaw sa maayong balita sa kanataran sa pag-alagad kausa o kaduha sa usa ka bulan. Ang usa ka tawo tingali sa lawasnon anaa sa gawas sa Dakong Babilonya, apan tinuod ba nga iya kanang gibiyaan? Siya ba mismo nakabulag na gikan sa kalibotan diin ang Dakong Babilonya maoy usa ka iladong bahin? Siya ba nagsunod gihapon nianang mga butang nga nagpabanaag sa espiritu niini—usa ka espiritu nga naglapas sa matuod nga mga sukdanan sa Diyos? Ginaisip ba niyang dili ugdang ang seksuwal nga moralidad ug pagkamaunongon sa kaminyoon? Gipasiugda ba niya ang personal ug materyal nga intereses nga labaw pa kay sa espirituwal nga intereses? Kinahanglang dili niya itugot nga siya maumol sumala niining sistemaha sa mga butang.—Mateo 6:24; 1 Pedro 4:3, 4.
Ayaw Itugot nga May Makababag sa Imong Pagkalagiw!
26. Unsay motabang kanato nga dili lamang mosugod sa pagkalagiw kondili sa pagkompleto niana nga malamposon?
26 Sa atong pagkalagiw ngadto sa kaluwasan, kinahanglang dili kita motan-aw nga may pagkawili sa mga butang sa luyo. (Lucas 9:62) Kinahanglang atong itisok ang atong mga alimpatakan ug mga kasingkasing diha sa Gingharian sa Diyos ug sa iyang pagkamatarong. Determinado ba kitang magpasundayag sa atong pagtuo pinaagi sa pagpangita una niini, nga may pagsalig nga panalanginan ni Jehova ang maong matinumanong dalan? (Mateo 6:31-33) Ang atong gibase-sa-Kasulatan nga mga kombiksiyon angayng magdasig kanato ngadto nianang tumonga samtang maikagon natong gipaabot ang pagkadayag sa makahuloganong mga panghitabo sa kalibotan.
27. Nganong hinungdanon ang pagpalandong nga ugdang bahin sa mga pangutanang gisukna dinhi?
27 Ang pagpatuman sa balaang paghukom mosugod sa paglaglag sa Dakong Babilonya. Kanang samag-bigaon nga empiryo sa bakak nga relihiyon pagapapason sa walay kataposan. Duol na kaayo ang maong panahon! Unsa kaha unya ang atong kahimtang sa atubangan ni Jehova ingong mga indibiduwal inig-abot nianang halandumong panahon? Ug sa tayuktok sa dakong kasakitan, sa dihang laglagon ang nahibiling bahin sa tuman-kadaotang sistema ni Satanas, sa haing kiliran kita makaplagan? Kon himoon nato ang gikinahanglang lihok karon, tino ang atong kaluwasan. Si Jehova nagsulti kanato: “Mahitungod sa usa nga nagapamati kanako, siya magpuyo sa kasegurohan.” (Proverbio 1:33) Pinaagi sa pagpadayon sa pag-alagad kang Jehova nga maunongon ug malipayon panahon sa katiklopan niining sistemaha, kita basin mahimong takos sa pag-alagad kang Jehova sa walay kataposan.
[Footnote]
a Tan-awa ang Insight on the Scriptures, nga gipatik sa Watchtower Bible and Tract Society of New York, Inc., Tomo 1, mga panid 634-5.
Nahinumdom Ka Ba?
◻ Unsa ang modernong-adlawng “dulumtanang butang”?
◻ Sa unsang diwa “ang dulumtanang butang . . . diha sa balaang dapit”?
◻ Unsay nalangkit sa pagkalagiw ngadto sa kaluwasan karon?
◻ Nganong dinalian ang maong lihok?
[Hulagway sa panid 16]
Aron maluwas, ang mga sumusunod ni Jesus kinahanglang mokalagiw nga walay langan